ବାଲେଶ୍ୱର: ବାଲେଶ୍ୱର ଜିଲ୍ଲା ବସ୍ତା ଥାନା ଗାନ୍ଧିଛକ-ବାଲିଆପାଳ ପେଜଗଳା ନିକଟରେ ସିରିଜ ଦୁର୍ଘଟଣା । ୧୦ ଆହତ ମେଡିକାଲରେ ଭର୍ତ୍ତି । ୪ଗୁରୁତରଙ୍କୁ ବାଲେଶ୍ବର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଅଟୋ, କାର ଓ ବାଇକ୍ ସିରିଜ ଦୁର୍ଘଟଣା ହେବା ପରେ ଅଟୋଟି ରାସ୍ତା ତଳକୁ ଚାଲିଯାଇଥିଲା । କାରଟି ରାସ୍ତା କଡରେ ପିଟି ହୋଇ ରହିଯାଇଛି । ଘଟଣାସ୍ଥଳରୁ ସମସ୍ତ ଆହାତଙ୍କୁ ବସ୍ତା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ପରେ ୪ ଜଣଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ବାଲେଶ୍ଵର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ବସ୍ତା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ଅପହରଣ ନୁହେଁ, ନିଜ ଇଚ୍ଛାରେ ସ୍କୁଲରୁ ଯାଇଥିଲେ ଦୁଇ ଛାତ୍ର
ଭୁବନେଶ୍ବର: ଭୁବନେଶ୍ବର ଚନ୍ଦକା ଅଞ୍ଚଳରୁ ଦୁଇ ନାବାଳକ ଅପହରଣ ମାମଲା । ସାମ୍ନାକୁ ଆସିଲା ଅପହରଣର ପ୍ରକୃତ ସତ । ଅପହରଣ ନୁହେଁ, ନିଜ ଇଚ୍ଛାରେ ସ୍କୁଲରୁ ଯାଇଥିଲେ ଦୁଇ ଛାତ୍ର । ଅପହରଣ କାହାଣୀର ସତ ସାମ୍ନାକୁ ଆଣିଲେ ଚନ୍ଦକା ଥାନା ପୋଲିସ । ଗତ ତିନିଦିନ ତଳେ ଚନ୍ଦକାର ଏକ ଘରୋଇ ସ୍କୁଲରୁ ନିଖୋଜ ହୋଇଥିବା ଦୁଇ ଦଶମ ଶ୍ରେଣୀ ଛାତ୍ରଙ୍କ ସତ ଧରିଛି ସିସିଟିଭି । ଦୁଇ ଜଣ ଅଟୋରୁ ଓହ୍ଲାଉଥିବା ଦୃଶ୍ୟ ସିସିଟିଭିରେ କଏଦ ହୋଇଥିଲା । ହେଲେ ଦୁଇଜଣ ନାବାଳକଙ୍କୁ କିଡନାପ କରାଯାଇଥିବା ଥାନାରେ ଅଭିଯୋଗ ହୋଇଥିଲା ।
କିଏ କହୁଥିଲା ଗୁଣି ଗାରେଡ଼ି ସନ୍ଦେହ ତ ଆଉ କିଏ କହୁଥିଲା ଆନ୍ତଃରାଜ୍ୟ ପିଲା ଚୋର ଗ୍ୟାଙ୍ଗ ତାଙ୍କୁ ଅପହରଣ କରିନେଇଛି। କିନ୍ତୁ ଭରତପୁର ଛକ ଏବଂ ଫାୟାର ଷ୍ଟେସନ୍ ଛକରେ ଲାଗିଥିବା ସିସିଟିଭି କ୍ୟାମେରାରୁ ଦୃଶ୍ୟ କଏଦ ହେବା ପରେ ଦୁଇ ନାବାଳକଙ୍କୁ ଅପହରଣ ନୁହେଁ ବୋଲି ସ୍ପଷ୍ଟ କରିଛି ଚନ୍ଦକା ଥାନା ପୋଲିସ ।
ଟ୍ରେନ୍ ଲାଇନକୁ ମାଡ଼ିଗଲା ଘରୋଇ ବସ୍
ସମ୍ବଲପୁର: ସମ୍ବଲପୁର କୋଲକାତା-ମୁମ୍ବାଇ ଜାତୀୟ ରାଜପଥରେ ଦୁର୍ଘଟଣା । ଲକ୍ଷ୍ମୀ ଡୁଙ୍ଗୁରୀରେ ଘରୋଇ ବସ୍ ଦୁର୍ଘଟଣା ହୋଇଛି । ଭାରସାମ୍ୟ ହରାଇ ରେଳ ଲାଇନ ନିକଟକୁ ମାଡ଼ିଗଲା ଯାତ୍ରୀବାହୀ ବସ । ସୌଭାଗ୍ୟ ବଶତଃ ବସର ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି । ଖବର ପାଇ ସଙ୍ଗେ ସଙ୍ଗେ କ୍ରେନ୍ ସାହାଯ୍ୟରେ ଦୁର୍ଘଟଣା ଗ୍ରସ୍ତ ରେଳ ଲାଇନ ନିକଟରୁ କଢ଼ାଯାଇଛି । କିଛି ସମୟ ପାଇଁ ରେଳ ଚଳାଚଳ ବାଧାପ୍ରାପ୍ତ ହୋଇଥିଲା । ଉଦ୍ଧାର କାର୍ଯ୍ୟ ପରେ ଏବେ ସ୍ବାଭାବିକ ହୋଇଛି ଟ୍ରେନ୍ ଚଳାଚଳ ।
ମନୀଷ ସିସୋଦିଆ ଓ ଅନ୍ୟ ଅଭିଯୁକ୍ତଙ୍କର ୫୨ କୋଟି ଟଙ୍କାର ସମ୍ପତ୍ତି ସିଜ୍
ନୂଆଦିଲ୍ଲୀ: ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ଓ ଅନ୍ୟ ଅଭିଯୁକ୍ତଙ୍କର ୫୨ କୋଟି ଟଙ୍କାର ସମ୍ପତ୍ତି ସିଜ୍ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ । ପୂର୍ବରୁ ଦିଲ୍ଲୀ ହାଇକୋର୍ଟ ମନୀଷ ସିସୋଦିଆକୁ ଦିଲ୍ଲୀ ଅବକାରୀ ନୀତି ଦୁର୍ନୀତି ମାମଲାରେ ଜାମିନ ଦେବାକୁ ମନା କରିଦେଇଥିଲେ ।
ଏହି ଅପରାଧ ଗୁରୁତର ବୋଲି କୋର୍ଟ ଦର୍ଶାଇଛନ୍ତି । ୧୧ ଲକ୍ଷ ଟଙ୍କା ଥିବା ମନୀଷ ସିସୋଦିଆଙ୍କର ବ୍ୟାଙ୍କ ଆକାଉଣ୍ଟ ମଧ୍ୟ ସିଜ କରାଯାଇଛି । ମନୀଷ ସିସୋଦିଆ ଏବଂ ତାଙ୍କ ପତ୍ନୀଙ୍କ ସହ ଜଡ଼ିତ ଦୁଇଟି ସମ୍ପତ୍ତି ସହ ଅନ୍ୟତମ ଅଭିଯୁକ୍ତ ରାଜେଶ ଯୋଶୀ, ଗୌତମ ମଲହୋତ୍ରାଙ୍କ ସମ୍ପତ୍ତି ମଧ୍ୟ ଆଟାଚ କରାଯାଇଛି । ମଦ ଦୁର୍ନୀତି ମାମଲାରେ ସିବିଆଇ ଓ ଇଡି ବାରମ୍ବାର ପଚରାଉଚରା କରିବା ପରେ ଦିଲ୍ଲୀ ଏକ୍ସାଇଜ୍ ପଲିସି ମାମଲାରେ ମନୀଷ ସିସୋଦିଆଙ୍କୁ ଫେବୃଆରୀରେ ଗିରଫ କରାଯାଇଥିଲା । ଏପଟେ ଆମ ଆଦମୀ ପାର୍ଟି ଏହାକୁ ଏକ ବଡ଼ ଷଡ଼ଯନ୍ତ୍ର ବୋଲି କହିଛି । ସିବିଆଇ ଯେଉଁ ସମ୍ପତ୍ତି ଆଟାଚ କରିଛି ତାହା ଦିଲ୍ଲୀ ମଦ ନୀତି ଆସିବା ପୂର୍ବରୁ ମନିଷ କିଣି ଥିଲେ ବୋଲି କହିଛି ଆମ ଆଦମୀ ପାର୍ଟି ।
ଆଜି ୫ ଜିଲ୍ଲାରେ ପ୍ରବଳ ବର୍ଷା, ସାମାନ୍ୟ ଭିଜିବ ଉପକୂଳ
ଭୁବନେଶ୍ବର: ଆଜି ପାଞ୍ଚ ଜିଲ୍ଲାରେ ପ୍ରବଳ ବର୍ଷା । ସାମାନ୍ୟ ଭିଜିବ ଉପକୂଳ ଓ ଆଭ୍ୟନ୍ତରୀଣ ଓଡ଼ିଶା । ରାଜ୍ୟରେ ସକ୍ରିୟ ରହିଛି ନିମ୍ନ ମୌସୁମୀ ଚାପରେଖା । ରାଜସ୍ଥାନରୁ ବାହାରି ବାଲେଶ୍ବର ଦେଇ ପୂର୍ବ କେନ୍ଦ୍ରୀୟ ବଙ୍ଗୋପସାଗର ପର୍ଯ୍ୟନ୍ତ ଲମ୍ବିଛି । ଏହାସହ ପଶ୍ଚିମବଙ୍ଗ ଓ ଉତ୍ତର ଓଡ଼ିଶା ପାର୍ଶ୍ବବର୍ତ୍ତୀ ଅଞ୍ଚଳରେ ଏକ ଘୁର୍ଣ୍ଣିବଳୟ ସକ୍ରିୟ ରହିଛି । ପ୍ରଭାବରେ ଆଜି ପାଞ୍ଚଟି ଜିଲ୍ଲାରେ ପ୍ରବଳ ବର୍ଷା ନେଇ ୟେଲୋ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର ।
ସୁନ୍ଦରଗଡ, ଦେବଗଡ, କେନ୍ଦୁଝର, ରାୟଗଡା ଏବଂ କନ୍ଧମାଳରେ ୭୦ ରୁ ୧୧୦ ମିଲିମିଟର ଯାଏଁ ବର୍ଷା ହେବାର ସମ୍ଭାବନା ରହିଛି । ସେହିଭଳି ଆସନ୍ତାକାଲି ଉତ୍ତର ଓଡ଼ିଶାରେ ପ୍ରବଳ ବର୍ଷା ସମ୍ଭାବନା ଥିବା ବେଳେ ଉପକୂଳ ଏବଂ ଆଭ୍ୟନ୍ତରୀଣ ଓଡ଼ିଶାରେ ସମାନ୍ୟରୁ ମଧ୍ୟମ ଧରଣର ବର୍ଷା ହେବ ।
ବାହାନଗା ଟ୍ରେନ୍ ଟ୍ରାଜେଡି, ୫ ଦିନିଆ ରିମାଣ୍ଡରେ ଗଲେ ୩ ଅଭିଯୁକ୍ତ
ଭୁବନେଶ୍ୱର: ୫ ଦିନିଆ ରିମାଣ୍ଡରେ ଗଲେ ବାହାନଗା ଟ୍ରେନ ଟ୍ରାଜେଡି ମାମଲାରେ ଗିରଫ ତିନି ଅଭିଯୁକ୍ତ । ରିମାଣ୍ଡ ପାଇଁ ଅନୁମତି ଦେଇଛନ୍ତି ଭୁବନେଶ୍ବର ସ୍ପେଶାଲ ସିବିଆଇ କୋର୍ଟ । କ୍ୟାପିଟାଲ ହସ୍ପିଟାଲରେ ତିନି ଅଭିଯୁକ୍ତଙ୍କ ସ୍ବାସ୍ଥ୍ୟ ପରୀକ୍ଷା ପରେ କୋର୍ଟରେ ହାଜର କରାଯାଇଥିଲା । ରିମାଣ୍ଡ ଶେଷ ପରେ ୧୧ ତାରିଖରେ ପୁଣି ଅଭିଯୁକ୍ତଙ୍କୁ କୋର୍ଟରେ ହାଜର କରାଯିବ । ସେକ୍ସନ ଇଞ୍ଜିନିୟର ଅରୁଣ କୁମାର ମହାନ୍ତ, ସେକ୍ସନ ଇଞ୍ଜିନିୟର ମହମ୍ମଦ ଅମିର ଖାନ୍ ଏବଂ ଟେକନିସିଆନ ପପୁ କୁମାରଙ୍କୁ ଗିରଫ କରିଛି ସିବିଆଇ । ଦୁର୍ଘଟଣାର ଠିକ୍ ୩୫ ଦିନରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି ସିବିଆଇ । ସିଆରପିସି ୩୦୪ ଓ ୨୦୧ ଧାରାରେ ସେମାନଙ୍କୁ ଗିରଫ କରାଯାଇଛି । ମାମଲାରେ ସିବିଆଇ ତଦନ୍ତ କରୁଥିବା ବେଳେ ଏହ ପ୍ରଥମ କାର୍ଯ୍ୟାନୁଷ୍ଠାନ । ସେମାନଙ୍କ ବିରୋଧରେ ଗୁରୁତର ଅବହେଳାରୁ ସଙ୍ଗୀନ ଦୁର୍ଘଟଣା ଏବଂ ପ୍ରମାଣ ନଷ୍ଟ କରିଥିବା ଅଭିଯୋଗ ରହିଛି ।
ସିଗନାଲିଂ ତ୍ରୁଟି ଯୋଗୁଁ ଏଭଳି ଘଟଣା ଘଟିପାରେ ବୋଲି ତିନି ଅଭିଯୁକ୍ତ ପୂର୍ବରୁ ଜାଣିଥିଲେ । ତଥାପି ଏହାର ଠିକ୍ ପରିଚାଳନା ନେଇ ଦାୟିତ୍ବବାନ ନଥିଲେ । ଜୁନ ୨ରେ ସଂଧ୍ୟା ବେଳେ କରମଣ୍ଡଳ ଏକ୍ସପ୍ରେସ ବାହାନଗାରେ ଦୁର୍ଘଟଣା ଗସ୍ତ ହୋଇଥିଲା । ସିଗନାଲିଂ ଭୁଲ ଥିବାରୁ ଏକ ମାଲଗାଡିକୁ ଧକ୍କା ଦେଇଥିଲା ଟ୍ରେନ୍ । ଏଥିରେ ୨୯୩ ଜଣଙ୍କ ମୃତ୍ୟୁ ହୋଇଥିଲା । ଦେଶର ସବୁଠୁ ବଡ଼ ଦୁର୍ଘଟଣା ମଧ୍ୟରୁ ଏହି ଦୁର୍ଘଟଣା ଅତି ଭୟଙ୍କର ଥିଲା । ଏଭଳି ଘଟଣାର ସିବିଆଇ ତଦନ୍ତ ପାଇଁ କେନ୍ଦ୍ର ରେଳମନ୍ତ୍ରାଳୟ ସୁପାରିସ କରିଥିଲା । ତାପରଠାରୁ ସିବିଆଇ ବାହାନଗା ଆସିବା ସହ ବିଭିନ୍ନ ଦିଗରୁ ତଦନ୍ତ ଜାରି ରହିଥିଲା ।
ଚତୁର୍ଥ ଜାତୀୟ ଜଳ ପୁରସ୍କାର ୨୦୨୨ ବିଜେତାଙ୍କୁ ସମ୍ବର୍ଦ୍ଧିତ କଲେ ମୁଖ୍ୟମନ୍ତ୍ରୀ
ଭୁବନେଶ୍ୱର: ଚତୁର୍ଥ ଜାତୀୟ ଜଳ ପୁରସ୍କାର ୨୦୨୨ ବିଜେତାଙ୍କୁ ଦିଆଯାଇଛି ସମ୍ବର୍ଦ୍ଧନା । ଲୋକସେବା ଭବନରେ ଆୟୋଜିତ କାର୍ଯ୍ୟକ୍ରମରେ ବିଜେତାଙ୍କୁ ସମ୍ବର୍ଦ୍ଧିତ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଜାତୀୟ ସ୍ତରରେ ଦ୍ବିତୀୟ ଶ୍ରେଷ୍ଠ ରାଜ୍ୟ ଭାବେ ଜଳ ପୁରସ୍କାର-୨୦୨୨ ପାଇଛି ଓଡ଼ିଶା । ସେହିଭଳି ଶ୍ରେଷ୍ଠ ଜିଲ୍ଲା ବର୍ଗରେ ଗଞ୍ଜାମ ଜିଲ୍ଲାକୁ ପ୍ରଥମ ଜଳ ପୁରସ୍କାର-୨୦୨୨ ପ୍ରଦାନ କରାଯାଇଥିଲା । ରାଜ୍ୟ ପକ୍ଷରୁ ଜଳସମ୍ପଦ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଅନୁ ଗର୍ଗ ଏବଂ ସର୍ବୋଚ୍ଚ ଯନ୍ତ୍ରୀ ଭକ୍ତ ରଞ୍ଜନ ମହାନ୍ତି ପୁରସ୍କାର ଗ୍ରହଣ କରିଥିଲେ । ସେହିଭଳି ଗଞ୍ଜାମ ଜିଲ୍ଲା ପକ୍ଷରୁ ଜିଲ୍ଲାପାଳ ଦିବ୍ୟଜ୍ୟେତି ପରିଡ଼ା ଏବଂ ଟିମ୍ ପୁରସ୍କାର ଗ୍ରହଣ କରିଥିଲେ । ସମସ୍ତଙ୍କୁ ଅଭିନନ୍ଦନ ଜଣାଛନ୍ତି ମୁଖ୍ୟମନ୍ତ୍ରୀ ।
ରାଜ୍ୟସ୍ତରରେ ଓଡ଼ିଶା ଏବଂ ଜିଲ୍ଲାସ୍ତରରେ ଗଞ୍ଜାମ କର୍ତ୍ତୃପକ୍ଷ ଅବିଶ୍ବସନୀୟ କାର୍ଯ୍ୟକରି ସମସ୍ତଙ୍କ ପାଇଁ ଉଦାହରଣ ପାଲଟିଛନ୍ତି । 5T ମାଧ୍ୟମରେ ଓ୍ବାଟର କନରଭେସନ କ୍ଷେତ୍ରରେ ସ୍ବଚ୍ଛତା ଅଣାଯାଇଛି । ସମସ୍ତଙ୍କ ମିଳିତ ଉଦ୍ୟମ ପାଇଁ ଓଡ଼ିଶା ସାରା ଦେଶ ଏବଂ ବିଶ୍ବ ପାଇଁ ରୋଲ୍ ମଡେଲ ପାଲଟିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି । ଜଳ ସମ୍ପଦ ସୁରକ୍ଷା କ୍ଷେତ୍ରରେ ଗତ ୪ ବର୍ଷରେ ସରକାର ମଞ୍ଜୁର କରିଛନ୍ତି ୪୬ ହଜାର କୋଟିର ପ୍ରକଳ୍ପ । ଏଥିସହ ଜଳସମ୍ପଦର ବିକାଶ ପାଇଁ ଆସନ୍ତା ୫ ବର୍ଷରେ ୭୫ ହଜାର କୋଟିର ପୁଞ୍ଜି ଲଗାଣ ଲକ୍ଷ୍ୟ ରଖାଯାଇଛି ।
ସୁସ୍ଥ ଆଖିରେ ଦୁନିଆ ଦେଖିବ ପଦ୍ମଲୋଚନ, ଚିକିତ୍ସା ପାଇଁ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ମିଳିଲା ୩୦ ହଜାର ଟଙ୍କା ସହାୟତା
ସୁବର୍ଣ୍ଣପୁର: ସୁସ୍ଥ ଆଖିରେ ଦୁନିଆ ଦେଖିବ ପଦ୍ମଲୋଚନ । ଆଖିର ଚିକିତ୍ସା ପାଇଁ ୩ ଦିନ ଭିତରେ ମିଳିଲା ସହାୟତା । ଚିକିତ୍ସା ପାଇଁ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ମିଳିଲା ୩୦ ହଜାର ଟଙ୍କା ସହାୟତା । ଗତ ୪ ତାରିଖ ଦିନ 5T ସଚିବ ଭିକେ ପାଣ୍ଡିଆନ ସୁବର୍ଣ୍ଣପୁର ଜିଲ୍ଲା ଗସ୍ତ କରିଥିଲେ । ଖଲିଆପାଲି ଗାଁର ହରି ନାଗଙ୍କ ପୁଅ ପଦ୍ମଲୋଚନ ନାଗ ତାଙ୍କୁ ଭେଟି ନିଜର ଆଖିର ଚିକିତ୍ସା ପାଇଁ ସହାୟତା ଯୋଗାଇ ଦେବାକୁ ଅନୁରୋଧ କରିଥିଲେ । ପରେ ସୁବର୍ଣ୍ଣପୁର ଜିଲ୍ଲାପାଳଙ୍କୁ ତୁରନ୍ତ ଚିକିତ୍ସା ପାଇଁ ସହାୟତା ଯୋଗାଇଦେବାକୁ କହିଥିଲେ 5T ସଚିବ । ଆଜି ସୁବର୍ଣ୍ଣପୁର ଜିଲ୍ଲାପାଳ ବିମଳେନ୍ଦୁ ରଏ ଶିଶୁଟିର ଚିକିତ୍ସା ପାଇଁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ୩୦ ହଜାର ଟଙ୍କା ଯୋଗାଇ ଦେଇଛନ୍ତି । ଏଥିପାଇଁ ହରି ନାଗଙ୍କ ପରିବାର ଲୋକ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି ।
IPS ସ୍ତରରେ ଅଦଳବଦଳ, କ୍ରାଇମବ୍ରାଞ୍ଚ IG ହେଲେ ସଫିନ୍ ଅହମ୍ମଦ କେ
ଭୁବନେଶ୍ୱର: IPS ସ୍ତରରେ ଅଦଳବଦଳ କରିଛନ୍ତି ରାଜ୍ୟ ସରକାର । କ୍ରାଇମବ୍ରାଞ୍ଚ IG ହେଲେ ସଫିନ୍ ଅହମ୍ମଦ କେ । ୨୦୦୭ ବ୍ୟାଚର ଆଇପିଏସ୍ ସାର୍ଥକ ଷଡ଼ଙ୍ଗୀ ହେଲେ ଅଗ୍ନିଶମ ଓ ହୋମଗାର୍ଡ DIG । ସେହିପରି ସତ୍ୟଜିତ ନାୟକ ହେଲେ ଡିଆଇଜି, HRPC, କଟକ SP ହେଲେ ମିହିର କୁମାର ପଣ୍ଡା ଓ ନୟାଗଡ଼ SP ଭାବରେ ରାଜୁଲ ଜୈନଙ୍କୁ ଦାୟିତ୍ୱ ଦିଆଯାଇଛି । ଅନ୍ୟପକ୍ଷରେ କଟକ SP ଜେ.କେ ବାନୋଥଙ୍କୁ ହେଡକ୍ୱାଟର AIG ଭାବେ ବଦଳି କରାଯାଇଛି ।
ରାଜ୍ୟ କଂଗ୍ରେସକୁ ଘାରିଛି ଘର ସଜଡ଼ା ଚିନ୍ତା, ଲୋକଙ୍କ ବିଶ୍ୱାସ ଜିତିବାକୁ ମାନସମନ୍ଥନ
ଭୁବନେଶ୍ୱର: କାହିଁକି ରସାତଳକୁ ଗଲା କଂଗ୍ରେସ ସଂଗଠନ ? କ’ଣ କଲେ ତୃଣମୂଳସ୍ତରରେ ପୁଣି ଉଠିବ ହାତ ? ସମୟ କମ୍, ଚ୍ୟାଲେଞ୍ଜ୍ ଅଧିକ । ୨୦୨୪ରେ ଭଲ ପ୍ରଦର୍ଶନ ପାଇଁ କଂଗ୍ରେସ ନେତାଙ୍କ ମାନସମନ୍ଥନ । ଗାଁ ଗାଁରେ ସଂଗଠନକୁ ମଜଭୁତ କରିବା ପାଇଁ ପିସିସି ସଭାପତି ଶରତ ପଟ୍ଟନାୟକଙ୍କ ନେତୃତ୍ବରେ ପ୍ରଦେଶ କଂଗ୍ରେସ କାର୍ଯ୍ୟାଳୟରେ ଦଳର ହେଭିଓ୍ବେଟ୍ ଏକାଠି ହୋଇଛନ୍ତି । ବିଧାୟକ, ପୂର୍ବତନ ବିଧାୟକ, ପୂର୍ବତନ ପିସିସି ସଭାପତି, ସଂଗଠନର ବିଭିନ୍ନ ପଦ ପଦବୀରେ ଥିବା ନେତା ଏକାଠି ବସି ଲମ୍ବା ରୋଡମ୍ୟାପ୍ ପ୍ରସ୍ତୁତ କରିଛନ୍ତି । ୯ ରୁ ୯୦ ମିଶନକୁ ସଫଳ କରିବା ପାଇଁ ଦଳ ବହୁ କାର୍ଯ୍ୟକ୍ରମ ହାତକୁ ନେଇଥିବା ପିସିସି ସଭାପତି କହିଛନ୍ତି ।
୨୦୦୦ ମସିହାରେ ରାଜ୍ୟରେ କଂଗ୍ରେସର ଭୋଟ୍ ହାର ୩୩.୮ ପ୍ରତିଶତ ଥିଲା । ୨୦୨୩ରେ ଏହା ୯.୬ ପ୍ରତିଶତକୁ କମିଛି । ଗତ ପଞ୍ଚାୟତ, ପୌର ଓ ସମବାୟ ନିର୍ବାଚନରେ କଂଗ୍ରେସକୁ ଲାଗିଛି ବଡ଼ ଝଟକା । ୮ଟି ଉପନିର୍ବାଚନରେ କେବଳ ବ୍ରଜରାଜନଗରକୁ ଛାଡ଼ି କଂଗ୍ରେସ ସବୁଠି ଅମାନତ ହରାଇଛି । ଏପରି ସ୍ଥିତିରେ ତୃଣମୂଳସ୍ତରରେ ସଂଗଠନକୁ ମଜଭୁତ କରିବା ପାଇଁ ନେତାଙ୍କୁ ଚିନ୍ତା ଘାରିଛି ।
୨୦୧୯ରେ ବିଧାନସଭା ନିର୍ବାଚନରେ ଏକ ଅଙ୍କରେ ସୀମିତ ଥିବା କଂଗ୍ରେସ ୨୦୨୪ରେ ଭଲ ପ୍ରଦର୍ଶନ ପାଇଁ ସମରସଜ୍ଜା ଆରମ୍ଭ କରଛି । ତେବେ ଉପର ସ୍ତରର ନିଷ୍ପତ୍ତି ଗ୍ରାଉଣ୍ଡରେ କାର୍ଯ୍ୟକାରୀ କରିବା ମଙ୍ଗୁଆଳଙ୍କ ପାଇଁ ଚ୍ୟାଲେଞ୍ଜ୍ ବୋଲି ରାଜନୈତିକ ସମୀକ୍ଷକ କହିଛନ୍ତି ।