ନୂଆଦିଲ୍ଲୀ: ତୁଟିବ କି ସୀମା ବିବାଦ । LACକୁ ଫେରିବ କି ସ୍ବାଭାବିକ ସ୍ଥିତି । ଆସନ୍ତାକାଲି ଭାରତ ଓ ଚୀନ ମଧ୍ୟରେ ହେବ କମାଣ୍ଡରସ୍ତରୀୟ ଆଲୋଚନା । LAC ବିବାଦର ସମାଧାନ ପାଇଁ ୧୯ତମ ଦ୍ବିପାକ୍ଷିକ କୋର କମାଣ୍ଡରସ୍ତରୀୟ ବୈଠକ ବସିବାକୁ ଯାଉଛି । ଲଦାଖର ଚୁସୁଲ-ମୋଲ୍ଡ ବର୍ଡ଼ରରେ ଉଭୟ ଦେଶ ମଧ୍ୟରେ କଥାବାର୍ତ୍ତା ହେବ । ଲେଫ୍ଟନାଣ୍ଟ ଜେନେରାଲ ରସିମ ବାଲି ଭାରତୀୟ ପ୍ରତିନିଧି ଦଳର ନେତୃତ୍ବ ନେବେ । ତାଙ୍କ ସହ ବୈଦେଶିକ ମନ୍ତ୍ରାଳୟ ଓ ଆଇଟିବିପିର ବରିଷ୍ଠ ଅଧିକାରୀମାନେ ଉପସ୍ଥିତ ରହିବେ । ୪ ମାସ ପରେ ଦୁଇ ଦେଶର ସେନାଙ୍କ ମଧ୍ୟରେ ବୈଠକ ବସିବାକୁ ଯାଉଛି । ଏଥିରେ ପୂର୍ବ ଲଦାଖର ଡେପସାଙ୍ଗ ଓ ଡେମଚୋପ ଅଞ୍ଚଳରୁ ସେନା ପ୍ରତ୍ୟାହାର ପାଇଁ ଚୀନକୁ ଭାରତ ପ୍ରସ୍ତାବ ଦେବ । ତେବେ ପୂର୍ବର ଏକାଧିକ ବୈଠକରେ ଭାରତର ଏହି ଦାବିକୁ ଚୀନ ଖଣ୍ଡନ କରିଆସୁଛି । ବୈଠକରେ ଦୁଇ ଦେଶ ମଧ୍ୟରେ ଶାନ୍ତି ବଜାୟ ରଖିବା ସହ ଦ୍ବିପାକ୍ଷିକ ସମ୍ପର୍କ ସୁଧାରିବାକୁ ପ୍ରୟାସ କରାଯିବ । ସୀମା ସ୍ଥିତି ନେଇ ବି ଆଲୋଚନା ହେବ । ୪ ବର୍ଷ ହେବ ଦୁଇ ଦେଶ ମଧ୍ୟରେ ସୀମା ବିବାଦ ଲାଗିରହିଛି । ୨୦୨୦ ଜୁନରେ ଗଲୱାନ ଘାଟିରେ ଦୁଇ ଦେଶର ସୈନ୍ୟ ମୁହାଁମୁହିଁ ହୋଇଥିଲେ । ଏଥିରେ ୨୦ ଜଣ ଭାରତୀୟ ଯବାନ ସହିଦ ହୋଇଥିବା ବେଳେ ଅନେକ ଚୀନ ସୈନ୍ୟ ନିହତ ହୋଇଥିଲେ । ଏହା ପରଠୁ ଉଭୟ ଦେଶ ଭିତରେ ଦ୍ବିପାକ୍ଷିକ ସମ୍ପର୍କରେ ତିକ୍ତତା ସୃଷ୍ଟି ହୋଇଥିଲା । ଲଦାଖରେ ଏବେ ବି ଉଭୟ ଦେଶ ୫୦ ହଜାରରୁ ଅଧିକ ସୈନ୍ୟ ଓ ଅତ୍ୟାଧୁନିକ ଯୁଦ୍ଧାସ୍ତ୍ର ମୁତୟନ କରିଛନ୍ତି ।
ପୁଣି ଅଡ଼ୁଆରେ ଟ୍ରମ୍ପ
ଓ୍ବାଶିଂଟନ: ପୁଣି ଅଡୁଆରେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ନିର୍ବାଚନ ଫଳାଫଳକୁ ପ୍ରଭାବିତ କରିବା ଅଭିଯୋଗ ମାମଲାରେ କାଠଗଡ଼ାରେ ଟ୍ରମ୍ପ । ଆସନ୍ତା ସପ୍ତାହରେ ଟ୍ରମ୍ପଙ୍କ ବିଚାର ହେବ । ଯଦି ସେ ଏହି ମାମଲାରେ ଦୋଷୀ ସାବ୍ୟସ୍ତ ହୁଅନ୍ତି ତାହେଲେ ଗତ ୫ ମାସରେ ଏହା ତାଙ୍କର ଚତୁର୍ଥ ଦୋଷୀ ସାବ୍ୟସ୍ତ ଘଟଣା ହେବ। ଆସନ୍ତା ୨୦୨୪ରେ ରାଷ୍ଟ୍ରପତି ନିର୍ବାଚନ ଲାଗି ଟ୍ରମ୍ପ ପ୍ରାର୍ଥୀ ହେବାକୁ ଯାଉଥିବାବେଳେ ବାରମ୍ବାର ଦୋଷୀ ସାବ୍ୟସ୍ତ ହେବା ଘଟଣା ତାଙ୍କ ଲାଗି ସମସ୍ୟା ସୃଷ୍ଟି କରୁଛି । ୨୦୨୦ ରାଷ୍ଟ୍ରପତି ନିର୍ବାଚନର ଫଳାଫଳକୁ ବେଆଇନ ଭାବେ ପ୍ରଭାବିତ କରିବା ଲାଗି ଉଦ୍ୟମ କରିଥିଲେ । ହୋଇଥିବା ଅଭିଯୋଗର ଶୁଣାଣି ଆସନ୍ତା ସପ୍ତାହରେ ଜର୍ଜିଆର ଜଣେ ବିଚାରପତି କରିବେ । ଜଣେ ନିର୍ବାଚନ ଅଧିକାରୀ ବ୍ରାଡ ରାଫେନସ୍ପର୍ଜରଙ୍କ ନିକଟକୁ ଟ୍ରମ୍ପ ଫୋନ କରି ତାଙ୍କ ସପକ୍ଷରେ ଅଧିକ ଭୋଟ କରାଇଦେବା ଲାଗି କହିଥିଲେ ବୋଲି ଟ୍ରମ୍ପଙ୍କ ବିରୋଧରେ ହୋଇଥିଲା ଅଭିଯୋଗ । ଶୁଣାଣିରେ ସାକ୍ଷ୍ୟ ଦେବାକୁ କେତେକ ବ୍ୟକ୍ତିଙ୍କୁ ନିର୍ଦ୍ଦେଶ ଦିଆଯାଇଥିବା ସୂଚନା ମିଳିଛି ।
ନିର୍ବାଚନ ଫଳାଫଳ ପ୍ରଭାବିତ କରିବା ଲାଗି ହୋଇଥିବା ଅଭିଯୋଗର ଶୁଣାଣି କରି କିଛି ଦିନ ତଳେ ଓ୍ବାଶିଂଟନ ଫେଡେରାଲ କୋର୍ଟ ଟ୍ରମ୍ପଙ୍କୁ ଅଭିଯୁ୍କ୍ତ ଦର୍ଶାଇଥିଲେ । ଜଣେ ପର୍ଣ୍ଣଷ୍ଟାରଙ୍କୁ ଚୁପ୍ ରହିବା ଲାଗି ଅର୍ଥ ପ୍ରଦାନ କରିଥିବା ମାମଲାରେ ବି ଟ୍ରମ୍ପଙ୍କୁ କିଛି ମାସ ତଳେ ମାନହଟ୍ଟନ କୋର୍ଟ ମଧ୍ୟ ଦୋଷୀ ସାବ୍ୟସ୍ତ କରିଥିଲେ ।ଆସନ୍ତା ନିର୍ବାଚନରେ ରିପବ୍ଲିକାନ ପାର୍ଟି ପକ୍ଷରୁ ଟ୍ରମ୍ପ ରାଷ୍ଟ୍ରପତି ପ୍ରାର୍ଥୀ ହେବାକୁ ଯାଉଥିବାବେଳେ ଏହି ସମସ୍ତ ଅଭିଯୋଗକୁ ଟ୍ରମ୍ପ ଖଣ୍ଡନ କରିଛନ୍ତି । ଏସବୁ ଡେମୋକ୍ରାଟିକ ପାର୍ଟିର ଷଡ଼ଯନ୍ତ୍ର ବୋଲି ସେ ଦର୍ଶାଇଛନ୍ତି ।
ସ୍ନାନ ସମୟରେ ସମୁଦ୍ରରେ ବୁଡ଼ି ଯାଇଥିବା ପର୍ଯ୍ୟଟକ ଉଦ୍ଧାର
ପୁରୀ: ପୁରୀ ସେକ୍ଟର-5 ଭେଳାଭୂମିରେ ସ୍ନାନ ସମୟରେ ବୁଡିଯାଉଥିଲେ ପର୍ଯ୍ୟଟକ । ବୁଡ଼ି ଯାଇଥିବା ପର୍ଯ୍ୟଟକଙ୍କୁ ଉଦ୍ଧାର କଲେ ଅଗ୍ନିଶମ କର୍ମଚାରୀ ଓ ଲାଇଫ ଗାର୍ଡ଼ । ତେବେ ପର୍ଯ୍ୟଟକ ଜଣକ ବଞ୍ଚିଥିବା ଅଗ୍ନିଶମ ବିଭାଗ ପକ୍ଷରୁ ସୂଚନା ଦିଆଯାଇଛି । ତାଙ୍କୁ ପ୍ରାଥମିକ ଚିକିତ୍ସା ପରେ ମେଡିକାଲରେ ଭର୍ତ୍ତି କରାଯାଇଛି । ଏପର୍ଯ୍ୟନ୍ତ ତାଙ୍କ ପରିଚୟ ମିଳିନାହିଁ । ସ୍ନାନ ସମୟରେ ବୁଡ଼ି ଯାଉଥିବା ଦେଖି ଉପସ୍ଥିତ ଲୋକେ ପାଟି କରିବା ପରେ ଉଦ୍ଧାର କରାଯାଇଥିବା ଜଣାପଡ଼ିଛି ।
ସୁପରସଣ୍ଡେରେ ସୁପର ଫାଇଟ୍
ନୂଆଦିଲ୍ଲୀ: ଓ୍ବେଷ୍ଟଇଣ୍ଡିଜ୍ ବିପକ୍ଷରେ ଅନ୍ତିମ ଟି-୨୦ ମ୍ୟାଚ ଖେଳିବ ଭାରତ । ୫ ମ୍ୟାଚ ବିଶିଷ୍ଟ ଟି-୨୦ ସିରିଜ ୨-୨ରେ ରହିଛି । ଉଭୟ ଦଳ ୨ଟି ଲେଖାଏଁ ମ୍ୟାଚ ଜିତିଥିବାବେଳେ ଆଜି ଅନ୍ତିମ ମ୍ୟାଚ ଖେଳାଯିବ । ଟିମ ଇଣ୍ଡିଆ ପ୍ରଥମ ୨ଟି ମ୍ୟାଚରେ ପରାଜୟ ହୋଇଥିଲେ ସୁଦ୍ଧା ଦମଦାର କମବ୍ୟାକ କରିଛି । ଶନିବାର ଖେଳାଯାଇଥିବା ଚତୁର୍ଥ ଟି-୨୦ରେ ଶୁଭମନ ଗିଲ ଏବଂ ଜସସ୍ବୀ ଜୟସ୍ବାଲଙ୍କ ଅର୍ଦ୍ଦଶତୀୟ ପାଳି ବଳରେ ଦଳ ପାଣ୍ଡ୍ୟା ବାହିନୀ ଏକ ସହଜ ବିଜୟ ହାସଲ କରିଛି । ଅନ୍ତିମ ମ୍ୟାଚରେ ବିଜୟ ସହ ସିରିଜ ହାତେଇବା ଲକ୍ଷ୍ୟରେ ରହିଛି ଟିମ୍ ଇଣ୍ଡିଆ ।
ସୀମା ଜଗିବ ହେରନ ମାର୍କ, ବର୍ଡରରେ ବାୟୁସେନାର ଶକ୍ତି ବଢ଼ାଇବ ଡ୍ରୋନ୍
ନୂଆଦିଲ୍ଲୀ: ସୀମା ସୁରକ୍ଷା ସୁନିଶ୍ଚିତ କରିବ ଡ୍ରୋନ । ଚୀନ, ପାକିସ୍ତାନ ସୀମା ଉପରେ ନଜର ରଖିବ ହେରନ ମାର୍କ । ଉଚ୍ଚ କ୍ଷମତା ସମ୍ପନ୍ନ ଡ୍ରୋନରେ ସର୍ଭେଲାନ୍ସ ସହ ଷ୍ଟ୍ରାଇକ କରିବାର କ୍ଷମତା ରହିଛି । ଏହି ଡ୍ରୋନରେ ଦୂରଗାମୀ କ୍ଷେପଣାସ୍ତ୍ର ଏବଂ ଅନ୍ୟ ଅସ୍ତ୍ରଶସ୍ତ୍ର ଖଞ୍ଜାଯାଇପାରିବ । ଜାମ୍ମୁ-କାଶ୍ମୀର ଉତ୍ତର ସେକ୍ଟରର ଫରଓ୍ବାର୍ଡ ଏୟାରବେସରେ ଏହି ଡ୍ରୋନ ମୁତୟନ କରାଯାଇଛି । ସାଟେଲାଇଟ୍ ଯୋଗାଯୋଗ କ୍ଷମତା ବିଶିଷ୍ଟ ଡ୍ରୋନଗୁଡିକ ଭାରତୀୟ ବାୟୁସେନାର ଶକ୍ତିକୁ ବୃଦ୍ଧି କରିଛି । ପ୍ରଥମ ଥର ଲାଗି ବାୟୁସେନାକୁ ଏହି ଡ୍ରୋନ ମିଳିଛି । ସବୁପ୍ରକାର ସର୍ଭେଲାନ୍ସରେ ଏହାକୁ ବ୍ୟବହାର କରାଯାଇପାରିବ । ସୀମା ସେପଟୁ ଆସୁଥିବା ଡ୍ରୋନ, ଶତ୍ରୁର ଗତିବିଧି ଉପରେ ଏହି ଡ୍ରୋନ କଡ଼ା ନଜର ରଖିବ । ଦୀର୍ଘ ଦୂରତାରେ ଏହି ଡ୍ରୋନ୍ ଲଗାତାର ୩୬ ଘଣ୍ଟା ଧରି କାର୍ଯ୍ୟ କରିପାରିବ । ଶତ୍ରୁର ଲକ୍ଷ୍ୟକୁ ଦେଖିବା ସହ ଫାଇଟର ଏୟାରକ୍ରାଫ୍ଟ ଏହାକୁ ଧ୍ବଂସ କରିବାରେ ସହଯୋଗ କରିବ ବୋଲି ବାୟୁସେନା ପକ୍ଷରୁ କୁହାଯାଇଛି ।
ବାହାରେ ଅଳିଆ ପକାଉଥିଲେ ସାବଧାନ, ଏଣିକି ଭୁବନେଶ୍ବରର ଗଳିକନ୍ଦିରେ ବୁଲିବ ଟିମ୍ ସାଇନ
ଭୁବନେଶ୍ବର: ଏଣିକି ରାଜଧାନୀ ଗଳିକନ୍ଦିରେ ବୁଲିବ ଟିମ୍ ସାଇନ ବା ବିଏମସି ଏନଫୋର୍ସମେଣ୍ଟ ସ୍କ୍ବାଡ । ଟିମ୍ ସାଇନ ଅର୍ଥାତ ସାନିଟେସନ ଏବଂ ହାଇଜିନ୍ ଇନସ୍ପେକସନ ଫର୍ ନିଟ୍ ଏନଭରନମେଣ୍ଟ । ଆଜି ଏହାର ବିଧିବଦ୍ଧ ଶୁଭାରମ୍ଭ କରିଛନ୍ତି ବିଏମସି ମେୟର ଏବଂ କମିଶନର । ରାଜଧାନୀରେ 10ଟି ଏନଫୋର୍ସମେଣ୍ଟ ସ୍କ୍ଵାଡ ରହିବେ ।
ଶୁଭାରମ୍ଭ ଅବସରରେ ବିଏମସି ଟିମ୍ ସାଇନ ବା ଏନଫୋର୍ସମେଣ୍ଟ ଟିମର ରୋଡ ଶୋ ଅନୁଷ୍ଠିତ ହୋଇଛି । ବାଣୀବିହାରରୁ ଆଚାର୍ଯ୍ୟବିହାର ଦେଇ ବିଏମସି ଅଫିସ ପର୍ଯ୍ୟନ୍ତ ରୋଡ ଶୋ ହୋଇଛି । ରାଲି ମାଧ୍ୟମରେ ରାଜଧାନୀବାସୀଙ୍କୁ ସ୍ବଚ୍ଛତା ନେଇ ସଚେତନ କରିବାକୁ ପ୍ରୟାସ କରାଯାଇଛି। ଦରକାର ପଡିଲେ କାର୍ଯ୍ୟନୁଷ୍ଠାନ ନେବ ଏହି ଟିମ୍ । ପ୍ରତି ସ୍କ୍ଵାଡରେ ରହିବେ 5 ଜଣ ସଦସ୍ୟ।
ଦ୍ବିତୀୟ ଦିନରେ ଭଲ ରୋଜଗାର କଲା ’OMG ୨’
ନୂଆଦିଲ୍ଲୀ: ଅକ୍ଷୟ କୁମାରଙ୍କ ଅଭିନୀତ ’OMG 2’ ଦର୍ଶକଙ୍କ ମହଲରେ ଆଦୃତ ହୋଇଥିବାବେଳେ ଭଲ ରୋଜଗାର କରୁଛି । ପ୍ରଥମ ଦିନରେ ୧୦.୨୬ କୋଟି ଟଙ୍କା ବିଜନେସ କରିଥିଲା । ସନ୍ନି ଦେଓଲଙ୍କ ’ଗଦର ୨’ ଅଧିକ ରୋଜଗାର କରୁଥିବାବେଳେ ’OMG ୨’ ମଧ୍ୟ ଭଲ ରୋଜଗାର କରୁଛି । ଗଦର-୨ କୁ ଟକ୍କର ଦେଉଛି ’OMG ୨’ । ଶୁକ୍ରବାର ରିଲିଜ ହୋଇଥିବା ଏହି ଫିଲ୍ମ ପ୍ରଥମ ଦିନ ଅପେକ୍ଷା ଦିନରେ ଭଲ ରୋଜଗାର କରିଛି । ଶନିବାର ଅକ୍ଷୟ କୁମାରଙ୍କ ଫିଲ୍ମ ’OMG ୨’ ୧୫ କୋଟି ଟଙ୍କା ଆୟ କରିଛି । ଭଗବାନ ଶୀବଙ୍କ ବେଶରେ ନଜର ଆସିଥିବା ଅକ୍ଷୟ କୁଚମାରଙ୍କ ଦର୍ଶକଙ୍କ ଭଲ ପାଇବା ମିଳୁଥିବା ଦେଖିବାକୁ ମିଳୁଛି ।
ସ୍ବାଧୀନତା ଦିବସ ପାଇଁ ଜୋରଦାର ପ୍ରସ୍ତୁତି, ଭୁବନେଶ୍ବର ପ୍ରଦର୍ଶନୀ ପଡ଼ିଆରେ ସରିଲା ଫୁଲ୍ ଡ୍ରେସ୍ ରିହର୍ସାଲ
ଭୁବନେଶ୍ବର: ସ୍ୱାଧୀନତା ଦିବସ ପାଇଁ ସରିଲା ପରେଡ୍ ରିହର୍ସାଲ । ଭୁବନେଶ୍ବର ପ୍ରଦର୍ଶନୀ ପଡିଆରେ ସରିଲା ଫୁଲ୍ ଡ୍ରେସ ରିହର୍ସାଲ । ପରେଡ୍ ରିହର୍ସାଲରେ ପୋଲିସ ଡିଜି ସୁନୀଲ ବଂଶଲ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ପୋଲିସ କମିଶନର ଓ ଡେପୁଟି ପୋଲିସ କମିଶନର ପ୍ରମୁଖ ସାମିଲ ହୋଇଥିଲେ । ପରେଡ୍ ରିହର୍ସାଲରେ ୪ଟି କଣ୍ଟିଜେଣ୍ଟ ସହ ପୋଲିସ ବ୍ୟାଣ୍ଡ ସାମିଲ ହୋଇଥିଲେ । ପରେଡକୁ କମାଣ୍ଡ କରିବେ ଆଇପିଏସ ଅଙ୍କିତ କୁମାର ବର୍ମା । ସ୍ବାଧୀନତା ଦିବସରେ ୧୫ ପ୍ଲାଟୁନ ପୋଲିସ ଫୋର୍ସ ସହ ୧୦୦ ଜଣ ଅଫିସର ମୁତୟନ ହେବେ । ଦର୍ଶକଙ୍କ ସହ ଅତିଥିଙ୍କ ପାଇଁ ସ୍ଵତନ୍ତ୍ର ବ୍ୟବସ୍ଥା ହୋଇଛି । ଟ୍ରାଫିକ ନିୟନ୍ତ୍ରଣ ପାଇଁ ମଧ୍ୟ ସ୍ଵତନ୍ତ୍ର ଭାବେ କରାଯାଇଛି ବ୍ୟବସ୍ଥା ।
ଜାଣନ୍ତୁ ଦ୍ବିତୀୟ ଦିନରେ କେତେ ଟଙ୍କା ରୋଜଗାର କଲା ’ଗଦର-୨’
ନୂଆଦିଲ୍ଲୀ: ସନ୍ନି ଦେଓଲଙ୍କ ଅଭିନୀତ ଫିଲ୍ମ ’ଗଦର-୨’ର ସଫଳତା ପାଇଁ ଛୁଟୁଛି ଶୁଭେଚ୍ଛାର ସୁଅ । ପ୍ରଥମ ଦିନରେ ୪୦ କୋଟି ଉପରେ ରୋଜଗାର କରିଥିବା ଏହି ଫିଲ୍ମକୁ ନେଇ ଦର୍ଶକଙ୍କ ଉତ୍ସାହ ବଢ଼ିବାରେ ଲାଗିଛି । ପ୍ରଥମ ଦିନ ଅପେକ୍ଷା ଦିତୀୟ ଦିନରେ ଭଲ ରୋଜଗାର କରିଛି ’ଗଦର-୨’ । ୪୩ରୁ ୪୪ କୋଟି ଟଙ୍କାର ଆଦାୟ ହୋଇଥିବା ସୂଚନା ମିଳିଛି । ଦୁଇଦିନରେ ୮୩ କୋଟିରୁ ଅଧିକ ଟଙ୍କା ଆୟ ହୋଇଥିବାବେଳେ ଆଗାମୀ ଦିନରେ ଆହୁରି ଭଲ ରୋଜଗାର କରିବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ଆଶା ରଖାଯାଇଛି । ଚଳିତବର୍ଷ ରିଲିଜର ଦ୍ବିତୀୟ ବୃହତମ ଚଳଚ୍ଚିତ୍ର । ଫିଲ୍ମର ବଜେଟ୍ ୮୦ କୋଟି ହୋଇଥିବାବେଳେ ଦୁଇଦିନରେ ଏହାଠାରୁ ଅଧିକ ରୋଜଗାର ହୋଇସାରିଲାଣି । ୨ଦିନର ରୋଜଗାର ସହ ଏହା ସନ୍ନି ଦେଓଲଙ୍କ କ୍ୟାରିୟରର ବଡ଼ ସିନେମା ହୋଇପାରିଛି । ୨୦୦୧ ମସିହାରେ ଗଦର ଫିଲ୍ମ ରିଲିଜ୍ ହୋଇଥିବାବେଳେ ଦୀର୍ଘ ୨୨ ବର୍ଷ ପରେ ଦ୍ବିତୀୟ ଭାଗ ରିଲିଜ୍ ହୋଇଛି । ଫିଲ୍ମର ଟ୍ରେଲର ରିଲିଜ ହେବା ଦିନଠାରୁ ଦର୍ଶକେ ଫିଲ୍ମର ରିଲିଜ ତାରିଖକୁ ଚାହିଁ ବସିଥିଲେ ।
ହାଓ୍ବାଇ ଦ୍ବୀପରେ ନିୟନ୍ତ୍ରଣକୁ ଆସୁନି ନିଆଁ, ଭୟଙ୍କର ଅଗ୍ନିକାଣ୍ଡରେ ଗଲାଣି ୮୯ରୁ ଅଧିକ ଲୋକଙ୍କ ଜୀବନ
ଓ୍ବାଶିଂଟନ: ଆମେରିକାରେ ଥମୁନି ଅଗ୍ନିକାଣ୍ଡ। ହାଓ୍ବାଇ ଦ୍ବୀପରେ ଲାଗିଥିବା ସର୍ବଗ୍ରାସକାରୀ ନିଆଁରେ ଅନେକ କ୍ଷୟକ୍ଷତି ହୋଇଛି । କିଛି ଦିନ ଧରି ଜାରି ରହିଥିବା ଅଗ୍ନିକାଣ୍ଡରେ ବର୍ତ୍ତମାନ ସୁଦ୍ଧା ୮୯ରୁ ଅଧିକ ଲୋକଙ୍କର ଜୀବନ ଯାଇଥିବାବେଳେ ଏବେ ମଧ୍ୟ ଶତାଧିକ ଲୋକ ନିଖୋଜ ଅଛନ୍ତି । ଐତିହାସିକ ସହର ଲାହିନା ଜଳିପୋଡି ଛାରଖାର ହୋଇଗଲାଣି । ହଜାର ହଜାର ଲୋକ ବେଘର ହୋଇସାରିଲେଣି । ଅତ୍ୟନ୍ତ ଶୁଖିଲା ପରିବେଶ ସମେତ ପ୍ରବଳ ପବନ ଯୋଗୁ ହାଓ୍ବାଇରେ ଲାଗିଥିବା ନିଆଁକୁ ଆୟତ୍ତ କରିବାରେ ଆମେରିକା ବିଫଳ ହୋଇଛି । ହାଓ୍ବାଇ ଦ୍ବୀପରେ ମରୁଡି ପଡିଥିବାରୁ ଶୁଖିଲା ଜଙ୍ଗଲ ଏହି ଅଗ୍ନିକାଣ୍ଡ ଲାଗି ସହାୟକ ହୋଇଛି । ଅଗ୍ନିକାଣ୍ଡକୁ ଦୃଷ୍ଟିରେ ରଖି ସହରରେ ପ୍ରତିଦିନ କର୍ଫ୍ଯୁ ଜାରି କରାଯାଉଛି । ବାର୍ଷିକ 20 ଲକ୍ଷ ପର୍ଯ୍ୟଟକଙ୍କୁ ଆକୃଷ୍ଟ କରୁଥିବା ଲାହିନା ସହରର ଏବେ ଧ୍ବଂସସ୍ତୂପରେ ପରିଣତ ହୋଇଛି। ଶେଷ ଖବର ସୁଦ୍ଧା ୧୭ଶହରୁ ଅଧିକ କୋଠା ପୋଡିଗଲାଣି ।