spot_img
Home Blog Page 2902

ଝିଅକୁ ଘରେ ଛାଡି ଷ୍ଟେସନ ଯାଇଥିଲେ ବାପାମା’, ଝରକାରୁ ଖସିପଡି ଶିଶୁ ମୃତ

ମୁମ୍ବାଇ: ଆପାର୍ଟମେଣ୍ଟର ୪ ମହଲାରୁ ଖସି ଆଖିବୁଜିଲା ୪ ବର୍ଷର ଶିଶୁ । ମୁମ୍ବାଇର ଭିରାରରେ ଘଟିଛି ଏହି ଦୁଃଖଦ ଘଟଣା । ଝିଅକୁ ଏକୁଟିଆ ଛାଡି ବାପା ମା ସକାଳୁ ଘରୁ ବାହାରକୁ ଚାଲିଯାଇଥିବାବେଳେ ଶିଶୁଟି ଝରକାରେ ଚଢିଯାଇ ତଳକୁ ଖସିପଡିଥିଲା । ଶିଶୁଟିର ଦୁଇ ଆଖିକୁ ପିତାମାତା ଦାନ କରିଛନ୍ତି । ମୁମ୍ବାଇ ଅନ୍ତର୍ଗତ ଭିରାରର ଓ୍ବାଇକେ ନଗରରେ ନୂଆ ଭାବେ ନିର୍ମିତ ହୋଇଛି ୧୯ ମହଲା ବିଶିଷ୍ଟ ଆପାର୍ଟମେଣ୍ଟ ।

ଆପାର୍ଟମେଣ୍ଟର ଚତୁର୍ଥ ମହଲାରେ ରହୁଥିଲେ ସୁରେଶ, ପତ୍ନୀ ମଣି ଓ ୪ ବର୍ଷର କନ୍ୟା ଦର୍ଶିନୀ । ଗତ ମଙ୍ଗଳବାର ସକାଳେ ଝିଅ ଶୋଇଥିବାବେଳେ ସ୍ବାମୀଙ୍କୁ ଷ୍ଟେସନରେ ଛାଡିବା ଲାଗି ମଣି ସ୍କୁଟରରେ ଯାଇଥିଲେ । ସେମାନେ ଭାବିଥିଲେ ଷ୍ଟେସନରୁ ଫେରିବା ବେଳକୁ ଝିଅ ଉଠି ନଥିବ । ୩୦ ମିନଟ ପରେ ସେ ଫେରିବାବେଳକୁ ଦେଖିଥିଲେ ଆପାର୍ଟମେଣ୍ଟ ଆଗରେ ବହୁ ଲୋକ ଜମା ହୋଇଛନ୍ତି । ସେ ସେଠାକୁ ଯାଇ ଦେଖନ୍ତି ତ ଆଉ କିଏ ନୁହେଁ, ତାଙ୍କ ଝିଅ ଦର୍ଶିନୀର ଶବ ନିକଟରେ ଲୋକେ ରୁଣ୍ଡ ହୋଇଛନ୍ତି ।

ଘରେ କେହି ନଥିବାରୁ ପିଲାଟି ଖୋଲାଥିବା ଝରକା ଦେଇ ଉପରକୁ ଉଠିଯାଇଥିଲା ଏବଂ ଭାରସାମ୍ୟ ହରାଇ ତଳକୁ ଖସି ପଡ଼ିଥିଲା । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।

ଇସ୍ରାଏଲରେ ଫସିଛନ୍ତି ୨୦ ହଜାରରୁ ଅଧିକ ଭାରତୀୟ, ସ୍ବତନ୍ତ୍ର ବିମାନର ବ୍ୟବସ୍ଥା

ଜେରୁଜେଲମ: ଇସ୍ରାଏଲରେ ୨୦ ହଜାରରୁ ଅଧିକ ଭାରତୀୟ ରହିଛନ୍ତି । ତେବେ କୌଣସି ଭାରତୀୟ ଆହତ ହୋଇଛନ୍ତି କିମ୍ବା ପ୍ରାଣ ହରାଇଛନ୍ତି କି ନାହିଁ ତାହାର କୌଣସି ଖବର ନାହିଁ ବୋଲି କହିଛନ୍ତି ମୁମ୍ବାଇ ସ୍ଥିତ ଇସ୍ରାଏଲର କନସଲ ଜେନେରାଲ କୋବି ସୋସାନି ।

ଭାରତ ଓ ଇସ୍ରାଏଲ ମଧ୍ଯରେ ବିମାନ ସେବା ବନ୍ଦ ରହିଛି  । ଭାରତର ବୈଦେଶିକ ମନ୍ତ୍ରାଳୟ ପକ୍ଷରୁ ଭାରତୀୟଙ୍କୁ ଫେରାଇଆଣିବା ଲାଗି ଉଦ୍ୟମ କରାଯାଉଛି ବୋଲି ସେ କହିଛନ୍ତି । ଇସ୍ରାଏଲରେ ଫସିଥିବା ନାଗରିକଙ୍କୁ ଉଦ୍ଧାର ଲାଗି ଭାରତ ପକ୍ଷରୁ ଆରମ୍ଭ କରାଯାଇଛି ଅପରେସନ ଅଜୟ । ଭାରତୀୟଙ୍କୁ ଫେରାଇ ଆଣିବା ଲାଗି ସ୍ବତନ୍ତ୍ର ଚାର୍ଟାର୍ଡ ଫ୍ଲାଇଟର ବ୍ୟବସ୍ଥା କରାଯାଇଛି । ଇସ୍ରାଏଲରେ ତାମିଲନାଡୁର 84 ଲୋକ ଫସିଥିବା ସୂଚନା ମିଳିଛି ।

ଲକ୍ଷ୍ମୀ ବସରେ ବସି ମାଲକାନଗିରିର ଏମଭି ୩ ବୁଲିଲେ ମୁଖ୍ୟମନ୍ତ୍ରୀ ନବୀନ

ମାଲକାନଗିରି: ମାଲକାନଗିରି ଷ୍ଟାଡିୟମରେ ଲକ୍ଷ୍ମୀ ଯୋଜନାର ଶୁଭାରମ୍ଭ କରିବା ପରେ ନିଜେ ବସରେ ବସି ଏମଭି-୩ ଯାଇଥିଲେ ମୁଖ୍ୟମନ୍ତ୍ରୀ । ଉଭୟ ପାର୍ଶ୍ବରେ ଶହ ଶହ ଜନତାଙ୍କୁ ହାତ ହଲାଇ ଶୁଭେଚ୍ଛା ଜଣାଇଥିଲେ। ଏମଭି-୩ରେ ବସଷ୍ଟପର ଶୁଭାରମ୍ଭ କରିଛନ୍ତି ନବୀନ। ଏହି ଅବସରରେ ଆଦିବାସୀଙ୍କ ସହ ଭାବବିନିମୟ କରିଥିଲେ।

ଓଡିଶା ବିକାଶର ଲଞ୍ଚିଂ ପ୍ୟାଡ ମାଲକାନଗିରି । ଏଠାରୁ ଟଙ୍କିକିଆ ଚାଉଳ ଏବଂ ବିଏସକେୱାଇ ହେଲଥ କାର୍ଡର ଶୁଭାରମ୍ଭ ହୋଇଥିଲା । ଏହିଠାରୁ ମହିଳାଙ୍କ ଲାଗି ୧୦ ଲକ୍ଷ ଚିକିତ୍ସା ସୁବିଧା ଯୋଗାଇ ଦେବାକୁ ମଧ୍ୟ ପ୍ରସ୍ତାବ ଆସିଥିଲା । ସିଏମଓଙ୍କ ଗସ୍ତବେଳେ ଗମନାଗମନ ଅସୁବିଧା ଜାଣିବା ପରେ ଏହିଠାରୁ ଲକ୍ଷ୍ମୀ ବସ ସେବା ଆରମ୍ଭ କରିବାକୁ ନିଷ୍ପତ୍ତି ନିଆଯାଇଥିଲା । ମାଲକାନଗିରିରେ ପତାକା ଦେଖାଇ ଲକ୍ଷ୍ମୀ ଯୋଜନା ଶୁଭାରମ୍ଭ କରି ଏହା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।

ମାଲକାନଗିରି ତାଙ୍କର ବହୁତ ପ୍ରିୟ। ଲକ୍ଷ୍ମୀ ଯୋଜନା ମାଲକାନଗିରି ଅର୍ଥନୀତିକୁ ସମୃଦ୍ଧ କରିବ। ଜିଲ୍ଲାରେ ୩୬ଟି ବସ ସେବା ଯୋଗାଇବ। ଜିଲ୍ଲାର ୧୧୧ଟି ପଞ୍ଚାୟତକୁ ବସ ସୁବିଧା ମିଳିବ । ଅର୍ଥନୀତି ସୁଦୃଢ ହେବ, ଗାଁ ଗାଁରେ ସମୃଦ୍ଧି ଆଣିବ । ଘରେ ଘରେ ଖୁସି ଆଣିବ । ଗୁରୁପ୍ରିୟା ସେତୁ ମାଲକାନଗିରି ବିକାଶର ମାଇଲଖୁଣ୍ଟ। ଲକ୍ଷ୍ମୀ ଯୋଜନା ଦ୍ବାରା ମାଲକାନଗିରି ବିକାଶ ଆହୁରି ଉଜ୍ଜ୍ୱଳ ହେବ। ପଞ୍ଚାୟତରୁ ଜିଲ୍ଲାକୁ ଏହି ଯୋଜନା ଯୋଡ଼ିବ ବୋଲି ମୁଖ୍ୟମନ୍ତ୍ରୀ କହିଛନ୍ତି। ପରବର୍ତ୍ତୀ ସମୟରେ ପୂରା ଓଡ଼ିଶାରେ ବସ୍ ଚଳାଚଳ କରିବ। ଆଜି ମାଲକାନଗିରି, କୋରାପୁଟ, ରାୟଗଡ଼ା, ନବରଙ୍ଗପୁର, କଳାହାଣ୍ଡି, ଗଜପତି ଜିଲ୍ଲାରେ ଚାଲିଛି ଲକ୍ଷ୍ମୀ ବସ।

ଘରେ ଘରେ ଲକ୍ଷ୍ମୀ ଯୋଜନା ଖୁସି ଆଣିବ ବୋଲି ମୁଖ୍ୟମନ୍ତ୍ରୀ କହିଛନ୍ତି। ବିଶେଷକରି ଗ୍ରାମାଞ୍ଚଳ ଲୋକେ ଯାତାୟତରେ ଯେପରି କୌଣସି ଅସୁବିଧାର ସମ୍ମୁଖୀନ ନହେବେ ତାହା ଉପରେ ଅଧିକ ଫୋକସ କରାଯାଇଛି। ରାଜ୍ୟରେ ସୁନିଶ୍ଚିତ ଓ ନିରାପଦ ପରିବହନ ସେବା ପାଇଁ ରାଜ୍ୟ ସରକାର ଆରମ୍ଭ କରିଛନ୍ତି ଲୋକେସନ ଆକ୍ସେସିବିଲିଟି ମଲ୍ଟି ମୋଡାଲ୍ ଇନିସିଏଟିଭ୍ ବା ଲକ୍ଷ୍ମୀ ଯୋଜନା ।

ଯୋଜନା ଅଧିନରେ ସାରା ରାଜ୍ୟରେ ହଜାରେରୁ ଅଧିକ ବସ ଚଳାଚଳ କରିବ। ଏହି ଅବସରରେ ଜିଲ୍ଲାରେ ୧୯୨ କୋଟି ବ୍ୟୟରେ ୧୮ଟି ଲୋକାଭିମୁଖି ପ୍ରକଳ୍ପର ଶୁଭାରମ୍ଭ କରିଛନ୍ତି ନବୀନ। ଏଥିସହ ୬୦୧ କୋଟିରୁ ଅଧିକ ବ୍ୟୟର ୯୬ଟି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଛନ୍ତି।

ଇସ୍ରାଏଲୀ ସୈନ୍ୟ ଓ ଶିଶୁଙ୍କ ମୁଣ୍ଡକାଟ ପରେ ତାତିଲେ ପ୍ରଧାନମନ୍ତ୍ରୀ, କହିଲେ ମୂଳପୋଛ ହେବ ହମାସ

ଜେରୁଜେଲମ: ଇସ୍ରାଏଲୀ ସୈନ୍ୟ ଓ ଶିଶୁମାନଙ୍କ ମୁଣ୍ଡକାଟ କରୁଛି ହମାସ । ଅନେକଙ୍କୁ ଜୀବନ୍ତ ଜାଳି ଦିଆଯାଉଛି । ଯୁବତୀଙ୍କୁ ଦୁଷ୍କର୍ମ କରିବା ସହ ସେମାନଙ୍କୁ ହତ୍ୟା କରାଯାଉଛି । ଏପରି କିଛି ଚାଞ୍ଚଲ୍ୟକର ସୂଚନା ଦେଇଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ଯାହୁ । ଏହା ସହ ହମାସକୁ ସମ୍ପୂର୍ଣ୍ଣ ମୂଳପୋଛ କରାଯିବ ବୋଲି ସେ କହିଛନ୍ତି । ଏହି ଲୋମହର୍ଷକ ଘଟଣାକୁ ବି ନିନ୍ଦା କରିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ ।

ସେପଟେ ଇସ୍ରାଏଲୀ ଶିଶୁମାନଙ୍କୁ ଧରି ନେବା ପରେ ସେମାନଙ୍କ ମୁଣ୍ଡକାଟ କରାଯାଉଛି ବୋଲି କହିଛନ୍ତି ଇସ୍ରାଏଲ ପ୍ରତିରକ୍ଷା ବିଭାଗ ମୁଖପାତ୍ର ଜୋନାଥନ କନରିକସ । ତେଣେ ହମାସ କମାଣ୍ଡର ମହମ୍ମଦ ଅଲ ଜହରଙ୍କ ଏକ ବିବୃତି ସମସ୍ତଙ୍କୁ ଚକିତ କରିଛି । ସେ କହିଛନ୍ତି ଇସ୍ରାଏଲ ହେଉଛି ହମାସର ପ୍ରଥମ ଟାର୍ଗେଟ । ତାଙ୍କ ଆଇନ ଅନୁସାରେ ସମଗ୍ର ବିଶ୍ବର 510 ନିୟୁତି ବର୍ଗ କିଲୋମିଟର ଅଞ୍ଚଳ ତାଙ୍କ ଅଧୀନରେ ଆସିବ । ଏହା ସମ୍ପୂର୍ଣ୍ଣ ହେଲେ ବିଶ୍ବରେ ଅନ୍ୟାୟ, ନିର୍ଯାତନା, ହତ୍ୟା, ଅପରାଧ ଆଦି ରହିବ ନାହିଁ ବୋଲି ସେ କହିଛନ୍ତି ।

ଗାଜା ସୀମାରେ ପ୍ରାୟ 3 ଲକ୍ଷ ସୈନିକଙ୍କୁ ଇସ୍ରାଏଲ ଠୁଳ କରିଥିବାବେଳେ ଇସ୍ରାଏଲୀ ଶରଣାର୍ଥୀଙ୍କୁ ଆଶ୍ରୟ ଦେବାକୁ ମନା କରିଛି ଇଜିପ୍ଟ । ସେପଟେ ହେଜବୁଲ୍ଲା ବାହିନୀ ପକ୍ଷରୁ ଇସ୍ରାଏଲ ଉପରେ ଆକ୍ରମଣ ହୋଇଥିବା ସୂଚନା ମିଳିଛି । ବର୍ତ୍ତମାନ ସୁଦ୍ଧା ଜାତିସଂଘ ପାଲେଷ୍ଟିନୀୟ ଶରଣାର୍ଥୀ ସଂସ୍ଥାର 11 ଜଣ କର୍ମୀ ଓ ଅନ୍ତର୍ଜାତୀୟ ରେଡକ୍ରସ ଓ ରେଡକ୍ରିସେଣ୍ଟର 5 ଜଣ କର୍ମୀ ଇସ୍ରାଏଲୀ ଏୟାରଷ୍ଟ୍ରାଇକରେ ପ୍ରାଣ ହରାଇଛନ୍ତି । ବର୍ତ୍ତମାନ ସୁଦ୍ଧା ଯୁଦ୍ଧରେ 22ଜଣ ଆମେରିକୀୟ ନାଗରିକ ପ୍ରାଣ ହରାଇଛନ୍ତି ।

ତେଣେ ପୂର୍ବତନ ପ୍ରତିରକ୍ଷା ମନ୍ତ୍ରୀ ଓ କେନ୍ଦ୍ରପନ୍ଥୀ ବିରୋଧୀ ଦଳ ନେତା ବେନି ଗାଞ୍ଜଙ୍କୁ ନେଇ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ଯାହୁ ଗଠନ କରିଛନ୍ତି ଓ୍ବାର କ୍ୟାବିନେଟ । ତେଲ ଆଭିବ ଉପରେ ପୁଣି ହମାସର ରକେଟ ମାଡ । ଫଳରେ ବେନ ଗୁରିଅନ ବିମାନ ବନ୍ଦରରୁ ସମସ୍ତ ବିମାନ ସେବା ବନ୍ଦ କରିଛି ଇସ୍ରାଏଲ । ବର୍ତ୍ତମାନ ସୁଦ୍ଧା ଯୁଦ୍ଧରେ 3 ହଜାରରୁ ଅଧିକ ଲୋକଙ୍କ ମୃତ୍ୟୁ ଘଟିଥିବାବେଳେ ଯୁଦ୍ଧ ଥମିବାର ନାଁ ନେଉନାହିଁ । ଯୁଦ୍ଧର ପରିସମାପ୍ତି ଲାଗି ବାଇଡେନ ପ୍ରଶାସନ ଉଦ୍ୟମ ଜାରି ରଖିଛି । ଇସ୍ରାଏଲ ଓ ପାଲେଷ୍ଟାଇନ ମଧ୍ଯରେ ବୁଝାମଣା ଲାଗି ଆଜି ଇସ୍ରାଏଲ ଗସ୍ତରେ ଆସୁଛନ୍ତି ଆମେରିକା ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନ ।

ସେପଟେ ଇସ୍ରାଏଲର ନେଭାତିମ ଏୟାରବେସରେ ପହଞ୍ଚିଛି ଆମେରିକା ପଠାଇଥିବା ଅତ୍ୟାଧୁନିକ ଅସ୍ତ୍ରଶସ୍ତ୍ର । ଯୁଦ୍ଧର ଅନ୍ତ ଲାଗି ଆହ୍ବାନ ଜଣାଇଛନ୍ତି ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ । ସେ କହିଛନ୍ତି ହଜାର ହଜାର ଲୋକଙ୍କ ଜୀବନ ନେଉଥିବା ଏହି ଯୁଦ୍ଧର ତୁରନ୍ତ ପରିସମାପ୍ତ ଘଟୁ । ବିଦ୍ୟୁତ ଯୋଗାଣ ବନ୍ଦ ହେବା ପରେ ଗାଜାରେ ହାହାକାର ସୃଷ୍ଟି ହୋଇଛି । ଗାଜାର ଏକମାତ୍ର ପାଓ୍ବାର ଷ୍ଟେସନରୁ ଇନ୍ଧନ ଶେଷ ହୋଇଯାଇଛି । ଇସ୍ରାଏଲ ପ୍ରତିରକ୍ଷା ମନ୍ତ୍ରୀ ୟୋଭ ଗାଲାଣ୍ଟ କହିଛନ୍ତି ଗାଜାକୁ ବିଦ୍ୟୁତ, ଖାଦ୍ୟ ଓ ଇନ୍ଧନ ଯୋଗାଣ ବନ୍ଦ ନିଷ୍ପତ୍ତି ଜାରି ରହିବ ।

ଦୁଇ ମାସରେ ଦୁଃଖ ବୁଝିଲେ ମୁଖ୍ୟମନ୍ତ୍ରୀ, ନୀତିଶଙ୍କ ଚିକିତ୍ସା ପାଇଁ ଘୋଷଣା କଲେ ୧୦ ଲକ୍ଷ

ଭୁବନେଶ୍ବର: ପ୍ରତିଟି ଜୀବନ ମୂଲ୍ୟବାନ । ଏହା ଏକ ନାରା ନୁହେଁ ବରଂ ଏହାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବାରମ୍ବାର କରି ଦେଖାଇଛନ୍ତି । ଆଜି ସମ୍ବଲପୁରର ନୀତିଶ ସାହୁଙ୍କୁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ୧୦ ଲକ୍ଷ ଟଙ୍କା ସାହାଯ୍ୟ କରିଛନ୍ତି ମୂଖ୍ୟମନ୍ତ୍ରୀ ।

ନାକଟିଦେଉଳ ବ୍ଲକର ନିତୀଶ ୫ ବର୍ଷହେଲା ଚାଲିପାରୁନାହାନ୍ତି । ଫିଜିଓଥେରାପି ପାଇଁ ମୋଟା ଅଙ୍କର ଟଙ୍କା ଆବଶ୍ୟକ ଥିବାରୁ ମୁଖ୍ୟମନ୍ତ୍ରୀଙ୍କୁ ଜଣାଇଥିଲେ ବାପା କୌଶିକ ସାହୁ । ୨ ମାସ ଭିତରେ ଦୁଃଖ ବୁଝି ସାହାଯ୍ୟ କରିଛନ୍ତି ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀଙ୍କ ସହାୟତା ପାଇଁ ଧନ୍ୟବାଦ ଜଣାଇଲେ ପରିବାର  ।

କୋହଲିଙ୍କୁ ନେଇ ଏମିତି କହିଲେ ଆଫଗାନିସ୍ତାନ ଫ୍ୟାନ୍

ନୂଆଦିଲ୍ଲୀ: ବିଶ୍ବକପର ନବମ ମ୍ୟାଚରେ ଆଫଗାନିସ୍ତାନ ଏବଂ ଭାରତ ମଧ୍ୟରେ ମ୍ୟାଚ ଅନୁଷ୍ଠିତ ହୋଇଥିଲା । ଆଇପିଏଲ ସମୟରେ ନବୀନ ଉଲ୍ଲକହ ଏବଂ କୋହଲିଙ୍କ ବିବାଦକୁ ନେଇ ଏହି ମ୍ୟାଚରେ ଫ୍ୟାନ୍ସମାନଙ୍କ ମଧ୍ୟରେ ସାମାନ୍ୟ ଝଗଡ଼ା ଦେଖିବାକୁ ମିଳିଥିଲା । ତେବେ ଦିଲ୍ଲୀର ଅରୁଣ ଜେଟଲି ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚରେ ଆଫଗାନିସ୍ତାନର ଜଣେ ସୁନ୍ଦରୀ ପ୍ରଂଶସକ ଓ୍ବାଜମା ଆୟୁବି ବିରାଟ କୋହଲିଙ୍କୁ ସପୋର୍ଟ କରିଥିବା ଦେଖିବାକୁ ମିଳିଥିଲା । ଏପରିକି ସେ ଉଭୟ ନବୀନ ଏବଂ କୋଡଳିଙ୍କ ପ୍ରଂଶସକ ଝଗଡ଼ା ନକରିବାକୁ ଟୁଇଟ କରିଛନ୍ତି । ସେପଟେ ସେ କୋହଲିଙ୍କୁ ନେଇ ମଧ୍ୟ ଏହି ପୋଷ୍ଟରେ ଲେଖିଛନ୍ତି । ସେ ଲେଖିଛନ୍ତି କି, ଦିଲ୍ଲୀ ହେ ଦିଲ୍ ଓ୍ବାଲେ କା । ଏପରିକି ସେ କହିଛନ୍ତି କି, ସେ ହେଉଛନ୍ତି କୋହଲିଙ୍କ ଜଣେ ବଡ଼ ପ୍ରଂଶସକ । ମୁଁ ଆଫଗାନିସ୍ତାନର ହେଲେ ମଧ୍ୟ କୋହଲି ମୋର ପ୍ରିୟ ଖେଳାଳି । ତାଙ୍କୁ କିଙ୍ଗ କୁହାଯିବା ପଛରେ କାରଣ ରହିଛି । ଏଭଳି ଅନେକ ପ୍ରଂଶସା କରିଥିଲେ ।

ସୂଚନା ଥାଉକି, ୨୦୨୩ ଆଇପିଏଲରେ ଲକ୍ଷ୍ନୌ ପକ୍ଷରୁ ନବୀନ ଖେଳୁଥିବାବେଳେ କୋହଲି ବାଙ୍ଗାଲୋର ପକ୍ଷରୁ ଖେଳୁଛନ୍ତି । ଏକ ମ୍ୟାଚରେ ଉଭୟଙ୍କ ମଧ୍ୟରେ ଝଗଡ଼ା ଦେଖିବାକୁ ମିଳିଥିଲା । ଏଡାକୁ ନେଇ ଅନେକ ଥର ସୋସିଆଲ ମିଡିଆରେ ନବୀନ ବହୁ ପୋଷ୍ଟ କରିଥିବାବେଳେ ସେ ଟ୍ରୋଲର ଶିକାର ହୋଇଛନ୍ତି । ଏମିତିକି ପଡ଼ିଆରେ ମଧ୍ୟ ଟ୍ରୋଲ ହୋଇଛନ୍ତି ନବୀନ ।

ବୁଧବାର ଆାଫଗାନିସ୍ତାନକୁ ଭାରତ ନିଜର ଦ୍ବିତୀୟ ମୁକାବିଲାରେ ହରାଇ ଲଗାତାର ବିଜୟ ହାସଲ କରିଛି । ଶତକୀୟ ପାଳି ଖେଳିଥିବା ରୋହିତ ଶର୍ମା ଏହି ମ୍ୟାଚରେ ଅନେକ ରେକର୍ଡ ଅର୍ଜନ କରିଛନ୍ତି । ଦିନିକିଆରେ ସର୍ବାଧିକ ଛକା ମାରିବାର ରେକର୍ଡ ତାଙ୍କ ନାମରେ କରିଛନ୍ତି । ଓ୍ବେଷ୍ଟଇଣ୍ଡିଜର ପୂର୍ବତନ ଧୂଆଁଧାର ବ୍ୟାଟ୍ସମ୍ୟାନ କ୍ରିସ ଗେଲଙ୍କ ରେକର୍ଡକୁ ଭାଙ୍ଗିଛନ୍ତି । ରୋହିତ ଦିନିକିଆରେ ୫୫୬ଟି ଛକା ମାରି ଏବେ ଏକ ନମ୍ବର ସ୍ଥାନରେ ରହିଛନ୍ତି । ତାଙ୍କ ପଛକୁ ରହିଛନ୍ତି କ୍ରିସ୍ ଗେଲ୍ ସେ ୫୫୩ ଛକା ମାରିଛନ୍ତି । କେବଳ ଏତିକି ନୁହେଁ ଏହି ମ୍ୟାଚରେ ଅନେକ ରେକର୍ଡ ମଧ୍ୟ ତାଙ୍କ ନାମରେ ଯୋଡ଼ି ହୋଇଛି ।

ଭାରତୀୟ କ୍ରିକେଟର ରୋହିତ ଶର୍ମା ବୁଧବାର ଦିନ ଆଫଗାନିସ୍ତାନ ବିରୋଧରେ ଶତକ ହାସଲ କରିଛନ୍ତି। ନିଜର ୧୯ତମ ଦିନିକିଆ ବିଶ୍ବକପ ମ୍ୟାଚରେ ସେ ସପ୍ତମ ଶତକ ହାସଲ କରିଛନ୍ତି। ଏହା ପୁଣି ୬୩ଟି ବଲରେ ହାସଲ କରିଛନ୍ତି। ଏହି ରେକର୍ଡ ହାସଲ କରିବାରେ ରୋହିତ ହେଉଛନ୍ତି ପ୍ରଥମ। ସେ ବିଶ୍ବକପରେ ସର୍ବାଧିକ ୭ଟି ଶତକ ହାସଲ କରିପାରିଛନ୍ତି। ତାଙ୍କ ତଳକୁ ସଚିନ ତେନ୍ଦୁଲକର ୬ଟି ଶତକ ହାସଲ କରିଥିଲେ। ସ୍ଥାନୀୟ ଅରୁଣ ଜେଟଲୀ କ୍ରିକେଟ ଷ୍ଟାଡିୟମରେ ହିଟ୍ମ୍ୟାନ ଏକାଧିକ ରେକର୍ଡ ହାସଲ କରିଛନ୍ତି। ରୋହିତ ଶର୍ମା ବିଶ୍ବକପରେ ଆଜି ୧୦୦୦ ରନ୍ ପୂରା କରିଛନ୍ତି।

 

ରୋଗୀଙ୍କ ମୃତ୍ୟୁ ପରେ ଶ୍ରୀ ହସ୍ପିଟାଲରେ ସମ୍ପର୍କୀୟଙ୍କ ଉନ୍ମତ୍ତକାଣ୍ଡ

ଭୁବନେଶ୍ବର: ହସ୍ପିଟାଲ ଭିତରେ ପଶିଲେ ଡାକ୍ତରଙ୍କୁ ନିର୍ଦ୍ଧୁମ ଛେଚିଲେ। ରାଜଧାନରେ ଘଟିଥିବା ଏଭଳି ଏକ ଘଟଣାର CCTV ଭିଜୁଆଲ ଦେଖିବାକୁ ମିଳିଛି । ସିକ୍ୟୁରିଟିଙ୍କ ପାଖରୁ ଆରମ୍ଭ କରି ଯାହାକୁ ପାରିଲେ ତାକୁ ମାରିଲେ । କିଛି ସମୟ ପାଇଁ ଆତଙ୍କ ସୃଷ୍ଟି କଲେ ଭୁବନେଶ୍ବରର ଶ୍ରୀ ହସ୍ପିଟାଲ ଭିତରେ । କିଛି ଦୁର୍ବୃତ୍ତ ବିନା କାରଣରେ ହସ୍ପିଟାଲ ଭିତରକୁ ପଶି ଆସୁଛନ୍ତି । ଆଉ ରୋଗୀଙ୍କୁ ଟ୍ରିଟମେଣ୍ଟ କରୁଥିବା ଡ଼ାକ୍ତର , ନର୍ସ ଆଉ ଅନ୍ୟ ଷ୍ଟାଫଙ୍କୁ ନିର୍ଦ୍ଧୁମ ମାଡ଼ ମାରୁଛନ୍ତି । ଏଭଳି ଦୃଶ୍ୟ କଏଦ ହୋଇଛି ସିସିଟିଭିରେ ।

ଏନେଇ ବଡଗଡ ଥାନାରେ ହସ୍ପିଟାଲ ପକ୍ଷରୁ ଏକ ମାମଲା ରୁଜୁ ହୋଇଛି । ଏମିତି ଅମାନୁଷିକ ଭାବରେ ଆକ୍ରମଣ କରିଥିବା ଯୁବକ ମାନଙ୍କର ଜଣେ ସମ୍ପର୍କୀୟ ସେହି ହସ୍ପିଟାଲରେ ଚିକିତ୍ସା ପାଇଁ ଆସିଥିଲେ । ହେଲେ ରୋଗୀର ସ୍ୱାସ୍ଥ୍ୟବସ୍ଥାରେ ଅନେକ ସମସ୍ୟା ରହିଥିଲା । ଯାହାର ଚିକିତ୍ସା ଅନ୍ୟ ହସ୍ପିଟାଲରେ ହୋଇପାରିବ ବୋଲି ସ୍ପଷ୍ଟ କରିଥିଲେ ହସ୍ପିଟାଲ କର୍ତ୍ତୃପକ୍ଷ । ହେଲେ କିଛି ନଶୁଣିକି ଏଠାରେ ଚିକିତ୍ସା କରାଯାଉ ବୋଲି ଜିଦ୍ ଧରିଥିଲେ ପରିବାର ଲୋକେ ।

ହେଲେ ରୋଗୀଙ୍କ ରୋଗ ଅନୁସାରେ ଭଲ ଟ୍ରିଟମେଣ୍ଟ ପାଇଁ ଅନ୍ୟ ହସ୍ପିଟାଲରେ ସେହି ସୁବିଧା ରହିଛି ବୋଲି ବୁଝେଇବା ଫଳରେ, ରୋଗୀଙ୍କ ସଂପର୍କୀୟ ମାନେ ଭୁବନେଶ୍ଵରରେ ଏକ ବଡ଼ ହସ୍ପିଟାଲକୁ ରୋଗୀକୁ ନେଇଥିଲେ । ହେଲେ ସେଠାରେ ରୋଗୀର ମୃତୁ ହେବା ପରେ, ରୋଗୀଙ୍କ ସମ୍ପର୍କୀୟ ମାନେ ଶ୍ରୀ ହସ୍ପିଟାଲକୁ ଆସି ଏମିତି ଉନ୍ମତ କାଣ୍ଡ ଘଟାଇଥିଲେ । ସେମାନଙ୍କ ଆକ୍ରମଣରେ ଡ୍ୟୁଟିରେ ଥିବା ଜଣେ ଡ଼ାକ୍ତର ଗୁରୁତର ହୋଇଛନ୍ତି । ବଡ଼ଗଡ଼ ଥାନା ପକ୍ଷରୁ ତଦନ୍ତ କରାଯାଇ ୨ ଜଣଙ୍କୁ ଗିରଫ କରାଯାଇଛି ।

ପଡୋଶୀ ଘରେ ଝିଅକୁ ଛାଡିଥିଲେ, ମିଳିଲା ଝୁଲନ୍ତା ମୃତଦେହ

ଉଦଳା: ଫୁଲ ଗଛ ପାଇଁ ନାବାଳିକାକୁ ହତ୍ୟା । ଏଭଳି ଅଭାବନୀୟ ଘଟଣା ଘଟିଛି ମୟୁରଭଞ୍ଜ ଉଦଳା ଥାନା ଭାଲୁହୁରୁଡ଼ା ଗାଁରେ । ଗାଁର ସୀତା ହାଁସଦା ନିଜର ୧୨ ବର୍ଷର ଝିଅ ସରସ୍ବତୀ ହାଁସଦାକୁ ପଡୋଶୀଙ୍କ ଘରେ ଛାଡି ଭୁବନେଶ୍ୱର ଯାଇଥିଲେ । ଭୁବନେଶ୍ୱରରେ ନାବାଳିକା ଜଣକ ପାଠ ପଢ଼ୁଥିବା ବେଳେ ତାହାର ସାର୍ଟିଫିକେଟ ଆଣି ଉଦଳାରେ ପଢ଼ାଇବେ ବୋଲି ଝିଅକୁ ପଡୋଶୀଙ୍କ ଘରେ ଛାଡି ଯାଇଥିଲେ ।

ହେଲେ ଗତକାଲି ମଧ୍ୟାହ୍ନରେ ତାଙ୍କ ଝିଅ ବାଡିରୁ ଗେଣ୍ଡୁ ଗଛ ଚୋରି କରିଥିବା କଥା ସୀତାଙ୍କୁ ଫୋନ କରି କହିଥିଲେ ତାଙ୍କ ପଡୋଶୀ । କିନ୍ତୁ ରାତିରେ ଆସି ସୀତା ଏବଂ ତାଙ୍କ ସ୍ୱାମୀ ଘରେ ପହଂଚିବାରୁ ଘର ଦ୍ୱାର ମୁହଁ ନିକଟରେ ୧୨ ବର୍ଷର ଝିଅ ସରସ୍ବତୀର ଝୁଲନ୍ତା ମୃତଦେହ ଦେଖିବାକୁ ପାଇଥିଲେ । ସରସ୍ବତୀ ବେକରେ ଏକ ଓଢଣୀ ଲଗାଇ ଝୁଲିଥିବା ବେଳେ ତାର ଶରୀରରେ ମାଡ଼ ଚିହ୍ନ ରହିଛି ।

ଗେଣ୍ଡୁ ଗଛ ଚୋରି କରିବାରୁ ପଡୋଶୀ ତାଙ୍କ ଝିଅ ସରସ୍ବତୀକୁ ନିର୍ଘାତ ମାଡ଼ ମାରି ହତ୍ୟା କରିବା ପରେ ଟାଙ୍ଗି ଦେଇଥିବା ଅଭିଯୋଗ ଆଣିଛନ୍ତି ମୃତକଙ୍କ ମା । ଏ ନେଇ ଉଦଳା ପୋଲିସକୁ ଖବର ଦେବାପରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।

ଶିଶୁ କଲ୍ୟାଣ କମିଟି ମେମ୍ବରଙ୍କୁ ପିଟି ମାରିଦେଲେ, ଡ୍ରାଇଭର ହତ୍ୟା କରିଥିବା ସନ୍ଦେହ

ବ୍ରହ୍ମପୁର: ଗୋଶାଣୀ ନୁଆଁଗାଁ ଥାନା ବିଜିପୁର ନୀଳକଣ୍ଠ ନଗରରେ ହତ୍ୟାକାଣ୍ଡ । ଶିଶୁ କଲ୍ୟାଣ କମିଟି ମେମ୍ବରଙ୍କୁ ହତ୍ୟା । ଶିଶୁ କଲ୍ୟାଣ କମିଟି ମେମ୍ବର ହେଲେ ସୌଦାମିନୀ ରଥ । ସୌଦାମିନୀ କୌଣସି ଜଣେ ବ୍ୟକ୍ତିଙ୍କ ସହ ମୋବାଇଲରେ କଥା ହେଉଥିବା ବେଳେ ପଛପଟୁ ଦୁର୍ବୃତ୍ତ ଜଣକ ମୁଣ୍ଡକୁ ପିଟି ପିଟି ହତ୍ୟା କରି ଘଟଣା ସ୍ଥଳରୁ ଫେରାର ହୋଇଯାଇଥିବା ଜଣାପଡ଼ିଛି ।

ତେବେ ସୌଦାମିନୀ ରଥଙ୍କୁ ତାଙ୍କ ଡ୍ରାଇଭର ହତ୍ୟା କରିଥିବା ପୁଲିସ ପ୍ରାଥମିକ ତଦନ୍ତରୁ ସନ୍ଦେହ କରୁଛି । ବର୍ତ୍ତମାନ ଘଟଣାସ୍ଥଳେ ଟାଉନ ଏସଡିପିଓ ରାଜୀବ ଲୋଚନ ପଣ୍ଡା ଓ ଥାନା ଅଧିକାରୀ ସ୍ମୃତି ପ୍ରଭା ପ୍ରଧାନ ଓ ତାଙ୍କ ଟିମ ପହଞ୍ଚି ଘଟଣାର ତଦନ୍ତ କରୁଥିବା ଜଣାପଡିଛି ।

ଇସ୍ରାଏଲରୁ ଉଦ୍ଧାର ହେବେ ଫସିଥିବା ଭାରତୀୟ, ଆରମ୍ଭ ହେଲା ଅପରେସନ ଅଜୟ

ଜେରୁଜେଲମ: ଇସ୍ରାଏଲରୁ ଉଦ୍ଧାର ହେବେ ଫଶିଯାଇଥିବା ଭାରତୀୟ । ଭାରତ ସରକାର ଆରମ୍ଭ କଲେ ଅପରେସନ ଅଜୟ । ଖୁବଶୀଘ୍ର ସେଠାରେ ଫସିରହିଥିବା ଭାରତୀୟ ସ୍ବଦେଶ ଫେରିବେ । ସେପଟେ ଉତ୍ତର ଇସ୍ରାଏଲରେ ପଶିଛନ୍ତି ହମାସର ଆତଙ୍କୀ । ପାଖାପାଖି ୨୦ ଜଣ ଆତଙ୍କୀ ଇସ୍ରାଏଲରେ ବଡ଼ ଧର ଆକ୍ରମଣ କରିବାକୁ ଯୋଜନା କରିଛନ୍ତି । ଏପଟେ ଇସ୍ରାଏଲ ସରକାର ସେଠାକାର ଲୋକଙ୍କୁ ସତର୍କ ରହିବାକୁ କହିବା ସହ ସେନା ପଠାଯାଇଛି । ଗାଜା ଦଖଲ ପାଇଁ ଇସ୍ରାଏଲ ନିଜର ହମଲାକୁ ଜୋରଦାର କରିଛି ।

ଗାଜାର ଆଖପାଖ ଅଞ୍ଚଳକୁ ନିଜ ଦଖଲକୁ ନେଇଥିବା ଇସ୍ରାଏଲ ଏବେ ଆଉ ପାଦ ଆଗେଇଛି । ଖୁବଶୀଘ୍ର ଇସ୍ରାଏଲ କବଜାକୁ ଗାଜା ଚାଲି ଆସିବ । ଗାଜାକୁ ବିଜୁଳି ଓ ପାଣି ଯୋଗାଣ ବନ୍ଦ କରାଯାଇଛି । ଏବେ ସଂପୂର୍ଣ୍ଣ ଗାଜା ଷ୍ଟ୍ରିପ ଅନ୍ଧକାରମୟ ହୋଇ ଯାଇଛି । ଇସ୍ରାଏଲ ଆକ୍ରମଣ ପରଠାରୁ ପାଲେଷ୍ଟାଇନ ଏନକ୍ଲେଭରେ ଥିବା ଏକ ମାତ୍ର ବିଜୁଳି ଷ୍ଟେସନ କାମ କରୁଥିଲା । ଏବେ ସେଠାରେ ତେଲ ଶେଷ ହୋଇ ଯାଇଛି । ଫଳରେ ପାୱାର ଷ୍ଟେସନ ମଧ୍ୟ କାର୍ଯ୍ୟକ୍ଷମ ହେଉନି । ପୂରା ଗାଜା ଅନ୍ଧାର ଭିତରେ ରହୁଛି ।

ଦୁଇ ଦିନ ତଳେ ଇସ୍ରାଏଲ ପକ୍ଷରୁ ଗାଜାକୁ ସଂପୂର୍ଣ୍ଣ ଅନ୍ଧକାର କରାଯିବ ବୋଲି ଚେତାବନୀ ଦିଆଯାଇଥିଲା । ଇସ୍ରାଏଲ ଖାଦ୍ୟ ଓ ତେଳ ଯୋଗାଣ ଗାଜାକୁ ବନ୍ଦ କରି ଦେଇଥିଲା । ଅନ୍ୟପକ୍ଷରେ ତେଲଅଭିଭରେ ଥିବା ଇସ୍ରାଏଲର ବେନଗୁରିଅନ ଏୟାରପୋର୍ଟ ଉପରେ ହମାସ ଆତଙ୍କବାଦୀମାନେ ରକେଟ ମାଡ଼ କରିଛନ୍ତି । ଏଥିପାଇଁ ଏୟାରପୋର୍ଟ ଓ ଏହାର ଆଖପାଖ ଅଞ୍ଚଳ କ୍ଷତିଗ୍ରସ୍ତ ହୋଇଛି । ଏହାକୁ ଦୃଷ୍ଟିରେ ରଖି ଏୟାରପୋର୍ଟରେ ସମସ୍ତ ସେବାକୁ ବାତିଲ କରି ଦିଆଯାଇଛି । ସେପଟେ ଆମେରିକା ଇସ୍ରାଏଲକୁ ଯୁଦ୍ଧ ପାଇଁ ଘାତକ ଅସ୍ତ୍ରଶସ୍ତ୍ର ଯୋଗାଉଛି । ଗତକାଲି ଏକ ବିମାନ ଭର୍ତ୍ତି ଯୁଦ୍ଧାସ୍ତ୍ର ଆମେରିକା ଇସ୍ରାଏଲକୁ ପଠାଇଛି ।