ଭୁବନେଶ୍ୱର: ସୂଚନା ଅଧିକାର କର୍ମୀ କହି ବ୍ଲାକମେଲ ମାମଲା । ମାଷ୍ଟରମାଇଣ୍ଡ କାହ୍ନୁଚରଣ ପ୍ରଧାନକୁ ଗିରଫ କଲା STF । ଘଟଣାରେ ବ୍ରହ୍ମପୁରର କିଶୋର ମିଶ୍ରଙ୍କୁ ଶୁକ୍ରବାର ଗିରଫ କରାଯାଇଥିଲା । କାହ୍ନୁଚରଣ ଆକାଉଣ୍ଟରେ କୋଟି କୋଟି ଟଙ୍କା ଟ୍ରାଞ୍ଜକ୍ସନ ହୋଇଛି । ଅଭିଯୁକ୍ତ ନିକଟରୁ କିଛି ବ୍ୟାଙ୍କ ପାସବୁକ ଓ ଏଟିଏମ କାର୍ଡ ଜବତ ହୋଇଛି । ସରକାରୀ କର୍ମଚାରୀଙ୍କୁ ବ୍ଲାକମେଲ କରୁଥିଲେ ନକଲି ଆର୍ଟିଆଇ କର୍ମୀ । ଲୋକଙ୍କୁ ଡରାଇ ଧମକାଇ କୋଟି କୋଟି ଟଙ୍କା ରୋଜଗାର କରୁଥିଲେ । କୋରାପୁଟ ବସଷ୍ଟାଣ୍ଡରେ ନକଲି ଆଇକାର୍ଡ଼ ପକାଇ ବୁଲୁଥିଲେ କିଶୋର । ପୋଲିସର ସନ୍ଦେହ ହେବାରୁ ଅଭିଯୁକ୍ତକୁ ହେପାଜତକୁ ନିଆଯାଇଥିଲା । ତାଙ୍କଠାରୁ ଆଇ ଆଣ୍ଡ ପିଆରର ନକଲି ଆଇକାର୍ଡ଼ ପାଇଥିଲା ପୋଲିସ । କୋରାପୁଟ ଟାଉନ ଥାନା ପୋଲିସ ଚିଠି ଲେଖି STF କୁ ଏ ସମ୍ପର୍କରେ ଅବଗତ କରାଇଥିଲା । ଅଭିଯୁକ୍ତଙ୍କ ଆକାଉଣ୍ଟ ତଥ୍ୟ ପାଇଁ RBI କୁ ଚିଠି ଲେଖିଲା STF ।
ଚନ୍ଦ୍ରର ପ୍ରି-ଲ୍ୟାଣ୍ଡିଂ ଅରବିଟରେ ପ୍ରବେଶ କରିବାରେ ବିଫଳ ହୋଇଛି ଲୁନା-୨୫ ଲ୍ୟାଣ୍ଡର
ମସ୍କୋ: ଫେଲ ହୋଇପାରେ ଋଷର ମୁନ ମିଶନ । ଚନ୍ଦ୍ରର ପ୍ରି-ଲ୍ୟାଣ୍ଡିଂ ଅରବିଟରେ ପ୍ରବେଶ କରିବାରେ ବିଫଳ ହୋଇଛି ଲୁନା-୨୫ ଲ୍ୟାଣ୍ଡର । ଦୀର୍ଘ ୫୦ ବର୍ଷ ପରେ ଚନ୍ଦ୍ର ଅଭିଯାନ ଆରମ୍ଭ କରିଥିବା ଋଷ ଲାଗି ଏହା ଏକ ଧକ୍କା ସାବ୍ୟସ୍ତ ହୋଇଛି । ଋଷୀୟ ସ୍ପେସ କର୍ପୋରେସନ ରୋସକସମସ ପକ୍ଷରୁ କୁହାଯାଇଛି- ପରିସ୍ଥିତି ପ୍ରତି ସଜାଗ ନଜର ରଖାଯାଇଛି । ତେବେ ମିଶନ ସମ୍ପର୍କରେ ସବିଶେଷ ସ୍ପଷ୍ଟୀକରଣ ଦିଆଯାଇନାହିଁ ।
ଗତ ସପ୍ତାହରେ ପ୍ରେରଣ କରାଯାଇଥିବା ଲୁନା-୨୫ ଆସନ୍ତା କାଲି ଚନ୍ଦ୍ରର ସାଉଥ ପୋଲରେ ଅବତରଣ କରିବାର କାର୍ଯ୍ୟକ୍ରମ ଥିଲା । ପ୍ରିଲ୍ୟାଣ୍ଡିଂ ଅରବିଟରେ ପ୍ରବେଶ କରିବା ପୂର୍ବରୁ ଏକ ବୈଷୟିକ ତ୍ରୁଟି ଦେଖାଯାଇଥିବାରୁ ମିଶନ ପ୍ରତି ଧକ୍କା ପହଞ୍ଚିଛି । ଏହି ସମସ୍ୟା ପରେ ବୈଜ୍ଞାନିକମାନେ ସ୍ଥିତି ସମୀକ୍ଷା କରୁଛନ୍ତି । ଗତ ଅଗଷ୍ଟ ୧୧ ତାରିଖରେ ଲୁନା ୨୫ର ଉତକ୍ଷେପଣ କରାଯାଇଥିବାବେଳେ ୧୨ ଓ ୧୪ ତାରିଖରେ ସଫଳତାର ସହ କରିଥିଲା ଟ୍ରାଜେକ୍ଟୋରୀ କରେକସନ ।
ଘର ଭିତରୁ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର, ଆତ୍ମହତ୍ୟା କରିଥିବା ସନ୍ଦେହ
ଭୁବନେଶ୍ୱର: ଭୁବନେଶ୍ବର ପ୍ରାଚୀବିହାର ଅଞ୍ଚଳରେ ଘର ଭିତରୁ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର । ମୃତଦେହକୁ ଉଦ୍ଧାର କରିଛି ମଞ୍ଚେଶ୍ୱର ଥାନା ପୋଲିସ । ଘର ଭିତର ପଟୁ ଯୁବକ କବାଟ ବନ୍ଦ କରି ବେକରେ ଗାମୁଛା ବାନ୍ଧି ଫ୍ୟାନରେ ଝୁଲି ପଡ଼ିଥିବା ଦେଖିବାକୁ ମିଳିଥିଲା । ପୋଲିସ କବାଟ ଭାଙ୍ଗି ଭିତରୁ ମୃତଦେହ ଉଦ୍ଧାର କରିଛି । ମୃତ ଯୁବକଙ୍କ ନାଁ ଦୀପକ ଦାସ । ବୟସ ପ୍ରାୟ ୨୬ ବର୍ଷ ହେବ ବୋଲି ଜଣାପଡ଼ିଛି । ଘର କେନ୍ଦ୍ରାପଡ଼ା ଜିଲ୍ଲା ରାଜକନିକା ଅଞ୍ଚଳରେ ବୋଲି ସୂଚନା ମିଳିଛି । ଦୀପକ ଏସବିଆଇ ଫାଇନାନ୍ସରେ କାମ କରୁଥିଲେ ଓ ପ୍ରାଚୀବିହାର ଅଞ୍ଚଳରେ ଘର ଭଡ଼ା ନେଇ ରହୁଥିଲେ । ପ୍ରେମ ବ୍ୟାପାରକୁ ନେଇ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି । ଦୀର୍ଘ ସମୟ ଧରି ରୁମ୍ କବାଟ ନଖୋଲିବାରୁ ପୋଲିସକୁ ସୂଚନା ଦିଆଯାଇଥିଲା । ପୋଲିସ ପହଞ୍ଚି କବାଟ ଭାଙ୍ଗି ମୃତଦେହ ଉଦ୍ଧାର କରିବା ସହ ତଦନ୍ତ ଆରମ୍ଭ କରିଛି ।
ପୁରୀ ପରେ ଝାରସୁଗୁଡ଼ା ଜିଲ୍ଲାରେ 5T ସଚିବଙ୍କ ମାରାଥନ ସମୀକ୍ଷା
ଝାରସୁଗୁଡ଼ା: ପୁରୀ ପରେ ଝାରସୁଗୁଡ଼ାରେ ବିକାଶ ସମୀକ୍ଷା । ବ୍ରଜରାଜନଗରରେ 5T ସଚିବଙ୍କ ମାରାଥନ ସମୀକ୍ଷା । ମାଆ ରାମଚଣ୍ଡୀ ମନ୍ଦିରରେ ପୂଜାର୍ଚ୍ଚନା ସହ ମାଆଙ୍କ ଦର୍ଶନ କରିଛନ୍ତି 5-ଟି ସଚିବ ଭି କେ ପାଣ୍ଡିଆନ । ମନ୍ଦିର ଉନ୍ନତିକରଣ ଓ ଆବଶ୍ୟକତା ନେଇ ମନ୍ଦିର ପୂଜକ, କର୍ମକର୍ତ୍ତାଙ୍କ ସହ ସଚିବ ଆଲୋଚନା କରିଛନ୍ତି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ 5ଟି ସଚିବ ଝାରସୁଗୁଡ଼ା ଗସ୍ତ କରିଥିବା ବେଳେ ସ୍ଥାନୀୟ ଲୋକେ ତାଙ୍କୁ ସ୍ବାଗତ କରିଛନ୍ତି ।
ମାଆ କୋଳରେ ଶୋଇଥିବା ବେଳେ ସାପ କାମୁଡ଼ାରେ ଶିଶୁକନ୍ୟା ମୃତ
ଯାଜପୁର: ମାଆ କୋଳରେ ଛୁଆକୁ କାମୁଡ଼ିଲା ସାପ । ରାତିରେ ମାଆ କୋଳରେ ଶୋଇଥିବା ବେଳେ ୭ ମାସର ଶିଶୁକନ୍ୟାର ଓଠକୁ ଏକ ବିଷାକ୍ତ ସାପ କାମୁଡ଼ି ଦେବାରୁ ଶିଶୁଟିର ମୃତ୍ୟୁ ଘଟିଛି । ଯାଜପୁର ଜିଲ୍ଲା ଟମକା ଥାନା ଗୋପପୁର ଗାଁର ରଘୁନାଥ ଲୋହାରଙ୍କ ପତ୍ନୀ ଓ ୭ ମାସର ଝିଅ ଶୋଇଥିବା ବେଳେ ବିଳମ୍ବିତ ରାତିରେ ଝିଅର ଓଠକୁ ଏକ ବିଷାକ୍ତ ସାପ କାମୁଡ଼ି ଦେଇଥିଲା । ଝିଅଟି ଜୋରରେ କାନ୍ଦିବାରୁ ମାଆ ଉଠି ଦେଖିବା ବେଳକୁ ସାପଟି ଝିଅ ଓଠକୁ କାମୁଡି ଧରିଥିଲା । ମାଆ ଉଠି ପଡ଼ିବାରୁ ସାପଟି ପଳାଇ ଯାଇଥିଲା । ତୁରନ୍ତ କୁନିଝିଅଟିକୁ ପରିବାର ଲୋକ ଆନନ୍ଦପୁର ମେଡିକାଲ ନେଇଥିଲେ । ଶିଶୁଟିକୁ ଡାକ୍ତର ମୃତ ଘୋଷଣା କରିଛନ୍ତି ।
ଜଙ୍ଗଲକୁ କାଠ ଆଣିବାକୁ ଯାଇଥିବା ବେଳେ ବୃଦ୍ଧାଙ୍କୁ ଦଳି ମାରିଲା ଦନ୍ତା
ବଲାଙ୍ଗୀର: ବୃଦ୍ଧାଙ୍କୁ ଦଳିଦେଲା ଦନ୍ତା । ଜଙ୍ଗଲକୁ ଜାଲେଣି କାଠ ଆଣିବାକୁ ଯାଇଥିବା ବେଳେ ହାତୀ ଆକ୍ରମଣରେ ବୃଦ୍ଧାଙ୍କ ମୃତ୍ୟୁ ହୋଇଛି । ଘଟଣା ଘଟିଛି ବଲାଙ୍ଗିର ଜିଲ୍ଲା ସଦର ରେଞ୍ଜ ଅଧୀନ ଝାଙ୍କରକୋଟ ଜଙ୍ଗଲରେ । ମୃତକ ହେଲେ ଆଟଗାଁର ୬୫ ବର୍ଷୀୟା ମୁଗ ନନ୍ଦ । ଗତକାଲିଠୁ ଜଙ୍ଗଲକୁ ଯାଇ ଆଉ ଫେରି ନଥିବା ବେଳେ ଆଜି ସକାଳୁ ଘଞ୍ଚ ଜଙ୍ଗଲରୁ ତାଙ୍କ ମୃତଦେହ ଉଦ୍ଧାର କରାଯାଇଛି ।
ସୁଧୁରୁନି ହିମାଚଳ ପ୍ରଦେଶ ସ୍ଥିତି, ଉଦ୍ଧାର କାର୍ଯ୍ୟ ଜାରି ଭିତରେ ପ୍ରବଳ ବର୍ଷା ନେଇ ଆକଳନ
ସିମଲା: ସୁଧୁରୁନି ହିମାଚଳ ପ୍ରଦେଶ ସ୍ଥିତି । ଉଦ୍ଧାର କାର୍ଯ୍ୟ ଜାରି ରହିଥିବାବେଳେ ପ୍ରବଳ ବର୍ଷା ନେଇ ପାଣିପାଗ ବିଭାଗର ଆକଳନ ଅଧିକ ଚିନ୍ତା ସୃଷ୍ଟି କରିଛି । ସମର ହିଲ୍ସ ଅଞ୍ଚଳରେ ପୁନର୍ବାର ଭୂସ୍ଖଳନ ହେବା ଯୋଗୁ ସେଠାରେ ଉଦ୍ଧାର କାର୍ଯ୍ୟ ଜାରି ରହିଛି । ଆଜି ଓ କାଲି ସାରା ରାଜ୍ୟରେ ବର୍ଷା ହେବ ବୋଲି ଆଶଙ୍କା କରାଯାଇଛି । ଏହା ସହ ୨୨ ଓ ୨୩ ତାରିଖରେ ବି ପ୍ରବଳ ବର୍ଷା ଆଶଙ୍କା ରହିଛି ବୋଲି ସୂଚନା ପରେ ବଢିଛି ଚିନ୍ତା । ଲ୍ୟାଣ୍ଡ ସ୍ଲାଇଡ, ଫ୍ଲାସ ଫ୍ଲଡ, ବିଭିନ୍ନ ନଦୀରେ ଜଳପତ୍ତନ ବୃଦ୍ଧି ଯୋଗୁ ଏବେ ବି ସାରା ରାଜ୍ୟରେ ହାହାକାର ଅବସ୍ଥା ଜାରି ରହିଛି । ରାଜ୍ୟର ବିପତ୍ତିକୁ ଜାତୀୟ ବିପର୍ଯ୍ୟୟ ଘୋଷଣା ଲାଗି ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁ ଦାବି କରିଥିବା ସତ୍ତ୍ବେ କେନ୍ଦ୍ର ପକ୍ଷରୁ କୌଣସି ପଦକ୍ଷେପ ନିଆଯାଇନାହିଁ । ରାଜ୍ୟରେ ବର୍ଷାଜନିତ କ୍ଷତି ୧୦ ହଜାର କୋଟି ଟଙ୍କାରୁ ଅଧିକ ହେବ ବୋଲି କହିଥିଲେ ସୁଖୁ ।
ଲଦାଖ ଅଞ୍ଚଳରେ ପ୍ରବେଶ କରିଛି ଚୀନ୍: ରାହୁଲ ଗାନ୍ଧୀ
ଲଦାଖ: ଲଦାଖରେ ବିଭିନ୍ନ କାର୍ଯ୍ୟକ୍ରମରେ ସାମିଲ କଂଗ୍ରେସ ନେତା ରାହୁଲ ଗାନ୍ଧୀ । ଲଦାଖର ପଙ୍ଗୋଙ୍ଗ ସୋ’ରେ ପିତା ତଥା ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି ରାହୁଲ । ରାହୁଲ କହିଛନ୍ତି- ଏହି ଅଞ୍ଚଳରେ ଚୀନ ପ୍ରବେଶ କରିଛି ବୋଲି ସ୍ଥାନୀୟ ଲୋକେ ମତ ପ୍ରକାଶ କରୁଛନ୍ତି । ଚୀନ ବି କିଛି ଅଞ୍ଚଳ ନିଜ ଅକ୍ତିଆରକୁ ନେଇଛି । ଲୋକଙ୍କ ଗୋଚର ଜମିକୁ ବି ଚୀନ କବଜା କରିଛି । ଏଠାକାର ଇଞ୍ଚେ ଜମି ଚୀନ ନେଇନାହିଁ ବୋଲି କେନ୍ଦ୍ର ସରକାର କହୁଥିଲେ ମଧ୍ୟ ବାସ୍ତବରେ ତାହା ସତ ନୁହେଁ । ସେପଟେ ଦିଲ୍ଲୀ ବୀରଭୂମିରେ ମଧ୍ୟ ରାଜୀବ ଗାନ୍ଧୀ ସ୍ମାରକୀରେ ସ୍ମୃତି ତର୍ପଣ କରିଛନ୍ତି ସୋନିଆ ଗାନ୍ଧୀ, ପ୍ରିୟଙ୍କା ଗାନ୍ଧୀ, ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେ ପ୍ରମୁଖ । ଗତକାଲି ପୂର୍ବ ଲଦାଖରେ ପଙ୍ଗୋଙ୍ଗ ହ୍ରଦ ଯାଏ ବାଇକ ଚଳାଇ ଚର୍ଚ୍ଚାର କାରଣ ପାଲଟିଥିଲେ ରାହୁଲ । ୨୦୧୯ରେ ଧାରା ୩୭୦ ଉଚ୍ଛେଦ ପରେ ଲଦାଖକୁ ଏହା ହେଉଛି ରାହୁଲଙ୍କ ପ୍ରଥମ ଗସ୍ତ ।
ମାଲ ବୋଝେଇ ଟ୍ରକରୁ ଡିଜେଲ ଚୋରି ରାକେଟର ୩ ଗିରଫ
ଦେବଗଡ଼: ଦେବଗଡ଼ ଥାନା ତିଳେଇବଣି ଫାଣ୍ଡି ଅଞ୍ଚଳରେ ମାଲ ବୋଝେଇ ଟ୍ରକରୁ ଡିଜେଲ ଚୋରି ରାକେଟର ୩ ଅଭିଯୁକ୍ତ ଗିରିଫ । ସେମାନଙ୍କ ନିକଟରୁ ପଲସର ବାଇକ, ତେଲ ଟାଙ୍କି ଭାଙ୍ଗିବାରେ ବ୍ୟବହୃତ ସାମଗ୍ରୀ ସହ ଚୋରା ଡିଜେଲ କିଣୁଥିବା ଗୁଣ୍ଡେଇମରା ଗାଁର ହବିଜୁଲ ଶେଖକୁ ମଧ୍ୟ ଗିରଫ କରିଛି ପୋଲିସ । ଅଭିଯୁକ୍ତ ଶେଖ ନିକଟରୁ ୫୦ ଲିଟରରୁ ଅଧିକ ଚୋରା ଡିଜେଲ ଜବତ ହୋଇଛି । ତିଳେଇବଣି ଫାଣ୍ଡି ଅଞ୍ଚକ ଦେଇ ଯାଇଥିବା ୪୯ ନମ୍ବର ଜାତୀୟ ରାଜପଥରେ ରାତ୍ରି ସମୟରେ ଛିଡ଼ା ହୋଇଥିବା ମାଲ ବୋଝେଇ ଟ୍ରକ ମାନଙ୍କରୁ ଡିଜେଲ ଚୋରି ଅଭିଯୋଗ ଆସୁଥିବା ବେଳେ ଚୋରି କରୁଥିବା ଚୋରଙ୍କ ସମ୍ପର୍କରେ କୌଣସି ସୁରାକ ମିଳୁନଥିଲା । ଗତକାଲି ବିଳମ୍ବିତ ରାତିରେ ଫାଣ୍ଡି ପୋଲିସ ପାଟ୍ରୋଲିଂ କରୁଥିବା ବେକେ କୈଳାସ ଛକ ନିକଟରେ ଦୁଇ ଜଣ ଦୁର୍ବୁତ୍ତ ଏକ ପଲସର ବାଇକରେ ସନ୍ଦେହଜନକ ଅବସ୍ଥାରେ ବୁଲୁଥିବା ବେଳେ ପୋଲିସ ସେମାନଙ୍କୁ ଅଟକାଇବାକୁ ଚେଷ୍ଟା କରିଥିଲା । ମାତ୍ର ପୋଲିସକୁ ଦେଖି ଦୁର୍ବୁତ୍ତମାନେ ବାଇକକୁ ଛାଡି ଦୌଡ଼ି ପଳାଇବାକୁ ଉଦ୍ୟମ କରୁଥିବା ବେଳେ ପୋଲିସ ସେମାନଙ୍କୁ କାବୁ କରି ଥାନାକୁ ଆଣି ପଚରା ଉଚୁରା କରିଥିଲା ।
କାଳିମାଡ଼ ସତ୍ତ୍ବେ ଉଦାରତା ଦେଖାଇଲେ 5T ସଚିବ, ଗିରଫ ଭାସ୍କର ସାହୁକୁ ଛାଡ଼ିବାକୁ ଦେଲେ ନିର୍ଦ୍ଦେଶ
ପୁରୀ: କାଳିମାଡ଼ ସତ୍ତ୍ବେ ଉଦାରତା ଦେଖାଇଲେ 5T ସଚିବ ଭିକେ ପାଣ୍ଡିଆନ । ଗିରଫ ଭାସ୍କର ସାହୁକୁ ଛାଡ଼ିବାକୁ ନିର୍ଦ୍ଦେଶ ଦେଲେ 5T ସଚିବ । ଭିକେ ପାଣ୍ଡିଆନଙ୍କ ନିର୍ଦ୍ଦେଶ କ୍ରମେ ପୋଲିସ ଭାସ୍କର ସାହୁକୁ ଖଲାସ କରିଛି । ଅଭିଯୁକ୍ତ ଭାସ୍କରକୁ ଛାଡ଼ିବା ପରେ 5T ସଚିବଙ୍କୁ ଧନ୍ୟବାଦ ଜଣାଇଲେ ପରିବାର ଲୋକ । ଗତକାଲି 5T ସଚିବ ଭିକେ ପାଣ୍ଡିଆନଙ୍କ ସତ୍ୟବାଦୀ ଗସ୍ତ ସମୟରେ ତାଙ୍କ ଉପରେ ଭାସ୍କର ସାହୁ କାଳିମାଡ଼ କରିଥିଲା । ରାଜନୈତିକ ଦଳ ଦ୍ବାରା ପରିଚାଳିତ ହୋଇ ଭାସ୍କର ଏଭଳି କରିଥିବା ଜଣାପଡ଼ିଛି । ରାଜ୍ୟରେ ବିକାଶମୂଳକ କାମକୁ ବିରୋଧୀ ସହ୍ୟ କରିପାରୁନାହାନ୍ତି । ଅସହିଷ୍ଣୁ ହୋଇ ଏଭଳି ବିଶୃଙ୍ଖଳା ସୃଷ୍ଟି କରିବା ପାଇଁ ଷଡ଼ଯନ୍ତ୍ର କରୁଥିବା ସ୍ଥାନୀୟ ଲୋକ କହିଛନ୍ତି । କାଳିମାଡ଼ ସତ୍ତ୍ବେ ଭିକେ ପାଣ୍ଡିଆନ ହସହସ ମୁହଁରେ ଲୋକଙ୍କ ସହ ମିଶିବା ସହ ନିର୍ଦ୍ଧାରିତ କାର୍ଯ୍ୟକ୍ରମରେ ଯୋଗଦେଇଥିଲେ । ଏହା ବିରୋଧୀଙ୍କ ମୁହଁରେ ଶକ୍ତ ଚାପୁଡ଼ା ବୋଲି ମଧ୍ୟ କୁହାଯାଉଛି ।
ଯିଏ ବିକାଶ କାମରେ ବାହାରିଛି ତା ପାଇଁ ଏସବୁର କିଛି ଅର୍ଥ ନଥାଏ । ଲୋକଙ୍କ କାମ କରିବ ଲୋକାଭିମୂଖୀ ସରକାର ଆଉ ଜନତାଙ୍କ ପାଖରେ ପହଞ୍ଚିବ ଉତ୍ତରଦାୟୀ ପ୍ରଶାସନ । କାହିଁକି ନା ଓଡ଼ିଶାବାସୀଙ୍କ ସେବା କରିବାର ସଂକଳ୍ପ ନେଇଛି ମୋ ସରକାର । ଯେତେବେଳେ ଭଲ କାମ ହୁଏ, ଲୋକଙ୍କ ବିକାଶ ହୁଏ ସେତେବେଳେ ଅନେକ ବିକାଶ ବିରୋଧୀଙ୍କ ଅସହିଷ୍ଣୁତା ଶୀର୍ଷରେ ପହଞ୍ଚିଥାଏ । ଯାହାକି ପୁରୀ ଜିଲ୍ଲା ସତ୍ୟବାଦୀରେ ପରିଲକ୍ଷିତ ହୋଇଛି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଲୋକଙ୍କଠାରୁ ଅଭିଯୋଗ ଶୁଣିବାକୁ ସତ୍ୟବାଦୀରେ ପହଞ୍ଚିଥିଲେ 5T ସଚିବ ଭିକେ ପାଣ୍ଡିଆନ । ଏହି ସମୟରେ ଯୋଜନା ମୁତାବକ 5T ସଚିବଙ୍କ ଉପରକୁ କାଳିମାଡ଼ କରିଥିଲେ ବିକାଶ ବିରୋଧୀ । ଲୋକଙ୍କ ଭିତରେ ଲୁଚି ରହି ଖାଲି 5T ସଚିବ ନୁହଁନ୍ତି ପୁରୀ ଜିଲ୍ଲାପାଳ ଓ ଅନ୍ୟ ବରିଷ୍ଠ ଅଧିକାରୀଙ୍କୁ ବି କାଳିମାଡ଼ କରିଥିଲେ ।