spot_img
Home Blog Page 2828

ଇଡେନ ଗାର୍ଡେନ୍ସରେ କ୍ୟାରିଅରର ପ୍ରଥମ ଶତକ କରିଥିଲେ ସେଇଠି କଲେ ୪୯ତମ ଶତକ

ନନ୍ଦିଘୋଷ ବ୍ୟୁରୋ : ଜନ୍ମଦିନରେ ରେକର୍ଡ ମ୍ୟାଚ ଖେଳିଲେ ବିରାଟ କୋହଲି । ସାଉଥ ଆଫ୍ରିକା ବିପକ୍ଷରେ ଶତକ କରିବା ସହ ଦିନିକିଆରେ ଶତକ ସଂଖ୍ୟାରେ ସଚିନ ତେନ୍ଦୁଲକରଙ୍କ ସମକକ୍ଷ ହୋଇଛନ୍ତି ବିରାଟ । ଇଡେନ ଗାର୍ଡେନ୍ସରେ କ୍ୟାରିଅରର ପ୍ରଥମ ଶତକ ହାସଲ କରିଥିବା ବିରାଟ କୋହଲି ସେହି ଷ୍ଟାଡିୟମରେ ୪୯ତମ ଶତକ କରିଛନ୍ତି ବିରାଟ । ସଚିନ ତେନ୍ଦୁଲକର ଦିନିକିଆ କ୍ରିକେଟରେ ୪୫୨ ଇନିଂସରେ ୪୯ଟି ଶତକ ହାସଲ କରିଥିବା ବେଳେ ବିରାଟ ମାତ୍ର ୨୭୭ ଇନିଂସରେ ଏହି ରେକର୍ଡର ସମକକ୍ଷ ହୋଇଯାଇଛନ୍ତି । ଦିନିକିଆରେ ସର୍ବାଧିକ ଶତକ ହାସଲ କରିଥିବା ଖେଳାଳିଙ୍କ ତାଲିକାରେ ଏବେ ସଚିନ ଓ ବିରାଟ ଯୁଗ୍ମ ଭାବେ ପ୍ରଥମ ସ୍ଥାନରେ ରହିଛନ୍ତି । ବିରାଟଙ୍କ ଶତକ ପରେ ଚାରିଆଡୁ ଶୁଭେଚ୍ଛାର ସୁଅ ଛୁଟିଛି  । ବିରାଟ ଆଉ ଗୋଟିଏ ଶତକ ହାସଲ କରିବା କ୍ଷଣି ସଚିନଙ୍କୁ ପଛରେ ପକାଇ ଦିନିକିଆ ଇତିହାସରେ ୫୦ତମ ଶତକ ହାସଲ କରିବାର ନୂଆ କୀର୍ତ୍ତିମାନର ଅଧିକାରୀ ହେବେ । Watch Eden Gardens erupt as Virat Kohli hits 49th ODI hundred. Goosebumps -  India Today

ଏହି ଅବସରରେ ସଚିନ ଟୁଇଟ କହିଛନ୍ତି ଯେ ୪୯ରୁ ୫୦ ଶତକ କରିବା ପାଇଁ ମୋତେ ୩୬୫ ଦିନ ସମୟ ଲାଗିଥିବା ବେଳେ ମୋର ଆଶା ବିରାଟ ଆଗାମୀ ଖୁବକମ ଦିନରେ ୫୦ ତମ ଶତକ କରି ରେକର୍ଡ କରିବେ । ବିରାଟ ୨୦୦୯ରେ ଶ୍ରୀଲଙ୍କା ବିପକ୍ଷରେ ନିଜ ଦିନିକିଆ କ୍ୟାରିୟରର ପ୍ରଥମ ଶତକ ହାସଲ କରିଥିଲେ । ଆଜି ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚରେ ନିଜର ୪୯ତମ ଶତକ ହାସଲ କରିଛନ୍ତି । ସେ ଦିନିକିଆରେ ୪୯ଟି ଶତକ ହାସଲ କରିଥିବା ବେଳେ ଟେଷ୍ଟରେ ୨୯ଟି ଶତକ ହାସଲ କରିଛନ୍ତି । ଟି-୨୦ରେ ମଧ୍ୟ ସେ ଗୋଟିଏ ସେଞ୍ଚୁରି ମାରିଛନ୍ତି । ବିରାଟଙ୍କ ଅନ୍ତର୍ଜାତୀୟ ଶତକ ସଂଖ୍ୟା ଆଜି ୭୯ରେ ପହଞ୍ଚି ଯାଇଛି ।

ସପ୍ତାହକୁ ସୋମବାର ଓ ଶୁକ୍ରବାର ଭୁବନେଶ୍ବର-ଜୟପୁର ବିମାନ ସେବା ଯୋଗାଇବ ଇଣ୍ଡିଆ ଓ୍ବାନ୍

କୋରାପୁଟ : ଆଜି ଉଡିବ ଭୁବନେଶ୍ବର-ଜୟପୁର ଦ୍ବିତୀୟ ବିମାନ । ସପ୍ତାହକୁ ସୋମବାର ଓ ଶୁକ୍ରବାର ସେବା ଯୋଗାଇବ ଇଣ୍ଡିଆ ଓ୍ବାନ୍ । ଆର୍ଥିକ ସହାୟତା ଯୋଗାଇ ଦେଉଛନ୍ତି ରାଜ୍ୟ ସରକାର । ଏହି ବିମାନ ସେବା ପର୍ଯ୍ୟଟନ କ୍ଷେତ୍ରର ବିକାଶ କରିବା ସହ ଲୋକଙ୍କ ଅର୍ଥନୈତିକ ବିକାଶ ଦିଗରେ ସହାୟକ ହେବ । ଗତ ବର୍ଷ ଭୁବନେଶ୍ବର-ଜୟପୁରକୁ ପ୍ରଥମ ବିମାନ ସେବା ଆରମ୍ଭ ହୋଇଥିବା ବେଳେ ଏବେ ଦ୍ବିତୀୟ ବିମାନ ସେବା ଆରମ୍ଭ ହେବାକୁ ଯାଉଛି । ବିମାନଟି  ଭୁବନେଶ୍ବର ବିମାନବନ୍ଦରରୁ ସକାଳ ୭ଟା ୧୦ରେ ଉଡାଣ ଭରିବ । ଜୟପୁର ବିମାନବନ୍ଦରରେ ସକାଳ ୮ଟା ୪୫ରେ ଅବତରଣ କରିବ । ସେହିପରି ଜୟପୁରରୁ ସକାଳ ୯ଟାରେ ବାହାରି ଭୁବନେଶ୍ବରରେ ୧୦ଟା ୩୫ରେ ପହଞ୍ଚିବ ।

ଏହି ଖବର ପଢନ୍ତୁ : ଦିଲ୍ଲୀର ବାୟୁ ୨୫-୩୦ଟି ସିଗାରେଟର ଧୂଆଁ ସହ ସମାନ

ଏହି ବିମାନରେ ୯ ଜଣ ଯାତ୍ରୀ ଯାତ୍ରା କରିବା ପାଇଁ ବ୍ୟବସ୍ଥା ରହିଛି । ଜୟପୁରକୁ ଗୋଟିଏ ବିମାନ କମ୍ ପଡୁଥିବାର ଫାଇଭ-ଟି ଓ ନବୀନ ଓଡ଼ିଶା ଅଧ୍ୟକ୍ଷ ଭିକେ ପାଣ୍ଡିଆନଙ୍କ ଜିଲ୍ଲା ଗ୍ରସ୍ତ ସମୟରେ ଆଉ ଏକ ବିମାନ ଚଳାଇବାକୁ ଅନୁରୋଧ କରିଥିଲେ ଲୋକେ । ମୁଖ୍ୟମନ୍ତ୍ରୀ ଏହି ଦାବି ଉପରେ ମୋହର ମାରିଥିବାରୁ ଜୟପୁରବାସୀ କୃତଜ୍ଞତା ଜଣାଇଛନ୍ତି ।

 

ଦିଲ୍ଲୀର ବାୟୁ ୨୫-୩୦ଟି ସିଗାରେଟର ଧୂଆଁ ସହ ସମାନ

ନନ୍ଦିଘୋଷ ବ୍ୟୁରୋ : ବିଷ ବଳୟରେ ଦିଲ୍ଲୀ-ଏନ୍ସିଆର । କ୍ରମାଗତ ଭାବେ ବିଷାକ୍ତ ହେବାରେ ଲାଗିଛି ବାୟୁ । ବାୟୁ ମାନକ ସୂଚକାଙ୍କ ଗୁରୁତର ଶ୍ରେଣୀରେ ରହିଛି । ଦିଲ୍ଲୀର ଏକ୍ୟୁଆଇ ୫୦୦ ପାର୍ କରିଛି । ଏବେ ଦିଲ୍ଲୀର ବାୟୁ ୨୫-୩୦ଟି ସିଗାରେଟର ଧୂଆଁ ସମାନ ହୋଇଯାଇଛି । ସବୁ ବର୍ଗର ଲୋକଙ୍କ ଉପରେ ଏହାର ପ୍ରଭାବ ପଡ଼ିବ ବୋଲି ସେ ଚେତାବନୀ ଦେଇଛନ୍ତି । ଗର୍ଭବତୀଙ୍କ ପେଟରେ ବଢୁଥିବା ଶିଶୁ ଉପରେ ଏହାର କୁପ୍ରଭାବ ପଡ଼ିବ । ଅନ୍ୟପକ୍ଷରେ ଦିଲ୍ଲୀ ସରକାର ପ୍ରଦୂଷଣ ସ୍ଥିତିକୁ ଦେଖି ଜରୁରୀ ବୈଠକ ଡକାଇବାକ ପାଇଁ କେନ୍ଦ୍ର ସରକାରଙ୍କ ନିକଟରେ ଦାବି କରିଛନ୍ତି । Air Pollution Reaches Near-Maximum Level Possible In Delhi, 100 Times WHO's Limits | Nation

ଖୁବଶୀଘ୍ର ୫ ରାଜ୍ୟ ଦିଲ୍ଲୀ, ଉତ୍ତରପ୍ରଦେଶ, ପଞ୍ଜାବ, ରାଜସ୍ଥାନ ଏବଂ ହରିୟାଣା ପରିବେଶ ମନ୍ତ୍ରୀଙ୍କ ସହ ବୈଠକ ହେବ ।  ପ୍ରଦୂଷଣ ଯୋଗୁଁ ଆଗ୍ରାସ୍ଥିତ ତାଜମହଲ ସମ୍ପୂର୍ଣ୍ଣ ଅଦୃଶ୍ୟ ଭଳି ଦେଖାଯାଉଛି । ଉତ୍ତରପ୍ରଦେଶର ଘାଜିଆବାଦ, ମୋରାଦାବାଦ, ନୋଏଡା, କାନପୁର ଆଦିର ସ୍ଥିତି ବି ବେହାଲ । ପଞ୍ଜାବର ଭତିଣ୍ଡାରେ ବି ପଡିଛି ପ୍ରଦୂଷଣର ପ୍ରଭାବ ।  ସେପଟେ ପଞ୍ଜାବରେ ନଡା ଜାଳିବାରୁ ଚାଷୀଙ୍କୁ ନିବୃତ୍ତ ରଖିବା ଲାଗି ପ୍ରଶାସନ ଉଦ୍ୟମ କରିଛି  ।

ବିଜୟ ନହେବା ପର୍ଯ୍ୟନ୍ତ ଯୁଦ୍ଧ ଜାରି ରହିବ : ଇସ୍ରାଏଲ ପ୍ରଧାନମନ୍ତ୍ରୀ

ନନ୍ଦିଘୋଷ ବ୍ୟୁରୋ : ଭୟଙ୍କର ରୂପ ନେବ ମଧ୍ୟପ୍ରାଚ୍ୟ ଯୁଦ୍ଧ । ହମାସ ନିକଟରେ ପଣବନ୍ଦୀ ଥିବା ୨୦୦ରୁ ଅଧିକ ଲୋକଙ୍କୁ ନଛାଡ଼ିବା ଯାଏ ଯୁଦ୍ଧ ଜାରି ରହିବ  । ଆମର ବିଜୟ ନହେବା ପର୍ଯ୍ୟନ୍ତ ଯୁଦ୍ଧ ଜାରି ରହିବ ବୋଲି କହିଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ  । ପାଲେଷ୍ଟାଇନରେ ହୋଇଥିବା କ୍ଷୟକ୍ଷତି ନେଇ ୟୁରୋପୀୟ ରାଷ୍ଟ୍ର ଚିନ୍ତା ପ୍ରକଟ କରୁଥିବା ବେଳେ ଏହି ଯୁଦ୍ଧକୁ ତୁରନ୍ତ ବନ୍ଦ କରଦେବାକୁ ଅପିଲ କରିଛନ୍ତି  । କିନ୍ତୁ ଇସ୍ରାଏଲ ଏଭଳି ପରାମର୍ଶକୁ ସମ୍ପୂର୍ଣ୍ଣ ଖଣ୍ଡନ କରିଛନ୍ତି  । ସେପଟେ ଗତକାଲି ଗାଜାରେ ପରମାଣୁ ବୋମା ବିସ୍ପୋରଣ କରିବାକୁ ଯୋଜନା ଚାଲିଛି ବୋଲି ଇସ୍ରାଏଲର ଜଣେ ମନ୍ତ୍ରୀ କହିବା ପରେ ଟେନସନ ଆହୁରି ବଢିଛି  । ଗାଜାରେ ଥିବା ଏକ ଶରଣାର୍ଥୀ କ୍ୟାମ୍ପରେ ଇସ୍ରାଏଲର ରକେଟ ମାଡ଼ ଯୋଗୁଁ ୭୦ରୁ ଅଧିକ ଲୋକଙ୍କ ମୃତ୍ୟୁ ହୋଇଛି  । ଇସ୍ରାଏଲର ମନ୍ତ୍ରୀ ତଥା ପ୍ରଧାନମନ୍ତ୍ରୀ ବେଞ୍ଜାମିନଙ୍କ ଘନିଷ୍ଠ ଆମିଚାୟୀ ଏଲିୟାହୁ ପରମାଣୁ ଆକ୍ରମଣ ପାଇଁ ଏକ ବିକଳ୍ପ ରହିଛି ବୋଲି କହିଥିଲେ । ଆବଶ୍ୟକ ପଡ଼ିଲେ ସମ୍ପୂର୍ଣ୍ଣ ଗାଜାକୁ ଧ୍ବଂଶ କରାଯିବ ।Israel-Hamas war: List of key events, day 21 | Israel-Palestine conflict  News | Al Jazeera

ଏଥିପାଇଁ ବିଚାର ବିମର୍ଷ ଜାରି ରହିଛି  । ଇସ୍ରାଏଲର ମନ୍ତ୍ରୀଙ୍କ ଏଭଳି ବୟାନ ପରେ ନିଜେ ପ୍ରଧାନମନ୍ତ୍ରୀ ବେଞ୍ଜାମିନ ମଧ୍ୟ ଆଶ୍ଚର୍ଯ୍ୟ ପ୍ରକଟ କରିଛନ୍ତି  । ସୋସିଆଲ ମିଡିଆରେ ପ୍ରତିକ୍ରିୟା ରଖି ସ୍ଥିତି ସମ୍ଭାଳିବାକୁ ଚେଷ୍ଟା କରିଛନ୍ତି  । ମନ୍ତ୍ରୀ ଯାହା କହିଛନ୍ତି ସେଥିରେ କିଛି ସତ୍ୟତା ନାହିଁ ବୋଲି କହିଛନ୍ତି ବେଞ୍ଜାମିନ । ଏହାଏକ ଦାୟିତ୍ବହୀନ ମନ୍ତବ୍ୟ ବୋଲି କହିଛନ୍ତି ବେଞ୍ଜାମିନ । ହମାସ ବିରୋଧରେ ଲଢେଇ ଜାରି ରହିବ । ସାଧାରଣ ଲୋକଙ୍କୁ କୌଣସି ଅସୁବିଧା ନକରି ହମାସ ବିରୋଧ ଏହି ସଂଘର୍ଷ ଜାରି ରହିବ ବୋଲି ବେଞ୍ଜାମିନ କହିଛନ୍ତି  ।

ବିରାଟଙ୍କ ୮୩ ପ୍ରତିଶତ ଶତକରେ ଜିତିଛି ଭାରତ

କୋଲକାତା: ବିଶ୍ବକପରେ ଅପରାଜେୟ ଭାରତ। ଚଳିତ ବିଶ୍ବକପର ଅଷ୍ଟମ ମ୍ୟାଚରେ ଦକ୍ଷିଣ ଆଫ୍ରିକାକୁ ଭେଟିଥିବାବେଳେ ୨୪୩ ରନରେ ପରାସ୍ତ କରିଛି ଭାରତ। ଟସ୍ ଜିତି ପ୍ରଥମେ ଭାରତ ବ୍ୟାଟିଂ କରିଥିବାବେଳେ କୋହଲି ଦମଦାର ଶତକ ହାସଲ କରିଛନ୍ତି । ଦିନିକିଆରେ ୪୯ ଶତକ ସହ ବିରାଟ ନୂଆ କିର୍ତ୍ତୀମାନ ସ୍ଥାପନ କରିଛନ୍ତି । ସଚିନ ୪୯ ଶତକ ହାସଲ କରିଥିବାବେଳେ କମ ପାଳିରେ ସଚିନଙ୍କ ସମକକ୍ଷ ହୋଇଛନ୍ତି କୋହଲି । ଉଭୟ ସ୍ବଦେଶ ମାଟିରେ ଅଧିକ ଶତକ ହାସଲ କରିଛନ୍ତି । କୋହଲି ନିଜର ପ୍ରଥମ ଶତକ ହାସଲ କରିବା ପାଇଁ ୧୪ଟି ପାଳି ଲାଗିଥିଲା । ପ୍ରଥମେ ସେ ୭ ନମ୍ବର ଏବଂ ୪ ନମ୍ବରରେ ବ୍ୟାଟିଂ କରୁଥିଲେ ।

ପରେ ୩ ନମ୍ବରରେ ଖେଳିବାର ସୁଯୋଗ ପାଇଥିଲେ ।  ତେନ୍ଦୁଲକର ନିଜର ପ୍ରଥମ ଶତକ ହାସଲ କରିବା ପାଳି ୭୯ଟି ମ୍ୟାଚକୁ ଅପେକ୍ଷା କରିବାକୁ ପଡ଼ିଥିଲା । ଘରୋଇ ମାଟିରେ କୋହଲି ୨୩ ଶତକ ହାସଲ କରିଥିବାବେଳେ ସଚିନ ୨୦ଟି ଶତକ ହାସଲ କରିଛନ୍ତି । ସଚିନ ଶ୍ରୀଲଙ୍କ ବିପକ୍ଷରେ ବଡ଼ ପାଳି ଖେଳିବାରେ ସବୁବେଳେ ସଫଳ ହୋଇଛନ୍ତି । ବିରାଟଙ୍କ ୪୮ ଶତକ ମଧ୍ୟରେ ଭାରତ ୪୦ଟି ମ୍ୟାଚ ଜିତିଛି । ଏହା ଅର୍ଥ କୋହଲିଙ୍କ ଶତକର ୮୩ ପ୍ରତିଶତ ମ୍ୟାଚରେ ଭାରତ ବିଜୟ ହୋଇଛି । ସେପଟେ ତେନ୍ଦୁଲକରଙ୍କ ୪୯ ଶତକ ମଧ୍ୟରେ ଭାରତ ୩୩ଟି ମ୍ୟାଚ ଜିତିଛି । ଯାହାକି ଭାରତ ବିଜୟର ୬୭ ପ୍ରତିଶତ ।

 

କାହିଁକି ଅଣମୌସୁମୀ ଋତୁରେ ଶୁଖିଯାଉଛି ବ୍ରାହ୍ମଣୀ ନଦୀ?

ଭୁବନେଶ୍ବର: କାହିଁକି ଅଣମୌସୁମୀ ଋତୁରେ ଶୁଖିଯାଉଛି ବ୍ରାହ୍ମଣୀ ନଦୀ? ଏନେଇ ଗବେଷଣା କରାଯିବ। ବ୍ରାହ୍ମଣୀ ଡେଲ୍ଟାର ପୁନରୁଦ୍ଧାର ପାଇଁ ଅଣ୍ଟା ଭିଡ଼ିଛନ୍ତି ରାଜ୍ୟ ସରକାର। ଏନେଇ ଜଳସମ୍ପଦ ବିଭାଗ ପକ୍ଷରୁ ଆଇଆଇଟି ଗୌହାଟୀ ସହ ଖୁବଶୀଘ୍ର ଏକ ଏମ୍ଓୟୁ ସ୍ବାକ୍ଷରିତ ହେବ। ଆଇଆଇଟି ରିପୋର୍ଟ ଆଧାରରେ ପରବର୍ତ୍ତୀ ପଦକ୍ଷେପ ନେବ ଜଳସମ୍ପଦ ବିଭାଗ। ଏହି କ୍ରମରେ ଦୁଇଟି ବ୍ୟାରେଜ ନିର୍ମାଣ ପାଇଁ ବି ଯୋଜନା କରାଯାଇଛି।

ଅଣମୌସୁମୀ ସମୟ ଆସିଲେ, ବ୍ରାହ୍ମଣୀକୁ କାଳ ସାଜେ। ସେ ସମୟରେ ସଂପୂର୍ଣ୍ଣ ଭାବେ ଶୁଖିଯାଏ ଓଡ଼ିଶାର ଦ୍ବିତୀୟ ବୃହତମ ନଦୀ। ଖାସ୍ କରି ଯାଜପୁରର ଜେନାପୁରରୁ କେନ୍ଦ୍ରାପଡ଼ାର ଇନ୍ଦୁପୁର ଷ୍ଟ୍ରେଚରେ ପାଣି ନଥାଏ। ଫଳରେ ପ୍ରଭାବିତ ହୁଏ ଚାଷ କାର୍ଯ୍ୟ ଓ ଦେଖାଦିଏ ଜଳ ସଙ୍କଟ। ଆଗକୁ ଯେପରି ଏହି ସମସ୍ୟା ନରହେ, ସେଥିପାଇଁ ମାଷ୍ଟରପ୍ଲାନ କରିଛନ୍ତି ରାଜ୍ୟ ସରକାର। ବ୍ରାହ୍ମଣୀ ଶୁଖିବା ନେଇ ଆଇଆଇଟି ଗୌହାଟୀ ଗାଣିତିକ ଏବଂ ଭୌତିକ ମଡେଲ ସର୍ଭେ କରିବ। ଏଥିରେ ପ୍ରାୟ ୯୩ ଲକ୍ଷ ୮୨ହଜାର ଟଙ୍କା ଖର୍ଚ୍ଚ ହେବ। ଆଇଆଇଟି ଗୌହାଟୀର ରିପୋର୍ଟ ଅନୁସାରେ ବ୍ରାହ୍ମଣୀ ପୁନରୁଦ୍ଧାର କାର୍ଯ୍ୟ ହାତକୁ ନେବ ଜଳ ସମ୍ପଦ ବିଭାଗ।

ବ୍ରାହ୍ମଣୀ ବଙ୍ଗୋପସାଗରରେ ମିଶିବା ଆଗରୁ ବୈତରଣୀ ସହ ମିଶି ଏକ ବଡ଼ ଡେଲଟା ସୃଷ୍ଟି କରିଛି। ପରିବେଶ ସନ୍ତୁଳନ, ଜଳ ନିଷ୍କାସନ ତଥା ଅନ୍ୟ ଦିଗରେ ଏହି ଡେଲଟାର ଗୁରୁତ୍ବପୂର୍ଣ୍ଣ ଭୂମିକା ରହିଛି। ଡେଲଟାର ପୁନରୁଦ୍ଧାର ଦ୍ବାରା ବ୍ରାହ୍ମଣୀ ଅବବାହିକାରେ ପରିବେଶ ସୁରକ୍ଷା, ଜଳସେଚନ ବ୍ୟବସ୍ଥାର ସୁଦୃଢ଼ୀକରଣ ସହ ଅବ୍ୟବହୃତ ନଦୀ ଶାଖାଗୁଡ଼ିକୁ ପୁନଃ କାର୍ଯ୍ୟକ୍ଷମ କରିବାକୁ ଲକ୍ଷ୍ୟ ରଖାଯାଇଛି। ପୁନଃରୁଦ୍ଧାର ଜରିଆରେ ଜେନାପୁର ଓ ଜୋକଡିଆରେ ଆଇଏସଏସ୍ ଯୋଜନାରେ ବ୍ୟାରେଜ ନିର୍ମାଣ କରାଯିବ ।

ବ୍ରାହ୍ମଣୀ ଶୁଖିବା ଇତିହାସ ବହୁ ପୁରୁଣା। ଝାଡ଼ଖଣ୍ଡରୁ ବାହାରିଥିବା ବ୍ରାହ୍ମଣୀ ନଦୀର ଡେଲଟା ଓଡ଼ିଶାର ଯାଜପୁର ଜିଲ୍ଲା ଜେନାପୁର ପାଖରେ ଆରମ୍ଭ ହୋଇଛି। ସେଠାରୁ ଏହା ବିଭିନ୍ନ ଆଡ଼କୁ ବିଭାଜନ ହୋଇଛି। ଖରସୁଆଁ ବ୍ରାହ୍ମଣୀର ପ୍ରଥମ ଶାଖା। ଗୋଟେ ସମୟରେ ଜୋକଡ଼ିଆ ଓ ଜେନାପୁରଠାରେ ଇଂରେଜ ଦୁଇଟି ଆନିକଟ ନିର୍ମାଣ କରିଥିଲେ। ହେଲେ ପାଞ୍ଚ ବର୍ଷ ଭିତରେ ଜେନାପୁର ଆନିକଟ ସମ୍ପୂର୍ଣ୍ଣ ଭାବେ ପୋତି ହୋଇଗଲା। ତାପରେ ରେଙ୍ଗାଳୀ ଡ୍ୟାମ ହେଲା। ଅଣ ମୌସୁମୀ ବେଳେ ୮୫% ଜଳ ଖରସୁଆଁକୁ ଯାଉଛି। ବାକି ୧୫% ପାଣି ବି ୧୦କିଲୋମିଟର ପରେ ଦୁଇ ଭାଗ ହୋଇଛି। ଗୋଟିଏ କେଲୁଅ ଓ ଦ୍ବିତୀୟଟି ବ୍ରାହ୍ମଣୀ । ତେବେ ସବୁ ପାଣି କେଲୁଅକୁ ଯିବା ପରେ ବ୍ରାହ୍ମଣୀରେ ପାଣି ନାହିଁ। ଫଳରେ ଯାଜପୁର ଜେନାପୁରରୁ କେନ୍ଦ୍ରାପଡ଼ା ଇନ୍ଦୁପୁର ଯାଏ ବ୍ରହ୍ମଣୀ ଶୁଖିଲା ପଡିଛି।

 

ଦକ୍ଷିଣ ଆଫ୍ରିକାକୁ ୨୪୩ ରନରେ ହରାଇଲା ଭାରତ

କୋଲକାତା: ଟିମ ଇଣ୍ଡିଆର ବଡ଼ ବିଜୟ। ଦକ୍ଷିଣ ଆଫ୍ରିକାକୁ ୨୪୩ ରନରେ ହରାଇଲା ଭାରତ। ଜାଡେଜା ଘାତକ ବୋଲିଂ କରିବା ସହ ୫ ଓ୍ବିକେଟ ଅକ୍ତିଆର କରିଛନ୍ତି । ଏହାସହ ସାମି ଏବଂ କୁଲଦୀପ ଯାଦବ ୨ ଲେଖାଏଁ ଓ୍ବିକେଟ ଅକ୍ତିଆର କରିଛନ୍ତି । ସେପଟେ ସିରାଜ ଗୋଟିଏ ଓ୍ବିକେଟ ଅକ୍ତିଆର କରିଛନ୍ତି । ସୁପର ସନଡେରେ ସୁପର ଫାଇଟ୍ । ଭାରତ ଦକ୍ଷିଣ ଆଫ୍ରିକାକୁ ଦେଲା ୩୨୭ ରନର ଟାର୍ଗେଟ୍  । ଜନ୍ମଦିନରେ ନୂଆ କୀର୍ତ୍ତିମାନ ସ୍ଥାପନ କଲେ ବିରାଟ କୋହଲି । ୪୯ ତମ ଶତକ କରି ସଚିନଙ୍କ ସମକକ୍ଷ ହେଲେ ବିରାଟ । ୧୨୧ ବଲରେ ୧୦୧ ରନ କଲେ ବିରାଟ କୋହଲି । ବିଶ୍ବକପରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଚାଲିଛି ମହାଲଢ଼େଇ । ଇଡେନ୍ ଗାର୍ଡେନରେ ଟସ ଜିତି ପ୍ରଥମେ ବ୍ୟାଟିଂ କରିଛି ଭାରତ । ପ୍ରଥମେ ବ୍ୟାଟିଂ କରି ଦକ୍ଷିଣ ଆଫ୍ରିକା ଆଗରେ ୩୨୭ ରନ ବିଜୟ ଲକ୍ଷ୍ୟ ରଖିଛି ଭାରତ ।

ଉଭୟ ଦଳ ଏବେ ସେମିଫାନାଲରେ ପ୍ରବେଶ କରିସାରିଛନ୍ତି । ରୋହିତ ଶର୍ମା ୨୪ ବଲରେ ୪୦ ରନ କରିଥିବାବେଳେ ଶୁବମନ ଗିଲ ୨୩ ରନ କରି କେଶବ ମହାରାଜଙ୍କ ଶିକାର ହୋଇଥିଲେ । ତେବେ ଶ୍ରେୟସ ଆୟାରେ ୮୭ ବଲରେ ୭୭ ରନ କରିଥିବାବେଳେ ନେଗିଡିଙ୍କ ବଲରେ ଆଉଟ ହୋଇଥିଲେ । ଏହାପରେ ପାଳି ସମ୍ଭାଳିଥିଲେ ବିରାଟ କୋହଲି ଓ ଲୋକେଶ ରାହୁଲ । ୭ଟି ମ୍ୟାଚରୁ ସବୁ ମ୍ୟାଚ ଜିତି ପଏଣ୍ଟ ଟେବୁଲର ଶୀର୍ଷରେ ରହିଛି ଟିମ୍ ଇଣ୍ଡିଆ । ସେପଟେ ୭ଟିରୁ ୬ଟିରେ ବିଜୟଲାଭ କରି ଦ୍ବିତୀୟରେ ରହିଛି ସାଉଥଆଫ୍ରିକା । ବିଶ୍ବକପ ଇତିହାସରେ ୫ ଥର ମୁହାଁମୁହିଁ ହୋଇଛନ୍ତି ଏହି ଦୁଇ ଦେଶ । ଭାରତ ୨ଟିରେ ବିଜୟ ଲାଭ କରିଥିବା ବେଳେ ୩ଟି ମ୍ୟାଚ ଜିତିଛି ଦକ୍ଷିଣ ଆଫ୍ରିକା । ଉଭୟ ଦେଶ ମଧ୍ୟରେ ମୋଟ ୯୦ଟି ଦିନିକିଆ ଖେଳାଯାଇଥିବା ବେଳେ, ଦକ୍ଷିଣ ଆଫ୍ରିକା ୫୦ ଓ ଭାରତ ୩୭ଟିରେ ବିଜୟୀ ହୋଇଛନ୍ତି ।

ଭାରତର ବିରାଟ ବିଜୟ । ସାଉଥ ଆଫ୍ରିକାକୁ ୨୪୩ ରନରେ ଅଲଆଉଟ କରିଛି ଭାରତ । କୋଲକାତାର ଇଡେନ ଗାଡେନ୍ସରେ ଚାଲିଥିବା ବିଶ୍ବକପର ଏକ ମ୍ୟାଚରେ ଦକ୍ଷିଣ ଆଫ୍ରିକାକୁ ୨୪୩ ରନରେ ପରାସ୍ତ କରିଛି ଭାରତ । ଏହା ସହିତ ଚଳିତ ବିଶ୍ବକପରେ ନିଜର ବିଜୟ ଧାରା ଜାରି ରଖିଛି ଟିମ୍ ଇଣ୍ଡିଆ ।ଦକ୍ଷିଣ ଆଫ୍ରିକା ଆଗରେ ୩୨୭ ରନର ଲକ୍ଷ୍ୟ ରଖିଥିଲା ଟିମ ଇଣ୍ଡିଆ । ନିଜର ଘାତକ ବୋଲିଂର ପ୍ରଦର୍ଶନ କରି ଭାରତୀୟ ବୋଲରମାନେ ଦକ୍ଷିଣ ଆଫ୍ରିକା ଟିମକୁ ଧୂଳି ଚଟାଇଥିଲେ । ଦକ୍ଷିଣ ଆଫ୍ରିକା ମାତ୍ର ୮୩ ରନରେ ଅଲଆଉଟ ହୋଇଯାଇଥିଲା । ଦଳପକ୍ଷରୁ କୌଣସି ବ୍ୟାଟ୍ସମ୍ୟାନ କ୍ରିଜରେ ତିଷ୍ଠିପାରିନଥିଲେ । ଦଳ ପକ୍ଷରୁ ମାର୍କୋ ଜାନସେନ ୧୪ ରନ ଓ ରାସି ଭାନ ଡର୍ ଦୁସେନ ୧୩ ରନ କରିଥିଲେ । ଭାରତ ପକ୍ଷରୁ ରବୀନ୍ଦ୍ର ଜାଦେଜା ୫ଟି ଓ୍ବିକେଟ ନେଇଥିବାବେଳେ ମହମ୍ମଦ ସମି ଓ କୂଳଦୀପ ଯାଦବ ୨ଟି ଲେଖାଏଁ ଓ୍ବିକେଟ ନେଇଥିଲେ ।

ମ୍ୟାଚରେ ଭାରତ ଟସ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ରୋହିତ ଶର୍ମା ୪୦ ରନ ଓ ଶୁଭମନ ଗିଲ୍ ୨୩ ରନ କରି ଆଉଟ ହେବା ପରେ ବିରାଟ କୋହଲି ଓ ଶ୍ରେୟସ ଆୟରଙ୍କ ମଧ୍ୟରେ ଏକ ଭଲ ପାର୍ଟନରସିପ୍ ଭାରତର ସ୍କୋରକୁ ଦ୍ରୁତ ଗତିରେ ଆଗେଇ ନେବାରେ ସହାୟକ ହୋଇଥିଲା । ଶ୍ରେୟସ ଆୟର ୭୭ ରନରେ ଆଉଟ ହେବା ପରେ କେଏଲ ରାହୁଲ ମାତ୍ର ୮ ରନରେ ଆଉଟ ହୋଇଥିଲେ । ବିରାଟ କୋହଲି ସୂର୍ଯ୍ୟକୁମାର ଯାଦବ ଓ ରବୀନ୍ଦ୍ର ଜାଦେଜାଙ୍କ ସହ ଉପଯୋଗୀ ପାର୍ଟନରସିପ କରି ଦଳୀୟ ସ୍କୋରକୁ ୫୦ ଓଭରରେ ୩୨୬ ରନରେ ପହଞ୍ଚାଇଥିଲେ । ବିରାଟ କୋହଲି ସର୍ବାଧିକ ୧୦୧ ରନ କରିଥିଲେ

 

ମିଜୋରାମର ସମସ୍ତ ୪୦ ଆସନ ଲାଗି ହେବ ଆସନ୍ତା ୭ରେ ଭୋଟ

ମିଜୋରାମ : ମିଜୋରାମର ସମସ୍ତ ୪୦ ଆସନ ଲାଗି ହେବ ଆସନ୍ତା ୭ରେ ଭୋଟ । ମିଜୋ ନ୍ୟାସନାଲ ଫ୍ରଣ୍ଟ ନେତା ତଥା ମୁଖ୍ୟମନ୍ତ୍ରୀ ଜୋରମଥାଙ୍ଗା ଆଇଜଲ ଇଷ୍ଟ-୧ରୁ ଲଢୁଛନ୍ତି । ତୁଇଚାଙ୍ଗ ଆସନରୁ ଲଢୁଛନ୍ତି ଏମଏନଏଫ ନେତା ତାନଲୁଇଆ । ସେ ଅଛନ୍ତି ଉପମୁଖ୍ୟମନ୍ତ୍ରୀ । ଆଇଜଲ ଓ୍ବେଷ୍ଟ-୩ରୁ ଲଢୁଛନ୍ତି କଂଗ୍ରେସ ଭେଟେରାନ ଲାଲସାଓ୍ବା । ସର୍ଚ୍ଚିପ ଆସନରୁ ଲଢୁଛନ୍ତି ଜେଡପିଏମ ନେତା ଲାଲଦୁହୋମା । ଦାମ୍ପା ଆସନରୁ ଲଢୁଛନ୍ତି ବିଜେପି ହେଭିଓ୍ବେଟ ଭାନଲାଥମୁକା ।

ଡିସେମ୍ବର ୧୭ରେ ମିଜୋରାମ ବିଧାନସଭାର କାର୍ଯ୍ୟକାଳ ଶେଷ ହେଉଛି । ୨୦୧୮ ନିର୍ବାଚନରେ ମିଜୋନ୍ୟାସନାଲ ଫ୍ରଣ୍ଟ ୨୭ ଆସନରେ ବିଜୟୀ ହୋଇଥିବାବେଳେ କଂଗ୍ରେସ ୫ ଆସନରେ ବିଜୟୀ ହୋଇଥିଲା । ବିଜେପି ମାତ୍ର ଗୋଟିଏ ଆସନ ପାଇଥିଲା । ଅନ୍ୟାନ୍ୟ ଦଳ ୭ ଆସନରେ ବିଜୟୀ ହୋଇଥିଲେ ।

କାର୍ତ୍ତିକରେ ଘାରିଛି ପରିବା ଦର ଚିନ୍ତା, ନଜର ପକାନ୍ତୁ ବଜାରରେ କେଉଁ ପରିବା ଦର କେତେ ରହିଛି

ଭୁବନେଶ୍ବର: କାର୍ତ୍ତିକ ମାସରେ ଘରଣୀଙ୍କୁ ଘାରିଛି ପରିବା ଦର ଚିନ୍ତା । ଭେଣ୍ଡି, ପୋଟଳ, ବିନ୍ସ, ବାଇଗଣ, ସାରୁ ଦର ଗ୍ରାହକଙ୍କୁ ଘାଇଲା କରୁଛି । ତା ସାଙ୍ଗରେ ପିଆଜ ଦର ବି ବଢିଚାଲିଛି । ଏବେ ଖାଉଟି ବଜାରରେ କିଲୋ ୭୦ ଛୁଇଁଥିବା ବେଳେ ଦୀପାବଳୀ ବେଳକୁ ୧୦୦ ଛୁଇଁବ ବୋଲି ଆଶଙ୍କା ହେଲାଣି । କେନ୍ଦ୍ର ସରକାରଙ୍କ କର୍ପୋରେଟ୍ ପ୍ରୀତି ଏବଂ ଆମଦାନୀ-ରପ୍ତାନୀ ନୀତିରେ ତ୍ରୁଟି ପାଇଁ କେବଳ ଓଡ଼ିଶା ନୁହେଁ ସାରା ଦେଶରେ ପିଆଜ ମହରଗ ହୋଇଛି। ନାଶିକ ପିଆଜ ଆସିଲେ ଦର ନିୟନ୍ତ୍ରଣ ହେବ ବୋଲି ବ୍ୟବସାୟୀ ମହାସଂଘ କହିଛି । ହେଲେ ପରିବା ଦର ଖାଉଟିଙ୍କୁ ଚିନ୍ତାରେ ପକାଇଛି।

କମୁନି ପିଆଜ ଦର । ୧୦ ଦିନ ହେଲାଣି କିଲୋ ପିଛା ରହିଛି ୬୦-୭୦ । ଦୀପାବଳି ଯାଏଁ ଲାଗି ରହିବ ଏହି ଅବସ୍ଥା । କାର୍ତ୍ତିକ ମାସରେ ରୋଷେଇ ଘରେ ଆମିଷ ବ୍ୟାନ, ହେଲେ ପରିବା ଦର ବି କରୁଛି ଘାଇଲା । ଭେଣ୍ଡି, ପୋଟଳ, ବାଇଗଣ, ସାରୁ, ବିନ୍ସ ସବୁ କିଛି ୫୦ ଉପରେ । ଟମାଟୋ  କିଲୋ ୪୦ ଉପରେ । ଦୀପାବଳି ପରେ ନାଶିକ ପିଆଜ ଆସିଲେ ଦର କିଛିଟା ନିୟନ୍ତ୍ରଣ ହେବ ବୋଲି ବ୍ୟବସାୟୀ କହିଛନ୍ତି । ହେଲେ ଏହା ପୂର୍ବରୁ ପିଆଜ ଦର ୧୦୦ ଛୁଇଁପାରେ ବୋଲି ଆକଳନ କରୁଛି ବ୍ୟବସାୟୀ ସଂଘ । ଭୁବନେଶ୍ବରରେ ପିଆଜ ସାଙ୍ଗକୁ ପରିବାର ଚଢା ଦର ଖାଉଟିଙ୍କୁ ଚିନ୍ତାରେ ପକାଇଛି ।

କଟକରେ ବି ସମାନ ଅବସ୍ଥା । ମାଲଗୋଦାମରେ ପିଆଜ ଦର ୪୦ରୁ ୬୦ ମଧ୍ୟରେ ବିକ୍ରୀ ହେଉଛି । ଧର୍ମମାସ କାର୍ତ୍ତିକରେ ପରିବା ଡ଼ିମାଣ୍ଡ ଅଧିକ ଥିବା ବେଳେ ଲୋକାଲ ପରିବା ଆସୁନଥିବାରୁ ଦର ବଢିଚାଲିଛି । ଭେଣ୍ଡି, କାଙ୍କଡ଼-୫୦, ସଜନା ଛୁଇଁ-ବିନ୍ସ ୬୦, ଝୁଡ଼ଙ୍ଗ, ପୋଟଳ, ଜହ୍ନି, କଲରା ସବୁ କିଛି ୪୦ ଉପରେ । ଏପଟେ ନଭେମ୍ବର ୧୫ ତାରିଖ ପର୍ଯ୍ୟନ୍ତ ପିଆଜ ଦର ଉପରମୁହାଁ ରହିବ ବୋଲି ଜଣାପଡ଼ିଛି । ବେଙ୍ଗାଳୁରୁ ଓ ନାଶିକରୁ ନୂଆ ପିଆଜ ଅମଳ ହେଲେ, ନଭେମ୍ବର ଶେଷ ଆଡ଼କୁ ଦର କମିପାରେ । କଟକ-ଭୁବନେଶ୍ବର ସମେତ ରାଜ୍ୟର ସବୁ ଜାଗାରେ ପିଆଜ ସାଙ୍ଗକୁ ପରିବାର ଚଢା ଦରକୁ ନେଇ ସମସ୍ତେ ଚିନ୍ତାରେ ।

ଓଡ଼ିଶାକୁ ନାସିକ, ବେଙ୍ଗାଲୁରୁରୁ ପିଆଜ ଆମଦାନୀ ହେଉଥିବା ବେଳେ ସେଠାରେ ଅଦିନିଆ ବର୍ଷା ଚାଷ ଉଜାଡି ଦେଇଛି । ଅତ୍ୟାବଶକୀୟ ସାମଗ୍ରୀ ଆଇନର ପରିସରରେ ଆସୁଥିବାରୁ ବଜାର ଦର ନିୟନ୍ତ୍ରଣ କରିବାକୁ ମାର୍କେଟ୍ ଇଣ୍ଟେଲିଜେନ୍ସକୁ ସତର୍କ ଦୃଷ୍ଟି ରଖିବାକୁ ନିର୍ଦ୍ଦେଶ ଦେଇଛନ୍ତି ରାଜ୍ୟ ସରକାର ।

ରାଜ୍ୟରେ ୩ଦିନ ପର୍ଯ୍ୟନ୍ତ ବର୍ଷା ସମ୍ଭାବନା

ଭୁବନେଶ୍ବର: ଆସନ୍ତା ୩ଦିନ ପର୍ଯ୍ୟନ୍ତ ରାଜ୍ୟରେ ବର୍ଷା। ପଶ୍ଚିମା ଝଡ ପ୍ରଭାବରେ ଉପକୂଳ ଓଡ଼ିଶା ସମେତ ଦକ୍ଷିଣ ଆଭ୍ୟନ୍ତରୀଣ ଓଡ଼ିଶାର ଅଧିକାଂଶ ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ରାଜ୍ୟକୁ ପ୍ରବେଶ କରୁଥିବା ପୂର୍ବାଳୀ ତରଙ୍ଗାୟିତ ପବନ ପ୍ରଭାବରେ ରାତିର ତାପମାତ୍ରା ସ୍ବାଭାବିକଠାରୁ ୨ ରୁ ୪ ଡିଗ୍ରୀ ପର୍ଯ୍ୟନ୍ତ ଅଧିକ ରହିଛି। ଏହାସହ ବାୟୁମଣ୍ଡଳରେ ଉଚ୍ଚ ଆର୍ଦ୍ରତା ପାଇଁ ଗୁଳୁଗଳି ଅନୁଭୁତ ହେଉଛି। ତେବେ ୩ଦିନ ପରେ ରାଜ୍ୟରେ ବଦଳିବ ପାଗ। ରାତି ତାପମାତ୍ରା ୩ରୁ ୪ଡିଗ୍ରୀ ପର୍ଯ୍ୟନ୍ତ କମିବା ସହ ଶୀତ ଅନୁଭୁତ ହେବ।

କାର୍ତ୍ତିକରେ ଖରା ଛାଇ ଖେଳ। କେତେବେଳେ ହାଲୁକା ଥଣ୍ଡା ତ ପୁଣି କେତେବେଳେ ବର୍ଷା। ପୁଣି କେତେବେଳେ ଗରମ ଗୁଳୁଗୁଳି କରୁଛି ଅସ୍ତବ୍ୟସ୍ତ। ରାଜ୍ୟରେ ବାୟୁ ଚଳାଚଳର ଅସଙ୍ଗତି ପାଇଁ ସୃଷ୍ଟି ହୋଇଛି ଏଭଳି ପରିସ୍ଥିତି। ପଶ୍ଚିମା ଝଡ ପ୍ରଭାବରେ କିଛି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇଥିବା ବେଳେ ଉପକୂଳ ଓଡ଼ିଶାରେ ଘଡଘଡି ବିଜୁଳି ସହ ବର୍ଷା ହୋଇଛି। ଆସନ୍ତାକାଲି ସକାଳ ଯାଏଁ ସୁନ୍ଦରଗଡ, ମୟୁରଭଞ୍ଜ, ବାଲେଶ୍ବର, ଭଦ୍ରକ, କେନ୍ଦୁଝର ଭଳି ୨୨ଟି ଜିଲ୍ଲାରେ ବର୍ଷା ହୋଇପାରେ। ସେହିପରି କାଲି ଦକ୍ଷିଣ ଉପକୂଳ ଓଡ଼ିଶାର ୮ଟି ଜିଲ୍ଲାରେ ହାଲୁକା ବର୍ଷା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ୭ତାରିଖରେ ମଧ୍ୟ ଦକ୍ଷିଣ ସମେତ ଉପକୂଳ ଓଡ଼ିଶାରେ ହାଲୁକା ବର୍ଷା ସମ୍ଭାବନା ରହିଛି। ଆଜି ରାଜଧାନୀ ଭୁବନେଶ୍ବର ସମେତ ସଂଲଗ୍ନ ସହର ଗୁଡିକରେ ବର୍ଷା ହୋଇଛି ।

ସେପଟେ ଏବେ ଓଡ଼ିଶାକୁ ପୂର୍ବ ଦିଗରୁ ତରଙ୍ଗାୟିତ ଶୁଷ୍କ ଗରମ ପବନ ପ୍ରବେଶ କରୁଛି। ପ୍ରଭାବରେ ରାଜ୍ୟର ଅଧିକାଂଶ ଜିଲ୍ଲାରେ ସ୍ବାଭାବିକ ଠାରୁ ୩ରୁ ୪ଡିଗ୍ରୀ ଉପରେ ରହିଛି ତାପମାତ୍ରା। ଏହାସହ ବାୟୁମଣ୍ଡଳରେ ଜଳୀୟବାଷ୍ପର ପରିମାଣ ଅଧିକ ରହୁଥିବାରୁ ଦିନରେ ଗୁଳୁଗୁଳି ଅନୁଭୁତ ହେଉଛି। ଆସନ୍ତା ୩ଦିନ ପର୍ଯ୍ୟନ୍ତ ରାଜ୍ୟରେ ଏଭଳି ପାଗ ଜାରି ରହିବ। ୩ଦିନ ପରେ ରାଜ୍ୟକୁ ଉତ୍ତର ଦିଗରୁ ଥଣ୍ଡା ବାୟୁ ପ୍ରବାହ ବଢିବ। ରାତି ତାପମାତ୍ରା ସ୍ବାଭାବିକ ଠାରୁ ୨ରୁ ୪ଡିଗ୍ରୀ ପର୍ଯ୍ୟନ୍ତ କମିବ। ଫଳରେ କିଛି ଦିନ ପାଇଁ ରାଜ୍ୟକୁ ଶୀତ ଫେରିବ ବୋଲି ଆକଳନ କରାଯାଇଛି।

ଗତ ୨୪ ଘଣ୍ଟା ମଧ୍ୟରେ ମାଲକାନଗିରିର କୋରୁକୁଣ୍ଡାରେ ସର୍ବାଧିକ ୬୦ମିଲିମିଟର ବର୍ଷା ରେକର୍ଡ ହୋଇଥିବା ବେଳେ କୋରାପୁଟରେ ୫୩, ସମ୍ବଲପୁର ରେଢାଖୋଲରେ ୩୯, ଯାଜପୁରରେ ୩୫.୫ ମିଲିମିଟର ବର୍ଷା ହୋଇଛି। ଟିଟିଲାଗଡରେ ସର୍ବାଧିକ ୩୫.୫ ଡିଗ୍ରୀ ତାପମାତ୍ରା ରେକର୍ଡ ହୋଇଥିବା ବେଳେ କୋରାପୁଟରେ ସର୍ବନିମ୍ନ ୧୩ଡିଗ୍ରୀ ତାପମାତ୍ରା ରହିଛି।