ରାଉରକେଲା: ରାଉରକେଲା ପାନପୋଷ ଷ୍ଟେସନ ମଧ୍ୟରେ ଗୋଟିଏ ଟ୍ରାକରେ ତିନୋଟି ଟ୍ରେନ । ଅଟୋମେଟିକ ସିଗନାଲ ଯୋଗୁଁ ଏପରି ହୋଇଥିବା ଜଣାପଡିଛି । କୈଣସି ଦୁର୍ଘଟଣାର ଆଶଙ୍କା ନାହିଁ, କିମ୍ଵା କୌଣସି ଭୟଭୀତ ହେବାର ନାହିଁ । ଝାରସୁଗୁଡ଼ା ହାଟିଆ ମେମୁ, ଝାରସୁଗୁଡ଼ା ରାଉରକେଲା ମେମୁ ଓ ବନ୍ଦେ ଭାରତ ଟ୍ରେନ ଗୋଟିଏ ଟ୍ରାକରେ ରହିଥିଲା । ଅଟୋମେଟିକ ସିଗନାଲ ଯୋଗୁଁ ଏପରି ହେଉଥିବା ରାଉରକେଲା ଷ୍ଟେସନ ମ୍ୟାନେଜର ସୂଚନା ଦେଇଛନ୍ତି ।
ସୁଡ଼ଙ୍ଗରେ ଫଶିଛନ୍ତି ଜଣେ ଭାଇ, ବାହାରେ ଦୁର୍ଘଟଣା ନେଲା ଅନ୍ୟ ଦୁଇ ଭାଇଙ୍କ ଜୀବନ
ରାଞ୍ଚି: ପୁଣି ଆସିଲା ଦୁଃଖଦ ଖବର । ସୁଡ଼ଙ୍ଗରେ ଜଣେ ଭାଇ ଫସି ରହିଥିବାବେଳେ ପରିବାର ଲୋକେ ଦୁଃଖରେ ଭାଙ୍ଗି ପଡ଼ିଛନ୍ତି । ଅନ୍ୟପଟେ ଦୁର୍ଘଟଣାରେ ଆଉ ଦୁଇ ଭାଇଙ୍କ ଜୀବନ ଯାଇଛି । ଯେ କେହି ବି ଏକଥା ଶୁଣୁଛି ଦୁଃଖରେ ଆହା ପଦେ କହୁଛି । ଜଣେ ଭାଇ ଉତ୍ତରାଖଣ୍ଡର ଉତ୍ତରକାଶୀରେ ଟନେଲରେ ୧୦ଦିନ ହେବ ଫସି ରହିଥିବାବେଳେ ଆଉ ଦୁଇ ଭାଇଙ୍କ ଝାଡ଼ଖଣ୍ଡ ରାମଗଡ଼ ଜିଲ୍ଲାର ତୁଡ୍ଡୁପାଲ୍ଲୁ ଘାଟିରେ ଦୁର୍ଘଟଣା ଘଟିଛି । ଟ୍ରେଲର କାର ଏବଂ ଟ୍ରାକ୍ଟରକୁ ମାଡ଼ କରିଥିବାବେଳେ ଏହି ଦୁର୍ଘଟଣାରେ ତିନି ଜଣଙ୍କ ମୃତ୍ୟୁ ହୋଇଛି । ଜଣେ ଡ୍ରାଇଭରଙ୍କ ସମେତ ଦୁଇଜଣ ଶ୍ରମିକଙ୍କ ମୃତ୍ୟୁ ହୋଇଛି । ଏମାନଙ୍କ ମଧ୍ୟରେ ରହିଛନ୍ତି ଉତ୍ତରାଖଣ୍ଡ ଟନେଲରେ ଫସିଥିବା ଶ୍ରମିକ ରାଜେନ୍ଦ୍ର ବେଦିଆଙ୍କ ଦୁଇ ଭାଇଙ୍କ ମୃତ୍ୟୁ ହୋଇଛି ।
ରାଜେନ୍ଦ୍ରଙ୍କ ଭାଇ ଦିନେଶ ଏବଂ ସମ୍ପର୍କୀୟ ଭାଇ ସୁକୁମାରଙ୍କ ଏହି ମର୍ମନ୍ତୁଦ ସଡ଼କ ଦୁର୍ଘଟଣାରେ ମୃତ୍ୟୁ ହୋଇଥିବାବେଳେ ଶୋକର ଛାୟା ଖେଳି ଯାଇଛି । ସ୍ଥାନୀୟ ଲୋକଙ୍କ କହିବା ମୁତାବକ ସକାଳୁ ଏକ ଦୃତଗାମୀ ଟ୍ରେଲର ମାଡ଼ି ଆସିଥିଲା । ତିନୋଟି ଯାନକୁ ଧକ୍କା ଦେବା ପରେ ଘାଟିରେ ଓଲଟି ପଡ଼ିଥିଲା । ଘଟଣାସ୍ଥଳରେ ତିନି ଜଣଙ୍କ ମୃତ୍ୟୁ ହୋଇଥିବାବେଳେ ଏନଏଚ ୩୩ ଜାମ ରହିଛି । ଫଳରେ ରାସ୍ତାର ଉଭୟ ପାର୍ଶ୍ବରେ ଶତାଧିକ ଗାଡ଼ି ରହିଛି । ଯାତାୟତରେ ବହୁ ଅସୁବିଧା ମଧ୍ୟ ଦେଖିବାକୁ ମିଳିଛି । ସେପଟେ ସ୍ଥାନୀୟ ଲୋକ ପୋଲିସ ନାଁରେ ସାଙ୍ଘାତିକ ଅଭିଯୋଗ ଆଣିଛନ୍ତି । ପିସିଆର ଭ୍ୟାନ୍ ଘାଟିରେ ରହି ଆସୁଥିବା ଗାଡ଼ି ମାନଙ୍କଠାରୁ ଟଙ୍କା ଆଦାୟ କରୁଥିଲେ । ପ୍ରତିଦିନ ଏଭଳି କରୁଥିବାବେଳେ ଆଜି ମଧ୍ୟ ଟଙ୍କା ଆଦାୟ କରୁଥିବାବେଳେ ଟ୍ରାକ୍ଟରଟି ସେଠାରେ ଛିଡ଼ା ହୋଇଥିଲା । ଦୃତଗତିରେ ଆସୁଥିବା ଟ୍ରେଲରଟି ଟ୍ରାକ୍ଟରକୁ ଧକ୍କା ଦେଇଥିଲା । ଏହାପରେ ବାକି ସମସ୍ତ ଗାଡ଼ି ଆସି ପଛରୁ ପିଟିଥିଲା ।
ବିଜେପି କାର୍ଯ୍ୟକ୍ରମକୁ ଯିବାବେଳେ ଅଘଟଣ, ଟ୍ରାକ୍ଟର ଓଲଟି ୨ ଜଣଙ୍କ ମୃତ୍ୟୁ
ବ୍ରହ୍ମପୁର; ବିଜେପି କାର୍ଯ୍ୟକ୍ରମକୁ ଆସିବା ବେଳେ ଓଲଟିଲା ଟ୍ରାକ୍ଟର। ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ ତାଳଗୁରାନ୍ଥି ନିକଟରେ ଦୁର୍ଘଟଣାରେ ଦୁଇ ଜଣଙ୍କ ମୃତ୍ୟୁ ହୋଇଛି। ମୃତକ ହେଉଛନ୍ତି ଡେରା ଶବର ଓ ଜଗନ୍ନାଥ ଶବର। ଉଭୟ ଗୁଡ଼ିପଦର ଅଞ୍ଚଳର ବୋଲି ଜଣାପଡିଛି। ଅନ୍ୟ ଦୁଇ ଜଣ ଗୁରୁତର ହୋଇଥିବା ବେଳେ ୧୩ଜଣ ଆହତ ହୋଇଛନ୍ତି। ଆହତଙ୍କୁ ନିକଟସ୍ଥ କାଞ୍ଚିଲି ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସା କରାଯାଉଛି। ବିଜେପିର ଚିକିଟି ବ୍ଲକ ଘେରାଉ କାର୍ଯ୍ୟକ୍ରମ ପାଇଁ ଟ୍ରାକ୍ଟରରେ ଅସୁରକ୍ଷିତ ଅବସ୍ଥାରେ ବୁହା ହୋଇ ଆସୁଥିଲେ ଲୋକ। ତେବେ ଟ୍ରାକ୍ଟର ଭାରସାମ୍ୟ ହରାଇ ପାହାଡ ତଳକୁ ଖସି ପଡିଥିଲା। ପ୍ରଶ୍ନ ଉଠୁଛି, ଆନ୍ଦୋଳନ ନାଁରେ ଅସୁରକ୍ଷିତ ଭାବେ ଲୋକଙ୍କୁ ବୋହି ଆଣିବା କେତେଦୂର ଯୁକ୍ତିଯୁକ୍ତ? ଟ୍ରାକ୍ଟରରେ ଲୋକଙ୍କୁ କାହିଁକି ଅଣା ଯାଉଥିଲା? ଦୁଇ ଜୀବନ ପାଇଁ କିଏ ଉତ୍ତରଦାୟୀ? ଏଭଳି ଅନେକ ପ୍ରଶ୍ନ ଏବେ ଉଠାଇଛନ୍ତି ବୁଦ୍ଧିଜୀବୀ ।
ପ୍ରକାଶ ପାଇଲା ଆଇସିଏମଆର ଗବେଷଣା ରିପୋର୍ଟ, ହ୍ରାସ ପାଇଛି ଯୁବବର୍ଗଙ୍କ ହଠାତ ମୃତ୍ୟୁ
ଭୁବନେଶ୍ବର: କୋଭିଡ୍ ଟିକାରୁ ଯୁବବର୍ଗଙ୍କ ମଧ୍ୟରେ କମିଛି ସଡନ୍ ଡେଥ୍ ବିପଦ। ଆଇସିଏମଆର ଗବେଷଣାରୁ ଏହି ତଥ୍ୟ ପ୍ରକାଶ ପାଇଛି । ୧୮ ବର୍ଷରୁ ୪୫ ବର୍ଷ ଯୁବବର୍ଗଙ୍କ ମଧ୍ୟରେ ହଠାତ ମୃତ୍ୟୁ ବିପଦ ହ୍ରାସ ପାଇଥିବା ରିପୋର୍ଟରୁ ଜଣାପଡିଛି। ୧୮ରୁ ୪୫ ବର୍ଷ ମଧ୍ୟରେ କୋଭିଡରେ ମୃତ୍ୟୁ ହୋଇଥିବା ବ୍ୟକ୍ତିଙ୍କୁ ନେଇ ହୋଇଥିଲା ସର୍ଭେ । ମୋଟ ୭୨୯ ଜଣଙ୍କର ମୃତ୍ୟୁକୁ ନେଇ ତନାଘନା କରାଯାଇଥିଲା । ଏଥିରୁ ଜଣାପଡିଥିଲା କି ୪୦ରୁ ୪୫ ବର୍ଷ ବର୍ଗଙ୍କ ମଧ୍ୟରେ ମୃତ୍ୟୁ ହୋଇଥିବା ବ୍ୟକ୍ତିଙ୍କ ହାର ଅଧିକ ରହିଛି । କିନ୍ତୁ ୧୮ରୁ ୪୦ ବର୍ଷ ମଧ୍ୟରେ ଯୁବଗୋଷ୍ଠୀଙ୍କ ମୃତ୍ୟୁହାର କମ ରହିଛି । ଚଳିତ ବର୍ଷ ଲଗାତର ଯୁବବର୍ଗଙ୍କ ମଧ୍ୟରେ ହୃଦଘାତରୁ ମୃତ୍ୟୁ ଭଳି ଅନେକ ଘଟଣା ସାମନାକୁ ଆସିଥିଲା ।
ଯୁବବର୍ଗଙ୍କ ମଧ୍ୟରେ ହଠାତ ହେଉଥିବା ମୃତ୍ୟୁ କୋଭିଡ ଟୀକା କାରଣରୁ ହେଉଛି କି ବୋଲି ଆଶଂକା କରାଯାଇଥିଲା । ଏହାକୁ ନେଇ ୨୦୨୧ ଅକ୍ଟୋବର ପହିଲାରୁ ୩୧ ମାର୍ଚ୍ଚ ୨୦୨୩ ମଧ୍ୟରେ ହଠାତ ମୃତ୍ୟୁ ହୋଇଥିବା ଯୁବବର୍ଗଙ୍କ ରିପୋର୍ଟ ଛାନବିନ କରାଯାଇଥିଲା। ଯୁବବର୍ଗ ଯେଉଁମାନେ କୋଭିଡ୍ ଟୀକା ନେଇ ଭଲହେବା ପରେ ହସ୍ପିଟାଲରୁ ଘରକୁ ଫେରିଥିଲେ। ଏବଂ ଭଲ ହେବାର ବର୍ଷକ ମଧ୍ୟରେ ସେମାନଙ୍କର ମୃତ୍ୟୁ ଘଟିଥିଲା। ଏଭଳି ମାମଲାକୁ ନେଇ କରାଯାଇଥିଲା ସର୍ଭେ । ଗବେଷଣାରୁ ଜଣାପଡିଥିଲା କି ଯେଉଁମା୍ନେ ୪୦ ବର୍ଷରୁ ଅଧିକ ଥିଲେ ଏବଂ ବିଭିନ୍ନ ଦୂରାରୋଗରେ ପୀଡ଼ିତ ଥିଲେ ସେମାନଙ୍କ ମଧ୍ୟରେ ମୃତ୍ୟୁର ବିପଦ ହାର ଅଧିକ। ଯେଉଁମାନେ ୪୦ ବର୍ଷରୁ କମ ଏବଂ ସଂକ୍ରମଣ ପୂର୍ବରୁ କୋଭିଡର କମରେ ଗୋଟିଏ ଟୀକା ନେଇଥିଲେ । ସେମାନଙ୍କ ଠାରେ ହସ୍ପିଟାଲରୁ ଭଲ ହୋଇ ଫେରିବା ପରେ ମୃତ୍ୟୁର ହାର କମ ଥିଲା ।
ସାମି ଖେଳୁଥିଲେ ଫାଇନାଲ, ମେଡିକାଲରେ ଚିକିତ୍ସିତ ହେଉଥିଲେ ମା’
ନୂଆଦିଲ୍ଲୀ: ବିଶ୍ବକପ ଫାଇନାଲ ମ୍ୟାଚ ଖେଳୁଥିଲେ ମହମ୍ମଦ ସାମି । ସେପଟେ ମେଡିକାଲରେ ଚିକତ୍ସିତ ହେଉଥିଲେ ସାମିଙ୍କ ମାଆ ଅମନ ଆରା । ବିଶ୍ବକପରେ ଦମଦାର ପ୍ରଦର୍ଶନ କରିଥିବା ସାମି ଫାଇନାଲରେ ମଧ୍ୟ ଭଲ ପ୍ରଦର୍ଶନ କରିବେ ବୋଲି ସମସ୍ତଙ୍କର ଆଶା ରହିଥିଲା । ଯାହାକି ପ୍ରଥମରୁ ମଧ୍ୟ ଓ୍ବିକେଟ ନେଇ ପ୍ରତିଫଳିତ କରିଥିଲେ । ଫାଇନାଲ ମ୍ୟାଚ ଦେଖିବାକୁ ପାଇଁ ସାମିଙ୍କ ଘରେ ପ୍ରସ୍ତୁତି ଆରମ୍ଭ ହୋଇଥିଲା । ହଠାତ ତାଙ୍କ ମାଙ୍କ ଦେହ ଖରାପ ହୋଇଯାଇଥିଲା । ପରିବାର ଲୋକ ତାଙ୍କୁ ନେଇ ମେଡିକାଲରେ ଭର୍ତ୍ତି କରିଥିଲେ । ଆଉ ଚିକିତ୍ସିତ ହୋଇଥିଲେ । ଅତ୍ୟଧିକ ଜ୍ଜର ହେବାରୁ ତାଙ୍କ ଦେହ ଖରାପ ହୋଇଥିବା ସୂଚନା ମିଳିଥିଲା ।
ସାମିଙ୍କୁ ଏହି ଖବର ପରବର୍ତ୍ତୀ ସମୟରେ ଦିଆଯାଇଥିଲା । ଘରଠାରୁ ୧୧ଶହ କିଲୋମିଟର ଦୂରରେ ଦେଶ ପାଇଁ ଖେଳୁଥିଲେ ସାମି । ଅନେକ ବିଶ୍ବସ ଏବଂ ଭରସା ରହିଥିଲା ତାଙ୍କ ଉପରେ । ମାତ୍ର ଫାଇନାଲରେ ସେମିତି ଭଲ ପ୍ରଦର୍ଶନ କରିପାରିନଥିଲେ ସାମି । ମାତ୍ର ଯଦି ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟକୁ ଦେଖିବା ତାହେଲେ ସେ ଭଲ ପ୍ରଦର୍ଶନ କରିଛନ୍ତି । ପ୍ରଥମ ଚାରୋଟି ମ୍ୟାଚରେ ଖେଳିବାର ସୁଯୋଗ ପାଇନଥିଲେ ମାତ୍ର ପରେ ପାଣ୍ଡ୍ୟାଙ୍କ ଆହତ ପରେ ପ୍ଲେଇଙ୍ଗ ୧୧ରେ ସ୍ଥାନ ପାଇଥିଲେ । ଆଉ ନିଜର ଉଚ୍ଚକୋଟିର ଖେଳ ପ୍ରଦର୍ଶନ କରିଥିଲେ । ନ୍ୟୁଜିଲାଣ୍ଡ ବିପକ୍ଷ ସେମିଫାଇନାଲରେ ସାମିଙ୍କ ଘାତକ ବୋଲିଂ ସୁବଦିନ ପାଇଁ ମନେ ରହିବ ନିଶ୍ଚୟ । ୭ ଓ୍ବିକେଟ ନେଇଥିବାବେଳେ ଏକ ଦମଦାର ବୋଲିଂ ପ୍ରଦର୍ଶନ କରିଥିଲେ । ଯାହାକି ସାରା ବିଶ୍ବରେ ପ୍ରଂଶସା କରାଯାଇଛି ।
ବରମୁଣ୍ଡା ବିଲ୍ଡର ଅଫିସରେ ସ୍ତ୍ରୀକୁ ଛୁରାମାଡ଼ ଘଟଣା, ଅଭିଯୁକ୍ତ ସ୍ବାମୀକୁ ଗିରଫ କଲା ପୋଲିସ
ଭୁବନେଶ୍ବର: ବରମୁଣ୍ଡା ବିଲ୍ଡର ଅଫିସରେ ସ୍ତ୍ରୀ ଉପରେ ସ୍ବାମୀର ଛୁରା ମାଡ଼ ଘଟଣାରେ କାର୍ଯ୍ୟାନୁଷ୍ଠାନ । ଗିରଫ ହେଲେ ସ୍ବାମୀ ସପନ କୁମାର । ସୋମବାର ସ୍ତ୍ରୀଙ୍କୁ ଛୁରୀରେ ଆକ୍ରମଣ କରି ଲହୁଲୁହାଣ କରିଥିଲା ଅଭିଯୁକ୍ତ । ସାର୍ଟ ଭିତରେ ଲୁଚାଇ ଧାରୁଆ ଛୁରୀ ଆଣିଥିଲା ଅଭିଯୁକ୍ତ । ସିସିଟିଭିରେ କଏଦ ହୋଇଥିଲା ଘଟଣା ବେଳର ଚିତ୍ର । ସେପଟେ ପଚରା ଉଚରା ପରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ଭରତପୁର ପୋଲିସ ହାତରେ ଲାଗିଛି । ସପନର ଘର ବାଲେଶ୍ବର ଜିଲ୍ଲା ସୋର ଅଞ୍ଚଳରେ । ୫ ବର୍ଷ ତଳେ ସେ ମଧୁସ୍ମିତା ଦାସଙ୍କୁ ବିବାହ କରିଥିଲେ । ବିବାହ ପରେ ତୃତୀୟ ପୁରୁଷ ବା ପରକୀୟା ପ୍ରୀତିକୁ ନେଇ ସ୍ତ୍ରୀ ମଧୁସ୍ମିତାଙ୍କୁ ସନ୍ଦେହ କରୁଥିଲେ ସପନ । ଯାହାକୁ ନେଇ ପରିବାର ଭିତରେ ବାଦ ବିବାଦ ଲାଗି ରହିଥିଲା । ଦୁହିଁଙ୍କର ୨ ବର୍ଷର ଶିଶୁଟିଏ ରହିଛି । କିନ୍ତୁ ପାରିବାରିକ କନ୍ଦଳକୁ କେନ୍ଦ୍ର କରି ସ୍ତ୍ରୀ ମଧୁସ୍ମିତା, ସପନଙ୍କ ବିରୋଧରେ ସୋର ଥାନାରେ ଯୌନ ନିର୍ଯାତନା ଅଭିଯୋଗ ଆଣିଥିଲେ । ଯେଉଁ ମାମଲା ବର୍ତ୍ତମାନ ସୁଧା ତଦନ୍ତ ପରିସରଭୁକ୍ତ ହୋଇ ରହିଛି । ଦୁହେଁ ଭୁବନେଶ୍ବରରେ ଅଲଗା ଅଲଗା ରହୁଥିଲେ । ଗତକାଲି ମଧୁସ୍ମିତା କାମ କରୁଥିବା ବିଲ୍ଡର ଅଫିସରେ ପହଞ୍ଚି ଛୁରାମାଡ଼ କରିଥିଲେ ସ୍ବାମୀ ସପନ । ପରେ ପୋଲିସ ଘଟଣାସ୍ଥଳରେ ପହଞ୍ଚି ମହିଳାଙ୍କୁ ଚିକିତ୍ସା ପାଇଁ ପଠାଇଥିବା ବେଳେ ଅଭିଯୁକ୍ତକୁ ଗିରଫ କରିଛି ।
ନେତାଜୀଙ୍କୁ କଲେଜ ଛାତ୍ରଙ୍କ ଅସମ୍ମାନ, ଭାଇରାଲ ହେଉଛି ଭିଡିଓ
ଅନୁଗୁଳ: ସୁବାଷ ବୋଷଙ୍କୁ ଅସମ୍ମାନ କଲେ କଲେଜ ଛାତ୍ର । ସୁବାଷ ବୋଷଙ୍କ ପ୍ରତିମୂର୍ତ୍ତି ଉପରେ କାନ୍ଧ ପକେଇ , ତାଙ୍କ ଚଷମା ଟାଣି ଇଂଷ୍ଟାଗ୍ରାମରେ ରିଲ କଲେ । ଯାହାର ଭିଡ଼ିଓ ଏବେ ଭାଇରାଲ ହେବା ପରେ ତୀବ୍ର ପ୍ରତିକ୍ରିୟା ପ୍ରକାଶ ପାଉଛି । ଆଉ ଏହି ଘଟଣା ଟି ଅନୁଗୁଳ ସ୍ୱୟଂ ଶାସିତ ମହାବିଦ୍ୟାଳୟର ବୋଲି ଜଣା ପଡିଥିବା ବେଳେ ଛାତ୍ର ଜଣଙ୍କ ଯୁକ୍ତ 2 ର ଛାତ୍ର । ସୂଚନା ଅନୁସାରେ ଦିଲ କା ରାଜା ସନ୍ଦୀପ ନାମକ ଏକ ଇଂଷ୍ଟାଗ୍ରାମ ଆକାଉଣ୍ଟରେ ସମ୍ପୃକ୍ତ ଯୁବକ ଜଣଙ୍କ ଏକ ରିଲ କରି ଛାଡିଥିଲେ । ଅନୁଗୁଳ କଲେଜ ପରିସରରେ ଅନେକ ମହାପୁରୁଷଙ୍କ ପ୍ରତିମୂର୍ତ୍ତି ଥିବା ବେଳେ ଯୁବକ ଜଣଙ୍କ ସୁବାଷ ବୋଷଙ୍କ ପ୍ରତିମୂର୍ତ୍ତିକୁ ଧରି ତାଙ୍କ ଚଷମା ଟାଣି ଟାଣି ନାଚିଥିଲେ । କିଛି ସମୟ ପରେ ପ୍ରତିମୂର୍ତ୍ତିରେ ଲାଗିଥିବା ଚାଷମାକୁ ବଳ ପୂର୍ବକ ଟାଣି ଭାଙ୍ଗିଦେବା ସହ ସେହି ଚଷମାକୁ ପିନ୍ଧି ମଇନା ମୋର ମଇନା ଗୀତରେ ନାଚି ନାଚି ରିଲ କରିଥିଲେ। ତେବେ ଜଣେ କଲେଜ ପଢୁଆ ଛାତ୍ରଙ୍କ ଏଭଳି କାରନାମା ଦେଖି ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।
ଆରମ୍ଭ ହେଲା ବିଧାନସଭାର ଶୀତ ଅଧିବେଶନ
ଭୁବନେଶ୍ବର: ବିଧାନସଭାର ଶୀତ ଅଧିବେଶନ ଆରମ୍ଭ ହୋଇଛି । ମଙ୍ଗଳବାରଠାରୁ ଆରମ୍ଭ ହୋଇଥିବା ଏହି ଅଧିବେଶନ ଡିସେମ୍ବର ୩୦ ଯାଏ ଚାଲିବ । ତେବେ ବିଧାନସଭା ଆରମ୍ଭରେ ଗୃହରେ ଶୋକ ପ୍ରସ୍ତାବ ଆଗତ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦିବଙ୍ଗତ ନେତାଙ୍କ ପାଇଁ ଶୋକପ୍ରକାଶ ଆଗତ କଲେ ମୁଖ୍ୟମନ୍ତ୍ରୀ । ପୂର୍ବତନ ବାଚସ୍ପତି ସ୍ବର୍ଗତଃ ମହେଶ୍ୱର ମହାନ୍ତି, ପୂର୍ବତନ ଉପ ମନ୍ତ୍ରୀ ସରସ୍ବତୀ ପ୍ରଧାନ, ପୂର୍ବତନ ସରକାରୀ ମୁଖ୍ୟ ସଚେତକ ଅଜୟ କୁମାର ଜେନା, ପୂର୍ବତନ ସଦସ୍ୟ ରବି ଦାସ, ପୂର୍ବତନ ସଦସ୍ୟ ଯୁଧିଷ୍ଠିର ସାମନ୍ତରାୟ, ପୂର୍ବତନ ଲାନସ ହାବିଲଦାର ସରୋଜ କୁମାର ଦାସ, ପୂର୍ବତନ କନେଷ୍ଟବଳ ବି.ଏସ.ଏଫ ପ୍ରକାଶ ଚନ୍ଦ୍ର ଶିଆଳଙ୍କ ଉଦ୍ଦେଶ୍ୟରେ ଶୋକ ପ୍ରସ୍ତାବ ଆଣିଲେ ମୁଖ୍ୟମନ୍ତ୍ରୀ । ଗୃହରେ ଆସିଥିବା ଶୋକ ପ୍ରସ୍ତାବକୁ ସମର୍ଥନ କରିଛନ୍ତି ବିରୋଧୀ ।
ଓ୍ବାର୍ଣ୍ଣର ଖେଳିବେନି ଭାରତ ବିପକ୍ଷ ଟି-୨୦ ସିରିଜ୍
ନୂଆଦିଲ୍ଲୀ: ଆସନ୍ତା ୨୩ ତାରିଖରୁ ଆରମ୍ଭ ହେବାକୁ ଯାଉଛି ଭାରତ- ଅଷ୍ଟ୍ରେଲିଆ ଟି-୨୦ ସିରିଜ୍ । ସୂର୍ଯ୍ୟକୁମାର ଯାଜବଙ୍କ ଅଧିନାୟକତ୍ବରେ ଦଳ କଙ୍ଗାରୁ ଦଳକୁ ଭେଟିବାକୁ ଥିବାବେଳେ ଭାରତୀୟ ପ୍ରଂଶସକଙ୍କ ପାଇଁ ଏକ ଖୁସି ଖବର । ଅଷ୍ଟ୍ରେଲିଆର ଧୂଆଁଧାର ବ୍ୟାଟ୍ସମ୍ୟାନ ଡେଭିଡ ଓ୍ବାର୍ଣ୍ଣର ନିଜ ନାମକୁ ପ୍ରତ୍ୟାହାର କରିଛନ୍ତି । ୩୭ ବର୍ଷୀୟ ଓ୍ବାର୍ଣ୍ଣର ଏହି ସିରିଜ ପାଇଁ ଦଳରେ ସ୍ଥାନ ପାଇଥିବାବେଳେ ସେ ସ୍ବେଦଶ ଫେରି ଯାଇଛନ୍ତି । ଚଳିତ ବିଶ୍ବକପରେ ୫୦୦ରୁ ଅଧିକ ସ୍କୋର କରିବା ସହ ଦମଦାର ଫର୍ମରେ ରହିଥିଲେ । ଏଣୁ ଟି-୨୦ରେ ମହଙ୍ଗା ସାବ୍ୟସ୍ତ ହୋଇଥାନ୍ତେ ବୋଲି ଚର୍ଚ୍ଚା ହେଉଥିଲା । ଟିମ ଇଣ୍ଡିଆର ସିନିୟର ଖେଳାଳିମାନେ ମଧ୍ୟ ଏହି ସିରିଜରେ ନଜର ଆସିବେନି । ବିରାଟ, ରୋହିତଙ୍କ ଭଳି ଖେଳାଳିଙ୍କୁ ବିଶ୍ରାମ ଦେଇଛି ବିସିସିଆଇ । ସେପଟେ ପାକିସ୍ତାନ ବିପକ୍ଷରେ ଡିସେମ୍ବର-ଜାନୁୟାରରେ ଖେଳାଯିବାକୁ ଥିବା ଟେଷ୍ଟ ମ୍ୟାଚ ଖେଳିବେ । ଏହା ତାଙ୍କର ଶେଷ ଟେଷ୍ଟ ସିରିଜ ହେବ । ଏହାପରେ ଟେଷ୍ଟ କ୍ରିକେଟରୁ ଓ୍ବାର୍ଣ୍ଣର ଅବସର ଘୋଷଣା କରିବେ ।
ସାଲୁଗା ପ୍ରଧାନ ହେଲେ ବିଧାନସଭାର ଉପବାଚସ୍ପତି, ମୁଖ୍ୟମନ୍ତ୍ରୀଙ୍କୁ ଜଣାଇଲେ କୃତଜ୍ଞତା
ଭୁବନେଶ୍ବର: ସାଲୁଗା ପ୍ରଧାନ ହେଲେ ବିଧାନସଭାର ଉପବାଚସ୍ପତି । ନିର୍ଦ୍ବନ୍ଦ୍ବରେ ଉପବାଚସ୍ପତି ଭାବେ ନିର୍ବାଚିତ ହୋଇଛନ୍ତି ସାଲୁଗା ପ୍ରଧାନ । ଆଜି ବିଧାନସଭାରେ ମୋସନ ଆଣିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୁଖ୍ୟମନ୍ତ୍ରୀ ନୂଆ ଉପବାଚସ୍ପତିଙ୍କୁ ସ୍ବାଗତ କରିଥିଲେ । ସେହିପରି ବିଜେପି ଓ କଂଗ୍ରେସ ମଧ୍ୟ ନୂଆ ଉପବାଚସ୍ପତିଙ୍କୁ ସ୍ବାଗତ କରିଥିଲେ । ଜି. ଉଦୟଗିରି ବିଧାୟକ ସାଲୁଗା ପ୍ରଧାନ ହୋଇଛନ୍ତି ବିଧାନସଭାର ପରବର୍ତ୍ତୀ ଉପବାଚସ୍ପତି । ଗତକାଲି ବିଧାନସଭା ସଚିବଙ୍କ ନିକଟରେ ସାଲୁଗା ପ୍ରଧାନ ଉପବାଚସ୍ପତି ପଦ ପାଇଁ ନାମାଙ୍କନ ପତ୍ର ଦାଖଲ କରିଥିଲେ । ୨୦୦୦ ଓ ୨୦୧୯ରେ ଜି.ଉଦୟଗିରି ବିଧାୟକ ଭାବେ ସାଲୁଗା ପ୍ରଧାନ ନିର୍ବାଚିତ ହୋଇଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କ ଉପରେ ଆସ୍ଥା ପ୍ରକଟ କରିଥିବାରୁ ସେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି । ନାମାଙ୍କନ ପତ୍ର ଦାଖଲ ପରେ ଗୃହକାର୍ଯ୍ୟରେ ପରିଚାଳନା ପାଇଁ ଉଭୟ ଶାସକ ଓ ବିରୋଧୀ ଦଳର ସଦସ୍ୟମାନଙ୍କ ସହଯୋଗ ଲୋଡ଼ିଛନ୍ତି ସାଲୁଗା ପ୍ରଧାନ ।