କୋଭିଡ୍ ଯୋଦ୍ଧାଙ୍କୁ ପୃଥ୍ୱୀରାଜଙ୍କ ଅସମ୍ମାନ, ବିଜେଡି କହିଲା ଏଭଳି ସମୟରେ ରାଜନୀତି ଉଚିତ୍ ନୁହେଁ…
ଭୁବନେଶ୍ୱର: କୋଭିଡ ଯୋଦ୍ଧାଙ୍କୁ ବିଜେପି ନେତା ପୃଥ୍ୱୀରାଜ ହରିଚନ୍ଦନଙ୍କ ଅସମ୍ମାନ କରିବା ଘଟଣାରେ ପ୍ରତିକ୍ରିୟା ରଖିଛି ବିଜେଡି । ପୃଥ୍ୱୀରାଜଙ୍କ ଏଭଳି ବିବୃତ୍ତିକୁ ସମାଲୋଚନା କରିଛନ୍ତି ଶକ୍ତିମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ର ଓ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ମନ୍ତ୍ରୀ ଅଶୋକ ପଣ୍ଡା । କୋଭିଡ ଯୋଦ୍ଧାଙ୍କୁ ସମସ୍ତେ ସମ୍ମାନ ଦେବା ଉଚିତ । ଏହାକୁ ନେଇ ରାଜନୀତି କରାଯିବା ଉଚିତ ନୁହେଁ ବୋଲି ସେ କହିଛନ୍ତି । ଦଳମତ ନିର୍ବିଶେଷରେ ଏଭଳି ଉଦ୍ୟମକୁ ସମସ୍ତେ ସମର୍ଥନ କରିବା ଉଚିତ୍ ବୋଲି କହି ବିଜେପି ନେତାଙ୍କୁ ସମାଲୋଚନା କରିଛି ବିଜେଡି ।
ନିଜ ଦଳର ନେତା ତଥା ପ୍ରଧାନମନ୍ତ୍ରୀଙ୍କ ନିର୍ଦ୍ଦେଶକୁ ଅକ୍ଷରେ ଅକ୍ଷରେ ପାଳନ କରିଥିବା ପୃଥ୍ୱୀରାଜ, ରାଜ୍ୟ ସରକାରଙ୍କ ନିବେଦନକୁ ସମାଲୋଚନା କରିଛନ୍ତି । ତାଳି, ଥାଳି ଓ ଘଣ୍ଟପିଟାକୁ ସମର୍ଥନ କରିଥିବା ପୃଥ୍ୱୀ ଏବେ ନିରବ ପ୍ରାର୍ଥନାର କୌଣସି ଯଥାର୍ଥତା ନାହିଁ ବୋଲି କହିଛନ୍ତି । ପୃଥ୍ୱୀରାଜ କହିଛନ୍ତି ଯେ, କୋଭିଡ ଯୋଦ୍ଧାଙ୍କ ପାଇଁ ନିରବ ପ୍ରାର୍ଥନାର କୌଣସି ଯଥାର୍ଥତା ନାହିଁ । କୋଭିଡ ଯୋଦ୍ଧାଙ୍କ ସମ୍ମାନ ପାଇଁ ଯଦି ନିରବ ପାର୍ଥନା କରାଯାଉଛି ତେବେ ଏହା ସ୍ୱାଗତ ଯୋଗ୍ୟ । କିନ୍ତୁ କୋଭିଡ ଯୋଦ୍ଧାଙ୍କ ମୃତ୍ୟୁ ବେଳେ ତାଙ୍କୁ ସମ୍ମାନ ଦିଆଯାଉନି । କୋଭିଡ ଯୋଦ୍ଧାଙ୍କ ସୁରକ୍ଷା ଲାଗି ଆଜି ପର୍ଯ୍ୟନ୍ତ ଚିନ୍ତା କରାଯାଉନି । ରାଜ୍ୟ ସରକାର ନିଜର ନୈତିକ ଦାୟିତ୍ୱ ଭୁଲି ଯଦି ଏଭଳି କରିବେ ତେବେ ଏହାଠୁ ବଳି ଦୁର୍ଭାଗ୍ୟଜନକ କଥା ଆଉ କିଛି ନାହିଁ । ଶପଥ ପାଠ ନାଁରେ କେବଳ କର୍ତ୍ତବ୍ୟ ସାରିଦେବାକୁ ଚେଷ୍ଟା କରୁଛନ୍ତି ସରକାର ବୋଲି କହିଛନ୍ତି ବିଜେପି ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ ।
ଅନ୍ୟପକ୍ଷରେ କୋଭିଡ ଯୋଦ୍ଧା ମାନଙ୍କ ଉଦ୍ଦେଶ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨ମିନିଟ ନିରବ ପ୍ରାର୍ଥନା କରିବା ପ୍ରସଙ୍ଗକୁ ସମର୍ଥନ କରିଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ । ସେ କହିଛନ୍ତି କୋଭିଡ ଯୋଦ୍ଧାମାନଙ୍କୁ ଯଦି ସମ୍ମାନ ଦେବାର ଅଛି ତା ହେଲେ ସମସ୍ତେ ଏକ ହେବା ଉଚିତ । ବିକାଶର କ୍ଷେତ୍ରରେ ଆମେ ସମସ୍ତେ ଏକ ଅଛୁ । ବିକାଶ ସମୟରେ ଦଳମତ ନିର୍ବିଶେଷରେ ସମସ୍ତେ ଉର୍ଧ୍ୱରେ ରହି କାମ କରିବାର ଅଛି ବୋଲି କହିଛନ୍ତି । ବିକାଶର କୌଣସି ଦଳ ନଥାଏ । ଯଦି କରୋନା ଯୋଦ୍ଧା ମାନଙ୍କ ଉଦ୍ଦେଶ୍ୟରେ ସମ୍ମାନ ଦେବା ପାଇଁ ଏହି କାର୍ଯ୍ୟ ତେବେ ଏଥିରେ ସମସ୍ତେ ସାମିଲ ହେବାକୁ କହିଛନ୍ତି ଅପରାଜିତା ।
ସେପଟେ ପୃଥ୍ୱୀରାଜଙ୍କର ଏପରି ଆଭିମୂଖ୍ୟକୁ ନେଇ କଡ଼ା ଜବାବ ରଖିଛନ୍ତି ବିଜେଡି ନେତା ଦେବୀ ପ୍ରସାଦ ମିଶ୍ର । ମୁଖ୍ୟମନ୍ତ୍ରୀ କୌଣସି ଦଳର ନୁହନ୍ତି ଓଡ଼ିଶାର ମୁଖ୍ୟମନ୍ତ୍ରୀ । ଏଭଳି କରୋନା ସମୟରେ କରୋନା ଯୋଦ୍ଧାଙ୍କ ମନୋବଳ ବଢେଇବା ପାଇଁ ଏବଂ ସମ୍ମାନ ଜଣାଇବା ପାଇଁ ଶପଥ ପାଠ ଓ ନିରବ ପ୍ରାର୍ଥନା କଲେ କିଛି ଅସୁବିଧା ନାହିଁ । ଏଥିରେ କୌଣସି ରାଜନୀତି ନାହିଁ । ଯିଏ ଯେଉଁ ଦଳର ହୁଅନ୍ତୁ ସମସ୍ତଙ୍କୁ ଆହ୍ଵାନ ଦିଆଯାଇଛି । ତେବେ ପ୍ରଶ୍ନ ଉଠୁଛି ପ୍ରଧାନମନ୍ତ୍ରୀଙ୍କ ତାଳି, ଥାଳି ଘଣ୍ଟ ବାଡେଇବାକୁ ସେ ସମର୍ଥନ କରି ପାଳନ କରିଥିଲେ । ଏବେ ମୁଖ୍ୟମନ୍ତ୍ରୀଙ୍କ ନିବେଦନକୁ ଅଯଥାର୍ଥ କହିବା କେତେଦୂର ଠିକ ?
