ସୁଶାନ୍ତଙ୍କ ପାଇଁ ଡ୍ରଗ୍ସ କିଣୁଥିଲେ ରିୟା, ସିଣ୍ଡିକେଟର ଥିଲେ ସକ୍ରିୟ ସଦସ୍ୟ: NCB
1 min read
ନୂଆଦିଲ୍ଲୀ: ସୁଶାନ୍ତ ସିଂହ ରାଜପୁତ ମୃତ୍ୟୁ ମାମଲାରେ ଯୋଡ଼ି ହୋଇଥିବା ଡ୍ରଗ୍ସ ଲିଙ୍କରେ ଗିରଫ ହୋଇଥିବା ରିୟା ଚକ୍ରବର୍ତ୍ତୀଙ୍କ ଜାମିନକୁ ନେଇ ଆଜି ବମ୍ବେ ହାଇକୋର୍ଟରେ ଶୁଣାଣି ହୋଇଛି । ଇତି ମଧ୍ୟରେ ମାମଲାର ଯାଞ୍ଚ କରୁଥିବା NCB ( Narcotic Control Bureau ) ହାଇକୋର୍ଟରେ ନିଜ ସତ୍ୟପାଠ ଦାଖଲ କରିଛି । ଏଥିରେ NCB ସ୍ପଷ୍ଟ ଭାବରେ କହିଛି ଯେ, ରିୟା ଚକ୍ରବର୍ତ୍ତୀ ସୁଶାନ୍ତ ସିଂହ ରାଜପୁତଙ୍କ ପାଇଁ ଡ୍ରଗ୍ସ କିଣୁଥିଲେ । ସୁଶାନ୍ତଙ୍କ ଔଷଧ ଖାଇବା ଅଭ୍ୟାସକୁ ଛଡ଼ାଇବା ପାଇଁ ରିୟା ତାଙ୍କୁ ଡ୍ରଗ୍ସ ଦେଉଥିବା NCB ସତ୍ୟପାଠରେ ଉଲ୍ଲେଖ କରିଛି ।
ରିୟା ଚକ୍ରବର୍ତ୍ତୀ ଏବଂ ସୌଭିକ ଚକ୍ରବର୍ତ୍ତୀଙ୍କୁ ଜାମିନ ଦେବା ବିପକ୍ଷରେ ଏନସିବି ନିଜ ସତ୍ୟପାଠରେ କହିଛି ଯେ, ଦୁହେଁ ଡ୍ରଗ ସିଣ୍ଡିକେଟର ସକ୍ରିୟ ସଦସ୍ୟ ଥିଲେ । ଏନସିବିର ଜୋନଲ ଡାଇରେକ୍ଟର ସମୀର ୱାନଖେଡେ ତରଫରୁ ଦାଖଲ କରାଯାଇଥିବା ଜବାବରେ କୁହାଯାଇଛି ଯେ, ରିୟା ଡ୍ରଗ୍ସ କଳାବଜାରୀରୁ ଫାଇନାନ୍ସ କରିଛନ୍ତି । ସତ୍ୟପାଠରେ କୁହାଯାଇଛି ଯେ, ହ୍ୱାଟସଆପ ଚାଟ୍, ମୋବାଇଲ, ଲାପଟପ୍ ଏବଂ ହାର୍ଡ ଡିସ୍କରୁ ସଂଗ୍ରହ କରାଯାଇଥିବା ତଥ୍ୟ ମୁତାବକ ରିୟା ଚକ୍ରବର୍ତ୍ତୀ ଲଗାତାର ଭାବେ ଡ୍ରଗ୍ସ କିଣୁଥିଲେ । ଏହା ସହିତ ଏହି ଅବୈଧ କାରବାରକୁ ଫାଇନାନ୍ସ ମଧ୍ୟ କରୁଥିଲେ ।
ଏନସିବି ସତ୍ୟପାଠରେ କହିଛି ଯେ, ଯଦି ପୂରା ମାମଲାକୁ ଦେଖିବା ତେବେ ସୁଶାନ୍ତ ସିଂ ରାଜପୁତ ଡ୍ରଗ୍ ନେଉଥିବା ଜାଣି ମଧ୍ୟ ରିୟା ଟକ୍ରବର୍ତ୍ତୀ ଏହାକୁ ଲୁଚାଇ ରଖିଥିଲେ। ରିୟା ଚକ୍ରବର୍ତ୍ତୀ ତାଙ୍କ ଘରେ ଡ୍ରଗ୍ସ ଗଚ୍ଛିତ କରି ରଖୁଥିଲେ ଏବଂ ପରେ ଏହାକୁ ସୁଶାନ୍ତ ସିଂ ରାଜପୁତଙ୍କୁ ମଧ୍ୟ ଦେଉଥିଲେ । ଏନସିବି ଏହା ମଧ୍ୟ କହିଛି ଯେ ରିୟା ହାଇ ସୋସାଇଟି ପର୍ସନାଲିଟି ସହିତ ଜଡିତ ଡ୍ରଗ୍ ସିଣ୍ଡିକେଟ୍ ର ଜଣେ ସକ୍ରିୟ ସଦସ୍ୟ ଅଟନ୍ତି। ସେ ଡ୍ରଗ୍ସ ଚୋରା କାରବାରରେ ସମ୍ପୃକ୍ତ ଥିବା ପର୍ଯ୍ୟାପ୍ତ ପ୍ରମାଣ ଥିବା ଏନସିବି ଦାବି କରିଛି । ରିୟା ଚକ୍ରବର୍ତ୍ତୀ ଡ୍ରଗ୍ସ ଡିଲିଭରୀ କରୁଥିଲେ ଏବଂ କ୍ରେଡିଟ୍ କାର୍ଡ, ନଗଦ ଏବଂ ପେମେଣ୍ଟ ଗେଟୱେ ମାଧ୍ୟମରେ ପେମେଣ୍ଟ କରୁଥିଲେ ।
