କଟକ: କଟକରେ ଚିକିତ୍ସିତ ହେଉଥିବା ବେଳେ କହ୍ନେଇଙ୍କୁ ଭେଟିଲେ ଉପ-ଜିଲ୍ଲାପାଳ । ଦୂରାରୋଗୀ ନ୍ୟୁରୋ ଫାର୍ବୋ ମେଟାସିସ ରୋଗରେ ପୀଡ଼ିତ କହ୍ନେଇ । ସେ ଓଲଟପୁର ଏସ.ଭି ନିରତାରରେ ଚିକିତ୍ସିତ ହେଉଛନ୍ତି । କହ୍ନେୟା ପ୍ରଧାନଙ୍କ ଘର କଟକ ନାହାଳପୁର ଗାଁରେ ।

ସରକାରୀ ନୀତିନିୟମ ଅନୁସାରେ କହ୍ନେଇଙ୍କୁ ସବୁପ୍ରକାର ସହଯୋଗ ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି ଉପ-ଜିଲ୍ଲପାଳ ଶୁଭ୍ରାଂଶୁ ଶେଖର ରଥ ।

ତେବେ ଉପ-ଜିଲ୍ଲାପାଳଙ୍କ ସହ କଟକ ସଦର ଏସଡିପି, ଓଲଟପୁର ଓ ଗୋବିନ୍ଦପୁର ଥାନା ଅଧିକାରୀ ମଧ୍ୟ କହ୍ନେଇଙ୍କୁ ଭେଟିଥିବା ଜଣାପଡିଛି ।

ଭୁବନେଶ୍ୱର: ପ୍ରଧାନମନ୍ତ୍ରୀ ଆବାସ ଯୋଜନା ବିଜୁ ପକ୍କା ଘର ଯୋଜନା ପାଇଁ ଏକାଠି ବଜେଟ ପ୍ରସ୍ତୁତ କରୁଛନ୍ତି ରାଜ୍ୟ ସରକାର । ତେଣୁ ଏଥିରେ ବିଜୁ ଲୋଗୋ ରହିବ ବୋଲି ବିଧାନସଭାରେ ମୁଲତବୀ ପ୍ରସ୍ତାବ ଆଲୋଚନାରେ ସ୍ପଷ୍ଟ କରିଛନ୍ତି ପଞ୍ଚାୟତିରାଜମନ୍ତ୍ରୀ । କେନ୍ଦ୍ର ଓ ରାଜ୍ୟ ସହଭାଗିତାରେ ଯୋଜନା ହେଉଥିବାରୁ ପ୍ରଧାନମନ୍ତ୍ରୀଙ୍କ ଲୋଗୋ ଦାବି କରିଛି ବିରୋଧୀ ବିଜେପି । ଏଥିରେ ଇନ୍ଦିରା ଗାନ୍ଧୀଙ୍କ ଲୋଗୋ ବି ଦାବି କରିଛି କଂଗ୍ରେସ।

ପ୍ରଧାନମନ୍ତ୍ରୀ ଆବାସ ଯୋଜନାରେ କେନ୍ଦ୍ରୀୟ ଅନୁଦାନ ୬୦ ପ୍ରତିଶତ ହୋଇଥିବାବେଳେ ରାଜ୍ୟର ଅଂଶଦନ ୪୦ ପ୍ରତିଶତ । ଯେଉଁଥି ପାଇଁ ଏହାକୁ ପ୍ରଧାନମନ୍ତ୍ରୀ ଆବାସ ବିଜୁ ପକ୍କା ଘର ଯୋଜନା କୁହାଯାଉଛି । ହେଲେ ଏହି ୪୦ ପ୍ରତିଶତରେ ପ୍ରଶାସନିକ ଖର୍ଚ୍ଚ ମିଶାଇଲେ, ରାଜ୍ୟକୁ ୫୪ ପ୍ରତିଶତ ବହନ କରିବାକୁ ପଡ଼ୁଛି । ଏଥିପାଇଁ ଏହି ଯୋଜନାରେ ବିଜୁ ଲୋଗୋ ରହୁଥିବା ପଞ୍ଚାୟତିରାଜମନ୍ତ୍ରୀ କହିଛନ୍ତି । ୨୦୧୬ରୁ ୨୦୨୦ ଯାଏଁ କେନ୍ଦ୍ର ସରକାର ୯୯୦୦.୪ କୋଟି ଦେଇଥିବାବେଳେ ରାଜ୍ୟ ବହନ କରିଛି ୬୬୦୦.୨୭ କୋଟି ଟଙ୍କା। ବର୍ତ୍ତମାନ ସୁଦ୍ଧା ୨୫ ଲକ୍ଷ ପକ୍କା ଘର ନିର୍ମାଣ ସରିଛି । ପଶ୍ଚିମ ବଙ୍ଗ, ସକିମ୍ମ, ତାମିଲନାଡ଼ୁ ପରି ରାଜ୍ୟ ଯୋଜନାରୁ ପ୍ରଧାନମନ୍ତ୍ରୀ ଆବାସ ଯୋଜନାର ନାମ ବାଦ୍‌ ଦେଉଥିବା ଅଭିଯୋଗ କରିଛନ୍ତି ବିଭାଗୀୟ ମନ୍ତ୍ରୀ । ହେଲେ ପ୍ରଧାନମନ୍ତ୍ରୀ ସହ ବିଜୁ ଲୋଗୋ ଲଗାଇବେ ରାଜ୍ୟ ସରକାର।

ପଞ୍ଚାୟତିରାଜ ମନ୍ତ୍ରୀଙ୍କ ଉତ୍ତର ପରେ ବି ଅସନ୍ତୋଷ ବିରୋଧୀ । ବିଜୁ ଲୋଗୋ ପରି ପ୍ରଧାନମନ୍ତ୍ରୀଙ୍କ ଲୋଗୋକୁ ବି ମାର୍ବଲରେ ଲଗାଇବାକୁ ଦାବି କରିଛି ବିଜେପି । ସେପଟେ ଇନ୍ଦିରାଗାନ୍ଧୀଙ୍କ ସମୟରୁ ଆବାସ ଯୋଜନା କାର୍ଯ୍ୟକାରୀ ହୋଇଥିବାରୁ ଇନ୍ଦିରା ଗାନ୍ଧିଙ୍କ ଲୋଗୋ ଦାବି କରିଛି କଂଗ୍ରେସ ।

୨୦୧୪ ପରଠାରୁ ବିଭିନ୍ନ ଯୋଜନାରେ କେନ୍ଦ୍ର ସରକାର ଅନୁଦାନ କାଟିଥିବା ଅଭିଯୋଗ ହୋଇଛି। ରାଜ୍ୟ ସରକାର ଆର୍ଥିକ ବୋଝ ଯୋଗୁଁ ୨ଟି ଯୋଜନା ମିଶିଲା। ହେଲେ ପ୍ରଧାନମନ୍ତ୍ରୀ ଆବାସ ଯୋଜନାକୁ ବିଜୁ ପକ୍କାଘର ଯୋଜନାରେ ପରିଣତ କରିବାକୁ ରାଜ୍ୟ ସରକାର ପ୍ରୟାସ କରୁନଥିବା ବିଧାନସଭାରେ ସ୍ପଷ୍ଟ କରିଛନ୍ତି ପଞ୍ଚାୟତିରାଜ ମନ୍ତ୍ରୀ ।

ଭୁବନେଶ୍ୱର: ବଲାଙ୍ଗିର ଓ ସୋନପୁର ଜିଲ୍ଲାର ୧୫ ଜଣ ଶ୍ରମିକ ଏବଂ ତାଙ୍କ ଶିଶୁମାନଙ୍କୁ ତେଲେଙ୍ଗାନା ବେଗୁମ୍ପେଟ ଜିଲ୍ଲାର ପେଡାପଲ୍ଲୀ ଅଞ୍ଚଳ ଓଡ଼ିଶା ଫେରାଇ ଆଣିଛି ‘ଓଡ଼ିଶା ମୋ ପରିବାର’ । ଜଣେ ଠିକାଦାର ସେମାନଙ୍କୁ ମଜୁରୀ ନଦେଇ ଜୋର ଜବରଦସ୍ତି ଅଟକାଇ କାମ କରାଉଥିବା ଖବର ପାଇବା ପରେ ସେମାନଙ୍କୁ ଓଡ଼ିଶା ଫେରାଇ ଆଣାଯାଇଛି ।

ସୂଚନାଯୋଗ୍ୟ, ଗତ ୧୪ ତାରିଖରେ ସୋନପୁରର ସୁରେନ୍ଦ୍ର ଭରସାଗର ନାମକ ଜଣେ ବ୍ୟକ୍ତି ‘ଓଡ଼ିଶା ମୋ ପରିବାର’କୁ ଫୋନ ମାଧ୍ୟମରେ ପେଡିପଲ୍ଲୀ ଗାଁରେ ଏକ ଇଟାଭାଟିରେ ଜୋରଜବରଦସ୍ତ ବିନା ମଜୁରିରେ ଖଟାଇବା ସହିତ ନାନା ପ୍ରକା ନିଯ୍ୟାତନା ଜଣାଇଥିଲେ ।  ଏହି ଖବର ସମ୍ପର୍କରେ ଅବଗତ ହେବା ପରେ ‘ଓଡ଼ିଶା ମୋ ପରିବାର’ର ଆବାହକ ଅରୁପ ପଟ୍ଟନାୟକ ଆନ୍ଧ୍ର ପ୍ରଦେଶର ପୂର୍ବତନ ଡିଜିପି ଏସ୍‌.କେ ହୁଡ଼ା ଏବଂ ଓଡ଼ିଶା ମୋ ପରିବାର ଟିମ୍ ସେଠାକାର ଜିଲ୍ଲାପାଳ ଓ ପୋଲିସ ଡେପୁଟୀ କମିଶନରଙ୍କୁ ଏ ବିଷୟରେ ଅବଗତ କରାଇଥିଲେ । ଫେବ୍ରୁଆରୀ ୧୬ ତାରିଖରେ ଏସ୍‌.ପି ଓ ତାଙ୍କ ଟିମ୍‌ ପେଡାପଲ୍ଲୀଠାରେ ଥିବା ଇଟାଭାଟି ଉପରେ ଚଢ଼ାଉ କରିଥିଲେ ଏବଂ ସେମାନଙ୍କୁ ପ୍ରାପ୍ୟ ଦେବାକୁ କହିବା ସହ ସେମାନଙ୍କୁ ତାଙ୍କ ଗ୍ରାମକୁ ଫେରାଇଦେବା ପାଇଁ ମଧ୍ୟ ନିର୍ଦ୍ଦେଶ ଦେଇଥିଲେ ।

ଠିକାଦାର ସମସ୍ତ ୧୫ ଜଣ ଶ୍ରମିକ ଓ ତାଙ୍କ ନାବାଳକ ପିଲାମାନଙ୍କୁ ସେମାନଙ୍କ ଫେରିବା ଖର୍ଚ୍ଚ ଦେବା ସହିତ ତାଙ୍କର ଫେରିବା ପାଇଁ ଟିକେଟ୍‌ କରାଇଦେଇଥିଲେ । ସେମାନେ ସମସ୍ତେ ବିଶାଖା ଏକ୍ସପ୍ରେସରେ ୧୭ ତାରିଖରୁ ବାହାରି ୧୮ ତାରିଖରେ ବିଶାଖାପାଟଣାରେ ପହଞ୍ଚିଥିଲେ । ଅନ୍ୟ ଏକ ଟ୍ରେନ୍‌ ଧାନବାଦ ଏକ୍ସପ୍ରେସରେ ସେଠାରୁ ବାହାରି ସାରିଥିବା ବେଳେ ମଙ୍ଗଳବାର ରାତି ୧୧ଟା ୩୦ ମିନିଟ୍‌ରେ ବଲାଙ୍ଗିର ରେଳ ଷ୍ଟେସନ୍‌ରେ ପହଞ୍ଚିଥିଲେ । ସେଠାରେ ଓଡ଼ିଶା ମୋ ପରିବାର ତରଫରୁ ନିହାର ରଞ୍ଜନ ବେହେରା, ନାରାୟଣ ସାହୁ, ନିତ୍ୟାନନ୍ଦ ସାହୁ ସମେତ ବଲାଙ୍ଗିର ଜିଲ୍ଲା ଶ୍ରମ ଅଧିକାରୀ ଓ ସୋନପୁର ଜିଲ୍ଲା ଶ୍ରମ ଅଧିକାରୀ ପ୍ରମୁଖ ଉପସ୍ଥିତ ରହି ସମସ୍ତ ଶ୍ରମିକମାନଙ୍କୁ ସେମାନଙ୍କ ଗ୍ରାମକୁ ଯିବାପାଇଁ ସବୁ ପ୍ରକାର ବ୍ୟବସ୍ଥା କରାଇଥିଲେ ।

ଭଦ୍ରକ: ମରିଗଲା ମାନବିକତା । ମୃତ୍ୟୁ ସହ ସଂଘର୍ଷ କରୁଥିବା ଯୁବକଙ୍କୁ ଉଦ୍ଧାର କରିବା ଛାଡ଼ି ଫଟୋ, ଭିଡିଓ ଉଠାଇଲେ ଲୋକେ । ଭଦ୍ରକ ସାହାପୁର ଛକରେ ଏଭଳି ଅଭାବନୀୟ ଘଟଣା ସାମନାକୁ ଆସିଛି ।

ଜାତୀୟ ରାଜପଥ ଉପରେ ବାଇକ୍‌ ଆରୋହୀଙ୍କୁ ଏକ ସିମେଣ୍ଟ ବୋଝେଇ ଟ୍ରକ୍ ଧକ୍କା ଦେଇଥିଲା । ବାଇକ ଚାଳକ ତଳେ ପଡିଯିବାରୁ ଟ୍ରକଟି ଅଣ୍ଟା ଉପରେ ଚଢିଯାଇଥିଲା । ଯୁବକ ଜଣକ ମୃତ୍ୟୁ ସହ ସଂଘର୍ଷ କରୁଥିଲେ ।

ତେବେ ତାଙ୍କୁ ଉଦ୍ଧାର କରିବା ବଦଳରେ ତାଙ୍କ ଫଟୋ ଉଠାଉଥିଲେ ଉପସ୍ଥିତ ଲୋକେ । ଜୀବନ ଅପେକ୍ଷା ସଉକ ଆଗ ଥିଲା । କିଛି ସମୟ ପରେ ପୋଲିସ ଆସି ଯୁବକଙ୍କୁ ଉଦ୍ଧାର କରି ମେଡିକାଲକୁ ନେଇଥିଲା । ହେଲେ ସେତେବେଳକୁ ଜୀବନ ଯୁଦ୍ଧରେ ହାରିସାରିଥିଲେ ଯୁବକ । ତାଙ୍କୁ ମୃତ ଘୋଷଣା କରିଥିଲେ ଡାକ୍ତର ।