ପଶ୍ଚିମବଙ୍ଗ: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କଂଗ୍ରେସ ସମେତ ସମସ୍ତ ବିରୋଧୀ ଦଳଙ୍କୁ ଝଟ୍‌କା ଦେଇଛନ୍ତି । ରାଜଧାନୀ ଦିଲ୍ଲୀରେ ଜାନୁୟାରୀ ୧୩ରେ ଆୟୋଜିତ ହେବାକୁ ଥିବା ବିରୋଧୀ ଦଳ ବୈଠକରେ ସେ ଯୋଗଦେବେ ନାହିଁ ବୋଲି କହିଛନ୍ତି । ମମତାଙ୍କ ମତରେ କଂଗ୍ରେସ ଓ ବାମଦଳ ପଶ୍ଚିମବଙ୍ଗରେ ଦୂଷିତ ରାଜନୀତି କରୁଛନ୍ତି । ସେଥିପାଇଁ ସେ ଏକା ନାଗରିକତ୍ୱ ସଂଶୋଧନ ଆଇନ(ସିଏଏ) ଓ ରାଷ୍ଟ୍ରୀୟ ନାଗରିକତା ରେଜିଷ୍ଟର(ଏନ୍‌ଆର୍‌ସି) ବିରୋଧରେ ଲଢିବେ ବୋଲି ସ୍ଥିର କରିଥିବା କହିଛନ୍ତି।

ସୂଚନାଯୋଗ୍ୟ, ମମତା ସିଏଏ ଓ ଏନ୍‌ଆର୍‌ସିକୁ ଆରମ୍ଭରୁ ବିରୋଧ କରୁଥିବା ବେଳେ ଏହାକୁ ନେଇ କିଛି ରାଲି ମଧ୍ୟ ଆୟୋଜନ କରି ସାରିଛନ୍ତି। ଏହାକୁ ନେଇ ସେ ସବୁ ବେଳେ ମୋଦି ସରକାର ବିଶେଷ କରି ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କୁ ଟାର୍ଗେଟ କରିଛନ୍ତି।

ଗୁଜୁରାଟ: ସୁରଟରେ ଗ୍ୟାସ ସିଲିଣ୍ତର ଭର୍ତ୍ତି ଏକ ଟ୍ରକରେ ହଠାତ୍ ନିଆଁ ଲାଗିଲା । ଏବଂ ସିଲିଣ୍ଡର ଫାଟିବାର ଶବ୍ଦରେ ଭୟଭିତ ହେଲେ ପାଖାପାଖି ଲୋକ । ଏଥିରୁ ବର୍ତ୍ତି ପାରିଲାନି ସ୍କୁଲ ବସ୍ । କିନ୍ତୁ ସମୟ ଥାଉ ଥାଉ ପିଲାଙ୍କୁ ସ୍କୁଲ ବସରୁ ବାହାର କରି ଦିଆଯାଇଥିଲା । ଫଳରେ କୌଣସି କ୍ଷୟକ୍ଷତି ହୋଇନାହିଁ  । ଏହି ଦୁର୍ଘଟଣାରେ ସ୍କୁଲବସ୍ ସହ କିଛି ଅଟୋ ମଧ୍ୟ ଜଳି ଯାଇଛି । ଘଟଣାଟି ସୁରଟ ଓଲପାଡ଼ ଅଞ୍ଚଳରେ ଦେଖିବାକୁ ମିଳିଛି ।

ସୁରଟରେ ଗ୍ୟାସ ସିଲିଣ୍ଡ ଭର୍ତ୍ତି ଏକ ଟ୍ରକ୍ ଯାଉଥିବାବେଳେ ହଠାତ୍ ଟ୍ରକରେ ନିଆଁ ଲାଗିଯାଇଥଲା ଏବଂ ଗୋଟେ ପରେ ଗୋଟେ ସିଲିଣ୍ଡର ଫାଟିବାକୁ ଲାଗିଥିଲା । ଯାହା ଫଳରେ ରାସ୍ତାରେ ଯାଉଥିବା ଗାଡ଼ି ଗୁଡ଼ିକରେ ନିଆଁ ବ୍ୟାପିବାରେ ଲାଗିଥିଲା । ଆଉ ଏହାର ଶିକାର ହୋଇଥିଲା ସ୍କୁଲ ବସ୍ । ତେବେ ନିଆଁ କେଉଁ କାରଣରୁ ଲାଗିଥିଲା ସେ ନେଇ ତନାଘନା ଜାରୀ ।

ସିଆଚିନ: ସିଆଚିନ୍‌ରେ ଆର୍ମି ମୁଖ୍ୟ ଜେନେରାଲ ମନୋଜ ମୁକୁନ୍ଦ ନରୱଣେ । ପଦ ଗ୍ରହଣ ପରେ ପ୍ରଥମ ଥର ସେ ସିଆଚିନ୍‌ ଗସ୍ତ କରି ସେଠାକାର ସୁରକ୍ଷା ସ୍ଥିତି ଅନୁଧ୍ୟାନ କରିଛନ୍ତି । ସିଆଚିନରେ ମୁତୟନ ସମସ୍ତ ଯବାନଙ୍କୁ ସେ ନୂଆବର୍ଷର ଅଭିନନ୍ଦନ ଜଣାଇବା ସହିତ ସିଆଚିନ୍ ୱାର ମେମୋରିଆଲ ଠାରେ ସହିଦଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ ।

ଖରାପ ପାଗ ସତ୍ତ୍ୱେ ଭାରତୀୟ ଯବାନ ସେଠାରେ ମୁତୟନ ରହି ଶତ୍ରୁ ଉପରେ କଡ଼ା ନଜର ରଖି ଦେଶକୁ ସୁରକ୍ଷା ଦେଉଥିବାରୁ ସେମାନଙ୍କୁ ପ୍ରଶଂସା କରିଛନ୍ତି ସେନାମୁଖ୍ୟ । ମୁତୟନ ଥିବା ଯବାନଙ୍କ ପାଖରେ ଆବଶ୍ୟକ ଖାଦ୍ୟ ପଦାର୍ଥ ଏବଂ ପୋଷାକ ଯେଭଳି ଠିକ୍‌ ସମୟରେ ପହଞ୍ଚିପାରିବ ସେ ନେଇ ଉଦ୍ୟମ ଅବ୍ୟାହତ ରହିଥିବା ସେ କହିଛନ୍ତି। ଯବାନଙ୍କୁ ରାସନ୍‌ଠୁ ନେଇ ଅନ୍ୟ ଆବଶ୍ୟକ ସାମଗ୍ରୀ ସୁଚାରୁ ଭାବେ କିପରି ଯୋଗାଯିବ, ତା’ ଉପରେ ଅଧିକ ଗୁରୁତ୍ୱ ଦିଆଯିବ ।

ଠିକ୍‌ ସମୟରେ ସମସ୍ତ ଯବାନ୍‌ ଛୁଟିରେ ଯେଭଳି ଘରକୁ ଯାଇପାରିବେ, ସେ ଦିଗରେ ମଧ୍ୟ ଗୁରୁତ୍ୱ ଦିଆଯିବ ବୋଲି ଜେନେରାଲ ନରୱାଣେ କହିଛନ୍ତି । ଏତେ ଦୂରରେ ରହିଲେ ବି ସବୁ ଯବାନଙ୍କ ସ୍ଥାନ ତାଙ୍କ ହୃଦୟରେ ବୋଲି ସେ କହିଛନ୍ତି । ସୂଚନା ଅନୁଯାୟୀ, ସେନାମୁଖ୍ୟ ଭାବେ ଦାୟିତ୍ୱ ଗ୍ରହଣ କରିବା ପରେ ନରାୱଣେ ପ୍ରଥମ ଥର ପାଇଁ ସିଆଚେନ୍‌ ପରିଦର୍ଶନରେ ଯାଇଛନ୍ତି । ପରେ ସିଆଚିନ ଯୁଦ୍ଧରେ ଭାରତୀୟ ଯବାନଙ୍କ ପ୍ରଦର୍ଶନକୁ ପ୍ରଶଂସା କରି ସେଠାରେ ମୁତୟନ ଥିବା ସମସ୍ତ ଯବାନ ମାନଙ୍କୁ ବ୍ୟାଚ୍ ପ୍ରଦାନ କଲେ ସେନାମୁଖ୍ୟ ।