ମୁମ୍ବାଇ: ଲକଡାଉନ ପାଇଁ ଦୂରଦର୍ଶନରେ ଆରମ୍ଭ ହୋଇଛି ପୂରୁଣା ସିରିଏଲ ଗୁଡ଼ିକର ପୁନଃ ପ୍ରସାରଣ । ତେଣୁ ଭାରତୀୟ ଟେଲିଭିଜନ୍ ଇତିହାସରେ ଜବରଦସ୍ତ ଟିଆରପି ପ୍ରଦାନ କରିବାର ରେକର୍ଡ ପୁଣି ଆରମ୍ଭ ହୋଇଛି । ଏହି ରେସରେ ସବୁଠୁ ଆଗରେ ଅଛି ସିରିଏଲ ରାମାୟଣ । ତେଣୁ ଏହାର ଜଣା ଅଜଣା କଥା ଜାଣିବାକୁ ଲୋକେ ଖୁବ ପସନ୍ଦ ମଧ୍ୟ କରୁଛନ୍ତି । ଏନେଇ ଆମେ ଏମିତି ଏକ କାହାଣୀ ନେଇ ଆସିଛୁ ।
ପରଦା ଆଗରେ ଥିବା କାହାଣୀ ବ୍ୟତୀତ, ପରଦା ପଛରେ ରହିଛି ଅନେକ କାହାଣୀ । ଏହି କାହାଣୀଗୁଡିକ କେବଳ ଅତ୍ୟନ୍ତ କୌତୁହଳପ୍ରଦ ନୁହେଁ ବରଂ ଆମକୁ ବୁଝାଏ ଯେ ସେହି ସମୟରେ ଜିନିଷଗୁଡିକ କିପରି ଥିଲା । ରାମାନନ୍ଦ ସାଗରଙ୍କ ରାମାୟଣ କଳାକାରମାନଙ୍କୁ ଏତେ ଲୋକପ୍ରିୟତା ଦେଇଥିଲା ଯେ ଲୋକମାନେ ତାଙ୍କୁ ଦେବତା ପରି ପୂଜା କରିବା ଆରମ୍ଭ କରିଥିଲେ ।
ଏହି ଶୋ’ରେ ରାମ, ଲକ୍ଷ୍ମଣ ଏବଂ ସୀତା ଭୂମିକାରେ ଅଭିନୟ କରୁଥିବା ଅରୁଣ ଗୋବିଲ, ସୁନୀଲ ଲହରି ଏବଂ ଦୀପିକା ଚିଖଲିଆ । ସେମାନେ ନିଜେ ମଧ୍ୟ ଅନେକ ଥର କହିଛନ୍ତି ଯେ ସେମାନେ ଯେତେବେଳେ ଗାଁ ଓ ସହରକୁ ଯାଉଥିଲେ ଲୋକମାନେ କିପରି ତାଙ୍କ ପାଦ ଛୁଉଁ ଥିଲେ । ଏଥିରୁ ହିଁ ଜଣାପଡ଼େ ସେମାନେ ସେ ସମୟରେ କେତେ ଲୋକପ୍ରିୟତା ହାସଲ କରିଥିଲେ । କିନ୍ତୁ ଆପଣ ଜାଣନ୍ତି କି ରାମାୟଣର କଳାକାରମାନଙ୍କ ଅଭିନୟର ପାରିଶ୍ରମିକ କେତେ ଥିଲା । ସେହି ସମୟ ସେମାନେ କେତେ ଟଙ୍କା ରୋଜଗାର କରୁଥିଲେ? ଏନେଇ ଲକ୍ଷ୍ମଣ ଭୂମିକାରେ ଅଭିନୟ କରିଥିବା ସୁନୀଲ ଲହରି ସ୍ପଷ୍ଟ କରିଛନ୍ତି ।
ରାମାୟଣରେ ଲକ୍ଷ୍ମଣ ଭୂମିକାରେ ଅଭିନୟ କରୁଥିବା ସୁନୀଲ ଲହରି କହିଛନ୍ତି, “ମୁଁ କେବଳ କହିବି ଯେ ଆମକୁ ବାଦାମ ମୁଲ୍ୟର ପାରିଶ୍ରମିକ ମିଳୁଥିଲା । ସେତେବେଳେ ଆଜିଭଳି ସେତେ ଖର୍ଚ୍ଚ ନଥିଲା।” ଯଦିଓ ସେ କେତେ ଟଙ୍କା ପାଉଥିଲେ ତାହା ସୁନୀଲ ସିଧାସଳଖ ତ କହି ନଥିଲେ, କିନ୍ତୁ ସେ ନିଶ୍ଚିତ ଭାବରେ କହିଥିଲେ ଯେ ଏହି ଅଭିନୟର ପାରିଶ୍ରମିକ ବହୁତ କମ୍ ମିଳୁଥିଲା । ସୁନୀଲ ତାଙ୍କ ଆଲୋଚନାରେ ଆହୁରି ମଧ୍ୟ କହିଛନ୍ତି ଯେ, ସେତେବେଳେ ଦୈନନ୍ଦିନ ଖର୍ଚ୍ଚ ଏତେ ଟଙ୍କା ନଥିଲା । ଆମେ ଆପଣଙ୍କୁ କହି ରଖୁଛୁ ଯେ, ରାମାୟଣ ସିରିଏଲର ସୁଟିଂ ୧୯୮୭ରେ କରାଯାଇଥିଲା ।
ପୁରା ଶୋ’ କରିବା ପରେ ମଧ୍ୟ ଆମ ପାଖରେ ଏତେ ଟଙ୍କା ନଥିଲା ଯେ ଆମେ ଘର ତିଆରି କରିପାରିବାକୁ ଚିନ୍ତା କରିବୁ
ସୁନୀଲ କହିଛନ୍ତି, “ଯଦିଓ ଆଜି ଜଣେ ଅଭିନେତା ଗୋଟିଏ ଶୋ କରି ନିଜ ପାରିଶ୍ରମିକରେ ଘର ତିଆରି କରିପାରନ୍ତି । କିନ୍ତୁ ସେତେବେଳେ ଆମେ ପୂରା ରାମାୟଣ କରିବା ପରେ ମଧ୍ୟ ଘର ନିର୍ମାଣ କରିବାକୁ ଚିନ୍ତା ବି କରିପାରୁ ନଥିଲୁ । ଆଜି ଭଳି ଆମେ ନିଜ ଲାଇଫ୍ ଷ୍ଟାଇଲକୁ ନେଇ ଏତେ ସିରିୟସ ନଥିଲୁ କି ଏନେଇ ବେଶୀ ଚିନ୍ତାମଧ୍ୟ କରି ନଥିଲୁ । ” କ୍ରମାଗତ ଭାବରେ ମନୋରଞ୍ଜନ ଜଗତ ଯେପରି ଦ୍ରୁତ ଗତିରେ ଆଗକୁ ବଢୁଛି ସୁନୀଲ ଲାହିରୀ ତାକୁ ପ୍ରଶଂସା କରିଛନ୍ତି ।
