ପୁଣି ହେବ କରୋନା ଟେଷ୍ଟ, ପଜିଟିଭ୍ ବାହାରିଲେ କ୍ୱାରେଣ୍ଟାଇନ୍..!
ପୁରୀ: ବାହୁଡ଼ା ପୂର୍ବରୁ ପୁରୀରେ ସବୁ ସେବାୟତଙ୍କର ପୁଣି ଥରେ କରୋନା ଟେଷ୍ଟିଂ କରାଯିବ । ଥରେ ନୁହେଁ ସେମାନଙ୍କର ଦୁଇ ଦୁଇ ଥର କରୋନା ଟେଷ୍ଟ ହେବ ବୋଲି ସ୍ଥିର କରାଯାଇଛି । କେବଳ ସେବାୟତଙ୍କର ନୁହେଁ, ସମସ୍ତ ଅଧିକାରୀ ଏବଂ କର୍ମଚାରୀ ଯେଉଁମାନେ ରଥଯାତ୍ରା ସହ ସମ୍ପୃକ୍ତ ଥିଲେ, ସେମାନଙ୍କର ପୁଣି ଥରେ କରୋନା ଟେଷ୍ଟ କରାଯିବ ।
ଟେଷ୍ଟିଂ ପରେ ଯେଉଁ ସେବାୟତ ମାନଙ୍କର ନେଗେଟିଭ୍ ବାହାରିବ ସେହିମାନେ ହିଁ ରଥ କାର୍ଯ୍ୟରେ ନିୟୋଜିତ ହେବେ । ଏବଂ ଯାତ୍ରାର ଅନ୍ୟାନ୍ୟ ନୀତିରେ ଭାଗ ନେବେ । ସେବାୟତଙ୍କ ପାଇଁ ଦୁଇଟି ମେଡିକାଲ କ୍ୟାମ୍ପ କରାଯିବା ସହ ଡାକ୍ତର ମଧ୍ୟ ମୁତୟନ ରହିବେ । ନୀଳାଦ୍ରି ବିଜେର ୧୦ ଦିନ ପର୍ଯ୍ୟନ୍ତ ଏହି ବ୍ୟବସ୍ଥା ଚାଲିବ ବୋଲି ସ୍ଥିର କରାଯାଇଛି ।
ବଡ଼ଦାଣ୍ଡ ସମେତ ଆଖପାଖ ଅଞ୍ଚଳରେ ରଥଯାତ୍ରା ସମାପ୍ତ ହେବା ଯାଏ ବାରମ୍ବାର ସାନିଟାଇଜ୍ କରାଯିବ । ଗୁରୁବାର ବସିଥିବା ଛତିଶା ନିଯୋଗ ବୈଠକରେ ଏଭଳି ନିଷ୍ପତ୍ତି ନିଆଯାଇଛି । ଗୁଣ୍ଡିଚା ଭଳି ବାହୁଡ଼ା ଯାତ୍ରାରେ ମଧ୍ୟ ପୋଲିସ ଛାଉଣୀ ଏବଂ କର୍ଫ୍ୟୁ ଲଗାଯିବ ବୋଲି ସୂଚନା ଦେଇଛନ୍ତି ପରିଚାଳନା କମିଟି କାର୍ଯ୍ୟକାରୀ ଅଧ୍ୟକ୍ଷ ସୁରେଶ ମହାପାତ୍ର । ତେବେ ସୂଚନା ଅନୁଯାୟୀ ଗୁରୁବାର ପ୍ରଥମ ଦିନରେ ୧୦୦୦ ଜଣଙ୍କର କରୋନା ଟେଷ୍ଟ କରାଯାଇଛି ।
ଇ-ଲର୍ଣ୍ଣିଂକୁ ସରକାର ଦେଉଛନ୍ତି ଗୁରତ୍ୱ, ଆପ୍ ମାଧ୍ୟମରେ ପ୍ରଥମରୁ ଦଶମ ଯାଏଁ ମୋବାଇଲରେ ପାଠ ପଢ଼ିବେ ଛାତ୍ରଛାତ୍ରୀ
ଭୁବନେଶ୍ୱର: ଦୀକ୍ଷା ଆପ୍କୁ ଅଧିକ ଗରୁତ୍ୱ ଦେଉଛନ୍ତି କେନ୍ଦ୍ର ସରକାର । ଏଣିକି ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ସମସ୍ତ ବିଷୟବସ୍ତୁ ଦୀକ୍ଷା ଆପ୍ରେ ରହିବ ବୋଲି କୁହାଯାଇଛି । ଦୀକ୍ଷା ଆପ୍ ଜରିଆରେ ଛାତ୍ରଛାତ୍ରୀ ମାନେ ଘରେ ବସି ମୋବାଇଲ୍ ଯୋଗେ ପାଠ ପଢ଼ିପାରିବେ । ତେବେ ଏହି ପରିପ୍ରେକ୍ଷୀରେ ରାଜ୍ୟ ସରକାର ମଧ୍ୟ ଲକ୍ଡାଉନ୍ ସମୟରେ ଇ-ଲର୍ଣ୍ଣଂ ବ୍ୟବସ୍ଥାକୁ ଗୁରୁତ୍ୱ ଦେଇଛନ୍ତି ।
ଲକ୍ଡାଉନ୍ ଯୋଗୁଁ ସ୍କୁଲ ବନ୍ଦ ଥିବା ବେଳେ ଛାତ୍ରଛାତ୍ରୀ ଘରେ ବସି ଏହି ଆପ୍ ମାଧ୍ୟମରେ କିଭଳି ପାଠ ପଢ଼ିପାରିବେ ସେନେଇ ରାଜ୍ୟ ସରକାର ଗୁରୁତ୍ୱ ଦେଇଛନ୍ତି । ଏଥିପାଇଁ ବିଦ୍ୟାଦାନ କାର୍ଯ୍ୟକ୍ରମକୁ ରାଜ୍ୟରେ କାର୍ଯ୍ୟକାରୀ କରିବାକୁ ସମସ୍ତ ଜିଲ୍ଲା ଶିକ୍ଷାଧିକାରୀଙ୍କୁ ଓସେପା ପ୍ରକଳ୍ପ ନିର୍ଦ୍ଦେଶକଙ୍କ କଡ଼ା ନିର୍ଦ୍ଦେଶ ରହିଛି । ଏହି ପ୍ରକ୍ରିୟା ଜୁଲାଇ ଶେଷ ସୁଦ୍ଧା ସାରିବାକୁ କୁହାଯାଇଛି । କୋଭିଡ୍ କଟକଣା ଲାଗି ସ୍କୁଲ ବନ୍ଦ ଥିବାରୁ ଇ–ଲର୍ଣ୍ଣିଂ ଉପରେ ଅଧିକ ଗୁରୁତ୍ୱ ଦିଆଯାଉଛି ।
ଭାରତ ସରକାରଙ୍କ ଦ୍ଵାରା ଆରମ୍ଭ ହୋଇଥିବା ଦୀକ୍ଷା ଆପ୍ ଏବେ ଅଧିକରୁ ଅଧିକ ଛାତ୍ରଛାତ୍ରୀ ବ୍ୟବହାର କରୁଛନ୍ତି । ତେବେ ଦୀକ୍ଷା ଆପ୍ରେ ଯାହା ତଥ୍ୟ ଦିଆଯାଇଥିଲା ତାହା ଛାତ୍ରଛାତ୍ରୀଙ୍କ ପାଠ୍ୟ ପୁସ୍ତକର ସମ୍ପୂର୍ଣ୍ଣ ବିଷୟ ବସ୍ତୁକୁ କଭର କରିନାହିଁ । ବାକି ରହିଥିବା ବିଷୟବସ୍ତୁ ଗୁଡିକୁ ଏହି ଆପ୍ରେ ଅପ୍ଲୋଡ୍ କରାଯାଉଛି । ଯଥାଶୀଘ୍ର ଏହି କାର୍ଯ୍ୟ ଶେଷ ହୋଇଯିବ । ଏହା ପରେ ଛାତ୍ରଛାତ୍ରୀମାନେ ଘରେ ବସି ନିଜ ପାଠ୍ୟପୁସ୍ତକର ସବୁ ବିଷୟ ବସ୍ତୁ ପାଇପାରିବେ । ଏବଂ ଲକ୍ଡାଉନ୍ ସମୟରେ ପାଠ ପଢ଼ିପାରିବେ ।
ଜନନୀ ଏକ୍ସପ୍ରେସ୍ ସେବା ଫେଲ୍, ଆଶାଦିଦିଙ୍କ ଫୋନ୍ ପରେ ବି ଆସିଲାନି ଆମ୍ବୁଲାନ୍ସ !
ରାୟଗଡ଼ା: ପୁଣି ସାମ୍ନାକୁ ଆସିଲା ଜନନୀ ଯନ୍ତ୍ରଣା । ଗର୍ଭବତୀଙ୍କ ପାଇଁ ମିଳିଲାନି ଆମ୍ବୁଲାନ୍ସ । ୧୭ କିଲୋମିଟର ଚାଲି ଚାଲି ଗଲେ ୩ ଜଣ ଗର୍ଭବତୀ । ଏଭଳି ଏକ ଅଭାବନୀୟ ଘଟଣା ପୁଣି ସାମ୍ନାକୁ ଆସିଛି ରାୟଗଡ଼ା ଜିଲ୍ଲା ମୁନିଗୁଡ଼ା ଅଞ୍ଚଳରୁ ।
ରାୟଗଡ଼ା ମୁନିଗୁଡା ବ୍ଲକ୍ ରଘୁବାରୀ ପଞ୍ଚାୟତର ବାଙ୍ଗରିପଦରରେ ଏଭଳି ଛାତି ଥରା ଘଟଣା ଦେଖିବାକୁ ମିଳିଛି । ସରକାରଙ୍କ ପକ୍ଷରୁ ଗରିବ ଆଦିବାସୀଙ୍କ ପାଇଁ ବିଭିନ୍ନ ଯୋଜନା କରାଯାଇଛି । ଏମିତିକି ସେମାନଙ୍କୁ ସମସ୍ତ ସୁବିଧା ସୁଯୋଗ ଦେବା ପାଇଁ ସରକାର ସବୁବେଳେ ଚେଷ୍ଟା କରିଛନ୍ତି । ହେଲେ କିଛି ନ୍ୟସ୍ତସ୍ୱାର୍ଥ ଅଧିକାରୀଙ୍କ ଯୋଗୁଁ ଗରିବ ନୀରିହ ଆଦିବାସୀମାନେ ଏହାର ସୁବିଧା ପାଇ ପାରୁନାହାନ୍ତି ।
ଆମ୍ବୁଲାନ୍ସ ନମିଳିବା କାରଣରୁ ପ୍ରାୟ ୧୭ କିଲୋମିଟର ଯାଏ ଚାଲି ଚାଲି ସ୍ୱାସ୍ଥ୍ୟକେନ୍ଦ୍ର ଅଭିମୁଖେ ଗଲେ ୩ ଜଣ ଗର୍ଭବତୀ । ବାଙ୍ଗିରିପଦର ଗାଁର ବୋଲେ ମାଝୀଙ୍କ ଗର୍ଭ ଯ଼ନ୍ତ୍ରଣା ହେବାରୁ ସ୍ଥାନୀୟ ଆଶାକର୍ମୀ ତାଙ୍କ ପାଖରେ ପହଞ୍ଚିଥିଲେ । ହେଲେ ବୋଲେ ମାଝିଙ୍କର ସ୍ୱାସ୍ଥ୍ୟାବସ୍ଥା ଗୁରୁତର ଥିବାରୁ ଆଶାକର୍ମୀ ଜଣକ ତାଙ୍କୁ ସ୍ୱାସ୍ଥ୍ୟକେନ୍ଦ୍ର ନେବା ପାଇଁ ଆମ୍ବୁଲାନସକୁ ଡକାଇଥିଲେ । ହେଲେ ଦୁର୍ଭାଗ୍ୟର କଥା ଆମ୍ବୁଲାନ୍ସ ଆସିପାରି ନଥିଲା ।
ଖାଲି ବୋଲେ ମାଝିଙ୍କ କଥା ନୁହେଁ ଅନ୍ୟପଟେ ଆହୁରି ଦୁଇ ଜଣ ଗର୍ଭବତୀଙ୍କର ମଧ୍ୟ ସମାନ ପରିସ୍ଥିତି ରହିଥିଲା । ପ୍ରମିତା ମାଝୀ ଓ ରାଣୀତା ମାଝୀଙ୍କ ରକ୍ତହୀନତା ଦେଖାଦେବାରୁ ୧୦୨କୁ ଖବର ଦିଆଯାଇଥିଲା । ମାତ୍ର ଆମ୍ବୁଲାନ୍ସ ଆସିନଥିଲା । ଶେଷରେ ନିରୁପାୟ ହୋଇ ପ୍ରାୟ ୧୭ କିଲୋମିଟର ପର୍ଯ୍ୟନ୍ତ ଚାଲିଚାଲି ଯାଇଥିଲେ ସବୁ ଗର୍ଭବତୀ ।
ପରେ ୪ ଘଣ୍ଟା ବିଳମ୍ବରେ ଆମ୍ବୁଲାନ୍ସ ପହଞ୍ଚିଥିଲା । ସମସ୍ତଙ୍କୁ ଆମ୍ବଦଳା ମେଡିକାଲରେ ଭର୍ତ୍ତି କରାଯାଇଛି । ଚିକିତ୍ସା ପରେ ସମସ୍ତଙ୍କ ସ୍ୱାସ୍ଥ୍ୟବସ୍ଥା ଭଲଥିବା ଡାକ୍ତର କହିଛନ୍ତି ।
ବାତିଲ ହେଲା CTET ପରୀକ୍ଷା
ଦିଲ୍ଲୀ: ବାତିଲ ହେଲା ସିଟିଇଟି ପରୀକ୍ଷା । ଗୁରୁବାର ସିବିଏସ୍ଇ ପକ୍ଷରୁ ସମସ୍ତ ପରୀକ୍ଷା ବାତିଲ ହୋଇଥିବା ବେଳେ ଆଜି ସିଟିଇଟି ପରୀକ୍ଷାକୁ ବାତିଲ କରାଯାଇଛି । ପରିସ୍ଥିତି ସୁଧୁରିବା ପରେ କେବେ ପରୀକ୍ଷା ହେବ ସେନେଇ ନିଷ୍ପତ୍ତି ନିଆଯିବ ବୋଲି କୁହାଯାଇଛି । ପୂର୍ବରୁ ଏହା ଜୁଲାଇ ୫ ତାରିଖରେ କରିବା ପାଇଁ ସ୍ଥିର ହୋଇଥିଲା । CTET ବା Central Teachers Eligibility Testର ଏହା ୧୪ତମ ସଂସ୍କରଣ । କରୋନା ମହାମାରୀ ଯୋଗୁଁ ଏହି ପରୀକ୍ଷାକୁ ସ୍ଥଗିତ ରଖିଛି ସିବିଏସ୍ଇ ।
ସୁସ୍ଥ ଓ ଅନୁକୂଳ ବାତାବରଣ ହେଲେ ପରୀକ୍ଷା ତାରିଖ ଧାର୍ଯ୍ୟ କରାଯିବ । ଏହାର ଦୈନିକ ସୂଚନା ପାଇଁ CTET ୱେବସାଇଟ ଦେଖିବାକୁ CTET ନିର୍ଦେଶକ ତଥା CBSE ସଚିବ ଅନୁରାଗ ତ୍ରିପାଠୀ ବିଜ୍ଞପ୍ତି ପ୍ରକାଶ କରିଛନ୍ତି । ଏ ସମ୍ପର୍କରେ ଟ୍ୱିଟ୍ ଜରିଆରେ ସୂଚନା ଦେଇଛନ୍ତି କେନ୍ଦ୍ର ମାନବ ସମ୍ବଳ ବିକାଶ ମନ୍ତ୍ରୀ ରମେଶ ପୋଖରୀୟାଲ ।
CBSE ଦଶମ ଓ ଦ୍ଵାଦଶ ଶ୍ରେଣୀର ପରୀକ୍ଷା ବାତିଲ୍… ରେଜଲ୍ଟ ନେଇ ପ୍ରକାଶ ପାଇବ ବିଜ୍ଞପ୍ତି
ନୂଆଦିଲ୍ଲୀ: କରୋନା ଯୋଗୁଁ ବ୍ୟବସାୟଠୁ ଆରମ୍ଭ କରି ଫିଲ୍ମ ଜଗତର ସବୁ କାର୍ଯ୍ୟ ଠପ୍ ହୋଇଯାଇଛି । ଦେଶର ଅର୍ଥନୀତି ଉପରେ ମଧ୍ୟ ଅନେକ ପ୍ରଭାବ ପଡିଛି । କରୋନା କଟକଣା ଲାଗୁ ହେବା ପରେ ଅଧିକାଂଶ କ୍ଷେତ୍ରରେ କାମ ଠପ୍ ହୋଇଯାଇଛି । ତେବେ ଏଥିରେ ଶିକ୍ଷା କ୍ଷେତ୍ର ମଧ୍ୟ ବାଦ ପଡିନାହିଁ । ତିନି ମାସ ଅପେକ୍ଷା ପରେ ବାତିଲ ହୋଇଛି ସିବିଏସଇ ଦଶମ ଓ ଦ୍ଵାଦଶ ଶ୍ରେଣୀର ସବୁ ପରୀକ୍ଷା । କିଛି ପରୀକ୍ଷା ସରିଥିବା ବେଳେ ଆଗାମୀ ଦିନରେ ହେବାକୁ ଥିବା ସମସ୍ତ ପରୀକ୍ଷା ବାତିଲ ନେଇ ନିର୍ଦ୍ଦେଶ ରହିଛି ।
ସୁପ୍ରିମକୋର୍ଟ ପରୀକ୍ଷା ନେଇ କେନ୍ଦ୍ର ସରକାରଙ୍କଠାରୁ ଜବାବ ମାଗିଥିଲେ । ତେବେ ଦିଲ୍ଲୀ, ତାମିଲନାଡ଼ୁ, ମହାରାଷ୍ଟ୍ର ଓ ଓଡ଼ିଶା ପରୀକ୍ଷା କରିବାକୁ ଅସମର୍ଥତା ଦର୍ଶାଇ ବାତିଲ କରିବା ଦାବିରେ ସତ୍ୟପାଠ ଦାଖଲ କରିଥିଲେ । ଏ ସଂପର୍କରେ ଶୁଣାଣି ବେଳେ କୋର୍ଟଙ୍କୁ ଅବଗତ କରିଥିଲେ ସଲିସିଟର ଜେନେରାଲ ତୁଷାର ମେହେଟ୍ଟା । ଫଳରେ ସର୍ବୋଚ୍ଚ ଅଦାଲତ ଜୁଲାଇ ୧ ରୁ ୧୫ ତାରିଖ ମଧ୍ୟରେ ହେବାକୁ ଥିବା ପରୀକ୍ଷାକୁ ବାତିଲ କରିଦେଇଛନ୍ତି ।
ଦଶମ ଶ୍ରେଣୀ ପରୀକ୍ଷା ସଂପୂର୍ଣ୍ଣ ବାତିଲ କରାଯାଇଥିବା ବେଳେ ଦ୍ଵାଦଶ ଶ୍ରେଣୀ ପାଇଁ ବିକଳ୍ପ ବାହାର କରାଯାଇଛି । ଯାହାକୁ ଛାତ୍ରଛାତ୍ରୀ ଚାହିଁଲେ ଗ୍ରହଣ କରିପାରିବେ ବୋଲି କୁହାଯାଇଛି । ତେବେ ପୂର୍ବରୁ ଶେଷ ହୋଇଥିବା ୩ଟି ପରୀକ୍ଷାର ଆସେସମେଣ୍ଟ କରି ରେଜଲ୍ଟ ପ୍ରକାଶ ପାଇବ । ତାହା କିପରି କରାଯିବ ସେ ନେଇ ମଧ୍ୟ ଜୁଲାଇ ୧୫ ସୁଦ୍ଧା ନିଷ୍ପତ୍ତି ନିଆଯିବ । ସେହିଭଳି କେବେ ରେଜଲ୍ଟ ବାହାରିବ, ସେନେଇ ଶୁକ୍ରବାର ବିଜ୍ଞପ୍ତି ପ୍ରକାଶ ପାଇବ ।
ଅନ୍ୟପଟେ ସିବିଏସଇ ନିଷ୍ପତ୍ତିକୁ ଆଇସିଏସଇ ମାନିବ ବୋଲି କହିଛି । ଅର୍ଥାତ ଆଗକୁ ଆଇସିଏସଇ ମଧ୍ୟ ସବୁ ପରୀକ୍ଷା ବାତିଲ କରିପାରେ । ଗୁରୁତ୍ୱପୂର୍ଣ୍ଣ କଥା ହେଲା ପରୀକ୍ଷା ବାତିଲ ଓ ଫଳ ପ୍ରକାଶନ ବିଳମ୍ବରେ ଗୁରୁତର ପ୍ରଭାବିତ ହୋଇପାରେ ଜେଇଇ ମେନ୍ ଓ ନିଟ୍ ପ୍ରବେଶିକା ।
ପାକିସ୍ତାନ-ଚୀନ୍-ନେପାଳ ପରେ ଏବେ ଭୁଟାନ୍ ବଢ଼ାଇଲା ଭାରତର ଚିନ୍ତା..!
ନୂଆଦିଲ୍ଲୀ: ଭରତକୁ ପଡ଼ୋଶୀ ରାଷ୍ଟ୍ର ମାନେ ବିବାଦ ଘେରକୁ ଟାଣିବାରେ ଲାଗିଛନ୍ତି । ଏମିତିକି ବନ୍ଧୁ ରାଷ୍ଟ୍ର କୁହାଯାଉଥିବା ନେପାଳ ମଧ୍ୟ ଭାରତକୁ ଅଡ଼ୁଆରେ ପକାଇବାକୁ ଚେଷ୍ଟା କରିଛି । ଭାରତର ପଡ଼ୋଶୀ ରାଷ୍ଟ୍ର ଭାବେ ପାକିସ୍ତାନ ଲଗାତାର ଚିନ୍ତା ବଢ଼ାଉଥିବା ବେଳେ ଚୀନ୍ ମଧ୍ୟ ଏହି ତାଲିକାରେ ସାମିଲ ହୋଇଛି । ହେଲେ ସବୁଠାରୁ ବଡ଼ କଥା ହେଲା ନେପାଳ ପରେ ଏବେ ଭୁଟାନ ମଧ୍ୟ ଭାରତ ପାଇଁ ମୁଣ୍ଡବିନ୍ଧାର କାରଣ ପାଲଟିଛି ।
ଭୁଟାନ ଏବେ ଭାରତୀୟ ଚାଷୀଙ୍କ ପାଇଁ ପାଣି ବନ୍ଦ କରିଦେଇଛି । ଖାଲି ସେତିକି ନୁହେଁ କିଛି ମାସ ପୂର୍ବରୁ ଭୁଟାନକୁ ପର୍ଯ୍ୟଟକ ଭାବେ ଆସୁଥିବା ଭାରତୀୟଙ୍କଠାରୁ ପ୍ରତିଦିନ ହଜାରେରୁ ଅଧିକ ଟଙ୍କା ଆଦାୟ କରିବାକୁ ନିଷ୍ପତ୍ତି ନେଇଥିଲା । ଏବେ ଆସାମର ବକସା ଜିଲ୍ଲାର କୃଷକମାନେ ଭୁଟାନ ପକ୍ଷରୁ ଜଳ ଅବରୋଧ କରାଯାଇଥିବାରୁ ଚିନ୍ତାରେ ପଡ଼ିଯାଇଛନ୍ତି ।
କରୋନା ମହାମାରୀ ଯୋଗୁଁ ଭୁଟାନ ସରକାର ଦେଶ ଭିତରେ କୌଣସି ବାହାର ଲୋକଙ୍କ ପ୍ରବେଶକୁ ବାରଣ କରିଛନ୍ତି । ଏହାସହ ଭୁଟାନରୁ ବାହାରୁଥିବା ନଦୀ ଜଳକୁ ଭାରତୀୟ ଚାଷୀଙ୍କୁ ବ୍ୟବହାର କରିବାରୁ ମଧ୍ୟ ବଞ୍ଚିତ କରିଛନ୍ତି । ବକସା ଜିଲ୍ଲାର ୨୬ ରୁ ଅଧିକ ଗାଁର ୬୦୦୦ ରୁ ଅଧିକ କୃଷକ ଜଳସେଚନ ପାଇଁ ଏହି ଜଳସ୍ରୋତ ଉପରେ ନିର୍ଭର କରିଥାନ୍ତି । ୧୯୫୩ ପରଠାରୁ ଏହି କୃଷକମାନେ ଭୁଟାନରୁ ବାହାରିଥିବା ନଦୀ ଜଳରେ ହିଁ ଧାନ କ୍ଷେତକୁ ଜଳସେଚନ କରିଆସୁଛନ୍ତି । ତେବେ ଭୁଟାନରୁ ହଠାତ୍ ଜଳ ବନ୍ଦ ହେବା ପରେ ଭାରତୀୟ କୃଷକମାନେ ଅତ୍ୟଧିକ ଅସନ୍ତୋଷ ପ୍ରକାଶ କରିଛନ୍ତି ।
ବକସା ଜିଲ୍ଲାର କୃଷକଙ୍କ ସମେତ ସିଭିଲ୍ ସୋସାଇଟିର ସଦସ୍ୟମାନେ ମଧ୍ୟ ସୋମବାର ଏହାକୁ ବିରୋଧ କରିବା ସହ ଉଦ୍ବେଗ ପ୍ରକାଶ କରିଛନ୍ତି । ଏମିତିକି ବିକ୍ଷୋଭକାରୀମାନେ ଅନେକ ଘଣ୍ଟା ଧରି ରୋଙ୍ଗିଆ–ଭୁଟାନ ରାସ୍ତାକୁ ଅବରୋଧ କରିଥିଲେ ।
ଏହି ରାଶିର ଲୋକଙ୍କର ପ୍ରେମ ସମ୍ପର୍କରେ ହେବ ବାଧା… ଜାଣନ୍ତୁ
ଆଜିର ପଞ୍ଚାଙ୍ଗ
ଜୁନ୍ ୨୬, ୨୦୨୦, ଶୁକ୍ରବାର, ମିଥୁନ ୧୨ ଦିନ
୧୪୨୭ ସାଲ୍, ୧୯୪୨ ଶକାବ୍ଦ, ୨୦୮୮ ସମ୍ବତ୍,
ଆଷାଢ ଶୁକ୍ଳ ପଞ୍ଚମୀ ତିଥି, ମଘା ନକ୍ଷତ୍ର
ଦିନ ୧୧ ଟା ୨୮ ପରେ ପୂର୍ବାଫାଲ୍ଗୁନୀ ନକ୍ଷତ୍ର
ସିଂହ ରାଶିରେ ଚନ୍ଦ୍ର ଅବସ୍ଥାନ କରୁଛନ୍ତି
ଘାତଚନ୍ଦ୍ର – କର୍କଟ, ମକର ରାଶିର ପୁରୁଷଙ୍କର
ଘାତବାର- ବିଛା, ଧନୁ, ମୀନ ରାଶିର
ଯୋଗିନୀ ପଶ୍ଚିମ ଦିଗରେ ଅବସ୍ଥାନ କରୁଥିବାରୁ ପଶ୍ଚିମ ଦିଗକୁ ଯାତ୍ରା କରିବା ନିଷେଧ
ଶୁଭ ସମୟ- ସକାଳ ୬ ଟା ୫୮ ମିନିଟ୍ ଠାରୁ ସକାଳ ୯ ଟା ୩୭ ମିନିଟ୍
ଦିନ ୧୨ଟା ଠାରୁ ଦିନ ୩ ଟା ୪୯ ମିନିଟ୍
ଅଶୁଭ ସମୟ
ଦିନ ୧୦ ଟା ୩୦ ମିନିଟ୍ ଠାରୁ ଦିନ ୧୨ ଟା ପର୍ଯ୍ୟନ୍ତ
ମେଷ ରାଶି
ଅଶ୍ୱିନୀ ନକ୍ଷତ୍ର- ବାଣିଜ୍ୟ,ବ୍ୟବସାରୁ ଅର୍ଥ ଲାଭ ଯୋଗୁଁ ଖୁସି ରହିବେ
ଦ୍ୱିଜା- କର୍ମକ୍ଷେତ୍ରକୁ ନେଇ ଅନେକ ଚାପରେ ରହିବେ
କୃତ୍ତିକା ନକ୍ଷତ୍ର- ସାହାଯ୍ୟ,ସହଯୋଗ ପାଇବେ, ନିଜ କାର୍ଯ୍ୟକୁ ନେଇ ଖୁସି ରହିବେ
ଗୋଟିଏ ଖଣ୍ଡ ହଳଦୀ ନିଜ ପାଖରେ ରଖନ୍ତୁ
ବୃଷ ରାଶି
କୃତ୍ତିକା ନକ୍ଷତ୍ର- ନିଜର ଆକର୍ଷଣୀୟ କଥା କହି କାର୍ଯ୍ୟ ହାସଲ କରିବେ
ରୋହିଣୀ ନକ୍ଷତ୍ର- ନିଜର କୈାଣସି ଆତ୍ମୀୟ ଲୋକ ସାହାଯ୍ୟ କରିପାରନ୍ତି
ମୃଗଶିରା- ଅନେକ ଚେଷ୍ଟା କରି ମଧ୍ୟ କର୍ମରେ ବିଫଳ ରହିବେ
୨୧ ଗୋଟି ଗୋଲମରିଚ ନିଜ ପାଖରେ ରଖନ୍ତୁ
ମିଥୁନ ରାଶି
ମୃଗଶିରା- କର୍ମକୁ ନେଇ ସମସ୍ୟା ଅଧିକ ବଢିବ,ମନ କଥା ମନରେ ରହିଯିବ
ଆର୍ଦ୍ରା- ବନ୍ଧୁଙ୍କର ସହଯୋଗ ପାଇବେ, ସ୍ଥଗିତ କାମ ଶିଘ୍ର ହୋଇଯିବ
ପୁନର୍ବସୁ-କର୍ମକ୍ଷେତ୍ର ଓ ଅର୍ଥକୁ ନେଇ ବିଭିନ୍ନ ପ୍ରକାର ଚିନ୍ତା ରହିବ
୭ ଟି ତୁଳସୀ ପତ୍ର ନିଜ ପାଖରେ ରଖନ୍ତୁ
କର୍କଟ ରାଶି
ପୁନର୍ବସୁ – ଅନ୍ୟମନସ୍କ ହୋଇ ଭୁଲ୍ ନିଷ୍ପତ୍ତି ନେଇ ପାରନ୍ତି
ପୁଷ୍ୟା- ପ୍ରତୀକ୍ଷାରେ ଥିବା କାମ ପାଇଁ ଖୁସି ଖବର ପାଇବେ
ଅଶ୍ଲେଷା- କ୍ୟାରିୟର କ୍ଷେତ୍ରରେ ସଫଳତା ପାଇଁ ନୂଆ ସୁଯୋଗ ଆସିବ
ତୁଳସୀ ଚଉରା ମୂଳରେ କ୍ଷୀର ଅର୍ପଣ କରନ୍ତୁ
ସିଂହ ରାଶି
ମଘା- ନିଜର କାର୍ଯ୍ୟ କରିବାର ଶୈଲୀ ପରିବର୍ତ୍ତନ କରି ସଫଳ ହେବେ
ପୂର୍ବାଫାଲଗୁନି- ପାରିବାରିକ ସମସ୍ୟା ଆପଣଙ୍କ ମନକୁ ଦୁର୍ବଳ କରିବ, ସତର୍କ ରୁହନ୍ତୁ
ଉତ୍ତରାଫାଲଗୁନି- ଚାକିରୀ ଆଶାୟୀମାନଙ୍କ ପାଇଁ ଶୁଭ ଖବର ରହିଛି
ହନୁମାନଙ୍କ ସିନ୍ଦୁର ମଥାରେ ଲଗାନ୍ତୁ
କନ୍ୟା ରାଶି
ଉତ୍ତରଫାଲଗୁନି – ଦିନଟି ସପକ୍ଷରେ ରହିବ, ଯାହା ବି କାର୍ଯ୍ୟ କରିବେ ସଫଳ ରହିବେ
ହସ୍ତା- ଧର୍ମଭାବନାରେ ମନ ଲାଗି ରହିବ,ପ୍ରେମ ପାଇଁ ଦିନଟି ଭଲ ରହିବ
ଚିତ୍ରା- ସ୍ୱାସ୍ଥ୍ୟ ପ୍ରତି ଧ୍ୟାନ ଦେଇ ଚଳନ୍ତୁ, ବ୍ୟୟ ଭାର ବଢିବ
ଗାୟତ୍ରୀ ମନ୍ତ୍ର ୧୧ ଥର ପାଠ କରନ୍ତୁ
ତୁଳା ରାଶି
ଚିତ୍ରା – ପଡୋଶୀଙ୍କ ସହ ବିବାଦୀୟ ପରିସ୍ଥିତି ସୃଷ୍ଟି ହେବ,ମନରେ ଅସ୍ଥିରତା ବଢିବ
ସ୍ୱାତୀ- ମଧୁର କଥାରେ ପରକୁ ଆପଣାର କରିବେ
ବିଶାଖା- ପ୍ରିୟ ବନ୍ଧୁଙ୍କର ସହଯୋଗ ମିଳିବ, ମନରେ ଉତ୍ସାହ ରହିବ
ଗରିବଙ୍କୁ ପେଟପୁରା ଖାଇବାକୁ ଦିଅନ୍ତୁ
ବିଛା ରାଶି
ବିଶାଖା- ଆର୍ଥିକ କ୍ଷେତ୍ରରେ ଉନ୍ନତି ଆସିବ, ମହିଳାମାନଙ୍କ ପାଇଁ ଦିନଟି ଭଲ ରହିବେ
ଅନୁରାଧା- ବିବାଦୀୟ କାର୍ଯ୍ୟରେ ବିଜୟୀ ହେବେ,ପାରିବାରିକ ସଂପର୍କରେ ଉନ୍ନତି ହେବ
ଜ୍ୟେଷ୍ଠା- ଆଜି କାର୍ଯ୍ୟରେ ବ୍ୟସ୍ତ ରହିବେ, ନିଜ ଚେଷ୍ଟା କାର୍ଯ୍ୟରେ ବିଫଳ ହେବେ
ବୁଲା ଷଣ୍ଢକୁ ରୁଟି ଖାଇବାକୁ ଦିଅନ୍ତୁ
ଧନୁ ରାଶି
ମୂଳା- ଆର୍ଥିକ ଦୃଷ୍ଟିରୁ ଦିନଟି ଶୁଭ ରହିବ,ଶରୀର ଓ ମନ ସୁସ୍ଥ ରହିବ
ପୂର୍ବାଷାଢା- ଗାଡି ଧିରେ ଚଳାଇବେ, ରାସ୍ତାରେ ବିପଦ ରହିଛି
ଉତ୍ତରାଷାଢା- ସମୟ ପୂର୍ବରୁ କାର୍ଯ୍ୟ ସଫଳ ହେବ
ହନୁମାନ ଚାଳିଶା ପାଠ କରନ୍ତୁ
ମକର ରାଶି
ଉତ୍ତରାଷାଢା- ପାରିବାରିକ ଜୀବନକୁ ନେଇ ଖୁସି ରହିବେ,ପ୍ରେମ ସମ୍ବନ୍ଧୀୟରେ ମଧୁରତା ବଢିବ
ଶ୍ରବଣା- ବାଧା, ପ୍ରତିବନ୍ଧକ ଦୁରେଇଯିବ, କାମରେ ଧ୍ୟାନ ଦିଅନ୍ତୁ
ଧନିଷ୍ଠା- କୈାଣସି ବି ନିଷ୍ପତ୍ତି ଭାବିଚନ୍ତି ନିଅନ୍ତୁ,ଠକାମୀରେ ପଡିପାରନ୍ତି
ମନ୍ଦିର ପୂଜାରୀଙ୍କୁ ଅରୁଆ ଚାଉଳ ଦାନ କରନ୍ତୁ
କୁମ୍ଭ ରାଶି
ଧନିଷ୍ଠା- ଅଧିକ ଭାବରେ କାହାକୁ ବିଶ୍ୱାସ କରନ୍ତୁ ନାହିଁ
ଶତଭିଷା-ବିଳମ୍ବ ହେଲେ ମଧ୍ୟ ନିଜ ଚେଷ୍ଟାରେ ସଫଳ ରହିବେ
ପୂର୍ବଭାଦ୍ରପଦ- ବନ୍ଧୁଙ୍କ ସହ ନିଜ କର୍ମ ବିଷୟରେ ଆଲୋଚନା କରିପାରନ୍ତି
ଓଁ ନମୋ ଭଗବତେ ବାସୁଦେବାୟ ମନ୍ତ୍ରକୁ ୧୦୮ ଥର ଜପ କରନ୍ତୁ
ମୀନ ରାଶି
ପୂର୍ବଭାଦ୍ରପଦ- ପାରିବାରିକ ଜୀବନ ସୁଖମୟ ରହିବ
ଉତ୍ତରଭାଦ୍ରପଦ- ସାମାଜିକ କାର୍ଯ୍ୟରେ ସମୟ କାଟିବେ,ମନୋବଳ ବଢିବ
ରେବତୀ- ନିଜର ଭାବନା ଉପରେ ନିୟନ୍ତ୍ରଣ ରଖନ୍ତୁ, ମାନସମ୍ମାନହାନୀ ହୋଇପାରେ
ମଥାରେହଳଦୀ ଟିକା ଲଗାନ୍ତୁ, ସମସ୍ୟାରୁ ମୁକ୍ତି ପାଇବେ
ଜ୍ୟୋତିର୍ବିଦ୍ ଡ.ଶ୍ୟାମସୁନ୍ଦର ବାଘ
ଯୋଗାଯୋଗ ନମ୍ବର- 9938571935
ଭାରତ ବିରୋଧରେ ଷଡ଼ଯନ୍ତ୍ର କରିଥିଲେ, ଏବେ ନିଜେ ବିବାଦରେ ପଡ଼ିଲେ ନେପାଳ ପ୍ରଧାନମନ୍ତ୍ରୀ କେପି ଓଲି..
ନୂଆଦିଲ୍ଲୀ: ଭାରତୀୟ ଜମିକୁ ନିଜ ଜମି ବୋଲି କହିବାରୁ ଭାରତ ଏବଂ ନେପାଳ ମଧ୍ୟରେ ବିବାଦ ତେଜିବାରେ ଲାଗିଛି । ନେପାଳ ପକ୍ଷରୁ ଏକ ନୂଆ ମ୍ୟାପ୍ ପ୍ରସ୍ତତ କରାଯାଇ ସଂସଦରେ ପାରିତ କରାଯାଇଛି । ଏହି ମ୍ୟାପ୍ରେ ଭାରତର କିଛି ଅଞ୍ଚଳକୁ ନେପାଳ ନିଜ ଜମି ବୋଲି ଦର୍ଶାଇଛି । ତେବେ ଏହା ପଛରେ ନେପାଳ ପ୍ରଧାନମନ୍ତ୍ରୀ କେପି ଓଲିଙ୍କ ହାତ ଥିବା କୁହାଯାଉଛି । ଏଭଳି କରି ଭାରତକୁ ବିବାଦ ଘେରକୁ ଆଣିଥିବା କେପି ଓଲି ଏବେ ନିଜେ ବଡ଼ ବିବାଦରେ ଫସିଛନ୍ତି । କାରଣ କେପି ଓଲିଙ୍କୁ ଏବେ ତାଙ୍କ ଦଳର ନେତା ମାନେ ବିରୋଧ କରିବା ଆରମ୍ଭ କରିଛନ୍ତି । ଏମିତିକି କିଛଇ ନେତା ଧମକ ଦେଇଛନ୍ତି ଯଦି କେପି ଓଲି ପଦରୁ ଇସ୍ତଫା ନଦିଅନ୍ତି ତେବେ ଦଳ ଭାଗ ଭାଗ କରାଯିବ ।
ନେପାଳ କମ୍ୟୁନିଷ୍ଟ ପାର୍ଟିର କେପି ଓଲି ପ୍ରଧାନମନ୍ତ୍ରୀ ରହିଥିବା ବେଳେ, ଦଳର ଅନ୍ତଃକନ୍ଦଳ ଏବେ ଉଗ୍ର ରୂପ ନେଇଛି । ପାର୍ଟି ଅଧ୍ୟକ୍ଷ ପ୍ରଚଣ୍ଡ, ପ୍ରଧାନମନ୍ତ୍ରୀ କେପି ଓଲିଙ୍କ ଇସ୍ତଫା ଦାବି କରିଛନ୍ତି । ଏଥିରେ ଅନ୍ୟ ବଡ଼ ବଡ଼ ନେତା ମଧ୍ୟ ପ୍ରଚଣ୍ଡଙ୍କୁ ସମର୍ଥନ ଦେଉଥିବା ସୂଚନା ମିଳିଛି ।
କେପି ଓଲି ଜଣେ ଅସଫଳ ପ୍ରଧାନମନ୍ତ୍ରୀ ବୋଲି ଅଭିଯୋଗ ଆଣିବା ସହ ଇସ୍ତଫା ଦାବି କରିଛି ନେପାଳ କମ୍ୟୁନିଷ୍ଟ ପାର୍ଟି । ପୂର୍ବରୁ ଦୁଇ ଥର ନେପାଳ ପ୍ରଧାନମନ୍ତ୍ରୀ ପ୍ରଚଣ୍ଡ ପୁଷ୍ପ କୁମାର ଧମାଲ କହିଛନ୍ତି କେପି ଓଲି ଜଣେ ରାଜନେତା ହେବା ସବୁଠୁ ବଡ଼ ତ୍ରୁଟି ।
ହେଲେ ଏଭଳି କଡ଼ା ବିରୋଧ ସତ୍ତ୍ୱେ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବା ନାହିଁ ବୋଲି କହିଛନ୍ତି କେପି ଓଲି । ଇସ୍ତଫା ଦେବାକୁ କେପି ଓଲି ମନା କରିବା ପରେ ପ୍ରଚଣ୍ଡ ତାଙ୍କୁ ଧମକ ଦେବାକୁ ମଧ୍ୟ ପଛାଇ ନାହାନ୍ତି । ସେ କହିଛନ୍ତି କେପି ଓଲି ଯଦି ଇସ୍ତଫା ନଦିଅନ୍ତି ତେବେ ଦଳ ଭାଗ କରିଦିଆଯିବ ।
ତେବେ ନିଜ ଦଳରୁ ହିଁ ଏଭଳି କଡ଼ା ବିରୋଧ କରାଯିବା ଫଳରେ ଅଡ଼ୁଆରେ ପଡ଼ିଛନ୍ତି କେପି ଓଲି ।