ଭୁବନେଶ୍ୱର: ନାବାଳିକା ଗଣଦୁଷ୍କର୍ମ ମାମଲାରେ ଅଠାକାଠିରେ ଛନ୍ଦି ହୋଇଛନ୍ତି ଓଟିଭି କର୍ତ୍ତୃପକ୍ଷ । ଆଜି ଏହି ମାମଲାରେ ଜେରା ହୋଇଛନ୍ତି ଓଟିଭିର ସହକାରୀ ଏଚଆର ମୁଖ୍ୟ । ତାଙ୍କୁ ପ୍ରାୟ ୩ ଘଣ୍ଟା ଧରି ଜେରା କରିଛି ମହିଳା ଥାନା । ପୂର୍ବରୁ ଇନପୁଟ ଓ ଆଉଟପୁଟ ମୁଖ୍ୟଙ୍କୁ ଜେରା କରାଯାଇଥିଲା । ଏହି ଘଟଣାରେ ପୀଡିତାଙ୍କ ମାଙ୍କ ସହ ଓଟିଭି ପରିଚାଳନା ନିର୍ଦ୍ଦେଶିକାଙ୍କ ବାର୍ତ୍ତାଳାପ ମହିଳା କମିଶନଙ୍କ ନିକଟରେ ଦାଖଲ କରାଯାଇଥିଲା । ଓଟିଭି କର୍ତ୍ତୃପକ୍ଷଙ୍କ ନିକଟରେ ଥିବା ଅନ୍ୟ କିଛି ଅଡିଓ କ୍ଲିପକୁ ନିଜ ଚ୍ୟାନେଲରେ ପ୍ରସାରିତ କରିଥିଲା ସଂପୃକ୍ତ ଗଣମାଧ୍ୟମ । ଏହି ଅଡିଓ କ୍ଲିପକୁ ପୋଲିସକୁ ଦିଆଯାଇନଥିଲା । ପୀଡିତାଙ୍କ ମାଙ୍କ ଅଭିଯୋଗ ପରେ ଚ୍ୟାନେଲ କର୍ତ୍ତୃପକ୍ଷ ପୋଲିସକୁ ଅବଗତ କରିବା ପରିବର୍ତ୍ତେ ଘଟଣାକୁ ଚାପି ଦେବାକୁ ଚକ୍ରାନ୍ତ କରୁଥିଲେ ବୋଲି ଅଭିଯୋଗ ହେଉଛି । ଏହିଦୃଷ୍ଟିରୁ ମହିଳା ଥାନା ଚ୍ୟାନେଲର ଜଣେ ଜଣେ ପରେ ଅଧିକାରୀଙ୍କୁ ଜେରା କରୁଛି ।
ସୁରଙ୍କ ଅବୁଝା ଚିଠି: ବାଚସ୍ପତି କହିଲେ ଭିଡିଓ କନଫରେନ୍ସିଂ ଜରିଆରେ ସାମିଲ ହୋଇପାରିବେ
ଭୁବନେଶ୍ୱର: କଂଗ୍ରେସ ବିଧାୟକ ସୁରେଶ ରାଉତରାୟ ଆଗାମୀ ବିଧାନସଭା ଅଧିବେଶନ ବର୍ଜନ କରିବେ । ଏନେଇ ସେ ବାଚସ୍ପତିଙ୍କୁ ଚିଠି ଲେଖିଛନ୍ତି । ତାଙ୍କ କହିବା କଥା, ୬୦ବର୍ଷରୁ ଅଧିକ ବୟସର ବିଧାୟକଙ୍କ ପାଇଁ କଟକଣା ଲାଗୁ ହୋଇଥିବାରୁ ସେ ବର୍ଜନ କରିବେ । ଏପଟେ ବିଧାନସଭା ପାଇଁ ବିରୋଧୀ ଓ ଶାସକ ସଜବାଜ ହେଉଛନ୍ତି, ସେପଟେ ବିଧାନସଭାର ନିଷ୍ପତ୍ତି ନବୁଝି ବାଚସ୍ପତିଙ୍କୁ ଚିଠି ଲେଖିଛନ୍ତି ସୁରେଶ ରାଉତରାୟ ।
ସୁରଙ୍କ ଅବୁଝା ଚିଠି । ବିଧାନସଭା ବର୍ଜନ କରିବାକୁ ଚେତାବନୀ । ନିଷ୍ପତ୍ତି ନଜାଣି ଉଠାଇଲେ ପ୍ରଶ୍ନ । ବାଚସ୍ପତି କହିଲେ ବିଧାୟକଙ୍କ ଉପରେ କଟକଣା ନାହିଁ । କଂଗ୍ରେସ ବିଧାୟକ ସୁରେଶ କୁମାର ରାଉତରାୟ । ଜଟଣୀର ବିଧାୟକ । ବିଧାନସଭାରେ ବଡ଼ପାଟି କରୁଥିବା ଏହି ବିଧାୟକ ଏବେ ଅବୁଝା । କରୋନା ପାଇଁ ୬୦ବର୍ଷରୁ ଅଧିକ ବୟସର ବିଧାୟକଙ୍କ ପାଇଁ କଟକଣା ଲାଗୁ ହୋଇଥିବାରୁ ସୁର ଅସନ୍ତୋଷ ପ୍ରକାଶ କରିଛନ୍ତି । ସେପଟେ ସୁରଙ୍କ ଚିଠି ପାଇ ବାଚସ୍ପତି ସୂର୍ଯ୍ୟନାରାୟଣ ପାତ୍ର କହିଛନ୍ତି, ୬୦ବର୍ଷରୁ ଅଧିକ ବୟସର ବିଧାୟକ ଯଦି ଚାହିଁବେ ତେବେ ଭିଡିଓ କନଫରେନ୍ସିଂ ଜରିଆରେ ବିଧାନସଭା ଅଧିବେଶନରେ ସାମିଲ ହୋଇପାରିବ । ହେଲେ ଏକଥା ଠିକ୍ ଭାବେ ବୁଝି ନାହାନ୍ତି ସୁର ରାଉତରାୟ ।
ସେପଟେ ଆସନ୍ତା ୨୯ତାରିଖରେ ବିଧାନସଭା ଅଧିବେଶନ ପୂର୍ବରୁ ୨୮ରେ ବିଜେପି ବିଧାୟକ ଦଳ ବୈଠକ ବସିବ । ଦଳ କେଉଁ କେଉଁ ପ୍ରସଙ୍ଗ ଉଠାଇବ, ସେନେଇ ଆଲୋଚନା କରାଯିବ । ସେହିପରି ୨୬ କିମ୍ବା ୨୭ ତାରିଖରେ କଂଗ୍ରେସ ବିଧାୟକ ଦଳ ବୈଠକ ବସିବ ବୋଲି ବିଧାୟକ ତାରାପ୍ରସାଦ ବାହିନୀପତି କହିଛନ୍ତି । ନିୟମ ଅନୁସାରେ ବିଧାନସଭା ଚାଲିବ ବୋଲି ଶାସକ ବିଜେଡି କହିଛି । ଆସନ୍ତା ୨୬ ତାରିଖରେ ସବୁ ବିଧାୟକଙ୍କର କରୋନା ଟେଷ୍ଟ କରାଯିବ । ଅଧିବେଶନ ପୂର୍ବରୁ ସର୍ବଦଳୀୟ ବୈଠକ ପାଇଁ ବିରୋଧୀ ଦାବି କରିଛନ୍ତି ।
ପ୍ରବାସୀ ଆସିବା କମିଲା: ଏବେ ସବୁ ଟିଏମ୍ସି ଖାଁ ଖାଁ
ଭୁବନେଶ୍ୱର: ରାଜ୍ୟରେ କରୋନା ମୁକାବିଲାରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲା ଅସ୍ଥାୟୀ ସ୍ୱାସ୍ଥ୍ୟକେନ୍ଦ୍ର – ଟିଏମ୍ସି। ପ୍ରାରମ୍ଭିକ ପର୍ଯ୍ୟାୟରେ ଟିମ୍ସି ହିଁ କରୋନା ସଂକ୍ରମଣକୁ ଦେଇଥିଲା ଚେକ୍ । କୋଭିଡ କେୟାର ହୋମ ବି କରୋନା ମୁକାବିଲାରେ ନେଇଥିଲା ବଳିଷ୍ଠ ଭୂମିକା । ଏବେ କିନ୍ତୁ ଆଉ ନାହାନ୍ତି ପ୍ରବାସୀ, ଫଳରେ ଖାଲି ପଡୁଛି ଅସ୍ଥାୟୀ ସ୍ୱାସ୍ଥ୍ୟକେନ୍ଦ୍ର । ଏଥିପାଇଁ ବ୍ୟବହାର ହେଉନଥିବା ଟିଏମ୍ସିକୁ ବନ୍ଦ କରିବା ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି ।
ବଢୁଛି ସୁସ୍ଥତା, କମୁଛି ସଂକ୍ରମଣ । ପ୍ରବାସୀ ଆସିବା କମିଲାଣି । ଏବେ ପ୍ରାୟ ସବୁ ଟିଏମ୍ସି ଖାଁ ଖାଁ । ଏକଥା ଆମେ କହୁନୁ । ଏ ଚିତ୍ର ବଖାଣୁଛି ସ୍ଥିତି । ଭାତହାଣ୍ଡିରୁ ଗୋଟିଏ ଚିପିଲା ଭଳି ଗୋଟିଏ ଜିଲ୍ଲାର ସ୍ଥିତି ଉପରେ ଟିକେ ନଜର ପକାଇବା । ଏ ହେଉଛି ବାଲେଶ୍ବର ଜିଲ୍ଲା ଅସ୍ଥାୟୀ ସ୍ୱାସ୍ଥ୍ୟ କେନ୍ଦ୍ର ବା ଟିଏମସି । ଜିଲ୍ଲାର ୧୨ଟି ବ୍ଲକ ଓ ୪ଟି ପୌର ପରିଷଦରେ ମୋଟ ୧୦୧୭ଟି ଟିଏମସି ଖୋଲିଥିଲା । ଏବେ ବହାନାଗା, ବସ୍ତା, ବାଲିଆପାଳ, ଭୋଗରାଇ, ଖଇରା, ନୀଳଗିରି, ରେମୁଣା, ସିମୁଳିଆ ଓ ସୋର ବ୍ଲକ୍ର ୧୨୧୫ଟି ଟିଏମସିରେ ଜଣେ ହେଲେ ନାହାନ୍ତି ।
ଜିଲ୍ଲାକୁ ବିଭିନ୍ନ ଟିଏମ୍ସିରୁ ସୁସ୍ଥ ହୋଇ ଘରକୁ ଫେରିଛନ୍ତି ୭୧ ହଜାର ୧୨୦ ଜଣ । ଏବେ ପ୍ରବାସୀ ଆସିବା ବନ୍ଦ ହୋଇଥିବା ବେଳେ ଅଳ୍ପ ଲକ୍ଷଣ ଓ ଲକ୍ଷଣହୀନ ଲୋକ ହୋମ୍ କ୍ୱାରେଣ୍ଟାଇନ୍ରେ ରହିବାକୁ ପସନ୍ଦ କରୁଛନ୍ତି । କେବଳ ବାଲେଶ୍ୱର ନୁହେଁ, ଶିଳ୍ପନଗରୀ ରାଉରକେଲା ଓ ଗଞ୍ଜାମ ଜିଲ୍ଲାରେ ମଧ୍ୟ ଚିତ୍ର ସମାନ । ଗଞ୍ଜାମରେ ସଂକ୍ରମଣ ନିୟନ୍ତ୍ରଣକୁ ଆସିଥିବାରୁ ଅକାମୀ ହୋଇଗଲାଣି ଏହି ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର । ରାଉରକେଲାରେ ମଧ୍ୟ ୧୫ଟି କୋଭିଡ କେୟାର ହୋମ ମଧ୍ୟରୁ ୧୪ଟି ଓ ୬ଟି ଯାକ ଟିଏମ୍ସିକୁ ବନ୍ଦ କରାଯାଇଛି । ଗୋଟେପଟେ ପ୍ରବାସୀ ଆସିବା କମିଛି, ଅନ୍ୟପଟେ ବାହାରୁ ଆସୁଥିବା ଲୋକଙ୍କୁ ହୋମ୍ ଆଇସୋଲେସନ ଅନୁମତି ମିଳିଛି ।
କୋଭିଡ ସଂକ୍ରମଣର ପ୍ରାଥମିକ ପର୍ଯ୍ୟାୟରେ ସରକାର ୬ ଲକ୍ଷ ୩୬ ହଜାର ୬୯ ଶଯ୍ୟା ବିଶିଷ୍ଟ ୧୩ ହଜାର ୯୯୨ ଟିଏମ୍ସି ଏବଂ ୬୭ ହଜାର ୮୮୮ ଶଯ୍ୟାବିଶିଷ୍ଟ ୬, ୭୯୮ଟି କୋଭିଡ୍ କେୟାର ହୋମ୍ ପ୍ରତିଷ୍ଠା କରିଥିଲେ ।
ଆମେରିକା ପ୍ରସ୍ତୁତ କଲା 6th generationର ସବୁଠାରୁ ଶକ୍ତିଶାଳୀ ଲଢୁଆ ବିମାନ, ଛାନିଆ ହେଲା ଚୀନ୍…
ନୂଆଦିଲ୍ଲୀ: ଚୀନ ଓ ଆମେରିକା ମଧ୍ୟରେ ଶୀତଳ ଯୁଦ୍ଧ ଚାଲୁ ରହିଛି । ଆମେରିକା ଚୀନ୍ ବିରୁଦ୍ଧରେ ପ୍ରତିଦିନ କିଛି ନା’ କିଛି ମନ୍ତବ୍ୟ ରଖୁଛି । ଏଭଳି ସମ୍ୱେଦନଶୀଳ ସ୍ଥିତିରେ ଆମେରିକାକୁ ଏକ ବଡ଼ ଧରଣର ସଫଳତା ମିଳିଛି । ଆମେରିକା ବିଶ୍ୱର ସବୁଠାରୁ ଅତ୍ୟାଧୁନିକ ଲଢୁଆ ବିମାନ ପ୍ରସ୍ତୁତ କରିଛି । 6th ଜେନେରେସନର ଏହି ବିମାନର ଉଡ଼ାଣ ମଧ୍ୟ ହୋଇ ସାରିଛି । ଆମେରିକା ଆକାଶରେ ଏହି ବିମାନ ଉଡ଼ୁଥିବାର ଦେଖିବାକୁ ମିଳିଛି ।
ଏହି ବିମାନ ଏଫ୍-୨୨ର ଅପଡେଟେଡ୍ ଭର୍ସନ ଅଟେ । ଏହି ବିମାନରେ ଡ୍ରୋନ ଓ ଲେଜର ଅସ୍ତ୍ରଶସ୍ତ୍ରର ସୁବିଧା ମଧ୍ୟ ରହିଛି । ଏହାପୂର୍ବରୁ କୌଣସି ଲଢୁଆ ବିମାନରେ ଏଭଳି ସୁବିଧା ନଥିଲା । ବିମାନର ନାମକରଣ ଏଯାବତ ହୋଇଛି କି ନାହିଁ ତାହା ଜଣା ନାହିଁ । ଆମେରିକା ସରକାରଙ୍କ ତରଫରୁ ବିଦ୍ଧିବଦ୍ଧ ଭାବେ କୌଣସି ଘୋଷଣା ହୋଇ ନାହିଁ । ଆମେରିକୀୟ ଗଣମାଧ୍ୟମ ସଂସ୍ଥା ‘ଡିଫେନ୍ସ ନ୍ୟୁଜ୍’ ଏଭଳି ଖବର ପ୍ରକାଶ କରିଛି । ବିମାନର ଗତି ଅତି ଦ୍ରୁତ ହୋଇଥିବା ହେତୁ ଏହାକୁ ଲକ୍ଷ୍ୟ ଭେଦ କରିବା ସମ୍ଭବପର ନୁହେଁ ।
ତେବେ ଆମେରିକା ବାୟୁସେନା ପକ୍ଷରୁ ଏନେଇ କୌଣସି ଘୋଷଣା ହୋଇନଥିଲେ ମଧ୍ୟ ପ୍ରତିରକ୍ଷା ବିଶେଷଜ୍ଞମାନେ ଆମେରିକାର ବିମାନକୁ ନେଇ ଦୃଢୋକ୍ତି ବାଢ଼ିଛନ୍ତି । ବିମାନକୁ ପ୍ରସ୍ତୁତ କରିବା ପାଇଁ ଆମେରିକା ସରକାରଙ୍କ ପାଖାପାଖି ୮ ବିଲିୟନ ଡଲାର ଖର୍ଚ୍ଚ କରିଛି । ଭାରତୀୟ ମୁଦ୍ରାରେ ଏହାର ମୂଲ୍ୟ ୫୮ ହଜାର ୯୦୬ କୋଟି । ତେବେ ପ୍ରତିରକ୍ଷା ବିଶେଷଜ୍ଞଙ୍କ କହିବା ଅନୁଯାୟୀ, ଲେଜର ଓ ଡ୍ରୋନ ଖଞ୍ଜା ଯାଇଥିବା ହେତୁ ବିମାନଟି ଅତି ଭୟଙ୍କର ବୋଲି ମନେ ହେଉଛି । କୌଣସି ବି ବିମାନକୁ ଠାବ କରି ଟାର୍ଗେଟ କରିବାରେ ଆମେରିକାର ଏହି ଅପଗ୍ରେଡ୍ ବିମାନ ସବୁଟାରୁ ଅଧିକ ସକ୍ଷମ ହେବ ।
ପ୍ରାଣ ବଞ୍ଚାଉଛି ପ୍ଳାଜ୍ମା: ମାସକ ଭିତରେ ପ୍ରତିଷ୍ଠା ହୋଇଛି ୮ ପ୍ଳାଜ୍ମା ବ୍ୟାଙ୍କ
ଭୁବନେଶ୍ୱର: କୋଭିଡ୍ ସଂକ୍ରମିତଙ୍କ ପାଇଁ ସଞ୍ଜୀବନୀ ହୋଇଛି ପ୍ଲାଜ୍ମା ଥେରାପି । ଏବେ ସୁଦ୍ଧା ଏକ ହଜାରରୁ ଅଧି୍କ ଗୁରୁତର ରୋଗୀଙ୍କୁ ପ୍ଲାଜମା ଥେରାପି ନୂଆ ଜୀବନ ଦେଇଛି । ଏଥିସହ କରୋନା ଚିକିତ୍ସା କ୍ଷେତ୍ରରେ ନୂଆ ମାଇଲଖୁଣ୍ଟ ସ୍ଥାପନ କରିଛି ଓଡ଼ିଶା । ସେପଟେ ରାଜ୍ୟରେ ଏବେ ସଂକ୍ରମଣ ପିକ୍ରେ ରହିଛି । ନଭେମ୍ବର ମଧ୍ୟ ଭାଗକୁ ସଂକ୍ରମଣ ନିୟନ୍ତ୍ରଣକୁ ଆସିବ ବୋଲି ବିଶେଷଜ୍ଞ ପୂର୍ବାନୁମାନ କରିଛନ୍ତି । କରୋନା ପାଇଁ ରାମବାଣ ପ୍ଲାଜ୍ମା ଥେରାପି । ସଂକ୍ରମିତଙ୍କ ପାଇଁ ସଂଜୀବନୀ। ଗୁରୁତର ରୋଗୀଙ୍କୁ ଦେଉଛି ନୂଆ ଜୀବନ ।
ମାତ୍ର ମାସକ ମଧ୍ୟରେ ରାଜ୍ୟରେ ପ୍ରତିଷ୍ଠା ହୋଇଛି ୮ଟି ପ୍ଲାଜ୍ମା ବ୍ୟାଙ୍କ । ମୁଖ୍ୟମନ୍ତ୍ରୀଙ୍କ ଆହ୍ୱାନରେ କରୋନାରୁ ସୁସ୍ଥ ହୋଇଥିବା କୋଭିଡ୍ ଯୋଦ୍ଧାଙ୍କଠାରୁ ଆରମ୍ଭ କରି ସାଧାରଣ ଲୋକ ପ୍ଲାଜ୍ମା ଦାନ କରୁଛନ୍ତି । ପ୍ଲାଜ୍ମା ଚିକିତ୍ସାରେ ଦେଶର ଅଗ୍ରଣୀ ରାଜ୍ୟଙ୍କ ମଧ୍ୟରେ ଓଡ଼ିଶା ଅନ୍ୟତମ । ଏବେସୁଦ୍ଧା ୧ ହଜାର ଗୁରୁତର ରୋଗୀଙ୍କ ପାଇଁ ପ୍ଲାଜ୍ମା ଥେରାପି ସଂଜୀବନୀ ସାବ୍ୟସ୍ତ ହୋଇଛି ।
କଟକ ଏସ୍ସିବି ମେଡିକାଲଠାରୁ ଆରମ୍ଭ କରି ରାଜ୍ୟର ପ୍ରମୁଖ ସରକାରୀ ହସ୍ପିଟାଲ ଏବଂ ପ୍ରାଇଭେଟ କୋଭିଡ ମେଡିକାଲରେ ପ୍ଲାଜ୍ମା ବ୍ୟାଙ୍କ ଖୋଲିଛି । ଫଳରେ ରାଜ୍ୟର ସବୁ କୋଣରୁ ସଂକ୍ରମିତ ପ୍ଲାଜ୍ମା ଚିକିତ୍ସା ପାଇପାରୁଛନ୍ତି । ରାଜ୍ୟରେ ପିକ୍ରେ ରହିଛି କୋଭିଡ୍ ସଂକ୍ରମଣ । ଅକ୍ଟୋବର ଦ୍ବିତୀୟ ସପ୍ତାହ ପର୍ଯ୍ୟନ୍ତ ଏଭଳି ସ୍ଥିତି ରହିବ । ଧୀରେ ଧୀରେ ସଂକ୍ରମଣ କମିବ । ନଭେମ୍ବର ମଧ୍ୟ ଭାଗକୁ କରୋନା ପ୍ରାୟତଃ ନିୟନ୍ତ୍ରଣକୁ ଆସିବ ବୋଲି ବିଶେଷଜ୍ଞ ପୂର୍ବାନୁମାନ କରିଛନ୍ତି । ମୁଖ୍ୟମନ୍ତ୍ରୀଙ୍କ ଆହ୍ୱାନରେ ୨ଶହ ପୋଲିସ କର୍ମଚାରୀ ପ୍ଲାଜ୍ମା ଦାନ କରିଛନ୍ତି । ପୂର୍ବରୁ ଓଡ୍ରାଫ ଏବଂ ଏନ୍ଡିଆର୍ଏଫ୍ କୋଭିଡ୍ ଯୋଦ୍ଧା ମଧ୍ୟ ଦେଇଥିଲେ ସଂଜୀବନୀ । ପ୍ଲାଜ୍ମା ଥେରାପି ସହ ଜଡ଼ିତ ପୂରା ଟିମ୍କୁ ଓ ପ୍ଲାଜ୍ମାଦାତାଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶୁଭେଚ୍ଛା ଜଣାଇଛନ୍ତି ।
ମୋଦି କ୍ୟାବିନେଟରୁ ଇସ୍ତଫା ଦେଲେ କେନ୍ଦ୍ରମନ୍ତ୍ରୀ ହର୍ଷିମ୍ରତ୍ କୌର ବାଦଲ, କୃଷି ବିଲକୁ ବିରୋଧ…
କେନ୍ଦ୍ର ମନ୍ତ୍ରୀ ହର୍ଷିମ୍ରତ୍ କୌର ବାଦଲ କ୍ୟାବିନେଟ ତ୍ୟାଗ କରିଛନ୍ତି । କେନ୍ଦ୍ର ସରକାରଙ୍କର କୃଷି ବିଲକୁ ବିରୋଧ କରି ସେ ଏଭଳି ନିଷ୍ପତ୍ତି ନେଇଛନ୍ତି । ଲୋକସଭାରେ ଏହି ବିଲରେ ଭୋଟ୍ ଦେବା କିଛି ସମୟ ପୂର୍ବରୁ ସେ ଇସ୍ତଫା ଦେଇଛନ୍ତି । ଏବେ ସଂସଦ ଅଧିବେଶନ ଚାଲିଥିବା ବେଳେ ସରକାର କୃଷି ସମ୍ୱନ୍ଧୀତ ଆଇନରେ ପରିବର୍ତ୍ତନ ପାଇଁ ଏକ ବିଲ ଆଗତ କରିଥିଲେ ।
ମାତ୍ର ହର୍ଷିମ୍ରତ୍ କୌର ବାଦଲ ଏହି ବିଲ ସପକ୍ଷରେ ଭୋଟ ଦେବାକୁ ମନା କରିଛନ୍ତି । ଶ୍ରୀମତୀ ବାଦଲ ଅକାଳ ଦଳ କୋଟାରୁ ମୋଦି କ୍ୟାବିନେଟରେ ସ୍ଥାନିତ ହୋଇଥିଲେ । ତେବେ ଏବେ ସେ ଇସ୍ତଫା ଦେବା ପରେ ଦଳ ପକ୍ଷରୁ ସଫେଇ ଆସିଛି । ଅକାଳୀ ଦଳ ମୁଖ୍ୟ ସୁଖବୀର ବାଦଲ କହିଛନ୍ତି ଯେ, ଅକାଳୀ ଦଳ ସରକାରକୁ ବାହାରେ ରହି ସମର୍ଥନ ଦେବ ମାତ୍ର କୌଣସି ପ୍ରକାର କୃଷକ ବିରୋଧୀ ରାଜନୀତିରେ ଭାଗୀଦାର ହେବ ନାହିଁ ।
କିଶୋରୀଙ୍କ ବଳାତ୍କାର, ହତ୍ୟା ମାମଲାରେ ୬ ଜଣ ଜେଲ ଯାଇଥିଲେ,୧୨ ବର୍ଷ ପରେ ମୃତ ଜୀବିତ ହେଲେ !
ନୂଆଦିଲ୍ଲୀ: ତ୍ତରପ୍ରଦେଶର ଜାଲୌନରୁ ଏଭଳି ଏକ ଖବର ସାମ୍ନାକୁ ଆସିଛି ଯାହାକୁ ଜାଣିବା ପରେ କେହି ମଧ୍ୟ ଆଶ୍ଚର୍ଯ୍ୟ ହୋଇଯିବ । ସୂଚନା ଅନୁସାରେ ଏକ ଯୁବତୀକୁ ଅପହରଣ ଏବଂ ହତ୍ୟା ମାମଲାରେ ୬ ଜଣଙ୍କୁ ଜେଲ ହୋଇଥିଲା । କିନ୍ତୁ ସେ ବଞ୍ଚିଥିବା ଖବର ୧୨ ବର୍ଷ ପରେ ସାମ୍ନାକୁ ଆସିଛି । ଘଟଣା ସମୟରେ ୧୪ ବର୍ଷର ଯୁବତୀ ଏବେ ୨୬ ବର୍ଷୀୟ ବିବାହିତା । ଉକ୍ତ ଯୁବତୀଙ୍କୁ ଏବେ ଅଲ୍ଲିଗଡ଼ରୁ ଜାଲୌନ ଆଣି ପଚରାଉଚରା ଜାରି ରହିଛି ।
ବାସ୍ତବରେ ପୂରା ମାମଲା ଜାଲୌନ ଜିଲ୍ଲାର କାଳପି କସ୍ୱେରେ ପର୍ଦ୍ଦାଫାଶ ହୋଇଛି । ଉକ୍ତ କିଶୋରୀ ଅପହରଣ ଏବଂ ହତ୍ୟା କରିଥିବା ଅଭିଯୋଗରେ ଛଅ ଜଣ ଜେଲ ଦଣ୍ଡ ଭୋଗୁଥିଲେ । କିନ୍ତୁ କିଶୋରୀ ଜୀବିତ ଥିବା ଖବର ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
ସିଓ ଆରପି ସିଂ କହିଛନ୍ତି ଯେ ୨୦୦୮ରେ କାଳପି କସ୍ୱେରେ ରହୁଥିବା ଏକ ଗରିବ ପରିବାରର ୧୪ ବର୍ଷୀୟ କିଶୋରୀ ଅପହରଣ ହୋଇଥିଲା । କିଶୋରୀଙ୍କ ମା ନଗରପାଳିକା ଅଧିକାରୀ, ଏକ ସଭାପତିଙ୍କ ସମେତ ୬ ଲୋକଙ୍କ ନାମରେ ଅଭିଯୋଗ ଦାଖଲ କରିଥିଲେ । ଜଣେ ବିଧାୟକଙ୍କ ବିରୁଦ୍ଧରେ ମଧ୍ୟ ଅଭିଯୋଗ ଦାଖଲ ହୋଇଥିଲା । ଅଭିଯୁକ୍ତମାନଙ୍କୁ ତୁରନ୍ତ ଗିରଫ ଦାବିରେ ଜିଲ୍ଲାପାଳଙ୍କ କାର୍ଯ୍ୟାଳୟ ସାମ୍ନାରେ ଧାରଣା ଦେଇଥିଲେ ଯୁବତୀଙ୍କ ମା । ସେହି ସମୟରେ ଘାଟମପୁରରେ ଜଣେ ଅଜ୍ଞାତ ଝିଅର ଶବ ମିଳିଥିଲା, ତାକୁ ନିଜ ଝିଅ କହି ହଙ୍ଗାମା କରି ଦେଇଥିଲେ ଉକ୍ତ ମହିଳା । ଯଦିଓ ବିଧାୟକଙ୍କୁ କ୍ଲିନ ଚିଟ୍ ମିଳିଗଲା କିନ୍ତୁ ଅନ୍ୟ ୬ ଜଣଙ୍କୁ ଜେଲ ହୋଇଗଲା । କିନ୍ତୁ ଜେଲରେ ଜଣେ ମହିଳା ଅଭିଯୁକ୍ତଙ୍କ ମୃତ୍ୟୁ ହୋଇଗଲା ଏବଂ ଅଢେଇ ବର୍ଷ ପରେ ଅନ୍ୟମାନେ ଜାମିନରେ ବାହାରକୁ ଆସିଗଲେ ।
ଚୀନର ଏହି ଓ୍ୱେବସାଇଟକୁ ବ୍ଲକ କଲା ଭାରତ, ଜାଣନ୍ତୁ କାରଣ କ’ଣ ?
ନୂଆଦିଲ୍ଲୀ: ଟେଲିକମ ବିଭାଗ ଚୀନର ନ୍ୟାସନାଲ ବ୍ୟୁରୋ ଅଫ ଷ୍ଟାଟିଷ୍ଟିକ୍ସର ଇଂରାଜୀ ଓ୍ୱେବସାଇଟକୁ ବ୍ୟାନ୍ କରି ଦେଇଛନ୍ତି । ପୂର୍ବ ଲଦାଖରେ ସୀମାରେ ଚାଲୁଥିବା ବିବାଦକୁ ନେଇ ଏଭଳି ନିଷ୍ପତ୍ତି ନେଇଛନ୍ତି କେନ୍ଦ୍ର ସରକାର । ତଥାପି ଏବେ ମଧ୍ୟ ଗ୍ଲୋବାଲ ଟାଇମ୍ସ ଏବଂ ସରକାରୀ ଏଜେନ୍ସି ସିହ୍ନୁଆକୁ ଏବେ ମଧ୍ୟ ବ୍ୟବହାର କରି ହେଉଛି । ତେବେ ଏହି ଓ୍ୱେବସାଇଟକୁ କ୍ଲିକ କରିବା ପରେ ସ୍କ୍ରିନ ଉପରେ ଏକ ମେସେଜ ନଜର ଆସୁଛି । ମେସେଜଟି ହେଉଛି, ଆପଣଙ୍କ ଦ୍ୱାରା ଅନୁରୋଧ କରାଯାଇଥିବା ୟୁଆରଏଲକୁ ଭାରତ ସରକାରଙ୍କ ଟେଲିକମ୍ୟୁନିକେସନ ଡିପାର୍ଟମେଣ୍ଟର ନିର୍ଦ୍ଦେଶ ଅନୁସାରେ ବ୍ଲକ କରିଦିଆଯାଇଛି । ଅଧିକ ସୂଚନା ପାଇଁ ଆଡମିନଷ୍ଟ୍ରେଟରଙ୍କ ସହିତ ଯୋଗାଯୋଗ କରନ୍ତୁ ।
ପୂର୍ବ ଲଦାଖର ଗଲଓ୍ୱାନ ଘାଟୀରେ ଭାରତ ଏବଂ ଚୀନ ମଧ୍ୟରେ ହୋଇଥିବା ଉତ୍ତେଜନାରେ ଭାରତର ୨୦ ଜଣ ଯବାନ ସହୀଦ ହୋଇଯାଇଥିଲେ । ଯାହାପରେ ଉକ୍ତ ମାମଲାକୁ ନଜରରେ ରଖି ଚୀନର ଶତାଧିକ ଆପ୍ଲିକେସନକୁ ବ୍ୟାନ କରିଛି ଭାରତ । ଏଥିରେ ଲୋକପ୍ରିୟ ଓ୍ୱେବସାଇଟ TIKTOK ଏବଂ PUBG ମଧ୍ୟ ସାମିଲ ରହିଛି ।
ସୂଚନାଯୋଗ୍ୟ ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଜୀନକୁ ନେଇ ଗୁରୁବାରକୁ ରାଜ୍ୟସଭାରେ ବୟାନ ଦେଇଛନ୍ତି । ଯଦି ଆବଶ୍ୟକ ପଡ଼େ ଭାରତ ନଇଁବ ନାହିଁ ବୋଲି ସେ ତାଙ୍କ ବୟାନରେ ଉଲ୍ଲେଖ କରିଛନ୍ତି ।
ବନ୍ୟା ପରବର୍ତ୍ତୀ ପଦକ୍ଷେପ ଲାଗି ରାଜ୍ୟ ସରକାରଙ୍କୁ କେନ୍ଦ୍ରୀୟ ଟିମ୍ର ପ୍ରଶଂସା
ଭୁବନେଶ୍ୱର: କେନ୍ଦ୍ରୀୟ ଟିମ୍କୁ ସହାୟତା ପ୍ରଦାନ ଲାଗି ଦାବି ଜଣାଇଲା ରାଜ୍ୟ । ୧୧୦୦ କୋଟି ଟଙ୍କା ସହାୟତା ଯୋଗାଇବା ପାଇଁ ଦାବି ଜଣାଇଲା ରାଜ୍ୟ । ଦୁଇ ଦିନିଆ ଓଡ଼ିଶା ଗସ୍ତରେ ଆସି ୩ ବନ୍ୟା ପ୍ରଭାବିତ ଜିଲ୍ଲା ବୁଲି ସ୍ଥିତି ସମୀକ୍ଷା କରିଥିଲା କେନ୍ଦ୍ରୀୟ ଟିମ୍ । ଏହାପରେ ଗୁରୁବାର ରାଜ୍ୟ ସଚିବାଳୟରେ କେନ୍ଦ୍ରୀୟ ଟିମ୍ ସହ ମୁଖ୍ୟ ଶାସନ ସଚିବ, ସ୍ୱତନ୍ତ୍ର ରିଲିଫ୍ କମିଶନରଙ୍କ ସମେତ ଅନ୍ୟ ଅଧିକାରୀଙ୍କ ଉପସ୍ଥିତିରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଥିଲା । ବୈଠକରେ ବନ୍ୟା ଜନିତ କ୍ଷୟକ୍ଷତି ଓ ଏହା ପରବର୍ତ୍ତୀ ପୁନରୁଦ୍ଧାର କାର୍ଯ୍ୟ ସମ୍ପର୍କିତ ଏକ ରିପୋର୍ଟ କେନ୍ଦ୍ରୀୟ ଟିମ୍ ନିକଟରେ ଉପସ୍ଥାପନ କରାଯାଇଥିଲା । ରାଜ୍ୟ ସରକାରଙ୍କ ବନ୍ୟା ବରବର୍ତ୍ତୀ ପଦକ୍ଷେପକୁ ପ୍ରଶଂସା କରିଛି କେନ୍ଦ୍ରୀୟ ଟିମ୍ । ଏଥିସହିତ ଏସ୍ଡିଆରଏଫ୍ ନିୟମାନୁଯାୟୀ ସହାୟତା ଯୋଗାଇ ଦିଆଯିବ ବୋଲି କହିଛି ଟିମ୍ । ନଦୀବନ୍ଧ ନିର୍ମାଣ ଓ ମରାମତି, କ୍ଷତିଗ୍ରସ୍ତ ଗୃହ ଓ ଅନ୍ୟ ଭିତ୍ତିଭୂମି ସଜାଡ଼ିବା ନେଇ ସହାୟତା ଯୋଗାଇଦେବାକୁ ଦାବି କରିଛି ରାଜ୍ୟ । ସୂଚନା ଯୋଗ୍ୟ ଯେ, ବନ୍ୟାରେ ମୋଟ ୨.୨୫ ଲକ୍ଷ ହେକ୍ୱର ଚାଷ ଜମି ଓ ଫସଲ ପ୍ରଭାବିତ ହୋଇଥିବା ବେଳେ ୩୩ ପ୍ରତିଶତରୁ ଅଧିକା ନଷ୍ଟ ହୋଇଛି । ଏଥିସହିତ ୧.୨୦ ଲକ୍ଷ ବାସଗୃହ ମଧ୍ୟ ଭାଙ୍ଗିଯାଇଥିବା ସହ ରାସ୍ତାଘାଟ ମଧ୍ୟ କ୍ଷୟକ୍ଷତି ଘଟିଛି । ତେବେ ଏହି ସହାୟତା ରାଶି ସମେତ ବିପର୍ଯ୍ୟୟ ପ୍ରତିରୋଧ ନିମନ୍ତେ ସ୍ଥାୟୀ ପଦକ୍ଷେପ ନେଇ ଆବଶ୍ୟକ ଅର୍ଥ ଚୂଡ଼ାନ୍ତ ସ୍ମାରକପତ୍ରରେ ସାମିଲ କରି କେନ୍ଦ୍ର ସରକାରଙ୍କୁ ଦିଆଯିବ ବୋଲି କହିଛନ୍ତି ଏସ୍ଆରସି ପ୍ରଦୀପ କୁମାର ଜେନା ।
ବଜାରରେ ହଠାତ୍ ସେଓ ଦାମ ପାଖାପାଖି ଅଧା କାହିଁକି ହେଲା ? ଜାଣନ୍ତୁ କାରଣ…
ନୂଆଦିଲ୍ଲୀ: ସାଧାରଣ ଲୋକଙ୍କ ପାଇଁ ନିହାତି ଭାବରେ ଏହା ଏକ ଖୁସି ଖବର । ଭାରତୀୟ ବଜାରରେ ଚାଲିଛି ସେଓର ଅଭାବୀ ବିକ୍ରି । ଏହାର ଦାମ ପ୍ରକୃତ ମୂଲ୍ୟରୁ ହ୍ରାସ ହୋଇ ଅଧା ହୋଇ ଯାଇଛି । ଉତ୍ତମ ଗୁଣବତ୍ତା ଥିବା ସେଓର ଦାମ୍ ହ୍ରାସ ହୋଇ ୫୦ରୁ ୪୦ ଟଙ୍କାରେ ପହଞ୍ଚିଛି । ଗଣମାଧ୍ୟମକୁ All India Apple Growers Associationର ଅଧ୍ୟକ୍ଷ ରବିନ୍ଦ୍ର ଚୌହାନ କହିଛନ୍ତି କି ବର୍ତ୍ତମାନର ମୂଲ୍ୟ ୨୦୧୭ ଭଳି ରହିଛି । ଅବଶ୍ୟ ନିବେଶ ଏବଂ ଶ୍ରମିକ ମୂଲ୍ୟ ଦୁଇ ଗୁଣା ହୋଇ ଯାଇଛି । ଚଳିତ ବର୍ଷ ଫସଲ କମ ହୋଇଛି ଏବଂ ପୋକ କାରଣରୁ ଗୁଣବତ୍ତାରେ ହ୍ରାସ ଘଟିଛି । ନେପାଳଠାରୁ ଶ୍ରମିକଙ୍କ ସଂଖ୍ୟା କମ୍ ହେତୁ ଆମର ସଙ୍କଟ ବଢିଯାଇଛି ।
ବ୍ୟବସାୟୀଙ୍କ କହିବା ଅନୁସାରେ ହିମାଚଳ ପ୍ରଦେଶର ପ୍ରାୟ ୪ରୁ ୫ ଲକ୍ଷ ଟନରୁ ପ୍ରାୟ ଅଧା ଏବଂ କାଶ୍ମୀର ଉପତ୍ୟକାରୁ ଆସିବାକୁ ଥିବା ଆନୁମାନିକ୨୦ ଟନ ସେଓରୁ ୧୫ ପ୍ରତିଶତ ଦେଶର ବିଭିନ୍ନ ବଜାରରେ ପହଂଚି ପାରିଛି । ଦିଲ୍ଲୀର ଆଜାଦପୁର ଫଳ ବଜାରରେ ସେଓ ମୂଲ୍ୟ କିଲୋଗ୍ରାମ ପ୍ରତି ପ୍ରାୟ ୪୦ରୁ ୫୦ ଟଙ୍କା ରହିଛି । ଅଧିକ ଯୋଗାଣ ଏବଂ ଚାହିଦା କମ ଥିବାରୁ ଏହାର ମୂଲ୍ୟ ପ୍ରାୟ ୫୦ପ୍ରତିଶତ କମ ହୋଇଯାଇଛି ।