ମହାରାଷ୍ଟ୍ର: ସାଙ୍ଗଲୀ ଜିଲ୍ଲାର ଭୋସେ ଗାଁର ୪୦୦ ବର୍ଷ ପୁରୁଣା ବରଗଛ ଏବେ ସୋଲିଆଲ ମିଡ଼ିଆରେ ଚର୍ଚ୍ଚାରେ ରହିଛି । ନିର୍ମାଣଧିନ ହାଇୱେର ସର୍ଭିସ୍ ରୋଡ଼ ଏହି ବରଗଛ ପାଖ ଦେଇ ଯିବାର ଥିଲା । ତେଣୁ ଏହି ଗଛଟିକୁ କାଟି ରାସ୍ତା ତିଆରି କରିବାକୁ ନିଷ୍ପତ୍ତି ନିଆଯାଇଥିଲା । କିନ୍ତୁ ପରିବେଶବିତ୍ ଏହାର ବିରୋଧ କରିଥିଲେ ।
ବିରୋଧ ବଢିବାରୁ ଯେତେବେଳେ ଗଛ ବିଷୟରେ ରାଜ୍ୟର ପର୍ଯ୍ୟଟନ ମନ୍ତ୍ରୀ ଆଦିତ୍ୟ ଠାକରେଙ୍କୁ ଅବଗତ କରାଗଲା ସେତେବଳେ ସେ କେନ୍ଦ୍ରମନ୍ତ୍ରୀ ନିତିନ ଗଡକରୀଙ୍କ ସହ କଥାବାର୍ତ୍ତା କରି ଏହି ଗଛଟିକୁ ନକାଟିବାକୁ ଅନୁରୋଧ କରିଥିଲେ । ଆଦିତ୍ୟ ଠାକରେଙ୍କ ସହ କଥା ହେବା ପରେ ହିଁ ନିତିନ ଗଡ଼କରୀ ଏହି ଗଛଟିକୁ ବଞ୍ଚାଇବା ପାଇଁ ହାଇୱେର ନକସାରେ ପରିବର୍ତ୍ତନ କରି ଏହି ପ୍ରୋଜେକ୍ଟ ପୂରା କରିବାକୁ ନିର୍ଦ୍ଦେଶ ଦେଇଥିଲେ ।
ଗଡକରୀଙ୍କୁ ଏହି ପୁରୁଣା ବରଗଛକୁ ବଞ୍ଚାଇବାକୁ ଅନୁରୋଧ କରାଯାଇଥିଲା
ରତ୍ନାଗିରି, ନାଗପୁର ହାଇୱେ ୧୬୬ ନମ୍ବର ସାଙ୍ଗଲୀ ଜିଲ୍ଲାର ଭୋସେ ଗାଁ ପାଖ ଦେଇ ଏହି ସର୍ଭିସ ରୋଡ୍ ଯିବାର ଥିଲା । ସାଙ୍ଗଲୀ ପରିବେଶବିତ୍ ଗଛ କାଟିବାକୁ ବିରୋଧ କରଥିଲେ । ଏହି ବିରୋଧ ସୋସିଆଲ ମିଡ଼ିଆରେ ଭାଇରାଲ ହେବା ପରେ ମୁଖ୍ୟସ୍ରୋତ ଗଣମାଧ୍ୟମ ଏହାକୁ ଖବର କରିଥିଲା, ଶେଷରେ ରାଜ୍ୟ ପର୍ଯ୍ୟଟନ ମନ୍ତ୍ରୀ ଏଥିରେ ହସ୍ତକ୍ଷେପ କରିଥିଲେ । ସେ କେନ୍ଦ୍ରୀୟ ପରିବହନ ମନ୍ତ୍ରୀ ନିତିନ ଗଡକରୀଙ୍କ ସହ କଥା ହୋଇ ଏହି ଗଛଟିକୁ ବଞ୍ଚାଇବାକୁ ଅନୁରୋଧ କରିଥିଲେ ।ନିତିନ ଗଡକରୀ ତାଙ୍କ ବିଭାଗର ଅଧିକାରୀଙ୍କ ସହ କଥା ହୋଇ ଏହି ୪୦୦ବର୍ଷ ପୁରୁଣା ବରଗଛକୁ ବଞ୍ଚାଇବାକୁ କହିଥିଲେ ଏବଂ ଶେଷରେ ଏହି ଗଛଟିକୁ ବଞ୍ଚାଇ ଦିଆଯାଇଥିଲା ।
