spot_img
Home Blog Page 5979

ହାଇଓ୍ୱା ଧକ୍କାରେ ଦମ୍ପତି ମୃତ

ଟାଙ୍ଗୀ: ଭୁବନେଶ୍ବର କେସୁରା ଛକରେ ଦୁର୍ଘଟଣାରେ ଦମ୍ପତି ମୃତ । ବାଲି ବୋଝେଇ  ହାଇୱା ଧକ୍କାରେ ଦମ୍ପତିଙ୍କ ମୃତ୍ୟୁ ହୋଇଛି । ମର୍ଣ୍ଣିଂ ଓ୍ବାକରେ ଯାଉଥିବା ବେଳେ ବାଲି ବୋଝେଇ ହାଇଓ୍ବା ଧକ୍କା ଦେଇଥିଲା । ଘଟଣାସ୍ଥଳରେ ଦମ୍ପତି ମୃତ୍ୟୁ ହୋଇଥିବା ବେଳେ, ସେମାନଙ୍କ ପରଚିୟ ମିଳିନାହିଁ । ପୋଲିସ ଦୁର୍ଘଟଣା ଘଟାଇଥିବା ହାଇଓ୍ବା ସହ ମୃତଦେହ ଜବତ କରି ତଦନ୍ତ ଚଳାଇଛି ।

ଏଥିସହିତ ପଢ଼ନ୍ତୁ: ଭାଇଚାରାର ପର୍ବରେ ଭାଇରସ୍ ନ ବ୍ୟାପୁ: କରୋନା କଟକଣା ମାନି ହୋଲି ଖେଳିବାକୁ ପରାମର୍ଶ

ବେଆଇନ ଟବାକୋ ଓ ପାନ ମସଲା ପରିବହନ ବେଳେ ଚଢ଼ାଉ: ୪୪ ଲକ୍ଷ ଜରିମାନା ଆଦାୟ

କେନ୍ଦୁଝର: ବଡ଼ବିଲ ଜିଏସଟି ଏନଫୋର୍ସମେଣ୍ଟ ଟିମକୁ ବଡ଼ ସଫଳତା । ଦିଲ୍ଲୀରୁ ବେଆଇନ ଭାବେ ଟବାକୋ ଓ ପାନ ମସଲା ପରିବହନ ସମୟରେ ଚଢ଼ାଉ । 44 ଲକ୍ଷ 64 ହଜାର 272 ଟଙ୍କା ଜୋରିମାନା ଆଦାୟ । ଗୋଟିଏ 14 ଚକିଆ ଟ୍ରକ ଯୋଗେ 320 ବସ୍ତା ପାନ ମସଲା ଓ 32 ବସ୍ତା ଟବାକୋ ଯାଉଥିବାବେଳେ ଚଢାଉ କରିଥିଲା ଟିମ୍ । ଗାଡିଟି ଦିଲ୍ଲୀରୁ ଭୁବନେଶ୍ୱର ଯିବା କଥା ହେଲେ କେନ୍ଦୁଝର ଜିଲ୍ଲାର ଚମ୍ପୁଆ ଥାନା ଅନ୍ତର୍ଗତ ମୁରୁସୁଆଁ ନିକଟରେ ଛିଡା ହୋଇଥିଲା । କୌଣସି ସୂତ୍ରରୁ ଖବର ପାଇ ସେଠାରେ ବଡ଼ବିଲର ବାଣିଜ୍ୟକର ଓ GST ENFORCEMENT ଟିମ ପହଂଚି ଚଢ଼ାଉ କରିଥିଲେ । ଘଟଣା ସ୍ଥଳରେ ସମ୍ପୃକ୍ତ ଗାଡିବାଲା କୌଣସି କାଗଜପତ୍ର ଦେଖାଇ ପାରି ନଥିଲେ । ତାକୁ ଚମ୍ପୁଆ ଥାନା କୁ ନିଆଯିବା ପରେ ଜିନିଷ ଅନଲୋଡ଼ କରିବା ସହ ଜୋରିମାନା ଚାଲାଣ କଟା ଯାଇଥିଲା । ପରେ ଦିଲ୍ଲୀରୁ ଏହି ଠକେଇ ଜୋରିମାନା ଅର୍ଥ ପୈଠ କରାଯିବା ପରେ ଗାଡିକୁ ଛଡା ଯାଇଛି ।

ଏଥିସହିତ ପଢ଼ନ୍ତୁ: ଭାଇଚାରାର ପର୍ବରେ ଭାଇରସ୍ ନ ବ୍ୟାପୁ: କରୋନା କଟକଣା ମାନି ହୋଲି ଖେଳିବାକୁ ପରାମର୍ଶ

ଭାଇଚାରାର ପର୍ବରେ ଭାଇରସ୍ ନ ବ୍ୟାପୁ: କରୋନା କଟକଣା ମାନି ହୋଲି ଖେଳିବାକୁ ପରାମର୍ଶ

ଭୁବନେଶ୍ୱର: ଆଜି ହେଉଛି ଭାଇଚାରାର ପର୍ବ ହୋଲି  । ହେଲେ ଭାଇଚାରାର ପର୍ବରେ ଭୂତାଣୁ ଭରିଦେଇଛି ଭୟ । କରୋନା ପାଇଁ ହୋଲି ଖେଳିବା ଉପରେ କଟକଣା ଜାରି କରିଛି ପ୍ରଶାସନ । ଘରେ ରହି ହୋଲି ଖେଳିବାକୁ ସରକାର ପରାମର୍ଶ ଦେଇଛନ୍ତି । ସେହିପରି ରାଜଧାନୀରେ ହୋଲି କଟକଣା ପାଇଁ ୧୫ ପ୍ଲାଟୁନ୍ ଫୋର୍ସ ମୁତୟନ କରାଯାଇଛି । ବିଭିନ୍ନ ଛକ ଓ ଭିଡ଼ ସ୍ଥାନରେ କଡ଼ା ନଜର ରଖିବ ପୋଲିସ । ପାଟ୍ରୋଲିଂ ପାଇଁ ୨୦ PCR ଭ୍ୟାନ୍, ଷ୍ଟ୍ରାଇକିଂ ଫୋର୍ସ ମୁତୟନ ହେଇଛନ୍ତି । BMC ଗାଇଡ୍‌ଲାଇନ୍ ମାନିବାକୁ ରାଜଧାନୀବାସୀଙ୍କୁ ଭୁବନେଶ୍ବର ଡିସିପି ଅପିଲ୍ କରିଛନ୍ତି । ବାହାରେ ହୋଲି ଖେଳନ୍ତୁ ନାହିଁ, ନିଜ ପରିବାର ସହ ହୋଲି ଖେଳିବା ପାଇଁ ଆହ୍ବାନ କରିଛନ୍ତି ଡିସିପି  । ଅମାନିଆ ହେଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଭୁବନେଶ୍ବର ଡିସିପି ଉମାଶଙ୍କର ଦାଶ କହିଛନ୍ତି  ।

          ସମ୍ପ୍ରତି ଦେଶ ଏବଂ ରାଜ୍ୟରେ କରୋନାର ଦ୍ୱିତୀୟ ପ୍ରବାହ ଦେଖାଯାଉଥିବା ବେଳେ କଟକଣା ମଧ୍ୟରେ ହୋଲି ପାଳନ ନେଇ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି । ସମ୍ପୂର୍ଣ୍ଣ ସତର୍କତାର ସହ ଏବଂ ନିଜର ପରିବାର ବର୍ଗଙ୍କ ସହ ବାହାରକୁ ନ ଯାଇ ହୋଲି ପାଳନ୍ତୁ । ହୋଲି ଖେଳ ଯେପରି କରୋନା ଅଧିକ ବ୍ୟାପିବାର କାରଣ ନହେଉ । ରଙ୍ଗର ଏ ନିଆରା ପର୍ବ ଅବସରରେ ଆପଣମାନଙ୍କୁ ସମସ୍ତଙ୍କୁ ନନ୍ଦିଘୋଷ ଟିଭି ପରିବାର ପକ୍ଷରୁ ହାର୍ଦ୍ଧିକ ଶୁଭେଚ୍ଛା ଓ ଶୁଭକାମନା ।

ଏଥିସହିତ ପଢ଼ନ୍ତୁ: ଦେଶରେ ଦିନକରେ ଚିହ୍ନଟ ହେଲେ ୬୨,୭୧୪ ସଂକ୍ରମିତ

ଇଂଲଣ୍ଡକୁ ୨-୧ରେ ହରାଇ ସରିଜ୍‌ ହାତେଇଲା ଭାରତ

ପୁନେ: ନିର୍ଣ୍ଣାୟକ ଲଢେଇରେ ଭାରତର ରୋମାଞ୍ଚକର ବିଜୟ । ଟି-୨୦, ଟେଷ୍ଟ ପରେ ଦିନିକିଆ ସିରିଜ୍ ଜିତି ହୋଲି ଉପହାର ଭେଟି ଦେଲା ବିରାଟ ବାହିନୀ । ଲଢିଲା ଇଂଲଣ୍ଡ, ହେଲେ ଶେଷରେ ବାଜି ମାରିନେଲା ଟିମ୍ ଇଣ୍ଡିଆ । ଇଂଲଣ୍ଡକୁ ୨-୧ରେ ହରାଇ ସରିଜ୍‌ ହାତେଇଲା ଭାରତ । ଇଂଲଣ୍ଡକୁ ୭ ରନରେ ପରାସ୍ତ କରିଛି ଭାରତ ।

ପ୍ରଥମେ ଟସ୍‌ ଜିତି ଇଂଲଣ୍ଡ ବୋଲିଂ ନିଷ୍ପତି ନେଇଥିବା ବେଳେ ଭାରତ ବ୍ୟାଟିଂ କରିବାକୁ ମଇଦାନକୁ ଓହ୍ଲାଇଥିଲା । ୪୮.୨ ଓଭର ଖେଳି ଭାରତ ଅଲ୍ଆଉଟ୍‌ ହୋଇଥିଲା । ଇଂଲଣ୍ଡ ଆଗରେ ୩୩୦ ରନର ବିଜୟ ଲକ୍ଷ ରଖିଥିଲା ଭାରତ । ତେବେ ୩୩୦ ରନ୍‌ର ବିଜୟ ଲକ୍ଷ ନେଇ ଇଂଲଣ୍ଡ ମଇଦାନକୁ ଓହ୍ଲାଇଥିବା ବେଳେ ନିର୍ଦ୍ଧାରିତ ୫୦ ଓଭରରେ ୯ ଓ୍ୱିକେଟ୍‌ ହରାଇ ୩୨୨ ରନ୍‌ କରିବାରେ ସକ୍ଷମ ହୋଇଥିଲା । ଇଂଲଣ୍ଡ ପକ୍ଷରୁ ସାମ୍‌ କୁରନ୍‌ ସର୍ବାଧିକ ୯୫ ରନ୍‌ କରିଥିବା ବେଳେ ଡେଭିଡ୍‌ ମଲନ ଦ୍ୱିତୀୟ ସର୍ବାଧିକ ୫୦ ରନ୍‌ କରିଥିଲେ । ଅନ୍ୟମାନଙ୍କ ମଧ୍ୟରେଇଂଲଣ୍ଡର ଜାସନ୍ ରୟ ୧୪ ରନ୍ , ଜନି ବେୟାରଷ୍ଟୋ ୧ ରନ୍, ବେନ୍ ଷ୍ଟୋକସ ୩୫ ରନ୍, ଜୋସ୍ ବଟଲର ୧୫ ରନ୍ ଓ ମୋଇନ୍ ଅଲ୍ଲି ୨୯ ରନ୍ କରି ଆଉଟ୍ ହୋଇଥିଲେ ।

ଭାରତ ପକ୍ଷରୁ ଓପନର ଶିଖର ଧାଓ୍ୱନ ୬୭ ରନ୍ କରିଥିବା ବେଳେ ରୋହିତ ଶର୍ମା କରିଥିଲେ ୩୭ ରନ୍ । କ୍ୟାପଟେନ୍ କୋହଲି ମାତ୍ର ୭ ରନ୍ କରି ଆଉଟ୍ ହୋଇଥିଲେ । ତେବେ ହାର୍ଡ ହିଟର ରିସଭ ପନ୍ଥ ୭୮ ରନ୍ କରିଥିବା ବେଳେ ୬୪ ରନ୍ କରିଥିଲେ ହାର୍ଦିକ୍ ପାଣ୍ଡ୍ୟା । ସେହିଭଳି କ୍ରୁନାଲ ପାଣ୍ଡ୍ୟା ୨୫ ରନ୍ ଓ ଶାର୍ଦୁଳ ଠାକୁର ୩୦ ରନ୍ କରିଥିଲେ ।

ପିପିଲି ଉପନିର୍ବାଚନ: କଂଗ୍ରେସର ପ୍ରାର୍ଥୀ ହେଲେ ଅଜିତ ମଙ୍ଗରାଜ

ସରଗରମ ହେଉଛି ପିପିଲି ରାଜନୀତି । ଶେଷରେ କଂଗ୍ରେସର ପ୍ରାର୍ଥୀ ହେଲେ ଅଜିତ ମଙ୍ଗରାଜ । ହାଇକମାଣ୍ଡଙ୍କ ନିର୍ଦ୍ଦେଶ ପରେ ଅଜିତଙ୍କୁ ଦଳ ପ୍ରାର୍ଥୀ ଘୋଷଣା କରିଛି । ଅଜିତ୍‌ଙ୍କ ବ୍ୟତୀତ ନିଶିକାନ୍ତ ମିଶ୍ର ଓ ପୁର୍ଣ୍ଣଚନ୍ଦ୍ର ସ୍ୱାଇଁ ପ୍ରାର୍ଥୀ ଚୟନ ରେସ୍‌ରେ ଥିଲେ । ତେବେ ସମସ୍ତଙ୍କୁ ପଛରେ ପକାଇ ଅଜିତ ମଙ୍ଗରାଜ ହାଇକମାଣ୍ଡଙ୍କ ବିଶ୍ୱାସ ଜିତିପାରିଛନ୍ତି ।

ଅଜତ ଗତ ୨୦୧୯ ସାଧାରଣ ନିର୍ବାଚନରେ ମଧ୍ୟ କଂଗ୍ରେସ ପକ୍ଷରୁ ପ୍ରାର୍ଥୀ ହୋଇଥିଲେ । ସେ ମୋଟ ୯୮୩୦ ଭୋଟ ପାଇ ତୃତୀୟ ସ୍ଥାନରେ ରହିଥିଲେ । ୨୦୧୯ରେ ବିଜେପି ପକ୍ଷରୁ ଆଶ୍ରିତ ପଟ୍ଟନାୟକ ପ୍ରାର୍ଥୀ ହୋଇଥିଲେ । ସେ ବିଜେଡିକୁ କଡ଼ା ଟକ୍କର ଦେବା ପାଇଁ ଚେଷ୍ଟା କରିଥିଲେ । କିନ୍ତୁ ସଫଳ ହୋଇନଥିଲେ । ଆଶ୍ରିତ ବିଜେପି ପକ୍ଷରୁ ୨୦୧୯ ପ୍ରାର୍ଥୀ ହୋଇଥିବା ବେଳେ ଏଥର ମଧ୍ୟ ସେ ପ୍ରାର୍ଥୀ ହୋଇଛନ୍ତି । ୨୦୧୯ରେ ଆଶ୍ରିତ ୭୨୭୩୧ ଭୋଟ ପାଇ ଦ୍ୱିତୀୟ ସ୍ଥାନରେ ଥିଲେ । ତେବେ ୮୮୫୧୮ ଭୋଟ ପାଇ ବିଜେଡି ପ୍ରାର୍ଥୀ ଦିବଂଗତ ପ୍ରଦୀପ ମହାରଥୀ ବିଜୟ ହୋଇଥିଲେ ।

ତେବେ ଏହି ଉପନିର୍ବାଚନ ମାହୋଲ ଭିତରେ ପ୍ରଥମେ ବିଜେପି ନିଜ ପ୍ରାର୍ଥୀ ଘୋଷଣା କରିଥିଲା । ଦ୍ୱିତୀୟରେ ବିଜେଡି ଓ ଶେଷରେ କଂଗ୍ରେସ । ଏହି ଉପନିର୍ବାଚନରେ ବିଜେପି-ବିଜେଡି ମଧ୍ୟରେ କଡ଼ା ଟକ୍କର ହେବ ବୋଲି ଆଶା କରାଯାଉଛି ।

କରୋନା ପରେ ଏବେ କଳିଙ୍ଗ ଷ୍ଟାଡିୟମକୁ ଫେରିବ ଅନ୍ତର୍ଜାତୀୟ ମ୍ୟାଚ୍‌

କଳିଙ୍ଗ ଷ୍ଟାଡିୟମରେ ଅନ୍ତର୍ଜାତୀୟ ମୁକାବିଲା । ପୁଣି କଳିଙ୍ଗକୁ ଫେରିବ ଅନ୍ତର୍ଜାତୀୟ ପ୍ରତିଯୋଗିତା । କରୋନା ଭିତରେ ଦୀର୍ଘଦିନ ଧରି କଳିଙ୍ଗ ଷ୍ଟାଡିୟମରେ ଅନ୍ତର୍ଜାତୀୟ ପ୍ରତିଯୋଗିତା ହୋଇ ପାରିନାହିଁ । କିନ୍ତୁ କଟକଣା କୋହଳ ହେବା ପରେ ଏବେ ପୁଣି ଥରେ ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ଦେଖିବାକୁ ମିଳିବ ପୁଟବଲ ଓ ହକି ଟକ୍କର ।

ଆସନ୍ତା ୨୦୨୨ ଜାନୁଆରୀ ୨୦ ରୁ ୬ ଫେବୃଆରୀ ପର୍ଯ୍ୟନ୍ତ ଏଏଫସି ମହିଳା ଏସିଆନ କପ୍ ଖେଳାଯିବ । ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ଖେଳାଯିବ ଏହି ପ୍ରତିଯୋଗିତାର କିଛି ମ୍ୟାଚ୍‌ । ଏଥିପାଇଁ ଭୁବନେଶ୍ୱର କଳିଙ୍ଗ ଷ୍ଟାଡ଼ିୟମରେ ଆରମ୍ଭ ହୋଇଯାଇଛି ପ୍ରସ୍ତୁତି । କଳିଙ୍ଗ ଷ୍ଟାଡିୟମ ସହ ଅହମଦାବାଦ ଓ ନେଭି ମୁମ୍ବାଇରେ ଖେଳାଯିବ ମ୍ୟାଚ୍‌ । ମୋଟ ୧୮ ଦିନରେ ୨୫ଟି ମ୍ୟାଚ ଖେଳାଯିବ । ସମସ୍ତ ଦଳକୁ ୩ଟି ଗ୍ରୁପରେ ଭାଗ କରାଯାଇଛି । ଦେଶରେ ମହିଳା ଫୁଟବଲର ପ୍ରସାର ପାଇଁ ଏହି ଇଭେଣ୍ଟ ଆୟୋଜନର ଭାର ସମ୍ଭାଳିଛି ଭାରତ ।

ଚଳିତ ବର୍ଷ ମେ ମାସରେରେ ହକି ପ୍ରୋ ଲିଗ ମଧ୍ୟ ଭୁବନେଶ୍ୱର କଳିଙ୍ଗ ହକି ଷ୍ଟାଡିୟମରେ ଖେଳାଯିବ । ମେ ୨୯ ଓ ୩୦ ତାରିଖରେ ଭାରତ ଓ ନ୍ୟୁଜଲାଣ୍ଡ ମଧ୍ୟରେ ଦୁଇଟି ମ୍ୟାଚ ଖେଳାଯିବାକୁ ସ୍ଥିର ହୋଇଛି । ଦୀର୍ଘଦିନ ପରେ କଳିଙ୍ଗରେ ଅନ୍ତର୍ଜାତୀୟ ହକି ଖେଳାଯିବାକୁ ଥିବାରୁ ହକି ପ୍ରେମିଙ୍କ ମଧ୍ୟରେ ଉତ୍ସାହ ପ୍ରକାଶ ପାଇଛି । ସେପଟେ କଳିଙ୍ଗ ଏବେ ଦେଶରେ ସ୍ପୋର୍ଟସର ନୂଆ ଡେଷ୍ଟିନେସନ ସାଜିଥିବା କହିଛନ୍ତି ହକି ପ୍ରୋମସନ କାଉଂସିଲର ଚ୍ୟାରମ୍ୟାନ ଦିଲ୍ଲୀପ ତିର୍କୀ ।

କଳିଙ୍ଗ ଷ୍ଟାଡ଼ିୟମରେ ଖେଳାଯିବାକୁ ଥିବା ୧୭ ବର୍ଷରୁ କମ୍‌ ମହିଳା ଫିଫା ବଶ୍ୱକପ୍ କରୋନା ଯୋଗୁଁ ବାତିଲ ହେବା, ଖେଳ ପ୍ରେମୀଙ୍କୁ ନିରାଶ କରିଥିଲା । କିନ୍ତୁ ଏବେ ପୁଣି ଅନ୍ତର୍ଜାତୀୟ ମ୍ୟାଚ୍‌ ଫେରୁଥିବାରୁ ଉତ୍ସାହ ପ୍ରକାଶ ପାଇଛି ।

ବନ ବିଭାଗର ନିଆରା ପ୍ରୟାସ, ପ୍ରସ୍ତୁତ କରିଛନ୍ତି ଆୟୁର୍ବେଦ ଜଙ୍ଗଲ..

0

କୋରାପୁଟ: କେଉଁଠି ବକୁଳ ତ କେଉଁଠି ଚନ୍ଦନ । କେଉଁଠି ରୁଦ୍ରାକ୍ଷ ତ କେଉଁଠି ଚମ୍ପକ ବନ । ଲୋକଙ୍କୁ ଆୟୁର୍ବେଦ ମୁହାଁ କରିବାକୁ କୋରାପୁଟ ବନ ବିଭାଗ ପକ୍ଷରୁ ନିଆରା ପ୍ରୟାସ । କେମିକାଲ ଦୂନିଆରୁ ଏବେ ଲୋକେ ଆୟୁର୍ବେଦ ମୁହାଁ ହେଲେଣି । କିନ୍ତୁ କଂକ୍ରିଟ ଜଙ୍ଗଲରେ ଗଛ ନିଜ ସତ୍ତା ହରାଉଥିବାରୁ ଏହା ସହଜରେ ଉପଲବ୍ଧ ହୋଇପାରୁ ନାହିଁ । ବିଲୁପ୍ତ ହେବାକୁ ବସିଲାଣି ଅନେକ ଔଷଧୀୟ ବୃକ୍ଷ । ଏହାକୁ ଦୃଷ୍ଟିରେ ରଖି କୋରାପୁଟ ବନ ବିଭାଗ ପକ୍ଷରୁ ଆରମ୍ଭ ହୋଇଛି ନୂଆ ପ୍ରୟାସ । ଜୟପୁରରେ ୧୩ ଏକର ଜଙ୍ଗଲରେ ଲଗାଯାଇଛି ବିଭିନ୍ନ ଔଷଧୀୟ ବୃକ୍ଷ । ବିଭାଗର ଏହି ଉଦ୍ୟମକୁ ବିଭିନ୍ନ ମହଲରୁ ମିଳିଛି ପ୍ରଶଂସା ।

ଏହି ୧୩ ଏକର ଜଙ୍ଗଲରେ ଅଁଳା, ଡାଳିମ୍ବ, ନରକୋଳି, ଚନ୍ଦନ, ରୁଦ୍ରାକ୍ଷ, ବକୁଳ ସହ ଅଶୋକ, ଅର୍ଜୁନ, ରିଠା, ଫଣଫଣା, ପୁତ୍ରଞ୍ଜିବା ପରି ବିରଳ ଜାତିର ଗଛ ଲଗାଯାଇଛି । ଜଙ୍ଗଲ ଜମିରେ ଆଧୁନିକ ପଦ୍ଧତିରେ ଏପରି ଔଷଧିୟ ବୃକ୍ଷ ରୋପଣ କରିବା ବନ ବିଭାଗ ପାଇଁ ପ୍ରଥମ । ଏଥିପାଇଁ ଅନେକ ରୋଜଗାର ପାଇଛନ୍ତି । ଯାହାକୁ ଦେଖିବାକୁ ବିଭିନ୍ନ ଅଞ୍ଚଳରୁ ଲୋକେ ଆସୁଥିବାବେଳେ ଏହି ପରିବେଶରେ ସମୟ ବିତାଇବାକୁ ଭଲ ପାଉଛନ୍ତି । ବନ ବିଭାଗର ଏପରି ଉଦ୍ୟମକୁ ଲୋକେ ପ୍ରଶଂସା କରିଛନ୍ତି । ଏହା ଆଗକୁ ଆୟୁର୍ବେଦକୁ ବରଦାନ ସାଜିବ ବୋଲି କହିଛନ୍ତି ବୁଦ୍ଧିଜୀବୀ ଓ ପର୍ଯ୍ୟଟକ ।

ଶ୍ରୀମନ୍ଦିରରେ ଭକ୍ତ ଓ ଭଗବାନଙ୍କ ଅପୂର୍ବ ମିଳନ, ମହାପ୍ରଭୁଙ୍କ ସହ ଅବିର ଖେଳିଲେ ଭକ୍ତ..

ପୁରୀ: ଶ୍ରୀମନ୍ଦିରରେ ଭକ୍ତ ଓ ଭଗବାନଙ୍କ ଅପୂର୍ବ ମିଳନ । ଶ୍ରୀକ୍ଷେତ୍ରରେ ଅବିର ଖେଳିଲେ ମହାପ୍ରଭୁ । ଶ୍ରୀମନ୍ଦିରରେ ପାଳିତ ହୋଇଛି ଦୋଳପୂର୍ଣ୍ଣିମା । ପରମ୍ପରା ଅନୁସାରେ ଶ୍ରୀମନ୍ଦିରରୁ ଦୋଳଗୋବିନ୍ଦ, ଭୁଦେବୀ ଓ ଶ୍ରୀଦେବୀ ଦୋଳବେଦୀକୁ ବିଜେ କରି ଭକ୍ତଙ୍କ ସହ ଅବିର ଖେଳିଥିଲେ । ଆଉ ସୁନା ବେଶରେ ଦର୍ଶନ ଦେଇଥିଲେ ମହାପ୍ରଭୁ ।

ଦୋଳ ପୂର୍ଣ୍ଣମା ଅବସରରେ ଦୋଳବେଦୀକୁ ବିଜେ କଲେ ମହାପ୍ରଭୁଙ୍କ ଚଳନ୍ତି ପ୍ରତିମା । ଦୋଳବେଦୀରେ ଭକ୍ତ ଓ ଭଗବାନଙ୍କ ଏହି ଖେଳ ଏକ ଭାବମୟ ପରିବେଶ ସୃଷ୍ଟି କରିଥିଲା । ମହାପ୍ରଭୁଙ୍କ ସହ ହୋଲି ଖେଳି ଜୀବନ ସାର୍ଥକ ହୋଇ ଯାଇଥିବା କହିଛନ୍ତି ଭକ୍ତ ।

ଦୋଳ ପୂର୍ଣ୍ଣିମା ଅବସରରେ ସୁନା ବେଶରେ ଦର୍ଶନ ଦେଇଛନ୍ତି ମହାପ୍ରଭୁ । ରାତି ୪:୩୦ରୁ ଦ୍ୱାର ଫିଟା ପରେ ମଙ୍ଗଳଆଳତୀ, ମଇଲମ, ତଡପ ଲାଗି ଓ ଅନ୍ୟାନ୍ୟ ନୀତି ବଢ଼ି ମହାପ୍ରଭୁଙ୍କ ସୁନା ବେଶ ନୀତି ଅନୁଷ୍ଠିତ ହୋଇଥିଲା । ହରିଡ଼ା ମାଳି, ବାହାଡା ମାଳି, ସେବତୀ ମାଳି, କିରିଟ, ନାକୂଆଶୀ ଆଦି ବିବିଧ ଅଳଙ୍କାରରେ ମହାପ୍ରଭୁ ସଜେଇ ହୋଇ ଭକ୍ତ ଗଣଙ୍କୁ ଦର୍ଶନ ଦେଇଛନ୍ତି ମହାବାହୁ । ଦୋଳ ଉପରେ ଦୋଳ ଗୋବିନ୍ଦଙ୍କୁ ଦର୍ଶନ କଲେ ମୁକ୍ତି ମିଳିଥାଏ ବୋଲି ବିଶ୍ୱାସ ଥିବାରୁ ଶ୍ରୀକ୍ଷେତ୍ରରେ ଦର୍ଶନ ପାଇଁ ରବିବାର ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳିଥିଲା ।

ସେପଟେ କରୋନା ସଂକ୍ରମଣକୁ ଦୃଷ୍ଟିରେ ରଖି ଆସନ୍ତା ସପ୍ତାହଠାରୁ ପ୍ରତି ରବିବାର ଶ୍ରୀମନ୍ଦିରକୁ ସାନିଟାଇଜ ପାଇଁ ବନ୍ଦ ରଖାଯିବ ବୋଲି ମୁଖ୍ୟ ପ୍ରଶାସକ ସୂଚନା ଦେଇଛନ୍ତି ।

ହୋଲି ବଜାରରେ ଅଘଟଣ, ଟ୍ରକ୍ ଚାପାରେ ୮ ଜଣଙ୍କ ମୃତ୍ୟୁ

ପାଟଣା: ବିହାର ନାଳନ୍ଦା ଜିଲ୍ଲାରେ ରବିବାର ଭୟଙ୍କର ସଡ଼କ ଦୁର୍ଘଟଣା ଘଟିଛି । ଦୁର୍ଘଟଣାରେ ୮ ଜଣଙ୍କ ମୃତ୍ୟୁ ହୋଇଥିବା ବେଳେ ପୋଲିସ ଏଏସଆଇଙ୍କ ସମେତ ୫୦ ଜଣ ଆହତ ହୋଇଛନ୍ତି । ଦୁର୍ଘଟଣା ନାଳନ୍ଦା ଜିଲ୍ଲାର ତେଲହଡ଼ା ଥାନା ଅଞ୍ଚଳରେ ଘଟିଛି । ଦ୍ରୁତଗତିରେ ମାଡ଼ି ଆସୁଥିବା ଏକ ଟ୍ରକ୍ ରାସ୍ତାକଡ଼ ଦୋକନା ଉପରେ ମାଡ଼ି ଯାଇଛି । ଘଟଣାସ୍ଥଳରେ ୮ ଜଣଙ୍କର ମୃତ୍ୟୁ ହୋଇଛି ।

ଦୁର୍ଘଟଣା ପରେ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ କରିଥିଲା । ଉତ୍ତ୍ୟକ୍ତ ଜନତା ପୋଲିସ ଉପରକୁ ଟେକା ପଥର ମାଡ଼ କରିବା ସହ ଦୁର୍ଘଟଣା ଘଟାଇଥିବା ଟ୍ରକ୍ ଓ ଥାନା ପରିସରରେ ଥିବା ଅନ୍ୟ ଗାଡ଼ି ଗୁଡ଼ିକରେ ନିଆଁ ଲଗାଇ ଦେଇଛନ୍ତି । ଏପରିକି ଆମ୍ବୁଲାନ୍ସ ଉପରେ ଢ଼େଲା ମାଡ଼ କରିଛନ୍ତି ଉତ୍ତ୍ୟକ୍ତ ଲୋକ ।

ଟ୍ରକଟି ଜହାନାବାଦରୁ ନାଳନ୍ଦା ଅଭିମୁଖେ ଆସୁଥିଲା । ଥାନା ଗେଟ୍ ନିକଟରେ ଟ୍ରକ୍ ଭାରସାମ୍ୟ ହରାଇ ରାସ୍ତାକଡ଼ ଦୋକାନ ଉପରକୁ ମାଡ଼ି ଯାଇଥିଲା । ହୋଲି ପାଇଁ ରଙ୍ଗ କିଣୁଥିବା ଗ୍ରାହକଙ୍କ ସହ ଅନେକ ଦୋକାନୀ ମୃତାହତ ହୋଇଛନ୍ତି । ଘଟଣା ପରେ ସେଠାରେ ଚାପା ଉତ୍ତେଜନା ପ୍ରକାଶ ପାଇଛି ।

ପଦାରେ ପଡ଼ିବ ଦୁର୍ନୀତିଖୋରଙ୍କ ଚେହେରା, ଆଧାର ସହ ପାନ୍ ଲିଙ୍କ୍‌ ବାଧ୍ୟତାମୂଳକ କଲେ ସରକାର

ନୂଆଦିଲ୍ଲୀ: ଆଧାର କାର୍ଡ ସହ ପାନ୍ କାର୍ଡ ଲିଙ୍କ୍‌ କରିଛନ୍ତି ତ ? ଭୁଲିଯାଇଥିଲେ ଦେବାକୁ ପଡିବ ଜୋରିମାନା । ଆଧାର ସହ ପାନ୍ କାର୍ଡକୁ ଲିଙ୍କ କରିବା ପାଇଁ ବାଧ୍ୟତାମୂଳକ କରିଛନ୍ତି କେନ୍ଦ୍ର ସରକାର । ଲିଙ୍କ କରାନଗଲେ ଦେବାକୁ ହେବ ଏକ ହଜାର ଟଙ୍କା ଜରିମାନା । ୨୦୨୧ ଅର୍ଥ ବିଲ୍‌ ସଂଶୋଧନରେ ଏହି ବ୍ୟବସ୍ଥା ଆଣିଛନ୍ତି କେନ୍ଦ୍ର ସରକାର । ଏଭଳି ପ୍ରକ୍ରିୟା ଆରମ୍ଭ ହେବା ପରେ ଟିକସ ଫାଙ୍କୁଥିବା ବ୍ୟକ୍ତି ସଜାଗ ହୋଇଯିବେ ବୋଲି ବିଶେଷଜ୍ଞ ମତ ଦେଇଛନ୍ତି ।

ମାର୍ଚ୍ଚ ୩୧ ସୁଦ୍ଧା ଏହି ପ୍ରକ୍ରିୟା ସାରିବାକୁ କେନ୍ଦ୍ର ସରକାରଙ୍କ ନିର୍ଦ୍ଦେଶ ରହିଛି । ଅବହେଳା କଲେ ଅକାମି ହୋଇଯାଇପାରେ ଉଭୟ କାର୍ଡ । ପୂର୍ବରୁ ଏନେଇ କେନ୍ଦ୍ର ସରକାର ବାରମ୍ବାର ବିଜ୍ଞପ୍ତି ପ୍ରକାଶ କରିଥିଲେ ବି ଏହାର ପ୍ରଭାବ ଦେଖିବାକୁ ମିଳିନାହିଁ । କିନ୍ତୁ ଏଣିକି ଉଭୟ କାର୍ଡ ଲିଙ୍କ ନହେଲେ ଦେବାକୁ ପଡିବ ଏକ ହଜାର ଟଙ୍କା ଜୋରିମାନା । ଆଧାର ସହ ପାନ୍ କାର୍ଡ ଲିଙ୍କ ନହେଲେ ଆଗାମୀ ଦିନରେ ବହୁ ସମସ୍ୟା ଭୋଗିବାକୁ ପଡିବ ବୋଲି ବିଶେଷଜ୍ଞ ମତ ଦେଇଛନ୍ତି । ଜମି କିଣା ବିକା ସହ ମ୍ୟୁଚୁଆଲ ଫଣ୍ଡରେ ଟଙ୍କା ନିବେଶ କରିବା ସମ୍ଭବ ହେବ ନାହିଁ ବୋଲି ଅର୍ଥନୀତି ବିଶେଷଜ୍ଞ କହିଛନ୍ତି ।

ବର୍ତ୍ତମାନ ସମୟରେ ଅନେକ ବ୍ୟକ୍ତି ଆଧାର କାର୍ଡ ଜରିଆରେ ସରକାରୀ ସୁବିଧା ପାଉଛନ୍ତି । ପାନ୍ କାର୍ଡ ଲିଙ୍କ ନଥିବାରୁ ସେମାନଙ୍କର ଅର୍ଥନୀତିର ସଂପୂର୍ଣ୍ଣ କାରବାର ଅଦୃଶ୍ୟ ହୋଇ ରହୁଛି । କିନ୍ତୁ ଆଧାର କାର୍ଡ ସହ ପାନ୍ କାର୍ଡ ଲିଙ୍କ ହେଲେ ଟଙ୍କା କାରବାରର ସବୁ ତଥ୍ୟ ସାମ୍ନାକୁ ଆସିଯିବ । ଆୟକର ଟିକସ ଫାଙ୍କୁଥିବା ବ୍ୟକ୍ତିଙ୍କ ପତ୍ତା ଲଗାଇବ ଏହି ବ୍ୟବସ୍ଥା । ଆଧାର କାର୍ଡ ସହ ପାନ୍ କାର୍ଡ ଲିଙ୍କ ନହେଲେ ଆଗାମୀ ଦିନରେ ତାହା ଅକାମି ହେବାର ଅନେକ ସମ୍ଭାବନା ଥିବା କହିଛନ୍ତି ବିଶେଷଜ୍ଞ ।