ଭୁବନେଶ୍ୱର: ଆଜି ରାଜ୍ୟ କ୍ୟାବିନେଟ ବୈଠକ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ବୈଠକ ବସିବାକୁ ଥିବା ବେଳେ, ବହୁ ଗୁରୁତ୍ବପୂର୍ଣ୍ଣ ପ୍ରସ୍ତାବ ଉପରେ ନିଆଯିବ ନିଷ୍ପତ୍ତି । ମଧ୍ୟାହ୍ନ ୧୨ଟା ୩୦ରେ କ୍ୟାବିନେଟ ବୈଠକ ବସିବ । ତେବେ ବୈଠକରେ ଉଚ୍ଚଶିକ୍ଷାରେ ଅନୁଦାନ ବ୍ୟବସ୍ଥାରେ ସଂଶୋଧନ ପ୍ରସ୍ତାବ ଆସିପାରେ । ସେହିପରି ୧୧ରୁ ଅଧିକ ପ୍ରସ୍ତାବ ଉପରେ ନିଷ୍ପତ୍ତି ନିଆଯିବ ବୋଲି ସୂଚନା ମିଳିଛି ।
ଟ୍ରେନରେ ଚଢିଲେ ୨୫୦, ଓହ୍ଲାଇଲେ ୨୫
ରାଞ୍ଚି: ରବିବାର ମୁମ୍ବାଇରୁ ରାଞ୍ଚି ଆସିଥିବା କରୋନା ସ୍ପେଶାଲ୍ ଟ୍ରେନ୍ ପହଞ୍ଚିବା ପରେ ସମସ୍ତେ ତାଜୁବ୍ ହୋଇ ଯାଇଥିଲେ । ଉକ୍ତ ବିଶେଷ ଟ୍ରେନକୁ ନେଇ ଜିଲ୍ଲା ପ୍ରଶାସନ ତରଫରୁ କରୋନା ଯାଞ୍ଚ ନେଇ ଅନେକ ପ୍ରସ୍ତୁତି କରାଯାଇଥିଲା । କିନ୍ତୁ ଟ୍ରେନରୁ ରାଞ୍ଚି ରେଲୱେ ଷ୍ଟେସନରେ ମାତ୍ର ୨୫ ଜଣ ଯାତ୍ରୀ ଓହ୍ଲାଇଥିଲେ ।
ମୁମ୍ବାଇରୁ ରାଞ୍ଚି ଅଭିମୁଖେ ଯାତ୍ରା ଆରମ୍ଭ କରିଥିବା ଟ୍ରେନରେ ପ୍ରାୟ ୨୫୦ ଜଣ ଯାତ୍ରୀ ଥିଲେ । କିନ୍ତୁ ଅଧିକାଂଶ ଯାତ୍ରୀ ରାଞ୍ଚି ପହଞ୍ଚିବା ପୂର୍ବରୁ ହିଁ ଅନ୍ୟ ଷ୍ଟେସନରେ ଓହ୍ଲାଇ ପଡ଼ିଥିଲେ । ଅନ୍ୟପଟେ ରାଞ୍ଚି ପହଞ୍ଚିବାକୁ ଥିବା ୨୫୦ ଯାତ୍ରୀ ସଂଖ୍ୟା ଆଧାରରେ ଜିଲ୍ଲା ପ୍ରଶାସନ ପକ୍ଷରୁ ରେଳ ଷ୍ଟେସନରେ କରୋନା ଯାଞ୍ଚ ପାଇଁ ପ୍ରସ୍ତୁତି କରାଯାଇଥିଲା । କିନ୍ତୁ ଟ୍ରେନ୍ ପ୍ଲାଟଫର୍ମରେ ଲାଗିବା ପରେ ସମସ୍ତ କୋଚ୍ ଖାଲି ନଜର ଆସିଥିଲା । ଗୋଟିଏ ବଗିରୁ ୫ ଜଣ ଓ ଅନ୍ୟ ବଗିରୁ ୨୦ ଜଣ ଯାତ୍ରୀ ପ୍ଲାଟଫର୍ମରେ ଓହ୍ଲାଇଥିଲେ । ଏହାକୁ ଦେଖି ରେଲୱେ ଅଧିକାରୀଙ୍କ ସହ ଜିଲ୍ଲା ପ୍ରଶାସନର ଅଧିକାରୀ ହଇରାଣ ହୋଇ ଯାଇଥିଲେ ।
ଆସନ୍ତା ୫ଦିନ ପର୍ଯ୍ୟନ୍ତ ରାଜ୍ୟରେ ଜାରି ରହିବ କାଳବୈଶାଖୀର ପ୍ରଭାବ
ଭୁବନେଶ୍ୱର: ଆସନ୍ତା ୫ଦିନ ପର୍ଯ୍ୟନ୍ତ ରାଜ୍ୟରେ ଜାରି ରହିବ କାଳବୈଶାଖୀର ପ୍ରଭାବ । ବିଜୁଳି ଓ ଘଡଘଡି ସହ ବର୍ଷା ପବନ ହେବ ବୋଲି ପୂର୍ବାନୁମାନ କରିଛି ଭୁବନେଶ୍ବର ପାଣିପାଗ କେନ୍ଦ୍ର । ବିଶେଷକରି, ଉତ୍ତର ଓ ଦକ୍ଷିଣ ଆଭ୍ୟନ୍ତରୀଣ ଜିଲ୍ଲାଗୁଡିକରେ ବିଜୁଳି ଓ ଘଡଘଡି ସହ ବର୍ଷା ଓ ପବନ ହୋଇପାରେ । ଆସନ୍ତା ୨୪ ଘଣ୍ଟା ପାଇଁ ୧୭ ଜିଲ୍ଲାରେ ୟେଲୋ ଆଲର୍ଟ ଜାରି କରାଯାଇଛି । କେନ୍ଦୁଝର, ମୟୂରଭଞ୍ଜ, ବାଲେଶ୍ୱର, ଭଦ୍ରକ, ନୟାଗଡ, ମାଲକାନଗିରି, କୋରାପୁଟ, ଗଜପତି, ନୂଆପଡା, ରାୟଗଡା, ନବରଙ୍ଗପୁର, ବରଗଡ, ଝାରସୁଗୁଡା, ସୁନ୍ଦରଗଡ, ସମ୍ବଲପୁର, ଯାଜପୁର ଏବଂ ଦେବଗଡକୁ ୟେଲୋ ଆଲର୍ଟ ଜାରି କରାଯାଇଛି । ଆସନ୍ତା ୧୬ ତାରିଖ ପର୍ଯ୍ୟନ୍ତ ଏଭଳି କାଳବୈଶାଖୀ ଜନିତ ବର୍ଷା ପବନ ଜାରି ରହିବ ବୋଲି ସୂଚନା ଦେଇଛି ଭୁବନେଶ୍ୱର ପାଣିପାଗ କେନ୍ଦ୍ର। କାଳବୈଶାଖୀ ପ୍ରଭାବରେ ଆସନ୍ତା ୪ ଦିନ ପର୍ଯ୍ୟନ୍ତ ରାଜ୍ୟରେ ସର୍ବୋଚ୍ଚ ତାପମାତ୍ରାରେ କୌଣସି ପରିବର୍ତ୍ତନ ହେବ ନାହିଁ।
ସନ୍ ରାଇଜର୍ସ ହାଇଦ୍ରାବାଦ ଆଗରେ ୧୮୮ ରନର ଟାର୍ଗେଟ୍, ନୀତିଶ ଖେଳିଲେ ବିସ୍ଫୋରକ ୮୦ ରନର ଇନିଂସ
ଚେନ୍ନାଇ: ଆଇପିଏଲର ତୃତୀୟ ମ୍ୟାଚରେ ଟସ୍ ହାରି ବ୍ୟାଟଂ କରିଥିବା କୋଲକାତା ନାଇଟ୍ ରାଇଡର୍ସ ନିର୍ଦ୍ଧାରିତ ୨୦ ଓଭରରେ ୧୮୭ ରନ୍ କରିଛି । ଦଳ ପକ୍ଷରୁ ନୀତିଶ ରଣା ୫୬ ବଲରେ ସର୍ବାଧିକ ୮୦ ରନ୍ କରିଛନ୍ତି । ୪ଟି ଛକା ୯ଟି ଚୌକା ସାହଯ୍ୟରେ ଏହି ନୀତିଶ ଦଳକୁ ବଡ଼ ସ୍କୋର୍ କରିବାରେ ସହଯୋଗ କରିଥିବା ବେଳେ ରାହୁଲ ତ୍ରିପାଠୀ ୨୯ ବଲରେ ୫୩ ରନ୍ କରିଛନ୍ତି ।

ସନ୍ ରାଇଜର୍ସ ହାଇଦ୍ରାବାଦ ପକ୍ଷରୁ ମହମ୍ମଦ ନବି ଓ ରସିଦ ଖାନ୍ ୨ଟି ଲେଖାଏଁ ୱିକେଟ୍ ନେଇଥିବା ବେଳେ ଭୁବନେଶ୍ୱର କୁମାର ଓ ଟି. ନଟରାଜନ ଗୋଟିଏ ଲେଖାଏଁ ୱିକେଟ୍ ନେଇଥିଲେ । ୧୮୮ ରନର ବିଜୟ ଲକ୍ଷ୍ୟ ପିଛା କରି ସନ୍ ରାଇଜର୍ସ ହାଇଦ୍ରାବାଦ ବ୍ୟାଟିଂ ଆରମ୍ଭ କରିଛି । ଦଳ ପକ୍ଷରୁ ଋଦ୍ଧିମାନ ଶାହ ଓ ଡେଭିଡ୍ ୱାର୍ଣ୍ଣର ଓପନିଂ କରିଛନ୍ତି ।
ମନ୍ତ୍ରୀମାନଙ୍କ କାର୍ଯ୍ୟଦକ୍ଷତାକୁ ଦେଖି ପ୍ରସ୍ତୁତ ହେବ ରିପୋର୍ଟ କାର୍ଡ
ଭୁବନେଶ୍ୱର: ଆସନ୍ତା ମେ’ ୨୯ରେ ନବୀନ ସରକାରର ପଞ୍ଚମ ପାଳିର ୨ବର୍ଷ ପୂର୍ତ୍ତି। ଏହି ଅବସରରେ ରାଜ୍ୟବାସୀଙ୍କୁ ସଫଳତାର ହିସାବ ଦେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏହା ପୂର୍ବରୁ ମେ’ ୧୫ରୁ ୨୫ ତାରିଖ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ସବୁ ବିଭାଗର ସମୀକ୍ଷା କରିବେ। ସମୀକ୍ଷା ପରେ ମନ୍ତ୍ରୀମାନଙ୍କ କାର୍ଯ୍ୟଦକ୍ଷତାକୁ ଦେଖି ପ୍ରସ୍ତୁତ ହେବ ରିପୋର୍ଟ କାର୍ଡ। କେଉଁ ବିଭାଗ କେଉଁ କାମ କେତେ କରିଛି ? ୨ବର୍ଷ ମଧ୍ୟରେ ଲୋଙ୍କ ସ୍ୱାର୍ଥକୁ କେତେ ଗୁରୁତ୍ୱ ଦେଇଛନ୍ତି ମନ୍ତ୍ରୀ ? ନିର୍ବାଚନୀ ପ୍ରତିଶ୍ରୁତି କେତେ ପୂରଣ ହୋଇଛି ? କଥା ନୁହେଁ, କାମରେ ଆମ ସରକାର ବିଶ୍ୱାସ କରେ, ଏକଥାକୁ କେତେ ମାନିଛନ୍ତି ?
୨୦୧୯ରେ ବିଜେଡି ଇସ୍ତାହାର କେତେ ପାଳନ ହୋଇଛି ? ପ୍ରତି ବିଭାଗରେ ପ୍ରମୁଖ ୫ଟି ସଫଳତା କ’ଣ ? ଫାଇଭ୍- ଟି ଓ ମୋ ସରକାର ସବୁ ବିଭାଗରେ କେତେ କାର୍ଯ୍ୟକାରୀ ହୋଇଛି ? ଏ ସବୁର ସମୀକ୍ଷା କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ମୁଖ୍ୟମନ୍ତ୍ରୀଙ୍କ ପାଖରେ ନିଜ ବିଭାଗର କାର୍ଯ୍ୟଧାରା ରଖିବା ପାଇଁ ମନ୍ତ୍ରୀମାନେ ପ୍ରସ୍ତୁତ ହେଲେଣି। ଲୋକଙ୍କ ପାଇଁ ଉତ୍ସର୍ଗୀକୃତ ସରକାରର ବାର୍ଷିକ ସମୀକ୍ଷାକୁ ମନ୍ତ୍ରୀ ସ୍ୱାଗତ କରିଛନ୍ତି।
ଗଣତନ୍ତ୍ରରେ ଜନତା ହେଉଛନ୍ତି ମାଲିକ। ଗଣତନ୍ତ୍ରରେ ଉତ୍ତର ଦାୟିତ୍ୱ ସବୁଠାରୁ ଗୁରୁତ୍ୱପୂର୍ଣ୍ଣ। ଓଡ଼ିଶାର ସାଢ଼େ ଚାରି କୋଟି ଲୋକ ଯେଉଁ ଦାୟିତ୍ୱ ଆମକୁ ଦେଇଛନ୍ତି ଓ ଆମେ ଯେଉଁ ପ୍ରତିଶ୍ରୁତି ଲୋକଙ୍କୁ ଦେଇଛୁ, ତାହା ପାଳନ କରିବାରେ ଆମେ କେତେ ସଫଳ ହୋଇଛୁ, ତା’ର ହିସାବ ଲୋକଙ୍କୁ ଦେବାକୁ ହେଵ ବୋଲି ମୁଖ୍ୟମନ୍ତ୍ରୀ କହିଛନ୍ତି। ମାର୍ଚ୍ଚ ୧୫ରୁ ୨୫ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ଓ ସଚିବଙ୍କ ଉପସ୍ଥିତିରେ ବିଭାଗ କାମର ସମୀକ୍ଷା କରିବେ। ମୁଖ୍ୟମନ୍ତ୍ରୀଙ୍କ ଦିଗଦର୍ଶନରେ ରାଜ୍ୟରେ ଭିତ୍ତିଭୂମି ବିକାଶ ଉପରେ ଗୁରୁତ୍ୱ ଦିଆଯାଉଥିବା ଗ୍ରାମ୍ୟ ଉନ୍ନୟନ ମନ୍ତ୍ରୀ କହିଛନ୍ତି ।





