ସନ୍ ରାଇଜର୍ସ ହାଇଦ୍ରାବାଦ ଆଗରେ ୧୮୮ ରନର ଟାର୍ଗେଟ୍, ନୀତିଶ ଖେଳିଲେ ବିସ୍ଫୋରକ ୮୦ ରନର ଇନିଂସ

ଚେନ୍ନାଇ: ଆଇପିଏଲର ତୃତୀୟ ମ୍ୟାଚରେ ଟସ୍ ହାରି ବ୍ୟାଟଂ କରିଥିବା କୋଲକାତା ନାଇଟ୍ ରାଇଡର୍ସ ନିର୍ଦ୍ଧାରିତ ୨୦ ଓଭରରେ ୧୮୭ ରନ୍ କରିଛି । ଦଳ ପକ୍ଷରୁ ନୀତିଶ ରଣା ୫୬ ବଲରେ ସର୍ବାଧିକ ୮୦ ରନ୍ କରିଛନ୍ତି । ୪ଟି ଛକା ୯ଟି ଚୌକା ସାହଯ୍ୟରେ ଏହି ନୀତିଶ ଦଳକୁ ବଡ଼ ସ୍କୋର୍ କରିବାରେ ସହଯୋଗ କରିଥିବା ବେଳେ ରାହୁଲ ତ୍ରିପାଠୀ ୨୯ ବଲରେ ୫୩ ରନ୍ କରିଛନ୍ତି ।

ସନ୍ ରାଇଜର୍ସ ହାଇଦ୍ରାବାଦ ପକ୍ଷରୁ ମହମ୍ମଦ ନବି ଓ ରସିଦ ଖାନ୍ ୨ଟି ଲେଖାଏଁ ୱିକେଟ୍ ନେଇଥିବା ବେଳେ ଭୁବନେଶ୍ୱର କୁମାର ଓ ଟି. ନଟରାଜନ ଗୋଟିଏ ଲେଖାଏଁ ୱିକେଟ୍ ନେଇଥିଲେ । ୧୮୮ ରନର ବିଜୟ ଲକ୍ଷ୍ୟ ପିଛା କରି ସନ୍ ରାଇଜର୍ସ ହାଇଦ୍ରାବାଦ ବ୍ୟାଟିଂ ଆରମ୍ଭ କରିଛି । ଦଳ ପକ୍ଷରୁ ଋଦ୍ଧିମାନ ଶାହ ଓ ଡେଭିଡ୍ ୱାର୍ଣ୍ଣର ଓପନିଂ କରିଛନ୍ତି ।