spot_img
Home Blog Page 5843

ଠିକ୍ ସମୟରେ ପହଞ୍ଚିଲା ନାହିଁ ଅମ୍ଲଜାନ, ଚାଲିଗଲା ୨୪ଜୀବନ

ଦେଶରେ ଥମୁନି ମୃତ୍ୟୁର ତାଣ୍ଡବ । ଅକ୍ସିଜେନ ଅଭାବରୁ ଚାଲିଯାଉଛି ହଜାର ହଜାର ଜୀବନ । ପ୍ରତ୍ୟେକ ଦିନ କରୋନା ରୋଗୀଙ୍କର ମୃତ୍ୟୁ ଏହିଭଳି ଅସହାୟ ଅବସ୍ଥାରେ ଘଟୁଛି । ଦିଲ୍ଲୀ ଓ ଉତ୍ତରପ୍ରଦେଶର ଅକ୍ସିଜେନ ଅଭାବର ଭୟାବହ ଦୃଶ୍ୟ ଦେଖିସାରିବା ପରେ ଆଜି କର୍ଣ୍ଣାଟକର ସ୍ଥିତି ମଧ୍ୟ ବେହାଲ । କର୍ଣ୍ଣାଟକର ଚାମରାଜନଗରରେ ଅକ୍ସିଜେନ ଅଭାବରୁ ୨୪ଜଣ କୋଭିଡ୍ ରୋଗୀଙ୍କର ମୃତ୍ୟୁ ହୋଇଛି । ଗତକାଲି ମଧ୍ୟରାତ୍ରୀରେ ଘଟିଛି ଏହିଭଳି ଦୁଃଖଦ ଘଟଣା । ଦୁର୍ଘଟଣା ଘଟିବା ପରେ ମହୀଶୁରରୁ ଚାମରାଜନଗରକୁ ଦେଢଶହ ଅକ୍ସିଜେନ ସିଲିଣ୍ଡର ପଠାଯାଇଥିଲା ।

ଦିଲ୍ଲୀର ବତ୍ରା ହସ୍ପିଟାଲରେ ଅକ୍ସିଜେନ ଡେରିରେ ପହଂଚିବାରୁ ଯେଉଁ ଘଟଣା ଘଟିଥିଲା । ଠିକ୍ ସେହିଭଳି କର୍ଣ୍ଣାଟକର ଚାମରାଜନଗରରେ ଘଟିଛି ।  ସୂଚନା ଅନୁସାରେ ଜୀବନ ଯାଇଥିବା ଅଧିକାଂଶ ଲୋକ ଭେଣ୍ଟିଲେଟରରେ ରହିଥିଲେ । ଅକ୍ସିଜେନ ସପ୍ଲାଏ ଶେଷ ହେବା ପରେ ରୋଗୀମାନେ ନିଶ୍ୱାସ ନେବାପାଇଁ ଅନେକ କଷ୍ଟପାଇ ମୃତ୍ୟୁବରଣ କରିଛନ୍ତି । ଅମ୍ଲଜାନ ବେଲ୍ଲାରୀରୁ ଆସିବାର ଥିଲା ।  କିନ୍ତୁ ଅକ୍ସିଜେନ ଠିକ୍ ସମୟରେ ପହଂଚି ପାରିନଥିଲା ।

ବର୍ତ୍ତମାନ କର୍ଣ୍ଣାଟକରେ ମୋଟ କରୋନା ସଂକ୍ରମିତଙ୍କ ସଂଖ୍ୟା ୧୬ଲକ୍ଷରୁ ଅଧିକ ।  ରବିବାର ଦିନ ୩୭ହଜାରରୁ ଅଧିକ ନୂଆ ମାମଲା ସାମ୍ନାକୁ ଆସିଛି । ତାସହ ୨୧୭ଜଣଙ୍କର ମୃତ୍ୟୁ ମଧ୍ୟ ହୋଇଛି । ଆଉ ଏସବୁ ଭିତରେ ରୋଗୀମାନଙ୍କୁ ଅମ୍ଲଜାନ ପାଇଁ ସଂଘର୍ଷ କରିବାକୁ ପଡୁଛି ।  ଅନେକ ସପ୍ତାହଧରି ଏହିଭଳି ସ୍ଥିତି କଣ୍ଣାଟକର ବିଭିନ୍ନ ହସ୍ପିଟାଲରେ ଦେଖିବାକୁ ମିଳୁଛି ।

ଦେଶର ଅନ୍ୟକିଛି ରାଜ୍ୟରେ ମଧ୍ୟ ଏହିଭଳି ସଙ୍ଗିନ ସ୍ଥିତି ଦେଖିବାକୁ ମିଳୁଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଦିନ କରୋନା ସଂଙ୍କଟ ମଧ୍ୟରେ ଦେଶରେ ଅମ୍ଲଜାନ ଏବଂ ଔଷଧ ଅଭାବ ସଂମ୍ପର୍କରେ ବିଶେଷଜ୍ଞଙ୍କ ସହ ଏକ ସମୀକ୍ଷା ବୈଠକ କରିଛନ୍ତି । ଯେଉଁଥିରେ ସରକାର ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି । ଏଥିରେ ଦେଶର ସ୍ୱାସ୍ଥବ୍ୟବସ୍ଥାର ସ୍ଥିତି ସମ୍ପର୍କରେ ଆଲୋଚନା  ସହିତ  ମେଡିକାଲ ଛାତ୍ରଛାତ୍ରୀଙ୍କୁ କୋଭିଡ ଡିଉଟିରେ ନିୟୋଜିତ କରିବାକୁ ଯୋଜନା ହୋଇଛି । ତେବେ ସରକାରଙ୍କ ଆଲୋଚନା ଓ ପର୍ଯ୍ୟାଲୋଚନା ଭିତରେ ଅନେକ ରୋଗୀଙ୍କର ମୃତ୍ୟୁ ହେଇଚାଲିଛି । ରୋଗୀଙ୍କର ଆତ୍ମୀୟସ୍ୱଜନଙ୍କର ଦୁଃଖ ଓ ଯନ୍ତ୍ରଣାର କଷ୍ଟ ମଧ୍ୟ ସମୟ ହିସାବରେ ବଢିବଢି ଚାଲିଛି । ଅପେକ୍ଷା ସେହିଦିନକୁ ଯେବେ ସାରା ଭାରତରେ ସଠିକ୍ ସମୟରେ ଅକ୍ସିଜେନ ଓ ବେଡ୍ ଉପଲବ୍ଧ ହୋଇପାରିବ ।

ଆଇପିଏଲରେ କରୋନା ଆତଙ୍କ, KKRର ଦୁଇ ଖେଳାଳି ପଜିଟିଭ

ନୂଆଦିଲ୍ଲୀ: ଦେଶରେ କରୋନା ସଂକ୍ରମଣ ବଢୁଥିବା ବେଳେ ଏଥିରୁ ବାଦ୍ ପଡିନି ଆଇପିଏଲ୍ ମ୍ୟାଚ୍। ଏବେ କୋଲକାତା ନାଇଟ ରାଇଡର୍ସର ଦୁଇ ଜଣ ଖେଳାଳି କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ଯାହା ଫଳରେ ଆଜିର ମ୍ୟାଚକୁ ସ୍ଥଗିତ କରିଛି ବିସିସିଆଇ। ସଂକ୍ରମିତ ଚିହ୍ନଟ ପରେ ଆଇସୋଲେସନରେ ଅଛନ୍ତି କେକେଆରର ଖେଳାଳି ।

ଏହି ମ୍ୟାଚ କେବେ ଖେଳାଯିବ ଏନେଇ ଖୁବଶୀଘ୍ର ନିଷ୍ପତ୍ତି ନିଆଯିବ । ଆଇପିଏଲର ୩୦ତମ ମ୍ୟାଚରେ କୋଲକାତା ନାଇଟ୍ ରାଇଡର୍ସ ଓ ରୟାଳ୍ ଚାଲେଞ୍ଜ ବାଙ୍ଗାଲୋର ମଧ୍ୟରେ ମ୍ୟାଚ ହେବାର ଥିଲା । ଏହି ମ୍ୟାଚ୍ ସନ୍ଧ୍ୟା ୭ଟା ୩୦ମି.ରେ ଖେଳାଯିବାକୁ ଥିଲା ।

KKR Sets 188 Run Targets For SRH In IPL 3Rd Match

ମହାମାରୀ ମଧ୍ୟରେ ଏଯାବତ୍ ୨୯ଟି ମ୍ୟାଚ୍ ସଫଳତା ପୂର୍ବକ କରାଯାଇଥିଲା । ହେଲେ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଚଳିତ ସିଜନର ୩୦ ତମ ମ୍ୟାଚକୁ ବର୍ତ୍ତମାନ ପାଇଁ ସ୍ଥଗିତ କରାଯାଇଛି ।

 

ଏହା ପୂର୍ବରୁ ଖବର ଆସିଥିଲା ଯେ କରୋନା ସଂକ୍ରମଣ କ୍ରମାଗତ ବଢୁଥିବା ଯୋଗୁଁ ବିସିସିଆଇ ପକ୍ଷରୁ IPL-14ରେ ଖେଳାଳିଙ୍କୁ ବାୟୋ ବବଲ୍ କୁ ଅଧିକ ଶକ୍ତ କରାଯାଇଥିଲା । ତେବେ ଏହା ସତ୍ୱେ ମଧ୍ୟ ଖେଳାଳି କରୋନା ପଜିଟିଭ ହେଉଛନ୍ତି ।

ସୂଚନାଯୋଗ୍ୟ, ଗତ ୨୪ ଘଣ୍ଟାରେ ଦେଶରୁ ଚିହ୍ନଟ ହୋଇଛନ୍ତି ଆଉ ୩ ଲକ୍ଷ ୬୮ ହଜାର ୧୪୭ ସଂକ୍ରମିତ। ସ୍ୱାସ୍ଥ୍ୟ  ବିଭାଗର ସୂଚନା ଅନୁଯାୟୀ, କରୋନା ସଂକ୍ରମଣରେ ୩ ହଜାର ୪୧୭ ଜଣଙ୍କ ଜୀବନ ନେଇଛି ମହାମାରୀ। ସେହିପରି ଗୋଟିଏ ଦିନରେ ସୁସ୍ଥ ହୋଇଛନ୍ତି ଆଉ ୩ ଲକ୍ଷ ୭୩୨ ସଂକ୍ରମିତ। ନୂଆ ଆକ୍ରାନ୍ତଙ୍କୁ ମିଶାଇ ଦେଶରେ ମୋଟ ଆକ୍ରାନ୍ତଙ୍କ ସଂଖ୍ୟା ୧ କୋଟି ୯୯ ଲକ୍ଷ ୨୫ ହଜାର ୬୦୪ରେ ପହଞ୍ଚିଥିବା ବେଳେ ସୁଦ୍ଧା ମୋଟ ୧ କୋଟି ୬୨ ଲକ୍ଷ ୯୩ ହଜାରରୁ ଅଧିକ ସୁସ୍ଥ ହୋଇଛନ୍ତି।

 

ଓଡ଼ିଶାରେ ପର୍ଯ୍ୟାପ୍ତ କାମ ମିଳିବ, ଅନ୍ୟତ୍ର ଯାଆନ୍ତୁ ନାହିଁ: ଶ୍ରମ ମନ୍ତ୍ରୀ

ଭୁବନେଶ୍ୱର: ଓଡ଼ିଶାରେ ପର୍ଯ୍ୟାପ୍ତ ପରିମାଣର କାମ ମିଳିବ। ପ୍ରବାସୀ ଶ୍ରମିକ ଏଠାରେ ହିଁ ରୁହନ୍ତୁ ଓ କାମଧନ୍ଦା ଖୋଜି ଜୀବିକା ନିର୍ବାହ କରନ୍ତୁ ବୋଲି ଶ୍ରମମନ୍ତ୍ରୀ ସୁଶାନ୍ତ ସିଂହ ଅନୁରୋଧ କରିଛନ୍ତି।

ସେ ଆହୁରି କହିଛନ୍ତି, ଅଧିକ ଟଙ୍କା ଆଶାରେ ଓଡ଼ିଶା ବାହାରକୁ ଯାଉଛନ୍ତି ଆମ ଲୋକମାନେ। ବାହାର ରାଜ୍ୟରୁ ଲୋକ ଆସି ଏଠାରେ ବି କାମ କରୁଛନ୍ତି। ହେଲେ ମହାମାରୀ ଯୋଗୁ ଲକ୍‌ଡାଉନ୍‌ ଓ ସଟ୍‌ଡାଉନ୍‌ ପାଇଁ ଫେରିବାରେ ସମସ୍ୟା ହେଉଛି । ସେଥିପାଇଁ ଓଡ଼ିଶାରେ ରହି ନିଜ ପରିବାରକୁ ସୁରକ୍ଷିତ ରଖନ୍ତୁ ଓ ଏଠାରେ ହିଁ କାମ କରନ୍ତୁ ବୋଲି ଶ୍ରମ ମନ୍ତ୍ରୀ କହିଛନ୍ତି।

ଜୀବନ ରହିଲେ, ବହୁତ ରୋଜଗାର କରିବେ। ସରକାର ଦଲାଲଙ୍କ ଉପରେ ନଜର ରଖିଛନ୍ତି । କିନ୍ତୁ ଲୋକ ନିଜେ ସଚେତନ ହେବା ସଙ୍ଗେସଙ୍ଗେ ଦଲାଲ ହାବୁଡ଼ାରେ ପଡ଼ି ଲୁଚି ନପଳାନ୍ତୁ ବୋଲି ଶ୍ରମମନ୍ତ୍ରୀ ସୁଶାନ୍ତ ସିଂହ ଲୋକମାନଙ୍କୁ ପରାମର୍ଶ ଦେବା ସହ ଅନୁରୋଧ ମଧ୍ୟ କରିଛନ୍ତି।

ପ୍ରଳୟଙ୍କାରୀ ବାତ୍ୟା ଫନିକୁ ପୂରିଲା ୨ ବର୍ଷ, ଆଜିବି ଶୁଖିନି ଆଖିର ଲୁହ…

ଭୁବନେଶ୍ୱର: ୨୦୧୯ ମସିହା ମେ ୩ । ସେହି ଦିନର ଘଟଣା ଆଜିବି ଲୋକଙ୍କ ମାନସପଟରୁ ଲିଭିନାହିଁ । ଏହି ଦିନ ଆସିଥିଲା ପ୍ରଳୟଙ୍କାରୀ ବାତ୍ୟା ଫନି। ଆଉ ଦୋହଲାଇ ଦେଇଥିଲା ସାରା ଓଡିଶାକୁ । ୨ ବର୍ଷ ତଳେ ବାତ୍ୟା ଫନି ଉପକୂଳ ଓଡ଼ିଶାରେ ରଚିଥିଲା ତାଣ୍ଡବ। ଘଣ୍ଟା ପ୍ରତି ୨୦୦ କିମି ବେଗରେ ବହୁଥିଲା ପବନ । ନିମିଷ.କେ ସବୁ କିଛି ଛାରଖାର କରି ଦେଇଥିଲା । ଉଜୁଡ଼ି ଯାଇଥିଲା ହଜାର ହଜାର ଘର, ଆଉ ମାଟିରେ ଶୋଇପଡ଼ିଥିଲା ଲକ୍ଷ ଲକ୍ଷ ଗଛ ।

ସମୟ ବଦଳିଛି, ଆଗକୁ ବଢିଛି ଦୁନିଆ ହେଲେ ପଛରେ ଛାଡ଼ିଯାଇଛି ଦୁର୍ଦ୍ଦଶାର ଚିତ୍ର । ଯଦିଓ ମାଟିରେ ଶୋଇପଡ଼ିଥିବା ଗଛ ଅଣ୍ଟାସଳଖି ପୁଣି ସବୁଜିମାରେ ଭରିପଡ଼ିଛି, ମାତ୍ର ଭଙ୍ଗା କାନ୍ଥ ଏବେବି ବଖାଣୁଛି ଦୁର୍ଦ୍ଦଶାର ଚିତ୍ର । ନିମାପଡ଼ା ଓ ଗୋପ ଅଞ୍ଚଳର ବିପନ୍ନଙ୍କ ଛାତିତଳେ ଲୁଚି ରହିଛି କୋହ । ପ୍ରଳୟର ଦିନ କଥା ଭାବିଲେ ଆଖିରେ ଜକେଇ ଆସୁଛି ଲୁହ ।

 

୧୯୯୯ରୁ ୨୦୧୯, ଦୁଇ ଦଶନ୍ଧି ଭିତରେ ଓଡ଼ିଶା ଅନେକ ମହାବାତ୍ୟା, ବାତ୍ୟାକୁ ସାମନା କରିଛି । ପୁଣି ଛାତିକୁ ଟାଣ କରି ଛିଡ଼ା ହୋଇଛି । ୨୦୧୯ ମସିହା ମେ ୩, ଆଜିକୁ ଠିକ୍ ବର୍ଷେ । ଓଡ଼ିଶା ଦେଖିଥିଲା ବାତ୍ୟା ‘ଫନି’ର କରାଳ ପ୍ରକୋପ । ସମୁଦ୍ର ତଟରୁ ଶ୍ମଶାନ, ରେଲୱେ ଷ୍ଟେସନରୁ ରାଜଧାନୀର କୋଣ ଅନୁକୋଣ । ସବୁଠି ତାଣ୍ଡବ ରଚିଥିଲା ‘ଫନି’ ।

ବାତ୍ୟା ‘ଫନି’ ଯୋଗୁଁ ଅଧା ଓଡ଼ିଶା ପ୍ରଭାବିତ ହୋଇଥିଲା । ପୁରୀ, କଟକ, କେନ୍ଦ୍ରାପଡ଼ା, ଖୋର୍ଦ୍ଧା ଓ ଜଗତସିଂହପୁର ବ୍ୟାପକ ଭାବେ ପ୍ରଭାବିତ ହୋଇଥିଲା । ଅନୁଗୁଳ, ଭଦ୍ରକ, ଢେଙ୍କାନାଳ, ଗଞ୍ଜାମ, ଯାଜପୁର, କେନ୍ଦୁଝର, ମୟୂରଭଞ୍ଜ, ନୟାଗଡ଼ ଜିଲ୍ଲା ବାତ୍ୟାରେ ପ୍ରଭାବିତ ହୋଇଥିଲା ।

ମେ ୩ ସକାଳୁ ପବନର ବେଗ ବଢ଼ିବା ସହ ବଢ଼ିଥିଲା ବର୍ଷା । ରାଜ୍ୟର ସବୁ ସମୁଦ୍ର କୁଳିଆ ଅଞ୍ଚଳରେ ପବନର ବେଗ ବେଶ୍ ଅଧିକ ଥିଲା । ସକାଳ ପ୍ରାୟ ୮ଟା ୪୦ ମିନିଟରେ ପୁରୀରେ ଲ୍ୟାଣ୍ଡଫଲ୍ କରିଥିଲା ବାତ୍ୟା ‘ଫନି’ । ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିଲା ପୁରୀ ସମୁଦ୍ର କୂଳରେ ଥିବା ନୋଳିଆ ବସ୍ତି ।

ଉଜୁଡ଼ି ଯାଇଥିଲା ହୋଟେଲ ଶିଳ୍ପ, ହରିଣଙ୍କ କୋଳାହଳରେ କମ୍ପୁଥିବା ବାଲୁଖଣ୍ଡ ଅଭୟାରଣ୍ୟ ବି ବାଦ୍ ପଡ଼ିନଥିଲା । ହରିଣ ସବୁ ଗାଏବ ହୋଇଯିବା ସହ ନିଶ୍ଚିହ୍ନ ହୋଇଯାଇଥିଲା ଜଙ୍ଗଲ । ପୁରୀ ଜିଲ୍ଲାର ସମସ୍ତ ଅଞ୍ଚଳ ବ୍ୟାପକ କ୍ଷତିଗ୍ରସ୍ତ ହୋଇଥିଲା । ବ୍ରହ୍ମଗିରି, ସାତପଡ଼ା ଅଞ୍ଚଳର ଦୃଶ୍ୟ ଥିଲା ବେଶ୍ ହୃଦୟ ବିଦାରକ ।

ସବୁବେଳେ ବାତ୍ୟା କଥା ଶୁଣି ହସରେ ଉଡ଼ାଇ ଦେଉଥିବା ରାଜଧାନୀବାସୀ ଦେଖିଥିଲେ ‘ଫନି’ର କରାଳ ରୂପ । ରାଜଧାନୀର ସବୁଜିମା ଧରାଶାୟୀ ହେବା ସହ ଭୂମିରେ ଲୋଟି ପଡ଼ିଥିଲା ଇଲେକ୍ଟ୍ରି ଖୁଣ୍ଟ, ବଡ଼ ବଡ଼ ହୋର୍ଡିଂ । ବସ୍ତି ଗୁଡ଼ିକୁ ଛାରଖାର୍ କରି ଦେଇଥିଲା ୩ ଘଣ୍ଟାର ବର୍ଷା ଓ ପବନ । ‘ଫନି’ ଲ୍ୟାଣ୍ଡଫଲ୍ ପରର ଚିତ୍ରକୁ ଆଖିରେ ଦେଖି ବିଶ୍ୱାସ କରି ହେଉନଥିଲା ।

ଜମିବାଡ଼ି ପାଇଁ ଦିବ୍ୟାଙ୍ଗ ଭାଇକୁ ମରଣାନ୍ତକ ଆକ୍ରମଣ କଲେ ଦୁଇ ଭାଇ

ବଲାଙ୍ଗୀର: ବଲାଙ୍ଗୀର ସଦର ଥାନା ଅନ୍ତର୍ଗତ ଚନ୍ଦନଭାଟି ଫାଣ୍ଡି କଟାପାଲି ଗାଁରେ ଅଭାବନୀୟ ଘଟଣା । ଜମିବାଡ଼ି ଓ ଘର ଡ଼ିହ ଭାଗବଣ୍ଟା ଘଟଣାକୁ କେନ୍ଦ୍ର କରି ଗାଁର ହାତୀ ପରିବାରର ୪ଜଣ ଭାଇ ମଧ୍ୟରେ ଗଣ୍ଡଗୋଳ ହୋଇଥିଲା । ଯାହା ପରେ ଉତ୍ୟକ୍ତ ହୋଇ ଅନ୍ୟ ଦୁଇ ଜଣ ଭାଇ ନିଜ ଦିବ୍ୟାଙ୍ଗ ବଡ଼ ଭାଇ ଓ ମଝିଆ ଭାଇକୁ ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି।

ସୂଚନା ଅନୁଯାୟୀ, ଭୁଜାଲି ଓ ଲୁହା ଶାବଳରେ ପେଟରେ ଭୂସୀ ମଝିଆ ଭାଇ ମାଧବକୁ ହତ୍ୟା ଉଦ୍ୟମ କରିଥିବା ବେଳେ ବଡ଼ ଭାଇ ନିତ୍ୟା ହାତୀ (ଦିବ୍ୟାଙ୍ଗ)କୁ ମଧ୍ୟ ମରଣାନ୍ତକ ଆକ୍ରମଣ କରିଛନ୍ତି । ଯାହା ଫଳରେ ତାଙ୍କର ଦୁଇ ହାତ ଭାଙ୍ଗି ଯାଇଥିବା ବେଳେ ଛାତି ଓ ମୁଣ୍ଡରେ ଗୁରୁତର ଆଘାତ ଲାଗିଛି ।

ତେବେ ଆକ୍ରମଣର ଶିକାର ହୋଇଥିବା ଉଭୟ ଭାଇଙ୍କୁ ଗୁରୁତର ଅବସ୍ଥାରେ ବଲାଙ୍ଗୀର ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଛି। କିନ୍ତୁ ମାଧବଙ୍କ ସ୍ୱାସ୍ଥ୍ୟବସ୍ଥା ସଙ୍କଟାପନ୍ନ ରହିଥିବା ଜଣାପଡିଛି । ଅପରପକ୍ଷେ ଆକ୍ରମଣ କରିଥିବା ବ୍ୟକ୍ତି ମାନେ ହେଲେ ସାରଙ୍ଗ ହାତୀ, ଗୌର ହାତୀ ଓ ସୁଶାନ୍ତ ହାତୀ ବୋଲି ଜଣାପଡିଛି । ଏନେଇ ସଦର ଥାନା ପୋଲିସ ଘଟଣା ସ୍ଥଳରେ ପହଂଚି ତଦନ୍ତ ଆରମ୍ଭ କରିଛି।

ପଶ୍ଚିମବଙ୍ଗରେ ମମତାଙ୍କ ବାଜିମାତ୍, ଶୁଭେଚ୍ଛା ଜଣାଇଲେ ମୁଖ୍ୟମନ୍ତ୍ରୀ ନବୀନ

କୋଲକାତା: ପଶ୍ଚିମବଙ୍ଗରେ ଦମ୍ ଦେଖାଇଲେ ଦିଦି। ବିଜୟର ହ୍ୟାଟ୍ରିକ ସହ ୨୧୩ ଆସନ ଅକ୍ତିଆର କରିଛି ଦିଦିଙ୍କ ଦଳ ଟିଏମସି। ଯାହା ପରେ ମମତା ବାନାର୍ଜୀଙ୍କୁ ଶୁଭେଚ୍ଛା ଜଣାଇଛନ୍ତି ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏନେଇ ସେ ଟ୍ୱିଟ୍ କରି ସୂଚନା ଦେଇଛନ୍ତି ।

ଟିଏମସିର ବିପୁଳ ବିଜୟ ପରେ ମମତା ବାନାର୍ଜୀଙ୍କୁ ଫୋନ କରି କଥା ହୋଇଛନ୍ତି ମୁଖମନ୍ତ୍ରୀ ନବୀନ ପଟ୍ଟନାୟକ । ବିପୁଳ ବିଜୟ ନେଇ ମମତାଙ୍କୁ ନବୀନ ଅଭିନନ୍ଦନ ଜଣାଇଛନ୍ତି ।

ଉଲ୍ଲେଖଯୋଗ୍ୟ, ପଶ୍ଚିମବଙ୍ଗରେ ଦିଦି ବିଜୟର ହ୍ୟାଟ୍ରିକ ସହ ୨୧୩ ଆସନ ଅକ୍ତିଆର କରିଛି ଟିଏମସି। ହେଲେ ନନ୍ଦିଗ୍ରାମରେ ଶୁଭେନ୍ଦୁ ଅଧିକାରୀଙ୍କଠାରୁ ହାରିଛନ୍ତି ମମତା । ଅନ୍ୟପକ୍ଷରେ ଆସାମରେ ବିଜେପି ମେଣ୍ଟ ଏନଡିଏ ୭୩ ଆସନ ପାଇ ପୁଣି ଥରେ ସରକାର ଗଢିବାକୁ ଯାଉଛନ୍ତି ସର୍ବାନନ୍ଦ ସୋନଓ୍ବାଲ । ଏଠାରେ କଂଗ୍ରେସ ମେଣ୍ଟ ୟୁପିଏକୁ ୫୨ଟି ଆସନ ମିଳିଛି । ପୁଡୁଚେରୀରେ ୩୦ ଆସନରୁ ଏନ୍‌ଡିଏ ମେଣ୍ଟ ୧୬ ଆସନରେ ବିଜୟୀ ହୋଇ ସରକାର ଗଢିବାକୁ ଯାଉଛି । କଂଗ୍ରେସ ମେଣ୍ଟକୁ ମାତ୍ର ୯ଟି ଆସନ ମିଳିଛ ଏବଂ ଅନ୍ୟମାନଙ୍କୁ ୬ଟି ଆସନ ସନ୍ତୁଷ୍ଟ ହେବାକୁ ପଡ଼ିଛି ।

ସେହିପରି କେରଳରେ ଶାସକ ଏଲ୍‌ଡିଏଫ୍‌ ମେଣ୍ଟ ଐତିହାସିକ ବିଜୟ ହାସଲ କରି ପୁଣି ଥରେ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ପିନାରାଇ ବିଜୟନ । ୧୪୦ ଆସନରୁ ବାମମେଣ୍ଟ ଏଲଡିଏଫ ୯୨ ଆସନରେ ବିଜୟୀ ରହିଛି । ୟୁଡିଏଫକୁ ୩୯ଟି ଆସନ ମିଲିଥିବା ବେଳେ ଅନ୍ୟାନ୍ୟ ଖାତାକୁ ୯ଟି ଆସନ ଯାଇଛି । ସେହିପରି ତାମିଲନାଡ଼ୁରେ ୨୩୪ ବିଧାନସଭା ଆସନରୁ AIADMK- BJPକୁ ମାତ୍ ଦେଇ ସରକାର ଗଢିବାକୁ ଯାଉଛି ଡିଏମକେ-କଂଗ୍ରେସ ମେଣ୍ଟ । ଡିଏମକେ କଂଗ୍ରେସ ମେଣ୍ଟ ୧୫୨ଟି ଆସନ ପାଇ ସରକାର ଗଢିବାକୁ ଯାଉଛନ୍ତି ଏମ କେ ଷ୍ଟାଲିନ୍ । କ୍ଷମତାରେ ଥିବା ଏଆଇଏଡିଏମ୍‌କେ ମେଣ୍ଟକୁ ମାତ୍ର ୭୭ ଆସନ ମିଳିଛି । କମଲ ହାସନଙ୍କ ଦଳ ଏମ୍‌ଏନ୍‌ଏମ୍‌କୁ ଗୋଟିଏ ଆସନରେ ସନ୍ତୁଷ୍ଟ ହେବାକୁ ପଡ଼ିଛି ।

ବାଲେଶ୍ବରର ୬୬ କେନ୍ଦ୍ରରେ ଟିକାକରଣ ବନ୍ଦ

ବାଲେଶ୍ବର: ବାଲେଶ୍ବର ଜିଲ୍ଲାରେ ପୁଣି ବନ୍ଦ ହୋଇଛି ଟିକାକରଣ। ଟିକା ଅଭାବରୁ ଜିଲ୍ଲାର ମୋଟ ୬୬ଟି ଯାକ କେନ୍ଦ୍ରରେ ଟିକାକରଣ ବନ୍ଦ ରହିଛି। ଚଳିତ ମାସ ପହିଲାରେ ମିଳିଥିବା ମାତ୍ର ୭ ହଜାର ୮୫୦ ଡ଼ୋଜ୍‌ ଶେଷ ହେବା ପରେ ବନ୍ଦ ରହିଛି ଟିକାକରଣ।

ପୂର୍ବରୁ ଗତ ମାସ ଶେଷ ସପ୍ତାହରେ ୪ ଦିନ ପାଇଁ ଟିକାକରଣ ବନ୍ଦ ରହିଥିଲା। କେବେ ଆସିବ ଟିକା, ସେନେଇ ଅନିଶ୍ଚିତତା ଲାଗି ରହିଥିବା ବେଳେ ଏହାକୁ ନେଇ ହିତାଧିକାରୀଙ୍କ ମଧ୍ୟରେ ଦେଖିବାକୁ ମିଳିଛି ଅସନ୍ତୋଷ।

ଉଲ୍ଲେଖଯୋଗ୍ୟ, ରାଜ୍ୟରେ ତୃତୀୟ ପର୍ଯ୍ୟାୟ ଟିକାକରଣ ଆଜିଠୁ ଆରମ୍ଭ ହୋଇଛି। ଏହି ପର୍ଯ୍ୟାୟରେ ୪୫ ବର୍ଷରୁ ଅଧିକ ବ୍ୟକ୍ତିଙ୍କ ସହ ୧୮ ରୁ ୪୪ ବର୍ଷ ବୟସ୍କଙ୍କୁ ଟିକା ଦିଆଯିବ । ଟିକାଦାନରେ ନିଜ ନାଁ ପଞ୍ଜିକରଣ କରିବା ପାଇଁ ସମସ୍ତ ଜିଲ୍ଲାରେ ସ୍ଲଟ ବୁକିଂ ବି ଆରମ୍ଭ ହୋଇଛି। ସଂକ୍ରମଣକୁ ରୋକିବାକୁ ଗତ ଶନିବାର ଠାରୁ ଏହି ସ୍ଲଟ ବୁକିଂ ଆରମ୍ଭ ହୋଇଥିଲା।

ସେହିପରି ଟିକା ନେବାକୁ ଥିବା ବ୍ୟକ୍ତି ନିଜ ସହ ଆଧାରକାର୍ଡ ନେବା ବାଧ୍ୟତାମୂଳକ କରାଯାଇଛି । ତେବେ ଭୁବନେଶ୍ବରେ ଟିକା କରଣ ପାଇଁ ୨୯ଟି ଟିକାକରଣ କେନ୍ଦ୍ରର ବ୍ୟବସ୍ଥା କରାଯାଇଛି ।

ବଢୁଛି ସଂକ୍ରମଣ; ସାରା ଦେଶରେ ଲାଗୁ ହୋଇପାରେ ଲକଡାଉନ କଟକଣା

ନୂଆଦିଲ୍ଲୀ: ସାରା ଦେଶରେ ଲାଗୁ ହୋଇପାରେ ଲକଡାଉନ କଟକଣା। କରୋନାର ଦ୍ବିତୀୟ ଲହରୀରେ ସଂକ୍ରମିତଙ୍କ ସଂଖ୍ୟା ବଢୁଥିବା ବେଳେ, କେନ୍ଦ୍ର ଓ ରାଜ୍ୟ ସରକାର ଲକଡାଉନ ନେଇ ବିଚାର କରିବାକୁ ପରାମର୍ଶ ଦେଇଛନ୍ତି କୋର୍ଟ। ଲୋକଙ୍କ ହିତ ପାଇଁ ଲକଡାଉନ ଆପଣାଇବାକୁ ମତ ରଖିଛନ୍ତି ସୁପ୍ରିମକୋର୍ଟ।

ଏଥିସହ ଅକ୍ସିଜେନ ସମସ୍ୟା ଦୂର ପାଇଁ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ନ୍ୟାୟାଳୟ। ରବିବାର ରାତିରେ ଶୁଣାଣି କରି ଏହି ନିର୍ଦ୍ଦେଶ ଦେଇଛନ୍ତି କୋର୍ଟ। ସାମୁହିକ କାର୍ଯ୍ୟକ୍ରମ ଉପରେ ରୋକ ଲଗାଇବାକୁ ପରାମର୍ଶ ଦେଇଛନ୍ତି କୋର୍ଟ। କୋର୍ଟ ଆହୁରି ମଧ୍ୟ କହିଛନ୍ତି ଯେ, ସଂକ୍ରମିତଙ୍କ ପାଖରେ କୌଣସି ପରିଚୟ ପତ୍ର ନଥିଲେ ମଧ୍ୟ ମେଡିକାଲରେ ଭର୍ତ୍ତି ସହ ଜରୁରୀ ଔଷଧ ମଧ୍ୟ ଯୋଗାଇ ଦିଆଯାଉ। ଏ ସମ୍ବନ୍ଧରେ କେନ୍ଦ୍ରସରକାର ଦୁଇ ସପ୍ତାହ ମଧ୍ୟରେ ରାଷ୍ଟ୍ରନୀତି ଆଣିବାକୁ କହିଛନ୍ତି କୋର୍ଟ ।

Covid Lockdown In Delhi May Be Extended By A Week

ସେହିପରି କୋର୍ଟ ସ୍ପଷ୍ଟ କରିଛନ୍ତି ଯେଉଁ ପର୍ଯ୍ୟନ୍ତ ରାଷ୍ଟ୍ରନୀତି ନଆସିଛି, ସେବେଯାଏଁ ବିନା ପ୍ରମାଣପତ୍ରରେ ମେଡିକାଲରେ ଭର୍ତ୍ତି କରାଯାଉ। ଦିଲ୍ଲୀରେ ଅକ୍ସିଜେନ ଅଭାବ ଉପରେ ମଧ୍ୟ ଟିପ୍ପଣୀ ଦେଇଛନ୍ତି ସୁପ୍ରିମକୋର୍ଟ। ଆଜି ମଧ୍ୟରାତ୍ର ସୁଦ୍ଧା ଅକ୍ସିଜେନ ଅଭାବ ପୂରଣ କରିବାକୁ କେନ୍ଦ୍ରକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ।

ଦେଶରେ କାୟା ମେଲାଉଛି କରୋନା, ଦିନକରେ ୩ ଲକ୍ଷ ୬୮ ହଜାର ୧୪୭ ସଂକ୍ରମିତ

ନୂଆଦିଲ୍ଲୀ: ଦେଶରେ ଦିନକୁ ଦିନ କାୟା ମେଲାଉଛି କରୋନା। ଦ୍ରୁତ ଗତିରେ ମାଡ଼ିଚାଲିଛି ସଂକ୍ରମଣର ଦ୍ବିତୀୟ ଲହରି। ଗତ ୨୪ ଘଣ୍ଟାରେ ଦେଶରୁ ଚିହ୍ନଟ ହୋଇଛନ୍ତି ଆଉ ୩ ଲକ୍ଷ ୬୮ ହଜାର ୧୪୭ ସଂକ୍ରମିତ। ଏନେଇ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି ।

ସ୍ୱାସ୍ଥ୍ୟ  ବିଭାଗର ସୂଚନା ଅନୁଯାୟୀ, କରୋନା ସଂକ୍ରମଣରେ ୩ ହଜାର ୪୧୭ ଜଣଙ୍କ ଜୀବନ ନେଇଛି ମହାମାରୀ। ସେହିପରି ଗୋଟିଏ ଦିନରେ ସୁସ୍ଥ ହୋଇଛନ୍ତି ଆଉ ୩ ଲକ୍ଷ ୭୩୨ ସଂକ୍ରମିତ। ନୂଆ ଆକ୍ରାନ୍ତଙ୍କୁ ମିଶାଇ ଦେଶରେ ମୋଟ ଆକ୍ରାନ୍ତଙ୍କ ସଂଖ୍ୟା ୧ କୋଟି ୯୯ ଲକ୍ଷ ୨୫ ହଜାର ୬୦୪ରେ ପହଞ୍ଚିଥିବା ବେଳେ ସୁଦ୍ଧା ମୋଟ ୧ କୋଟି ୬୨ ଲକ୍ଷ ୯୩ ହଜାରରୁ ଅଧିକ ସୁସ୍ଥ ହୋଇଛନ୍ତି।

ସେହିପରି ଦେଶରେ ମୃତ୍ୟୁ ସଂଖ୍ୟା ୨ ଲକ୍ଷ ୧୮ ହଜାର ୯୫୯ରେ ପହଞ୍ଚିଥିବା ବେଳେ ୩୪ ଲକ୍ଷ ୧୩ ହଜାର ୬୪୨ ସକ୍ରିୟ ମାମଲା ରହିଛି। ସେହିପରି ୯ ରାଜ୍ୟରେ ସ୍ଥିତି ଉଦବେଗଜନକ ରହିଛି । ଦିଲ୍ଲୀ, ମହାରାଷ୍ଟ୍ର, ୟୁପି, କର୍ଣ୍ଣାଟକ, କେରଳ, ଗୁଜରାଟ ଓ ଛତିଶଗଡରେ ସଂକ୍ରମଣର ଭୟ ଢେର ଅଧିକ ରହିଛି । ପରିସ୍ଥିତିକୁ ଲକ୍ଷ୍ୟ କରି ଲକଡାଉନ୍, ନାଇଟ୍ କର୍ଫ୍ୟୁ ଓ ସପ୍ତାହାନ୍ତ ସଟଡାଉନ୍ ଲାଗୁ କରିଛନ୍ତି ପ୍ରଭାବିତ ରାଜ୍ୟ ସହ ଅନ୍ୟ ରାଜ୍ୟମାନେ । ହରିୟାଣାରେ ଆଜିଠୁ ଲାଗୁ ହେଉଛି ସାତ ଦିନିଆ ଲକଡାଉନ୍।

ରାଜ୍ୟରେ ଆରମ୍ଭ ସାମ୍ବାଦିକଙ୍କ ଟିକାକରଣ ପ୍ରକ୍ରିୟା

ଭୁବନେଶ୍ୱର: ସାମ୍ବାଦିକ ମାନଙ୍କୁ ରାଜ୍ୟ ସରକାର ସମ୍ମୁଖ ଯୋଦ୍ଧା ଭାବେ ଘୋଷଣା କରିବା ପରେ ସୋମବାର ଦିନ ସେମାନଙ୍କ ଟିକା କରଣ ପାଇଁ ଆରମ୍ଭ ହୋଇଛି ପ୍ରକ୍ରିୟା। ବିଏମସି ପକ୍ଷରୁ ସାମ୍ବାଦିକଙ୍କ ଟିକାକରଣ ପାଇଁ ସ୍ବତନ୍ତ୍ର କ୍ୟାମ୍ପ କରାଯାଇଛି। ଭୁବନେଶ୍ବର କଟକରୋଡ୍ ଯାତ୍ରୀ ନିବାସରେ ସାମ୍ବାଦିକଙ୍କୁ ଟିକାକରଣ ପାଇଁ ଆୟୋଜିତ ହୋଇଛି ସ୍ବତନ୍ତ୍ର କ୍ୟାମ୍ପ ।

ସୂଚନା ଅନୁଯାୟୀ, ସକାଳ ୧୧ ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ୧୮ ରୁ ୪୪ ବର୍ଷୀୟ ସାମ୍ବାଦିକଙ୍କୁ ଟିକା କରଣ କରାଯିବ। ସେହିପରି ୩ଟା ଠାରୁ ୫ଟା ପର୍ଯ୍ୟନ୍ତ ୪୫ ବର୍ଷରୁ ଉର୍ଦ୍ଧ୍ବ ବୟସ୍କ ସାମ୍ବାଦିକମାନକୁ ଟିକା ଦେବାର ବ୍ୟବସ୍ଥା କରାଯାଇଛି। ଏଥିପାଇଁ ସଂପୃକ୍ତ ସାମ୍ବାଦିକମାନେ ଆଧାର କାର୍ଡ଼ ସହ ସେମାନଙ୍କ ସାମ୍ବାଦିକ ପରିଚୟପତ୍ର ନେଇ ଟିକା ପାଇଁ ଅଫଲାଇନ୍ ରେଜିଷ୍ଟ୍ରେସନ କରିପାରିବେ । ଗତକାଲି ସାମ୍ବାଦିକମାନଙ୍କୁ ସମ୍ମାନ ଜଣାଇ କରୋନା ସମ୍ମୁଖ ଯୋଦ୍ଧାର ମାନ୍ୟତା ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।

ସେହିପରି ମୁଖ୍ୟମନ୍ତ୍ରୀଙ୍କ ଏହି ଘୋଷଣା ଦ୍ୱାରା ରାଜ୍ୟର ୬ ହଜାର ୯୪୪ ସାମ୍ବାଦିକ ଉପକୃତ ହେବେ। କରୋନା ଯୁଦ୍ଧରେ ସାମ୍ବାଦିକ ପ୍ରାଣ ହରାଇଲେ ତାଙ୍କ ପରିବାରକୁ ୧୫ଲକ୍ଷ ଟଙ୍କା ମିଳିବ। ଯାହାକୁ ପ୍ରଥମ ଲହର ବେଳେ ଘୋଷଣା କରିଥିଲେ ମୁଖ୍ୟମନ୍ତ୍ରୀ । ଏହାବାଦ ଏଣିକି ସାମ୍ବାଦିକଙ୍କୁ ଅଗ୍ରାଧିକାର ଭିତ୍ତିରେ ଅନ୍ୟ କୋଭିଡ୍ ଯୋଦ୍ଧାଙ୍କ ଭଳି ଟିକାକରଣ କରାଯିବ ବୋଲି କୁହାଯାଇଥିଲା।

ଅଧିକ ପଢନ୍ତୁ- ମେ ୩ରୁ ସାମ୍ବାଦିକଙ୍କୁ ଟିକା, ସମ୍ମୁଖ ଯୋଦ୍ଧା ଘୋଷଣା ପରେ BMCର ନିଷ୍ପତି