ସମ୍ୱଲପୁର: ଆହୁରି ଜୋରଦାର ହେବ କୋଭିଡ୍ କଟକଣା । ଆଜିଠୁ ପଶ୍ଚିମ ଓଡ଼ିଶାରେ ଆରମ୍ଭ ହୋଇଛି ୧୦ଦିନିଆ ସ୍ୱତନ୍ତ୍ର ଡ୍ରାଇଭ୍ । ଆସନ୍ତା ୧୬ତାରିଖ ଯାଏଁ ଚାଲିବ ସ୍ୱତନ୍ତ୍ର ଡ୍ରାଇଭ୍ । କୋଭିଡ କଟକଣା ଅନୁପାଳନ ପାଇଁ ଏହି ସ୍ୱତନ୍ତ୍ର ଅଭିଯାନ କରାଯାଉଛି । ଏ ନେଇ ସବୁ ଏସପି, ଡିସିପିଙ୍କୁ ପୋଲିସ ଡିଜିଙ୍କ ନିର୍ଦ୍ଦେଶ ରହିଛି । ମାସ୍କ, ସାମାଜିକ ଦୂରତା ଉପରେ ବିଶେଷ ଗୁରୁତ୍ୱ ଦିଆଯିବ । ଏଥିସହ ଅଭିଯାନ ନେଇ ଆଇନ ଶୃଙ୍ଖଳା ଡିଆଇଜିଙ୍କୁ ଦୈନିକ ରିପୋର୍ଟ ଦିଆଯିବ । ଏନେଇ ଗତକାଲି ମୁଖ୍ୟମନ୍ତ୍ରୀ ଏକ ଉଚ୍ଚସ୍ତରୀୟ ବୈଠକରେ ସମୀକ୍ଷା କରି ନିର୍ଦ୍ଦେଶ ଦେଇଥିଲେ ।
୨ଦିନ ମଧ୍ୟରେ ଟିକା ନ ଦେଲେ ରାଜ୍ୟରେ ବନ୍ଦ ହେବ ଟିକାକରଣ
ଭୁବନେଶ୍ୱର: ରାଜ୍ୟରେ ବନ୍ଦ ହୋଇପାରେ ଟିକାକରଣ । ୨ ଦିନ ମଧ୍ୟରେ କେନ୍ଦ୍ର ପକ୍ଷରୁ ରାଜ୍ୟକୁ ଟିକା ନଦେଲେ ରାଜ୍ୟରେ ଟିକାକରଣ ବନ୍ଦ ହେବ । ଆବଶ୍ୟକୀୟ ଟିକା କେନ୍ଦ୍ର ଦେଉନାହିଁ । ଫଳରେ ରାଜ୍ୟରେ ୧୫ଶହ ଟିକା କେନ୍ଦ୍ର ମଧ୍ୟରୁ ୪ଶହ ଟିକାକେନ୍ଦ୍ର ବନ୍ଦ ହେଲାଣି । ବର୍ତ୍ତମାନ ୧୧୦୩ଟି ଟିକାକରଣ କେନ୍ଦ୍ରରେ ଚାଲିଛି ଭ୍ୟାକ୍ସିନେସନ । ପ୍ରତିଦିନ ୨ ଲକ୍ଷ ଟିକାକରଣ ନିଷ୍ପତ୍ତି ନିଆଯାଇଥିଲା । କେନ୍ଦ୍ର ଟିକା ଦେଉନି । ରାଜ୍ୟ ୧୫ ଲକ୍ଷ ଟିକା ଦେବାକୁ କେନ୍ଦ୍ରକୁ ଚିଠି ଲେଖି ଦାବି କରିଥିବା ବେଳେ ବର୍ତ୍ତମାନ ୧ଲକ୍ଷ ୭୩ ହଜାର ଟିକା ମହଜୁଦ ଅଛି । କାଲି ଆସିଥିଲା ୩ ଲକ୍ଷ ୩୯ ହଜାର ଟିକା , ତାକୁ ବାଣ୍ଟି ଦିଆଯାଇଛି । ଧାର୍ଯ୍ୟ ଲକ୍ଷ ପୂରଣ ହେଉନଥିବା ପରିବାର କଲ୍ୟାଣ ନିର୍ଦ୍ଦେଶକ ବିଜୟ ପାଣିଗ୍ରାହୀ କହିଛନ୍ତି ।
ଏଥିସହିତ ପଢ଼ନ୍ତୁ: ଦେଶରେ ରେକର୍ଡ ସଂଖ୍ୟକ କରୋନା ସଂକ୍ରମିତ ଚିହ୍ନଟ
ଫାସଟ୍ୟାଗକୁ ନେଇ ଆପଣଙ୍କ ମନରେ ପ୍ରଶ୍ନ ଆଶୁଛି କି ? ତାହାଲେ ଏଠାରେ ଉତ୍ତର ପଢ଼ନ୍ତୁ
ନୂଆଦିଲ୍ଲୀ: ବର୍ତ୍ତମାନ କାରରେ ଯାତ୍ରା କରିବା ସମୟରେ ସମସ୍ତଙ୍କ ପାଇଁ ଫାସଟ୍ୟାଗ୍ ବାଧ୍ୟତାମୂଳକ। ଟୋଲ ଉପରେ ନଗଦ ଦେୟ ବନ୍ଦ ହେବା ପରେ, ବର୍ତ୍ତମାନ ପ୍ରତ୍ୟେକ ଗାଡ଼ିର ଆଗ ଗ୍ଲାସରେ ଲାଗିଥିବା ଏହି କାର୍ଡ ହେଉଛି ସଡକ ଟ୍ୟାକ୍ସ ଦେବାର ମୁଖ୍ୟ ଉପକରଣ। ତେବେ ଏବେ ପର୍ଯ୍ୟନ୍ତ ଫାସଟ୍ୟାଗ୍କୁ ନେଇ ଲୋକଙ୍କ ମନରେ ଅନେକ ପ୍ରଶ୍ନ ଅସମାହିତ ହୋଇ ରହିଛି। ଉଦାହରଣ ସ୍ୱରୂପ, ଏହାକୁ କିପରି ରିଚାର୍ଜ କରାଯିବ ଏବଂ ଯଦି କାରରେ ଫାସଟ୍ୟାଗ୍ ନାହିଁ ତେବେ କ’ଣ ହେବ ?
ଆପଣଙ୍କ ମନରେ ଥିବା ପ୍ରଶ୍ନର ସମାଧାନ ପୂର୍ବରୁ ପ୍ରଥମେ ଜାଣିବା ଏହି ଫାସଟ୍ୟାଗ୍ କ’ଣ ? ଏହା ଏକ ଇଲେକ୍ଟ୍ରୋନିକ୍ ଟୋଲ୍ ସଂଗ୍ରହ ଟେକ୍ନିକ, ଯାହା ଜାତୀୟ ରାଜପଥର ଟୋଲ୍ ପ୍ଲାଜାରେ କାମରେ ଆସେ। ଟୋଲ୍ ପ୍ଲାଜାରେ ଥିବା ସେନ୍ସରଗୁଡ଼ିକ ଏହାକୁ ସ୍କାନ୍ କରି ଆକାଉଣ୍ଟରୁ ନିର୍ଦ୍ଦିଷ୍ଟ ପରିମାଣ ରୋଡ ଟ୍ୟାକ୍ସ ନେଇଥାଏ। ଏହି ଡିଭାଇସ୍ରେ ରେଡିଓ ଫ୍ରିକ୍ୱେନ୍ସି ଆଇଡେଣ୍ଟିଫିକେସନ ଟେକ୍ନୋଲୋଜିକୁ ବ୍ୟବହାର କରାଯାଇଛି । ଯାହାକି ବହୁତ ଶକ୍ତିଶାଳୀ।
ତେବେ ଏହି ଫାସଟାଗ ଆପଣ କେମିତି ପାଇବେ ବୋଲି ଭାବୁଥିବେ। ଆପଣ ପେଟିଏମ୍ କିମ୍ବା ଆପଣଙ୍କ ବ୍ୟାଙ୍କ୍ ସହିତ ଯୋଗାଯୋଗ କରି ଘରୁ ଆପଣଙ୍କ ଫାସଟ୍ୟାଗ୍ ପାଇପାରିବେ। ଯଦି ଆପଣ ଏହା କରିବାକୁ ଚାହୁଁନାହାଁନ୍ତି, ତେବେ ଯେକୌଣସି ଟୋଲରେ ଆପଣ ଆପଣଙ୍କର RC ଏବଂ ମୋବାଇଲ୍ ନମ୍ବର ଉପରେ ଆଧାର କରି ଫାସଟ୍ୟାଗ୍ ପାଇପାରିବେ, ଯାହା ତୁରନ୍ତ କାମ ଆରମ୍ଭ କରେ।
ଫାସଟ୍ୟାଗ୍ରେ ଆପଣଙ୍କୁ ମୋବାଇଲ ଭଳି ରିଚାର୍ଜ କରିବାକୁ ପଡ଼ିବ ନାହିଁ। କାରଣ ଏହା ସିଧାସଳଖ ଆପଣଙ୍କ ଆକାଉଣ୍ଟ ସହିତ ଲିଙ୍କ ଥିବାରୁ ସେଥିରୁ ଟଙ୍କା କଟିଥାଏ। ପ୍ରତ୍ୟେକ ଥର ଟୋଲ ଅତିକ୍ରମ କରିବା ସମୟରେ ଫାସଟ୍ୟାଗ୍କୁ ସ୍କାନ କରି ଟଙ୍କା କଟାଯାଇଥାଏ। ଯଦି ଆପଣଙ୍କୁ ଫାସଟାଗ ପେଟିଏମ୍ କିମ୍ବା ଗୁଗୁଲ୍ ପେ ଇତ୍ୟାଦି ସହିତ ରିଚାର୍ଜ କରିବାକୁ ପଡିବ ତେବେ ୱାଲେଟରେ ଉପଲବ୍ଧ ବାଲାନ୍ସ ରହିବା ଉଚିତ, ନଚେତ୍ କାର୍ଡ କାମ କରିବ ନାହିଁ।
ଆମେ ଆପଣଙ୍କୁ କହିଦେବାକୁ ଚାହୁଁକି ଗୋଟିଏ ଫାସଟ୍ୟାଗ୍ କେବଳ ଗୋଟିଏ ଗାଡିରେ ହିଁ କାମ କରିପାରିବ। ପଞ୍ଜିକୃତ ହୋଇଥିବା ଫାଷ୍ଟଟ୍ୟାଗକୁ ଅନ୍ୟ ଗାଡ଼ିରେ ଆପଣ ବ୍ୟବହାର କରିପାରିବେ ନାହିଁ । ଯଦି ଆପଣଙ୍କର ଫାସଟ୍ୟାଗ୍ କେଉଁଠି ହଜିଯାଏ ତେବେ ଆପଣ ଦ୍ୱିତୀୟ ଫାସଟ୍ୟାଗ୍ ନେଇପାରିବେ । ଏବଂ ଦ୍ୱିତୀୟ ଫାସଟ୍ୟାଗ୍ ସକ୍ରିୟ ହେବା ମାତ୍ରେ ପ୍ରଥମଟି ସ୍ୱୟଂଚାଳିତ ଭାବରେ ନିଷ୍କ୍ରିୟ ହୋଇଯିବ।
ଯଦି ଆପଣଙ୍କର କାରରେ ଫାସଟ୍ୟାଗ୍ ନାହିଁ, ତେବେ ଆପଣଙ୍କୁ ଅଧିକ ଜରିମାନା ଦେବାକୁ ପଡ଼ିବ । ତେଣୁ ମନେରଖନ୍ତୁ ଯେ ଫାସଟ୍ୟାଗ୍ ବିନା ରାଜପଥରେ ଯିବା ଆପଣଙ୍କ ପକେଟ ଉପରେ ଭାରି ପଡିପାରେ ।
IPL T20ରେ ମିଡିଲ ଅର୍ଡରରେ ବ୍ୟାଟିଂ ବହୁତ ଗୁରୁତ୍ୱପୂର୍ଣ୍ଣ, ଜାଣନ୍ତୁ କେଉଁ ଦଳର ମିଡିଲ ଅର୍ଡର ବହୁତ ଶକ୍ତ
ନୂଆଦିଲ୍ଲୀ: ଗତବର୍ଷ IPL ସିଜିନରେ ମୁମ୍ବାଇ ଇଣ୍ଡିଆନ୍ସ ଟାଇଟଲ ହାସଲ କରିଥିଲା। ୨୦୦୮ରୁ ୨୦୨୦ ଭିତରେ ମୋଟ ୫ ଥର ଟାଇଟଲ ହାସଲ କରିଛି ମୁମ୍ବାଇ ଇଣ୍ଡିଆନ୍ସ । ଯଦି କହିବା ସବୁଠାରୁ ଅଧିକ ଥର ଜିତିଛି ଏହି ଦଳ। ଫ୍ୟାନ ଫଲୋଇଁରେ ମଧ୍ୟ ଆଗରେ ରହିଛି ମୁମ୍ବାଇ ଇଣ୍ଡିଆନ୍ସ। ଆଉ ଏବେ ୨୦୨୧ ର ଟାଇଟଲ ହାସଲ କରିବାକୁ ଲକ୍ଷ୍ୟ ରଖିଛି ମୁମ୍ବାଇ। ଏଥିପାଇଁ ରୋହିତ ଶର୍ମାଙ୍କ ଟିମ୍ ପୁରା ପ୍ରସ୍ତୁତ ରହିଛି। ସେପଟେ ସୁନୀଲ ଗାଭାସ୍କରଙ୍କ ସମେତ ଅନେକ ମହାନ ଖେଳାଳି ମୁମ୍ବାଇକୁ ସେମାନଙ୍କର ସବୁଠାରୁ ପ୍ରିୟ ଦଳ ଭାବରେ କହିଛନ୍ତି। ଏହି ଦଳକୁ ପସନ୍ଦ କରିବାର ଅନେକ କାରଣ ରହିଛି। ଏହାର ଏକ ମୁଖ୍ୟ କାରଣ ହେଉଛି ମିଡିଲ ଓଭର ରେ ଭଲ ଖେଳର ପ୍ରଦର୍ଶନ। ଏହି ଦଳରେ ୭ରୁ ୧୬ ଓଭର ମଧ୍ୟରେ ସବୁବେଳେ ଭଲ ବ୍ୟାଟିଂର ପ୍ରଦର୍ଶନ ରହିଆସୁଛି। ସେଥିଲାଗି ଏହି ଦଳକୁ ଅନେକ ମହାନ ଖେଳାଳି ପସନ୍ଦ କରନ୍ତି। IPL ଲିଗ୍ର ପ୍ରଥମ ମ୍ୟାଚ୍ ୯ ଏପ୍ରିଲରୁ ଆରମ୍ଭ ହେବାକୁ ଯାଉଥିବା ବେଳେ ମୁହାଁ ମୁହିଁ ହେବେ ମୁମ୍ବାଇ ଏବଂ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର।
ଖେଳ କଥା ଉଠିଲେ ଆଗ କେଉଁ ଟିମର କେତେ ରନରେଟ ରହିଛି ତାହା ଦେଖାଯାଏ। କେଉଁ ଓଭରରେ କାହାର କେତେ ରନରେଟ ଥାଏ ସମସ୍ତେ ତର୍ଜମା କରନ୍ତି ତେବେ IPLର ପୂର୍ବ ସିଜିନ ୟୁଏଇରେ ଖେଳା ଯାଇଥିଲା। ସେହି ମ୍ୟାଚ୍ରେ ଯଦି ଆମେ ମିଡିଲ ଓଭରରେ ରହିଥିବା ରନରେଟକୁ ୮ଟି ଦଳ ମଧ୍ୟରେ ତୁଳନା କରିବା ତେବେ ମୁମ୍ବାଇ ଇଣ୍ଡିଆନ୍ସ ସବୁଠାରୁ ଆଗରେ ରହିବ। କାରଣ ମୁମ୍ବାଇରେ ଇଶାନ କିଶନ, କିରନ ପୋଲାର୍ଡ ଏବଂ ହାର୍ଦ୍ଦିକ ପାଣ୍ଡ୍ୟାଙ୍କ ଭଳି ବ୍ୟାଟ୍ସମ୍ୟାନ୍ ଅଛନ୍ତି। ଅନ୍ୟପକ୍ଷରେ, ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ପ୍ରଦର୍ଶନ ଏହି ସମୟ ମଧ୍ୟରେ ସବୁଠାରୁ ଖରାପ ଥିଲା। ଆଉ ଏହି କାରଣରୁ, ଦଳ ଏଥର ନିଲାମରେ ଗ୍ଲେନ୍ ମ୍ୟାକ୍ସୱେଲଙ୍କୁ କିଣିଛି । ଯାହା ଦ୍ୱାରା ସେମାନେ ରନ୍ ହାରାହାରି ବୃଦ୍ଧି କରିପାରିବେ।
ଗତ ସିଜନରେ ମୁମ୍ବାଇ ୧୫ ଟି ମ୍ୟାଚ୍ ଖେଳିବାର ସୁଯୋଗ ପାଇଥିଲା। ଏହି ଅବଧି ମଧ୍ୟରେ ଦଳ ମିଡିଲ ଅର୍ଡରରେ ପ୍ରାୟ ୮ ରନରେଟରେ ସ୍କୋର କରିଥିଲା। ସେହି ସମୟ ମଧ୍ୟରେ ଦଳର ଷ୍ଟ୍ରାଇକ୍ ରେଟ ପ୍ରାୟ ୩୬ ରହିଥିଲା । ଅନ୍ୟପକ୍ଷରେ ବେଙ୍ଗାଲୁରୁ ୬.୮ ରନରେଟରେ ସ୍କୋର କରିଥିବା ବେଳେ ଟ୍ରାଇକ୍ ଅର୍ଡର ରହିଥିଲା ୨୭ । ଅର୍ଥାତ୍ ମୁମ୍ବାଇ ପ୍ରତ୍ୟେକ ମ୍ୟାଚ୍ ମିଡିଲ ଓଭରରେ ୮୦ ରନ ସଂଗ୍ରହ କରୁଥିବା ବେଳେ ବେଙ୍ଗାଲୁରୁ ୬୮ ରନ୍ ସଂଗ୍ରହ କରିଥିଲା। ଉଭୟଙ୍କ ମଧ୍ୟରେ ମାତ୍ର ୧୨ ରନ୍ର ପାର୍ଥକ୍ୟ ଥିଲା।
ଏହି ରନରେଟକୁ ଦେଖିଲେ ପଞ୍ଜାବ ଦ୍ୱିତୀୟ ଏବଂ ଦିଲ୍ଲୀ ତୃତୀୟ ସ୍ଥାନରେ ରହିଛି। ପଞ୍ଜାବ ୭.୮ ରନରେଟରେ ସ୍କୋର କରିଥିବା ବେଳେ ଦିଲ୍ଲୀ କ୍ୟାପିଟାଲ ୭.୭, ରାଜସ୍ଥାନ ୭.୭ , ହାଇଦ୍ରାବାଦ ୭.୩, କୋଲକାତା ୭.୧ ଏବଂ ଚେନ୍ନାଇ ୭.୧ ରନରେଟରରେ ସ୍କୋର କରିଛି। ଗତ ସିଜନରେ ଦିଲ୍ଲୀ ଏବଂ ହାଇଦ୍ରାବାଦ ସର୍ବାଧିକ ୧୬-୧୬ ମ୍ୟାଚ ଖେଳିବାର ସୁଯୋଗ ପାଇଥିଲେ ।
ଗତ ସିଜିନରେ ବହୁତ ବଡ଼ ବଡ଼ ସ୍କୋର ଦେଖିବାକୁ ମିଳିଥିଲା । ଏହା ପରେ ମଧ୍ୟ ପାୱାର ପ୍ଲେ ର ପ୍ରଥମ ୬ ଓଭରରେ ରାଜସ୍ଥାନ ରୟାଲ୍ସ ଫାଷ୍ଟ ବୋଲର ଜୋଫ୍ରା ଆର୍ଚର ଏବଂ ମୁମ୍ବାଇ ଇଣ୍ଡିଆନ୍ସ ଫାଷ୍ଟ ବୋଲର ଜସପ୍ରୀତ ବୁମ୍ରାଙ୍କ ପ୍ରଦର୍ଶନ ବହୁତ ଭଲ ରହିଥିଲା। ଜୋଫ୍ରା ଆର୍ଚର ୪.୩୫ ଇକୋନୋମି ସହିତ ପାୱାର ପ୍ଲେରେ ରନ୍ ଦେଇଥିଲେ । ସେହିପରି ବୁମ୍ରା ୫.୩୫ ଇକୋନୋମି ସହିତ ରନ୍ ଦେଇଥିଲେ । ଏହାରି ଭିତରେ ଅନ୍ୟ କୌଣସି ବୋଲରଙ୍କର ଇକୋନୋମି ୬ ତଳକୁ ରହିନାହିଁ।
IPLର ଅଧିକାଂଶ ସଦସ୍ୟ କରୋନା ସଂକ୍ରମିତ, ସ୍ଥଗିତ ରହିପାରେ ଏପ୍ରିଲ୍ ୯ରେ ହେବାକୁ ଥିବା ମ୍ୟାଚ୍
ନୂଆଦିଲ୍ଲୀ: ଆସନ୍ତା ୯ ଏପ୍ରିଲରୁ ବାଜିବ ଆପିଏଲ୍ ବିଗୁଲ। ଆଉ ମାତ୍ର ଦୁଇ ଦିନ ରହିଛି IPL ସିଜିନ ଆରମ୍ଭକୁ। ଏତିକି ବେଳେ କରୋନା କାୟାରେ ରହିଛି ପୁରା ଆଇପିଏଲ୍ । ଆଇପିଏଲ୍ ୨୦୨୧ ର ଉଦଘାଟନୀ ମ୍ୟାଚ୍ ମୁମ୍ବାଇ ଇଣ୍ଡିଆନ୍ସ ଏବଂ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ମଧ୍ୟରେ ଖେଳାଯିବ। ୧୪ ସିଜିନ ମ୍ୟାଚ୍ର ଟାଇଟଲ ହାତେଇବା ପାଇଁ ନେଟରେ ହେଉଛି ଜୋରଦାର ଅଭ୍ୟାସ। ଆଇପିଏଲ୍ ଫ୍ରାଞ୍ଚାଇଜ୍ କ୍ରମାଗତ ଭାବରେ ସେମାନଙ୍କର ଅଫିସିଆଲ୍ ସୋସିଆଲ୍ ମିଡିଆ ଆକାଉଣ୍ଟ୍ ସହିତ ଖେଳାଳିଙ୍କ ଅଭ୍ୟାସର ଫଟୋ ଏବଂ ଭିଡିଓ ସେୟାର କରୁଛନ୍ତି। କିନ୍ତୁ ଏପ୍ରିଲ ୯ ତାରିଖରେ ଆଇପିଏଲ ସିଜିନ ୧୪ ହେବ ନା ସ୍ଥଗିତ ରହିବ ତାହା ଏପର୍ଯ୍ୟନ୍ତ ଆଶଙ୍କା ମଧ୍ୟରେ ରହିଛି। କାରଣ ଏବେ ପାଞ୍ଚଟି ଆଇପିଏଲ୍ ଦଳର ସଦସ୍ୟ କରୋନା ଦ୍ୱାରା ସଂକ୍ରମିତ ହୋଇଥିବା ଜଣାପଡ଼ିଛି। ସମସ୍ତଙ୍କୁ ମିଶାଇ ମୋଟ ୧୪ ଜଣ ସଂକ୍ରମିତ ହୋଇଛନ୍ତି।
କରୋନା ଭାଇରସରେ ସଂକ୍ରମିତ ହୋଇଥିବା ଚଉଦ ଜଣ ସଦସ୍ୟଙ୍କ ମଧ୍ୟରେ ଜଣେ କ୍ୟାମେରାମ୍ୟାନ୍, ଡାଇରେକ୍ଟର, ପ୍ରଡ୍ୟୁସର, ଇଭିଏସ୍ ଅପରେଟର ଏବଂ ଭିଡିଓ ଏଡିଟର୍, ଅନେକ ଗ୍ରାଉଣ୍ଡ କର୍ମଚାରୀ, ଆସୋସିଏଟ ଷ୍ଟାଫ ମଧ୍ୟ କରୋନା ପଜିଟିଭ୍ ହୋଇଥିବା ଜଣାପଡ଼ିଛି। ପ୍ରସାରଣ ସଂସ୍ଥା ଷ୍ଟାର ଏବେ ତା କ୍ର୍ୟୁ ମାନଙ୍କୁ ନେଇ ଚିନ୍ତିତ ରହିଛି। ଯଦି ଆଇପିଏଲର ଗ୍ରାଉଣ୍ଡ-ଷ୍ଟାଫ୍ ଏବଂ ଇଭେଣ୍ଟ ମ୍ୟାନେଜମେଣ୍ଟ ଦଳ କରୋନାରେ ସଂକ୍ରମିତ ହେଉଛନ୍ତି ତେବେ ଷ୍ଟାର କ୍ର୍ୟୁ ମାନଙ୍କ ସହ ମଧ୍ୟ ସମାନ ଘଟଣା ଘଟିପାରେ। ଏଥିପାଇଁ ଷ୍ଟାର ବହୁତ ଚିନ୍ତିତ ବୋଲି ସୂଚନା ମିଳିଛି ।
ଉଦଘାଟନି ମ୍ୟାଚରେ ମୁମ୍ବାଇ ଇଣ୍ଡିଆନ୍ସ ଏବଂ ଆରସିବି ମଧ୍ୟରେ ଘମୋଘୋଟ ଯୁଦ୍ଧ ହେବାକୁ ଯାଉଛି । ଏହି ମ୍ୟାଚ୍ ଚେନ୍ନାଇର ଏମ୍ଏ ଚିଦାମ୍ବରମ ଷ୍ଟାଡିୟମରେ ଶୁକ୍ରବାର ଖେଳାଯିବ। କିନ୍ତୁ ସବୁଠାରୁ ଚିନ୍ତାର କାରଣ ପାଲଟିଛି ଚେନ୍ନାଇର କରୋନା ସଂକ୍ରମଣ। ଚେନ୍ନାଇରେ ଏପ୍ରିଲ ୭ରେ ୩ ହଜାର ୬୪୫ ଜଣ ନୂଆ କରୋନା ସଂକ୍ରମିତ ଚିହ୍ନଟ ହୋଇଥିବା ବେଳେ ୧୫ ଜଣଙ୍କର ମୃତ୍ୟୁ ହୋଇଛି। ଏବଂ ଚେନ୍ନାଇରେ କରୋନା ସଂଖ୍ୟା ୨୫ ହଜାର ଛୁଇଁଛି। ହେଲେ ଯେହେତୁ ଏମ୍ଏ ଚିଦାମ୍ବରମ ଷ୍ଟାଡିୟମରେ ପ୍ରଥମ ଲିଗ୍ ୪ଟି ଦଳକୁ ନେଇ ହେଉଛି , ସେଥିପାଇଁ ତାମିଲନାଡୁ କ୍ରିକେଟ ଆସୋସିଏସନ ପୁରା ପ୍ରସ୍ତୁତ ରହିଛି।
ସେପଟେ ଦିଲ୍ଲୀରେ ମଧ୍ୟ କରୋନା ସଂକ୍ରମଣ ମାଡ଼ିଚାଲିଛି। ସେଥିପାଇଁ ୨୮ରେ ହେବାକୁ ଥିବା ମ୍ୟାଚ ପାଇଁ ଦିଲ୍ଲୀ କ୍ରିକେଟ ଆସୋସିଏସନ ଏପ୍ରିଲ ୧୦ରୁ ଷ୍ଟାଡିୟମକୁ ସଟଡାଉନ କରିବାକୁ ଯାଉଛି। ଷ୍ଟାଡିୟମର କର୍ମଚାରୀ ମାନେ କ୍ୱାରେଣ୍ଟାଇନରେ ରହିବା ସହ ସେମାନେ କେବଳ ଦିଲ୍ଲୀ କ୍ରିକେଟ ଆସୋସିଏସନର ଗାଡ଼ି ବ୍ୟବହାର କରିବେ ବୋଲି ନିର୍ଦ୍ଦେଶ ଦିଆଯାଇଛି ।
ପୁଣି ବନ୍ଦ ହେବ AIIMS ଓପିଡି
ଭୁବନେଶ୍ୱର: ପୁଣି ବନ୍ଦ ହେବ ଏମ୍ସ ଓପିଡି । କରୋନା ସ୍ଥିତିକୁ ଦେଖି ଦିଲ୍ଲୀ ଏମସ ଓପିଡି ବନ୍ଦ କରିବାକୁ ନିଷ୍ପତ୍ତି ହୋଇଛି । ଗୁରୁବାରଠାରୁ ଓପିଡି ବନ୍ଦ କରାଯିବାକୁ ନିଷ୍ପତ୍ତି ନେଇଛନ୍ତି ମେଡିକାଲ କର୍ତ୍ତୃପକ୍ଷ । ଏବେ କେବଳ ଅନ୍ଲାଇନ୍ରେ ନାମ ପଞ୍ଜୀକୃତ କରିବେ ରୋଗୀ । ଅନଲାଇନ ନାମ ପଞ୍ଜୀକୃତ କରିବା ପରେ ଡାକ୍ତରଙ୍କୁ ଦେଖାଇପାରିବେ । ପ୍ରତ୍ୟେକ ବିଭାଗରେ ଦୈନିକ ୫୦ ରୋଗୀ ନାମ ରେଜିଷ୍ଟ୍ରେସନ କରିପାରିବେ । ଦିଲ୍ଲୀରେ ଗତ ୨୪ ଘଣ୍ଟାରେ ୫୧ ଶହ ନୂଆ କରୋନା ରୋଗୀ ଚିହ୍ନଟ ହୋଇଛନ୍ତି ।
ଏଥିସହିତ ପଢ଼ନ୍ତୁ: ପୁଣି ଭୁବନେଶ୍ୱର ରେଳ ଷ୍ଟେସନ୍ରୁ କରୋନା ସଂକ୍ରମିତ ଚିହ୍ନଟ
ପୁଣି ଭୁବନେଶ୍ୱର ରେଳ ଷ୍ଟେସନ୍ରୁ କରୋନା ସଂକ୍ରମିତ ଚିହ୍ନଟ
ଭୁବନେଶ୍ୱର: ଭୁବନେଶ୍ୱର ରେଳ ଷ୍ଟେସନରୁ ପୁଣି କରୋନା ସଂକ୍ରମିତ ଚିହ୍ନଟ । ଆଜି ସକାଳେ ଚିହ୍ନଟ 3ଜଣ ଯାତ୍ରୀ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଚିହ୍ନଟ ସମସ୍ତ ୩ଜଣ ଆକ୍ରାନ୍ତ ବେଙ୍ଗାଲୁରୁ ଫେରନ୍ତା । ସୂଚନା ଯୋଗ୍ୟ ଯ, ପୂର୍ବରୁ ମଧ୍ୟ ଭୁବନେଶ୍ୱର ରେଳ ଷ୍ଟେସନ୍ରୁ ୨ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ବିମାନବନ୍ଦରରୁ ମଧ୍ୟ ୧୦ ପଜିଟିଭ୍ ଚିହ୍ନଟ ହୋଇଥିଲେ । ରବିବାର ଅପରାହ୍ନ ୩ଟା ସୁଦ୍ଧା ୧୦ ଜଣ କରୋନା ପଜିଟିଭ ଚିହ୍ନଟ ଭୁବନେଶ୍ୱର ବିମାନ ବନ୍ଦରରୁ ଚିହ୍ନଟ ହୋଇଥିଲେ । ଏଯାବତ୍ ଭୁବନେଶ୍ୱର ବିମାନ ବନ୍ଦରରୁ ମୋଟ ୩୫ ଜଣ ଯାତ୍ରୀ ପଜିଟିଭ୍ ଚିହ୍ନଟ ହୋଇସାରିଲେଣି। ପଜିଟିଭ ଚିହ୍ନଟ ହୋଇଥିବା ସମସ୍ତ ଯାତ୍ରୀଙ୍କୁ କୋଭିଡ୍ ହସ୍ପିଟାଲରେ ଭର୍ତ୍ତି କରାଯାଇଛି । ବିମାନ ବନ୍ଦରରୁ ଚିହ୍ନଟ ସମସ୍ତ ଯାତ୍ରୀ ମହାରାଷ୍ଟ୍ରର ମୁମ୍ବାଇ ଓ ପୁଣେରୁ ଫେରିଛନ୍ତି ।