ଭୁବନେଶ୍ୱର: ଟୋଲ୍ ଟ୍ୟାକ୍ସ ଛାଡ଼ କଲେ ରାଜ୍ୟ ସରକାର । କରୋନା ମହାମାରୀ ବେଳେ ଟୋଲ ଟିକସ ଛାଡ଼ କରିଛନ୍ତି ସରକାର । ସଂକ୍ରମଣର ଭୟାବହତାକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନେଇଛନ୍ତି ସରକାର । ମେଡିକାଲ ଅକ୍ସିଜେନ ଟ୍ୟାଙ୍କର, ସିଲିଣ୍ଡର ପରିବହନ ଗାଡିକୁ ରାଜ୍ୟରେ ଥିବା କୌଣସି ଟୋଲ୍ ଗେଟ୍ରେ ଟ୍ୟାକ୍ସ ଦେବାକୁ ପଡ଼ିବନାହିଁ । ସୁବିଧାରେ ଏହି ସବୁ ସାମଗ୍ରୀ ନେବା ଆଣିବା ନେଇ ସରକାରଙ୍କ ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି । ଏନେଇ ଲେବର ଡିପାର୍ଟମେଣ୍ଟ ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି । ଜୁଲାଇ ୩୧ ପର୍ଯ୍ୟନ୍ତ ଏହି ଫି ଛାଡ କରାଯିବ । ଏନେଇ ଲେବର ଡିପାର୍ଟମେଣ୍ଟ ପକ୍ଷରୁ ଏ ନେଇ ବିଜ୍ଞପ୍ତି ଜରିଆରେ ସୂଚିତ କରାଯାଇଛି ।
ସ୍ୱାସ୍ଥ୍ୟ କର୍ମଚାରୀଙ୍କ ପରିବାରବର୍ଗଙ୍କୁ ଅଗ୍ରାଧିକାର ଭିତ୍ତିରେ କରୋନା ଟିକା ଦେବାକୁ ନିର୍ଦ୍ଦେଶ
ଭୁବନେଶ୍ୱର: ରାଜ୍ୟରେ ସ୍ବାସ୍ଥ୍ୟ କର୍ମଚାରୀଙ୍କୁ ଟିକାଦାନରେ ଦିଆଯାଉଛି ପ୍ରାଥମିକତା । ସେହି ଭିତ୍ତିରେ ସ୍ୱାସ୍ଥ୍ୟ କର୍ମଚାରୀଙ୍କ ପରିବାର ସଦସ୍ୟଙ୍କୁ ମିଳିବ ଟିକା । ଟିକାଦାନ ବ୍ୟବସ୍ଥା କରିବାକୁ ସବୁ ଜିଲ୍ଲାପାଳଙ୍କୁ ଚିଠି ଲେଖିଲେ ଏସିଏସ୍ ପ୍ରଦୀପ୍ତ କୁମାର ମହାପାତ୍ର । ମ୍ୟୁନିସିପାଲ କମିଶନର ଓ ସିଡିଏମଓମାନଙ୍କୁ ମଧ୍ୟ ଚିଠି ହୋଇଛି । ଏଯାଏଁ ୯୫ପ୍ରତିଶତ ସ୍ୱାସ୍ଥ୍ୟ କର୍ମଚାରୀଙ୍କୁ ଟିକା ଦିଆସରିଲାଣି । ସେମାନଙ୍କ ପରିବାର ସଦସ୍ୟଙ୍କୁ ମଧ୍ୟ ଟିକା ଦେବାକୁ ନିର୍ଦ୍ଦେଶ ଦିଆଯାଇଛି । ପୂର୍ବରୁ ଅଗ୍ରାଧିକାର ଭିତ୍ତିରେ ସ୍ୱାସ୍ଥ୍ୟକର୍ମଚାରୀଙ୍କୁ ପ୍ରଥମେ କରୋନା ଟିକା ଦିଆଯାଇଥିଲା । ପରେ ୬୦ ବର୍ଷରୁ ଊର୍ଦ୍ଧ୍ୱ ଏବଂ ଏହା ପରେ ୪୫ ବର୍ଷରୁ ଊର୍ଦ୍ଧ୍ୱ ଏବଂ ବର୍ତ୍ତମାନ ୧୮ ବର୍ଷରୁ ଊର୍ଦ୍ଧ୍ୱଙ୍କୁ କରୋନା ଟିକା ଦିଆଯାଉଛି । ଏଥିସହିତ ରାଜ୍ୟରେ ସାମ୍ୱାଦିକଙ୍କୁ କରୋନା ଯୋଦ୍ଧା ଭାବେ ଘୋଷଣା କରିବା ସହ ସେମାନଙ୍କୁ ମଧ୍ୟ ଅଗ୍ରାଧିକାର ଭିତ୍ତିରେ କରୋନା ଟିକା ଦିଆଯାଉଛି । ରାଜ୍ୟରେ ଟିକା ଅଭାବ ଦୂର କରିବା ନେଇ ରାଜ୍ୟ ସରକାର ଟିକା ନେଇ ଗ୍ଳୋବାଲ୍ ଟେଣ୍ଡର ମଧ୍ୟ ଆହ୍ୱାନ କରିଛନ୍ତି ।
ଏଥିସହିତ ପଢ଼ନ୍ତୁ: କୋଭିଡ୍ ଟିକା ସହ ଅନ୍ୟ ଉପକରଣ ଯୋଗାଇ ଦେବାକୁ କେନ୍ଦ୍ରକୁ ଚିଠି
କରୋନା ଟିକା ଉତ୍ପାଦନ ଲାଗି ଅଧିକ ଔଷଧ କମ୍ପାନୀଙ୍କୁ ଦିଆଯାଉ ମଞ୍ଜୁରୀ: ନିତିନ ଗଡକରୀ
ନୂଆଦିଲ୍ଲୀ: କରୋନା ଭ୍ୟାକ୍ସିନର ଉତ୍ପାଦନ ବଢାଇବା ଲାଗି ଅଧିକ ଔଷଧ କମ୍ପାନୀଙ୍କୁ ମଞ୍ଜୁରୀ ଦିଆଯାଉ ବୋଲି ମଙ୍ଗଳବାର ଦିନ ପରାମର୍ଶ ଦେଇଛନ୍ତି କେନ୍ଦ୍ର ମନ୍ତ୍ରୀ ନିତିନ ଗଡକରୀ। ଏକ ଭିଡ଼ିଓ କନଫରେନ୍ସିଂ ଜରିଆରେ ବିଶ୍ୱବିଦ୍ୟାଳୟର କୁଳପତିଙ୍କୁ ସମ୍ବୋଧନ କରିବା ଅବସରରେ ସେ କହିଛନ୍ତି।

ସେ ଆହୁରି ମଧ୍ୟ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏସମ୍ପର୍କରେ ଚିନ୍ତା କରିବା ଉଚିତ୍ । ଏଥିସହ ଦେଶରେ ଜୀବନ ରକ୍ଷାକାରୀ ଟିକାର ଉତ୍ପାଦନ ବଢାଇବା ଲାଗି ଅଧିକ ଔଷଧ କମ୍ପାନୀକୁ ମଞ୍ଜୁରୀ ପ୍ରଦାନ କରିବା ଲାଗି ଆଇନ୍ ମଧ୍ୟ ପ୍ରସ୍ତୁତ କରାଯିବ । ଏଥିରେ ଔଷଧର ପେଣ୍ଟେଟ ଧାରକକୁ ଅନ୍ୟ ଔଷଧ କମ୍ପାନୀ ଦ୍ୱାରା ୧୦% ରୟାଲଟି ଦେବାର ବ୍ୟବସ୍ଥା କରାଯିବା ଉଚିତ୍ ।
ଯଦି ଟିକା ଉତ୍ପାଦନ ଅନୁସାରେ ଚାହିଦା ଅଧିକ ବଢୁଛି ତାହେଲେ ସମସ୍ୟା ସୃଷ୍ଟି ହେବାର ଆଶଙ୍କା ରହିଛି । ଏଥିପାଇଁ ଗୋଟିଏ କମ୍ପାନୀ ବଦଳରେ ୧୦ରୁ ଅଧିକ କମ୍ପାନୀକୁ ଟିକା ଉତ୍ପାଦନରେ ଲଗାଇବା ଉଚିତ୍ ।

ଏହା ପୂର୍ବରୁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍ ମଧ୍ୟ ପ୍ରଧାନମନ୍ତ୍ରୀ ମୋଦିଙ୍କୁ ଏସମ୍ପର୍କରେ ଚିଠି ଲେଖିଥିଲେ । କେନ୍ଦ୍ର ପକ୍ଷରୁ ଟିକା ନିର୍ମାଣ କରୁଥିବା ଦୁଇ କମ୍ପାନୀର ଫର୍ମୁଲା ଅନ୍ୟ ଯୋଗ୍ୟ ଔଷଧ ନିର୍ମାତା କମ୍ପାନୀକୁ ଦିଆଯିବା ଉଚିତ୍ । ଯାହା ଫଳରେ ଟିକାର ଉତ୍ପାଦନ ବଢାଯାଇପାରିବ ।
ଛୋଟପିଲାଙ୍କୁ କରୋନା ହେଲେ ଜାଣିବେ କେମିତି ?
ଭାରତରେ ଭୟାନକ ମହାମାରୀ ସୃଷ୍ଟି କରୁଛି ନୂଆ ନୂଆ ଅଧ୍ୟାୟ । ଏହି ଅଧ୍ୟାୟର ପ୍ରତ୍ୟେକ ପୃଷ୍ଠାରେ ଲେଖାହେଉଛି ଅସଂଖ୍ୟ ମୃତ୍ୟୁର କାହାଣୀ । ଡାକ୍ତରଙ୍କ ଅନୁସାରେ ବର୍ତମାନ ଛୋଟ ପିଲାଙ୍କୁ ଆୟତ୍ତରେ ନେଲାଣି କରୋନା । ଆଉ ଛୋଟପିଲାଙ୍କ ଭିତରେ କରୋନା ମହାମାରୀ ଲକ୍ଷଣ ଜାଣିବା କାଠିକର ପାଠ ହୋଇପଡୁଛି । କିଛି ପିଲାଙ୍କ ଭିତରେ କରୋନା ଥାଇ ବି ଲକ୍ଷଣ ଜଣାପଡୁନି ତ ଆଉ କିଛି ପିଲାଙ୍କୁ ଭିନ୍ନ ଭିନ୍ନ ପ୍ରକାରର ଲକ୍ଷଣ ଦେଖାଯାଉଛି । ତେଣୁକରି ନିଜ ପିଲାଙ୍କୁ ମହାମାରୀଠୁ କେମିତି ବଂଚାଇବେ ତାହା ପରିବାର ଲୋକଙ୍କୁ ଚିନ୍ତାରେ ପକାଇଲାଣି । ହଁ ଏହି ମହାମାରୀର ଦ୍ୱିତୀୟ ଲହର ଏବେ ଜଙ୍ଗଲର ନିଆଁ ଭଳି ବ୍ୟାପୁଛି । ଆଉ ସେହି ନିଆଁରେ ବୟସ୍କ,ଯୁବଗୋଷ୍ଠୀ ଓ ଛୋଟପିଲା ସମସ୍ତଙ୍କୁ ଜାଳି ପାଉଁଶ କରିଦେଉଛି । ପ୍ରଥମ ଲହର ସମୟରେ ବିଶେଷ ଭାବେ ବୟସ୍କ ବ୍ୟକ୍ତିଙ୍କୁ ଆକ୍ରାନ୍ତ କରୁଥିଲା ଏହି ମହାମାରୀ । କିନ୍ତୁ ବର୍ତମାନ ନା ବୟସର ଅନ୍ତର ନା ହିଁ ପିଢିର ବ୍ୟବଧାନ । କିଛି ଦେଖୁନାହିଁ ଏହି ପ୍ରଳୟଙ୍କରୀ ମହାମାରୀ । ତେଣୁକରି ସାବଧାନ ହେଇଯାଆନ୍ତୁ ଓ ପିଲାଙ୍କ ଭିତରେ କେଉଁ ସବୁ ଲକ୍ଷଣ ଦେଖାଗଲେ ତୁରନ୍ତ ଡାକ୍ତରଙ୍କର ପରାମର୍ଶ ନେବେ ସେ ବିଷୟରେ ଜାଣିରଖନ୍ତୁ ।

ଛୋଟପିଲାଙ୍କୁ ଟାର୍ଗେଟ କରୁଥିବା କରୋନା ଭୟଙ୍କର ରୂପ ଧାରଣ କରିବା ପୂର୍ବରୁ ତାର ଚିହ୍ନଟ କରିବା ଆବଶ୍ୟକ । ଏଥିପାଇଁ କେନ୍ଦ୍ରସରକାର MyGovIndiaରେ କିଛି ନିର୍ଦ୍ଧିଷ୍ଟ ସୂଚନା ଜାରୀ କରିଛନ୍ତି । ସ୍ୱାସ୍ଥ୍ୟ ବିଶେଷଜ୍ଞଙ୍କ ଅନୁସାରେ,ସାମାନ୍ୟ ଜ୍ୱର,ଥଣ୍ଡା,କାଶ,ନିଶ୍ୱାସ ନେବାରେ ଅସୁବିଧା ହେଲେ,ଶରୀରର ମାଂସପେଶୀରେ କଷ୍ଟ ଅନୁଭବ ହେଲେ,ଦୁର୍ବଳ ଲାଗିଲେ ଓ ଖାଦ୍ୟର ସ୍ୱାଦ ବାରିନପାରିଲେ ଏହା କରୋନାର ପ୍ରମୁଖ ଲକ୍ଷଣ ବୋଲି ଜାଣିନେବେ । ହେଲେ ଏହିସବୁ ଲକ୍ଷଣ ବ୍ୟତୀତ କିଛି ପିଲାଙ୍କୁ ପେଟ ଓ ଛାତିଯନ୍ତ୍ରଣା ସହ ଜଡିତ ସମସ୍ୟା ମଧ୍ୟ ଦେଖାଯାଉଛି । ଆଉ ତାସହ କିଛି ଅସମାନ୍ୟ ଲକ୍ଷଣ ମଧ୍ୟ ପରିଲକ୍ଷିତ ହେଉଛି । ଏହିସବୁ ଲକ୍ଷଣ ଯେ କୈାଣସି ବୟସର ଛୋଟପିଲାଙ୍କ ଭିତରେ ଦେଖାଯିବାର ସମ୍ଭାବନା ରହିଛି ।
ଏକ ରିସର୍ଚ ମୁତାବିକ,ପିଲାମାନଙ୍କ ଭିତରେ ମଲ୍ଟି ସିଷ୍ଟମ ଇନଫ୍ଲାମେଣ୍ଟରୀ ନାମକ ଏକ ନୂଆ ସିଣ୍ଡ୍ରମ ଦେଖିବାକୁ ମିଳୁଛି ।

ଏହା କୈାଣସୀ ରୋଗ ନୁହେଁ ବରଂ କିଛି ଲକ୍ଷଣ ଉପରେ ହିଁ ଆଧାରିତ ଏକ ସିଣ୍ଡ୍ରୋମ । ସାଧାରଣତଃ ଯେଉଁ ପିଲା କୋଭିଡ୍-୧୯ ଦ୍ୱାରା ସଂକ୍ରମିତ ହେଉଛନ୍ତି ସେମାନଙ୍କ ଭିତରେ ଜ୍ୱର,ଥଣ୍ଡା ଓ ଶ୍ୱାସଜନିତ ଲକ୍ଷଣ ଦେଖିବାକୁ ମିଳୁଛି । କିନ୍ତୁ ଯେଉଁ ପିଲାମାନେ ମଲ୍ଟି ସିଷ୍ଟମ ଇନଫ୍ଲାମେଣ୍ଟରୀ ସିଣ୍ଡ୍ରୋମରେ ପିଡିତ ରହୁଛନ୍ତି ସେମାନଙ୍କୁ ଛାତିରେ କଷ୍ଟ,ରକ୍ତ ସଂଚାଳନରେ ବାଧକ,ପାଚନ ତନ୍ତ୍ରରେ ଅନିୟମିତତା ,ଶରୀର ଓ ଆଖିରେ ଇନଫେକସନ୍ ହେବା ଭଳି ଲକ୍ଷଣ ଦେଖାଯାଉଛି । ତେବେ ଯଦି ଛୋଟ ପିଲାଙ୍କ ଭିତରେ ମଲ୍ଟି ସିଷ୍ଟମ ଇନଫ୍ଲାମେଣ୍ଟରୀ ସିଣ୍ଡ୍ରୋମର ସାମାନ୍ୟ ଲକ୍ଷଣ ବି ଦେଖାଯାଉଛି ତେବେ ତୁରନ୍ତ ଡାକ୍ତରଙ୍କ ସହ ପରାମର୍ଶ କରନ୍ତୁ । ତାଛଡା ଯଦି ଆପଣଙ୍କ ପରିବାରରେ କେହି କରୋନା ଦ୍ୱାରା ସଂକ୍ରମିତ ହୋଇଥିଲେ ତେବେ ଘରେ ପିଲାମାନଙ୍କର ବି ଟେଷ୍ଟ ତୁରନ୍ତ କରାଇନିଅନ୍ତୁ । ହୁଏତ ସଂକ୍ରମଣ ପିଲାମାନଙ୍କ ଦେହକୁ ବି ବ୍ୟାପିଯାଇପାରେ । ଆଉ ଯଦି ପିଲାମାନଙ୍କ ଭିତରେ କେବଳ କାଶ,ଗଳାରେ ଯନ୍ତ୍ରଣା,ମାଂସପେଶୀରେ ଯନ୍ତ୍ରଣା ଭଳି ଲକ୍ଷଣ ଅଛି ତାହାଲେ ଯାଂଚ ନ କରି ପିଲାଙ୍କୁ ହୋମ ଆଇସୋଲେସନରେ ମଧ୍ୟ ରଖିପାରିବେ । ହେଲେ ପିଲାଙ୍କୁ ଯଦି ଜ୍ୱର ଆସୁଛି ତାହାଲେ ପ୍ରତି ୪ରୁ ୬ ଘଣ୍ଟା ବ୍ୟବଧାନରେ ପାରାସିଟାମଲ୍ ୧୦ରୁ ୧୫ ଏମ୍ ଜି ଦେଇପାରିବେ । ତାସହ ଗରମ ପାଣିରେ ଟିକିଏ ଲୁଣ ପକାଇ ଗାର୍ଗେଲିଙ୍ଗ କରିପାରିବେ । ତାଛଡା ପିଲାଙ୍କୁ ଘରେ ସୁଷମ ଖାଦ୍ୟ ଖାଇବାକୁ ଦେବେ ବାହାରର ଖାଦ୍ୟ ଓ ବହୁଳ ତେଲ ବ୍ୟବହୃତ ଖାଦ୍ୟକୁ ସଂମ୍ପୂର୍ଣ୍ଣ ରପେ ବନ୍ଦ କରିବେ । ଆପଣମାନେ ବର୍ତମାନର ହସ୍ପିଟାଲ,ଅକ୍ସିଜେନ ଅଭାବ ଓ ଆଇସିୟୁର ଅଭାବ ଭଳି ଦୃଶ୍ୟ ତ ଦେଖିବାକୁ ପାଉଛନ୍ତି । ତେଣୁକରି ଧ୍ୟାନ ରଖନ୍ତୁ ବିଶେଷ ଜରୁରୀ ନଥିଲେ ହସ୍ପିଟାଲ ଯାଆନ୍ତୁ ନାହିଁ । ବରଂ ଡାକ୍ତରଙ୍କ ସହ ପରାମର୍ଶ କରି ଘରେ ହିଁ ଚିକିତ୍ସିତ ହେବାକୁ ଚେଷ୍ଟାକରନ୍ତୁ ।
ବାତ୍ୟା ତାଉତେର ତାଣ୍ଡବ : ମୁମ୍ବାଇ ତଟରୁ ୧୪ ମୃତଦେହ ଉଦ୍ଧାର, ଗୁଜୁରାଟରେ ୩୪ ମୃତ
ମୁମ୍ବାଇ/ଅହମ୍ମଦାବାଦ: ବାତ୍ୟା ତାଉତେ କାରଣରୁ ମୁମ୍ବାଇରେ ୧୪ ଜଣଙ୍କ ଜୀବନ ଯାଇଛି । ଆରବ ସାଗରରୁ ଏହି ୧୪ ଜଣଙ୍କ ଶବ ଉଦ୍ଧାର ହୋଇଛି । ବାତ୍ୟା ସମୟରେ ଏକ ନୌକା ପି-୩୫୦ ଡୁବିଯାଇଥିଲା । ସବୁ ମୃତକ ଏଥିରେ ସବାର ଥିଲେ । ଏହି ନୌକାରେ ମୋଟ ୨୭୩ ଜଣ ସବାର ଥିଲେ । ସେମାନଙ୍କ ମଧ୍ୟରୁ ୭୮ ଜଣ ନିଖୋଜ ଥିଲେ । ନିଖୋଜଙ୍କ ମଧ୍ୟରୁ ୧୪ ଜଣଙ୍କ ମୃତଦେହ ଉଦ୍ଧାର ହୋଇଛି । ବାକି ଲୋକଙ୍କ ତଲାସ ଅଭିଯାନ ଏବେ ମଧ୍ୟ ଜାରି ରହିଛି । ଅନ୍ୟପକ୍ଷରେ ଗୁଜୁରାଟରେ ତୋଫାନ କାରଣରୁ ମୃତକଙ୍କ ସଂଖ୍ୟା ୩୩ରେ ପହଂଚିଛି ।
ନୌସେନା ପକ୍ଷରୁ ବୁଧବାର ଦିନ ଜାରି ବୟାନରେ କୁହାଯାଇଛି ଯେ, ଖରାପ ପାଗ ବିରୋଧରେ ଲଢେଇ କରି ନୌସନିକ ପି-୩୫୦ରେ ସବାର ଥିବା ଯାତ୍ରୀଙ୍କ ମଧ୍ୟରୁ ୧୮୪ ଜଣଙ୍କୁ ଉଦ୍ଧାର କରିଛନ୍ତି । ଅନ୍ୟ ଦୁଇଟି ନୌକା ଓ ଅଏଲ ରିଗରେ ଥିବା ସମସ୍ତେ ସୁରକ୍ଷିତ ଅଛନ୍ତି ବୋଲି ନୌସେନା ପକ୍ଷରୁ କୁହାଯାଇଛି ।

ସୂଚନାଯୋଗ୍ୟ ଯେ, ଏହି ନୌକା ବାତ୍ୟା ତାଉତେ ଗୁଜୁରାଟ ଉପକୂଳରେ ମାଡ ହେବାର କେଇ ଘଣ୍ଟା ପୂର୍ବରୁ ମୁମ୍ବାଇ ପାଖରେ ଆରବ ସାଗରରେ ଫସି ଯାଇଥିଲା । ଆଇଏନଏସ କୋଚ୍ଚି ଓ ଆଇଏନଏସ କୋଲକାତା ନୌକାରେ ସବାର ଥିବା ବ୍ୟକ୍ତିଙ୍କୁ ନେଇ ମୁମ୍ବାଇ ବନ୍ଦରକୁ ଫେରୁଛି । ଅନ୍ୟପକ୍ଷରେ ଆଇଏନଏସ ତେଗ୍, ଆଇଏନସ ବେତବା, ଆଇଏନଏସ ବ୍ୟାସ, ପି୮୧ ବିମାନ ଓ ହେଲିକପ୍ଟରଙ୍କୁ ଉଦ୍ଧାର କାର୍ଯ୍ୟରେ ମୁତୟନ କରାଯାଇଛି ।
ଅମାନବୀୟ: ବିଲେଇକୁ ମାରି କୁକୁର ମୁହଁକୁ ଫିଙ୍ଗିଦେଲେ ଯୁବକ, ଗିରଫ କଲା ପୋଲିସ
ଭୁବନେଶ୍ୱର: ଛୁଆ ବିଲେଇକୁ ମାରି କୁକୁର ମୁହଁକୁ ଫିଙ୍ଗିବା ଅଭିଯୋଗରେ ଗିରଫ ହେଲେ ଭୁବନେଶ୍ବର ପ୍ରଶାନ୍ତ ବିହାର ଅଂଚଳର ମୁରଲୀଧର ବେହେରା । ଗତ ୧୩ ତାରିଖରେ ଛୁଆ ବିଲେଇକୁ ମାଡ଼ ମାରିବା ସହ ବୁଲା କୁକୁରଙ୍କ ମୁହଁକୁ ଫିଙ୍ଗିଥିଲେ ମୁରଲୀ । ସିସିଟିଭିରେ କଏଦ ହୋଇଥିଲା ଏପରି ଅମାନବୀୟ ଦୃଶ୍ୟ । ମୁରଲୀକୁ ଗିରଫ କଲା ଇନ୍ଫୋସିଟି ଥାନା ପୋଲିସ । ଘରେ ବିଲେଇ ପଶିବାରୁ ବିଲେଇକୁ ପିଟିବା ସହ ବଞ୍ଚିଥିବା ଅବସ୍ଥାରେ କୁକୁର ମୁହଁକୁ ଫିଙ୍ଗି ଦେଇଥିଲେ ମୁରଲୀ ।
ଏଥିସହିତ ପଢ଼ନ୍ତୁ: ୧୫ ଦିନ ମଧ୍ୟରେ ୧୯ ହଜାର ଶିଶୁ କରୋନାରେ ସଂକ୍ରମିତ
୧୫ ଦିନ ମଧ୍ୟରେ ୧୯ ହଜାର ଶିଶୁ କରୋନାରେ ସଂକ୍ରମିତ
ନୂଆଦିଲ୍ଲୀ: ତୃତୀୟ ଲହର ପୂର୍ବରୁ ଶିଶୁଙ୍କ ଉପରେ ଘନେଇଲାଣି ବିପଦ । ଦେଶର ବିଭିନ୍ନ ରାଜ୍ୟରେ ବଢୁଛି କରୋନା ଆକ୍ରାନ୍ତ ଶିଶୁଙ୍କ ସଂଖ୍ୟା । ଗତ ୧୫ ଦିନ ମଧ୍ୟରେ ଦେଶରେ ପ୍ରାୟ ୧୯ହଜାର ଶିଶୁ କରୋନା ଆକ୍ରାନ୍ତ ହୋଇଛନ୍ତି । ଏପ୍ରିଲ ପରଠାରୁ ଶିଶୁ ସଂକ୍ରମିତଙ୍କ ସଂଖ୍ୟା ବଢ଼ୁଛି । ଉତ୍ତରାଖଣ୍ଡ, ଦିଲ୍ଲୀ ଓ କର୍ଣ୍ଣାଟକରେ ଶିଶୁ ସଂକ୍ରମିତଙ୍କ ସଂଖ୍ୟା ବଢୁଥିବା ଦେଖାଯାଉଛି । ଗତ ୧୦ ଦିନ ମଧ୍ୟରେ ଉତ୍ତରାଖଣ୍ଡରେ ଏକ ହଜାରରୁ ଉର୍ଦ୍ଧ୍ବ ଶିଶୁ କରୋନା ପଜିଟିଭ୍ ହୋଇଛନ୍ତି । ସମସ୍ତ ଆକ୍ରାନ୍ତଙ୍କ ବୟସ ୯ବର୍ଷରୁ କମ୍ ହୋଇଥିବା ବେଳେ କେତେଜଣ ଗୁରୁତର ହୋଇ ହସ୍ପିଟାଲରେ ମଧ୍ୟ ଭର୍ତ୍ତି ହୋଇଛନ୍ତି । ଏପ୍ରିଲ ଦ୍ବିତୀୟ ସପ୍ତାହ ପରଠାରୁ ଉତ୍ତରାଖଣ୍ଡରେ ଶିଶୁ ସଂକ୍ରମଣ ବୃଦ୍ଧି ପାଇଛି । ଏପ୍ରିଲ ୧ରୁ ୧୬ ମଧ୍ୟରେ ୨୬୪ ଶିଶୁ ପଜିଟିଭ୍ ହୋଇଥିବା ବେଳେ ଏପ୍ରିଲ ୧୬ରୁ ୩୦ ମଧ୍ୟରେ ୧୦୫୩ ଜଣ ଶିଶୁ ସଂକ୍ରମିତ ହୋଇଛନ୍ତି । ମେ ୧ରୁ ୧୫ ମଧ୍ୟରେ ୧୬୧୮ ଶିଶୁଙ୍କ ଦେହରେ କରୋନା ଲକ୍ଷଣ ଦେଖାଯାଇଛି । ସେପଟେ ଦିଲ୍ଲୀରେ ୫ବର୍ଷରୁ କମ୍ ୨ ଶିଶୁଙ୍କର କରୋନାରେ ମୃତ୍ୟୁ ହୋଇଛି । କର୍ଣ୍ଣାଟକରେ ବି ଶିଶୁ ସଂକ୍ରମିତଙ୍କ ସଂଖ୍ୟା ବଢ଼ୁଥିବାରୁ ଚିନ୍ତା ବଢ଼ିଛି ।


