spot_img
Home Blog Page 5630

‘ରାଜୀବ ଗାନ୍ଧୀ ଖେଳରତ୍ନ’ ପାଇଁ ଦୌଡ଼ରାଣୀ ଦୂତୀ ଚାନ୍ଦଙ୍କ ନାଁ ସୁପାରିସ୍

ଭୁବନେଶ୍ୱର: ଜାତୀୟ କ୍ରୀଡ଼ା ପୁରସ୍କାର ପାଇଁ ରାଜ୍ୟ କ୍ରୀଡ଼ା ବିଭାଗର ସୁପାରିସ । ଦେଶର ସର୍ବୋଚ୍ଚ କ୍ରୀଡ଼ା ପୁରସ୍କାର ‘ରାଜୀବ ଗାନ୍ଧୀ ଖେଳରତ୍ନ’ ପାଇଁ ଦୌଡ଼ରାଣୀ ଦୂତୀ ଚାନ୍ଦଙ୍କ ନାଁ ସୁପାରିସ୍ କରିଛନ୍ତି ରାଜ୍ୟ ସରକାର । ଏହାସହ ପୁରୁଷ ହକି ଦଳର ଷ୍ଟାର୍ ଡିଫେଣ୍ଡର୍ ବୀରେନ୍ଦ୍ର ଲାକ୍ରାଙ୍କ ନାଁ ଅର୍ଜୁନ ପୁରସ୍କାର ପାଇଁ କେନ୍ଦ୍ର କ୍ରୀଡ଼ା ମନ୍ତ୍ରାଣାଳୟକୁ ସୁପାରିସ୍ କରାଯାଇଛି ।

ଏହାଛଡ଼ା ଦ୍ରୋଣାଚାର୍ଯ୍ୟ ପୁରସ୍କାର ପାଇଁ କୋଚ୍ କାଳୁ ଚୌଧୁରୀ ଏବଂ ଧ୍ୟାନଚାନ୍ଦ ପୁରସ୍କାର ପାଇଁ ପୂର୍ବତନ ଆଥଲେଟ୍ ଅନୁରାଧା ବିଶ୍ୱାଳଙ୍କ ନାଁ ସୁପାରିସ୍ କରିଛନ୍ତି ରାଜ୍ୟ ସରକାର । ଗତବର୍ଷ ରାଜ୍ୟ ସରକାର ଦୂତୀ ଓ ବୀରେନ୍ଦ୍ରଙ୍କ ନାଁ ଅର୍ଜୁନ ପୁରସ୍କାର ପାଇଁ ସୁପାରିସ୍ କରିଥିଲେ । ଦୂତୀଙ୍କୁ ଗତବର୍ଷ ଅର୍ଜୁନ ପୁରସ୍କାର ମିଳିଥିଲା । ବୀରେନ୍ଦ୍ର ଦ୍ୱିତୀୟ ଥର ପାଇଁ ଅଲିମ୍ପିକ୍ସ ଟିକଟ୍ ପାଇଛନ୍ତି । ଭାରତୀୟ ହକି ଟିମ୍‌ର ଉପ ଅଧିନାୟକ ନିଯୁକ୍ତ ହୋଇଛନ୍ତି ବୀରେନ୍ଦ୍ର ଲାକ୍ରା ।

ଭୁବନେଶ୍ୱର ରେଳ ଷ୍ଟେସନରୁ ଗଞ୍ଜେଇ ଜବତ, ୨ କିନ୍ନର ଗିରଫ

ଭୁବନେଶ୍ୱର: ଭୁବନେଶ୍ୱର ରେଲୱେ ଷ୍ଟେସନରୁ ଗଞ୍ଜେଇ ଜବତ ହୋଇଛି । କିନ୍ନର କରୁଥିଲେ ଗଞ୍ଜେଇ ବେପାର । ଟ୍ରେନ୍ ଯୋଗେ ଅହମଦାବାଦ ଗଞ୍ଜେଇ ଚାଲାଣ ବେଳେ କ୍ରାଇମବ୍ରାଞ୍ଚ ଓ ଭୁବନେଶ୍ୱର ଆରପିଏଫର ମିଳିତ ଚଢ଼ାଉ ବେଳେ ଧରା ପଡ଼ିଛନ୍ତି କିନ୍ନର । ପୁରୀ-ଗୁଜରାଟ ଗାନ୍ଧିଧାମ ଏକ୍ସପ୍ରେସରେ ଅହମଦାବାଦ ଗଞ୍ଜେଇ ଚାଲାଣ କରୁଥିଲେ ।

Two Kinner Arrested For Smugling Of Ganja Bhubaneswar By Train

ଭୁବନେଶ୍ୱର ରେଳ ଷ୍ଟେସନର ରେଲୱେ ମେଲ୍ ସର୍ଭିସ ଅଫିସ ସାମ୍ନାରୁ ୨ ଜଣ କିନ୍ନର ଗଞ୍ଜେଇ ସହ ଧରା ପଡ଼ିଛନ୍ତି । ସେମାନେ ହ୍ୟାଣ୍ଡବ୍ୟାଗ ଓ ସୁଟକେସରେ ଗଞ୍ଜେଇ ନେଉଥିଲେ । ଅଭିଯୁକ୍ତ ଦୁହେଁ ହେଲେ ଲକ୍ଷ୍ମୀଧର ମହାନ୍ତି ଓରଫ ଲିଜା ଏବଂ ଅନ୍ୟଜଣେ ବସନ୍ତ ସ୍ୱାଇଁ ଓରଫ ବାସନ୍ତୀ । ଦୁଇ ଜଣଙ୍କଠାରୁ ୧୫ କେଜିରୁ ଅଧିକ ଗଞ୍ଜେଇ ଜବତ ହୋଇଛି । ଜବତ ଗଞ୍ଜେଇର ଅନୁମାନିକ ମୂଲ୍ୟ ଦେଢ଼ ଲକ୍ଷ ଟଙ୍କା ହେବ ।

Two Kinner Arrested For Smugling Of Ganja Bhubaneswar By Train

ଦୁହେଁ ସୋମବାର ପ୍ରଶାନ୍ତି ଏକ୍ସପ୍ରେସରେ ବାଲୁଗାଁରୁ ଗଞ୍ଜେଇ ଆଣି ଭୁବନେଶ୍ୱର ଆସିଥିଲେ । ପରେ ଗାନ୍ଧୀଧାମ ଏକ୍ସପ୍ରେସରେ ସୋମବାର ରାତି ୯ଟାରେ ଭୁବନେଶ୍ୱର ଷ୍ଟେସନରୁ ଅହମଦାବାଦ ଅଭିମୁଖେ ଯାଇଥାନ୍ତେ । ତା’ପୂର୍ବରୁ ସୂଚନା ପାଇ ରାତି ୮ଟା ସମୟରେ ଗଞ୍ଜେଇ ସହ ଉଭୟଙ୍କୁ ଗିରଫ କରି କୋର୍ଟ ଚାଲାଣ କରା ଯାଇଛି ।

ସୁପ୍ରିମକୋର୍ଟଙ୍କ କଡ଼ା ନିର୍ଦ୍ଦେଶ, ଜୁଲାଇ ସୁଦ୍ଧା ଲାଗୁ କର ୱାନ୍ ନେସନ ୱାନ୍ ରାସନ କାର୍ଡ

ନୂଆଦିଲ୍ଲୀ: ମଙ୍ଗଳବାର ସୁପ୍ରିମକୋର୍ଟ ବଡ଼ ନିର୍ଦ୍ଦେଶ ଦେଇଛନ୍ତି । ଅଣସଙ୍ଗଠିତ କ୍ଷେତ୍ର ଶ୍ରମିକ ଓ ପ୍ରବାସୀ ଶ୍ରମିକଙ୍କ ପଞ୍ଜିକରଣ ପାଇଁ ଏନଆଇସି ସହଯୋଗରେ ଏକ ୱେବସାଇଟ୍ ପ୍ରସ୍ତୁତ ପାଇଁ କେନ୍ଦ୍ର ସରକାରଙ୍କୁ କହିଛନ୍ତି କୋର୍ଟ । ଏଥିସହ ୨୦୨୧ ଜୁଲାଇ ୩୧ ସୁଦ୍ଧା ସମସ୍ତ ଶ୍ରମିକଙ୍କ ପଞ୍ଜିକରଣ ସାରିବାକୁ କୋର୍ଟ କହିଛନ୍ତି ।

Supreme Court Says Implement One Nation One Ration Card Scheme By 31st July

କୋର୍ଟ କହିଛନ୍ତି, ଜୁଲାଇ ୨୧ ପୂର୍ବରୁ ପ୍ରବାସୀ ଶ୍ରମିକଙ୍କୁ ଶୁଖିଲା ଖାଦ୍ୟ ବିତରଣ ପାଇଁ ଯୋଜନା ଲାଗୁ କରାଯାଉ । ଉକ୍ତ ଯୋଜନା ମହାମାରୀ ସରିବା ଯାଏ ଜାରି ରଖାଯାଉ । ଏଥିସହ ସମସ୍ତ ରାଜ୍ୟରେ ୱାନ୍ ନେସନ ୱାନ୍ ରାସନ କାର୍ଡ ଲାଗୁ କରିବା ପାଇଁ ସୁପ୍ରିମକୋର୍ଟ କହିଛନ୍ତି ।

ଆନ୍ତଃରାଜ୍ୟ ପ୍ରବାସୀ ଶ୍ରମିକ ଆଇନ୍ ୧୯୭୯ ପ୍ରକାରେ ସମସ୍ତ ପ୍ରତିଷ୍ଠାନ ଓ ଠିକାଦାରଙ୍କୁ ପଞ୍ଜିକରଣ କରିବା ଲାଗି ନିର୍ଦ୍ଦେଶ ଦେଇଛନ୍ତି କୋର୍ଟ । ଶ୍ରମିକଙ୍କ ସଂଖ୍ୟା ଅଧିକ ଥିବା ସ୍ଥାନରେ ରାଜ୍ୟ ସରକାର କମ୍ୟୁନିଟି କିଚେନ୍ କରିବା ପାଇଁ କୋର୍ଟ କହିଛନ୍ତି । ଶ୍ରମିକଙ୍କ ପାଇଁ ଖାଦ୍ୟ ବ୍ୟବସ୍ଥା ମହାମାରୀ ସରିବା ଯାଏ ଜାରି ରଖିବାକୁ କହିଛନ୍ତି ସୁପ୍ରିମକୋର୍ଟ ।

ନବବଧୂକୁ କାନ୍ଧରେ ଧରି ନଦୀ ପାର କରାଇଲା ବର

କିଶନଗଞ୍ଜ: ସୋସିଆଲ ମିଡିଆରେ ଏକ ଭିଡିଓ ଦିନକୁ ଦିନ ଭାଇରାଲ ହେବାରେ ଲାଗିଛି । ଭିଡ଼ିଓଟିରେ ଜଣେ ବର ତାଙ୍କ ନବବଧୂଙ୍କୁ କାନ୍ଧରେ ନେଇ ନଦୀ ପାର ହେଉଥିବା ଦେଖିବାକୁ ମିଳିଛି। ଏହି ଘଟଣା ହେଉଛି ବିହାରର କିଶନଗଞ୍ଜ ଜିଲ୍ଲାର ।

ସୂଚନା ଅନୁସାରେ, କିଶନଗଞ୍ଜର ଦିଘଲବ୍ୟାଙ୍କ ବ୍ଲକ ଅଞ୍ଚଳର ସିଂଘୀମାରୀ କନକଇ ନଦୀର ପଲସା ଘାଟରୁ ଏହି ଭିଡିଓ ଅତ୍ୟନ୍ତ ଭାଇରାଲ ହେଉଛି । ଯେଉଁଥିରେ ଜଣେ ବର ତାଙ୍କ ନବବଧୂଙ୍କୁ କାନ୍ଧରେ ନେଇ ନଦୀ ପାର ହୋଇଥିବାର ନଜର ଆସିଛନ୍ତି। ଶନିବାର ଦିନ ଏହି ଶୋଭାଯାତ୍ରା ଲୋହାଗଡା ଗାଁରୁ ପଲସା ଗ୍ରାମକୁ ଯାଇଥିଲା। ଏବଂ ବିବାହ ସାରି ରବିବାର ଦିନ ଫେରୁଥିବାବେଳେ ଅଧା ନଦୀରେ ଡଙ୍ଗା ପାର ହେବା ପରେ ବର ତାଙ୍କ ନବ ବିବାହିତ କନ୍ୟାକୁ କାନ୍ଧରେ ନଦୀ ପାର ହୋଇ ଯାଉଥିଲେ, ଯାହ କେହି ଜଣେ କାମେରା କଏଦ କରିଦେଇଥିଲେ।

ଏହି ଭିଡିଓ ଭାଇରାଲ ହେବା ମାତ୍ରେ ଏହା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ସୂଚନା ଯୋଗ୍ୟ ଯେ, ଗଲେ ପଲସା ଏକ ସୀମାନ୍ତ ଗ୍ରାମ, ଏବଂ ଏଠାକୁ ଯିବାକୁ ହେଲେ କନକଇ ନଦୀ ପାର କରିବାକୁ ପଡ଼ିଥାଏ । ଲୋକେ ଏଠାରେ ପୋଲ ନ ହୋଇଥିବାରୁ ଲୋକମାନେ ଡଙ୍ଗାରେ ଯିବା ଆସିବା କରିଥାନ୍ତି ।

ଜୁଲାଇ ୫ରୁ ମାଟ୍ରିକ୍ ଅଫଲାଇନ୍ ପରୀକ୍ଷା ପାଇଁ ଆରମ୍ଭ ହେବ ଫର୍ମ ଫିଲଅପ୍

କଟକ: ମାଟ୍ରିକ ମୂଲ୍ୟାୟନରେ ହୋଇଛି କି ତ୍ରୁଟି ? ଏନେଇ ପ୍ରେସମିଟରେ ଉତ୍ତର ରଖିଛନ୍ତି ବୋର୍ଡ କର୍ତ୍ତୃପକ୍ଷ । ଶ୍ରେଣୀଗୃହ ପାଠପଢ଼ା ହୋଇ ନଥିବାରୁ ସେଥିପ୍ରତି ଧ୍ୟାନ ଦେଇ ପାଠ୍ୟକ୍ରମ କମା ଯାଇଥିଲା । ଶହେ ଦିନର ପାଠପଢ଼ା ପରେ ମେ ୩ ତାରିଖରେ ପରୀକ୍ଷା ହେବାର ଥିଲା । ଦ୍ୱନ୍ଦ୍ୱ ଦୂର ପାଇଁ ଅତିରିକ୍ତ କ୍ଲାସ କରାଯାଇଥିଲା । ପରୀକ୍ଷା ଦର୍ପଣ ନାଁରେ ଏକ ପ୍ରଶ୍ନ ପାର୍ଟନ ମଧ୍ୟ ଦିଆଯାଇଥିଲା । ୯୨ ଦିନ ପର୍ଯ୍ୟନ୍ତ ପାଠପଢ଼ା ପରେ କରୋନା ପାଇଁ ସ୍କୁଲ୍ ବନ୍ଦ କରାଯାଇଥିଲା ।

 Board Clarification On Matric Exams Cuttack

ଛାତ୍ରଛାତ୍ରୀଙ୍କ ଜୀବନର ସୁରକ୍ଷା ପାଇଁ ସରକାର ମାଟ୍ରିକ ପରୀକ୍ଷାକୁ ବାତିଲ୍ କରିବା ସହ ବିକଳ୍ପ ବ୍ୟବସ୍ଥା କରିବାକୁ ବୋର୍ଡ କହିଥିଲେ । ମାଧ୍ୟମିକ ଶିକ୍ଷା ପରିଷଦ ବିଚାରବିମର୍ଶ, ପରାମର୍ଶ ପରେ ବିକଳ୍ପ ଆସେସମେଣ୍ଟ ବ୍ୟବସ୍ଥା କରିଥିଲା । ଏହାକୁ ୱେବସାଇଟରେ ଦିଆଯାଇ ସବୁ ସ୍କୁଲର ପ୍ରଧାନଶିକ୍ଷକଙ୍କୁ ପଠା ଯାଇଥିଲା । ମେ ୭ ତାରିଖରେ ଉକ୍ତ ଗାଇଡଲାଇନକୁ ସାର୍ବଜନୀନ କରାଯାଇଥିଲା । ସେହି ଅନୁସାରେ, ନବମ ଓ ଦଶମ ଶ୍ରେଣୀର ମାର୍କକୁ ଫଳାଫଳ ମୂଲ୍ୟାୟନ କରାଯାଇଥିଲା ।

 Board Clarification On Matric Exams Cuttack

ସ୍କୁଲ୍ ମାନେ ମାର୍କ ଅପଲୋଡ୍ କରିବା ପରେ ମୂଲ୍ୟାୟନ ହୋଇଥିବା ବୋର୍ଡ କର୍ତ୍ତୃପକ୍ଷ କହିଛନ୍ତି । ପରୀକ୍ଷା ବାତିଲ୍ ପରେ ବୋର୍ଡ କର୍ତ୍ତୃପକ୍ଷ ଶିକ୍ଷାବିତ୍, ଡିଇଓ ଓ କୋର୍ କମିଟି ସହ ଆଲୋଚନା କରିଥିଲା । ନବମ ଶ୍ରେଣୀର ସର୍ବୋଚ୍ଚ ମାର୍କ ସହ ଦଶମର ୩ଟି ଅଭ୍ୟାସ ଟେଷ୍ଟର ୨ଟି ସର୍ବୋଚ୍ଚ ମାର୍କକୁ ନେଇ ଫଳ ପ୍ରକାଶିତ ହୋଇଛି । ଏହି ସବୁ ମାର୍କକୁ ସ୍କୁଲ୍ କର୍ତ୍ତୃପକ୍ଷ ଅପଲୋଡ୍ କରିଥିଲେ । ତାପରେ ବିଗତ ୪ ବର୍ଷର ଫଳାଫଳ ମଧ୍ୟ ଆନାଲିସିସ୍ କରାଯାଇଥିଲା । ସୁରୁଖୁରୁରେ ପିଲାଙ୍କ ରେଜଲ୍ଟ ପ୍ରକାଶ ନେଇ ବୋର୍ଡ ପଦକ୍ଷେପ ନେଇଥିଲା । ସିବିଏସଇ ଗୋଟିଏ ବର୍ଷ ମାର୍କ ନେଇଛି, ଆମେ ନେଇନୁ ବୋଲି କହିଛନ୍ତି ବୋର୍ଡର ଉପ ସଭାପତି ।

Board Clarification On Matric Exams Cuttack

ଯେଉଁମାନେ ପରୀକ୍ଷା ଫଳକୁ ନେଇ ଅସନ୍ତୁଷ୍ଟ ଅଛନ୍ତି ସେମାନେ ଫର୍ମ ଫିଲଅପ୍ କରି ଅଫଲାଇନ୍ ପରୀକ୍ଷା ଦେଇ ପାରିବେ । ଜୁଲାଇ ୫ରେ ଅଫଲାଇନ୍ ପରୀକ୍ଷା ପାଇଁ ଫର୍ମ ଫିଲଅପ୍ ନୋଟିଫିକେସନ୍ ହେବ । ଫର୍ମ ଫିଲଅପ୍ ପାଇଁ ୧୦ ଦିନ ଦିଆଯିବ । ଜୁଲାଇ ମାସରେ ହିଁ ଅଫଲାଇନ୍ ପରୀକ୍ଷା କରାଯିବ । ପରୀକ୍ଷାର ୧୫ ଦିନ ମଧ୍ୟରେ ହିଁ ରେଜଲ୍ଟ ବାହାରିବ । ସେହି ରେଜଲ୍ଟକୁ ଯୁକ୍ତ ୨ ପଢ଼ିବେ । ଅଫଲାଇନ୍ ପରୀକ୍ଷା ମାର୍କକୁ ଚୂଡ଼ାନ୍ତ ମାର୍କ ଧରାଯିବ ।

ଜମ୍ମୁ ବାୟୁସେନା ଷ୍ଟେସନରେ ଆକ୍ରମଣର ତଦନ୍ତ କରିବ NIA

ନୂଆଦିଲ୍ଲୀ: ଜମ୍ମୁ ଏୟାରଫୋର୍ସ ଷ୍ଟେସନରେ ରବିବାର ରାତିରେ ହୋଇଥିବା ଡ୍ରୋନ୍ ଆକ୍ରମଣର ତଦନ୍ତ ଭାର NIAକୁ ଦେଇଛି କେନ୍ଦ୍ର ଗୃହ ମନ୍ତ୍ରଣାଳୟ । ଏବେ ଏହି ପୂରା ମାମଲାର ତଦନ୍ତ ନ୍ୟାସନାଲ ଇନଭେଷ୍ଟିଗେସନ୍ ଏଜେନ୍ସି କରିବ । ଏନଆଇଏ ଜମ୍ମୁ-କାଶ୍ମୀର ପୋଲିସ ଠାରୁ ମାମଲାର ତଦନ୍ତ ବେଳେ ମିଳିଥିବା ଦସ୍ତାବିଜକୁ ଗ୍ରହଣ କରୁଛି । ଖୁବଶୀଘ୍ର ଏନଆଇଏ ମାମଲା ରୁଜୁ କରି ତଦନ୍ତ ଆରମ୍ଭ କରିବ ।

ଏହା ପୂର୍ବରୁ ସ୍ଥାନୀୟ ପୋଲିସ ଓ ବାୟୁ ସେନା ଅଧିକାରୀଙ୍କ ସହ ଏନଆଇଏ, ରାଷ୍ଟ୍ରୀୟ ସୁରକ୍ଷା ଗାର୍ଡ ସହିତ କେତେକ ସୁରକ୍ଷା ଏଜେନ୍ସି ଆତଙ୍କବାଦୀ ଆକ୍ରମଣ ନେଇ ଯାଞ୍ଚ କରିଥିଲେ । ତଦନ୍ତକାରୀ ଏଜେନ୍ସି ଆତଙ୍କବାଦୀ ଆକ୍ରମଣ ଦିଗକୁ ନେଇ ଯାଞ୍ଚ କରିଛନ୍ତି । ତେବେ ଡ୍ରୋନ୍ ଆକ୍ରମଣର ୪୮ ଘଣ୍ଟା ପରେ ମଧ୍ୟ କୌଣସି ଠୋସ୍ ପ୍ରମାଣ ମିଳିନାହିଁ । ଯାହା ପରେ ଏନଆଇଏକୁ ତଦନ୍ତ ଦାୟିତ୍ୱ ଦିଆଯାଇଛି ।

ରବିବାର ଜମ୍ମୁ-କାଶ୍ମୀର ଏୟାରବେସ୍ ଉପରେ ଡ୍ରୋନ୍ ସାହାଯ୍ୟରେ ଦୁଇ ଦୁଇଟି ଆକ୍ରମଣ କରାଯାଇଥିଲା । ବିସ୍ଫୋରଣରେ ଏକ କୋଠାର ଛାତ କ୍ଷତିଗ୍ରସ୍ତ ହୋଇଥିଲା । ସୋମବାର ୨ଗୋଟି ଡ୍ରୋନ୍ ଜମ୍ମୁର କାଳୁଚକ ମିଲିଟାରୀ ଷ୍ଟେସନ ନିକଟରେ ଦେଖିବାକୁ ମିଳିଥିଲା । ସେନାର ଫାୟାରିଂ ପରେ ଡ୍ରୋନ୍ ୨ଟି ଗାଏବ ହୋଇ ଯାଇଥିଲା ।

୧୦୩ଦିନ ପରେ ଦେଶରେ ୪୦ହଜାର ତଳେ ସଂକ୍ରମିତ ଚିହ୍ନଟ

ନୂଆଦିଲ୍ଲୀ: ଦେଶରେ ତଳମୁହାଁ କରୋନା ଗ୍ରାଫ୍ । ୧୦୩ଦିନ ପରେ ଦେଶରେ ୪୦ହଜାର ତଳେ ସଂକ୍ରମିତ ଚିହ୍ନଟ । ପଜିଟିଭ ସହ ମୃତ୍ୟୁସଂଖ୍ୟା ମଧ୍ୟ କମିଥିବା କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ସୂଚନା ମିଳିଛି । ଦିନକରେ ୩୭ହଜାର ୫୬୬ ସଂକ୍ରମିତ ଚିହ୍ନଟ ହୋଇଥିବା ବେଳେ ୯୦୭ଜଣଙ୍କ ଜୀବନ ନେଇଛି ଭାଇରସ୍  । ୨୪ ଘଣ୍ଟାରେ ୫୬ହଜାର ୯୯୪ ଆକ୍ରାନ୍ତ ସୁସ୍ଥ ହୋଇଛନ୍ତି ।

ଦେଶରେ ମୋଟ୍ କରୋନା ସଂକ୍ରମିତଙ୍କ ସଂଖ୍ୟା ୩ କୋଟି ୩ ଲକ୍ଷ ୧୬ ହଜାର ୮୯୭ । ମୋଟ୍ ସୁସ୍ଥ ହେଲେଣି ୨ କୋଟି ୯୩ ଲକ୍ଷ ୬୬ ହଜାର ୬୦୧ । ଆକ୍ଟିଭ କେସ୍ ୫ଲକ୍ଷ ୫୨ହଜାର ୬୫୯ ଥିବା ବେଳେ ମୋଟ୍ ମୃତ୍ୟୁସଂଖ୍ୟା ୩ଲକ୍ଷ ୯୭ହଜାର ୭୩୬ରେ ପହଞ୍ଚିଛି ।

ମହାରାଷ୍ଟ୍ରରେ କରୋନାର ୬,୭୨୭ ନୂଆ ମାମଲା ସାମ୍ନାକୁ ଆସିଥିବା ବେଳେ ମୃତ୍ୟୁ ସଂଖ୍ୟା ୧୦୧, ଏବଂ ସୁସ୍ଥତା ହାର ୧୦,୮୧୨ ରହିଛି । ଉତ୍ତରାଖଣ୍ଡରେ କରୋନା ସଂକ୍ରମଣର ୧୨୦ଟି ନୂଆ ମାମଲା ରେକର୍ଡ କରାଯାଇଛି ଏହାସହ ଆଉ ତିନି ଜଣଙ୍କର ମୃତ୍ୟୁ ହୋଇଛି । ସେହିପରି ଛତିଶଗଡର ୪୦୫ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ଝାଡଖଣ୍ଡରେ କୋଭିଡ -19ର ୮୧ଟି ନୂଆ ମାମଲା, ଆଉ ଗୋଟିଏ ମୃତ୍ୟୁ ରୋକର୍ଡ କରାଯାଇଛି । ତାମିଲନାଡୁରେ ୫ହଜାରରୁ କମ୍ ସଂକ୍ରମିତ ଚିହ୍ନଟ ହୋଇଛନ୍ତି ।

ଭାରତର ଭୁଲ୍ ମ୍ୟାପ ପାଇଁ ଟ୍ୱିଟରର ଏମଡି ମାହେଶ୍ୱରୀଙ୍କ ବିରୋଧରେ ମାମଲା

ନୂଆଦିଲ୍ଲୀ: ସାତ ମାସରେ ଦ୍ୱିତୀୟ ଥର । ଭାରତର ଭୁଲ୍ ମାନଚିତ୍ର ପ୍ରଦର୍ଶନ କଲା ଟ୍ୱିଟର । ଏହା ପରେ ଟ୍ୱିଟରକୁ ଭାରତରେ ବ୍ୟାନ ପାଇଁ ଚାରି ଆଡ଼ୁ ଦାବି ହୋଇଛି । ପ୍ରବଳ ବିରୋଧ ପରେ ୱେବସାଇଟ୍ ବିବାଦୀୟ ନକ୍ସାକୁ ହଟାଇ ଦେଇଛି ଟ୍ୱିଟର । ଏହାରି ଭିତରେ ଉତ୍ତରପ୍ରଦେଶର ବୁଲନ୍ଦସହରରେ ଟ୍ୱିଟରର ଏମଡି ମନୀଷ ମାହେଶ୍ୱରୀଙ୍କ ବିରୋଧରେ ମାମଲା ରୁଜୁ ହୋଇଛି ।

Case Filed Against Twitter MD Manish Maheshwari For Showing Wrong Map Of India

ମିଳିଥିବା ସୂଚନା ଅନୁସାରେ, ବୁଲନ୍ଦସହରରେ ବଜରଙ୍ଗ ଦଳ ପକ୍ଷରୁ ଏହି ମାମଲା ହୋଇଛି । ଟ୍ୱିଟରର ଏମଡି ମାହେଶ୍ୱରୀଙ୍କ ବିରୋଧରେ ଆଇପିସି ଧାରା ୫୦୫ (୨) ଓ ଆଇଟି (ସଂଶୋଧିତ) ଆଇନ୍ ୨୦୦୮ର ଧାରା ୭୪ ଅନୁସାରେ ମାମଲା ରୁଜୁ କରାଯାଇଛି ।

ଏଥିସହ ପଢ଼ନ୍ତୁ: ଟ୍ୱିଟରର ନକ୍ସାରେ ଭାରତର ନୁହେଁ ଜମ୍ମୁ-କାଶ୍ମୀର, ଅଲଗା ଦେଶ; ସରକାର ନେଇପାରନ୍ତି ବଡ଼ କାର୍ଯ୍ୟାନୁଷ୍ଠାନ

ନୂଆ ଆଇଟି ନିୟମ ଅନୁପାଳନ ନେଇ ଟ୍ୱିଟର ସହ ଭାରତ ସରକାରଙ୍କ ସହ ତିକ୍ତତା ଲାଗି ରହିଛି । ଏହାରି ଭିତରେ ଟ୍ୱିଟର ଭାରତର ଭୁଲ୍ ମାନଚିତ୍ର ଦେଖାଇ ପୁଣି ବିବାଦ ଘେରକୁ ଆସିଛି । ଯେଉଁଥିରେ ଟ୍ୱିଟର ଜମ୍ମୁ-କାଶ୍ମୀରକୁ ଅଲଗା ଦେଶ ଦର୍ଶାଇଥିବା ବେଳେ ଲଦାଖକୁ ଅଲଗା ଦେଶ ଭାବେ ଚିତ୍ରଣ କରିଛି । ଟ୍ୱିଟର ୱେବସାଇଟର କ୍ୟାରିଅର ସେକ୍ସନରେ ଟ୍ୱିପ୍ ଲାଇଫରେ ବିକୃତ ମାନଚିତ୍ର ଦିଆଯାଇଥିଲା । ଏହା ପୂର୍ବରୁ ଲେହକୁ ଚୀନର ଅଂଶ ବୋଲି ଦର୍ଶାଇଥିଲା ଟ୍ୱିଟର ।

ନଗଡ଼ାରେ ଜୁଆଙ୍ଗ ଆଦିବାସୀଙ୍କୁ ଦିଆଗଲା କୋଭିଡ୍ ଟିକା

ଯାଜପୁର: ରାଜ୍ୟରେ ଦୈନିକ ପାଖାପାଖି ୩ ଲକ୍ଷ ଟିକାକରଣ ହେଉଛି । ଟିକାକରଣ ଉପରେ ଗୁରୁତ୍ୱ ଦିଆଯାଉଛି । ରାଜ୍ୟ ସରକାରଙ୍କ ପକ୍ଷରୁ ଆଦିବାସୀଙ୍କୁ ଟିକାକରଣ ପାଇଁ ନଗଡ଼ାରେ ଟିକାକରଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଜିଲ୍ଲା ସ୍ୱାସ୍ଥ୍ୟ ବିଭାଗ ଓ ସୁକିନ୍ଦା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପକ୍ଷରୁ ବଣ ପାହାଡ଼ ଘେରା ଅନୁନ୍ନତ ଇଲାକା ନଗଡ଼ାର ଆଦିବାସୀଙ୍କୁ ଟିକାକରଣ କରାଯାଇଛି । ଉଭୟ ତଳ ଓ ଉପର ନଗଡ଼ାର ୬୫ ଜଣ ଜୁଆଙ୍ଗ ଆଦିବାସୀଙ୍କ ସମେତ ଗୁହିଆଶାଳରୁ ୫୬ ଓ ତୁମୁଣିର ୩୮ ଜଣ ଜୁଆଙ୍ଗ ଆଦିବାସୀଙ୍କୁ ପ୍ରଥମ ପର୍ଯ୍ୟାୟରେ ଟିକା ଦିଆଯାଇଛି ।

Juang Tribe Of Nagada Taking Covid Vaccine

ଏଥି ସହିତ ନାଲିଆଡାବର ୨ ଜଣଙ୍କ ସମେତ ସେଠାରେ ରହି ଉନ୍ନୟନ କାର୍ଯ୍ୟ କରୁଥିବା ବିଭିନ୍ନ ବିଭାଗର ୧୬ ଜଣ କର୍ମଚାରୀଙ୍କୁ ଟିକାକରଣ କରାଯାଇଛି । ନଗଡ଼ା ଅଞ୍ଚଳରେ ମୋଟ ୧୭୭ ଜଣଙ୍କୁ କୋଭିଡ୍ ଟିକା ଦିଆଯାଇଛି । ଟିକାକରଣର ସପ୍ତାହକ ପୂର୍ବରୁ ସେମାନଙ୍କ ମଧ୍ୟରେ ସଚେତନତା ସୃଷ୍ଟି କରିବା ପାଇଁ ଜିଲ୍ଲାପାଳଙ୍କ ନିର୍ଦ୍ଦେଶରେ ଅଙ୍ଗନୱାଡି ଓ ଆଶାକର୍ମୀ ମାନେ ଘର ଘର ବୁଲି ସଚେତନ କରାଇଥିଲେ । ତଳ ନଗଡ଼ାରେ ଥିବା ବିଦ୍ୟାଳୟ ପରିସରରେ ଟିକାକରଣ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।

ରାଜ୍ୟରେ ୩ ହଜାର ତଳକୁ ଖସିଲା କରୋନା ସଂକ୍ରମଣ, ବାଲେଶ୍ୱରରୁ ସର୍ବାଧିକ ଆକ୍ରାନ୍ତ ଚିହ୍ନଟ

ଭୁବନେଶ୍ୱର: ରାଜ୍ୟରେ କରୋନା ସଂକ୍ରମଣ ମାମଲା ଖସିବାରେ ଲାଗିଛି । ଗତ ୨୪ ଘଣ୍ଟାରେ ଆଉ ୨୬୪୦ ଆକ୍ରାନ୍ତ ଚିହ୍ନଟ ହୋଇଛନ୍ତି । କ୍ୱାରେଣ୍ଟାଇନରୁ ୧୫୧୭ ମାମଲା ଚିହ୍ନଟ ହୋଇଥିବା ବେଳେ ୧୧୨୩ ଜଣ ସ୍ଥାନୀୟ ସଂକ୍ରମିତ ଚିହ୍ନଟ ହୋଇଛନ୍ତି । ଏଥିସହ ରାଜ୍ୟରେ ମୋଟ କରୋନା ସଂକ୍ରମଣ ମାମଲା ୯ ଲକ୍ଷ ୬ ହଜାର ୪୨୯କୁ ବୃଦ୍ଧି ପାଇଛି । ଖୋର୍ଦ୍ଧା ଓ କଟକକୁ କାଟି ବାଲେଶ୍ୱରରେ ସର୍ବାଧିକ ୩୯୭ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି ।

ଅନୁଗୁଳରୁ ୮୯ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ବରଗଡ଼ରୁ ୨୧, ଭଦ୍ରକରୁ ୧୨୮,ବଲାଙ୍ଗିରରୁ ୧୧, ବୌଦ୍ଧରୁ ୧୯, କଟକରୁ ୨୬୬, ଦେବଗଡ଼ରୁ ୪, ଢ଼େଙ୍କାନାଳରୁ ୬୭, ଗଜପତିରୁ ୧୮, ଗଞ୍ଜାମରୁ ୧୭, ଜଗତସିଂହପୁରରୁ ୧୩୨,ଯାଜପୁରରୁ ୧୬୨, ଝାରସୁଗୁଡ଼ାରୁ ୮, କଳାହାଣ୍ଡିରୁ ୨୦, କନ୍ଧମାଳରୁ ୧୫, କେନ୍ଦ୍ରାପଡ଼ାରୁ ୫୫ ଆକ୍ରାନ୍ତ ଚିହ୍ନଟ ହୋଇଛନ୍ତି ।

ସେହିଭଳି କେନ୍ଦୁଝରରୁ ୭୦, ଖୋର୍ଦ୍ଧାରୁ ୩୬୫, କୋରାପୁଟରୁ ୬୧, ମାଲକାନଗିରିରୁ ୬୪, ମୟୂରଭଞ୍ଜରୁ ୧୫୫, ନବରଙ୍ଗପୁରରୁ ୨୦, ନୟାଗଡ଼ରୁ ୯୨, ନୂଆପଡ଼ାରୁ ୮, ପୁରୀରୁ ୧୭୮, ରାୟଗଡ଼ାରୁ ୪୯, ସମ୍ବଲପରୁରରୁ ୨୩, ସୋନପୁରରୁ ୨୫, ସୁନ୍ଦରଗଡ଼ରୁ ୨୮ ଏବଂ ଷ୍ଟେଟପୁଲରୁ ୭୩ ଜଣ ପଜିଟିଭ୍ ଚିହ୍ନଟ ହୋଇଛନ୍ତି ।

ରାଜ୍ୟରେ ମୋଟ ସଂକ୍ରମିତଙ୍କ ସଂଖ୍ୟା ୯ ଲକ୍ଷ ୬ ହଜାର ୪୨୯କୁ ବୃଦ୍ଧି ପାଇଛି । ଏବେ ୩୧ ହଜାର ୬୧୯ ସକ୍ରିୟ ସଂକ୍ରମଣ ମାମଲା ରହିଥିବା ବେଳେ କରୋନାକୁ ମାତ୍ ଦେଇ ସୁସ୍ଥ ହୋଇଛନ୍ତି ୮ ଲକ୍ଷ ୭୦ ହଜାର ୭୮୭ ଜଣ । ରାଜ୍ୟରେ ମୋଟ କରୋନା ମୃତ୍ୟୁସଂଖ୍ୟା ୩ ହଜାର ୯୭୦କୁ ବୃଦ୍ଧି ପାଇଛି ।