spot_img
Home Blog Page 5592

ବ୍ୟାଙ୍କର ଗୁରୁତ୍ବପୂର୍ଣ୍ଣ ପଦବିରେ ଥିବା ଅଧିକାରୀ ବର୍ଷକୁ ୧୦ ଦିନ ଯିବେ ଛୁଟିରେ

ନୂଆଦିଲ୍ଲୀ: ବଦଳିଲା ନିୟମ । ଏଣିକି ବ୍ୟାଙ୍କର ଅତି ଗୁରୁତ୍ବପୂର୍ଣ୍ଣ ପଦବିରେ ଥିବା ଅଧିକାରୀ, ଟ୍ରେଜେରୀ ଓ କରେନ୍ସି ଚେଷ୍ଟ ଦାୟିତ୍ବରେ ଥିବା ଅଧିକାରୀଙ୍କୁ ବାଧ୍ୟତାମୂଳକ ଛୁଟିରେ ପଠାଯିବ । ପ୍ରତିବର୍ଷ ଅତି କମରେ ୧୦ ଦିନ ଲାଗି ସେମାନଙ୍କୁ ଛୁଟିରେ ପଠାଯିବ । ପରିବର୍ତ୍ତିତ ରିସ୍କ ମ୍ୟାନେଜମେଣ୍ଟ ଗାଇଡଲାଇନ ଅନୁଯାୟୀ ଭାରତୀୟ ରିଜର୍ଭ ବ୍ୟାଙ୍କ ଏହି ନୀତି ଘୋଷଣା କରିଛି । ବିବୃତିରେ ଆରବିଆଇ କହିଛି ବ୍ୟାଙ୍କଗୁଡିକରେ ଗୁରୁତ୍ବପୂର୍ଣ୍ଣ ପଦବିରେ ନିୟୋଜିତ ଅଧିକାରୀମାନଙ୍କୁ କୌଣସି ସୂଚନା ନଦେଇ ଛୁଟିରେ ପଠାଯିବ ।

ଛୁଟିର ପରିମାଣ ସର୍ବନିମ୍ନ ୧୦ ଦିନ ହେବ । ଛୁଟି ନେଇ ସେମାନଙ୍କୁ ଆଗୁଆ କୌଣସି ସୂଚନା ଦିଆଯିବ ନାହିଁ । ଆକସ୍ମିକ ଭାବେ ଏହି ନିୟମ କାର୍ଯ୍ୟକାରୀ ହେବ । ଏନେଇ ସମସ୍ତ ବ୍ୟବସ୍ଥା ଚୂଡାନ୍ତ କରିବାକୁ ଆରବିଆଇ ନିର୍ଦ୍ଦେଶ ଦେଇଛି । ଆରବିଆଇର ଏହି ନିର୍ଦ୍ଦେଶ ଫଳରେ ଗତ ୨୦୧୫ରେ ଏପ୍ରିଲ ୨୩ରେ ଜାରି ଗାଇଡଲାଇନ ରଦ୍ଦ ହୋଇଯାଇଛି ।

ଏହି ଛୁଟି କାଳରେ କର୍ମଚାରୀମାନେ ସଶରୀରରେ ବ୍ୟାଙ୍କକୁ ଆସିପାରିବେ ନାହିଁ ବା ଭର୍ଚୁଆଲରେ ଯୋଗାଯୋଗ କରିପାରିବେ ନାହିଁ । କେବଳ ଇ-ମେଲ ଜରିଆରେ ଯୋଗସୂତ୍ର ରକ୍ଷା କରିବେ । ରିସ୍କ ମଡେଲିଂ, ମଡେଲ ଭାଲିଡେସନ ଆଦି କ୍ଷେତ୍ରରେ ମଧ୍ୟ ଏହି ନିୟମ କାର୍ଯ୍ୟକାରୀ ହେବ । ବ୍ୟାଙ୍କରେ ଜାଲିଆତି ରୋକିବା ଲାଗି ଏହି ପଦକ୍ଷେପ ନିଆଯାଇଛି ବୋଲି କୁହାଯାଇଛି ।

ଯୋଗୀ ରାଜ୍ୟରେ ନୂଆ ଆଇନ, ଦୁଇରୁ ଅଧିକ ସନ୍ତାନ ଥିଲେ ମିଳିବନି ସରକାରୀ ଚାକିରି

ଲକ୍ଷ୍ନୌ: ଦୁଇରୁ ଅଧିକ ସନ୍ତାନ ଥିଲେ ମିଳିବନି ସରକାରୀ ଚାକିରି । ସରକାରୀ ଚାରିରିଆଙ୍କର ଦୁଇରୁ ଊର୍ଦ୍ଧ୍ବ ସନ୍ତାନ ରହିଥିଲେ ପଦୋନ୍ନତି ମିଳିବନି କି ନିର୍ବାଚନ ଲଢ଼ିବାକୁ ସୁଯୋଜ ଦିଆଯିବନି । ଜନସଂଖ୍ୟା ନିୟନ୍ତ୍ରଣ ପାଇଁ ଜନସଂଖ୍ୟା ବିଧେୟକ-୨୦୨୧ ଡ୍ରାଫ୍ଟ ପସ୍ତୁତ କରିଛନ୍ତି ଉତ୍ତରପ୍ରଦେଶ ସରକାର । ୨ରୁ ଅଧିକ ସନ୍ତାନ ଥିବା ପରିବାର ଅନେକ ସରକାରୀ ସୁବିଧାରୁ ବଞ୍ଚିତ ରହିବେ । ସରକାରୀ ଯୋଜନାର ମଧ୍ୟ ଲାଭ ମିଳିବ ନାହିଁ ।

ଆୟୋଗ ଡ୍ରାଫ୍ଟକୁ ସରକାରୀ ୱେବସାଇଟରେ ଅପଲୋଡ କରାଯାଇ ଆସନ୍ତା ୧୯ ତାରିଖ ମଧ୍ୟରେ ରାଜ୍ୟବାସୀ ଏହା ଉପରେ ମତ ରଖିବାକୁ କୁହାଯାଇଛି । ଯୋଗୀ ସରକାର ଆସନ୍ତା ୧୧ ତାରିଖରେ ନୂଆ ଜନସଂଖ୍ୟା ନୀତି ଜାରି କରିବାକୁ ଯାଉଛନ୍ତି । ଚିଠା ପ୍ରସ୍ତାବ ଗ୍ରହଣ କରିଥିବା ରାଜ୍ୟ ବିଧି ଆୟୋଗ ପକ୍ଷରୁ କୁହାଯାଇଛି ଯେ, ଜନସଂଖ୍ୟା ବିଧେୟକ-୨୦୨୧ ଡ୍ରାଫ୍ଟ ପାଇଁ ରାଜ୍ୟ ସରକାରଙ୍କ ପକ୍ଷରୁ କୌଣସି ନିର୍ଦ୍ଦେଶ ଜାରି କରାଯାଇନାହିଁ । ଆୟୋଗ ନିଜ ପ୍ରୟାସରେ ଏହି ବିଧେୟକ ପ୍ରସ୍ତୁତ କରିଛନ୍ତି ।

୨ ସନ୍ତାନ ଥିବା ସରକାରୀ କର୍ମଚାରୀଙ୍କୁ ଆଡିସନାଲ ଇନକ୍ରିମେଣ୍ଟ ଦିଆଯିବା ସହ ଘର ବା ଜାଗା କିଣାରେ ରିହାତି ମିଳିବ । ଏହାସହ ଇପିଏଫ୍ ୩ପ୍ରତିଶତ ବୃଦ୍ଧି କରାଯିବ । ଏହାଛଡ଼ା ଗୋଟିଏ ସନ୍ତାନ କରୁଥିବା ଦମ୍ପତିଙ୍କୁ ସ୍ବତନ୍ତ୍ର ସୁବିଧା ଦେବାକୁ ଯୋଗୀ ସରକାର ନିଷ୍ପତ୍ତି ନେଇଚନ୍ତି । ମାଗଣା ଚିକିତ୍ସା ସୁବିଧା ସହ ୨୦ବର୍ଷ ପର୍ଯ୍ୟନ୍ତ ବୀମା, ସିଙ୍ଗଲ ଚାଇଲ୍ଡଙ୍କୁ ସ୍କୁଲରେ ଆଡମିସନ ପାଇଁ ପ୍ରାଥମିକତା ଦିଆଯିବ ।

ମିକ୍ସ ଭ୍ୟାକସିନକୁ ଜର୍ମାନୀର ଅନୁମତି: ଆଷ୍ଟ୍ରାଜେନିକା, ମଡେର୍ଣ୍ଣା, ଫାଇଜର ନେଇଥିଲେ ଅନ୍ୟ ଟିକା ନେଇପାରିବେ

ଜର୍ମାନୀ: ମିକ୍ସ ଭ୍ୟାକସିନ ଲଗାଇବାକୁ ପ୍ରଥମ ଦେଶ ଭାବେ ଅନୁମତି ଦେଲା ଜର୍ମାନୀ । ବିଶ୍ବର ପ୍ରଥମ ଦେଶ ଭାବେ ୟୁରୋପୀୟ ଦେଶ ଜର୍ମାନୀ ମିକ୍ସ ଟିକା ଲଗାଇବାକୁ ଅନୁମତି ପ୍ରଦାନ କରିଛି । ଆଷ୍ଟ୍ରାଜେନିକା, ମଡେର୍ଣ୍ଣା ବା ଫାଇଜରର ପ୍ରଥମ ଡୋଜ୍ ନେଇଥିବା ଲୋକମାନେ ଅନ୍ୟ ଟିକାର ଦ୍ବିତୀୟ ଡୋଜ୍ ନେଇପାରିବେ । ଗୋଟିଏ ଟିକାର ଦୁଇଟି ଡୋଜ୍ ନେଇସାରିଥିବା ଲୋକମାନଙ୍କୁ ନିଜ ଇଚ୍ଛାରେ ଅନ୍ୟ ଏକ ଟିକାର ଡୋଜ୍ ନେବାକୁ ଆମେରିକା, ବ୍ରିଟେନ ଓ ଫ୍ରାନ୍ସ ସରକାର ଅନୁମତି ଦେଇଛନ୍ତି ।

କିନ୍ତୁ ପ୍ରଥମ ଦେଶ ଭାବେ ଜର୍ମାନୀରେ ମିକ୍ସ ଭ୍ୟାକସିନ ନେବାକୁ ଅନୁମତି ଦିଆଯାଇଛି । ଟିକାକରଣ ସ୍ଥାୟୀ ସମିତିର ରିପୋର୍ଟ ପରେ ସରକାର ଏ ନେଇ ନିଷ୍ପତ୍ତି ନେଇଚନ୍ତି । ୟୁରୋପୀୟ ମେଡିସିନ ଲଜେନ୍ସି ପକ୍ଷରୁ ଫାଇଜନ-ବାୟୋଏନ୍‌ଟେକ୍ ଓ ମଡେର୍ଣ୍ଣା M-RNA ଭ୍ୟାକସିନକୁ ଅନୁମତି ଦିଆଯାଇଛି । ଜର୍ମାନ ଚାନସେଲର ଏଞ୍ଜେଲା ମାର୍କେଲ ଜୁନ୍‌ରେ ଆଷ୍ଟ୍ରାଜେନିକାର ପ୍ରଥମ ଡୋଜ୍ ନେବା ପରେ ଦ୍ବିତୀୟ ଡୋଜରେ ମଡେର୍ଣ୍ଣା ଟିକା ନେଇଥିଲେ ।

ଜଗନ୍ନାଥଙ୍କୁ ସମର୍ପିତ ପ୍ରଥମ ୱେବ ରେଡ଼ିଓ, ନୂଆଦିଲ୍ଲୀ ହଜଖାସ ଜଗନ୍ନାଥ ମନ୍ଦିରରେ ଶୁଭାରମ୍ଭ

ନୂଆଦିଲ୍ଲୀ: ଜଗନ୍ନାଥଙ୍କୁ ସମର୍ପିତ ପ୍ରଥମ ୱେବ ରେଡ଼ିଓ ରେଡ଼ିଓ ଶ୍ରୀକ୍ଷେତ୍ର ଆଜି ଜଗନ୍ନାଥଙ୍କ ନବଯୌବନ ଦର୍ଶନ ଦିନ ନୂଆଦିଲ୍ଲୀ ସ୍ଥିତ ହଜଖାସ ଜଗନ୍ନାଥ ମନ୍ଦିରରେ ଶୁଭାରମ୍ଭ ହୋଇଛି। ପ୍ରତିକାତ୍ମକ ଭାବରେ ପ୍ରଭୁ ଜଗନ୍ନାଥ ଏହାର ଶୁଭାରମ୍ଭ କରିଥଲେ । ଏହି କାର୍ଯ୍ୟକ୍ରମରେ ପୂର୍ବତନ ସାଂସଦ ରାମଚନ୍ଦ୍ର ଖୁଣ୍ଟିଆ, ନିଳାଚଳ ସେବା ସଂଘର ସମ୍ପାଦକ ରବୀନ୍ଦ୍ର ପ୍ରଧାନ, ଆକାଶବାଣୀ ବିଦେଶ ବିଭାଗର ପୂର୍ବତନ ନିର୍ଦ୍ଦେଶକ ଅମ୍ଳାନ ଜ୍ୟୋତି ମଜୁମଦାର ଉପସ୍ଥିତ ରହିଥିଲେ  ।

ବିଦେଶ ବିଭାଗର ପୂର୍ବତନ ସଚିବ ଅମରେନ୍ଦ୍ର ଖଟୁଆ, ପୂର୍ବତନ ପ୍ରଶାସକ କୁଳମଣି ବିଶ୍ବାଳ, ଓଡ଼ିଶା ଡାଏରୀ ର ସଂଚାଳକ ରଶ୍ମି ରଞ୍ଜନ ପରିଡ଼ା, ଦିଲ୍ଲୀ ସାରସ୍ଵତ ସଂଘର ସମ୍ପାଦକ ସଂଗ୍ରାମ ଧର, ଓଡ଼ିଆ ମହାମଚର ନିର୍ଦେଶକ ଗୋବର୍ଦ୍ଧନ ଧଳ, ପଲ୍ଲୀବାଣୀର ସହ ସମ୍ପାଦକ ନବଜ୍ୟୋତି ଦାସ ପ୍ରମୁଖ ଉପସ୍ଥିତ ଥିଲେ। ଏହି ଚାନେଲରେ ଜଗନ୍ନାଥଙ୍କ କଥା ଗାଥା ରୀତିନୀତି ଅନୁଭୂତି ସହିତ ଭଜନ ଜଣାଣ ଆଦି ସମସ୍ତ ବିଷୟ ସ୍ଥାନ ପାଇବ ବୋଲି ଏହାର ସଂଚାଳକ ରାମଚନ୍ଦ୍ର ନାଥ ଗଣମାଧ୍ୟମକୁ କହିଛନ୍ତି।

ଲକଡାଉନ୍ କୋହଳ କରିବା ମୁଡରେ ନାହାଁନ୍ତି ଷ୍ଟାଲିନ୍ ସରକାର,୧୯ ପର୍ଯ୍ୟନ୍ତ ଲକଡାଉନ୍ ବୃଦ୍ଧି

ତାମିଲନାଡୁ: କରୋନା ସଂକ୍ରମଣ କମିବାରେ ଲାଗିଛି, ହେଲେ ସମ୍ପୂର୍ଣ୍ଣ ଲକଡାଉନ୍ କୋହଳ କରିବା ମୁଡରେ ନାହାଁନ୍ତି ଷ୍ଟାଲିନ୍ ସରକାର । ପୁଣି ଗୋଟିଏ ସପ୍ତାହ ପାଇଁ ଲକଡାଉନ୍ ବୃଦ୍ଧି କରିଛନ୍ତି ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ୍ । ଆସନ୍ତା ୧୯ ତାରିଖ ପର୍ଯ୍ୟନ୍ତ ଲକଡାଉନ୍ ବୃଦ୍ଧି କରାଯାଇଛି । ତେବେ କିଛି କଟକଣା କୋହଳ କରାଯାଇଛି । ରାତି ୯ଟା ଯାଏ ୫୦ ପ୍ରତିଶତ ଗ୍ରାହକରେ ହୋଟେଲ୍ , ଚା ଦୋକାନ, ଜାତୀୟ ରାଜପଥ ନିକଟରେ ଥିବା ଦୋକାନ ଖୋଲିବା ପାଇଁ ଅନୁମତି ମିଳିଛି ।

ତେବେ ପୂର୍ବପରି ବନ୍ଦ ରହିବ ସ୍କୁଲ, କଲେଜ, ଥିଏଟର, ବାର ଓ ସୁଇପିଙ୍ଗ ପୁଲ୍ । କେବଳ ପୁଡୁଚେରୀକୁ ବସ ସେବା ପାଇଁ ଅନୁମତି ମିଳିଥିବାବେଳେ ପଡୋଶୀ ରାଜ୍ୟ ପାଇଁ ଅନୁମତି ମିଳିନାହିଁ । ବାହାଘରରେ ୫୦ ଜଣ ଲୋକ ସାମିଲ ହେବାପାଇଁ ଅନୁମତି ମିଳିଥିବାବେଳେ ଶୁଦ୍ଧି କ୍ରିୟାରେ ୨୦ ଜଣ ଲୋକ ସାମିଲ ହୋଇପାରିବେ । ଗତ ୨୪ ଘଣ୍ଟାରେ ତାମିଲନାଡୁରେ ୩ ହଜାର ୯୨୧ କରୋନା ସଂକ୍ରମିତ ଚିହ୍ନଟ ହୋଇଥିବାବେଳେ ସୁସ୍ଥ ସଂଖ୍ୟା ବଢିବାରେ ଲାଗିଛି  ।

ବିଶ୍ୱର କ୍ଷୁଦ୍ରତମ ରଥ ନିର୍ମାଣ କଲେ ଶିଳ୍ପୀ ସୁବଳ ମହାରଣା

ଭୁବନେଶ୍ୱର: ବିଶ୍ୱର କ୍ଷୁଦ୍ରତମ ରଥ ନିର୍ମାଣ କଲେ ଶିଳ୍ପୀ ସୁବଳ ମହାରଣା । ରାଜଧାନୀ ଭୁବନେଶ୍ୱର ରେ ମାତ୍ର ଦେଢ଼ ସେଣ୍ଟିମିଟର ଉଚ୍ଚତାର ରଥ ନିର୍ମାଣ କରି ଚର୍ଚ୍ଚାକୁ ଆସିଛନ୍ତି ସୁବଳ । ଦେଢ଼ ସେଣ୍ଟିମିଟର ଉଚ୍ଚତା ଥିବା ରଥର ଚଉଡା ୧.୪ ସେଣ୍ଟିମିଟର ରହିଛି ।

ନିମ୍ବ, ବେଲ, ତୁଳସୀ, ଗୁଆ କାଠରେ ଏହାର ନିର୍ମାଣ କରାଯାଇଛି । ଏହି ରଥଟି ନିର୍ମାଣ କରିବାକୁ ୪ ଘଣ୍ଟା ସମୟ ଲାଗିଛି । ପୂର୍ବ ବର୍ଷ ୨.୩ ସେଣ୍ଟିମିଟର ର ରଥ ନିର୍ମାଣ କରି world book of record , India book of record , Asia book of record , world book star award ଆଦି ଅନେକ ସମ୍ମାନରେ ସମ୍ମାନିତ ହୋଇଥିଲେ ଶିଳ୍ପୀ ସୁବଳ ମହାରଣା ।

ରବିବାର ରାତିରୁ ମଙ୍ଗଳବାର ରାତି ୮ଟା ପର୍ଯ୍ୟନ୍ତ ପୁରୀରେ କର୍ଫ୍ୟୁ

ପୁରୀ: ପୁରୀରେ କାଲି ରାତି ୮ଟାରୁ ମଙ୍ଗଳବାର ରାତି ୮ଟା ପର୍ଯ୍ୟନ୍ତ ଲାଗିବ କର୍ଫ୍ୟୁ । ସେପଟେ ତିନିରଥରେ ଆଜି କପଡ଼ା ମଣ୍ଡଣି ହୋଇଛି । ଆସନ୍ତାକାଲି ତିନିରଥକୁ ରଥଖଳାରୁ ସିଂହଦ୍ବାର ସମ୍ମୁଖକୁ ଅଣାଯିବ  । ସେହିପରି ଘୋଷଯାତ୍ରା ବେଳେ ଶାନ୍ତିଶୃଙ୍ଖଳା ରକ୍ଷା ପାଇଁ ପୁରୀ ସହରକୁ ୧୨ଟି ଜୋନ୍‌ରେ ବିଭକ୍ତ କରାଯାଇଛି । ପ୍ରାୟ ୬୫ ପ୍ଲାଟୁନ ଫୋର୍ସ ମୁତୟନ ହୋଇଛନ୍ତି ।  ୧୦ ଜଣ ଅତିରିକ୍ତ ଏସପି, ୨୧ଜଣ ଡିଏସପି, ୬୪ ଜଣ ଇନସପେକ୍ଟର, ୨୨୨ ଏଏସ୍‌ଆଇ ଏବଂ ଏସ୍‌ଆଇଙ୍କୁ ଦାୟିତ୍ବ ଦିଆ ଯାଇଛି  ।

ସହରରେ ଶାନ୍ତି ଶୃଙ୍କଳା ଦୃଷ୍ଟିରୁ ଅର୍ଥାତ କୋଭିଡ କଟକଣାକୁ ନେଇ ରବିବାର ରାତି ୮ ଟାରୁ କର୍ଫ୍ୟୁ ଲଗାଯିବ  । ଏହି ସମୟରେ ପୁରୀ ପୋଲିସ ପକ୍ଷରୁ କଡ଼ା କଟକଣା ଲାଗୁ କରାଯିବ  । ସେପଟେ ଆଜି ତିନି ରଥରେ କୋଠ ସୁଆଁସିଆ ସେବକ କପଡା ମଣ୍ଡଣି କରିଛନ୍ତି  । ରଥ ଇଞ୍ଜିନିୟରମାନେ ବ୍ରେକ୍‌ ଯାଞ୍ଚ କରିଥିଲେ  । ଚଳିତବର୍ଷ ନବଯୌବନ ନୀତି ପରେ ଦୁଇଦିନ ଧରି ଉଭାଯାତ୍ରା ନୀତି କାନ୍ତି କରାଯାଉଛି  ।  ରଥଖଳାରେ ତିନି ରଥ ଦଣ୍ଡାୟମାନ ହୋଇଥିବା ବେଳେ ଆସନ୍ତାକାଲି ଆଜ୍ଞାମାଳ ବିଜେ ପରେ ତିନିରଥକୁ ସିଂହଦ୍ୱାର ସମ୍ମୁଖକୁ ଅଣାଯିବ  ।

ଗରିବ ରୋଗୀଙ୍କୁ ମାଗଣା କାର୍ଡିଆକ ସର୍ଜରୀ, ଜେପି ହୃଦୟ ମିତ୍ର ଯୋଜନାରେ ମିଳିବ ଚିକିତ୍ସା

ରାଉରକେଲା: ସ୍ୱାସ୍ଥ୍ୟ ସେବାରେ ଆଉ ପାଦେ ଆଗରେ ଓଡ଼ିଶା  । ଏବେ ଗରୀବ ରୋଗୀ ପାଇବେ ବଡ ସୁବିଧା  । ସମସ୍ଥଙ୍କ ସ୍ୱାସ୍ଥ୍ୟକୁ ଗୁରୁତ୍ୱ ଦେବାକୁ ଯାଇ ଏକ ଅଭିନବ ଯୋଜନା ଆରମ୍ଭ କରିଛନ୍ତି  ଜେପି ହସ୍ପିଟାଲ। ଗରିବ ଓ ଆର୍ଥିକ ଅନଗ୍ରସର ରୋଗୀଙ୍କୁ ମିଳିବ ମାଗଣା କାର୍ଡିଆକ ସର୍ଜରୀ ସେବା । ଆଜି ରାଉରକେଲା ଜୟ ପ୍ରକାଶ ହସ୍ପିଟାଲରେ ଉଦଘାଟିତ ହୋଇଛି ଜେପି ହୃଦୟ ମିତ୍ର ଯୋଜନା । ଏହାଦ୍ବାରା ମାଗଣାରେ କାର୍ଡିଆକ ଟ୍ରୀଟମେଣ୍ଟ, କାର୍ଡିଆକ ସର୍ଜରୀ, ଓପନହାର୍ଟ ସର୍ଜରୀ ଓ ଵାଇପାସ ସର୍ଜରୀ ମିଳିବ ।

ସୁନ୍ଦରଗଡ଼ ଜିଲ୍ଲାପାଳ ନିଖିଳ ପବନ କଲ୍ୟାଣ ଏହାର ଉଦଘାଟନ କରିଛନ୍ତି । ୧୮ ହଜାରରୁ କମ ମାସିକ ଦରମା ପାଉଥିବା ସରକାରୀ ଓ ବେସରକାରୀ କର୍ମଚାରୀଙ୍କୁ ମଧ୍ୟ ଏହି ସେବା ମାଗଣାରେ ଯୋଗାଇ ଦିଆଯିବ । ସର୍ବୋତ୍ତମ ଟ୍ରମା କେୟାର, ସର୍ବୋତ୍ତମ ଆଇସିୟୁ କେୟାର, ଅଭିଜ୍ଞ ଡାକ୍ତରୀଦଳ ଏହି ସେବା ଯୋଗାଇଦେବେ । ରାଉରକେଲା ସହରରେ ଓପନହାର୍ଟ ସର୍ଜରୀ ଅନେକଙ୍କ ପାଇଁ ସ୍ବପ୍ନ ଥିବାବେଳେ ଏହାକୁ ଜେପି ହସ୍ପିଟାଲ ସଫଳ କରିଥିବା ହସ୍ପିଟାଲ ପଷରୁ କୁହାଯାଇଛି ।

ଭକ୍ତ ବିନା ଗଡ଼ିବ ରଥ, ମୁତୟନ ହେବେ ୬୫ ପ୍ଲାଟୁନ ପୋଲିସ ଫୋର୍ସ

ପୁରୀ: ଦିନକ ପରେ ବିଶ୍ୱ ପ୍ରସିଦ୍ଧ ଘୋଷଯାତ୍ରା । ଭକ୍ତ ବିନା ଖାଁ ଖାଁ ରହିବ ବଡ଼ଦାଣ୍ଡ । କଟକଣାରେ ଗଡ଼ିବ ମହାବାହୁଙ୍କ ରଥ । ଶୃଙ୍ଖଳିତ ରଥଯାତ୍ରା ନେଇ ଆଜି ପୋଲିସ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା । ଏଡିଜି ଆର କେ ଶର୍ମାଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ବଡ଼ଦାଣ୍ଡକୁ ୩ଟି, ପୁରା ସହରକୁ ୧୨ଟି ଜୋନରେ ବିଭକ୍ତ କରାଯିବ ବୋଲି ନିଷ୍ପତ୍ତି ହୋଇଛି । ପ୍ରାୟ ୬୫ପ୍ଲାଟୁନ ଫୋର୍ସ ମୁତୟନ ହେବେ ।

ସେହିପରି ରଥଯାତ୍ରା ସମୟରେ ୧୦ଜଣ ଅତିରିକ୍ତ ଏସପି, ୩୧ଡିଏସପି, ୬୪ ଇନିସପେକ୍ଟର, ୨୨୨ ASI ଓ SI ହେବେ ମୁତୟନ । ସୁରକ୍ଷାକୁ ଦୃଷ୍ଟିରେ ରଖି ଆସନ୍ତାକାଲି ରାତି ୮ରୁ ୧୩ତାରିଖ ରାତି ୮ପର୍ଯ୍ୟନ୍ତ ପୁରୀ ସହରରେ କର୍ଫ୍ୟୁ ଜାରି କରାଯିବ । ସେପଟେ ଆଜି ଶ୍ରୀଜିଉଙ୍କ ଉଭାଯାତ୍ରା । ରଥଯାତ୍ରା ପୂର୍ବୁରୁ ଆଜି ସରିବ ରଥକନା ମଣ୍ଡଣି । ଅଣବସରର 15ଦିନ ଗୁପ୍ତନୀତି ପରେ ଗତକାଲି ନବଯୌବନ ବେଶରେ ଦର୍ଶନ ଦେଇଥିଲେ ମହାବାହୁ ।

ବିଦେଶ ଗସ୍ତ ପୂର୍ବରୁ ଟିକାନେବା ହିଁ ଯଥେଷ୍ଟ, ଟେଷ୍ଟିଂ କରିବା ପରେ ଯାତ୍ରା କରିବା ଉଚିତ

ନୂଆଦିଲ୍ଲୀ: ବିଦେଶ ଗସ୍ତ ପାଇଁ ବ୍ୟକ୍ତିଙ୍କୁ ଟିକାନେବା ହିଁ ଯଥେଷ୍ଟ । ତେବେ ଟିକା ନେଇ କୌଣସି ପାତରଅନ୍ତର ମନୋଭାବ ପୋଷଣ କରିବା ଜରୁରୀ ନୁହେଁ ବୋଲି କହିଛନ୍ତି ବୈଦଶିକ ମନ୍ତ୍ରୀ ଏସ. ଜୟଶଙ୍କର । ସେ କହିଛନ୍ତି- ବିଦେଶ ଗସ୍ତ ପୂର୍ବରୁ ଓ ପରେ ଟେଷ୍ଟିଂ କରିବା ଭଲ କଥା । ମାତ୍ର ଟିକା ନେଇ କୌଣସି ପାତରଅନ୍ତର ମନୋଭାବ ରଖାଯିବା ଦରକାର ନାହିଁ । ରୁଷ ପ୍ରତିପକ୍ଷ ସର୍ଗେଇ ଲାଭରଭଙ୍କ ସହ ଆଲୋଚନା ବେଳେ ଜୟଶଙ୍କର କହିଛନ୍ତି- ବିଦେଶ ଯାତ୍ରା କ୍ଷେତ୍ରରେ ଟେଷ୍ଟିଂ ଭିତ୍ତିରେ ଯାତ୍ରା ହେଉ ବୋଲି ଚାହାଁନ୍ତି ।

ଯଦି ଲୋକମାନେ ଆନ୍ତର୍ଜାତିକ ଯାତ୍ରା ପୂର୍ବରୁ ଟେଷ୍ଟ କରିଥାନ୍ତି ଏବଂ ସେଠାରେ ପହଞ୍ଚିବା ପରେ ଟେଷ୍ଟିଂ କରନ୍ତି ତେବେ ତାହା ଉତ୍ତମ । ମାତ୍ର କେତେକ ଦେଶ ଟିକାକରଣ ଉପରେ ପ୍ରଶ୍ନ ଉଠାଉଥିବାରୁ ତାହା ସମସ୍ୟା ହୋଇଛି । ବିଦେଶ ଯାତ୍ରା ପରେ ଓ ପୂବର୍ରୁ ଟେଷ୍ଟି ବି ହୋଇଥାଏ, ହେଲେ ଏହି ଟେଷ୍ଟିଂକୁ ବି କିଛି ଦେଶ ଧ୍ୟାନ ନଦେଇ ଭ୍ୟାକସିନେସନ୍ ଉପରେ ଅଧିକ ଧ୍ୟାନ ଦେଉଥିବା କହିଛନ୍ତି ଜୟଶଙ୍କର । ଏହା ଉପରେ ଏକ ସ୍ପଷ୍ଟ ନିଷ୍ପତ୍ତି ଆସିବା ଦରକାର । ଏନେଇ ବୈଠକରେ ଆଲୋଚନା କରାଯାଇଥିବା କହିଛନ୍ତି ଜୟ ଶଙ୍କର ।