spot_img
Home Blog Page 5591

ଜୁଲାଇ ୧୫ରୁ ଆରମ୍ଭ ଧାନ ସଂଗ୍ରହ ପାଇଁ ପଞ୍ଜିକରଣ

ଭୁବନେଶ୍ୱର : ଚଳିତ ଖରିଫରେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ ଧାନ ସଂଗ୍ରହ ନିମନ୍ତେ ଜୁଲାଇ ୧୫ରୁ ନାମ ପଞ୍ଜିକରଣ ଆରମ୍ଭ ହେବ। ଅଗଷ୍ଟ ୧୬ ପର୍ଯ୍ୟନ୍ତ ଏହି ପଞ୍ଜିକରଣ ଜାରି ରହିବ । ଖରିଫ ଧାନ ବିକ୍ରି ନିମନ୍ତେ ଇଚ୍ଛୁକ ସମସ୍ତ ଚାଷୀଙ୍କୁ ଆଉଥରେ ପଞ୍ଜିକରଣ କରିବାକୁ ପଡ଼ିବ। ପୂର୍ବ ପଞ୍ଜିକରଣ ନବୀକରଣ ହେବ ନାହିଁ। ଚାଷୀ ମାନଙ୍କୁ ସେମାନଙ୍କର ଜମିଜମା, ବ୍ୟାଙ୍କ ଆକାଉଣ୍ଟ, ଆଧାର କାର୍ଡ, ମୋବାଇଲ ନମ୍ବର ଆଦି ସମସ୍ତ ତଥ୍ୟ ଦାଖଲ କରିବାକୁ ପଡିବ।

ଯେଉଁ ଚାଷୀ ମାନେ ଚଳିତ ଖରିଫରେ ସେମାନଙ୍କର ବଳକା ଧାନ ବିକ୍ରି କରିବାକୁ ଚାହୁଁଛନ୍ତି, ସେମାନଙ୍କୁ ନିକଟବର୍ତ୍ତି ସୋସାଇଟିରେ ନାମ ପଞ୍ଜିକରଣ କରିବାକୁ ପଡ଼ିବ। କାରଣ ସୋସାଇଟିରେ ଧାନ ବିକ୍ରି କରିବା ପାଇଁ ପୂର୍ବରୁ ନାମ ପଞ୍ଜିକରଣ କରିବା ବାଧ୍ୟତା ମୁଳକ କରାଯାଇଛି। ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ ବିସ୍ତୁତ ମାର୍ଗଦର୍ଶିକା ଜାରି କରାଯାଇ ସମସ୍ତ ଜିଲ୍ଲାପାଳ ମାନଙ୍କୁ ପଠାଯାଇଛ।

ସୂଚନା ମୁତାବକ, ସମସ୍ତ ୩୦ଟି ଯାକ ଜିଲ୍ଲାରେ ଚାଷୀ ପଞ୍ଜିକରଣ କରିପାରିବେ । ଏଥିପାଇଁ ହେଲ୍ପ ଡେସ୍କ ସୁବିଧା ମଧ୍ୟ ରହିବ । ଏନେଇ ଆପତ୍ତି ଆସିଲେ ତୁରନ୍ତ ଶୁଣାଣି କରାଯିବାର ବ୍ୟବସ୍ଥା ମଧ୍ୟ କରାଯାଇଛି । ଏଥିସହ ଯାଞ୍ଚ ବ୍ୟବସ୍ଥାକୁ ମଧ୍ୟ କଡ଼ାକଡ଼ି କରାଯାଇଛି। ତେବେ ପଞ୍ଜିକରଣ ପାଇଁ ଚାଷୀଙ୍କୁ ବିନାମୁଲ୍ୟରେ ଫର୍ମ ଯୋଗାଇ ଦିଆଯିବ ।

ଆଉ ସପ୍ତାହେ ପାଇଁ ବଢ଼ିଲା ଲକଡାଉନ୍

ତାମିଲନାଡ଼ୁ: ତାମିଲନାଡୁରେ କରୋନା ସଂକ୍ରମଣ ଧିରେ ଧିରେ କମିବାରେ ଲାଗିଛି, ହେଲେ ସମ୍ପୂର୍ଣ୍ଣ ଲକଡାଉନ୍ କୋହଳ କରିବା ମୁଡରେ ନାହାଁନ୍ତି ଷ୍ଟାଲିନ୍ ସରକାର। ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ୍ ରାଜ୍ୟରେ ପୁଣି ଗୋଟିଏ ସପ୍ତାହ ପାଇଁ ଲକଡାଉନ୍ ବୃଦ୍ଧି କରିଛନ୍ତି। ରାଜ୍ୟରେ ଆସନ୍ତା ୧୯ ତାରିଖ ପର୍ଯ୍ୟନ୍ତ ଲକଡାଉନ୍ ବୃଦ୍ଧି କରାଯାଇଛି।

ତେବେ କିଛି କଟକଣା କୋହଳ କରାଯାଇଛି। ରାତି ୯ଟା ଯାଏ ୫୦ ପ୍ରତିଶତ ଗ୍ରାହକରେ ହୋଟେଲ୍ , ଚା ଦୋକାନ, ଜାତୀୟ ରାଜପଥ ନିକଟରେ ଥିବା ଦୋକାନ ଖୋଲିବା ପାଇଁ ଅନୁମତି ମିଳିଛି । ତେବେ ପୂର୍ବପରି ବନ୍ଦ ରହିବ ସ୍କୁଲ, କଲେଜ, ଥିଏଟର, ବାର ଓ ସୁଇପିଙ୍ଗ ପୁଲ୍ । କେବଳ ପୁଡୁଚେରୀକୁ ବସ ସେବା ପାଇଁ ଅନୁମତି ମିଳିଥିବାବେଳେ ପଡୋଶୀ ରାଜ୍ୟ ପାଇଁ ଅନୁମତି ମିଳିନାହିଁ । ବାହାଘରରେ ୫୦ ଜଣ ଲୋକ ସାମିଲ ହେବାପାଇଁ ଅନୁମତି ମିଳିଥିବାବେଳେ ଶୁଦ୍ଧି କ୍ରିୟାରେ ୨୦ ଜଣ ଲୋକ ସାମିଲ ହୋଇପାରିବେ । ଗତ ୨୪ ଘଣ୍ଟାରେ ତାମିଲନାଡୁରେ ୩ ହଜାର ୯୨୧ କରୋନା ସଂକ୍ରମିତ ଚିହ୍ନଟ ହୋଇଥିବାବେଳେ ସୁସ୍ଥ ସଂଖ୍ୟା ବଢିବାରେ ଲାଗିଛି।

କମୁଛି କରୋନାର ପ୍ରକୋପ: ୩ ପ୍ରତିଶତକୁ ଖସିଲା ପଜିଟିଭ ହାର

ଭୁବନେଶ୍ୱର: ରାଜ୍ୟରେ କମୁଛି କରୋନା ସଂକ୍ରମଣ । କରୋନା ପଜିଟିଭ ହାର ବର୍ତ୍ତମାନ ୩ ପ୍ରତିଶତକୁ ଖସିଲାଣି । ୨୬ଟି ଜିଲ୍ଲାରେ ପଜିଟିଭ ହାର ୫ ପ୍ରତିଶତ ତଳେ ରହିଛି। ଉପକୂଳର ୪ଟି ଜିଲ୍ଲାକୁ ଛାଡ଼ିଲେ ଅନ୍ୟ ଜିଲ୍ଲାଗୁଡ଼ିକରେ କରୋନା ନିୟନ୍ତ୍ରଣରେ ରହିଛି । ଯଦି ଲୋକମାନେ କୋଭିଡ ନିୟମକୁ ନମାନିବେ ତେବେ ପରିସ୍ଥିତି ବିଗିଡ଼ିବାର ସମ୍ଭାବନା ରହିଛି।

ସେପଟେ ମହାରାଷ୍ଟ୍ର ଓ କେରଳରେ କରୋନା ସଂକ୍ରମଣ ବୃଦ୍ଧି ପାଇଛି ଓ ନୂଆ ମ୍ୟୁଟାଣ୍ଟ ଦେଖାଦେଇଛି। କରୋନାର ତୃତୀୟ ଲହର ଆସିଥିବା ସନ୍ଦେହ କରାଯାଉଛି । ଏହି ଦୁଇ ରାଜ୍ୟରୁ ଓଡ଼ିଶା ଆସୁଥିବା ଲୋକଙ୍କ ଉପରେ କଡା ନଜର ରଖିଛି ରାଜ୍ୟ ସ୍ବାସ୍ଥ୍ୟ ବିଭାଗ । ସେଠାରୁ ଆସୁଥିବା ଲୋକଙ୍କ ଟ୍ରେସିଂ, ଟେଷ୍ଟିଂ ଓ ଟ୍ରିଟମେଣ୍ଟ ଉପରେ ରାଜ୍ୟ ସରକାର ଅଧିକ ଫୋକସ୍ କରିଛନ୍ତି। ତେଣୁ ଏହି ଦୁଇ ରାଜ୍ୟ ଫେରନ୍ତାଙ୍କ ଉପରେ ସ୍ୱାସ୍ଥ୍ୟ ବିଭାଗ କଡ଼ା ନଜର ରଖିଛି।

ଟଳୁନି ଟିକା ସଂକଟ, ମାତ୍ର ୪ ଜିଲ୍ଲାରେ ଦିଆଯାଉଛି ଟିକା

ଭୁବନେଶ୍ୱର: ରାଜ୍ୟରେ ଟଳୁ ନାହିଁ ଟିକା ସଂକଟ। କେନ୍ଦ୍ର ଆବଶ୍ୟକୀୟ ଟିକା ଦେଉନଥିବାରୁ ଦିନକୁ ଦିନ ଜଟିଳ ହେଉଛି ଟିକା ସଂକଟ। ଆଜି ମାତ୍ର ୪ଟି ଜିଲ୍ଲାରେ ଟିକାକରଣ କରାଯାଉଛି। ୪ଟି ଜିଲ୍ଲାର ମୋଟ ୧୨ଟି କେନ୍ଦ୍ରରେ ଟିକା ଦିଆଯାଉଛି । ଗଞ୍ଜାମରେ ୪, ନବରଙ୍ଗପୁରରେ ୪, ପୁରୀରେ ୩ ଓ ସୁନ୍ଦରଗଡ଼ ଜିଲ୍ଲାରେ ମାତ୍ର ଗୋଟିଏ କେନ୍ଦ୍ରରେ ଟିକାକରଣ କରାଯାଉଛି।

ରାଜ୍ୟରେ ୪୧ ହଜାର ୨୯୦ ଡୋଜ କୋଭିସିଲଡ ଥିବା ବେଳେ ୩ ଲକ୍ଷ ୫୪ ହଜାର ୧୩୦ ଡୋଜ କୋଭାକ୍ସିନ ମହଜୁଦ ରହିଛି। ଟିକା ସଙ୍କଟକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ବଢିବାରେ ଲାଗିଛି । ଆସନ୍ତା ୧୫ ତାରିଖରେ କେନ୍ଦ୍ର ସରକାର କୋଭିସିଲଡ ଟିକା ପଠାଇବେ । ତେଣୁ ସେ ପର୍ଯ୍ୟନ୍ତ ରାଜ୍ୟରେ ଟିକାକରଣ ବାଧାପ୍ରାପ୍ତ ହେବ । ରାଜ୍ୟ ସରକାର ରେକର୍ଡ ଟିକାକରଣ କରୁଥିବା ବେଳେ କେନ୍ଦ୍ରର ଟାଳଟୁଳ ନୀତି ପାଇଁ ଟିକାକରଣରେ ବାଧା ସୃଷ୍ଟି ହେଉଛି । ରାଜ୍ୟ ସରକାର ତୁରନ୍ତ କୋଭିସିଲଡ ଟିକା ପଠାଇବା ପାଇଁ ଦାବି କରିଛନ୍ତି। ଅନ୍ୟପଟେ ଆସନ୍ତା ୧୫ ତାରିଖ ପରେ ଟିକାକରଣରେ ଗର୍ଭବତୀ ସାମିଲ ହେବେ।

ହୀରାକୁଦରୁ ଛଡ଼ାଯିବ ଚଳିତ ବର୍ଷର ପ୍ରଥମ ବନ୍ୟାଜଳ

ସମ୍ବଲପୁର: ଆଜି ହୀରାକୁଦ ଜଳଭଣ୍ଡାରରୁ ଛଡାଯିବ ଚଳିତ ବର୍ଷର ପ୍ରଥମ ବନ୍ୟାଜଳ। ଦିନ ୧୧ଟାରେ ପାରମ୍ପରିକ ପୂଜାର୍ଚ୍ଚନା ପରେ ଯେକୌଣସି ସମୟରେ ବନ୍ୟାଜଳ ଛଡିଯିବ ବୋଲି ଜଳଭଣ୍ଡାର କର୍ତ୍ତୃପକ୍ଷ ସୂଚନା ଦେଇଛନ୍ତି । ୭ ନମ୍ବର ସ୍ଲୁଇସ ଗେଟରୁ ଛଡ଼ାଯିବ ଚଳିତ ବର୍ଷର ପ୍ରଥମ ବନ୍ୟାଜଳ । ଏହାପରେ ଆବଶ୍ୟକତା ଅନୁଯାୟୀ ଗେଟ ଖୋଲାଯିବ ବୋଲି ସୂଚନା ରହିଛି।

ତେବେ ବନ୍ୟା ପରିସ୍ଥିତି ନଥିବାରୁ କେତେ ଗେଟ ଖୋଲାଯିବ ସେନେଇ ସ୍ପଷ୍ଟ କରିନାହାନ୍ତି ଡ୍ୟାମ କର୍ତୃପକ୍ଷ। ଚଳିତ ବର୍ଷ କରୋନା କଟକଣା ଯୋଗୁଁ ଗେଟ ଖୋଲିବା ସମୟରେ କାହାରିକୁ ଛଡାଯିବ ନାହିଁ ବୋଲି ଘୋଷଣା କରିଛି ପ୍ରଶାସନ। ପ୍ରଶାସନ ପକ୍ଷରୁ ତଳିଆ ଅଞ୍ଚଳ ମାନଙ୍କରେ ମହାନଦୀ କୁଳିଆ ଲୋକମାନଙ୍କୁ ସତର୍କ ରହିବାକୁ ଡାକବାଜି ଯନ୍ତ୍ର ମାଧ୍ୟମରେ ପ୍ରଚାର କରାଯାଇଛି।

ଆଜି ମହାପ୍ରଭୁଙ୍କ ନିକଟରୁ ରଥ ଖଳାକୁ ବିଜେ କରାଯିବ ଆଜ୍ଞା ମାଳ

ପୁରୀ: ଆସନ୍ତାକାଲି ବିଶ୍ୱ ପ୍ରସିଦ୍ଧ ଘୋଷଯାତ୍ରା । ଆଜି ପରମ୍ପରା ଅନୁସାରେ ସକାଳ ଧୂପ ନୀତି ପରେ ମହାପ୍ରଭୁଙ୍କ ନିକଟରୁ ଆଜ୍ଞା ମାଳ ରଥ ଖଳାକୁ ବିଜେ କରାଯିବ। ତିନି ବାଡ଼ରେ ପୂଜାପଣ୍ଡା ସେବକ ମାନେ ଏହି ଆଜ୍ଞା ମାଳ ବିଜେ କରାଇବେ।

ଆଜ୍ଞା ମାଳ ବିଜେ ହୋଇ ବିଜେ କାହାଳୀ ବାଜିବା ପରେ ଵିଧି ପରମ୍ପରା ଅନୁସାରେ ପ୍ରଥମେ ମହାପ୍ରଭୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥ ଟଣା ଯାଇ ସିଂହଦ୍ୱାରକୁ ବିଜେ କରାଯିବ। ପରେ ଦେବୀ ସୁଭଦ୍ରାଙ୍କ ଦେବ ଦଳନ ରଥ ଓ ଶେଷରେ ପ୍ରଭୁ ବଳଭଦ୍ରଙ୍କ ତାଳଧ୍ଵଜ ରଥ ଟଣା ଯାଇ ସିଂହଦ୍ୱାର ସମ୍ମୁଖକୁ ନିଆଯିବ। ବିଶ୍ୱ ପ୍ରସିଦ୍ଧ ଘୋଷଯାତ୍ରାକୁ ଶୃଙ୍ଖଳାର ସହ ଶେଷ କରିବା ପାଇଁ ପ୍ରଶାସନିକ ପ୍ରସ୍ତୁତି ଅନ୍ତିମ ପର୍ଯ୍ୟାୟରେ ପହଁଚିଛି।

ରଥଯାତ୍ରା ବେଳେ ଶାନ୍ତିଶୃଙ୍ଖଳା ରକ୍ଷା ପାଇଁ ପୁରୀ ସହରକୁ ୧୨ଟି ଜୋନରେ ବିଭକ୍ତ କରାଯାଇଛି। ୬୫ ପ୍ଲାଟୁନ ଫୋର୍ସ ମୁତୟନ ହୋଇଛନ୍ତି। ୧୦ ଜଣ ଅତିରିକ୍ତ ଏସପି, ୨୧ଜଣ ଡିଏସପି, ୬୪ ଜଣ ଇନସପେକ୍ଟର, ୨୨୨ ଏଏସ୍ଆଇ ଏବଂ ଏସ୍ଆଇଙ୍କୁ ଦାୟିତ୍ୱ ଦିଆ ଯାଇଛି। ଆଜି ରାତି ୮ଟାରୁ ମଙ୍ଗଳବାର ରାତି ୮ଟା ପର୍ଯ୍ୟନ୍ତ ପୁରୀରେ କର୍ଫ୍ୟୁ ଲାଗୁ ହେବ। ଏଥିସହ ବଡ଼ଦାଣ୍ଡରେ ଥିବା ସବୁ ହୋଟେଲକୁ ମଧ୍ୟ ଖାଲି କରାଯାଇଛି । ବଡ଼ ଦାଣ୍ଡରେ ଥିବା ଘରର ଲୋକ ମାନେ ମଧ୍ୟ ଛାତ ଉପରେ ଠିଆ ହୋଇ ରଥ ଯାତ୍ରା ଦେଖିପାରିବେ ନାହିଁ । ଏଭଳି ଗାଇଡଲାଇନ ଜାରି କରିଛି ଜିଲ୍ଲା ପ୍ରଶାସନ ।

ବାଲିରେ ବିଶ୍ୱର ବୃହତମ ରଥ ନିର୍ମାଣ କଲେ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ

ପୁରୀ: ରଥଯାତ୍ରା ଅବସରରେ ବାଲୁକା କଳାରେ ବିଶ୍ବର ବୃହତ୍ତମ ରଥ ନିର୍ମାଣ । ପୁରୀ ବେଳାଭୂମିରେ ଏହାକୁ ନିର୍ମାଣ କରିଛନ୍ତି ଅନ୍ତର୍ଜାତୀୟ ବାଲୁକା ଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ । ଏହି ବାଲୁକା ରଥର ଉଚ୍ଚତା ୪୩ ଫୁଟ ଥିବାଳେ ଓସାର ୩୫ ଫୁଟ ରହିଛି । ଏହାକୁ ନିର୍ମାଣ କରିବାକୁ ପ୍ରାୟ ୮ ଘଣ୍ଟା ସମୟ ଲାଗିଥିବା କହିଛନ୍ତି ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ।

ଏହାକୁ ସେ ବିଶ୍ୱ ରେକର୍ଡରେ ସ୍ଥାନ ପାଇବା ପାଇଁ ସେ ଆଶା ରଖିଛନ୍ତି । ବିଗତ ବର୍ଷ ପରି ଏଥର ବିନା ଭକ୍ତରେ ରଥଯାତ୍ରା କରିବାକୁ ସରକାର ନିଷ୍ପତ୍ତି ନେଇଥିବାରୁ ଘରେ ରହି ସମସ୍ତେ ଗଣମାଧ୍ୟମ ଜରିଆରେ ମହାପ୍ରଭୁଙ୍କ ରଥ ଦେଖିବାକୁ ନିବେଦନ କରିଛନ୍ତି ।

 

କଳାହାଣ୍ଡିରେ ୯ ବାଘ ଛାଲ ଓ ଦୁଇଟି ବାଘ ନଖ ଜବତ, 7   ଗିରଫ

କଳାହାଣ୍ଡି:  ବଡ ଧରଣର ବାଘ ଛାଲ ରାକେଟର ପର୍ଦ୍ଦାଫାଶ । ଦକ୍ଷିଣ ବନଖଣ୍ଡ ଓ ଉତ୍ତର ବନଖଣ୍ଡ ପକ୍ଷରୁ 9 ବାଘ ଛାଲ ଓ ଦୁଇଟି ବାଘ ନଖ ଜବତ କରାଯାଇଛି । ଘଟଣାରେ 7 ଜଣଙ୍କୁ  ଗିରଫ କରିଛି ବନ ବିଭାଗ । ବାହାର ରାଜ୍ୟର ଜଣେ ଗ୍ରାହକ ପାଖରୁ ପ୍ରଥମେ ସୁରାକ ପାଇ କେନ୍ଦ୍ରୀୟ ମଧ୍ୟ କ୍ଷେତ୍ର ବନ୍ୟ ପ୍ରାଣୀ ନିୟନ୍ତ୍ରଣ ବିଭାଗ, ଛତିଶଗଡ ବନ ବିଭାଗ ଆଉ ଓଡିଶା ବନ ବିଭାଗର ମିଳିତ ଭାବେ ଚଢାଉ କରିଥିଲେ ।

ଚଢ଼ାଉ ପରେ କଳାହାଣ୍ଡି ଜିଲ୍ଲାର 7 ଜଣ ଗିରଫ ହୋଇଥିବା ବେଳେ ଅନ୍ୟ ମାନଙ୍କୁ ଧରିବା ପାଇଁ ବନ ବିଭାଗ ଓ କେନ୍ଦ୍ରୀୟ ବନ୍ୟ ପ୍ରାଣୀ ବିଭାଗ ତଦନ୍ତ ଜାରି ରଖିଛି । ଗିରଫଙ୍କ ମଧ୍ୟରେ ସ୍ଥାନୀୟ ବେପାରୀ ମଧ୍ୟରେ ମ.ରାମପୁରର ମନୋଜ ବେହେରା, ନର୍ଲାର ନରୋତ୍ତମ ଭୋଇ, ବଫଲା ଗ୍ରାମର ରଙ୍ଗା ଚରଣ ଭୋଇ, ଅମାଠର କାର୍ତ୍ତିକ ରଣା, ଭୁଲିଆର ବାଗ, କୋଦଣ୍ଡ ଗୌଡ ଓ ଉଆଁସୁ ଜାନୀ ଅଛନ୍ତି । ତେବେ ଏହି ରାକେଟରେ ଆଉ କେଉଁମାନେ ଜଡିତ ଅଛନ୍ତି ତାହା ତଦନ୍ତ ଚାଲିଥିବା କହିଛନ୍ତି ଦକ୍ଷିଣ ବନଖଣ୍ଡ ଅଧିକାରୀ ନୀତିଶ କୁମାର ।

ପୁଣି ଟିକା ସଂକଟ, ରବିବାର ୨୬ ଜିଲ୍ଲାରେ ବନ୍ଦ ଟିକାକରଣ

ଭୁବନେଶ୍ୱର: ରାଜ୍ୟରେ ପୁଣି ଟିକା ସଂକଟ । କେନ୍ଦ୍ର ଆବଶ୍ୟକୀୟ ଟିକା ଦେଉନଥିବାରୁ ଦିନକୁ ଦିନ ଜଟିଳ ହେଉଛି ଟିକା ସଂକଟ । ଆସନ୍ତାକାଲି ମାତ୍ର ୪ଟି ଜିଲ୍ଲାରେ ହେବ ଟିକାକରଣ । ୪ଟି ଜିଲ୍ଲାର ମୋଟ ୧୨ଟି କେନ୍ଦ୍ରରେ ଟିକା ଦିଆଯିବ । ଗଞ୍ଜାମରେ ୪, ନବରଙ୍ଗପୁରରେ ୪, ପୁରୀରେ ୩ ଓ ସୁନ୍ଦରଗଡ଼ ଜିଲ୍ଲାରେ ମାତ୍ର ଗୋଟିଏ କେନ୍ଦ୍ରରେ ଟିକାକରଣ କରାଯିବ ।

ରାଜ୍ୟରେ ୪୧ ହଜାର ୨୯୦ ଡୋଜ କୋଭିସିଲଡ ଥିବା ବେଳେ ୩ ଲକ୍ଷ ୫୪ ହଜାର ୧୩୦ ଡୋଜ କୋଭାକ୍ସିନ ମହଜୁଦ ରହିଛି । ଟିକା ସଙ୍କଟକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ବଢିବାରେ ଲାଗିଛି । କେନ୍ଦ୍ର ସରକାର ଅଧିକରୁ ଅଧିକ ଟିକା ଦେବା ପାଇଁ ଦାବି କରି ଆସୁଛନ୍ତି ରାଜ୍ୟ ସରକାର ।

ବ୍ୟାଙ୍କର ଗୁରୁତ୍ବପୂର୍ଣ୍ଣ ପଦବିରେ ଥିବା ଅଧିକାରୀ ବର୍ଷକୁ ୧୦ ଦିନ ଯିବେ ଛୁଟିରେ

ନୂଆଦିଲ୍ଲୀ: ବଦଳିଲା ନିୟମ । ଏଣିକି ବ୍ୟାଙ୍କର ଅତି ଗୁରୁତ୍ବପୂର୍ଣ୍ଣ ପଦବିରେ ଥିବା ଅଧିକାରୀ, ଟ୍ରେଜେରୀ ଓ କରେନ୍ସି ଚେଷ୍ଟ ଦାୟିତ୍ବରେ ଥିବା ଅଧିକାରୀଙ୍କୁ ବାଧ୍ୟତାମୂଳକ ଛୁଟିରେ ପଠାଯିବ । ପ୍ରତିବର୍ଷ ଅତି କମରେ ୧୦ ଦିନ ଲାଗି ସେମାନଙ୍କୁ ଛୁଟିରେ ପଠାଯିବ । ପରିବର୍ତ୍ତିତ ରିସ୍କ ମ୍ୟାନେଜମେଣ୍ଟ ଗାଇଡଲାଇନ ଅନୁଯାୟୀ ଭାରତୀୟ ରିଜର୍ଭ ବ୍ୟାଙ୍କ ଏହି ନୀତି ଘୋଷଣା କରିଛି । ବିବୃତିରେ ଆରବିଆଇ କହିଛି ବ୍ୟାଙ୍କଗୁଡିକରେ ଗୁରୁତ୍ବପୂର୍ଣ୍ଣ ପଦବିରେ ନିୟୋଜିତ ଅଧିକାରୀମାନଙ୍କୁ କୌଣସି ସୂଚନା ନଦେଇ ଛୁଟିରେ ପଠାଯିବ ।

ଛୁଟିର ପରିମାଣ ସର୍ବନିମ୍ନ ୧୦ ଦିନ ହେବ । ଛୁଟି ନେଇ ସେମାନଙ୍କୁ ଆଗୁଆ କୌଣସି ସୂଚନା ଦିଆଯିବ ନାହିଁ । ଆକସ୍ମିକ ଭାବେ ଏହି ନିୟମ କାର୍ଯ୍ୟକାରୀ ହେବ । ଏନେଇ ସମସ୍ତ ବ୍ୟବସ୍ଥା ଚୂଡାନ୍ତ କରିବାକୁ ଆରବିଆଇ ନିର୍ଦ୍ଦେଶ ଦେଇଛି । ଆରବିଆଇର ଏହି ନିର୍ଦ୍ଦେଶ ଫଳରେ ଗତ ୨୦୧୫ରେ ଏପ୍ରିଲ ୨୩ରେ ଜାରି ଗାଇଡଲାଇନ ରଦ୍ଦ ହୋଇଯାଇଛି ।

ଏହି ଛୁଟି କାଳରେ କର୍ମଚାରୀମାନେ ସଶରୀରରେ ବ୍ୟାଙ୍କକୁ ଆସିପାରିବେ ନାହିଁ ବା ଭର୍ଚୁଆଲରେ ଯୋଗାଯୋଗ କରିପାରିବେ ନାହିଁ । କେବଳ ଇ-ମେଲ ଜରିଆରେ ଯୋଗସୂତ୍ର ରକ୍ଷା କରିବେ । ରିସ୍କ ମଡେଲିଂ, ମଡେଲ ଭାଲିଡେସନ ଆଦି କ୍ଷେତ୍ରରେ ମଧ୍ୟ ଏହି ନିୟମ କାର୍ଯ୍ୟକାରୀ ହେବ । ବ୍ୟାଙ୍କରେ ଜାଲିଆତି ରୋକିବା ଲାଗି ଏହି ପଦକ୍ଷେପ ନିଆଯାଇଛି ବୋଲି କୁହାଯାଇଛି ।