ନୂଆଦିଲ୍ଲୀ: ଆସନ୍ତା ଜୁନ୍ ୧ ତାରିଖରୁ ଅନେକ ନୂଆ ପରିବର୍ତ୍ତନ ହେବାକୁ ଯାଉଛି । ଆଉ କିଛିଟା ପରିବର୍ତ୍ତନ ସିଧା ଜନତାଙ୍କ ପକେଟ୍ ଉପରେ ପଡିପାରେ। ଏବେ ଜାଣି ରଖନ୍ତୁ, ଜୁନ୍ ପହିଲାରୁ ହେବାକୁ ଥିବା ୬ଟି ବଡ଼ ପରିବର୍ତ୍ତନ ବିଷୟରେ…
ପିଏଫ୍ ଆକାଉଣ୍ଟ-ଆଧାର ଲିଙ୍କ୍ ଜରୁରୀ
EPFOର ନୂଆ ନିୟମ ଅନୁସାରେ ସମସ୍ତ ଆକାଉଣ୍ଟଧାରୀଙ୍କ ନିଜ PF ଆକାଉଣ୍ଟ ସହ ଆଧାର କାର୍ଡ ଲିଙ୍କ କରିବା ଅତ୍ୟନ୍ତ ଜରୁରୀ । ଯଦି କେହି ଖାତାଧାରୀ କିମ୍ବା କର୍ମଚାରୀ ଜୁନ୍ ୧ ମଧ୍ୟରେ ଏଭଳି ନକରନ୍ତି ତାହେଲେ ତାଙ୍କୁ କିଛି କ୍ଷତି ଭରଣା ମଧ୍ୟ କରିବାକୁ ପଡିପାରେ । ଏପରିକି ଖାତାକୁ ଆସୁଥିବା ସୁବିଧାକୁ ମଧ୍ୟ ଅଟକାଇ ଦିଆଯାଇପାରେ । ଏନେଇ EPFO ପକ୍ଷରୁ ବିଜ୍ଞପ୍ତି ମଧ୍ୟ ଜାରି କରାଯାଇଛି ।
BOB ରେ ବଦଳିବ ପେମେଣ୍ଟ ବ୍ୟବସ୍ଥା
ଜୁନ୍ ୧ରୁ ବ୍ୟାଙ୍କିଂ ସେବାରେ ପରିବର୍ତ୍ତନ ହେବାକୁ ଯାଉଛି । ବ୍ୟାଙ୍କ ଅଫ୍ ବରୋଦାର ଗ୍ରାହକଙ୍କ ପାଇଁ ଏହି ତାରିଖରୁ ପେମେଣ୍ଟ ବ୍ୟବସ୍ଥା ବଦଳିବାକୁ ଯାଉଛି । ଅଧିକାରୀଙ୍କ କହିବାନୁଯାୟୀ, ଗ୍ରାହକଙ୍କ ପାଇଁ ପଜିଟିଭ ପେ ସିଷ୍ଟମ୍ ଅଧିନରେ ଚେକ୍ ଡିଟେଲ୍ସକୁ ସେତେବେଳେ ରିକନଫର୍ମ କରାଯିବ ଯେତେବେଳେ ୨ ଲକ୍ଷରୁ ଅଧିକ ଟଙ୍କାର ବ୍ୟାଙ୍କ ଚେକ୍ ଜାରି କରାଯିବ । ଏହି ସୂଚନା SMS, ମୋବାଇଲ୍ ଆପ୍, ଇଣ୍ଟରନେଟ୍ ବ୍ୟାଙ୍କିଂ କିମ୍ବା ATM ଜରିଆାରେ ଦିଆଯିବ ।
ଫ୍ରିରେ ଗୁଗୁଲ୍ ଫଟୋ ବ୍ୟବହାର କରିପାରିବେ ନାହିଁ-
ଭିଡ଼ଓ ଓ ଫଟୋ ବ୍ୟାକଅପ୍ ଲାଗି ଏବେ ମାଗଣାରେ ଗୁଗୁଲର ଫଟୋସ୍ ବ୍ୟବହାର କରିପାରିବେ ନାହିଁ । ଜୁନ୍ ୧ରୁ ଫଟୋ ଓ ଭିଡିଓ ଅପଲୋଡ୍ କରିବା ଲାଗି ପଇସା ଦେବାକୁ ପଡିବ ।
ଏଥିପାଇଁ ମାସିକ କିମ୍ବା ବାର୍ଷିକ ପ୍ଲାନ୍ ମଧ୍ୟ ଆସିବାକୁ ଯାଉଛି । ଯେଉଁଥିରେ ୧୦୦ GB ପାଇଁ ୧୪୯ ଟଙ୍କା ମାସିକ ଏବଂ ବାର୍ଷିକ ୧୪୯୯ ଟଙ୍କା ଦେବାକୁ ପଡିବ । ସେହିପରି ୨୦୦ GB ପାଇଁ ୨୧୯ ଟଙ୍କା ମାସିକ ଏବଂ ବାର୍ଷିକ ୨୧୯୯ ଟଙ୍କା ଦେବାକୁ ପଡିବ । ଏହାବ୍ୟତୀତ ୨TB ପାଇଁ ୭୪୯ ଟଙ୍କା ମାସିକ ଏବଂ ବାର୍ଷିକ ୭୫୦୦ ଟଙ୍କା ଦେବାକୁ ପଡିବ ।
ଏଲପିଜି ସିଲିଣ୍ଡରର ଦାମରେ ହୋଇପାରେ ପରିବର୍ତ୍ତନ-
ସରକାରୀ ତୈଳ କମ୍ପାନୀ ଗୁଡିକ ପ୍ରତି ମାସ ପହିଲାରେ ଏଲପିଜି ଗ୍ୟାସର ମୂଲ୍ୟ ସମୀକ୍ଷା କରିଥାନ୍ତି । ତେଣୁ କରି ଏଥିରେ ପରିବର୍ତ୍ତନ ହେବାର ସମ୍ଭାବନା ରହିଛି ।
ଇନକମ୍ ଟ୍ୟାକ୍ସ ୱେବସାଇଟ୍ ବନ୍ଦ ରହିବ-
ଜୁନ୍ ୧ରୁ ୬ ତାରିଖ ଯାଏଁ ଇନକମ୍ ଟ୍ୟାକ୍ସ ଡିପାର୍ଟମେଣ୍ଟର ଇ-ଫାଇଲିଂ ପୋର୍ଟାଲ୍ କାମ କରିବ ନାହିଁ । କାରଣ ବିଭାଗ ପକ୍ଷରୁ ଟ୍ୟାକ୍ସ ପେୟର୍ସଙ୍କ ପାଇଁ ଇନକମ୍ ଟ୍ୟାକ୍ସ ଇ-ଫାଇଲିଂର ନୂଆ ପୋର୍ଟାଲ୍ ଲଞ୍ଚ ହେବାକୁ ଯାଉଛି । ଯାହାର ନାମ http://INCOMETAX.GOV.IN ରହିବ ।
ୟୁଟ୍ୟୁବ୍ ଇନକମ୍ ଉପରେ ଟ୍ୟାକ୍ସ-
ୟୁଜର୍ସଙ୍କୁ ୟୁଟ୍ୟୁବରୁ ହେଉଥିବା ଇନକମ୍ ଉପରେ ଜୁନ୍ ୧ ତାରିଖରୁ ଟ୍ୟାକ୍ସ ଲାଗିବାକୁ ଯାଉଛି । ହେଲେ ଆପଣଙ୍କୁ ସେହି ଭ୍ୟୁଜ୍ ଉପରେ ଟ୍ୟାକ୍ସ ଦେବାକୁ ପଡିବ ଯାହା ଆମେରିକା ଭ୍ୟୁଅର୍ସଙ୍କ ସହ ମିଶିଛି ।
