spot_img
Home Blog Page 5544

ଏଣିକି +୩ ଛାତ୍ରଛାତ୍ରୀ ମହାମାରୀ ମୁକାବିଲା ଓ ବିପର୍ଯ୍ୟୟ ପରିଚାଳନା ନେଇ ପାଠ ପଢ଼ିବେ

ଭୁବନେଶ୍ୱର: ଯୁକ୍ତ ୩ରେ ପଢ଼ାଯିବ ବିପର୍ଯ୍ୟୟ ଓ ମହାମାରୀ ପରିଚାଳନା ବିଷୟରେ ନୂଆ ପାଠ୍ୟକ୍ରମ। ମୁଖ୍ୟମନ୍ତ୍ରୀଙ୍କ ନିଷ୍ପତ୍ତିକ୍ରମେ ଆଜି ଓଡ଼ିଶା ରାଜ୍ୟ ଉଚ୍ଚଶିକ୍ଷା ପରିଷଦ ବୈଠକ ଏହାକୁ ଚୂଡ଼ାନ୍ତ ରୂପ ଦେଇଛି। ଏହି ପାଠ୍ୟକ୍ରମ ଚଳିତ ଶିକ୍ଷାବର୍ଷରୁ ଆରମ୍ଭ ହେବ। ଯୁକ୍ତ ୩ ପ୍ରଥମ ବର୍ଷର ପ୍ରଥମ ସେମିଷ୍ଟରରେ ବାଧ୍ୟତାମୂଳକ ଭାବେ ପଢ଼ାଯିବ ଏହି ବିଷୟ। ଉଭୟ ପ୍ରାକ୍ଟିକାଲ ଓ ଥିଓରି ମିଶି ୧୦୦ ମାର୍କର ପେପର ରହିବ।

ବିପର୍ଯ୍ୟୟ ସହିତ ମହାମାରୀରେ ଛାତ୍ରଛାତ୍ରୀମାନେ କିପରି ବଞ୍ଚିବା ପାଇଁ ଆତ୍ମବଳ ପାଇବେ, ସେନେଇ ନୂଆ ସିଲାବସ୍‌ ପ୍ରସ୍ତୁତ ହୋଇଛି। ବିପର୍ଯ୍ୟୟ ଓ ମହାମାରୀଗୁଡ଼ିକ ଜଳବାୟୁଜନିତ କିମ୍ବା ଜୈବିକଜନିତ ହେଉ, ସେସବୁର କିପରି ଦକ୍ଷତାର ସହ ମୁକାବିଲା କରାଯିବ, ତାହା ଛାତ୍ରଛାତ୍ରୀଙ୍କୁ ଶିକ୍ଷା ଦିଆଯିବ। ଓଡ଼ିଶା ସରକାରଙ୍କ ଏହି ପଦକ୍ଷେପ ଯୁଗାନ୍ତକାରୀ ବୋଲି ଉଚ୍ଚ ପରିଷଦ ଉପାଧ୍ୟକ୍ଷ କହିଛନ୍ତି।

ବିଶ୍ୱବିଦ୍ୟାଳୟର ଶୈକ୍ଷିକ ବାତାବରଣରେ ଉନ୍ନତି ଅଣାଯିବା ସହିତ, ନାକ୍‌, ଏନ୍‌ଆଇଆର୍‌ଏଫ୍‌ ରାଙ୍କିଙ୍ଗ୍‌, ଜେଆର୍‌ଏଫ୍‌, ପିଜି ଆଡମିଶନକୁ ଆହୁରି ବ୍ୟବସ୍ଥିତ ଢଙ୍ଗରେ କରିବା ପାଇଁ ନିଷ୍ପତ୍ତି ହୋଇଛି। ଏହା ସହିତ ଗୁଣାତ୍ମକ ଶିକ୍ଷା ପ୍ରଦାନ ପାଇଁ କଲେଜସ୍ତରରେ ପାଠ ପଢ଼ାଉଥିବା ଶିକ୍ଷକମାନଙ୍କୁ ପୁଣେ ଓ ହାଇଦ୍ରାବାଦ ସ୍ଥିତ ବିଶ୍ୱବିଦ୍ୟାଳୟରେ ପ୍ରଶିକ୍ଷଣ ଦିଆଯିବ।

ପୁଣି ତେଜିଲା ଫୋକସ୍ ଷ୍ଟେଟ୍ ମାନ୍ୟତା ରାଜନୀତି, ବିଜେଡି ପରେ ରାଜ୍ୟ ପାଇଁ ସ୍ୱର ଶାଣିତ କଲା କଂଗ୍ରେସ

ଭୁବନେଶ୍ୱର: ଦିନକୁ ଦିନ କମିବାରେ ଲାଗିଛି କେନ୍ଦ୍ରୀୟ ଅନୁଦାନ। ବିଭିନ୍ନ କ୍ଷେତ୍ରରେ ଟିକସ ଅଂଶରୁ ରାଜ୍ୟକୁ ବଞ୍ଚିତ କରିବା ସହ ଅର୍ଥକାଟ୍ କରୁଛି କେନ୍ଦ୍ର। ୭ବର୍ଷରେ ମୋଦି ସରକାରଙ୍କ ଏପରି ଅଣଦେଖାକୁ ବିରୋଧ କରି କେନ୍ଦ୍ର ଉପରେ ବର୍ଷିଛି ରାଜ୍ୟ କଂଗ୍ରେସ। ଦଳ ଅଭିଯୋଗ କରିଛି, ୨୦୧୫ରେ ୧୪ପ୍ରତିଶତ ଓ ୨୦୨୦-୨୧ରେ ୩୦ପ୍ରତିଶତ କେନ୍ଦ୍ରୀୟ ଅନୁଦାନ କମିଛି। ରାଜ୍ୟକୁ ମିଳୁନି ସେସ୍ ସରଚାର୍ଜ ଭାଗ। ପେଟ୍ରୋଲ ଓ ଡିଜେଲରେ କେନ୍ଦ୍ର ଅଧିକ ଟିକସ ନେଉଛି, ରାଜ୍ୟକୁ କମ୍‌ ଦେଉଛି।

ଏପରିକି ବିଭିନ୍ନ କ୍ଷେତ୍ରରେ କେନ୍ଦ୍ର ଟିକସର ସିଂହଭାଗ ନେଉଥିବା ବେଳେ ରାଜ୍ୟକୁ ଦେଉଛି କମ୍। ୮ଟି କେନ୍ଦ୍ରୀୟ ଯୋଜନା ବନ୍ଦ କରିବା ସହ ୩୩ଟି କେନ୍ଦ୍ର ପ୍ରବର୍ତ୍ତିତ ଯୋଜନାରେ ଅର୍ଥ କାଟ୍ କରାଯାଇଛି। ପ୍ରତିବର୍ଷ ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଥିବା ଓଡ଼ିଶାକୁ ଫୋକସ୍ ଷ୍ଟେଟର ମାନ୍ୟତା ଦେବାକୁ ଦାବି କରିଛି କଂଗ୍ରେସ। ସେପଟେ ରାଜ୍ୟ ପ୍ରତି କେନ୍ଦ୍ର ଅବହେଳା କରିଥିବା କଥାକୁ ବିଜେପି ମାନିଛି, ହେଲେ ଫୋକସ୍ ଷ୍ଟେଟ୍ ପ୍ରସଙ୍ଗକୁ ଏଡ଼ାଇ ରାଜନୈତିକ ବୟାନବାଜି କରିଛି।

ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦାବିରେ ନିରାଶ ହେବା ପରେ ଓଡ଼ିଶା ସ୍ପେଶାଲ ଫୋକସ୍ ଷ୍ଟେଟ୍ ମାନ୍ୟତା ଦେବା ଦାବିକୁ ବିଜେଡି ଦୋହରାଇ ଆସୁଛି। ହେଲେ ନୀତି ଆୟୋଗର ଆଳ ଦେଖାଇ କେନ୍ଦ୍ର ଏହି ଦାବିକୁ ଏଡ଼ାଇ ଚାଲିଛି। ଉଭୟ ୟୁପିଏ ଓ ଏନଡିଏ ସରକାରଙ୍କ ପାଖରେ ବିଜେଡି ସାଂସଦମାନେ ଏହି ଦାବି ଦୋହରାଇ ଚାଲିଛନ୍ତି। କଂଗ୍ରେସର ଫୋକସ୍ ଷ୍ଟେଟ ମାନ୍ୟତା ଦାବି ସ୍ୱାଗତଯୋଗ୍ୟ ବୋଲି ବିଜେଡି କହିବା ସହ ଏହି ସ୍ୱରରେ ବିଜେପି ସ୍ୱର ମିଳାଇବା ପାଇଁ ଦଳ ପରାମର୍ଶ ଦେଇଛି।  ଦୁଇ ଦିନ ତଳେ ବିଜେଡି ସାଂସଦ ଅମର ପଟ୍ଟନାୟକ କେନ୍ଦ୍ରୀୟ ଯୋଜନାରେ ରାଜ୍ୟର ଅଂଶଧନ ୨୫ ପ୍ରତିଶତ ନଟପିବା ପାଇଁ ସ୍ପେଶାଲ ମେନସନ ଜରିଆରେ ଦାବି କରିଥିଲେ ।

ଓଡ଼ିଶା ଶିଳ୍ପାୟନରେ ଯୋଡ଼ି ହେଉଛି ନୂଆ ଫର୍ଦ୍ଦ, ମ୍ୟାନୁଫ୍ୟାକଚରିଂର ହବ୍‌ ହେବ ଓଡ଼ିଶା

ଭୁବନେଶ୍ୱର: ରାଜ୍ୟରେ ଶିଳ୍ପାୟନର ନୂଆ ଅଧ୍ୟାୟ। ୧୪ଟି ଶିଳ୍ପର ଉଦଘାଟନ ଓ ଶିଳାନ୍ୟାସ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ୪୩୬ କୋଟି ଟଙ୍କା ପୁଞ୍ଜିନିବେଶ ହୋଇଥିବା ୩ ଶିଳ୍ପର ଉଦଘାଟନ କରିଛନ୍ତି। ସେହିପରି ୧୧ଶହ କୋଟି ଟଙ୍କା ପୁଞ୍ଜିନିବେଶ ହୋଇଥିବା ୧୧ଟି ଶିଳ୍ପର ଶିଳାନ୍ୟାସ କରିଛନ୍ତି। ଏଥିରେ ୩ ହଜାର ୭୭୩ ନିଯୁକ୍ତି ସୁଯୋଗ ସୃଷ୍ଟିହେବ।

ଅକ୍ଷୟ ଶକ୍ତି ଉତ୍ପାଦନ, ମେଟାଲ ଓ ଆନୁସଙ୍ଗିକ ଶିଳ୍ପରେ ପୁଞ୍ଜିନିବେଶ ହୋଇଛି। ମୁଖ୍ୟମନ୍ତ୍ରୀ କହିଛନ୍ତି, ଓଡିଶା ପୂର୍ବ ଭାରତର ଶିଳ୍ପ ହବ୍‌। ସ୍ଥିର ଶିଳ୍ପ ନୀତି ରାଜ୍ୟରେ ଶିଳ୍ପ ଅଭିବୃଦ୍ଧିକୁ ତ୍ୱରାନ୍ୱିତ କରିଛି। ଇଜ ଅଫ ଡୁଇଙ୍ଗରେ ରାଜ୍ୟର ଶିଳ୍ପାୟନ ପ୍ରକ୍ରିୟାରେ ସହାୟକ ହୋଇଛି। ଓଡ଼ିଶାର ଶିଳ୍ପଗୁ଼ଡିକ ସାମାଜିକ ଦାୟିତ୍ୱବୋଧ କାର୍ଯ୍ୟକ୍ରମରେ ସହଯୋଗ କରିଛନ୍ତି। ଏହାଦ୍ୱାରା ରାଜ୍ୟର ଅର୍ଥନୈତିକ ପ୍ରଗତିରେ ଯଥେଷ୍ଟ ଅଗ୍ରଗତି ପରିଲ୍ଲଖିତ ହୋଇଛି। କୋଭିଡ ଦ୍ୱିତୀୟ ଲହର ସମୟରେ ଅକ୍ସିଜେନ ଅଭାବକୁ ଦୂର କରିଛନ୍ତି ଶିଳ୍ପାନୁଷ୍ଠାନ।

ବଲାଙ୍ଗୀରରେ ଆଦିତ୍ୟ ବିର୍ଲା ପକ୍ଷରୁ ଅକ୍ଷୟଶକ୍ତି ପ୍ରକଳ୍ପର ଉଦଘାଟନ। ଆଦିତ୍ୟ ବିର୍ଲା ପକ୍ଷରୁ ୩୫୨.୫୦ କୋଟି ଟଙ୍କାର ପୁଞ୍ଜିନିବେଶ କରାଯାଇଛି। ଝାରସୁଗୁଡାରେ ୬୪.୪୩ କୋଟି ପୁଞ୍ଜିନିବେଶରେ ହୋଇଛି ଆଲୁମିନା ରିଫାଇନାରୀ ପ୍ରକଳ୍ପ। ଖୋର୍ଦ୍ଧା ଛତାବରରେ ୨୦ କୋଟି ବ୍ୟୟରେ ହୋଇଛି ଗାର୍ମେଣ୍ଟ ୟୁନିଟ ଉଦଘାଟିତ ହୋଇଛି। ପାରାଦୀପରେ ସଲଫ୍ୟୁରିକ ଏସିଡ ସଂପ୍ରସାରଣ ପ୍ରକଳ୍ପ କରିବ ଇଫକୋ। ସୁନ୍ଦରଗଡ ଲହୁଣୀପଡାରେ ହେବ ଲୁହାପଥର ବେନିଫିକେସନ ପ୍ଲାଣ୍ଟ। କଟକ ଖୁଣ୍ଟୁଣିରେ ହେବ ପିଭିସି ପାଇପ ଉତ୍ପାଦନ ଶିଳ୍ପ।

ଖୋର୍ଦ୍ଧାରେ ବ୍ରିଟାନିଆ ପକ୍ଷରୁ କରାଯିବ ବିସ୍କୁଟ ଫ୍ୟାକ୍ଟ୍ରି। ସେହିପରି ଖୋର୍ଦ୍ଧା ଚମ୍ପାଝରରେ ଏନ.କେ ଆନନ୍ଦ ପକ୍ଷରୁ କରାଯିବ ଜୋତା କାରଖାନା। କଟକ ରାମଦାସପୁରରେ ହେବ ଥର୍ମୋ ପ୍ଲାଷ୍ଟିକ ପାଇପ କାରଖାନା, ଭାରତ ମସଲା ପକ୍ଷରୁ ରାମଦାସପୁରରେ ହେବ ଖାଦ୍ୟ ପ୍ରକ୍ରିୟାକରଣ ୟୁନିଟ, ଚୌଦ୍ୱାରରେ ବାୟୋ ମେଡିକାଲ ୱେଷ୍ଟ ମ୍ୟାନେଜମେଣ୍ଟ ପ୍ଲାଣ୍ଟ, ଅର୍ଗାନିକ ଫର୍ଟିଲାଇଜର ଉତ୍ପାଦନ ୟୁନିଟ ଓ ନୁଡୁଲସ ଉତ୍ପାଦନ କାରଖାନା ହେବ। ନଭେମ୍ବର ୨୦୧୭ରୁ ୧୯୫ଟି ପ୍ରକଳ୍ପ ରାଜ୍ୟରେ ବାସ୍ତବ ରୂପ ନେଇଛି। ୯୨ହଜାର ୪୬୦ କୋଟି ୮୪ ଲକ୍ଷ ଟଙ୍କାର ପୁଞ୍ଜିନିବେଶ ହୋଇଛି। ଏକ ଲକ୍ଷ ୧୮ ହଜାର ୨୧୧ ଜଣ ଯୁବକ ଯୁବତୀଙ୍କୁ ମିଳିଛି ନିଯୁକ୍ତି ସୁଯୋଗ।

Tokyo Olympics: ଉଦଘାଟନୀ ଉତ୍ସବରେ ଧ୍ୱଜାବାହକ ସାଜିଲେ ମେରି କମ୍ ଓ ମନପ୍ରୀତ

ଟୋକିଓ: କରୋନା କାଳରେ ଟୋକିଓ ଅଲମ୍ପିକ୍ସ ଜୁଲାଇ ୨୩ରୁ ଆରମ୍ଭ ହୋଇଛି । ୩୨ତମ ଅଲମ୍ପିକ୍ ଗେମ୍ସର ଉଦଘାଟନୀ ସମାରୋହରେ ଭାରତୀୟ ଦଳର ନେତୃତ୍ୱ ନେଇଛନ୍ତି ୬ ଥର ବିଶ୍ୱ ଚାମ୍ପିଅନ୍ ମେରି କମ୍ ଏବଂ ପୁରୁଷ ହକି ଦଳର ଅଧିନାୟକ ମନପ୍ରୀତ ସିଂ ।

ଜାପାନ ଶାସକ ନାରୁହିଟୋ ଅନ୍ତର୍ଜାତୀୟ ଅଲମ୍ପିକ୍ କମିଟି (ଆଇଓସି)ର ମୁଖ୍ୟ ଥୋମାସ୍ ବାକଙ୍କ ସହ ଷ୍ଟାଡିୟମରେ ପହଞ୍ଚିଥିଲେ। ଟୋକିଓ ୨୦୨୦ର ପ୍ରତୀକ ପ୍ରଦର୍ଶନ କରିବାକୁ ୨୦ ସେକେଣ୍ଡ ଯାଏଁ ନୀଳ ଏବଂ ଧଳା ରଙ୍ଗର ଆତସବାଜି କରାଯାଇଥିଲା ।

ଉଲ୍ଲେଖଯୋଗ୍ୟ, ଜୁଲାଇ ୨୩ରେ ନ୍ୟାସନାଲ୍ ଷ୍ଟାଡିୟମରେ ଅନୁଷ୍ଠିତ ସମାରୋହରେ ଶାରୀରିକ ଭାବେ କମ୍ ସଂଖ୍ୟକ ବ୍ୟକ୍ତି ସାମିଲ ହେବା ନେଇ ଆୟୋଜକମାନେ ପ୍ରକାଶ କରିଥିଲେ । ଏପରିକି  ଟୋକିଓ ଅଲମ୍ପିକ ବେଳେ କରୋନା ସଂକ୍ରମଣ ବଢ଼ିବା ଆଶଙ୍କା କରି ଖେଳ ସରିବା ଯାଏଁ ଜାପାନ ସରକାରଙ୍କ ପକ୍ଷରୁ ଏମର୍ଜେନ୍ସି ଘୋଷଣା କରାଯାଇଛି। ତେବେ ଏହି ଉତ୍ସବରେ ଅନ୍ତର୍ଜାତୀୟ ଅତିଥିମାନଙ୍କ ମଧ୍ୟରେ ଆମେରିକାର ଫାଷ୍ଟ୍ ଲେଡି ଜିଲ୍ ବିଡେନ ସାମିଲ ।

Japan To Declare Covid-19 Emergency For Tokyo As It Mulls Olympics Without Fans

କରୋନାରେ ମୃତ ୧୭ ସାମ୍ବାଦିକଙ୍କ ପରିବାରକୁ ମୁଖ୍ୟମନ୍ତ୍ରୀଙ୍କ ସହାୟତା ରାଶି, ଧନ୍ୟବାଦ ଜଣାଇଲେ ସରକାରଙ୍କ ଗଣମାଧ୍ୟମ ଉପଦେଷ୍ଟା ମାନସ ମଙ୍ଗରାଜ

ଭୁବନେଶ୍ୱର: କୋଭିଡରେ ମୃତ ସାମ୍ବାଦିକଙ୍କ ପରିବାରକୁ ସହାୟତା। ମୃତ ୧୭ଜଣ ସାମ୍ବାଦିକଙ୍କ ପରିବାରକୁ ଅନୁକମ୍ପା ରାଶି ମଞ୍ଜୁର କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ୧୫ଲକ୍ଷ ଲେଖାଏଁ ଅନୁକମ୍ପା ରାଶି ମଞ୍ଜୁର କରାଯାଇଛି। ଭୁବନେଶ୍ୱରର ୪ ଜଣ, ବଲାଙ୍ଗୀରର ୩ ଜଣ ସାମ୍ବାଦିକ, ଗଞ୍ଜାମର ୭ ଜଣ, ଯାଜପୁରର ୨ ଜଣ ଏବଂ କଳାହାଣ୍ଡିର ଜଣେ ସାମ୍ବାଦିକଙ୍କ ପରିବାକୁ ସହାୟତା ରାଶି ମଞ୍ଜୁର ହୋଇଛି। ମୁଖ୍ୟମନ୍ତ୍ରୀଙ୍କ ଅନୁମୋଦନ କ୍ରମେ ଅନୁକମ୍ପା ରାଶି ଏହି ୧୭ ଜଣ ସାମ୍ବାଦିକଙ୍କ ପରିବାରକୁ ପ୍ରଦାନ କରାଯିବ।

ସେପଟେ ମୃତ ସାମ୍ବାଦିକଙ୍କୁ ରାଜ୍ୟ ସରକାର ସହାୟତାର ହାତ ବଢାଇଥିବାରୁ ଧନ୍ୟବାଦ ଜଣାଇଛନ୍ତି ସରକାରଙ୍କ ଗଣମାଧ୍ୟମ ଉପଦେଷ୍ଟା ମାନସ କୁମାର ମଙ୍ଗରାଜ।

ସାମ୍ବାଦିକ ମାନଙ୍କୁ ସମ୍ମୁଖ ଯୋଦ୍ଧା ଘୋଷଣା କରିଥିଲେ ରାଜ୍ୟ ସରକାର। କୋଭିଡରେ ଯଦି କୈଣସି କର୍ତ୍ତବ୍ୟରତ ସାମ୍ବାଦିକଙ୍କ ମୃତ୍ୟୁ ଘଟେ, ତେବେ ରାଜ୍ୟ ସରକାରଙ୍କ ପକ୍ଷରୁ ସହାୟତା ରାଶି ଯୋଗାଇଦିଆଯିବା ନେଇ ଘୋଷଣା କରିଥିଲେ ମୁଖ୍ୟମନ୍ତ୍ରୀ। ପୂର୍ବରୁ ଅନେତକ ସାମ୍ବାଦିକଙ୍କ ପରିବାରକୁ ରାଜ୍ୟ ସରକାରଙ୍କ ପକ୍ଷରୁ ସହାୟତା ରାଶି ଯୋଗାଇ ଦିଆଯାଇଛି। ଆଜି ୧୭ଜଣ ସାମ୍ବାଦିକଙ୍କ ପରିବାରକୁ ଅନୁକମ୍ପା ରାଶି ପ୍ରଦାନ ନେଇ ମଞ୍ଜୁର କରିଛନ୍ତି ମୁଖ୍ୟମନ୍ତ୍ରୀ।

‘ଜି-ଓଡ଼ିଶାର ଭୁବନେଶ୍ୱରରେ କାର୍ଯ୍ୟକରୁଥିବା ସ୍ୱର୍ଗତ ମାନସ ଜୟପୁରିଆ, ବରିଷ୍ଠ ସାମ୍ବାଦିକ ବସନ୍ତ ଦାସ, ‘ଆଜିକାଲି’ର ସାମ୍ବାଦିକ ବିଜୟଲକ୍ଷ୍ମୀ ମହାନ୍ତି, ‘ଟାଇମସ୍‌ ଅଫ୍‌ ଇଣ୍ଡିଆ’ର ସ୍ୱର୍ଗତ ପ୍ରୀତିମାନ୍‌ ମହାପାତ୍ରଙ୍କ ପରିବାରବର୍ଗ ୧୫ ଲକ୍ଷ ଟଙ୍କା ଲେଖାଏଁ ଅନୁକମ୍ପା ରାଶି ପାଇବେ। ସେହିପରି ଗଞ୍ଜାମ ଜିଲ୍ଲାର ‘ଟିଭି ନ୍ୟୁଜ୍‌ ୬(ଓ୍ୱେବ୍‌)’ର ସାମ୍ବାଦିକ ଗୋବିନ୍ଦ ବେହେରା, ’ସମ୍ବାଦ’ର ପ୍ରଦୀପ କିଶୋର ସାହୁ, ‘ସମାଜ’ର କିଶୋର ଚନ୍ଦ୍ର ଦାଶ, ‘ଓଡ଼ିଶା ଫାଇଲସ୍‌’ର ନରେଶ କୁମାର ବେହେରା, ‘କଳିଙ୍ଗ ଜ୍ୟୋତି, ନନ୍ଦିନୀ’ର ସାମ୍ବାଦିକ ରନିକର ମହାରଣା, ବ୍ଲକ୍‌ କରେସ୍‌ପଣ୍ଡେଣ୍ଟ ନିଳୟ ରଞ୍ଜନ ପଟ୍ଟନାୟକ, ‘ଅନୁପମ ଭାରତ’ର କରୁଣାକର ସାହୁ, ବଲାଙ୍ଗୀର ଜିଲ୍ଲାର ‘ସମ୍ବାଦ’ର ସାମ୍ବାଦିକ ଶୁଭ୍ରାଂଶୁ ଶେଖର ମିଶ୍ର ଏବଂ ଜତୀଶ ଚନ୍ଦ୍ର ଖମାରୀ, ‘ପ୍ରଗତିବାଦୀ’ର କୈଳାଶ ଚନ୍ଦ୍ର ସାହୁ, ‘ନକ୍ଷତ୍ର ଟିଭି’ର କଳାହାଣ୍ଡି ଜିଲ୍ଲା ପ୍ରତିନିଧି ଭାନୁପ୍ରକାଶ ରଥ, ଯାଜପୁର ଜିଲ୍ଲାର ‘ମନ୍ଥନ’ର ସାମ୍ବାଦିକ ଅଶୋକ କୁମାର ସାହୁ, ‘ଲୋକସଂପର୍କ’ର ସାମ୍ବାଦିକ ପ୍ରଭାତ କୁମାର ରାଉତରାୟଙ୍କ ନିକଟତମ ସଂପର୍କୀୟଙ୍କୁ ଏହି ଅନୁକମ୍ପାମୂଳକ ସହାୟତା ମିଳିବ।

 

ମାରାଥନ ଜେରାରେ ଘାଇଲା ହେଲେ DFO, କହିଲେ ବିଦ୍ୟାଙ୍କୁ ମୁଁ ପୂର୍ବରୁ ଜାଣିନଥିଲି…

ସୋର: ଘନଉଛି ACF ସୌମ୍ୟରଞ୍ଜନଙ୍କ ମୃତ୍ୟୁ ଘଟଣା। ଏହି ମାମଲରେ ଯୋଡ଼ି ହେଉଛନ୍ତି ଜଣଙ୍କ ପରେ ଜଣେ। ସେପଟେ ଏହି ଘଟଣାରେ ବିଦ୍ୟାଙ୍କ ପରେ ଟାଣି ହୋଇଥିବା ଚର୍ଚ୍ଚିତ ଡିଏଫଓ ମାରାଥନ ଜେରାର ସମ୍ମୁଖିନ ହୋଇଛନ୍ତି। ଡିଏଫଓ ସଂଗ୍ରାମ କେଶରୀ ବେହେରାଙ୍କୁ ଜେରା କରିଛନ୍ତି ପୋଲିସ ତଦନ୍ତକାରୀ ଟିମ୍‌ ଓ କ୍ରାଇମବ୍ରାଞ୍ଚ ଟିମ୍।

ବିଭିନ୍ନ ଦିଗକୁ ନେଇ ଜେରା କରିଛି ତଦନ୍ତକାରୀ ଦଳ। ଗୋଟିଏ ପରେ ଗୋଟିଏ ପ୍ରଶ୍ନ ପଚାରିକି ଡିଏଫ୍‌ଓଙ୍କୁ ଘାଇଲା କରିଛି ଦଳ। ତଦନ୍ତ ସମୟରେ ବୟାନ ରେକର୍ଡ କରାଯାଇଛି। ତେବେ ଏହି ସମୟରେ କେଉଁଭଳି ପ୍ରଶ୍ନ ପଚରାଯାଇଥିଲା। ଡିଏଫ୍‌ଓଙ୍କୁ ସଲାସୁତୁରାରେ ପ୍ରଶ୍ନ କରାଯାଇନଥିଲା ତ ? ଡିଏଫ୍‌ଓଙ୍କୁ ସୁହାଇଲା ଭଳି ପ୍ରଶ୍ନ କରାଯାଇଥିଲା ନା ତାଙ୍କୁ ଘଟଣା ସମ୍ପର୍କରେ ଟେକନିକାଲ ପ୍ରଶ୍ନ କରାଯାଇଥିଲା। ଏମିତି କିଛି ପ୍ରଶ୍ନ ଏବେ ସାଧାରଣେ ଉଠିଛି।

ସେପଟେ ଏହି ଘଟଣାକୁ ନେଇ ସମସ୍ତଙ୍କୁ ପଚରାଉଚରା କରାଯିବ ବୋଲି କହିଛନ୍ତି ତଦନ୍ତକାରୀ ଅଧିକାରୀ ଦଳ। ଯେଉଁମାନେ ଏହି ଘଟଣାରେ ଯୋଡ଼ି ହୋଇଛନ୍ତି ସେ ସମସ୍ତଙ୍କୁ ଜେରା କରାଯିବ। ଡିଏଫ୍‌ଓ ବିଦ୍ୟାଙ୍କୁ ଆଗରୁ ଚିହ୍ନିଥିବା ଚର୍ଚ୍ଚା ହେଉଥିବା ବେଳେ ଜେରା ସମୟରେ ବିଦ୍ୟାଭାରତୀଙ୍କୁ ପୂର୍ବରୁ ଚିହ୍ନିନଥିବା କହିଛନ୍ତି ଡିଏଫ୍‌ଓ। ହସ୍ପିଟାଲରେ ବିଦ୍ୟାଭାରତୀଙ୍କ ସହ ଡିଏଫ୍‌ଓଙ୍କର ପ୍ରଥମଥର ପାଇଁ ଦେଖା ହୋଇଥିବା ତଦନ୍ତକାରୀ ଅଧିକାରୀଙ୍କ ଆଗରେ କହିଛନ୍ତି ଡିଏଫଓ। ଯାହାକୁ ନେଇ ମାମଲା ଏବେ ନୂଆ ମୋଡ ନେଇଛି।

ସେପଟେ ଆଗକୁ ମମତା ପଣ୍ଡାଙ୍କୁ ଜେରା ହେବା ନେଇ ସୂଚନା ଦେଇଛନ୍ତି ତଦନ୍ତକାରୀ ଅଧିକାରୀ। ଗୁରାଣ୍ଡି ଥାନା ଅଧିକାରୀ ହେଉଛନ୍ତି ମମତା ପଣ୍ଡା। ମମତା ପଣ୍ଡାଙ୍କ ନାଁରେ ରହିଛି ଆମ୍ବୁଲାନ୍ସ ଅଟକାଇବା ଅଭିଯୋଗ। ସୌମ୍ୟଙ୍କ ଆମ୍ବୁଲାନ୍ସକୁ ସେ ଘଣ୍ଟାଏରୁ ଅଧିକ ସମୟ ରାସ୍ତାରେ ଅଟକାଇଥିଲେ ବୋଲି ଅଭିଯୋଗ ହୋଇଛି। ସେବେ ବିଦ୍ୟାଭାରତୀଙ୍କ ସହ ତାଙ୍କର କି ସମ୍ପର୍କ ଅଛି। ତାଙ୍କ ଘରକୁ ବିଦ୍ୟାଭାରତୀ ଆସିଛନ୍ତି ନା ନାହିଁ ସେନେଇ ପଚରାଉଚରା କରାଯାଇଛି।

ICSE, ISC Result 2021: ଆସନ୍ତାକାଲି ପ୍ରକାଶ ପାଇବ ରେଜଲ୍ଟ

ନୂଆଦିଲ୍ଲୀ: କାଉନସିଲ୍ ଫର୍ ଦ ଇଣ୍ଡିଆନ୍ ସ୍କୁଲ୍ ସାର୍ଟିଫିକେଟ୍ ଏକ୍ସାମିନେସନ୍ (CISCE) ପକ୍ଷରୁ ଇଣ୍ଡିଆନ୍ ସାର୍ଟିଫିକେଟ୍ ଅଫ୍ ସେକେଣ୍ଡାରୀ ଏଜୁକେସନ୍ (ICSE) ଓ ଇଣ୍ଡିଆନ୍ ସ୍କୁଲ୍ ସାର୍ଟିଫିକେଟ୍ (ISC)ର ଫଳାଫଳ ପ୍ରକାଶ ନେଇ ତାରିଖ ଘୋଷଣା କରିଛି ।

ଚଳିତ ବର୍ଷ ଯେଉଁ ଛାତ୍ରଛାତ୍ରୀ ମାନେ ICSE ଏବଂ ISC ପରୀକ୍ଷା ଦେଇଥିଲେ ସେମାନେ ଆସନ୍ତାକାଲି ଅପରାହ୍ନ ୩ଟାରେ CISCE ର ଅଫିସିଆଲ୍ ୱେବସାଇଟ୍ cisce.org ରେ ରେଜଲ୍ଟ ଦେଖିପାରିବେ ।

CISCEର ସୂଚନା ଅନୁଯାୟୀ, ୨୦୨୧ ଶିକ୍ଷାବର୍ଷର ଦଶମ ଏବଂ ଦ୍ୱାଦଶର ଫଳାଫଳ ଜୁଲାଇ ୨୪ ତାରିଖ ଶନିବାର ୩ଟାରେ ପ୍ରକାଶ ପାଇବ ।

ତେବେ କୋଭିଡ-୧୯ ମହାମାରୀ ଯୋଗୁଁ ଦେଶରେ ନ୍ୟାସନାଲ ଏବଂ ଷ୍ଟେଟ ବୋର୍ଡ ସହିତ CISCEର ଦଶମ ଶ୍ରେଣୀ ଏବଂ ଦ୍ୱାଦଶ ଶ୍ରେଣୀ ପରୀକ୍ଷାକୁ ମଧ୍ୟ ବାତିଲ କରାଯାଇଥିଲା। ବୋର୍ଡ ପକ୍ଷରୁ ଇଣ୍ଟରନାଲ୍ ଆସେସମେଣ୍ଟ ପଲିସିକୁ ଆଧାର କରି ICSE ଏବଂ ISC ରେଜଲ୍ଟ ପ୍ରସ୍ତୁତ କରାଯାଇଛି ।

ଲୀଳାଖେଳା ସାରି ନୀଳ କନ୍ଦରକୁ ବିଜେ ହେଉଛନ୍ତି ଶ୍ରୀଜିଉ, ଚାଲିଛି ଗୋଟି ପହଣ୍ଡି

ପୁରୀ: ଆଜି ହେଉଛି ମହାପ୍ରଭୁଙ୍କର ନୀଳାଦ୍ରି ବିଜେ। ଲୀଳାଖେଳା ସାରି ଜନ୍ମବେଦୀରୁ ରତ୍ନବେଦୀକୁ ବାହୁଡ଼ିବା ପରେ ଆଜି ଲେଉଟିଯିବେ ନୀଳକନ୍ଦରକୁ। ରଥଯାତ୍ରା ଶେଷ କରି ରତ୍ନବେଦୀକୁ ବାହୁଡ଼ିବେ ମହାବାହୁ। ଏଥିପାଇଁ ଆରମ୍ଭ ହୋଇଛି ଶ୍ରୀଜିଉଙ୍କର ପହଣ୍ଡି। ରଥଯାତ୍ରାରେ ଧାଡ଼ି ପହଣ୍ଡି ହେଉଥିବା ବେଳେ ନୀଳାଦ୍ରୀବିଜେରେ ହେଉଛି ଗୋଟି ପହଣ୍ଡି। ଜଣେ ଜଣେ କରି ପହଣ୍ଡି ହୋଇ ଯିବେ ଶ୍ରୀମନ୍ଦିର ଭିତରକୁ। ସୁଦର୍ଶନଙ୍କର ପହଣ୍ଡି ସରିଥିବା ବେଳେ ଏବେ ଆରମ୍ଭ ହୋଇଛି ବଡ଼ ଭାଇଁ ବଳଭଦ୍ରଙ୍କର ପହଣ୍ଡି।

ସେପଟେ ଶ୍ରୀମନ୍ଦିରରେ ମହପ୍ରଭୁଙ୍କ ଅପେକ୍ଷାରେ ଅଛନ୍ତି ଅଭିମାନିନୀ ମହାଲକ୍ଷ୍ମୀ। ମହାପ୍ରଭୁଙ୍କ ପହଣ୍ଡି ସମୟରେ କଂସା କବାଟ କିଳି ବାଟ ଓଗାଳିବେ ଲକ୍ଷ୍ମୀ ସାଆନ୍ତାଣି। ଚାଲିବ କଥା କଟାକଟି। ପରିଶେଷରେ ଅଭିମାନିନୀ ଲକ୍ଷ୍ମୀ ସାଆନ୍ତାଣୀଙ୍କୁ ରସଗୋଲା ଦେଇ ମାନଭଞ୍ଜନ କରିବେ ମହବାହୁ।

ପେଗାସସର ଟାର୍ଗେଟରେ ଅନିଲ ଅମ୍ବାନୀଙ୍କ ସହ ପୂର୍ବତନ ସିବିଆଇ ନିର୍ଦ୍ଦେଶକ

ନୂଆଦିଲ୍ଲୀ: ଶିଳ୍ପପତି ଅନୀଲ ଅମ୍ବାନୀ, ପୂର୍ବତନ ସିବିଆଇ ନିର୍ଦ୍ଦେଶକ ଆଲୋକ ବର୍ମା, ପୂର୍ବତନ ସ୍ୱତନ୍ତ୍ର ନିର୍ଦ୍ଦେଶକ ରାକେଶ ଆସ୍ଥାନା ଓ ପୂର୍ବତନ ଅତିରିକ୍ତ ନିର୍ଦ୍ଦେଶକ ଏ.କେ. ଶର୍ମାଙ୍କୁ ପେଗାସସ ଜରିଆରେ ଟାର୍ଗେଟ କରାଯାଇଛି। ଦି ୱାଇରରେ ପ୍ରକାଶିତ ରିପୋର୍ଟରେ ଏହା କୁହାଯିବା ପରେ ଚାଞ୍ଚଲ୍ୟ ଖେଳିଯାଇଛି।

ସୂଚନା ଅନୁଯାୟୀ, ଫ୍ରାନ୍ସର ନନପ୍ରଫିସ ଫରବିଡେନ ଷ୍ଟୋରିଜ ଓ ଆମ୍ନେଷ୍ଟି ଇଣ୍ଟରନ୍ୟାସନାଲର ସହଭାଗିତାରେ ଚାଲିଥିବା ଦି ୱାଇର ପକ୍ଷରୁ କୁହାଯାଇଛି ଯେ ଅନୀଲ ଅମ୍ବାନୀଙ୍କ କେତେକ କର୍ମଚାରୀ, ଫ୍ରାନସ କମ୍ପାନୀ ଡାସଲ୍ଟ ଆଭିଏସନରର ଭାରତ ପ୍ରତିନିଧି ଭେଙ୍କଟରାଓ ରୋସିନାଙ୍କ ଫୋନକୁ ପେଗାସସ ଜରିଆରେ ଟାର୍ଗେଟ କରାଯାଇଛି।

ସେହିପରି ୨୦୧୮ରେ ଆଲୋକ ବର୍ମାଙ୍କ ଫୋନ ନମ୍ବରକୁ ଟାର୍ଗେଟ କରାଯାଇଥିଲା। ସେହି ବର୍ଷ ତାଙ୍କର ଡେପୁଟି ରାକେଶ ଆସ୍ଥାନାଙ୍କ ବିରୋଧରେ ଆଲୋକ ବର୍ମା ବିଭିନ୍ନ କାରଣକୁ ନେଇ ମାମଲା ଦାୟର କରିଥିଲେ। ସିବିଆଇରେ ବିବାଦ ପରେ ଏ.କେ. ଶର୍ମାଙ୍କୁ ଅନ୍ୟ ଏକ ବିଭାଗକୁ ବଦଳି କରିଦିଆଯାଇଥିଲା। ଆଲୋକ ବର୍ମାଙ୍କ କିଛି ପରିବାର ସଦସ୍ୟଙ୍କ ଫୋନ ବି ଟାର୍ଗେଟରେ ଥିଲା ବୋଲି କୁହାଯାଇଛି।

ଅପରପକ୍ଷେ କଂଗ୍ରେସ ନେତା ରାହୁଲ ଗାନ୍ଧୀ କହିଛନ୍ତି ଯେ ତାଙ୍କର ସମସ୍ତ ଫୋନକୁ ପେଗାସସ ଜରିଆରେ ଟ୍ୟାପ କରାଯାଇଛି । ଏନେଇ ଗୁଇନ୍ଦା ବିଭାଗ ଠାରୁ ତାଙ୍କ ନିକଟକୁ ସୂଚନା ଆସିଛି ବୋଲି ସେ କହିଛନ୍ତି। ଏହି ଘଟଣାରେ ସେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ଇସ୍ତଫା ଦାବି କରିଛନ୍ତି।

 

ପୁଣି ଜମ୍ମୁ ଓ କାଶ୍ମୀରରେ ଡ୍ରୋନ ଖସାଇଲେ ଯବାନ

ଶ୍ରୀନଗର: ଶତ୍ରୁର ହୀନ ଉଦ୍ୟମକୁ ପଣ୍ଡ କଲା ପୋଲିସ । ଜମ୍ମୁ ଓ କାଶ୍ମୀରର କଣାଚକ ଇଲାକା ଅନ୍ତର୍ଗତ ଭାରତୀୟ ସୀମାର ପ୍ରାୟ ୬ କିଲୋମିଟର ଭିତରେ ଏକ ଡ୍ରୋନକୁ ଖସାଇ ଦିଆଯାଇଛି । ତାହା ଏକ ହେକ୍ସାକପ୍ଟର ହୋଇଥିବାବେଳେ ତନ୍ମଧ୍ୟରୁ ୫ କେଜି ବିସ୍ଫୋରକ ଜବତ ହୋଇଛି ।

ବୁଧବାର ସ୍ଥାନୀୟ ସତଓ୍ବାରୀ ଇଲାକାରେ ଏକ ଡ୍ରୋନ ଠାବ ହୋଇଥିଲା । ମାତ୍ର ତାହା କିଛି ସମୟ ପରେ ଫେରି ଯାଇଥିଲା । ଜାମ୍ମୁ ଏୟାରବେସ ନିକଟରେ ଉଡୁଥିବା ଏହି ଡ୍ରୋନକୁ ଏନଏସଜି ଦ୍ବାରା ଲଗାଯାଇଥିବା ରାଡାରରୁ ଠାବ କରାଯାଇଥିଲା ।

ଗତ ମାସରେ ଜାମ୍ମୁ ଏୟାରଫୋର୍ସ ବେସ ଉପରେ ହାମଲା ପରେ ଏନଏସଜି ପକ୍ଷରୁ ବିଭିନ୍ନ ସ୍ଥାନରେ ହାଇଫ୍ରିକ୍ବେନ୍ସି ରାଡାର ଲଗାଯାଇଛି । ଗତ କିଛି ଦିନ ଧରି ବାରମ୍ବାର ଭାରତୀୟ ସୀମାରେ ସନ୍ଦିଗ୍ଧ ଡ୍ରୋନ ଠାବ ହେଉଥିବାବେଳେ ଶତ୍ରୁର ଗତିବିଧି ଉପରେ କଡା ନଜର ରଖାଯାଇଛି । ସୀମାରେ ଏବେ ସଶସ୍ତ୍ର ସୀମା ବଳ ପକ୍ଷରୁ ସତର୍କ ଦୃଷ୍ଟି ଦିଆଯାଇଛି ।