spot_img
Home Blog Page 5513

ଅଷ୍ଟ୍ରେଲିଆକୁ ୧-୦ରେ ହରାଇ ସେମିଫାଇନାଲରେ ସ୍ଥାନ ପକ୍କା କଲା ଭାରତୀୟ ମହିଳା ହକି ଦଳ

ଟୋକିଓ: ଟୋକିଓ ଅଲମ୍ପିକ୍‌ରେ ଇତିହାସ ରଚିଲା ମହିଳା ହକି ଦଳ। ଦଳ ପ୍ରଥମ ଥର ପାଇଁ ସେମିଫାଇନାଲରେ ପ୍ରବେଶ କରିଛି। କ୍ୱାର୍ଟର ଫାଇନାଲରେ ଭାରତ ଅଷ୍ଟ୍ରେଲିଆକୁ ୧-୦ ରେ ପରାସ୍ତ କରିଛି। ୨୦୧୬ ରିଓ ଅଲିମ୍ପିକ୍ସରେ ଦଳ ଦ୍ୱାଦଶ ସ୍ଥାନ ହାସଲ କରିଥିଲା। ଏହା ବ୍ୟତୀତ, ୧୯୮୦ ରେ, ଦଳ ଚତୁର୍ଥ ସ୍ଥାନରେ ଥିଲା। ଯଦିଓ ସେ ସମୟରେ କୌଣସି ସେମିଫାଇନାଲ ମ୍ୟାଚ୍ ନଥିଲା। ପୁଲ୍ ମ୍ୟାଚ୍ ପ୍ରଦର୍ଶନ ଆଧାରରେ ଟପ୍-ଦଳ ନିଷ୍ପତ୍ତି ନିଆଯାଇଥିଲା। ସେପଟେ ଭାରତୀୟ ପୁରୁଷ ଦଳ ମଧ୍ୟ ସେମିଫାଇନାଲରେ ପ୍ରବେଶ କରି ପଦକ ଆଶାକୁ ବଜାୟ ରଖିଛି।

ଭାରତୀୟ ମହିଳା ଦଳ ମ୍ୟାଚରେ ଭଲ ପ୍ରଦର୍ଶନ କରିଥିଛି। ତେବେ ପ୍ରଥମ କ୍ୱାର୍ଟରରେ ଉଭୟ ଭାରତ ଏବଂ ଅଷ୍ଟ୍ରେଲିଆ ସ୍କୋର କରିପାରି ନଥିଲେ। ଦ୍ୱିତୀୟ ହାଫରେ ଗୁରୁଜିତ କୌର ଏକ ପେନାଲ୍ଟି କର୍ନର ସ୍କୋର କରି ଭାରତକୁ ୧-୦ରେ ଆଗକୁ ନେଇଥିଲେ। ଏହା ପରେ ଅଷ୍ଟ୍ରେଲିଆକୁ ୭ଟି ପେନାଲଟି କର୍ଣ୍ଣର ମିଳିଥିଲେ ମଧ୍ୟ ତାକୁ ଭାରତୀୟ ମହିଳା ଦଳ ସିଂହ ଭଳି ଲଢ଼ି ଅଟକାଇଥିଲା।

୨୦୧୭ରୁ ୨୦୧୯ ମଧ୍ୟରେ ଦେଶରେ ୧୪ରୁ ୧୮ ବୟସ୍କ ୨୪ ହଜାର ପିଲା କରିଛନ୍ତି ଆତ୍ମହତ୍ୟା

ନୂଆଦିଲ୍ଲୀ: ଦେଶରେ ପିଲାଙ୍କ ମଧ୍ୟରେ ବଢୁଛି ଆତ୍ମହତ୍ୟା ପ୍ରବଣତା। ୨୦୧୭ରୁ ୨୦୧୯ ମଧ୍ୟରେ ଦେଶରେ ୧୪ରୁ ୧୮ ବୟସ୍କ ୨୪ ହଜାର ପିଲା ଆତ୍ମହତ୍ୟା କରିଛନ୍ତି। ଜାତୀୟ ଅପରାଧ ରେକର୍ଡ ବ୍ୟୁରୋ ବା ଏନସିଆରବି ପକ୍ଷରୁ ପ୍ରକାଶିତ ରିପୋର୍ଟରେ ଏହା କୁହାଯାଇଛି। ରିପୋର୍ଟରେ ଦର୍ଶାଯାଇଛି ଯେ, ୨୦୧୭ରୁ ୨୦୧୯ ମଧ୍ୟରେ ୧୩ ହଜାର ୩୨୫ ବାଳିକାଙ୍କ ସମେତ ୨୪ ହଜାର ୫୬୮ ପିଲା ଆତ୍ମହତ୍ୟା କରିଛନ୍ତି। ୨୦୧୭ରେ ୮ ହଜାର ୨୯ ପିଲା ଆତ୍ମହତ୍ୟା କରିଥିବା ବେଳେ ୨୦୧୮ରେ ୮ ହଜାର ୧୬୨ ଓ ୨୦୧୯ରେ ୮ ହଜାର ୩୭୭ ପିଲା ଆତ୍ମହତ୍ୟା କରିଥିବା ରିପୋର୍ଟରେ ଦର୍ଶାଯାଇଛି। ମଧ୍ୟପ୍ରଦେଶରେ ସର୍ବାଧିକ ୩ ହଜାର ୧୧୫ ପିଲା ଆତ୍ମହତ୍ୟା କରିଥିବା ବେଳେ ପଶ୍ଚିମବଙ୍ଗରେ ୨ ହଜାର ୮୦୨ ପିଲା ଆତ୍ମହତ୍ୟା କରିଛନ୍ତି। ତୃତୀୟ ସ୍ଥାନରେ ରହିଛି ତାମିଲନାଡୁ।

ଏହି ରାଜ୍ୟରେ ୨ ହଜାର ୩୫ ପିଲା ଏହି ସମୟ କାଳ ମଧ୍ୟରେ ଆତ୍ମହତ୍ୟା କରିଛନ୍ତି। ପରୀକ୍ଷାରେ ଫେଲ ହେବା କାରଣରୁ ସର୍ବାଧିକ ୪ ହଜାର ୪୬ ପିଲା ଆତ୍ମହତ୍ୟା କରିଛନ୍ତି। ବୈବାହିକ କାରଣକୁ ନେଇ ୬୩୯ ପିଲା ଆତ୍ମହତ୍ୟା କରିଛନ୍ତି। ସେମାନଙ୍କ ମଧ୍ୟରେ ବାଳିକା ହେଉଛନ୍ତି ୪୧୧। ପ୍ରେମ ବ୍ୟାପାରକୁ ନେଇ ୩ ହଜାର ୩୧୫ ପିଲା ଆତ୍ମହତ୍ୟା କରିଛନ୍ତି। ସେପଟେ ରୋଗ ଯନ୍ତ୍ରଣା ସହି ନପାରି ଆତ୍ମହତ୍ୟା କରିଛନ୍ତି ୨ ହଜାର ୫୬୭ ପିଲା। ଶାରୀରିକ ଆକ୍ରମଣ କାରଣରୁ ୮୧ ଜଣ ପିଲା ପ୍ରାଣ ହରାଇଛନ୍ତି। ଏହାସହ ନିଶାଦ୍ରବ୍ୟ ସେବନ, ମାଦକଦ୍ରବ୍ୟ ସେବନ, ଅନୈତିକ ସମ୍ପର୍କରୁ ଗର୍ଭବତୀ, ସାମାଜିକ କୁଖ୍ୟାତି, ବେକାରୀ, ଦାରିଦ୍ର୍ୟ, ଆଦର୍ଶଗତ ସଂକଟ କାରଣରୁ ବି କିଛି ପିଲା ଆତ୍ମହତ୍ୟା କରିଥିବା ରିପୋର୍ଟରେ ପ୍ରକାଶ ପାଇଛି।

ବିଭିନ୍ନ କାରଣରୁ ପିଲାମାନେ ଆତ୍ମହତ୍ୟା କରୁଥିବା ବେଳେ କୋଭିଡ କାଳରେ ଏହି ବର୍ଗର ପିଲାଙ୍କ ମାନସିକ ସ୍ଥିତି ଅଧିକ ଦୁର୍ବଳ ହୋଇଛି। ଫଳରେ ସେମାନଙ୍କ ଆତ୍ମହତ୍ୟା ସଂଖ୍ୟା ବଢିବାରେ ଲାଗିଛି। ଅବସାଦ, ନିଜ ଉପରେ ବିଶ୍ୱାସର ଅଭାବ, ପ୍ରତିଯୋଗିତାରେ ହାରିବା ନେଇ ସନ୍ତାପ, ଆର୍ଥିକ ଅସ୍ଥିରତା, ମାନସିକ ଚାପ, ବିଭିନ୍ନ ପ୍ରକାର କ୍ଷତି ଆଦି କାରଣରୁ ବି ସେମାନେ ଆତ୍ମହତ୍ୟାର ପଥ ବାଛୁଥିବା ସ୍ପଷ୍ଟ ହୋଇଛି। ବିଭିନ୍ନ ସଂକଟରେ ପଡିଥିବା ପିଲାଙ୍କୁ ସହାୟତା ଦେବା ଲାଗି ଅନେକ ସମୟରେ କେହି ଆସୁନାହାନ୍ତି ବା ସେମାନଙ୍କୁ ସାହା ହେବା ଲାଗି ପରିବାର ସାଥ୍ ଦେଉନି। ଏହି କାରଣରୁ ସେମାନଙ୍କ ମଧ୍ୟରେ ଆତ୍ମହତ୍ୟା ପ୍ରବଣତା ବଢୁଥିବା ପରିଲକ୍ଷିତ ହୋଇଛି।

ପର୍ଯ୍ୟଟକଙ୍କ ପାଇଁ ଖୁସି ଖବର, ଦିନକୁ ୨ ହଜାର ପର୍ଯ୍ୟଟକଙ୍କ ପାଇଁ ଖୋଲିଲା କୋଣାର୍କ ସୂର୍ଯ୍ୟ ମନ୍ଦିର

କୋଣାର୍କ: ରାଜ୍ୟରେ କରୋନା ଜନିତ ସ୍ଥିତି ସୁଧୁରିବାରେ ଲାଗିଛି। ଅନ୍‌ଲକ୍‌ ପ୍ରକ୍ରିୟା ଆରମ୍ଭ ହେବା ପରେ କୋହଳ ହୋଇଛି ନିୟମ। ପର୍ଯ୍ୟଟନସ୍ଥଳି ମଧ୍ୟ ଧିରେ ଧିରେ ଖୋଲିବାରେ ଲାଗିଛି। ତେବେ କରୋନା କଟକଣା ସହ ଆଜି ଖୋଲିଛି କୋଣାର୍କ ସୂର୍ଯ୍ୟ ମନ୍ଦିର। କରୋନା ଦ୍ୱିତୀୟ ଲହର ପାଇଁ ଏପ୍ରିଲ ୧୬ରୁ ଦୀର୍ଘ ସାଢ଼େ ତିନିମାସ ବନ୍ଦ ଥିଲା ମନ୍ଦିର। ପୁରୀ ଜିଲ୍ଲା ପ୍ରଶାସନର ନିର୍ଦେଶ କ୍ରମେ କେନ୍ଦ୍ର କୋଭିଡ ନିୟମ ଅନୁଯାୟୀ ସାଧାରଣ ପର୍ଯ୍ୟଟକଙ୍କ ପାଇଁ କରୋନା କଟକଣାରେ ଖୋଲିଛି କୋଣାର୍କ। ବାରକୋଡ଼ରେ ଟିକେଟ ବ୍ୟବସ୍ଥା, ଥର୍ମାଲ ସ୍କ୍ରିନିଂ, ସାମାଜିକ ଦୂରତା ରକ୍ଷା କରିବା ଉପରେ ଗୁରୁତ୍ୱ ଦିଆଯାଇଥିବା ବେଳେ ସକାଳ ୬ଟାରୁ ଦିନ ୧ଟା ମଧ୍ୟରେ ୧୦୦୦ ଓ ଦିନ ୧ଟା ରୁ ସନ୍ଧ୍ୟା ୬ ଟା ମଧ୍ୟରେ ୧୦୦୦ ପର୍ଯ୍ୟଟକଙ୍କୁ ଅନୁମତି ଦିଆଯିବ। ରାଜ୍ୟ ସରକାରଙ୍କ ଏହି ନିଷ୍ପତକୁ ପର୍ଯ୍ୟଟକ ମାନେ ସ୍ୱାଗତ କରିଥିବା ବେଳେ ବ୍ୟବସାୟୀ, ଫଟୋ ଗ୍ରାଫର, ଗାଇଡ଼ ଓ ହସ୍ତଶିଳ୍ପ ବ୍ୟବସାୟୀ ମାନଙ୍କୁ ଅନୁମତି ନଥିବାରୁ ସେମାନେ ନିରାଶ ହୋଇଛନ୍ତି।

ରାଜ୍ୟରେ ତଳକୁ ଖସୁଛି କରୋନା ସଂକ୍ରମଣ, ୧୧ ଶହ ତଳେ ସଂକ୍ରମିତ ଚିହ୍ନଟ

ଭୁବନେଶ୍ୱର: ସଂକ୍ରମଣ କବଳରୁ ମୁକୁଳୁଛି ରାଜ୍ୟ। ଦିନକରେ ହଜାରେ ୩୨ ସଂକ୍ରମିତ ଚିହ୍ନଟ ହୋଇଥିବା ବେଳେ ୬୭ ଜଣଙ୍କ ଜୀବନ ନେଇଛି କିଲର ଭାଇରସ୍। ଏହାକୁ ମିଶାଇ ୬ହଜାର ୩୩ରେ ପହଞ୍ଚିଛି ମୃତ୍ୟୁସଂଖ୍ୟା। କ୍ୱାରେଣ୍ଟାଇନରୁ ୫୯୮, ଲୋକାଲ କେସ୍ ୪୩୪। ଗତ ୨୪ ଘଣ୍ଟାରେ ସୁସ୍ଥ ହୋଇଛନ୍ତି ୧୭ ଶହ ୭୩ ଆକ୍ରାନ୍ତ। ଖୋର୍ଦ୍ଧାରୁ ସର୍ବାଧିକ ୨୩୭, କଟକରୁ ୧୫୪ ସଂକ୍ରମିତ ଚିହ୍ନଟ ହୋଇଛନ୍ତି। ଜଗତସିଂହପୁର ଓ ପୁରୀରୁ ୮୨ଜଣ ଲେଖାଏଁ, ଷ୍ଟେଟପୁଲରୁ ୫୦, ଅନୁଗୁଳରୁ ୪୮, ଭଦ୍ରକରୁ ୪୭, ଯାଜପୁରରୁ ୪୩, ବାଲେଶ୍ୱରରୁ ୩୬, ନୟାଗଡ଼ରୁ ୩୦, ଢେଙ୍କାନାଳରୁ ୨୫, କେନ୍ଦୁଝର ଓ ସୁନ୍ଦରଗଡ଼ରୁ ୨୩ଜଣ ଲେଖାଏଁ, ମୟୂରଭଞ୍ଜରୁ ୨୦, ସମ୍ବଲପୁରରୁ ୧୯, କେନ୍ଦ୍ରାପଡାରୁ ୧୮, ବରଗଡ଼, କନ୍ଧମାଳ ଓ ସୋନପୁରରୁ ୧୦ ଜଣ ଲେଖାଏଁ, କୋରାପୁଟରୁ ୯, ଦେବଗଡ଼, ଗଞ୍ଜାମ ଓ ରାୟଗଡ଼ାରୁ ୮ ଜଣ ଲେଖାଏଁ, ଗଜପତି, କଳାହାଣ୍ଡି, ମାଲକାନଗିରି, ନବରଙ୍ଗପୁରରୁ ୬ଜଣ ଲେଖାଏଁ, ବଲାଙ୍ଗୀରରୁ ୪, ଝାରସୁଗୁଡାରୁ ୩, ବୌଦ୍ଧରୁ ୨, ନୂଆପଡାରୁ ଜଣେ ସଂକ୍ରମିତ ଚିହ୍ନଟ ହୋଇଛନ୍ତି। ରାଜ୍ୟରେ ମୋଟ୍ ସଂକ୍ରମିତଙ୍କ ସଂଖ୍ୟା ୯ଲକ୍ଷ ୭୯ହଜାର ୭୩୭, ସୁସ୍ଥ ହେଲାଣି ୯ଲକ୍ଷ ୫୮ହଜାର ୬୦୧, ଆକ୍ଟିଭ କେସ୍ ୧୫ହଜାର ୫୦ ରହିଛି।

ରାଜ୍ୟର ଅଧିକାଂଶ ସ୍ଥାନରେ ଆସନ୍ତା ୪ ଦିନ ପର୍ଯ୍ୟନ୍ତ ଲାଗି ରହିବ ବର୍ଷା

ଭୁବନେଶ୍ୱର: ମୌସୁମୀ ଟ୍ରପଲାଇନ୍ ପ୍ରଭାବରେ ଆସନ୍ତା ୪ ଦିନ ପର୍ଯ୍ୟନ୍ତ ରାଜ୍ୟର ଅଧିକାଂଶ ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହେବ। ସୃଷ୍ଟି ହୋଇଥିବା ଟ୍ରପ୍‌ଲାଇନ୍‌ ଉତ୍ତର ବଙ୍ଗୋପସାଗର ପର୍ଯ୍ୟନ୍ତ ଲମ୍ବିକି ରହିଛି। ଏନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ଓଡ଼ିଶାର ଆଭ୍ୟନ୍ତରୀଣ ଜିଲ୍ଲା ଗୁଡ଼ିକରେ ଆକାଶ ମେଘାଛନ୍ନ ରହିବା ସହ କିଛି କିଛି ସ୍ଥାନରେ ମଧ୍ୟମ ଧରଣର ବର୍ଷା ହେବ। ଉପକୂଳ ଓଡ଼ିଶାର ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡା, ଜଗତସିଂହପୁର, କଟକ, ଖୋର୍ଦ୍ଧାରେ ପାଗ ମେଘୁଆ ରହିବା ସହ କିଛି ସ୍ଥାନରେ ବର୍ଷା ହେବାର ସମ୍ଭାବନା ରହିଛି। ଆସନ୍ତା ୪ ଓ ୫ ତାରିଖ ବେଳକୁ ସୁନ୍ଦରଗଡ, କେନ୍ଦୁଝର, ମୟୁରଭଞ୍ଜ, ଝାରସୁଗୁଡା, ଦେବଗଡ ଏବଂ ସମ୍ବଲପୁରରେ ପ୍ରବଳ ବର୍ଷାର ସମ୍ଭାବନା ରହିଥିବାରୁ ୟଲୋ ଆଲର୍ଟ ଜାରି କରାଯାଇଛି। ବର୍ତ୍ତମାନ ସୁଦ୍ଧା ରାଜ୍ୟରେ ୨୦ ପ୍ରତିଶନ ନିଅଣ୍ଟିଆ ବର୍ଷା ହୋଇଛି। ବର୍ତ୍ତମାନ ସୁଦ୍ଧା ରାଜ୍ୟରେ ୪୫୯.୬ ମିଲିମିଟିର ବର୍ଷା ରେକର୍ଡ କରାଯାଇଥିବା ବେଳେ ୧୧ଟି ଜିଲ୍ଲାରେ ୨୦ ରୁ ୫୯ ପ୍ରତିଶତ କମ୍ ବର୍ଷା ହୋଇଥିବା ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି।

କର୍ଣ୍ଣାଟକ ମନ୍ତ୍ରିମଣ୍ଡଳ ସମ୍ପ୍ରସାରଣ ନେଇ ଆଜି ଆସିପାରେ ବଡ଼ ନିଷ୍ପତ୍ତି

ନୂଆଦିଲ୍ଲୀ: କର୍ଣ୍ଣାଟକ ମନ୍ତ୍ରିମଣ୍ଡଳ ସମ୍ପ୍ରସାରଣ ନେଇ ଆଜି ଆସିବ ବଡ଼ ନିଷ୍ପତ୍ତି। ଆଜି ହିଁ ନିଷ୍ପତ୍ତି ଚୂଡାନ୍ତ ହେବ ବୋଲି କହିଛନ୍ତି ମୁଖ୍ୟମନ୍ତ୍ରୀ ବାସବରାଜ ବୋମାଇ। ଦିଲ୍ଲୀ ଗସ୍ତରେ ଯାଇ ଫେରିଥିବା ବାସବରାଜ ପ୍ରଧାନମନ୍ତ୍ରୀ, ଗୃହମନ୍ତ୍ରୀ, ପ୍ରତିରକ୍ଷା ମନ୍ତ୍ରୀ, ବିଜେପି ସଭାପତି ଜେ.ପି. ନଡ୍ଡାଙ୍କୁ ସାକ୍ଷାତ କରିଥିଲେ ବି ମନ୍ତ୍ରିମଣ୍ଡଳ ସମ୍ପ୍ରସାରଣ ନେଇ କୌଣସି ଚୂଡାନ୍ତ ନିଷ୍ପତ୍ତି ହୋଇପାରି ନଥିବା ଜଣାଯାଇଛି। ସେପଟେ ଉପମୁଖ୍ୟମନ୍ତ୍ରୀ କିଏ ହେବେ ତାହାକୁ ନେଇ ଏବେ ବି ଚାଲିଛି ଚର୍ଚ୍ଚା। ବରିଷ୍ଠ ବିଜେପି ନେତା କେ.ଏସ. ଈଶ୍ୱ ରାପ୍ପା ଉପମୁଖ୍ୟମନ୍ତ୍ରୀ ଲାଗି ଇଚ୍ଛୁକ ଥିବା ବେଳେ ଆଉ କେତେକ ନେତା ବି ଏହି ପଦ ଲାଗି ଇଚ୍ଛୁକ ଅଛନ୍ତି। ମନ୍ତ୍ରିମଣ୍ଡଳ ସମ୍ପ୍ରସାରଣ ନେଇ ବାସବରାଜ ପୂର୍ବତନ ମୁଖ୍ୟମନ୍ତ୍ରୀ ଜଗଦୀଶ ସେଟ୍ଟାରଙ୍କ ସହ ବି ଆଲୋଚନା କରିଛନ୍ତି। ତେଣେ ଆର. ଅଶୋକା, ମୁରୁଗେସ ନିରାନୀ ମଧ୍ୟ ଉପମୁଖ୍ୟମନ୍ତ୍ରୀ ଦୌଡରେ ଅଛନ୍ତି। ଆଜି ମଧ୍ୟ ଜେପି ନଡ୍ଡାଙ୍କୁ ଭେଟିବେ ବାସବରାଜ। ଏହାପରେ ମନ୍ତ୍ରିମଣ୍ଡଳ ସମ୍ପ୍ରସାରଣ ନେଇ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯିବ।

 

୨୦୦ ମିଟର ଦୌଡ଼ରେ ୭ମ ସ୍ଥାନରେ ରହିଲେ ଦୂତୀ, ୨୩.୮୫ ସେକେଣ୍ଡରେ ହିଟ୍‌ କଲେ

ଭୁବନେଶ୍ୱର: ପୁଣି ନିରାଶ କଲେ ଭାରତୀୟ ଆଥଲେଟ୍ ଦୂତୀ ଚାନ୍ଦ। ୧୦୦ ମିଟର ପରେ ୨୦୦ ମିଟରରେ ବି ହାରି ଯାଇଛନ୍ତି ଦୂତୀ ଚାନ୍ଦ। ଆଜି ୨୦୦ ମିଟର ଚତୁର୍ଥ ହିଟରେ ସେ ଅଂଶ ଗ୍ରହଣ କରିଥିଲେ ଦୂତୀ। ରେସର ପ୍ରଥମ ରାଉଣ୍ଡରେ ସପ୍ତମ ସ୍ଥାନରେ ରହିଛନ୍ତି ଦୂତୀ। ତେବେ ୨୩.୮୫ ସେକେଣ୍ଡରେ ୨୦୦ ମିଟର ଅତିକ୍ରମ କରିଥିଲେ ଦୂତୀ ଚାନ୍ଦ। ଏହା ପୂର୍ବରୁ ୧୧.୫୪ ସେକେଣ୍ଡରେ ସେ ୧୦୦ ମିଟର ଅତିକ୍ରମ କରି ହାରିଥିଲେ। ୧୦୦ ମିଟରରେ ବି ମଧ୍ୟ ଦୂତୀ ୭ମ ସ୍ଥାନରେ ରହିଥିଲେ। ଟୋକିଓ ଅଲିମ୍ପିକ୍ସରେ ଦୂତୀଙ୍କର ପଦକ ଆଶା ମଳିନ ପଡ଼ିଯାଇଛି।

କରୋନା କଟକଣାରେ ଆଜିଠୁ ଆରମ୍ଭ ହେଉଛି ମୋ ବସ୍‌ ସେବା, ୨୫ଟି ରୁଟରେ ଗଡ଼ିବ ୧୯୪ଟି ବସ୍‌

ଭୁବନେଶ୍ୱର: ଅନ୍‌ଲକ୍‌ରେ କୋହଳ ହେଉଛି କଟକଣା। ଧିରେ ଧିରେ ପରିସ୍ଥିତି ସାମାନ୍ୟ ହେବାରେ ଲାଗିଛି। ଆଜିଠୁ ସମସ୍ତ ରୁଟରେ ଗଡ଼ିବ ମୋ ବସ୍‌। ସମସ୍ତ ୨୫ ରୁଟରେ ୧୯୪ଟି ବସ୍‌ ଯାତାୟତ କରିବ। ସକାଳ ୭ଟାରୁ ସଂଧ୍ୟା ୭ଟା ପର୍ଯ୍ୟନ୍ତ ଚାଲିବ ବସ୍‌। ସପ୍ତାହାନ୍ତ ସଟଡାଉନରେ କେବଳ ରେଳ ଷ୍ଟେସନ୍ ଓ ବିମାନ ବନ୍ଦରକୁ ଛାଡ଼ି ଦେଲେ ଅନ୍ୟ ସମସ୍ତ ରୁଟରେ ମୋ ବସ୍ ସେବା ବନ୍ଦ ରହିବ। ବସ୍‌ ଯାତ୍ରା ବେଳେ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି। ରାଜ୍ୟ ବାହାରୁ ଆସୁଥିବା ଲୋକଙ୍କ ସୁବିଧା ପାଇଁ ଶନିବାର ଓ ରବିବାର ସ୍ୱତନ୍ତ୍ର ବ୍ୟବସ୍ଥା କରାଯାଇଛି।

ବିମାନ ବନ୍ଦର ଓ ରେଳ ଷ୍ଟେସନରୁ କଟକ ଏବଂ ଭୁବନେଶ୍ୱର ଆସୁଥିବା ଯାତ୍ରୀମାନଙ୍କୁ ଏହି ସ୍ୱତନ୍ତ୍ର ସଟଲ ବସ୍ ସେବା ଯୋଗାଇ ଦିଆଯିବ। ବସ୍‌ରେ ଯାତ୍ରା ସମୟରେ କୌଣସି ଯାତ୍ରୀ ଛିଡା ହୋଇଯିବେନି। ଯେତିକି ସିଟ୍ ସେତିକି ଲୋକ ବସାଇବାକୁ ନିର୍ଦ୍ଦେଶ ଦିଆଯାଇଛି। ଏଥିସହିତ ଯାତ୍ରୀମାନେ ନିଜ ପାଖରେ ସାନିଟାଇଜର୍ ରଖିବାକୁ ପରାମର୍ଶ ଦିଆଯାଇଛି। କରୋନା କଟକଣା କୋହଳ ହେବା ପରେ ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ସମସ୍ତ ୨୫ଟି ରୁଟରେ ୧୯୪ଟି ବସ୍ ଚଳାଚଳ କରିବ।

ଟିକା ବିବାଦ, କଂଗ୍ରେସ ନେତା ରାହୁଲ ଗାନ୍ଧିଙ୍କୁ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟଙ୍କ ଜବାବ

ନୂଆଦିଲ୍ଲୀ: ଟିକାକୁ ନେଇ ବଢିଲା ବିବାଦ । କଂଗ୍ରେସ ନେତା ରାହୁଲ ଗାନ୍ଧିଙ୍କୁ ଜବାବ ଦେଇଛନ୍ତି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟ । କହିଛନ୍ତି ଜୁଲାଇରେ ଦେଶରେ ୧୩ କୋଟି ଟିକା ପ୍ରଦାନ କରାଗଲାଣି । ଚଳିତ ମାସରେ ଟିକାକରଣ ବ୍ୟାପକ ହୋଇଛି । ସ୍ବାସ୍ଥ୍ୟକର୍ମୀଙ୍କ ସଂଗ୍ରାମ ଯୋଗୁ ଦେଶରେ ଟିକାକରଣ ସଫଳ ହୋଇଛି । ରାହୁଲ ଗାନ୍ଧି ସୋସିଆଲ ମିଡିଆରେ କହିଥିଲେ ଯେ- ଗତ ଏକ ସପ୍ତାହ ଧରି ଦେଶର ବିଭିନ୍ନ ଭାଗରେ ଟିକା ଅଭାବ ଯୋଗୁ ଟିକାକରଣ ବନ୍ଦ ରହିଛି ।

ଜୁଲାଇ ସରିଗଲା ହେଲେ ଟିକା ଅଭାବ ଦୂର ହୋଇପାରିଲା ନାହିଁ ବୋଲି ରାହୁଲ ଦର୍ଶାଇଥିଲେ । ରାହୁଲଙ୍କ ଉଦ୍ଦେଶ୍ୟରେ ସ୍ବାସ୍ଥ୍ୟମନ୍ତ୍ରୀ କହିଛନ୍ତି- ସ୍ବାସ୍ଥ୍ୟସେବା କର୍ମୀମାନଙ୍କ ଯୋଗୁ ଆପଣ ଗର୍ବ କରିବା କଥା । ମାଣ୍ଡବ୍ୟ କହିଛନ୍ତି- ଶୁଣିବା କଥା ଅନୁସାରେ ରାହୁଲଙ୍କ ସମେତ ଦେଶର ୧୩ କୋଟି ଲୋକ ଜୁଲାଇରେ ଟିକା ନେଇଛନ୍ତି । ତେଣୁ ରାହୁଲ ହୀନ ରାଜନୀତି କରୁଛନ୍ତି । ଟିକାର ଅଭାବ ନୁହେଁ ବରଂ ରାହୁଲଙ୍କର ପରିପକ୍ବତାର ଅଭାବ ରହିଛି ।

ଅଲିମ୍ପିକ୍ସରେ କମାଲ କଲେ ଦେଶର ଲାଡଲା, ଉତ୍ସାହିତ ଭାରତ

ନନ୍ଦିଘୋଷ ବ୍ୟୁରୋ: ସଣ୍ଡେରେ ସୁପର ସୋ । ଭାରତ ପାଇଁ ବୋଧେ ହୁଏ ଏହି ଦିନଟି ଆଜି ଶୁଭ ଥିଲା । ଦେଶବାସୀ ଆଜି ସମ୍ପୂର୍ଣ୍ଣ ଉତ୍ସାହିତ । ଉତ୍ସାହିତ ବା ହେବେନି କେମିତି  । ବିଶ୍ୱ ମଞ୍ଚରେ ଭାରତ ହାସଲ କରିଛି ମେଡାଲ  । ଗୋଟେପଟେ ଭାରତର ସୁନା ଝିଅ ସିନ୍ଧୁ ଭାରତକୁ ବ୍ରୋଞ୍ଚ ମେଡାଲ ଭେଟିଦେଇଥିବାବେଳେ ଅନ୍ୟପଟେ ଭାରତୀୟ ପୁରୁଷ ହକି ଟିମ ରଚିଛି ଇତିହାସ  । ବ୍ୟାଡମିଣ୍ଟନରେ ସିନ୍ଧୁ ସେମି ଫାଇନାଲଲେ ହାରିଥିଲେ  । କିନ୍ତୁ ହାରିବା ପରେ ମଧ୍ୟ ଭାରତକୁ ନିରାଶ କରିବେ ନାହିଁ ବୋଲି ପ୍ରତିଶ୍ରୁତି ଦେଇଥିଲେ  । ଏବଂ ସେହି ପ୍ରତିଶ୍ରୁତି ମୂଳକ ରବିବାର ଦେଶକୁ କାଂସ୍ୟ ପଦକ  ଭେଟି ଦେଇଛନ୍ତି ବ୍ୟାଡମିଣ୍ଟନ ତାରକା ପିଭି ସିନ୍ଧୁ  ।

ଅନ୍ୟପଟେ ଅଲିମ୍ପିକ୍ସରେ ପୁରୁଷ ହକି ଟିମ ଦମଦାର ପ୍ରଦର୍ଶନ କରିଛି । ଯଦ୍ୱାରା ସେମିଫାଇନାଲ ପ୍ରବେଶ କରିବାକୁ ପୁରୁଷ ହକି ଟିମ୍ ରାସ୍ତା ପକ୍କା କରିଛି  । କ୍ବାର୍ଟର ଫାଇନାଲରେ 3-1ରେ ବ୍ରିଟେନକୁ ହରାଇଛି ଭାରତ । ଆସନ୍ତା ମଙ୍ଗଳବାର ବେଲଜିୟମକୁ ଭେଟିବ । ତେଣୁ ଦୀର୍ଘ ୪୧ ବର୍ଷ ପରେ ଭାରତ ସେମିଫାଇନାଲକୁ ଯାଇଛି । ୪୧ ବର୍ଷ ପରେ ପ୍ରଥମ ଥର ପାଇଁ ଭାରତୀୟ ହକି ଟିମ୍ ଅଲମ୍ପିକ୍ସର ସେମିଫାଇନାଲରେ ପହଂଚିଛି । ଫାଇନାଲ ଓ ସ୍ୱର୍ଣ୍ଣ କିମ୍ବା ରୌପ୍ୟ ପଦକଠାରୁ ମାତ୍ର ଗୋଟିଏ ପାଦ ଦୂରରେ ଟିମ୍ ଇଣ୍ଡିଆ । ଶେଷ ଥର ପାଇଁ ୧୯୮୦ ମସ୍କୋ ଅଲମ୍ପିକ୍ସରେ ଭାରତୀୟ ଟିମ୍ ସେମିଫାଇନାଲରେ ପହଂଚିଥିଲା ।

ଆଉ ଶେଷ ଥର ପାଇଁ ମଧ୍ୟ ୧୯୮୦ ମସିହାରେ ଭାରତୀୟ ହକି ଟିମ୍ ଅଲମ୍ପିକ୍ସରେ ସ୍ୱର୍ଣ୍ଣ ପଦକ ପାଇଥିଲା  । ତେବେ ଆରମ୍ଭରୁ ବ୍ରିଟେନ ଉପରେ ଭାରି ପଡିଥିଲା ଭାରତ । ଭାରତ ପକ୍ଷରୁ ପ୍ରଥମ ଗୋଲ୍‌ ଦେଇଥିଲେ ଦିଲପ୍ରୀତ ସିଂହ । ଦ୍ବିତୀୟ ଗୋଲ ଦେଇଥିଲେ ଗୁରୁକାନ୍ତ ଏବଂ ଶେଷ କ୍ବାର୍ଟରରେ ଗୋଲ ଦେଇଥିଲେ ହାର୍ଦ୍ଦିକ ସିଂହ । ଭାରତର ଏଭଳି ଦମଦାର ପ୍ରଦର୍ଶନରେ କିଏ ଖୁସି ନହୋଇ ରହିପାରିବ  । ଟୋକିଓରେ  ଅଲିମ୍ପିକ୍ସ ଆରମ୍ଭ ହେବାକୁ ଏହାରି ଭିତରେ ୧୦ ଦିନ ପୁରିଛି  । ଏବଂ ଏହି ୧୦ ଦିନ ଭିତରେ ଭାରତକୁ ପ୍ରଥମ ମେଡାଲ ଭେଟିଦେଇଥିଲେ ମିରାବାଇ ଚାନୁ  । ଭାରତୋଳନରେ ପ୍ରତିପକ୍ଷ ଚୀନକୁ ହରାଇ ମିରାବାଇ ଭାରତକୁ ପ୍ରଥମ ମେଡାଲ ପକ୍କା କରିଥିଲେ  ।

ଭାରତକୁ ଏହି ମେଡାଲ ଦେଶବାସୀଙ୍କୁ ସର୍ବାଧିକ ଗୌରାବନିତ୍ୱ କରିଥିଲା  । ଏହା ପରେ ଆଜି ପୁନର୍ବାର ଦେଶ ଉତ୍ସାହ ମନାଇଛି  । ଯେତେବେଳେ ଦେଶର ବ୍ୟାଡମିଣ୍ଟନ ତାରକା ପିଭି ସିନ୍ଧୁ ଗ୍ରାଉଣ୍ଡକୁ ଓହ୍ଲାଇଥିଲେ, ସେତେବେଳେ ସମସ୍ତଙ୍କର ସିନ୍ଧୁଙ୍କ ଉପରେ ଭରସା ରହିଥିଲା  । ଯାହାକୁ ସିନ୍ଧୁ ପୁରଣ କରିବାରେ ମଧ୍ୟ ପଛ ଘୁଞ୍ଚା ଦେଇନଥିଲେ  ।  ପ୍ରତିପକ୍ଷ ଚୀନ୍‌ର ବିଙ୍ଗଜିୟାଓଙ୍କୁ ହରାଇ ବ୍ରୋଞ୍ଜ ପଦକ ହାତେଇଥିଲେ ପିଭି ସିନ୍ଧୁ । 21-13, 21-15 ସେଟ୍‌ରେ ସିନ୍ଧୁ ବିଜୟୀ ହୋଇଛନ୍ତି । କିନ୍ତୁ ସବୁଠାରୁ ଗୌରାବାନିତ୍ୱ ଖବର ଏହା ଯେ, ପିଫି ସିନ୍ଧୁ ଦେଶର ଏକମାତ୍ର ତାରକା, ଯିଏ ଲଗାତର ଦେଶକୁ ବିଶ୍ୱ ମଞ୍ଚରେ ପରିପ୍ରକାଶ କରିଛନ୍ତି  । ଗତ ଅଲିମ୍ପିକ୍ସରେ ସିନ୍ଧି ମେଡାଲ ଆଣିଦେଇଥିବାବେଳେ ଚଳିତବର୍ଷ ମଧ୍ୟ କାଂସ୍ୟ ପଦକ ହାସଲ କରିଛନ୍ତି ସିନ୍ଧୁ  । ସିନ୍ଧୁଙ୍କ ଏହି ସଫଳତାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ, କ୍ରୀଡ଼ାମନ୍ତ୍ରୀ ଏବଂ ମୁଖ୍ୟମନ୍ତ୍ରୀ ନବୀନ  ପଟ୍ଟନାୟକ ମଧ୍ୟ ଶୁଭେଛା ଜଣାଇଛନ୍ତି  ।