spot_img
Home Blog Page 5512

ଆଇଟି ଆଇନର ଧାରା ୬୬ଏ ଉଚ୍ଛେଦ ସତ୍ତ୍ୱେ ମାମଲା ରୁଜୁ ପ୍ରସଙ୍ଗ, ମାମଲା ପ୍ରତ୍ୟାହର କରିବା ଲାଗି ସୁପ୍ରିମ କୋର୍ଟଙ୍କ ନିର୍ଦ୍ଦେଶ

ନୂଆଦିଲ୍ଲୀ: ରଦ୍ଦ ହୋଇଥିବା ଆଇନକୁ ବ୍ୟବହାର କରାଯିବା ପ୍ରସଙ୍ଗ। ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳକୁ ସୁପ୍ରିମକୋର୍ଟଙ୍କ ନୋଟିସ। ୨୦୧୫ରେ ଆଇଟି ଆଇନର ଧାରା ୬୬ଏ କୁ ଉଚ୍ଛେଦ କରାଯାଇଥିଲେ ମଧ୍ୟ ଏହି ଆଇନ ଅନୁସାରେ ଅନେକ ମାମଲା ରୁଜୁ ହୋଇଥିବାରୁ ଅସନ୍ତୋଷ ବ୍ୟକ୍ତ କରିଥିଲେ ସୁପ୍ରିମକୋର୍ଟ। ଏହା ସହ ସମସ୍ତ ହାଇକୋର୍ଟର ରେଜିଷ୍ଟ୍ରାର ଜେନେରାଲଙ୍କୁ ମଧ୍ୟ ନୋଟିସ କରିଛନ୍ତି ସର୍ବୋଚ୍ଚ ଅଦାଲତ। ୪ ସପ୍ତାହ ମଧ୍ୟରେ ଉତ୍ତର ଦେବାକୁ ବି କୋର୍ଟ କହିଛନ୍ତି। ଜଷ୍ଟିସ ଆରଏଫ ନରିମାନ ଓ ଜଷ୍ଟିସ ବି.ଆର. ଗଭାଇଙ୍କୁ ନେଇ ଗଠିତ ଖଣ୍ଡପୀଠ ଏହି  ନୋଟିସ ଜାରି କରିଛନ୍ତି। ଆଇଟି ଆଇନର ଧାରା ୬୬-ଏ ଅନୁସାରେ ମାତ୍ରାଧିକ ମାମଲା ଦାଏର ହୋଇଥିବାରୁ ଏସମ୍ପର୍କରେ ପଦକ୍ଷେପ ନେବା ଲାଗି ପିପୁଲ ୟୁନିଅନ ଫର ସିଭିଲ ଲିବରଟିଜ ବା ପିୟୁସିଏଲ  ପକ୍ଷରୁ ଏକ ଆବେଦନ ସୁପ୍ରିମ କୋର୍ଟରେ କରାଯାଇଥିଲା।

ଏହି ମାମଲା ପରେ ରଦ୍ଦ ହୋଇଥିବା ଆଇନ ଅନୁସାରେ ମାମଲା ରୁଜୁ ନ କରିବାକୁ ସୁପ୍ରିମକୋର୍ଟ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡିକୁ ନିର୍ଦ୍ଦେଶ ଦେବା ସହ ରୁଜୁ ହୋଇଥିାବା ମାମଲାଗୁଡିକୁ ପ୍ରତ୍ୟାହାର କରିବା ଲାଗି ନିର୍ଦ୍ଦେଶ ଦେଇଥିଲେ। ରଦ୍ଦ ହୋଇଥିବା ଆଇନ ଆଧାରରେ ଦେଶରେ ୧ହଜାରରୁ ଅଧିକ ମାମଲା ରୁଜୁ ହୋଇଥିବା ନେଇ କେନ୍ଦ୍ର ଗୃହମନ୍ତ୍ରଣାଳୟ ପକ୍ଷରୁ ରିପୋର୍ଟ ପ୍ରକାଶ ପାଇବା ପରେ ସୁପ୍ରିମକୋର୍ଟ କ୍ଷୁବ୍ଧ ହୋଇଥିଲେ। କମେଣ୍ଟ ପୋଷ୍ଟିଂ କରି ଦୁଇ ମହିଳା ଗିରଫ ହେବା ପରେ ଗତ ୨୦୧୨ରେ ଏନେଇ ମୁମ୍ବାଇର ଜଣେ ଆଇନଛାତ୍ର ଏକ ପିଟିସନ ଦାଖଲ କରିଥିଲେ। ପିଟିସନର ଶୁଣାଣି କରି ସୁପ୍ରିମକୋର୍ଟ ଗତ ୨୪ ମାର୍ଚ୍ଚ ୨୦୧୫ରେ ଆଇଟି ଆଇନର ଧାରା ୬୬ଏ ଉଚ୍ଛେଦ କରିଥିଲେ।

ଆର୍‌. ଭାଲ୍ୟୁ କମ୍ ଥିବାରୁ ରାଜ୍ୟରେ ତୃତୀୟ ଲହରରେ ଅଧିକ ସଂକ୍ରମଣ ହେବନାହିଁ

ଭୁବନେଶ୍ୱର: ଅଗଷ୍ଟରୁ ସେପ୍ଟେମ୍ବର ମାସ ମଧ୍ୟରେ କରୋନାର ତୃତୀୟ ଲହର ଆସିପାରେ। ତେବେ ବିଭିନ୍ନ ଷ୍ଟଡି ଓ ମଡେଲ ମଧ୍ୟ କହୁଛି କି ଏଇ ମାସ ଶେଷ ବେଳକୁ ଦେଶରେ ତୃତୀୟ ଲହର ଆସିପାରେ ଓ ଅକ୍ଟୋବରରେ ପିକ୍‌କୁ ଛୁଇଁ ପାରେ। ଏମିତି ସୂଚନା ଦେଇଛନ୍ତି ସ୍ୱାସ୍ଥ୍ୟ ବିଶେଷଜ୍ଞ ନିରୋଜ ମିଶ୍ର। ସେ ଆହୁରି ମଧ୍ୟ କହିଛନ୍ତି ତୃତୀୟ ଲହରରେ ଡେଲ୍ଟା ଭ୍ୟାରିଆଣ୍ଟ ଅଧିକ ସଂକ୍ରମିତ କରିବା ଆଶଙ୍କା ରହିଛି। ଯେଉଁଥିରେ ଦୈନିକ ଲକ୍ଷେରୁ ଦେଢ଼ ଲକ୍ଷ ଲୋକ ସଂକ୍ରମିତ ହୋଇପାରନ୍ତି। ସବୁଠାରୁ ବଡ଼ କଥା ହେଉଛି ଯେ ଏଥିରେ ଓଡ଼ିଶାରେ ଆର୍‌. ଭାଲ୍ୟୁ କମ୍ ଥିବାରୁ ସଂକ୍ରମଣ ଅଧିକ ହେବନି। ତେବେ ତୃତୀୟ ଲହର ସମୟରେ ଓଡ଼ିଶାରେ ଦ୍ୱିତୀୟ ଲହର ଭଳି ୧୦ ହଜାର ଉପରେ ସଂକ୍ରମିତ ଚିହ୍ନଟ ହେବେ ନାହିଁ ବୋଲି କହିଛନ୍ତି ସ୍ୱାସ୍ଥ୍ୟ ବିଶେଷଜ୍ଞ ନିରୋଜ ମିଶ୍ର। ମୁକାବିଲା ପାଇଁ ରାଜ୍ୟ ସରକାର ପୂରା ପ୍ରସ୍ତୁତ ଥିବା ସୂଚନା ଦିଆଯାଇଛି।

ସେପଟେ ସିବିକେ ମହାନ୍ତି ମଧ୍ୟ ଆର୍‌. ଭାଲ୍ୟୁ ଉପରେ ସୂଚନା ଦେଇଛନ୍ତି। ଓଡ଼ିଶାରେ ଆର. ଭାଲ୍ୟୁ ଅନ୍ୟ ରାଜ୍ୟ ତୁଳନାରେ ଭଲ ଅଛି ବୋଲି କହିଛନ୍ତି। ଆର୍‌. ଭାଲ୍ୟୁ ୧ ଉପରେ ରହିଲେ ଅଧିକ ଲୋକଙ୍କୁ ସଂକ୍ରମିତ ହେବ। କେତେକ ରାଜ୍ୟରେ ବର୍ତ୍ତମାନ ଆର୍.‌ ଭାଲ୍ୟୁ ୧ ପାଖାପାଖି  ପହଞ୍ଚିଛି। ଓଡ଼ିଶାରେ ଆର୍‌. ଭାଲ୍ୟୁ ୧ ହୋଇନାହିଁ। ୧ ଉପରେ ରହିଲେ ସଂକ୍ରମଣ ବଢ଼ିବା ଆଶଙ୍କା ରହିଛି ବୋଲି ଡିଏମ୍‌ଇଟି ନିର୍ଦ୍ଦେଶକ ସି.ବି.କେ ମହାନ୍ତି କହିଛନ୍ତି।

ମହିଳା ଏବଂ ପୁରୁଷ ହକିର ବିଜୟ ପାଇଁ ମୁଖ୍ୟମନ୍ତ୍ରୀଙ୍କୁ ପ୍ରଶଂସା କଲେ ସାମ୍ବାଦିକ ରାଜଦୀପ ସରଦେଶାଇ

ଭୁବନେଶ୍ୱର: ପ୍ରଥମ ଥର ପାଇଁ ଅଲମ୍ପିକ୍‌ ସେମିଫାଇନାଲରେ ପ୍ରବେଶ କରିଛି ଭାରତୀୟ ମହିଳା ହକି ଦଳ। ଅଷ୍ଟ୍ରେଲିଆକୁ ୧-୦ରେ ପରାସ୍ତ କରି ଇତିହାସ ସୃଷ୍ଟି କରିଛି ଭାରତୀୟ ହକି ଦଳ। ଆଜି ଯଦି କିଏ ସବୁଠୁ ବେଶି ଖୁସି ଓ ଉତ୍ସାହିତ ହେବା କଥା ସେ ହେଉଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୋଲି କହିଛନ୍ତି ବରିଷ୍ଠ ସାମ୍ବାଦିକ ରାଜଦୀପ ସରଦେଶାଇ। ସେଥିପାଇଁ ଓଡ଼ିଶା ଏବଂ ମୁଖ୍ୟମନ୍ତ୍ରୀଙ୍କୁ ପ୍ରଶଂସା କରିଛନ୍ତି ବରିଷ୍ଠ ସାମ୍ବାଦିକ ରାଜଦୀପ ସରଦେଶାଇ। ଓଡ଼ିଶା ଭାରତୀୟ ହକି ଦଳର ପ୍ରାୟୋଜକ ହୋଇଥିବାରୁ ପ୍ରଶଂସା କରିଛନ୍ତି। ସବୁଠାରୁ ବଡ଼ କଥା ହେଉଛି ଭାରତୀୟ ମହିଳା ହକି ଦଳର ବିଜୟର ସମସ୍ତ ଶ୍ରେୟ ଓଡ଼ିଶା ମୁଖ୍ୟମନ୍ତ୍ରୀଙ୍କୁ ଯିବ ବୋଲି କହିଛନ୍ତି ରାଜଦୀପ ସରଦେଶାଇ। ଅଧିକାଂଶ ରାଜନେତା ଓ କର୍ପୋରେଟ୍‌ କ୍ରିକେଟ ସହିତ ସଂଶ୍ଳିଷ୍ଟ। କାରଣ କ୍ରିକେଟରେ ରହିଛି ହକିଠାରୁ ଅଧିକ ରୋମାଞ୍ଚ। ସେଥିପାଇଁ ଯେହେତୁ କ୍ରିକେଟରେ ଅଧିକ ରୋମାଞ୍ଚ ରହିଛି ସେଥିପାଇଁ ସମସ୍ତେ ସେଥିରେ ଯୋଡ଼ି ହୋଇଛନ୍ତି। କିନ୍ତୁ ଓଡ଼ିଶା ଏମିତି ଏକ ରାଜ୍ୟ ଯିଏ ହକି ସହିତ ଯୋଡ଼ି ହୋଇ ଏବେ ବିଶାଳ ଉଦାହରଣ ସୃଷ୍ଟି କରିଛି। ଭାରତୀୟ ମହିଳା ହକି ଟିମ୍‌ର ବିଜୟ ପରେ ଟ୍ୱିଟ୍‌ କରି ଏଭଳି ସୂଚନା ଦେଇଛନ୍ତି ବରିଷ୍ଠ ସାମ୍ବାଦିକ ରାଜଦୀପ ସରଦେଶାଇ।

 

 

ଦେଶ ମନେ ରଖିବ ଏହି ୬୦ ମିନିଟ ! ଅଲମ୍ପିକରେ ଭାରତୀୟ ମହିଳା ହକି ଦଳର ବିସ୍ଫୋରକ ପ୍ରଦର୍ଶନ

ଟୋକିଓ ଅଲମ୍ପିକ ୨୦୨୦: ଟୋକିଓ ଅଲମ୍ପିକରେ ଭାରତୀୟ ମହିଳା ହକି ଟିମ ସମସ୍ତଙ୍କୁ ଖୁବ ପ୍ରଭାବିତ କରିଛି । ରାଣୀ ରାମପାଲଙ୍କ ନେତୃତ୍ୱରେ ଖେଳାଳୀମାନେ ଯେଉଁଭଳି ଭାବେ କ୍ୱାର୍ଟର ଫାଇନାଲରେ ପ୍ରବେଶ କରିଥିଲେ, ସେଥିରୁ ପ୍ରମାଣିତ ହୋଇଥିଲା ଯେ, ଦେଶର ଜାତୀୟ ଖେଳରେ ଝିଅମାନେ ବି କିଛି କମ ନୁହଁନ୍ତି । ଆଜି ଟୋକିଓ ଅଲମ୍ପିକରେ ଭାରତର ମୁକାବିଲା ଥିଲା ଟିମ ଅଷ୍ଟ୍ରେଲିଆ ସହିତ । ତିନି ତିନି ଥରର ଅଲିମ୍ପିକ୍ ଗୋଲ୍ଡ ବିଜେତା ଅଷ୍ଟ୍ରେଲିଆକୁ ଭାରତୀୟ ଦଳ ଯେଉଁଭଳି ଭାବେ ମାତ୍ ଦେଲା ତାହା ସବୁଦିନ ପାଇଁ ସ୍ମରଣୀୟ ହୋଇ ରହିବ ।

ଆରମ୍ଭରୁ ହିଁ ଜଣାପଡ଼ିଗାଲ ଯେ ଉଭୟ ଦଳ ପାଇଁ ମୁକାବିକା ଏତେ ସଜହ ହେବ ନାହିଁ । ଅଷ୍ଟ୍ରେଲୀୟ ଖେଳାଳୀ ମାନେ ମ୍ୟାଚ ଆରମ୍ଭ ହେଉ ହେଉ ତାଙ୍କ କୌଶଳ ଆରମ୍ଭ କରିଥିଲେ । କିନ୍ତୁ ଭାରତୀୟ ଖେଳାଳୀ ବି କିଛି କମ ନଥିଲେ । କଙ୍ଗାରୁଙ୍କ ଗୋଟି ଗୋଟି ମୁଭକୁ ଖୁବ ଚତୁରତାର ସହ ମାତ୍ ଦେଇଥିଲେ । ଭାରତୀୟ ଗୋଲକିପର ଅଷ୍ଟ୍ରେଲୀୟ ଖେଳାଳିଙ୍କ ପ୍ରତ୍ୟେକ ମୁଭକୁ ଡିଫେଣ୍ଡ କରିବାକୁ ପ୍ରସ୍ତୁତ ଥିଲେ। ଭାରତର ଡିଭେନ୍ସ ଖୁବ ଦମଦାର ଥିଲା, ବିଶେଷକରି ଏଭଳି ଦେଶ ବିପକ୍ଷରେ ଯିଏ ଗ୍ରୁପ ଷ୍ଟେଜରେ ୧୩ଟି ଗୋଲ ସ୍କୋର କରିଥିଲା ।

ଅଷ୍ଟ୍ରେଲିଆ ଗୋଲ କରିବା ପାଇଁ ପୂରା ଦମ ଲଗାଇଥିଲେ, କିନ୍ତୁ ଭାରତ ଏପରି ହେବାକୁ ଦେଲେନି । ମଉକା ଆସିଲା ଦ୍ୱିତୀୟ କ୍ୱାର୍ଟର ଫାଇନାଲର ୬ ମିନିଟ ପରେ । ଭାରତକୁ ମିଳିଲା ପ୍ରଥମ ପେନାଲ୍ଟି କର୍ଣ୍ଣର । ଗୁରଜୀତ ସିଂହ କୌଣସି ଭୁଲ ନକରି ଅଲମ୍ପିକରେ ନିଜର ପ୍ରଥମ ଗୋଲ କଲେ । ଭାରତ ୧-୦ରେ ଆଗରେ ଥିଲା । ଗୋଲ ପରେ କାଉଣ୍ଟର ଆଟାକ୍ ଅଷ୍ଟ୍ରେଲିଆ ପକ୍ଷରୁ ଜୋରଦାର ଥିଲା । ଖେଳରେ ଆକ୍ରୋଶ କିଛି ମିନିଟ୍ ପରେ ବଢ଼ିବାକୁ ଲାଗିଲା, ଅନେକ ଖେଳାଳି ପଡ଼ିଆରେ ଆହତ ହେବା ବି ନଜର ଆସିଥିଲା ।

ସମୟ ସରି ଆସୁଥାଏ, ଅଷ୍ଟ୍ରେଲିଆ ପାଇଁ ଚିନ୍ତା ବଢ଼ୁଥାଏ । ଏଭଳି ପରିସ୍ଥିତିରେ ଭାରତୀୟ ଦଳର ଗୋଟିଏ ଭୁଲ ପଦକ ଜିତିବାର ଆଶାକୁ ଧୂଳିସାତ୍ କରିଦେଇଥାନ୍ତା । କିନ୍ତୁ ସେପରି କିଛି ହୋଇନଥିଲା । ମ୍ୟାଚ ଭିତରେ ଏମିତି ସମୟ ଆସିଥିଲା ଯେଉଁଠି ଭାରତୀୟ ଖେଳାଳୀଙ୍କ ଚିନ୍ତା ବଢ଼ିଯାଇଥିଲା । ଶର୍ମିଳା ଫାଷ୍ଟ ହାଫରେ ଗୋଲ କରିବା ପାଇଁ ସୁଯୋଗ ବାଢ଼ିଥିଲେ କିନ୍ତୁ ଗୋଲ ହୋଇପାରିନଥିଲା ।

୬୦ ମିନିଟ୍ ବିତିସାରିଥିଲା । ସ୍କୋର ଭାରତ ସପକ୍ଷରେ ୧-୦ରେ ଥିଲା । ଭାରତ ଏହି ମ୍ୟାଚ ଜିତିସାରିଥିଲା ​​ଆଉ ତାହା ହୋଇଥିଲା ଯାହା କେବେ ହୋଇନଥିଲା । ଭାରତୀୟ ମହିଳା ହକି ଟିମ ପ୍ରଥମ ଥର ପାଇଁ ସେମିଫାଇନାଲରେ ପହଞ୍ଚିଛି ।

ନିର୍ବିଶେଷରେ ମ୍ୟାଚର ଫଳାଫଳ ଯେଉଁ ଦଳ ପକ୍ଷରେ ହେଇଥାଉ ନା କାହିଁକି ଦର୍ଶକଙ୍କ ପାଇଁ ଏହା ଏକ ରୋମାଞ୍ଚକର ମ୍ୟାଚ୍ ଥିଲା । ଉଭୟ ଦଳର ଖେଳାଳିମାନେ ସେମାନଙ୍କର ସର୍ବୋତ୍ତମ ଦକ୍ଷତା ପ୍ରଦର୍ଶନ କରିଥିଲେ ।

ଭାରତୀୟ ହକିରେ ମହିଳା ଏବଂ ପୁରୁଷ ଦଳର ବିଜୟ ପରେ ମୁଖ୍ୟମନ୍ତ୍ରୀଙ୍କୁ ଛୁଟୁଛି ପ୍ରଶଂସା ସୁଅ

ଭୁବନେଶ୍ୱର: ପ୍ରଥମଥର ପାଇଁ ଭାରତୀୟ ମହିଳା ହକି ଟିମ୍‌ ସେମିଫାଇନାଲରେ ପ୍ରବେଶ କରିଛି। ଅଷ୍ଟ୍ରେଲିଆକୁ ୧-୦ରେ ହରାଇଛି ମହିଳା ହକି ଟିମ୍‌। ଏହା ପୂର୍ବରୁ ଭାରତୀୟ ପୁରୁଷ ହକି ଟିମ୍‌ ମଧ୍ୟ ଦୀର୍ଘ ୪୧ ବର୍ଷ ପରେ ଅଲମ୍ପିକ୍‌ରେ ସେମି ଫାଇନାଲକୁ ପ୍ରବେଶ କରିଛି। ୨୦୧୮ରୁ ଓଡ଼ିଶା ଭାରତୀୟ ହକି ଟିମ୍‌ର ପ୍ରାୟୋଜକ ରହିଛି ଖାଲି ସେତିକି ନୁହେଁ ହକି ପାଇଁ ଓଡ଼ିଶାର ଅବଦାନ ମଧ୍ୟ ଅନନ୍ୟ। ଓଡ଼ିଶାରେ ହକିର ଉନ୍ନତି ହେବାରୁ ଆଜି ଓଡ଼ିଶାରୁ ପୁରୁଷ ହକି ଟିମ୍‌ରେ ଉପ ଅଧିନାୟକ ବିରେନ୍ଦ୍ର ଲାକ୍ରା ଥିବା ବେଳେ ମହିଳା ଟିମ୍‌ରେ ଦିପ୍‌ ଗ୍ରେସ୍‌ ଏକ୍କା ଅଛନ୍ତି। ସେଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଛୁଟୁଛି ବିଭିନ୍ନ ମହଲରୁ ପ୍ରଶଂସାର ସୁଅ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ହକିକୁ ନୂଆ ଦିଗ ଦେଇଛନ୍ତି। କଳିଙ୍ଗ ଷ୍ଟାଡିଅମକୁ ନବୀନ ନୂଆରୂପ ଦେଇଛନ୍ତି ବୋଲି କହିଛନ୍ତି କଂଗ୍ରେସ ବିଧାୟକ ସୁରେଶ ରାଉତ ରାୟ। ସେ ଆହୁରି ମଧ୍ୟ କହିଛନ୍ତି କି ବଜେଟକୁ ୮ କୋଟିରୁ ୩୦ କୋଟି କରାଯାଇଛି। ଓଡ଼ିଶାରେ ନବୀନ ନିଜେ ହକି ମ୍ୟାଚର ଆୟୋଜନ କରିଥିବା ବେଳେ ପୁରା ବିଶ୍ୱ ଆଗରେ କଳିଙ୍ଗ ଷ୍ଟାଡିଅମକୁ ପରିଚିତ କରାଇଛନ୍ତି। ଯେଉଁଥିପାଇଁ ହକି ଟିମ୍‌କୁ ସାରା ବିଶ୍ୱ ପ୍ରଶଂସା କରିଥିଲା। ସେପଟେ ହକି ଟିମର ପ୍ରାୟୋଜକ ବ୍ୟବସ୍ଥା ଏବଂ ସୁନ୍ଦରଗଡରେ ନୂଆ ହକି ଷ୍ଟାଡିଅମ ପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ସୁରେଶ ରାଉତରାୟ।

ସେପଟେ ଅଲମ୍ପିକ୍ସରେ ପୁରୁଷ ଓ ମହିଳା ହକିର ବିକାଶ ପାଇଁ ରହିଛି ଓଡ଼ିଶା ସରକାରଙ୍କ ହାତ। ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କ୍ରୀଡ଼ା ବିଭାଗ, ବିଶାଲ ଦେବ, ଭିନିଲ କ୍ରାଷ୍ଣାଙ୍କୁ ଧନ୍ୟବାଦ ଜଣାଇଛନ୍ତି ପୂର୍ବତନ ଅଧିନାୟକ ଦିଲ୍ଲୀପ ତିର୍କୀ। ମୁଖ୍ୟମନ୍ତ୍ରୀ ହକିକୁ ଅନ୍ୟ ଖେଳ ପରି ପ୍ରାଥମିକତା ଦେଇ ଏହାର ବିକାଶ କରୁଛନ୍ତି। ଦୁଇ ବର୍ଷ ହେବ ପୁରୁଷ ଓ ମହିଳା ହକି ଟିମର ପ୍ରାୟୋଜକ ରହିଛି ଓଡ଼ିଶା। ପ୍ରାୟୋଜକ ପାଇଁ କେହି ରାଜି ହେଉନଥିବା ବେଳେ, ଓଡ଼ିଶା ପ୍ରାୟୋଜକ ହୋଇଥିଲା ବୋଳି ଦିଲ୍ଲୀପ ତିର୍କୀ କହିଛନ୍ତି। ହକିର ପ୍ରସାର ପାଇଁ ବିଶ୍ୱକପ ହେଲା ଯାହା ବଡ଼ ସଫଳତା। ହକି କ୍ୟାମ୍ପ, ଚାମ୍ପିଅନସ ଟ୍ରଫି ମଧ୍ୟ ଆୟୋଜନ କରାଗଲା। ଆଗାମୀ ବିଶ୍ୱକପ ବି ରାଉରକେଲା ଓ ଭୁବନେଶ୍ୱରରେ ହେବ।

ବିଜୟ ପରେ ଓଡ଼ିଆ ଖେଳାଳିଙ୍କୁ ଅଭିନନ୍ଦନ ଜଣାଇଲେ କ୍ରୀଡ଼ାମନ୍ତ୍ରୀ। ବିଶ୍ୱରେ ଓଡ଼ିଶାର ଟେକ ରଖିଲେ ଆମ ଖେଳାଳି ବୋଲି କହିଛନ୍ତି କ୍ରିଡ଼ାମନ୍ତ୍ରୀ। ମୁଖ୍ୟମନ୍ତ୍ରୀଙ୍କ ହକି ପ୍ରତି ପ୍ରତିବଦ୍ଧତାରୁ ଅନେକ ସଫଳତା ମିଳିଛି। ମୁଖ୍ୟମନ୍ତ୍ରୀଙ୍କ ଚେଷ୍ଟା ପାଇଁ ତୃଣମୂଳସ୍ତରରୁ ଖେଳାଳିଙ୍କ ପ୍ରତିଭାର ବିକଶିତ କରାଯାଉଛି। ତେବେ ଉଭୟ ଦଳ ପଦକ ନେଇ ଫେରନ୍ତୁ ବୋଲି କହିଛନ୍ତି କ୍ରିଡ଼ାମନ୍ତ୍ରୀ।

ପ୍ରଥମ ଥର ପାଇଁ ସେମିପାଇନାଲରେ ସ୍ଥାନ ପକ୍କା କଲା ଭାରତୀୟ ମହିଳା ହକି ଟିମ୍‌, ଖୁସି ପ୍ରକଟ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ

ଭୁବନେଶ୍ୱର: ଟୋକିଓ ଅଲମ୍ପିକ୍ସରେ ପ୍ରଥମ ଥର ପାଇଁ ସେମିଫାଇନାଲରେ ପହଞ୍ଚିଛି ଭାରତୀୟ ମହିଳା ହକି ଟିମ୍। ଏଥିପାଇଁ ଟ୍ୱିଟ କରି ଭାରତୀୟ ମହିଳା ହକି ଦଳର ବିଜୟରେ ଖୁସି ପ୍ରକଟ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ପ୍ରଥମ ଥର ପାଇଁ ଭାରତୀୟ ମହିଳା ହକି ଟିମ୍‌ ଅଲିମ୍ପିକ୍ସର ସେମି ଫାଇନାଲକୁ ପ୍ରବେଶ କରିଛି। ଭାରତୀୟ ହକି ଟିମର ଏହି ଐତିହାସିକ ବିଜୟରେ ଖୁସି ପ୍ରକଟ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଚ୍ଚନାୟକ।

ସମ୍ପୂର୍ଣ୍ଣ ମ୍ୟାଚ୍‌ ଦେଖିବା ପରେ ଭିଡିଓ ଏବଂ ଟ୍ୱିଟ୍‌ ମାଧ୍ୟମରେ ଭାରତୀୟ ହକି ଟିମକୁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ। ଟିମ୍ ଆଗକୁ ଭଲ ପ୍ରଦର୍ଶନ କରୁ ଇତିହାସରେ ନିଜର ସ୍ଥାନ ପକ୍କା କରୁ ବୋଲି ଆଶା ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଚ୍ଚନାୟକ। ଦେଶ ପାଇଁ ଗୌରବ ଆଣୁ, ଏହି ଆଶା ରଖିଛନ୍ତି ନବୀନ। ଭାରତୀୟ ମହିଳା ଟିମ୍‌କୁ ସଫଳତାର ଅଭିନନ୍ଦନ ଜଣାଇବା ସହ ଆଗାମୀ ମ୍ୟାଚ୍ ପାଇଁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ।

ଅନ୍ୟପଟେ ଯେତେବେଳେ ଭାରତ ସହ ଅଷ୍ଟ୍ରେଲିଆର ମ୍ୟାଚ ଜାରି ରହିଥିଲା। ସେତେବେଳେ ମୁଖ୍ୟମନ୍ତ୍ରୀ ନିଜ ବାସଭବନରେ ରହି ସମ୍ପୂର୍ଣ୍ଣ ମ୍ୟାଚକୁ ଦେଖୁଥିଲେ। ଭାରତୀୟ ମହିଳା ହକି ଦଳ ଜିତିବା ପରେ ଇଣ୍ଡିଆ ହକି ଟିମ୍‌ ବେଷ୍ଟ ଅଫ୍‌ ଲକ୍‌ ବୋଲି କହିଥିଲେ।

୨୦୧୮ରୁ ଓଡ଼ିଶା ଭାରତୀୟ ହକି ଟିମ୍‌ର ପ୍ରାୟୋଜକ ଅଛି । ହକି ପାଇଁ ଓଡ଼ିଶାର ଅବଦାନ ମଧ୍ୟ ଅନନ୍ୟ । ଓଡ଼ିଶାରୁ ପୁରୁଷ ହକି ଟିମ୍‌ରେ ଉପ ଅଧିନାୟକ ବିରେନ୍ଦ୍ର ଲାକ୍ରା ଥିବା ବେଳେ ମହିଳା ଟିମ୍‌ରେ ଦିପ୍‌ ଗ୍ରେସ୍‌ ଏକ୍କା ଅଛନ୍ତି ।

LACରେ ବିବାଦକୁ ରୋକିବା ପାଇଁ ସିକ୍କିମରେ ଭାରତ ଓ ଚୀନ୍‌ ସୀମା ମଧ୍ୟ ପ୍ରତିଷ୍ଠା ହେଲା ହଟଲାଇନ୍‌

ନୂଆଦିଲ୍ଲୀ: ଭାରତ ଓ ଚୀନ ମଧ୍ୟରେ ସହାବସ୍ଥାନ ଲାଗି ହଟଲାଇନ ପ୍ରତିଷ୍ଠା। ଉତ୍ତର ସିକିମ ସେକ୍ଟରରେ ଭାରତୀୟ ଓ ଚୀନ ସୈନ୍ୟଙ୍କ ମଧ୍ୟରେ ଆତ୍ମପ୍ରତ୍ୟୟ ସୃଷ୍ଟି କରିବା ଉଦ୍ଦେଶ୍ୟରେ ଏହି ହଟଲାଇନ ପ୍ରତିଷ୍ଠା କରାଯାଇଛି। ପ୍ରକୃତ ନିୟନ୍ତ୍ରଣ ରେଖା ଅଞ୍ଚଳରେ ସ୍ଥିରତା ପ୍ରତିଷ୍ଠା ଉଦ୍ଦେଶ୍ୟରେ ଏହି ପଦକ୍ଷେପ ନିଆଯାଇଛି। ଉତ୍ତର ସିକିମର କୋଙ୍ଗ୍ରା ଓ ତିବ୍ବତୀୟ ଅଞ୍ଚଳର ଖାମ୍ବା ଜୋଙ୍ଗସ୍ଥିତ ପିଏଲଏ ମଧ୍ୟରେ ଏହି ହଟଲାଇନ କାର୍ଯ୍ୟକାରୀ ହେବ। ଦୁଇ ଦେଶ ମଧ୍ୟରେ ବାରମ୍ବାର ଶୀତଳ ଯୁଦ୍ଧ ସ୍ଥିତି ଲାଗୁଥିବାରୁ ଏହି ହଟଲାଇନ ଅନେକ ସମସ୍ୟାର ସମାଧାନ କରିପାରିବ ବୋଲି ଆଶା କରାଯାଉଛି।

ଗତବର୍ଷ ପୂର୍ବ ଲଦ୍ଦାଖରେ ସୃଷ୍ଟି ହୋଇଥିବା ଉତ୍ତେଜନା ପରିପ୍ରେକ୍ଷୀରେ ଏହି ବ୍ୟବସ୍ଥା କାର୍ଯ୍ୟକାରୀ କରାଯାଇଛି। ଦୁଇ ଦେଶ ମଧ୍ୟରେ ଦ୍ୱାଦଶ କର୍ପସ କମାଣ୍ଡରସ୍ତରୀୟ ବୈଠକ ପରେ ଏହି ପଦକ୍ଷେପ ନିଆଯାଇଛି। ଶନିବାର ଅନୁଷ୍ଠିତ ଏହି ବୈଠକରେ ଭାରତ ପକ୍ଷରୁ ଲେଫ୍ଟନାଣ୍ଟ ଜେନରାଲ ପିଜିକେ ମେନନ ଓ ଚୀନ ପକ୍ଷରୁ ଚିଫ ମେଜର ଜେନରାଲ ଲିଉ ଲିନ ଭାଗ ନେଇଥିଲେ। ହଟସ୍ପ୍ରିଙ୍ଗସ, ଗୋଗ୍ରା, କୋଙ୍ଗକା ଲା ଅଞ୍ଚଳରେ ସ୍ଥିରତା ବଜାୟ ରଖିବା ଲାଗି ଦୁଇ ପକ୍ଷ ମଧ୍ୟରେ ଆଲୋଚନା ହୋଇଥିବା ବେଳେ ପର୍ଯ୍ୟାୟ କ୍ରମେ ସେଠାରୁ ସୈନ୍ୟ ଅପସାରଣ ଲାଗି ନିଷ୍ପତ୍ତି ହୋଇଥିଲା।

ତୃଣମୂଳ ସ୍ତରରେ ଦୁଇ ଦେଶର କମାଣ୍ଡର ସ୍ତରରେ ଯେପରି ସମସ୍ତ ସମସ୍ୟାର ସମାଧାନ ହେବ ସେଥିପାଇଁ ହଟଲାଇନ ପ୍ରତିଷ୍ଠା କରାଯାଇଛି। ହଟଲାଇନ ପ୍ରତିଷ୍ଠା ଅବସରରେ ଉଭୟ ପକ୍ଷର କମାଣ୍ଡର ଯୋଗ ଦେଇଥିଲେ। ୩ ହଜାର ୪୮୮ କିଲୋମିଟର ଦୀର୍ଘ ପ୍ରକୃତ ନିୟନ୍ତ୍ରଣ ରେଖାରେ ଏହା ହେଉଛି ଷଷ୍ଠ ହଟଲାଇନ।

ଆଖଣ୍ଡଳମଣିଙ୍କ ପୀଠରେ କରୋନା କଟକଣାକୁ ନମାନି ଶ୍ରାବଣଯାତ୍ରା

ଆରଡ଼ି: ଆଖଣ୍ଡଳମଣିଙ୍କ ପୀଠରେ ଶ୍ରାବଣଯାତ୍ରା କଟକଣା ଫୁ। ପୀଠରେ ସହସ୍ରାଧିକ ଭକ୍ତଙ୍କ ଗହଳି। ଭୋଳାନାଥଙ୍କୁ କଲେ ଜଳାଭିଷେକ। ଚଳିତବର୍ଷ ମହାମାରୀ କରୋନାର ଭୟଭୟତାକୁ ନେଇ ସରକାର ବନ୍ଦ କରିଛନ୍ତି ଶ୍ରାବଣୀମେଳା। ଏପରିକି କୌଣସି ଶିବାଳୟରେ କାଉଡିଆ ଜଳଲାଗି କରିବେ ନାହିଁ ବୋଲି ସମସ୍ତ ମନ୍ଦିର ପ୍ରଶାସନ ଓ ଜିଲା ପ୍ରଶାସନକୁ ପରାମର୍ଶ ଦେଇଛନ୍ତି ସରକାର।

ଏପରିକି ଅଗଷ୍ଟମାସରେ କଟକଣାକୁ କୋହଳ କରାଯାଇଥିଲେ ମଧ୍ୟ ଶ୍ରାବଣୀମେଳା ପାଇଁ ବନ୍ଦ ରହିଛି ମନ୍ଦିର। ଏପରିକି ଖୋଲିବା ପାଇଁ ଜିଲାପାଳଙ୍କୁ ନିର୍ଦେଶ ଦେଇଛନ୍ତି ସରକାର। ଏପରି ନିୟମକୁ ଫୁ କରି ଆରଡିପୀଠ ଆଖଣ୍ଡଳମଣିଙ୍କ ମନ୍ଦିର ପରିସରରେ ସହସ୍ରାଧିକ ଭକ୍ତଙ୍କର ଭିଡ ଜମିବା ସହ କେତେକ କାଉଡିଆ ବାବା ଶିବଗଙ୍ଗା ପୁଷ୍କରିଣୀ କୂଳରେ ଥିବା ବାସୁଆବଳଦ ଉପରେ ଜଳ ଢାଳିଛନ୍ତି। କୋଭିଡ ନିୟମ ପାଳନ କରିବା ତ ଦୂରର କଥା ନା ଅଛି ସାମାଜିକ ଦୂରତା ନା ଅଛି କାହାରି ମୁହଁରେ ମାକ୍ସ। ପିଲା  ଠୁଁ ବୟସ୍କ ବ୍ୟକ୍ତି ଭିଡାଭିଡି ହୋଇ ଜାଳୁଛନ୍ତି ଦୀପ।

ଉପର ମଥାରେ ପ୍ରବଳ ବର୍ଷା କାରଣରୁ ବିପଦ ସଂକେତ ଟପିଲାଣି ସୂବର୍ଣ୍ଣରେଖା ନଦୀ ଜଳସ୍ତର

ଜଳେଶ୍ୱର: ଉପାର ମୁଣ୍ଡରେ ମୌସୁମୀ ବର୍ଷା କାରଣରୁ ଫୁଲୁଛି ସୂବର୍ଣ୍ଣରେଖା ନଦୀ। ଆଜି ସକାଳୁ ଝାଡ଼ଖଣ୍ଡରୁ ବର୍ଷାପାଣି ଆସି ସୂବର୍ଣ୍ଣରେଖା ନଦୀର ରାଜଘାଟ ନିକଟରେ ମିଶିବା ଫଳରେ ଜଳସ୍ତର ବିପଦ ସଂକେତ ଟପିଛି। ରାଜଘାଟ ନିକଟରେ ନଦୀର ବିପଦ ସଂକେତ ୧୦.୩୬ ମିଟର ଥିବାବେଳେ, ସକାଳ ୯ଟା ସୁଦ୍ଧା ଏଠାରେ ଜଳସ୍ତର ୧୦.୫୪ ମିଟରରେ ପହଞ୍ଚିଛି। ଫଳରେ ଭୋଗରାଇ ତହସିଲର ଦହମୁଣ୍ଡା, ଗବଗାଁ, ଚିରକୁଲା, ଆରୁହାବର୍ତ୍ତି, କୁଲଡ଼ା ପ୍ରଭୃତି ଗାଁ ସମେତ ୫/୬ଟି ପଞ୍ଚାୟତରେ ବନ୍ୟାପାଣି ପସି ଯାଇଛି।

ସେହିପରି ବାଲିଆପାଳ ତହସିଲର ୬ଟି ପଞ୍ଚାୟତର କୁଦମାନସିଂ, ସୂର୍ଯ୍ୟପୁର, ଗୁଣପୁର, ଆଠବାଟିଆ, ସୁଙ୍ଗମୁହଁ, ବିଷ୍ଣୁପୁର, ଅସ୍ତି, ମଧୁପୁରା ପ୍ରଭୃତି ଗାଁ ପ୍ରଭାବିତ ହୋଇଛି। ସୂବର୍ଣ୍ଣରେଖା ନଦୀକୁ ଝାଡ଼ଖଣ୍ଡର ଗାଲୁଡ଼ିହି ବ୍ୟାରେଜ୍‌ରୁ ୮ ହଜାର କ୍ୟୁସେକ୍‌ ବନ୍ୟାଜଳ ଛଡ଼ା ଯାଇଛି। ସେହିପରି ଚାନ୍ଦିଲି ଡ଼୍ୟାମର ଗୋଟିଏ ଗେଟ୍‌ ଦେଇ ମଧ୍ୟ ନଦୀକୁ ବନ୍ୟାଜଳ ପ୍ରବେଶ କରୁଛି। ଫଳରେ ଆଜି ମଧ୍ୟାହ୍ନ ଗୋଟାଏ ସୁଦ୍ଧା ନଦୀର ଜଳସ୍ତର ୧୧ ମିଟରରେ ପହଞ୍ଚିପାରେ ବୋଲି ପୂର୍ବାନୁମାନ କରିଛି ଜଳସେଚନ ବିଭାଗ। ଅପରାହ୍ନ ପରେ ନଦୀର ଜଳସ୍ତର ହ୍ରାସ ପାଇପାରେ ବୋଲି ଜଳସେଚନ ବିଭାଗ ସୂଚନା ଦେଇଛି।

ଦେଶରେ ଦିନକରେ ୪୦ହଜାର ୧୩୪ କରୋନା ସଂକ୍ରମିତ ଚିହ୍ନଟ

ନୂଆଦିଲ୍ଲୀ: ଦେଶରେ ଧିରେ ଧିରେ କରୋନା ସଂକ୍ରଣ କମିବାରେ ଲାଗିଛି। ଦେଶରେ ଦିନକରେ ୪୦ହଜାର ୧୩୪ କରୋନା ସଂକ୍ରମିତ ଚିହ୍ନଟ। ୨୪ ଘଣ୍ଟାରେ ୩୬ହଜାର ୯୪୬ ଆକ୍ରାନ୍ତ ସୁସ୍ଥ ହୋଇଥିବା ବେଳେ ୪୨୨ଜଣଙ୍କ ଜୀବନ ନେଇଛି କିଲର କରୋନା। ଦେଶର ମୋଟ୍ ସଂକ୍ରମିତଙ୍କ ସଂଖ୍ୟା ୩କୋଟି ୧୬ଲକ୍ଷ ୯୫ହଜାର ୯୫୮। ମୋଟ୍ ସୁସ୍ଥ ହେଲାଣି ୩କୋଟି ୮ଲକ୍ଷ ୫୭ହଜାର ୪୬୭। ମୋଟ୍ ମୃତ୍ୟୁସଂଖ୍ୟା ୪ଲକ୍ଷ ୨୪ହଜାର ୭୭୩ ରହିଛି। ତେବେ ଦେଶରେ କରୋନା ଆକ୍ଟିଭ କେସ୍ ଦେଶରେ ୪ଲକ୍ଷ ୧୩ହଜାର ୭୧୮ ଜଣ ରହିଛନ୍ତି। ଦେଶରେ ମୋଟ୍ ଭ୍ୟାକ୍ସିନେସନ ୪୭କୋଟି ୨୨ଲକ୍ଷ ୨୩ହଜାର ୬୩୯ରେ ପହଞ୍ଚିଛି । ୨୪ ଘଣ୍ଟାରେ ୧୭ଲକ୍ଷ ୬ହଜାର ୫୯୮ଜଣଙ୍କୁ ଟିକାକରଣ କରାଯାଇଛି।