ଭଦ୍ରକ: ହାତୀଦାନ୍ତ ଚୋରା ଚାଲାଣରେ ଭଦ୍ରକ ଲିଙ୍କ । ରାତି ଅଧରେ ରେଡ୍ କରି କାଦବରାଙ୍ଗରୁ ୫ଜଣଙ୍କୁ ଉଠାଇ ନେଲା ଏସଟିଏଫ ଓ ବନ ବିଭାଗ । ସୂଚନା ଅନୁସାରେ, ଭଦ୍ରକ ଜିଲ୍ଲା ଆଗରପଡ଼ା ଥାନା ଅଞ୍ଚଳରେ ଏସଟିଏଫ ରେଡ୍ କରିଥିବା ବେଳେ ୪ଜଣଙ୍କୁ କାବୁ କରିଥିବା ବେଳେ ସୋର ଖଇରାରେ ରେଡ୍ କରି ଜଣଙ୍କୁ କାବୁ କରିଛି ଏସଟିଏଫ୍ ।
ଏମାନେ ଆଗରପଡା ଥାନା କାଦବରାଙ୍ଗ ଅଞ୍ଚଳର ବୋଲି ଜଣାପଡ଼ିଛି । ଚଢ଼ାଉ ବେଳେ କିଛି ସାମଗ୍ରୀ ଜବତ ହୋଇଥିବା ସୂଚନା ମିଳିଛି । ଘଟଣାରେ ମୋଟ କେତେ ଜଣଙ୍କୁ ଗିରଫ କରାଯାଇଛି ସେ ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ ।
ଟୋକିଓ: ସ୍ୱର୍ଣ୍ଣ ବିଜୟ ପରେ ଆଜି ବ୍ରୋଞ୍ଜ ପାଇଁ ଲଢେଇ କରିବେ ପାରା ଅଲମ୍ପିଆନ ପ୍ରମୋଦ ଭଗତ। ଆଜି ବ୍ୟାଡମିଣ୍ଟନ ଡବଲ୍ସରେ ଜାପାନ ବିପକ୍ଷରେ ଖେଳିବ ଭାରତ। ସକାଳ ୮ଟା ୪୫ରେ ଏହି ଖେଳ ଆରମ୍ଭ ହେବାକୁ ଯାଉଛି।
ପ୍ରମୋଦ ଭଗତ ଓ ପଲକ କୋହଲି ଜାପାନର ଆକିକୋ ଏବଂ ଡାଇସୁକେଙ୍କୁ ଭେଟିବେ। ଗତକାଲି ଟୋକିଓ ପାରାଲିମ୍ପିକ୍ସରେ ଇତିହାସ ରଚିଥିଲେ ଓଡ଼ିଆ ପୁଅ ପ୍ରମୋଦ ଭଗତ । ବ୍ୟାଡ୍ମିଣ୍ଟନ ପୁରୁଷ ଏକକ ବର୍ଗରେ ଜିତିଥିଲେ ସ୍ୱର୍ଣ୍ଣ ପଦକ । ପ୍ରଥମ ଭାରତୀୟ ଭାବେ ସେ ପାରାଲିମ୍ପିକ୍ସ ବ୍ୟାଡ୍ମିଣ୍ଟନରେ ସ୍ୱର୍ଣ୍ଣ ଜିତିଛନ୍ତି ।
ପ୍ରମୋଦ ନିଜର ବିଶ୍ୱର ୧ ନମ୍ବର ଖେଳାଳି ମାନ୍ୟତାକୁ ବି ବଜାୟ ରଖିଛନ୍ତି । ଏଭଳି ସ୍ବର୍ଣ୍ଣିମ ବିଜୟ ପରେ ପ୍ରମୋଦଙ୍କ ଗାଁ ଏବେ ଉତ୍ସବ ମୁଖର ହୋଇପଡିଛି । ପରିବାର ମଧ୍ୟରେ ଖୁସିର ଲହରି ଖେଳିଯାଇଛି । ଆଜି ମଧ୍ୟ ଡବଲ୍ଟରେ ଚମତ୍କାର ପ୍ରଦର୍ଶନ କରି ଭାରତ ବ୍ରୋଞ୍ଜ ମେଡାଲ ହାତେଇବେ ବୋଲି ଆଶା କରାଯାଉଛି । ବର୍ତ୍ତମାନ ସୁଦ୍ଧା ୧୭ଟି ମେଡାଲ ହାତେଇଛି ଭାରତ।
ଅଧିକ ପଢନ୍ତୁ– ପାରା ଅଲମ୍ପିକ୍ସରେ ଓଡ଼ିଆ ପୁଅ ପ୍ରମୋଦଙ୍କ ଜଲୱା, ଜିତିଲେ ସ୍ୱର୍ଣ୍ଣ
ତେବେ ଅଲମ୍ପିକ୍ସରେ ମଧ୍ୟ କୌଣସି ଭାରତୀୟ ଏ ପର୍ଯ୍ୟନ୍ତ ବ୍ୟାଡ୍ ମିଣ୍ଟନରେ ସ୍ୱର୍ଣ୍ଣ ପଦକ ଜିତି ନାହାନ୍ତି। ପାରା ଅଲମ୍ପିକ୍ସରେ ଭାରତ ଭଲ ପ୍ରଦର୍ଶନ ସହ ଏବେ ସୁଦ୍ଧା ଭାରତ ୧୭ ପଦକ ଜିତିଛି।
ଯୋଡ଼ା: ପୁଅକୁ ହତ୍ୟା ଘଟଣାରେ ବାପା ଓ ସାବତ ମାଆକୁ ଆଜୀବନ ଜେଲ୍ ଦଣ୍ଡ । ଦଣ୍ଡାଦେଶ ଶୁଣାଇଲେ ଚମ୍ପୁଆ ଅତିରିକ୍ତ ଜିଲ୍ଲା ଦୌରା ଜଜ୍ ଦୋଳଗୋବିନ୍ଦ ବାରିକ । ଘଟଣାରେ ଅନ୍ୟ ଜଣେ ଅଭିଯୁକ୍ତ ସାବତଭାଇ ଗୌତମଙ୍କୁ ୧ ବର୍ଷ ଜେଲ୍ ଦଣ୍ଡାଦେଶ ଦେଇଛନ୍ତି କୋର୍ଟ । ୨୦୧୯ ସେପ୍ଟେମ୍ବର ୧ ତାରିଖରେ କେନ୍ଦୁଝର ବାମେବାରୀ ଥାନା ବଳଭଦ୍ରପୁର ଗାଁରେ ଟ୍ରାନ୍ସପୋର୍ଟ ବ୍ୟବସାୟ ଲାଭ ଟଙ୍କା ଭାଗବଣ୍ଟାକୁ ନେଇ ଏହି ହତ୍ୟାକାଣ୍ଡ ଘଟିଥିଲା ।
ନାରାୟଣ ମହାନ୍ତ ତାଙ୍କ ତୃତୀୟ ପତ୍ନୀଙ୍କ ପୁଅ ପିତାମ୍ବରଙ୍କୁ ଲାଭ ଟଙ୍କା ଦେବାକୁ ଚାହୁଁ ନଥିଲେ । ଏହାକୁ ନେଇ ପରିବାର ଭିତରେ ଲାଗିଥିଲା ଝଗଡ଼ା । ବାପା ନାରାୟଣ ମହାନ୍ତ, ତାଙ୍କର ପ୍ରଥମ ସ୍ତ୍ରୀ ମାଳତି ଓ ଦ୍ୱିତୀୟ ସ୍ତ୍ରୀଙ୍କ ପୁଅ ଗୌତମ ମିଶି ପିତାମ୍ବରଙ୍କୁ ନିସ୍ତୁକ ମାରିଥିଲେ । ପିତାମ୍ବର ତଳେ ପଡ଼ିଯିବା ପରେ ବାପା ନାରାୟଣ ପଥରରେ ତାଙ୍କ ମୁଣ୍ଡକୁ ଛେଚି ଜଘନ୍ୟ ଭାବେ ହତ୍ୟା କରିଥିଲେ । ପ୍ରମାଣ ଓ ସାକ୍ଷୀଙ୍କ ବୟାନକୁ ଭିତ୍ତିକରି ଆଜି ଉଭୟଙ୍କୁ ଆଜୀବନ ଜେଲ୍ ଦଣ୍ଡାଦେଶ ଶୁଣାଇଛନ୍ତି କୋର୍ଟ ।
ବାଲିଗୁଡ଼ା: ପାଇଖାନା ଘରୁ ଯୁବ ଇଞ୍ଜିନିୟରଙ୍କ ମୃତଦେହ ଉଦ୍ଧାର । ଏଭଳି ଘଟଣା ଦେଖିବାକୁ ମିଳିଛି କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ଲୁହୁର ସାହିରେ । ମୃତ୍ୟୁର କାରଣ ଜଣା ପଡ଼ିନଥିବା ବେଳେ ପୋଲିସ ମୃତଦେହ ଉଦ୍ଧାର କରିଛି । ମୃତକ ନୟାଗଡ଼ ଜିଲ୍ଲା ଦଶପଲ୍ଲାର ରବୀନ୍ଦ୍ରନାଥ ବେହେରାଙ୍କ ପୁଅ ରାକେଶ କୁମାର ବେହେରା । ସେ କିଛିଦିନ ହେଲା RKD ଠିକାସଂସ୍ଥାରେ କାମ କରୁଥିଲେ । ଦାରିଙ୍ଗବାଡ଼ି ଲୁହୁର ସାହିରେ ଘର ଭଡ଼ା ନେଇ ରହିଆସୁଥିଲେ ।
ଗତକାଲି କାମସାରି ସନ୍ଧ୍ୟା ସମୟରେ ଆସିବା ପରେ ଘରୁ ବାହାରକୁ ବାହାରି ନଥିଲେ । କୌଣସି କାରଣରୁ ଘର ମାଲିକ କଥା ହେବା ପାଇଁ ଯାଇଥିଲେ । ହେଲେ କବାଟ ଖୋଲି ନଥିଲେ କି କୌଣସି ଉତ୍ତର ଦେଇ ନଥିବାରୁ ଥାନାକୁ ଜଣାଇଥିଲେ ଘର ମାଲିକ । ପୋଲିସ କବାଟ ଭାଙ୍ଗି ଘର ଭିତରକୁ ପଶିବା ପରେ ଉଲଗ୍ନ ଅବସ୍ଥାରେ ପାଇଖାନାରୁ ରାକେଶଙ୍କ ମୃତଦେହ ଉଦ୍ଧାର କରିଛି । ମୃତଦେହ ବ୍ୟବଚ୍ଛେଦ ପରେ ମୃତ୍ୟୁର କାରଣ ଜଣାପଡିବ ବୋଲି କହିଛି ପୋଲିସ ।
ଭୁବନେଶ୍ୱର: ଓୟୋ ରୁମରେ ସେକ୍ସ ରାକେଟ ଠାବ । ଭରତପୁର ଥାନା ଅଞ୍ଚଳରେ ଥିବା ଏକ ଓୟୋ ଲଜରେ ଚାଲିଥିବା ସେକ୍ସ ରାକେଟର ପର୍ଦ୍ଦାଫାସ କରିଛି ପୋଲିସ । ଓୟୋ ରୁମରେ ଦେହ କାରବାର ଚାଲିଥିବା ନେଇ କୌଣସି ସୂତ୍ରରୁ ଖବର ପାଇ ପୋଲିସ ଚଢ଼ାଉ କରିଥିଲା ।
ଓୟୋ ରୁମରୁ ୮ ବଙ୍ଗୀୟ ଯୁବତୀଙ୍କୁ ଉଦ୍ଧାର କରାଯାଇଥିବା ବେଳେ ପୋଲିସ ୨ ଜଣଙ୍କୁ ଅଟକ ରଖିଛି । ଚଢ଼ାଉ ବେଳେ ଲଜ୍ ମାଲିକ ଫେରାର ହୋଇଯାଇଥିବା ବେଳେ ପୋଲିସ ତଦନ୍ତ ଜାରି ରଖିଛି । ଲଜରୁ ମଦ ବୋତଲ ସହ ବହୁ ଆପତ୍ତିଜନକ ସାମଗ୍ରୀ ଜବତ କରାଯାଇଛି । କଳିଙ୍ଗ ନଗର କେ୧ରେ ଥିବା ଏକ ଓୟୋ ହୋଟେଲରେ ସେକ୍ସ ରାକେଟ ଚାଲିଥିଲା ।
ଭୁବନେଶ୍ୱର: ମୁଖ୍ୟ ଶାସନ ସଚିବ ସୁରେଶଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଆଜି ରାଜ୍ୟସ୍ତରୀୟ ସିଙ୍ଗଲ୍ ୱିଣ୍ଡୋ କ୍ଲିୟରାନ୍ସ ଅଥରିଟି ବୈଠକ ବସିଥିଲା। ଏଥିରେ ୨୧୭୧.୮୨ କୋଟି ଟଙ୍କାର ପ୍ରସ୍ତାବିତ ପ୍ରକଳ୍ପକୁ ଅନୁମୋଦନ ମିଳିଛି । ଏସବୁ ପ୍ରକଳ୍ପରେ ୫ ହଜାର ୨୪୨ ଜଣଙ୍କୁ ରାଜ୍ୟ ଭିତରେ ନିଯୁକ୍ତି ମିଳିବ । ଏହିସବୁ ପ୍ରକଳ୍ପ ଦ୍ୱାରା ରାଜ୍ୟରେ ପରୋକ୍ଷ ନିଯୁକ୍ତି ମଧ୍ୟ ସୃଷ୍ଟି ହେବ । ଯାହାକି ରାଜ୍ୟର ଆର୍ଥିକ ସ୍ଥିତିକୁ ଆହୁରି ମଜଭୁତ କରିବ ।
ପ୍ରକଳ୍ପ ଅନୁମୋଦନ ସହ ଜମି ଓ ଜଳର ଆବଶ୍ୟକତାକୁ ଅନୁଧ୍ୟାନ ପାଇଁ ମୁଖ୍ୟ ଶାସନ ସଚିବ ଇଡକୋକୁ ନିର୍ଦ୍ଦେଶ ଦେଇଛନ୍ତି । ଅନୁମୋଦିତ ପ୍ରକଳ୍ପ ଭିତରେ ସିମେଣ୍ଟ ଗ୍ରାଇଣ୍ଡିଂ, ଏଥାନଲ, ଖାଦ୍ୟ ପ୍ରକ୍ରିୟାକରଣ, ପର୍ଯ୍ୟଟନ, କୋଇଲା, ସୌରଶକ୍ତି ରହିଛି ।
ଯାଜପୁର ଜିଲ୍ଲାରେ ମାଇଁ ହୋମ୍ ଇଣ୍ଡଷ୍ଟ୍ରିଜ୍ ପ୍ରାଇଭେଟ୍ ଲିମିଟେଡ୍ ସିମେଣ୍ଟ ଗ୍ରାଇଣ୍ଡିଂ ୟୁନିଟ୍ ପ୍ରତିଷ୍ଠା କରିବ । ଏଥିରେ ୬୫୦ କୋଟି ଟଙ୍କା ବିନିଯୋଗ ହେବାକୁ ଥିବା ବେଳେ ୭୫୦ ଜଣଙ୍କୁ ନିଯୁକ୍ତି ମିଳିବ । ଝାରସୁଗୁଡ଼ାରେ ଏଲ.ଏନ ମେଟାଲିକ୍ସ ଲିମିଟେଡ୍ ୨୦୫ କୋଟି ବିନିଯୋଗ କରିବ, ଏଥିରେ ୫୭୧ ଜଣ ନିଯୁକ୍ତି ପାଇବେ । ଜଗତସିହଂପୁରର ଉଦୟବଟରେ ଆର୍ସେଲର ମିତ୍ତଲ ନିପ୍ପନ ଷ୍ଟିଲ୍ ରିଭେରାଇନ୍ ଜେଟ୍ଟି ପ୍ରତିଷ୍ଠା କରିବ । ଏଥିରେ ୧୫୦ କୋଟି ବିନିଯୋଗ ହେବାକୁ ଥିବାବେଳେ ୨୮୦ ଜଣ କାମ ପାଇବେ ।
ସୋନପୁରରେ ମାସ୍ ବାୟୋ ଫୁଏଲ୍ସ ୨୫୮.୦୫ କୋଟି ବିନିଯୋଗରେ ଏଥାନଲ ଉତ୍ପାଦନ ୟୁନିଟ୍ ପ୍ରତିଷ୍ଠା କରିବ । ଯେଉଁଥିରେ ୩୦୦ ଜଣ ନିଯୁକ୍ତି ପାଇବେ । ସେହିଭଳି ଭାଇବ୍ରାଣ୍ଟ ସ୍ପିରିଟ୍ ବରଗଡ଼ରେ ୧୦୦ କୋଟି ବିନିଯୋଗ କରି ଏଥାନଲ ୟୁନିଟ୍ କରିବ । ଏଥିରେ ୨୨୫୦ ଜଣଙ୍କୁ ନିଯୁକ୍ତି ମିଳିବ । ଯାଜପୁର କଳିଙ୍ଗନଗରରେ ଭିସିଆଇ କେମିକାଲ୍ କୋଇଲା ପ୍ଲାଣ୍ଟ କରିବ । ଏଥିରେ ୨୧୦ କୋଟି ବିନିଯୋଗ ହେବାକୁ ଥିବା ବେଳେ ୧୫୭ ଜଣ ନିଯୁକ୍ତି ପାଇବେ । ରାମକୋ ସିମେଣ୍ଟ ହରିଦାସପୁର ୟୁନିଟର ସମ୍ପ୍ରସାରଣ ପାଇଁ ୧୯୦ କୋଟି ନିବେଶ କରିବ । ଏହାଦ୍ୱାରା ୬୦ ଜଣଙ୍କୁ ନିଯୁକ୍ତି ମିଳିବ ।
ଖୋର୍ଦ୍ଧାରେ ଏକ ପଞ୍ଚ ତାରକା ହୋଟେଲ ପ୍ରତିଷ୍ଠା କରିବ ଲକଜୁରି ଆସେଟ୍ସ ପ୍ରା.ଲି । ଏଥିରେ ୧୮୧.୬୦ କୋଟି ଟଙ୍କା ନିବେଶକ ହେବାକୁ ଥିବାବେଳେ ୨୨୪ ଜଣ କାମ ପାଇବେ । ସେହିଭଳି ଖୋର୍ଦ୍ଧାରେ ଲାଲଚାନ୍ଦ ରିସୋର୍ଟ ହୋଟେଲ ଶିଳ୍ପ ପାଇଁ ୧୧୯.୬୭ କୋଟି ନିବେଶ କରିବେ । ଏଥିରେ ୩୫୦ ଜଣ ନିଯୁକ୍ତି ପାଇବେ । ଶୈଳବାଳା ଇନଫ୍ରାଷ୍ଟକ୍ଚର ପ୍ରା.ଲି ଖୋର୍ଦ୍ଧାରେ ୪ ତାରକା ବିଶିଷ୍ଟ ହୋଟେଲ୍ ପାଇଁ ୧୦୭.୫୦ କୋଟି ନିବେଶ କରିବେ । ଯେଉଁଥିରେ ୩୦୦ ଜଣ ନିଯୁକ୍ତି ପାଇବେ ।
ପାରଳାଖେମୁଣ୍ଡି: ଏସିଏଫ ସୌମ୍ୟରଞ୍ଜନଙ୍କ ମୃତ୍ୟୁ ଘଟଣାର ନୂଆ ଟ୍ୱିଷ୍ଟ । ୫୦ ଦିନ ପରେ ଡିଏଫଓ କାର୍ଯ୍ୟାଳୟର ପୂର୍ବତନ ରାତ୍ରୀ ଜଗୁଆଳିଙ୍କ ଚାଞ୍ଚଲ୍ୟକର ବୟାନ ସାମ୍ନାକୁ ଆସିଛି । ରାତ୍ରୀ ଜଗୁଆଳି ଗଙ୍ଗା ପ୍ରଧାନ ଡିଏଫଓ କାର୍ଯ୍ୟାଳୟରେ ଗତ ଡିସେମ୍ବର ମାସ ପର୍ଯ୍ୟନ୍ତ କାର୍ଯ୍ୟ କରିଆସୁଥିଲେ । ରାତ୍ରୀ ଜଗୁଆଳି ଡ୍ୟୁଟି କରୁଥିବା ସମୟରେ ଦିନେ ଡିଏଫଓ ସଂଗ୍ରାମକେଶରୀ ଏସିଏଫ ସୌମ୍ୟରଞ୍ଜନଙ୍କ ସରକାରୀ ବାସଭବନକୁ ରାତି ପ୍ରାୟ ସାଢ଼େ ବାରଟା ବେଳେ ଯାଉଥିବା ନିଜେ ଦେଖିଥିବା ଗଣମାଧ୍ୟମ ଆଗରେ କହିଛନ୍ତି । ତେବେ କେଉଁ ପରିସ୍ଥିତିରେ ଏପରି ଏକ ତଥ୍ୟ, ସେ ପ୍ରକାଶ କରିଛନ୍ତି ତାହା ପରବର୍ତ୍ତୀ ସମୟରେ ସ୍ପଷ୍ଟ ହେବ ।
କିନ୍ତୁ ବର୍ତ୍ତମାନ ଏହି ତଥ୍ୟ ସାମ୍ନାକୁ ଆସିବା ପରେ ନିଶ୍ଚିତ ରୂପେ ତଦନ୍ତକୁ ନୂଆ ମୋଡ଼ ଦେଇଛି । କ୍ରାଇମବ୍ରାଞ୍ଚ ମଧ୍ୟ ଅଧିକ ତଥ୍ୟ ପାଇଁ ତଦନ୍ତ ପରିସରଭୁକ୍ତ କରି ଆଗାମୀ ଦିନରେ ଗଙ୍ଗାଙ୍କ ବୟାନ ରେକର୍ଡ କରିପାରେ । ସେପଟେ ସୌମ୍ୟଙ୍କ ମୃତ୍ୟୁର ଏତେ ଦିନ ପରେ ଏଭଳି ବୟାନ ଅନେକ ପ୍ରଶ୍ନ ସୃଷ୍ଟି କରିଛି । ଗଙ୍ଗା ପ୍ରଧାନ ଓ ଅନ୍ୟ ୩ଜଣଙ୍କୁ ଚାକିରିରୁ ବହିଷ୍କାର କରିଥିଲେ ଡିଏଫଓ ସଂଗ୍ରାମକେଶରୀ । ଗଙ୍ଗା ପ୍ରଧାନଙ୍କ ବୟାନ ଯଦି ସତ୍ୟ ତାହେଲେ ସାଂଘାତିକ ନିଶ୍ଚୟ । ଯଦି ରାଗ ସୁଝାଇବାକୁ ଏଭଳି ବିବୃତ୍ତି ଦେଇଥାନ୍ତି, ତାହେଲେ ତଦନ୍ତକୁ ଗୋଳମାଳିଆ କରିବ ।
ଲକ୍ଷ୍ନୌ: ଅଜଣ ଜର ସହ ଯୁଝୁଛି ଉତ୍ତରପ୍ରଦେଶ । ମଥୁରାରୁ ନେଇ ଆଗ୍ରା, ପୂରା ପଶ୍ଚିମ ଉତ୍ତରପ୍ରଦେଶ ଅଜଣା ଜରରେ ଥରୁଛି । ଅଚାନକ ପ୍ଲେଟଲେଟ ହ୍ରାସ୍ ପାଇ ଜୀବନ ହାରୁଛନ୍ତି ଶିଶୁଙ୍କ ସହ ବୟସ୍କ । ମଥୁରାର ଏକାଧିକ ଗାଁରେ ଅଜଣା ଜରରେ ସଂଖ୍ୟାଧିକ ଲୋକ ପୀଡ଼ିତ ହୋଇଥିବା ବେଳେ ୧୩ ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ୧୦ ଜଣ ଛୁଆ ରହିଛନ୍ତି । ଛୁଆଙ୍କ ମୃତ୍ୟୁ ପରେ ଲୋକଙ୍କ ମନରେ ଭୟ ସଞ୍ଚାର ହେବା ସହ ଗ୍ରାମବାସୀ ଗାଁ ଛାଡ଼ିବାରେ ଲାଗିଛନ୍ତି ।
उत्तर प्रदेश में दम तोड़ चुकी स्वास्थ्य सेवाओं के बीच बुखार का कहर जारी है और सरकार प्रचार अभियान में व्यस्त है।
मथुरा में बीमार बच्चे का पिता अधिकारी के पैरों में गिर कर उपचार की गुहार मांगने को मजबूर हैं।
इस विचलित कर देने वाले मंजर को जनता कभी नहीं करेगी माफ। pic.twitter.com/WeUQcaRsWI
— Samajwadi Party (@samajwadiparty) September 4, 2021
ମଥୁରାର ଫରହ ବ୍ଲକ କୋହ ଗାଁର ଅଧିକାଂଶ ପରିବାର ଛୁଆଙ୍କୁ ନେଇ ଗାଁରୁ ଅନ୍ୟତ୍ର ପଳାଇଛନ୍ତି । ଡାକ୍ତରୀ ଦଳ ନିୟମିତ ଗାଁକୁ ଯାଇ ଚିକିତ୍ସା କରୁଛନ୍ତି । ଏହାରି ଭିତରେ କୋହରୁ ଆସିଛି ଏକ ଚିତ୍ର । ଯାହା ସମସ୍ତଙ୍କୁ ଭାବୁକ କରି ଦେଇଛି । ଭାଇରାଲ୍ ହେଉଥିବା ଏହି ଭିଡିଓରେ ଜଣେ ବୃଦ୍ଧ ମୁଖ୍ୟ ଚିକିତ୍ସାଧିକାରୀଙ୍କ ପାଦ ଧରି ଛୁଆକୁ ବଞ୍ଚାଇବା ଲାଗି ଗୁହାରି କରୁଛନ୍ତି ।
କାବୁଲ: ଖୁସିରେ ଗୁଳି ଫୁଟାଇଲେ, ୧୭ଜଣଙ୍କୁ ମାରିଦେଲେ । ପଞ୍ଜଶୀର ବିଜୟ ନେଇ ଏକ ଅନିଶ୍ଚିତ ଖବରରେ ବିଭୋର ହୋଇ ଫାଙ୍କା ଗୁଳିଚାଳନା କଲେ ତାଲିବାନୀ ଆତଙ୍କୀ । ଏହା ଦ୍ୱାର ପ୍ରାୟ ୧୭ ଜଣଙ୍କ ମୃତ୍ୟୁ ହୋଇଥିବା ବେଳେ ୪୦ଜଣ ଆହତ ହୋଇଥିବା ସୂଚନା ମିଳିଛି । ଆହତଙ୍କୁ କାବୁଲ ଚିକିତ୍ସାଳୟରେ ଭର୍ତ୍ତି କରାଯାଇଛି ।
‘ନ୍ୟାସ୍ନାଲ୍ ରେଜିଷ୍ଟାନ୍ସ୍ ଫ୍ରଣ୍ଟ୍ ଅଫ୍ ଆଫଗାନିସ୍ତାନ୍’କୁ ପରାସ୍ତ କରି ପଞ୍ଜଶୀର ଉପତ୍ୟକାକୁ ନିୟନ୍ତ୍ରଣାଧୀନ କରି ପାରିଛନ୍ତି ବୋଲି ତାଲିବାନ୍ ଘୋଷଣା କରିବା ପରେ ଶୁକ୍ରବାରେ ସମଗ୍ର କାବୁଲ୍ରେ ଉତ୍ସବ ପାଳନକାଳୀନ ଭୀଷଣ ବନ୍ଧୁକ ଫୁଟିବା ଶଦ୍ଦ ଶୁଭିଥିଲା।
ଗତକାଲିର ଦୃଶ୍ୟ ଅତ୍ୟନ୍ତ ହୃଦୟ ବିଦାରକ ଥିଲା। ତାଲିବାନ ଆଫଗାନିସ୍ତାନକୁ ନର୍କ ବନାଇ ଦେଇଥିବା ବେଳେ ଆହତ ଆତ୍ମୀୟସଜ୍ଜନଙ୍କୁ ଧରି ଲୋକେ ଡାକ୍ତରଖାନା ନେଉଥିବା ଦୃଶ୍ୟ ସାମାଜିକ ଗଣମାଧ୍ୟମରେ ସେୟାର୍ ହୋଇଥିବା ଫଟୋ ଏବଂ ଭିଡିଓରେ ଦେଖାଯାଇଥିଲା। ସର୍ବଶକ୍ତିମାନ ଆଲ୍ଲାଙ୍କ କୃପାରୁ ଆମେ ସମଗ୍ର ଆଫଗାନିସ୍ତାକୁ ନିୟନ୍ତ୍ରଣାଧୀନ କରିଛୁ । ବିଶୃଙ୍ଖଳା ସୃଷ୍ଟିକାରୀମାନେ ପରାସ୍ତ ହୋଇଛନ୍ତି ଏବଂ ଏଥର ପଞ୍ଜଶୀର ଆମ ଅଧୀନକୁ ଆସିଛି ବୋଲି ଜଣେ ତାଲିବାନ୍ କମାଣ୍ଡର୍ କହୁଥିଲେ । ତେବେ ଗତ କିଛି ଦିନ ସଂଘର୍ଷ ମଧ୍ୟରେ ଉଭୟ ପକ୍ଷରୁ ପ୍ରାୟ ୩୦୦ ଜଣ ପ୍ରାଣ ହରାଇଥିବା ସୂଚନା ମିଳିଛି ।
କାବୁଲ: ପଞ୍ଜଶୀର ପାଇଁ ଛକାପଞ୍ଝା । ପଞ୍ଜଶୀରକୁ ତାଲିବାନ ଦଖଲ କରିଛି ବୋଲି ଦାବି କରୁଥିବାବେଳେ ସେପଟେ ପୂର୍ବତନ ଉପରାଷ୍ଟ୍ରପତି ଅମରୁଲ୍ଲା ସାଲେହ ଏହାକୁ ଖଣ୍ଡନ କରିଛନ୍ତି । କିଛିଦିନର ଲଢେଇ ପରେ ବିଦ୍ରୋହୀଙ୍କ ପରାଜୟ ହୋଇଛି ବୋଲି ତାଲିବାନ ଘୋଷଣା କରିଛି । ତେବେ ପଞ୍ଜଶୀରର ପତନ ହୋଇନାହିଁ ବୋଲି ଦାବି କରିଛନ୍ତି ବିଦ୍ରୋହୀ ଗୋଷ୍ଠୀ ନେତା ତଥା ପୂର୍ବତନ ଉପରାଷ୍ଟ୍ରପତି ଅମରୁଲ୍ଲା ସାଲେହ । ଏହାସହ ସେ ଦେଶ ଛାଡ଼ି ଚାଲିଯାଇଥିବା ଖବରକୁ ଖଣ୍ଡନ କରିଛନ୍ତି । ନିଜକୁ ଆଫଗାନିସ୍ତାନର ରାଷ୍ଟ୍ରପତି ବୋଲି ଦାବି କରୁଥିବା ଅମରୁଲ୍ଲା କହିଛନ୍ତି, ସେ ପଞ୍ଜଶୀରରେ ହିଁ ଅଛନ୍ତି । ଏବଂ ଅନ୍ୟ ଦେଶକୁ ଚାଲିଯିବା ଖବର ଗୁଜବ । ତାଲିବାନ ବିରୋଧରେ ଯୁଦ୍ଧ ଜାରି ରହିବ ଏବଂ ସେ ସ୍ୱାଭିମାନର ସହ ନିଜ ଜନ୍ମମାଟି ଲାଗି ଲଢେଇ ଜାରି ରଖିବେ ।
ଅମରୁଲ୍ଲାଙ୍କ ପୁଅ ଏବଦୁଲ୍ଲା ସାଲେହ ମଧ୍ୟ କହିଛନ୍ତି ପଞ୍ଜଶିର ତାଲିବାନ ହାତକୁ ଯାଇନାହିଁ । ଅମାନୁଲ୍ଲାଙ୍କ ସହଯୋଗୀ ଅହମ୍ମଦ ମାସୁଦ କହିଛନ୍ତି, ପଞ୍ଜଶୀର ଏବେ ବି ତାଙ୍କ କବଜାରେ ରହିଛି । ଏହା ତାଲିବାନ ହାତକୁ ଯାଇନାହିଁ । ସାରା ଆଫଗାନିସ୍ତାନକୁ ତାଲିବାନ କବଜା କରିଥିବା ବେଳେ କେବଳ ପଞ୍ଜଶିର ସେମାନଙ୍କ ହାତକୁ ଯାଇ ନଥିଲା ।
ଏବେ ବି ଅହମ୍ମଦ ମାସୁଦ ଓ ଅମରୁଲ୍ଲାଙ୍କ ନେତୃତ୍ୱରେ ହଜାର ହଜାର ବିଦ୍ରୋହୀ ତାଲିବାନର ପ୍ରତିରୋଧ କରୁଥିବା କୁହାଯାଉଛି । ସେପଟେ ମହିଳା ବିଚାରପତିଙ୍କ ବିରୋଧରେ ପଦକ୍ଷେପ ନେଇଛି ତାଲିବାନ । ଯେଉଁ ମହିଳା ବିଚାରପତିମାନେ ତାଲିବାନ କର୍ମୀଙ୍କୁ ବିଭିନ୍ନ ଦଣ୍ଡ ଶୁଣାଇଥିଲେ ସେମାନଙ୍କୁ ଖୋଜିବା ଆରମ୍ଭ କରିଛନ୍ତି । ଦେଶର ୨୫୦ରୁ ଅଧିକ ମହିଳା ବିଚାରପତିଙ୍କ ଜୀବନ ଏବେ ବିପନ୍ନ । କିଛି ବିଚାରପତି ଦେଶ ଛାଡି ଚାଲିଗଲେଣି । ଏନେଇ ସେମାନେ ବିଶ୍ୱ ସମୁଦାୟର ଦୃଷ୍ଟି ଆକର୍ଷଣ କରିଛନ୍ତି ।
