ଭୁବନେଶ୍ୱର: ସହରାଞ୍ଚଳ ରାସ୍ତାଘାଟ ଓ ନର୍ଦ୍ଦମା ମରାମତି ତଥା ଉନ୍ନତିକରଣ ପାଇଁ ୫୦୦ କୋଟି ଟଙ୍କା ମଞ୍ଜୁର କଲେ ମୁଖ୍ୟମନ୍ତ୍ରୀ। ବର୍ଷା ଯୋଗୁ ସାରା ରାଜ୍ୟରେ ବିଭିନ୍ନ ସହରାଞ୍ଚଳର କ୍ଷତିଗ୍ରସ୍ତ ହୋଇଛି। ରାସ୍ତାଘାଟ ଠାରୁ ଆରମ୍ଭ କରି ନାଳନର୍ଦମା ସବୁ କିଛି କ୍ଷତିଗ୍ରସ୍ତ ହୋଇଛି। କେଉଁଠି ରାସ୍ତାରୁ ସିମେଣ୍ଟ ପିଚୁ ଉଠି ଯାଇଛି ତ ପୁଣି କେଉଁଠି ନଳା ଭାଙ୍ଗିଯାଇଛି। ଏହି ସବୁର ମରାମତି ପାଇଁ ରାଜ୍ୟ ସରକାର ୫ ଶହ କୋଟି ଟଙ୍କାର ଅର୍ଥ ମଞ୍ଜୁର ହୋଇଛି। ତେବେ କ୍ଷତିଗ୍ରସ୍ତ ରାସ୍ତାଘାଟ, ନର୍ଦ୍ଦମା ଓ ଫୁଟପାଥ ଆଦିର ମରାମତି ତଥା ଉନ୍ନତି କରଣ ହେବ। ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୫୦୦ କୋଟି ଟଙ୍କା ମଞ୍ଜୁର କରିଛନ୍ତି। ଏହି କାର୍ଯ୍ୟ ତୁରନ୍ତ ଆରମ୍ଭ କରିବା ସହିତ ଆଗାମୀ ମୌସୁମୀ ଋତୁ ପୂର୍ବରୁ ଶେଷ କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।

ଭୁବନେଶ୍ୱର: ଲିଜ ଦଲିଲ ପାଇଲେ ହିତାଧିକାରୀ। ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ ଏବଂ ରାଜ୍ୟ ଗୃହ ନିର୍ମାଣ ସଂସ୍ଥା ଦ୍ଵାରା ବିଭିନ୍ନ ସମୟରେ ଆବଣ୍ଟିତ ଘର ଓ ଜମିର ଆଜି ଲିଜ୍ ଦଲିଲ ହସ୍ତାନ୍ତରର ଶୁଭାରମ୍ଭ କରାଯାଇଛି। ରାଜଧାନୀର ଆଚାର୍ଯ୍ୟବିହାର, ଉଦୟଗିରି ବିହାର, କଳିଙ୍ଗ ନଗର ଓ ଅନନ୍ତ ବିହାର ପୋଖରୀପୁଟ, ଚନ୍ଦ୍ରଶେଖରପୁର, ପଟିଆ, କପିଳପ୍ରସାଦ, ଆଇଗିଣିଆ, ଜୟଦେବ ବିହାର ଏବଂ ଡୁମୁଡୁମାରେ ଦୀର୍ଘ ୨୦ ବର୍ଷ ହେଲା ସାଧାରଣ ପ୍ରଶାସନ ଜମି ଉପରେ ଘର କରି ସୁଲଭ ମୂଲ୍ୟରେ ଯୋଗାଇ ଦେଇଥିଲା। ଏହାକୁ ବିଡିଏ ଓ ହାଉସିଂ ବୋର୍ଡ ନିର୍ମାଣ କରିଥିଲେ।

ମାତ୍ର ଲିଜ ଡିଡ୍‌ କରିବା ପାଇଁ ଅଧିକ ଅର୍ଥ ବ୍ୟୟ କରିବାକୁ ପଡୁଥିବାରୁ ଲିଜ ଡିଡ କାମ ପଡିରହିଥିଲା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସମସ୍ତ ଜାଗା ଉପରେ ଜରିମାନା, ସୁଧ ଇତ୍ୟାଦି ବାବଦକୁ ସମୁଦାୟ ୨୯ କୋଟି ୧୫ ଲକ୍ଷରୁ ଉର୍ଦ୍ଧ୍ୱ ଟଙ୍କା ଛାଡ କରିବା ପରେ ଲିଜ ଡିଡ୍‌ କାମ ଶେଷ ହୋଇଥିଲା। ଏଥିଯୋଗୁଁ ହାଉସିଂ ବୋର୍ଡର ୧୯୨୫ ଏବଂ ବିଡିଏର ୮୭୮ ଏପରି ଭାବେ ୨୮୦୩ ହିତାଧିକାରୀ ଉପକୃତ ହେବେ। ଦ୍ଵିତୀୟ ପର୍ଯ୍ୟାୟରେ ୧୪ ହଜାର ୪୬୦ଟି ସୁଲଭ ବାସଗୃହ ଆର୍ଥିକ ଅନଗ୍ରସର ବ୍ୟକ୍ତିଙ୍କୁ ଯୋଗାଇ ଦେବାକୁ ଯୋଜନା ଅତିଶୀଘ୍ର ଆରମ୍ଭ କରାଯିବ। ଆଜି BDA ୭୮ ଜଣଙ୍କୁ ଏବଂ ହାଉସିଂ ବୋର୍ଡ ୪୩ ଜଣ ହିତାଧିକାରୀଙ୍କର ଦଲିଲ ସମ୍ପାଦନ କାର୍ଯ୍ୟକ୍ରମ ଆରମ୍ଭ କରାଯାଇଛି। ଆଗକୁ ଖୁବ୍ ଶୀଘ୍ର ସମସ୍ତ ହିତାଧିକାରୀଙ୍କୁ ଲିଜ୍ ଦଲିଲଗୁଡ଼ିକ ପର୍ଯ୍ୟାୟକ୍ରମେ ସମ୍ପାଦନ କରାଯିବ।

ବୌଦ୍ଧ: ଗିରଫ ହେଲେ ବୌଦ୍ଧ ଅତିରିକ୍ତ ଆଞ୍ଚଳିକ ପରିବହନ ଅଧିକାରୀ ସାଲଖୁ ମୁର୍ମୁ। ସୂଚନା ଅନୁସାରେ, ଗତ ୧୬ ତାରିଖରେ ପରିବହନ ଆଇଡି ପାସୱାର୍ଡର ଅପବ୍ୟବହାର କରି ବଡ଼ବିଲର ୧୧୭ଟି ଗାଡିକୁ ବୌଦ୍ଧରେ ଥିବା ଦର୍ଶାଇ ଫିଟନେସ ସାର୍ଟିଫିକେଟ ପ୍ରଦାନ କରିଥିଲେ ସହକାରୀ ପ୍ରୋଗ୍ରାମର ରଞ୍ଜନ କୁମାର ଦାସ। ଘଟଣା ସମ୍ପର୍କରେ ଖବର ପାଇ ପରିବହନ କମିଶନର ଅରୁଣ ବୋଥ୍ରା ଥାନାରେ ଏତଲା ଦେବାକୁ ନିର୍ଦେଶ ଦେଇଥିଲେ।

ନିର୍ଦେଶ ଅନୁଯାୟୀ ଅତିରିକ୍ତ ଆଞ୍ଚଳିକ ପରିବହନ ଅଧିକାରୀ ସାଲଖୁ ମୁର୍ମୁ ବୌଦ୍ଧ ଅଦର୍ଶ ଥାନାରେ ରଞ୍ଜନ କୁମାର ଦାସଙ୍କ ନାମରେ ଥାନାରେ ଏତଲା ଦେଇଥିଲେ । ପୋଲିସ ସହକାରୀ ପ୍ରୋଗ୍ରାମରଙ୍କୁ ଥାନାରେ ଅଟକ ରଖି ପଚରାଉଚରା କରୁଥିଲା । ତଦନ୍ତ ପରେ ଅତିରିକ୍ତ ଆଞ୍ଚଳିକ ପରିବହନ ଅଧିକାରୀ ସାଲଖୁ ମୁର୍ମୁଙ୍କୁ ଉଠାଇନେଇଛି ବୌଦ୍ଧ ପୋଲିସ । ଆଜି ଉଭୟଙ୍କୁ କୋର୍ଟ ଚାଲାଣ କରାଯିବ ।

ପାଇକମାଲ: ପାଇକମାଲ ବଜାରରେ ଖୁଲମ ଖୁଲା ବୁଲିଲା ଖଣ୍ଡା। ପୂର୍ବତନ ପୋଲିସ କର୍ମଚାରୀଙ୍କୁ ଗୋଡେଇ ଗୋଡେଇ ଖଣ୍ଡାରେ ଆକ୍ରମଣ ହୋଇଥିବା ଅଭିଯୋଗ। ପଦ୍ମପୁର ଉପଖଣ୍ଡ ପାଇକମାଲ ଥାନାର ପୂର୍ବତନ କର୍ମଚାରୀ ଗୋପାଳ ସାଙ୍କୁ ଆଜି ସକାଳେ ଆକ୍ରମଣ ହୋଇଛି। ପାଇକମାଲ ବଜାର ଠାରେ ଜଣେ ଅଜଣା ବ୍ୟକ୍ତି ଅତର୍କିତ ଭାବରେ ଏକ ଖଣ୍ଡାରେ ଆକ୍ରମଣ କରିଥିଲା। ଆକ୍ରମଣ ଫଳରେ ଗୋପାଳଙ୍କ ବାମ ହାତ ଓ ଡାହାଣ ଗୋଡ଼ ଏବଂ ପିଠିରେ ଗଭୀର କ୍ଷତ ଲାଗିଛି। ଚିକିତ୍ସା ପାଇଁ ତାଙ୍କୁ ପ୍ରଥମେ ପଦ୍ମପୁର ଡାକ୍ତରଖାନା ଓ ପରେ ବରଗଡ଼ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିବା ସୂଚନା।

ଦିନ ଦ୍ୱିପ୍ରହରରେ ପାଇକମାଲ ଅଞ୍ଚଳରେ ଖଣ୍ଡା ବୁଲିବା ଏବଂ ଜଣେ ପୂର୍ବତନ ପୋଲିସ କର୍ମଚାରୀଙ୍କୁ ଆକ୍ରମଣ ହେବା ସାଧାରଣରେ ପ୍ରଶ୍ନ ଉଠାଉଛି। ଏଥିରୁ ଜଣାପଡୁଛିଯେ ପାଇକମାଲ ଅଞ୍ଚଳରେ କିପରି ଭାବରେ ଗୁଣ୍ଡାରାଜ ବଢି ଚାଲିଛି। ଦେଖିବାକୁ ଗଲେ ଜଣେ ପୂର୍ବତନ ପୋଲିସ କର୍ମଚାରୀଙ୍କୁ ଗୋଡାଇ ଗୋଡାଇ ହାଣିବା ପୋଲିସ ପ୍ରତି ଲୋକଙ୍କ ଭୟ କମି ଯାଉଥିବା ସୂଚନା ଦେଉଛି।