ନନ୍ଦିଘୋଷ ବ୍ୟୁରୋ : ପ୍ରାଥମିକ ଶିକ୍ଷକ କଣ ସରକାରଙ୍କ ସାବତ ପୁଅ ? ଏ ପ୍ରଶ୍ନ ଏବେ ଶିକ୍ଷକ ସମାଜକୁ ଆନ୍ଦୋଳିତ କରିଛି । କାରଣ ଗତକାଲି ମୁଖ୍ୟମନ୍ତ୍ରୀଙ୍କ ଘୋଷଣାରୁ ବାଦ ପଡ଼ିଛନ୍ତି ପ୍ରାଥମିକ ଶିକ୍ଷକ । ଦେଢ଼ ଲକ୍ଷ ପ୍ରାଥମିକ ଶିକ୍ଷକ ରାଜରାସ୍ତାରେ ଆନ୍ଦୋଳନ କରିବାରୁ ସରକାର ଏକ କମିଟି କରିଥିଲେ । ସବୁ ଘୋଷଣା ହେଲା । ହେଲେ ପ୍ରାଥମିକ ଶିକ୍ଷକମାନଙ୍କ ପାଇଁ ସରକାର ହାତ ଟେକି ଦେଇଥିବା ଅଭିଯୋଗ ହୋଇଛି । ପ୍ରାଥମିକ ଶିକ୍ଷମାନଙ୍କ ଦୁଇଟି ଦାବି ଥିଲା । କେନ୍ଦ୍ରୀୟ ହାରରେ ଦରମା ବା ମୂଳ ଗ୍ରେଡ ପେ ୪୨୦୦ ଟଙ୍କା । ଚୁକ୍ତି ସମୟରେ ଖଟିଥିବା ୬ ବର୍ଷର ଚାକିରି କାଳର ଗଣନା ଓ ୬ଟି ନୋସନାଲ ଇନକ୍ରିମେଣ୍ଟ । ହେଲେ ଗତକାଲି ଏ ସବୁ ହୋଇ ନଥିବାରୁ ପ୍ରାଥମିକ ଶିକ୍ଷକ ସଂଘ ବିରୋଧ କରିଛନ୍ତି । ଆଗକୁ ବିଧାନସଭା ବି ଘେରାଉ କରିବାକୁ ପ୍ରାଥମିକ ଶିକ୍ଷକ ସଂଘ ପ୍ରସ୍ତୁତ ହେଉଛି । ଅନ୍ୟପଟେ ଓଡ଼ିଶା କନିଷ୍ଠ ଶିକ୍ଷକ ସଂଘର ଅନେକ ଦାବି ପୂରଣ ହୋଇଥିବାରୁ ସେମାନେ ସରକାରଙ୍କୁ ସାଧୁବାଦ ଜଣାଇଛନ୍ତି ।
ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀଙ୍କ ସଫେଇ, ପ୍ରାଥମିକ ଶିକ୍ଷକଙ୍କ ପଦୋନ୍ନତି ପାଇଁ ବାଟ ଫିଟିଛି । ଆଗକୁ ଅନ୍ୟ ଦାବି ଉପରେ ବି ତର୍ଜମା ହେବ । ବିଜେପି ସରକାର ଶିକ୍ଷକମାନଙ୍କୁ ସ୍ଥାୟୀ ନିଯୁକ୍ତି ବି ଦେଉଥିବା ନେଇ ଗଣଶିକ୍ଷା ମନ୍ତ୍ରୀ ମତ ଦେଇଛନ୍ତି । ଶିକ୍ଷା ସହାୟକ ବି ପାଇବେ ସ୍ଥାୟୀ ନିଯୁକ୍ତି । ସମୟ ଲାଗିବ, ହେଲେ ସମାଧାନ ହେବ । ସେପଟେ ସରକାରଙ୍କ ମତକୁ ନେଇ ପ୍ରାଥମିକ ଶିକ୍ଷକ ସଂଘ ନିନ୍ଦା କରିଛି । କାରଣ ପ୍ରାଥମିକ ଶିକ୍ଷକଙ୍କ ଯୋଗ୍ୟତା ବଢ଼ି ଯାଇଛି । ସେମାନେ ଏବେ ଯୁକ୍ତ ଦୁଇରେ ବି ପଢ଼ାଉଛନ୍ତି । ହେଲେ ପୂର୍ଣ୍ଣ ଦରମା ମିଳୁନି । ସେହିପରି ୬ ବର୍ଷ ଚାକିରି କରିଥିବା ଶିକ୍ଷକଙ୍କ ପାଇଁ ନୋସନାଲ ସୁବିଧା ନାହିଁ । ଏହି ଘୋଷଣା ଗୁଡ଼ିକରେ ପ୍ରାଥମିକ ଶିକ୍ଷକମାନଙ୍କ ପାଇଁ କିଛି ନାହିଁ । କମିଟି କଣ ସୁପାରିସ କରିଥିଲା, ପ୍ରାଥମିକ ଶିକ୍ଷକ ଅବଗତ ନାହାନ୍ତି । ସରକାରୀ ପ୍ରାଥମିକ ଶିକ୍ଷକ ପଦୋନ୍ନତି ପାଉ ନାହାନ୍ତି । ୨୦ ବର୍ଷ ଚାକିରିରେ ବି ପଦୋନ୍ନତି ମିଳୁନି । ପ୍ରାଥମିକ ଶିକ୍ଷକଙ୍କୁ ବିଧାନସଭା ସମୟରେ ଲଲିପପ ମିଳୁଥିବା ନେଇ କଟାକ୍ଷ କରିଛି ପ୍ରାଥମିକ ଶିକ୍ଷକ ସଂଘ । ବିଦ୍ୟାଳୟ ଓ ଗଣଶିକ୍ଷା ବିଭାଗ ଏବଂ ଉଚ୍ଚଶିକ୍ଷା ବିଭାଗ ଅଧୀନରେ ଥିବା ସରକାରୀ, ଅନୁଦାନପ୍ରାପ୍ତ ଓ ଅଣଅନୁଦାନପ୍ରାପ୍ତ ଘରୋଇ ଶିକ୍ଷାନୁଷ୍ଠାନର ଶିକ୍ଷକ, ଅଧ୍ୟାପକ ଓ କର୍ମଚାରୀ ସଂଗଠନଗୁଡ଼ିକର ବିଭିନ୍ନ ଦାବିର ଅନୁଧ୍ୟାନ ପାଇଁ ଅବସରପ୍ରାପ୍ତ ଆଇଏଏସ୍ ଅଶୋକ କୁମାର ତ୍ରିପାଠୀଙ୍କ ଅଧ୍ୟକ୍ଷତାରେ ଏକ କମିଟି ଗଠନ ହୋଇଥିଲା । କମିଟିର ସୁପାରିସଗୁଡ଼ିକୁ ସମ୍ପୃକ୍ତ ଦୁଇ ବିଭାଗ ପକ୍ଷରୁ ପୁଙ୍ଖାନୁପୁଙ୍ଖ ଅନୁଧ୍ୟାନ ପରେ ଏହି ନିଷ୍ପତ୍ତି ନିଆଯାଇଛି ।
