ଭୁବନେଶ୍ୱର: ବିଜେପି ସାଂସଦ ଅପରାଜିତା ଷଡ଼ଙ୍ଗୀଙ୍କୁ ପୁଣି ଅଣ୍ଡାମାଡ଼ । ଦରବୃଦ୍ଧି ପ୍ରସଙ୍ଗରେ ଅଣ୍ଡାମାଡ଼ କରିଛି ଛାତ୍ର କଂଗ୍ରେସ । ଆଚାର୍ଯ୍ୟ ବିହାର ଛକ ପାଣିଟାଙ୍କି ନିକଟରେ ଏକ କାର୍ଯ୍ୟରେ ଯୋଗଦେବା ବେଳେ କେନ୍ଦ୍ର ସରକାରଙ୍କ ଦରବୃଦ୍ଧି ନୀତି ବିରୋଧ କରି ଲୋକେ ଘେରିଥିଲେ । ଏହି ସମୟରେ ଛାତ୍ର କଂଗ୍ରେସ ପକ୍ଷରୁ ଅଣ୍ଡା ଓ ଟମାଟୋ ମାଡ଼ କରାଯାଇଥିଲା ।
ଆଜି ଅପରାହ୍ନରେ ମଧ୍ୟ ଭୁବନେଶ୍ୱର ଉପକଣ୍ଠ ବାଲିପାଟଣା ସରିପୁର ଛକରେ ଅପରାଜିତାଙ୍କ ଗାଡ଼ି ଉପରେ ଅଣ୍ଡାମାଡ଼ ସହ କଳାପତାକା ପ୍ରଦର୍ଶନ କରିଥିଲେ ଛାତ୍ର କଂଗ୍ରେସ କର୍ମୀ । ପେଟ୍ରୋଲ, ଡିଜେଲ୍ ଓ ଗ୍ୟାସ୍ ମୂଲ୍ୟ ବୃଦ୍ଧିକୁ ବିରୋଧ କରି ଅଣ୍ଡାମାଡ଼ କରାଯାଇଥିଲା । ସାଂସଦଙ୍କ ଗାଡିକୁ ଅଣ୍ଡାମାଡ଼ ଘଟଣାରେ ବିଜେପି କର୍ମୀ ରାଜ କିଶୋର ସାହୁଙ୍କୁ ଅଟକ ରଖିଛି ପୋଲିସ । ଅସନ୍ତୁଷ୍ଟ ରାଜକିଶୋର ଛାତ୍ର କଂଗ୍ରେସ କର୍ମୀଙ୍କ ସହ ମିଶି କରିଥିଲେ ଅଣ୍ଡାମାଡ଼ ।
ଅନ୍ୟପଟେ ପାରାଦୀପରେ ବି ବିରୋଧର ସମ୍ମୁଖୀନ ହୋଇଛନ୍ତି ସାଂସଦ ଅପରାଜିତା । ଏଠି ଦଳ ଭିତରୁ ଆସିଛି ବିରୋଧ । ସାଂସଦ ଅପରାଜିତା ଷଡ଼ଙ୍ଗୀଙ୍କୁ ନେଇ ଦୁଇ ଗୋଷ୍ଠୀ ଭିତରେ ଛକାପଞ୍ଝା ଦେଖା ଦେଇଛି । ଡିସେମ୍ବର ୨୫ ତାରିଖରେ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ଜୟନ୍ତୀ । ଏଥିପାଇଁ ପାରାଦ୍ଵୀପ ଅଟଳ ବିହାରୀ ବାଜପେୟୀ ଟ୍ରଷ୍ଟ ପକ୍ଷରୁ ଆୟୋଜିତ ଉତ୍ସବରେ ମୁଖ୍ୟ ଅତିଥି ଭାବେ ଅପରାଜିତା ଷଡ଼ଙ୍ଗୀଙ୍କୁ ନିମନ୍ତ୍ରଣ କରିଛି । ଯାହାକୁ ନେଇ ଏବେ ବିଜେପି ଦଳରେ ବିବାଦ ମୁଣ୍ଡ ଟେକିଛି ।
