ଭୁବନେଶ୍ୱର: ଛାତ୍ର ବିଜେଡି ପକ୍ଷରୁ ବିଶାଳ ରକ୍ତଦାନ ଶିବିର । ଭୁବନେଶ୍ୱର ଯୁବ ବିଜେଡି କାର୍ଯ୍ୟାଳୟରେ ରକ୍ତଦାନ ଶିବିରର ଆୟୋଜନ କରାଯାଇଛି । ଶିବିରରେ ଶତାଧିକ ଯୁବକ ଓ ଛାତ୍ର ସ୍ୱେଚ୍ଛାକୃତ ଭାବେ ରକ୍ତଦାନ କରିଛନ୍ତି । ବିଜେଡି ମୁଖ୍ୟାଳୟ ସାଧାରଣ ସମ୍ପାଦକ ସଞ୍ଜୟ ଦାସବର୍ମା, ସାଧାରଣ ସମ୍ପାଦକ ପ୍ରଣବ ବଳବନ୍ତରାୟ ଓ ଛାତ୍ର ବିଜେଡି ସଭାପତି ଦେବୀ ରଞ୍ଜନ ତ୍ରିପାଠୀ ଉଦଘାଟନ କରିଛନ୍ତି ।
ଓଡ଼ିଶା ମୋ ପରିବାର ଆବାହକ ଅରୂପ ପଟ୍ଟନାୟକ ଉପସ୍ଥିତ ରହି ରକ୍ତଦାତାଙ୍କ ମନୋବଳ ବଢ଼ାଇଛନ୍ତି । ଏବଂ ଛାତ୍ର ବିଜେଡିର ବରିଷ୍ଠ ଉପସଭାପତି ବିଶ୍ୱ ପ୍ରତାପ ସାହୁ ଶିବିର ପରିଚାଳନା କରିଥିଲେ ।
ଭୁବନେଶ୍ୱର: ରାଜଧାନୀ ଡବଲ ମର୍ଡ଼ର ଘଟଣା । ସାମ୍ନାକୁ ଆସୁଛି ବହୁ ଚାଞ୍ଚଲ୍ୟକର ତଥ୍ୟ । ବିବାହକୁ ୨ମାସ ହୋଇଥିଲା । ଚାକିରୀ ପାଇଁ ହଷ୍ଟେଲରେ ରହୁଥିଲେ ମୃତକ ଶାଳୀ ସରସ୍ବତୀ ସେଠୀ । କିଏ ଜାଣିଥିଲା ଭିଣୋଇର କଟୁରୀ ଚୋଟରେ ଚାଲିଯିବ ପ୍ରାଣ । ଭଉଣୀ ଭିଣୋଇଙ୍କ ପାରିବାରିକ କଳହରେ ଭିଣୋଇର ଆକ୍ରୋଶର ଶିକାର ହେବେ ଶାଳୀ । ଏବେ ଦୁଇମାସର ସ୍ତ୍ରୀ ସରସ୍ୱତୀଙ୍କୁ ହରାଇ ଭୋ ଭୋ ହୋଇ କାନ୍ଦୁଛନ୍ତି ସ୍ବାମୀ । ବିବାହକୁ ୨ ମାସ ହୋଇଥିବା ବେଳେ ଆରପାରିକୁ ଚାଲିଯାଇଛନ୍ତି ସରସ୍ୱତୀ ।
ଚନ୍ଦ୍ରଶେଖରପୁର ହାଉସିଂବୋର୍ଡ ହତ୍ୟାକାଣ୍ଡ ଘଟଣାରେ ଅଭିଯୁକ୍ତ ସ୍ବାମୀ ବିଜୟ କେତନ ସେଠୀକୁ ଗିରଫ କରିଛି ପୋଲିସ । ଗୁରୁବାର ରାତିରୁ ଦୁହିଁଙ୍କୁ ହତ୍ୟା କରିଥିଲା ସୈତାନ ସ୍ବାମୀ । ଆଜି ଘରୁ ପଚା ଗନ୍ଧ ବାହାରିବାରୁ ଶବ ଲୁଚାଇବାକୁ ଚେଷ୍ଟା କରୁଥିଲା ବିଜୟ । ହେଲେ ଶ୍ବଶୁର ଓ ସ୍ଥାନୀୟ ଲୋକଙ୍କ ହାତରେ ଧରାପଡି ପୋଲିସ ତାକୁ ଗିରଫ କରିନେଇଛି । ହତ୍ୟାର କାରଣ ଅସ୍ପଷ୍ଟ ଥିବା ବେଳେ ପାରିପାରିକ କଳହ ଓ ସନ୍ତାନ ହେଉନଥିବାରୁ ସ୍ତ୍ରୀ ଗାୟତ୍ରୀ ସେଠୀକୁ ହାଣିଛି ନୃଶଂସ ସ୍ବାମୀ । ୨୦୧୧ରେ ଗାୟତ୍ରୀଙ୍କୁ ବିବାହ କରିଥିଲେ ବିଜୟ । ଶାଳୀ ହଷ୍ଟେଲରେ ରହି ଚାକିରି କରୁଥିଲେ ।
ହଠାତ୍ ସେଦିନ ଶାଳୀ ତାଙ୍କର ଘରକୁ କେମିତି ଓ କାହିଁକି ଆସିଥିଲେ ତାହା ସ୍ପଷ୍ଟ ହୋଇନି । ଘରୋଇ ଅଫିସରେ କାମ କରୁଥିଲା ଅଭିଯୁକ୍ତ ସ୍ବାମୀ । ଗୁରୁବାର ସନ୍ଧ୍ୟାରେ ଅଫିସରୁ ଫେରିବା ପରେ ହୋଇଥିଲା ଝଗଡ଼ା । ହଠାତ୍ ଟାଙ୍ଗିଆରେ ପ୍ରଥମେ ଶାଳୀ ପରେ ସ୍ତ୍ରୀକୁ କରିଥିଲା ହତ୍ୟା । ହତ୍ୟାକାଣ୍ଡ ପରେ ଟାଙ୍ଗିଆ ବାଡିପଟକୁ ଫୋପାଡିଦେଇଥିଲା । ଶାଶୁ ଶ୍ବଶୂର ଫୋନ୍ କରିଥିଲେ । ହେଲେ ଫୋନ୍ ସୁଇଚ୍ ଅଫ୍ କରିଥିଲା ଅଭିଯୁକ୍ତ । ଗଲା ଗୁରୁବାରଠାରୁ ୨ଝିଅଙ୍କ ସହ କଥା ହୋଇନଥିଲେ ବାପା ମା ।
ଅନ୍ୟପଟେ, ସ୍ତ୍ରୀ ଓ ଶାଳୀକୁ ହତ୍ୟା ପୂର୍ବରୁ ଯୋଜନା କରିଥିଲା ବିଜୟ । ଯୋଜନାବଦ୍ଧ ଭାବେ ଶାଳୀକୁ ହଷ୍ଟେଲରୁ ଲେଖି କରି ଆଣିଥିଲା । ମୋବାଇଲକୁ ସ୍ୱିଚ୍ ଅଫ୍ କରି ସମସ୍ତଙ୍କୁ ମାରି ଦେଇ ଘରେ ତାଲା ପକାଇ ବାହାରକୁ ପଳାଇଥିଲା ସେ । ତେଣୁ ସନ୍ଦେହ ବଢ଼ିଥିଲା ବୋଲି କହିଛନ୍ତି ପଡୋଶୀ ।
ଭୁବନେଶ୍ୱର: ୪୦ ଡିଗ୍ରୀ ଅତିକ୍ରମ କଲା ରାଜଧାନୀ ଭୁବନେଶ୍ବରର ତାପମାତ୍ରା । ଦିନ ୧୨ ସୁଦ୍ଧା ଭୁବନେଶ୍ବରର ତାପମାତ୍ରା ୪୦.୨ ଡିଗ୍ରୀ ରହିଛି । ରାଜଧାନୀ ସମେତ ସାରା ରାଜ୍ୟରେ ଅସହ୍ୟ ଗରମ ସହ ଗ୍ରୀଷ୍ମ ପ୍ରବାହ ଜାରି ରହିଛି । ଗ୍ରୀଷ୍ମ ପ୍ରବାହରେ ଆହୁରି କଲବଲ ହେବ ଜନଜୀବନ । ଆସନ୍ତା ୩ଦିନ ପର୍ଯ୍ୟନ୍ତ ତାତିରୁ ମୁକ୍ତି ମିଳିବନି । ଆଗାମୀ ୨ରୁ ୩ ଦିନ ମଧ୍ୟରେ ଆଭ୍ୟନ୍ତରୀଣ ଓଡ଼ିଶାରେ ୫ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବଢିବ ବୋଲି ଆକଳନ କରିଛି ପାଣିପାଗ କେନ୍ଦ୍ର । ଉପକୂଳରେ ତାପମାତ୍ରା ବିଶେଷ ପରିବର୍ତ୍ତନ ହେବନି ।
ଶନିବାର ମଧ୍ୟ ୪୦ଡିଗ୍ରୀ ଉପରେ ଥିଲା ତାପମାତ୍ରା । ପାଣିପାଗର ପୂର୍ବାନୁମାନ ଯାହା, ବର୍ତ୍ତମାନ ବର୍ଷାର ଆଶା କ୍ଷୀଣ । ଶନିବାର ନିଆଁ ବର୍ଷିଛି । ଆଗକୁ ଆହୁରି ଭୟଙ୍କର ରୂପ ନେବ ଗ୍ରୀଷ୍ମ ପ୍ରବାହ । ଆସନ୍ତା ୩ ଦିନ ଭିତରେ ତାପମାତ୍ରା ଆହୁରି ୩ରୁ ୫ ଡିଗ୍ରୀ ବଢ଼ିଯିବ । ଉପକୂଳ ୪୦-୪୨ ଓ ଆଭ୍ୟନ୍ତରୀଣ ଓଡ଼ିଶା ୪୩-୪୬ ଡିଗ୍ରୀ ତାପମାତ୍ରା ରହିବ । ଆସନ୍ତା ସପ୍ତାହ ପର୍ଯ୍ୟନ୍ତ ଏମିତି ଅସମ୍ଭାଳ ତାତି ଜାରି ରହିବ । ଗ୍ରୀଷ୍ମ ପ୍ରବାହ ନେଇ ସ୍ୱତନ୍ତ୍ର ରିଲିଫ୍ କମିଶନର (ଏସଆରସି)ଙ୍କ କାର୍ଯ୍ୟାଳୟ ପକ୍ଷରୁ ଜିଲ୍ଲା ପ୍ରଶାସନ ଓ ରାଜ୍ୟବାସୀଙ୍କୁ ସତର୍କ କରାଯାଇଛି । ଦିନ ୧୧ଟାରୁ ଅପରାହ୍ନ ସାଢ଼େ ୩ଟା ଭିତରେ ପଦାକୁ ବାହାରିବାକୁ ଥିଲେ ଘରୁ ଆବଶ୍ୟକ ସତର୍କତା ପଦକ୍ଷେପ ଗ୍ରହଣ କରିବାକୁ କୁହାଯାଇଛି ।
ଆସନ୍ତାକାଲିଠୁ କିଛିଜିଲ୍ଲା ପାଇଁ ହିଟୱେଭ୍ ସତର୍କତା ୨୮ତାରିଖ ଯାଏ ଜାରି ହୋଇଛି । ଓଡ଼ିଶା ମଧ୍ୟକୁ ଶୁଷ୍କ ବାୟୁ ପ୍ରବାହ ହେଉଥିବାରୁ ତାତି ବଢୁଛି । ଆସନ୍ତାକାଲି ପାଇଁ ସୋନପୁର, ବୌଦ୍ଧ ଓ ବଲାଙ୍ଗୀରକୁ ସତର୍କତା ଜାରି ହୋଇଥିବାବେଳେ ୨୬ରେ ସୋନପୁର, ବୌଦ୍ଧ, ବଲାଙ୍ଗୀର, ମୟୂରଭଞ୍ଜ ଏବଂ ୨୭ତାରିଖରେ ସୋନପୁର, ବୌଦ୍ଧ, ବଲାଙ୍ଗୀର, ମୟୂରଭଞ୍ଜ, ଓ କଳାହାଣ୍ଡିକୁ ଜାରି ହୋଇଛି ହିଟଓ୍ବେଭ୍ ।
ଅମରାବତୀ: ଇଲେକ୍ଟ୍ରିକ୍ ବାଇକ୍ ବ୍ୟାଟେରୀ ଫାଟି ସ୍ବାମୀ ମୃତ, ସ୍ତ୍ରୀ ପିଲା ଗୁରୁତର । ଶନିବାର ଆନ୍ଧ୍ରପ୍ରଦେଶ ବିଜୟ୍ଓ୍ବାଡାରେ ଏହି ଘଟଣା ଘଟିଛି । ବାଇକର ବ୍ୟାଟେରୀ ଚାର୍ଜ ବସାଇଥିଲାବେଳ ଏହି ଦୁର୍ଘଟଣା ଘଟିଛି । ଏଥିରେ ୪୦ ବର୍ଷିୟ ଜଣେ ଯୁବକଙ୍କ ମୃତ୍ୟୁ ହୋଇଥିଲାବେଳେ ତାଙ୍କ ପତ୍ନୀ ଜଳିଯାଇଛନ୍ତି । ସେ ଏବେ ଗୁରୁତର ଅବସ୍ଥାରେ ମେଡିକାଲରେ ଚିକିତ୍ସାଧିନ ଅଛନ୍ତି । ତାଙ୍କର ଦୁଇ ପିଲା ଶ୍ବାସରୁଦ୍ଧ ହୋଇଯାଇଥିଲେ । ସେମାନଙ୍କର ମଧ୍ୟ ଚିକିତ୍ସା ଚାଲିଛି ।
ଦୁର୍ଘଟଣାରେ ମୃତ୍ୟୁ ବରଣ କରିଥିବା ବ୍ୟକ୍ତିଙ୍କ ନାଁ ହେଉଛି ଶିବ କୁମାର । ଶୁକ୍ରବାର ଦିନ ଶିବ କୁମାର ଏହି ଇଲେକ୍ଟ୍ରିକ୍ ବାଇକ୍ କିଣିଥିଲେ। ସେହିଦିନ ରାତିରେ ଗାଡ଼ିର ବ୍ୟାଟେରୀକୁ ସେ ଶୋଇବା ଘରେ ଚାର୍ଜରେ ବସାଇଥିଲେ। ଭୋର ସମୟରେ ହଠାତ୍ ବ୍ୟାଟେରୀଟି ଫାଟି ଯିବାରୁ ଘର ଭିତରେ ନିଆଁ ଲାଗି ଯାଇଥିଲା।
ଶିବ କୁମାରଙ୍କ ଘର ଭିତରୁ ଧୂଆଁ ବାହାରୁଥିବାର ପାଖ ପଡ଼ୋଶୀମାନେ ଦେଖିଥିଲେ। ସେମାନେ କବାଟ ଭାଙ୍ଗି ପରିବାରର ସମସ୍ତଙ୍କୁ ଉଦ୍ଧାର କରିଥିଲେ। ଶିବ କୁମାରଙ୍କୁ ଡାକ୍ତରଖାନା ନିଆଯାଉଥିବା ବେଳେ ରାସ୍ତାରେ ହିଁ ତାଙ୍କର ମୃତ୍ୟୁ ଘଟିଥିଲା। ଘରେ ନିଆଁ ଲାଗିଯିବା ଯୋଗୁ ଏସି ସହିତ ଆଉ କିଛି ଆସବାବପତ୍ର ମଧ୍ୟ ପୋଡ଼ି ଯାଇଛି।
ବ୍ରହ୍ମପୁର: ନକଲି ଡିଟର୍ଜେଣ୍ଟ, ନକଲି ତେଲ, ନକଲି ଘିଅ ପରେ ଏବେ ବିଷ ବି ନକଲି । ଅର୍ଥାତ୍ ଏବେ ବଜାରରେ ବିକ୍ରି ହେଉଛି ନକଲି ମଦ । ଏମିତି ଏକ ନକଲି ମଦ ପ୍ରସ୍ତୁତ ହେଉଥିବା କାରଖାନା ଠାବ କରିଛି ଅବକାରୀ ବିଭାଗ । ଏବଂ ସେଠାରେ ବପୁଳ ପରିମାଣରେ ନକଲି ମଦ ଜବତ କରାଯାଇଛି । ଅସଲି ବ୍ରାଣ୍ଡ, ନକଲି ମଦ ।
ସୂଚନା ଅନୁସାରେ, ବ୍ରହ୍ମପୁର ଅବକରୀ ବିଭାଗ ଦ୍ବାରା ବିପୁଳ ପରିମାଣର ନକଲି ମଦ ଜବତ । ବିଶ୍ବସ୍ତ ସୂତ୍ରରୁ ଖବର ପାଇ ଅବକରୀ ବିଭାଗର ୩ଟି ଟିମ ବ୍ରହ୍ମପୁର ପାଖାପାଖି ଲୋଚାପଡ଼ା, ଆସିକା ରୋଡ ପଦ୍ମନଗର, ଗଜପତି ନଗର ଉପରେ ଚଢ଼ାଉ କରି ବିପୁଳ ପରିମାଣର ବିଭିନ୍ନ ବ୍ରାଣ୍ଡର ନକଲି ମଦ ବୋତଲ, ଲେବୁଲ, ଠିପି, ସ୍ପିରିଟ, କେମିକାଲ, ରଂଗ ସମେତ ଗୋଟିଏ ଅଟୋ, ଗୋଟିଏ ସ୍କୁଟି ଜବତ କରିଛନ୍ତି । ଘଟଣାରେ ୪ଜଣଙ୍କୁ ଗିରଫ କରାଯାଇଛି ।
ନାଇଜେରିଆ: ନାଇଜେରିଆରେ ଏକ ତେଲ ରିଫାଇନାରୀରେ ଭୟଙ୍କର ବିସ୍ଫୋରଣ ହୋଇଛି । ଏଥିରେ ଶତାଧିକ ଲେକଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ଏଥିରେ ବହୁ ସଂଖ୍ୟାରେ କର୍ମଚାରୀ ଆହତ ହୋଇଥିବା ଅନୁମାନ କରାଯାଉଛି । ଗତ ଶନିବାର ଅଧିକାରୀ ଏହି ସୂଚନା ଦେଇଛନ୍ତି ।
ରିପୋର୍ଟ ଅନୁସାରେ, ଶତାଧିକ ଲୋକ ବିସ୍ଫୋରଣର ଶିକାର ହୋଇଛନ୍ତି । ସେମାନଙ୍କ ମଧ୍ୟରୁ ଶହେରୁ ଅଧିକ ଲୋକ ମୃତ୍ୟୁ ବରଣ କରିଛନ୍ତି । ନିଆଁ ଦ୍ରୁତ ଗତିରେ ରିଫାଇନାରୀରେ ବ୍ୟାପିଯାଇଥିଲା । ଏଥିରୁ କିପରି ରକ୍ଷା ପାଇ ହେବ ତାହା ହଠାତ୍ କେହି ଜାଣିପାରି ନଥିଲେ । ଏହାକୁ ନିୟନ୍ତ୍ରଣ କରିବା ସମ୍ଭବ ନ ହୋଇନଥିବାରୁ ଏତେ ବଡ଼ ଅଘଟଣ ଘଟିଯାଇଥିଲା । ରାଜ୍ୟ ପେଟ୍ରୋଲିୟମ ରିସୋର୍ଟ କମିଶନର ଗୁଡଡଲକ ଓପିୟାଙ୍କ କହିବା ଅନୁସାରେ ଏକ ବେଆଇନ୍ ବଙ୍କରିଙ୍ଗ ନିକଟରେ ନିଆଁ ଲାଗିଛି । ଏଥିରେ ଶହେରୁ ଅଧିକ ଲୋକଙ୍କର ମୃତ୍ୟୁ ହୋଇଛି । ମୃତକଙ୍କ ପରିଚୟ ଏ ଯାଏ ମିଳିପାରିନି ।
ଖରାପ ପାଇପଲାଇନ୍ ଏବଂ ସଠିକ ଭାବରେ ଏହାର ରକ୍ଷଣାବେକ୍ଷଣା କରାଯାଇ ନଥିବାରୁ ଏହି ଦୁର୍ଘଟଣା ଘଟିଥିବା କୁହାଯାଉଛି । ଏଠାରୁ ତେଲ କଳାବଜାରୀ ହେଉଥିବା ପୂର୍ବରୁ ସୂଚନା ରହିଛି । ପେଟ୍ରୋଲିୟମ ଦ୍ରବ୍ୟ ଚୋରି ଏବଂ ବେଆଇନ ବିଶୋଧନ ଯୋଗୁ ଏହି ଦୁର୍ଘଟଣା ଘଟିଥିବା କୁହାଯାଉଛି ।
ନୂଆଦିଲ୍ଲୀ: ଚୀନକୁ ଭାରତର ଶକ୍ତ ଧକ୍କା । ଚୀନରୁ ଆଉ ଭାରତ ଆସିପାରିବେନି ପର୍ଯ୍ୟଟକ । ଟୁରିଷ୍ଟ ଭିସାକୁ ରଦ୍ଦ କରିଛନ୍ତି ଭାରତ ସରକାର । ବ୍ୟବସାୟ ଏବଂ କୁଟନୀତି କ୍ଷେତ୍ରରେ ଭିସା ଜାରି ରହିବ । ସେପଟେ ଚୀନରୁ ଫେରିଥିବା ଭାରତୀୟଙ୍କୁ ପୁଣି ଡାକିଛି ଚୀନ୍ । କୋଭିଡ ପାଇଁ ଚୀନରୁ ଭାରତ ଫେରିଥିଲେ ଛାତ୍ରଛାତ୍ରୀ । ହେଲେ ସେମାନଙ୍କୁ ପୁଣି ଚୀନ ଫେରାଇ ନେବାକୁ ଯୋଜନା କରଯାଉଛି । ଏହାରି ଭିତରେ ଚୀନକୁ ଜବାବ ଦେବାକୁ ଭାରତ ସରକାର କଡ଼ା ପଦକ୍ଷେପ ନେଇଛନ୍ତି ।
ବିଦେଶୀଙ୍କୁ ଟ୍ୟୁରିଷ୍ଟ ଭିସା ନେଇ ଇଣ୍ଟରନ୍ୟାସନାଲ ଏୟାର ଟ୍ରାନ୍ସପୋର୍ଟ ଆସୋସିଏସନ (IATA) ଟ୍ୟୁରିଷ୍ଟ ଭିସାକୁ ନେଇ ନୂଆ ଅପଡେଟ ପ୍ରକାଶ କରିଛି । ଏହାଦ୍ବାରା ବିଭିନ୍ନ ଦେଶର ଏୟାରଲାଇନ୍ସମାନେ ଜାଣି ପାରିବେ କେଉଁ ଦେଶର ଲୋକ କେଉଁ ଦେଶକୁ, କେଉଁ ଭିସାରେ ଯାଇ ପାରିବେ । ଏହାଦ୍ବାରା ବିଦେଶୀ ନାଗରିକ କୌଣସି ଦେଶକୁ ଯିବା ବେଳେ ଯାଞ୍ଚରେ ସୁବିଧା ହୋଇପାରିବ ।
ଭାରତ ସମ୍ପର୍କୀତ ଅପଡେଟ ଆଇଏଟିଏ ଏପ୍ରିଲ ୧୯ ତାରିଖରେ ଜାରି କରିଛି । ଏହାଦ୍ବାରା ଇ-ଟ୍ୟୁରିଷ୍ଟ ଭିସାରେ କେଉଁ ଦେଶର ନାଗରିକ ଭାରତକୁ ଆସି ପାରିବେ ତାହାର ଲିଷ୍ଟ ପ୍ରକାଶ ପାଇଛି । ଏଥିରେ ଭୁଟାନ, ମାଲଦ୍ବୀପ ଓ ନେପାଳ ନାଗରିକଙ୍କୁ ଟ୍ୟୁରିଷ୍ଟ ଭିସାରେ ଭାରତ ଆସିବା ପାଇଁ ଅନୁମତି ମିଳିଛି ।
ନୂଆଦିଲ୍ଲୀ: ଗତ କିଛି ଦିନ ଧରି ପେଟ୍ରୋଲ ଦର ବଢ଼ୁଥିବା ବେଳେ ଏବେ ଚାଳକଙ୍କୁ ଟିକିଏ ଆଶ୍ବସ୍ତି ମିଳିଛି । ଗତ ୧୮ ଦିନ ଧରି ପେଟ୍ରୋଲ ଦରରେ କୌଣସି ପରିବର୍ତ୍ତନ ହୋଇନାହିଁ । ଏଥିପାଇଁ ପ୍ରତିଦିନ ବଢ଼ୁଥିବା ପେଟ୍ରୋଲ ଏବଂ ଡିଜେଲ ଦର ଯୋଗୁ ଚିନ୍ତାରେ ଥିବା ଚାଳକଙ୍କୁ ଟିକିଏ ଆଶ୍ବସ୍ତି ମିଳିଛି । ଗତ ୭ ଏପ୍ରିଲରୁ ତେଲ ଦର ସ୍ଥିର ରହିଛି । ୬ ଏପ୍ରିଲରେ ତେଲ ଦର ଶେଷଥର ପାଇଁ ୮୦ ପଇସା ବଢ଼ିଥିଲା ।
ଇଣ୍ଡିଆନ୍ ଅଏଲ କର୍ପୋରେସନ ଲିମିଟେଡର ସଦ୍ୟ ତଥ୍ୟ ଅନୁସାରେ ଦେଶରେ ରାଜଧାନୀ ଦିଲ୍ଲୀରେ ଆଜି ପେଟ୍ରୋଲ ଦର ପ୍ରତି ଲିଟର ପିଛା ରହିଛି ୧୦୫ ଟଙ୍କା ୪୧ ପଇସା ରହିଛି । ସେହିପରି ଡିଜେଲର ଦର ରହିଛି ୯୬ ଟଙ୍କା ୬୭ ପଇସା । ଦେଶର ଆର୍ଥିକ ରାଜଧାନୀ ମୁମ୍ବାଇରେ ପେଟ୍ରୋଲ ଦର କିନ୍ତୁ ୧୨୦ ଟଙ୍କା ଟପିଯାଇଛି । ସେଠାରେ ପେଟ୍ରେଲ ଦର ରହିଛି ୧୨୦ ଟଙ୍କା ୫୧ ପଇସା । ଏବଂ ଡିଜେଲ ପ୍ରତି ଲିଟର ପିଛା ଦର ରହିଛି ୧୦୪ ଟଙ୍କା ୭୭ ପଇସା ।
ସେହିପରି କଲିକତାରେ ପେଟ୍ରୋଲ ଦର ୧୧୫ଟଙ୍କା ୧୨ ପଇସା ଥିଲାବେଳେ ଡିଜେଲ ଦର ରହିଛି ୯୯ ଟଙ୍କା ୮୩ ପଇସା । ଚେନ୍ନାଇରେ ପେଟ୍ରୋଲ ୧୧୦ ଟଙ୍କା ୮୫ ପଇସା ଥିଲାବେଳେ ମଧ୍ୟପ୍ରଦେଶରେ ୧୧୮ ଟଙ୍କା ୨୬ ପଇସା ରହିଛି ।
ଭୁବନେଶ୍ୱର: ବଦଳିବ ନନ୍ଦନକାନନର କଳେବର । ଦେଶର ସର୍ବ ବୃହତ ସବୁଜିମା ଚିଡ଼ିଆଖାନାର ବଢିବ ପରିସର । ୪୩୧ ହେକ୍ଟରରୁ ବଢି ୧୦୪୭ ହେକ୍ଟରରେ ପହଞ୍ଚିବ । ଏବେ ଚିଡ଼ିଆଖାନା, କାଞ୍ଜିଆ ହ୍ରଦ ଏବଂ ବୋଟାନିକାଲ ଗାର୍ଡ଼େନ ଏହାର ପରିସରରେ ଯାଉଥିବା ବେଳେ ପରିବର୍ତ୍ତିତ ଯୋଜନାରେ ଚନ୍ଦକା ଜଙ୍ଗଲ, ଚୁଡ଼ଙ୍ଗ ଓ କୃଷ୍ଣନଗରର ସଂରକ୍ଷିତ ଅଞ୍ଚଳ ବି ସାମିଲ ହେବ । ନୂଆ ମାଷ୍ଟରପ୍ଲାନକୁ କେନ୍ଦ୍ରୀୟ ଚିଡ଼ିଆଖାନା କର୍ତ୍ତୁପକ୍ଷ ଅନୁମୋଦନ ଦେଇଛନ୍ତି । ନୂଆ ଯୋଜନା କାର୍ଯ୍ୟକାରୀ ହେଲେ ବର୍ଷକୁ ୩୫ଲକ୍ଷ ପର୍ଯ୍ୟଟକ ଆସିବାର ଅନୁମାନ କରାଯାଉଛି । ଯାହାକୁ ସ୍ବାଗତ କରିଛନ୍ତି ପରିବେଶବିତ ।
ଏବେ ଦେଶର ସର୍ବ ବୃହତ ସୁବଜିମା ଚିଡ଼ିଆଖାନାକୁ ଆସିବେ ଅଧିକ ଜୀବଜନ୍ତୁ । ରାଜଧାନୀର ଉପକଣ୍ଠରେ ଥିବା ଚିଡ଼ିଆଖାନାର ପରିସର ବି ଦୁଇଗୁଣାରୁ ଅଧିକ ହେବା ନେଇ ଲକ୍ଷ୍ୟ । ଚନ୍ଦକା ବନ୍ୟଜନ୍ତୁ ଅଭୟାରଣ୍ୟରୁ ସୃଷ୍ଟି ହୋଇଥିବା ନନ୍ଦନକାନନରେ ଏବେ ପୁଣି ଥରେ ସାମିଲ ହେବ ଚନ୍ଦକା । ଏହାସହ ସଂରକ୍ଷିତ ଅଞ୍ଚଳ ଭାବେ ଜଣାଶୁଣା ଚୁଡ଼ଙ୍ଗ ଓ କୃଷ୍ଣନଗର ବି ଏଥିରେ ସାମିଲ ହେବ । ଏଥିପାଇଁ ଖର୍ଚ୍ଚ ହେବ ପ୍ରାୟ ୬୦୦କୋଟି ଟଙ୍କା । ବନ ବିଭାଗ ଏବଂ ଚିଡ଼ିଆଖାନା କର୍ତ୍ତୁପକ୍ଷଙ୍କ ମାଷ୍ଟରପ୍ଲାନକୁ କେନ୍ଦ୍ରୀୟ ଚିଡ଼ିଆଖାନା କର୍ତ୍ତୁପକ୍ଷ ଅନୁମୋଦନ ଦେଇଛନ୍ତି ।
ବନ୍ୟଜନ୍ତୁମାନଙ୍କୁ ନନ୍ଦନକାନନ ଓ ଭରତପୁର ସଂରକ୍ଷିତ ଜଙ୍ଗଲରେ ଖୋଲା ବିଚରଣ କରିବା ପାଇଁ ସୁଯୋଗ ମିଳିବ । ଏବେ ନନ୍ଦନକାନନ ଚିଡ଼ିଆଖାନାରେ କାଞ୍ଜିଆ ହ୍ରଦ ଓ ବୋଟାନିକାଲ ଗାର୍ଡ଼େନ ରହିଛି । ପର୍ଯ୍ୟଟକଙ୍କୁ ଆକୃଷ୍ଟ କରିବାକୁ ଚନ୍ଦକା ଅଞ୍ଚଳରେ ଜଙ୍ଗଲ ସଫାରୀ କରାଯିବ । ୨୦୦ ହରିଣ ଚନ୍ଦକା ଏବଂ ଚୁଡ଼ଙ୍ଗ ଅଞ୍ଚଳରେ ଛଡ଼ାଯିବ । ଚିଡ଼ିଆଖାନା ପରିସର ବାହାରେ ମଲ୍ଟି ଲେଭେଲ ପାର୍କିଂ ସହ ନୂଆ ଅତ୍ୟାଧୁନିକ ବସଷ୍ଟାଣ୍ଡ ଏବଂ ଫୁଡ଼କୋର୍ଟ ନିର୍ମାଣ ହେବ । ବର୍ଷକୁ ୩୫ଲକ୍ଷ ପର୍ଯ୍ୟଟକ ଆସିବା ନେଇ ଯୋଜନା କରୁଛି ବନ ବିଭାଗ । ଏହାକୁ ପରିବେଶବିତ ସ୍ବାଗତ କରିଥିବା ବେଳେ ସବୁଜିମା ବଜାୟ ରଖିବା ଉପରେ ଧ୍ୟାନ ଦେବା ଗୁରୁତ୍ବ ଦେବାକୁ ମତ ଦେଇଛନ୍ତି ।
ବନ ବିଭାଗ ଓ ପର୍ଯ୍ୟଟନ ବିଭାଗର ମଳିତ ଆନୁକୁଲ୍ୟରେ ଏବେ ଇକୋ-ଟୁରିଜିମର ଆଦୃତି ବଢୁଥିବା ବେଳେ ନନ୍ଦନକାନନର କଳେବର ବୃଦ୍ଧି ପର୍ଯ୍ୟଟନ ଦିଗରେ ନୂଆ ଅଧ୍ୟାୟ ସୃଷ୍ଟି କରିବ ।
ମୁମ୍ବାଇ: ଏପ୍ରିଲ ୨୪ । କ୍ରିକେଟ ପ୍ରେମୀଙ୍କ ପାଇଁ ଆଜିର ଦିନଟି ବିଶେଷ ମହତ୍ବ ରଖିଥାଏ । କାରଣ ଆଜି ହେଉଛି ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କ ଜନ୍ମଦିନ । ୪୯ ବର୍ଷରେ ପଦାର୍ପଣ କରିଛନ୍ତି ସଚିନ । କେବଳ ଭାରତୀୟ କ୍ରିକେଟକୁ ନୁହେଁ ବିଶ୍ବ କ୍ରିକେଟକୁ ନୂଆ ଦିଗ ଦେଇଥିବା ଏହି ମହାନ କ୍ରିକେଟରଙ୍କ ଜୀବନୀକୁ ରହିଛି ଅନେକ ରୋମାଞ୍ଚକ କଥା । ଯାହା ବହୁତ କମ କ୍ରିକେଟ ପ୍ରେମୀ ଜାଣନ୍ତି ।
ଜାଣିଲେ ଆଶ୍ଚର୍ଯ୍ୟ ହେବେ ଭାରତୀୟ କ୍ରିକେଟର ଗର୍ବ ସଚିନ ତେନ୍ଦୁଲକର ପାକିସ୍ତାନ ପାଇଁ ମଧ୍ୟ ଖେଳିଛନ୍ତି । ତାହା ପୁଣି ଭାରତ ବିପକ୍ଷରେ । କଥାଟା ଶୁଣି ଆଶ୍ଚର୍ଯ୍ୟ ଲାଗିଥିଲେ ବି ସତ । ନିଜେ ସଚିନ ଏହା ତାଙ୍କ ଆତ୍ମକଥା ‘ପ୍ଲେଇଂ ଇଟ୍ ମାଇଁ ଓ୍ବେ’ରେ ଉଲ୍ଲେଖ କରିଛନ୍ତି ।
ସଚିନ କାହିଁକି ଓ କେବେ ପାକିସ୍ତାନ ଟିମ୍ ତରଫରୁ ଭାରତ ବିରୋଧରେ ଫିଲ୍ଡକୁ ଓହ୍ଲାଇଥିଲେ ଆସନ୍ତୁ ଜାଣିବା ଏହି ବିଶେଷ ରିପୋର୍ଟରେ ।
ବର୍ଷ ୧୯୮୭ । ସଚିନଙ୍କ ଅନ୍ତର୍ଜାତୀୟ କ୍ୟାରିୟର ବି ଆରମ୍ଭ ହୋଇ ନଥିଲା । ପାକିସ୍ତାନ ଟିମ୍ ୫ ଟେଷ୍ଟ ଓ ୬ ଦିନିକିଆ ସିରିଜ ଖେଳିବାକୁ ଭାରତ ଆସିଥିଲା । ସିରିଜ ଆରମ୍ଭରୁ ଜାନୁଆରୀ ୨୦ରେ ଭାରତ ଓ ପାକିସ୍ତାନ ମଧ୍ୟରେ ମୁମ୍ବାଇ ବ୍ରିବୋର୍ଣ୍ଣ ଷ୍ଟାଡିୟମରେ ଖେଳା ଯାଇଥିଲା ଏକ ୪୦-୪୦ ଓଭରର ପ୍ରଦର୍ଶନୀ ମ୍ୟାଚ୍ । ପାକିସ୍ତାନ ଫିଲ୍ଡିଂ କରୁଥିଲା । ଲଞ୍ଚ ବ୍ରେକ୍ ସମୟରେ ଜାଭେଦ ମିଆଁଦାଦ ଏବଂ ଅବଦୁଲ୍ଲ କାଦିର ପଡିଆ ବାହାରକୁ ପଳାଇଥିଲେ । ଖେଳ ଆରମ୍ଭ ହେବା ପରେ ମଧ୍ୟ ସେମାନେ ଆସି ନଥିଲେ । ଫଳରେ ପାକିସ୍ତାନକୁ ୧୧ ଜଣ ଖେଳାଳିଙ୍କୁ ନେଇ ଫିଲ୍ଡିଂ କରିବାର ଥିଲା । ଏହି ସମୟରେ ପାକିସ୍ତାନ ପାଇଁ ଫିଲ୍ଡିଂ କରିବାକୁ ସବଷ୍ଟିଚ୍ୟୁଡ ଫିଲଡର ଭାବେ ପଡିଆକୁ ଓହ୍ଲାଇଥିଲେ ମାତ୍ର ୧୩ ବର୍ଷ ବୟସର ଜଣେ ଛୋଟ ପିଲା । ସେହି ପିଲାଟି ଆଉ କେହି ନଥିଲେ । ସେ ଥିଲେ ସଚିନ । ଅଧିନାୟକ ଇମ୍ରାନ ଖାନ୍ ତାଙ୍କୁ ଓ୍ବାଇଡ ଲଙ୍ଗ ଅନରେ ଫିଲ୍ଡ କରିବାକୁ କହିଥିଲେ ।
ସଚିନ ତାଙ୍କ ଆତ୍ମକଥାରେ ଏହା ମଧ୍ୟ ଉଲ୍ଲେଖ କରିଛନ୍ତି ଯେ, ଏହି ମ୍ୟାଚରେ ସେ ଭାରତୀୟ କ୍ରିକେଟର କିମ୍ବଦନ୍ତୀ କ୍ରିକେଟର କପିଲ ଦେବଙ୍କ କ୍ୟାଚ ପ୍ରାୟତଃ ନେଇ ଯାଇଥିଲେ କହିଲେ ଚଳେ । ଫିଲ୍ଡିଂ ସମୟରେ କପିଲ ଦେବ ସଚିନଙ୍କ ଆଡକୁ ଏୟାରରେ ଏକ ସଟ୍ ଖେଳିଥିଲେ । ଯାହାକୁ ଧରିବାକୁ ସଚିନ ତାଙ୍କ ଛୋଟ ଛୋଟ ପାଦରେ ପ୍ରାୟ ୧୫ ମିଟର ପର୍ଯ୍ୟନ୍ତ ଦୌଡି ଥିଲେ । ସେଥିକି ନୁହେଁ, ସଚିନ ବଲ୍ ପାଖରେ ପ୍ରାୟତଃ ପହଞ୍ଚି ଯାଇଥିଲେ । ଦେଖଣାହାରି କୁହନ୍ତି ଯଦି କେହି ବୟସ୍କ ଖେଳାଳି ସେଠାରେ ଫିଲ୍ଡ କରୁଥାନ୍ତେ ହୁଏତ କପିଲଙ୍କୁ କ୍ରିଜ୍ ଛାଡିବାକୁ ପଡିଥାନ୍ତା ।
ସଚିନ ତାଙ୍କ ବହିରେ ଏହା ମଧ୍ୟ ଲେଖିଛନ୍ତି ଯେ, ‘ମୁଁ ଜାଣିନାହିଁ, ଇମ୍ରାନ ଖାନଙ୍କୁ ମନେ ଥିବ କି ନାହିଁ ମୁଁ ଥରେ ପାକିସ୍ତାନ ଟିମ୍ ପାଇଁ ଡିଲ୍ଡିଂ କରିଥିଲି ।’ ଏହି ମ୍ୟାଚର କିଛି ବର୍ଷ ପରେ ସେହି ପାକିସ୍ତାନ ବିପକ୍ଷରେ ସଚିନ ଟିମ ଇଣ୍ଡିଆ ତରଫରୁ ଡେବ୍ୟୁ କରିଥିଲେ ।
ଆଜି ସଚିନଙ୍କ ଜନ୍ମଦିନ । ଜାଣିଛନ୍ତି କି ୨୪ରେ ତାରିଖରେ ଜନ୍ମ ହୋଇଥିବା ସଚିନଙ୍କ ପାଇଁ ଏହି ତାରିଖଟି ବେଶ ମହତ୍ବ ରଖେ । ଏହି ତାରିଖରେ ସଚିନଙ୍କ ସହ କ’ଣ ଘଟିଥିଲା ଥରେ ନଜର ପକାଇବା ।
୧୯୮୮ ଫେବୃଆରୀ ୨୪ରେ ସଚିନ ତାଙ୍କ ପିଲାଦିନର ସାଙ୍ଗ ବିନୋଦ କାମ୍ବଲୀଙ୍କ ସହ ମିଶି ହାରିଶ ସିଲ୍ଡର ସେମିଫାଇନାଲରେ ତୃତୀୟ ଓ୍ବିକେଟରେ ଅପରାଜିତ ୬୬୪ ରନର ପାରି ଖେଳିଥିଲେ । ଏହି ପାର୍ଟନରସିପରେ ସଚିନ ୩୨୬ ଏବଂ କାମ୍ବଲୀ ୩୪୯ ରନ୍ କରିଥିଲେ ।
ସେହିପରି ୧୯୮୯ ନଭେମ୍ବର ୨୪ରେ ସଚିନ ୧୬ ବର୍ଷ ବୟସରେ ଟେଷ୍ଟ କ୍ୟାରିୟର ଆରମ୍ଭ କରିଥିଲେ । ୧୯୯୫ ମେ’ ୨୪ ତାରିଖରେ ସଚିନ ଓ ଅଞ୍ଜଳିଙ୍କ ବିବାହ ହୋଇଥିଲା । ୨୦୧୦ ଫେବୃଆରୀ ୨୪ରେ ସଚିନ ସାଉଥ ଆଫ୍ରିକା ବିପକ୍ଷ ଦିନିକିଆରେ ଦ୍ବିଶତକ ମାରିଥିଲେ ।
