ପାଟଣା: ପାର୍ଟି ନୁହେଁ ପଦଯାତ୍ରା । ପିକେଙ୍କ ପ୍ଲାନ୍ରେ ଟ୍ବିଷ୍ଟ । ସକ୍ରୀୟ ରାଜନୀତିରେ ପଲିଟିକାଲ ଷ୍ଟ୍ରାଟେଜିଷ୍ଟ ପ୍ରଶାନ୍ତ କିଶୋର ସାମିଲ ହେବା ସହ ନୂଆ ଦଳ ଗଢ଼ିବା ନେଇ ଚର୍ଚ୍ଚା ହେଉଥିବା ବେଳେ ସେଥିରେ ପୂର୍ଣ୍ଣଚ୍ଛେଦ ପଡ଼ିଛି । ବିହାରରୁ ରାଜେନୖତିକ ଅଭିଯାନ ଆରମ୍ଭ କରିବେ ବୋଲି ପ୍ରଶାନ୍ତ କିଶୋର ଘୋଷଣା କରିଥିବା ବେଳେ ଆଜି ପାଟଣାଠାରେ ପ୍ରେସମିଟ କରି ଏ ନେଇ ସ୍ପଷ୍ଟ ସୂଚନା ଦେଇଛନ୍ତି । ଏବେ ରାଜନୈତିକ ଦଳ ଗଠନ କରିବାର କୌଣସି ଯୋଜନା ନାହିଁ । ଅନ୍ୟ ରାଜ୍ୟ ତୁଳନାରେ ବିହାର ପଛରେ ଥିବାରୁ ଏଠାରେ ପରିବର୍ତ୍ତନ ଆବଶ୍ୟକ । ବିହାରରେ ରାଜନୈତିକ ପରିବର୍ତ୍ତନ ଲାଗି ୩ହଜାର କିମି ପଦଯାତ୍ରା କରିବେ ବୋଲି ରାଜନୈତିକ ରଣନୀତିକାର ପ୍ରଶାନ୍ତ କିଶୋର କହିଛନ୍ତି । ଆସନ୍ତା ଅକ୍ଟୋବର ୨ରୁ ଚମ୍ପରଣ ସ୍ଥିତ ଗାନ୍ଧୀ ଆଶ୍ରମରୁ ଏହି ପଦଯାତ୍ରା ବା ଜନ ସୁରଜ ଅଭିଯାନ ଆରମ୍ଭ ହେବ ।
ରୁଷ ସୈନ୍ୟଙ୍କ ବର୍ବର କାଣ୍ଡ, ପୁରୁଷଙ୍କୁ କରୁଛନ୍ତି ଦୁଷ୍କର୍ମ
ନୂଆଦିଲ୍ଲୀ: ସବୁ ସୀମା ଟପିଯାଇଛନ୍ତି ରୁଷ ସୈନ୍ୟ । ଆହୁରି ଲମ୍ବା ହୋଇଯାଇଛି ରୁଷ ସୈନ୍ୟଙ୍କ ଅମାନବୀୟ ଓ ବର୍ବର କାଣ୍ଡର ତାଲିକା । ଦୀର୍ଘ ୨ ମାସ ଧରି ଚାଲିଥିବା ଯୁଦ୍ଧ କେବେ ଥମିବ ତା ନାଁ ନେଉ ନଥିଲାବେଳେ ୟୁକ୍ରେନରେ ଧ୍ବସଂଲୀଳା ରଚିଚାଲିଛି ରୁଷିଆ । ଏହି ଯୁଦ୍ଧରେ ଅନେକ ସାଧାରଣ ଲୋକଙ୍କ ଜୀବନ ଯାଇଥିଲାବେଳେ ଅନେକ ଯୁବତୀ, ମହିଳା ଏବଂ ନାବାଳିକାଙ୍କୁ ବନ୍ଦୀ କରି ରଖିଛନ୍ତି ରୁଷୀୟ ସୈନ୍ୟ । କେବଳ ଏତିକି ନୁହେଁ ସେମାନଙ୍କ ମଧ୍ୟରୁ ଅନେକ ଗର୍ଭବତୀ ଥିବା ମଧ୍ୟ ଏବେ ଚିନ୍ତାର ବିଷୟ ପାଲଟିଛି ।
ସେଠାରେ ମହିଳାଙ୍କ ଭଳି ପୁରୁଷ ମଧ୍ୟ କମ୍ ଶୋଷଣର ଶିକାର ହେଉନାହାନ୍ତି । ରୁଷ ସୈନ୍ୟ ପୁରୁଷ ଏବଂ ବାଳକମାନଙ୍କୁ ମଧ୍ୟ ଯୌନ ନିର୍ଯାତନା ଦେଉଥିବା ଅଭିଯୋଗ କରିଛି ଜାତିସଂଘ । ରୁଷ ସୈନ୍ୟଙ୍କ ଏଭଳି ହିଂସାତ୍ମକ ଆଚରଣର ଖବର ସାମ୍ନାକୁ ଆସୁଥିବାରୁ ଏ ନେଇ ଅଭିଯୋଗ ଆଣିବା ବି ଆହ୍ବାନପୂର୍ଣ୍ଣ । ସେଠାରେ ଏଭଳି ନିର୍ଯାତନା ସହୁଥିବା ମହିଳା ଏବଂ ପୁରୁଷଙ୍କୁ ସୁରକ୍ଷିତ ସ୍ଥାନକୁ ନେବା ବେଶ ଜରୁରୀ ହୋଇପଡ଼ିଛି ।
ଏଠାରେ ଆମେ କହି ରଖିବାକୁ ଚାହୁଁଛୁ ଯେ, ଫେବୃଆରୀ ୨୪ରେ ମିଲିଟାରୀ ଅପରେସନ୍ ଆରମ୍ଭ କରିଥିବା ରୁଷକୁ ନିରାଶ ହେବାକୁ ପଡ଼ିଛି । ଦିନକୁ ଦିନ ବିଫଳତା ହାସଲ କରୁଥିବାରୁ ନିରାଶ ହୋଇ ସେମାନେ ଏଭଳି ଅମାନବୀୟ କାମ କରୁଛନ୍ତି ।
୨ ବର୍ଷ ପରେ ରଥଯାତ୍ରାରେ ସାମିଲ ହେବେ ଭକ୍ତ
ପୁରୀ: ଆସନ୍ତା ଜୁଲାଇ ୧ରେ ମହାପ୍ରଭୁ ଜଗନ୍ନାଥଙ୍କ ରଥଯାତ୍ରା । ରଥ ଯାତ୍ରାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ଆଜି ପ୍ରସ୍ତୁତି ବୈଠକ ବସିଥିଲା । ଏହି ବୈଠକ ଶେଷ ହେବା ପରେ ପ୍ରତିକ୍ରିୟା ରଖିଛନ୍ତି ପୁରୀ ଜିଲ୍ଲାପାଳ । ୨ ବର୍ଷ ପରେ ଘୋଷଯାତ୍ରାରେ ସାମିଲ ହେବେ ଭକ୍ତ । କୋଭିଡ ପରିସ୍ଥିତି ନଥିଲେ ବହୁ ପରିମାଣର ଭକ୍ତ ବଡ଼ଦାଣ୍ଡରେ ଭିଡ଼ କରିବେ । ଏନେଇ ବ୍ୟବସ୍ଥା କରାଯିବ ବୋଲି କହିଛନ୍ତି ଜିଲ୍ଲାପାଳ । ଅଧିକ ଭକ୍ତ ଆସିବାର ସମ୍ଭାବନା ଥିବାରୁ ସେହି ଅନୁସାରେ ବ୍ୟବସ୍ଥା କରାଯିବ ବୋଲି ବୈଠକ ପରେ ଜିଲ୍ଲାପାଳ କହିଛନ୍ତି । ଦୁଇଟି ପ୍ଲାନ କରାଯାଇଛି । କୋଭିଡ ପରିସ୍ଥିତି ଗମ୍ଭୀର ହେଲେ ବ୍ୟବସ୍ଥାରେ ପରିବର୍ତ୍ତନ କରାଯିବ । ସେଥିପାଇଁ ସମସ୍ତ ବିଭାଗ ନିଜ ଆକ୍ସନ ପ୍ଲାନ ପ୍ରାଦନ କରିଛନ୍ତି । ଆବଶ୍ୟକ ପଡିଲେ ୪/୫ ଦିନ ପରେ ପୁଣି ବସିପାରେ ବୈଠକ । ରଥଯାତ୍ରା ସମୟରେ ଆନୁଷଙ୍ଗିକ ସୁବିଧା ସୁଯୋଗ କିଭଳି ଭକ୍ତ ପାଇବେ ସେନେଇ ଆଲୋଚନା କରାଯାଇଛି ।
ଜାମ୍ମୁ ଓ କଶ୍ମୀର ସୀମାରେ ସନ୍ଦିଗ୍ଧ ସୁଡ଼ଙ୍ଗ
ଶ୍ରୀନଗର: ଜାମ୍ମୁ ଓ କଶ୍ମୀର ସୀମାରେ ସନ୍ଦିଗ୍ଧ ସୁଡ଼ଙ୍ଗ । ସାମ୍ବା ସେକ୍ଟରରେ ଏହି ସୁଡ଼ଙ୍ଗ ଠାବ ହେବା ପରେ ସୀମାରେ ସୁରକ୍ଷା କଡ଼ାକଡ଼ି କରାଯାଇଛି । ନିରାପତ୍ତା ରକ୍ଷୀଙ୍କ ଗୁଳିରେ ଜୈସ-ଏ-ମହମ୍ମଦ ସଂଗଠନର ଦୁଇ ଆତଙ୍କବାଦୀ ପ୍ରାଣ ହରାଇବାର ପ୍ରାୟ ୧୪ ଦିନ ପରେ ଏହି ସୁଡ଼ଙ୍ଗ ଠାବ ହୋଇଛି । ସୀମା ସୁରକ୍ଷା ବଳରେ ଡେପୁଟି ଇନସ୍ପପେକ୍ଟର ଜେନେରାଲ ଏସପିଏସ ସାନ୍ଧୁ କହିଛନ୍ତି ହାଇସିକ୍ୟୁରିଟି ଜୋନରେ ଏହି ସୁଡ଼ଙ୍ଗ ଠାବ ହୋଇଛି । ସୁଡ଼ଙ୍ଗ ସମ୍ପର୍କରେ ଖୋଳତାଡ଼ ଜାରି ରହିଛି ଏବଂ ଏହା କେଉଁ ପର୍ଯ୍ୟନ୍ତ ଲମ୍ବିଛି ତାହାର ସନ୍ଧାନ କାର୍ଯ୍ୟ ଜାରି ରହିଛି । ସୀମାନ୍ତରେ ଥିବା ଚକ୍ ଫକିରା ଚେକ୍ ପୋଷ୍ଟଠାରୁ ୩୦୦ ମିଟର ଦୂର ତଥା ଭାରତୀୟ ଗ୍ରାମଠାରୁ ମାତ୍ର ୭୦୦ ମିଟର ଦୂରରେ ଠାବ ହୋଇଛି ଏହି ସୁଡ଼ଙ୍ଗ । ଦୁଇ ଜଣ ଜୈସ ଆତଙ୍କବାଦୀ ଏନକାଉଣ୍ଟରରେ ପ୍ରାଣ ହରାଇବା ପରେ ଗତ ଏପ୍ରିଲ ୨୨ରେ ଜାମ୍ମୁର ସୁଞ୍ଜଓ୍ୱାନ ଇଲାକାରେ ବ୍ୟାପକ ସର୍ଚ୍ଚ ଅପରେସନ ଜାରି ରହିଥିଲା ।
ନାଇଟ୍ କ୍ଲବରେ ରାହୁଲ, ଆସିଲା ନେପାଳୀ କଣ୍ଠଶିଳ୍ପୀଙ୍କ ସହ ରାହୁଲଙ୍କ ଆଉ ଏକ ଫଟୋ
ନେପାଳ: ଫଟୋ ପାଇଁ ଚର୍ଚ୍ଚାର କଂଗ୍ରେସ ନେତା ରହୁଲ ଗାନ୍ଧି । ନେପାଳର ଏକ ନାଇଟ କ୍ଲବରେ ରାହୁଲଙ୍କ ଉପସ୍ଥିତିକୁ ନେଇ ଚର୍ଚ୍ଚା ଜୋର୍ ଧରିଥିଲାବେଳେ ଏବେ ଆଉ ଏକ ଫଟୋ ସାମ୍ନାକୁ ଆସିଛି । ଏଥର ରାହୁଲ ଗାନ୍ଧି ଜଣେ ନେପାଳୀ କଣ୍ଠଶିଲ୍ପୀଙ୍କ ସହ ଅଛନ୍ତି । କଣ୍ଠଶିଲ୍ପୀ ଜଣଙ୍କ ତାଙ୍କ ଟ୍ବିଟର ହ୍ୟାଣ୍ଡେଲରେ ଏହି ଫଟୋ ପୋଷ୍ଟ କରିଛନ୍ତି ।
Music has the power to bring all people together. I had an honor to sing few songs for Honorable member of Indian Parliament member Mr. Rahul Gandhi ji yesterday evening. I found him such humble & simple person.
Thanks to Sumnima ji, Nima Ji for this opportunity. pic.twitter.com/QbAZ9TEmLh— Saraswoti khatri (@saraswotikhtri) May 4, 2022
ଫଟୋ ପୋଷ୍ଟ କରି କଣ୍ଠଶିଲ୍ପୀ ସରସ୍ବତୀ ଖତ୍ରୀ ଲେଖିଛନ୍ତି ଯେ, ସମସ୍ତଙ୍କୁ ଏକାଠି ବାନ୍ଧି ରଖିବାର ଶକ୍ତି ସଙ୍ଗୀତରେ ରହିଛି । ଗତ ସନ୍ଧ୍ୟାରେ ମୁଁ ଭାରତ ସଂସଦର ସାଂସଦ ରାହୁଲ ଗାନ୍ଧିଙ୍କ ସହ ଗୀତ ଗାଇବାର ସୁଯୋଗ ପାଇଲି । ସେ ବହୁତ ଭଲ ଏବଂ ସରଳ ବ୍ୟକ୍ତତ୍ବ ।
ଏଠାରେ ଆମେ କହି ରଖିବାକୁ ଚାହୁଁଛୁ ଯେ, ରାହୁଲ ଗାନ୍ଧୀଙ୍କ ନେପାଳ ଗସ୍ତକୁ ନେଇ ବିଜେପି ଓ କଂଗ୍ରେସ ମୁହାଁମୁହିଁ ହୋଇଥିଲେ । ନାଇଟ୍ କ୍ଲବରେ ରାହୁଲଙ୍କ ଫଟୋ ଭାଇରାଲ୍ ହେବା ନେଇ କଂଗ୍ରେସକୁ ଟାର୍ଗେଟ୍ କରିଥିଲା ବିଜେପି । ସେପଟେ କଂଗ୍ରେସ ମଧ୍ୟ କିଛି ବିଜେପି ନେତାଙ୍କ ସମାନ ଫଟୋ ଶେଆର୍ କରି ବିଜେପିକୁ କାଉଣ୍ଟର କରିଥିଲା ।
ସୁରଙ୍କ ବିରୋଧରେ ଶୀତଳ ଷଡଯନ୍ତ୍ର
ଭୁବନେଶ୍ୱର: ବଦଳିବ ଚିତ୍ର, ବଦଳିବେ ନେତା । ରାଜ୍ୟ ପିସିସି ଦେଖିବେ ନୂଆ ସଭାପତି । ବଦଳିବେ କଂଗ୍ରେସ ବିଧାୟକ ଦଳ ନେତା । ରାଜ୍ୟ କଂଗ୍ରେସର ହେବ ନବକଳେବର । କିଛିଦିନ ପୂର୍ବରୁ ବିଧାୟକ ଦଳ ନେତା ନରସିଂହ ମିଶ୍ର ଏବଂ ମୁଖ୍ୟ ସଚେତକ ତାରା ପ୍ରସାଦ ବାହିନୀପତି ଇସ୍ତଫା ଦେଇଥିବା କୁହାଯାଉଛି । ତାରା ଇସ୍ତଫା ଦେଇଥିବା ନେଇ ହଁ ମାରିଥିବାବେଳେ ନରସିଂହ ଧରିଛନ୍ତ ମୌନବ୍ରତ । ତେବେ କଂଗ୍ରେସ ରାଜନୀତିରେ ଆଉ ଏକ ଗୋଟି ଚାଳନା ଦଳରେ ଏବେ ପାଲଟିଛି ବଡ଼ ଖବର ।
କଂଗ୍ରେସର ଭିତର ମହଲ କହୁଛି, ବିଧାୟକ ଦଳ ନେତା ପଦରୁ ନରସିଂହ ମିଶ୍ର ଇସ୍ତଫା ଦେବା ପରେ ବରିଷ୍ଠତା ଦୃଷ୍ଟିରୁ ସୁରେଶ କୁମାର ରାଉତରାୟଙ୍କୁ କାଳେ ହାଇକମାଣ୍ଡ ବିଧାୟକ ଦଳ ନେତା ଘୋଷଣା କରିଦେବେ । ଏହାକୁ ଦୃଷ୍ଟିରେ ରଖି ଉଦ୍ଦେଶ୍ୟ ପ୍ରଣୋଦିତ ଭାବେ ତାଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି । ଏହି ଅସ୍ତ୍ର ମାଧ୍ୟମରେ ସୁରଙ୍କୁ କଂଗ୍ରେସ ବିଧାୟକ ଦଳ ନେତା ପଦରୁ ଦୂରେଇ ରଖିବାକୁ ହୋଇଛି ବିଧିବଦ୍ଧ ଷଡ଼ଯନ୍ତ୍ର ବୋଲି ଜନୈକ କଂଗ୍ରେସ ନେତା ନାମ ଗୋପନ ରଖିବା ସର୍ତ୍ତରେ କହିଛନ୍ତି । କୌଣସି ବିଶୃଙ୍ଖଳା ହେଲେ ଶୃଙ୍ଖଳା କମିଟି ବୈଠକ ଡକାଇ କାରଣ ଦର୍ଶାଅ ନୋଟିସ୍ ଜାରି କରିବା କଥା । ମାତ୍ର ସିଧାସଳଖ ପିସିସି ସଭାପତିଙ୍କ ଦ୍ବାରା ନୋଟିସ୍ କରାଯିବା ପରମ୍ପରା ନୁହେଁ ।
ସୁର ରାଉତରାୟଙ୍କୁ କାରଣ ଦର୍ଶାଅ ନୋଟିସ୍ ପଠାଇବାର ପରଦିନ ପିସିସି ସଭାପତି ନିରଞ୍ଜନ ପଟ୍ଟନାୟକ ଏକ ମନ୍ତବ୍ୟରେ କହିଥିଲେ, ସୁର ବାବୁ ଜଣେ ବରିଷ୍ଠ ନେତା ଓ ବିଧାୟକ । ସେ ଜଣେ ଏଆଇସିସି ମେମ୍ବର ମଧ୍ୟ । ତେଣୁ ଏପରି ମନ୍ତବ୍ୟ ଦେବା ଠିକ୍ ନାହିଁ । ସେ କାରଣ ଦର୍ଶାଅ ନୋଟିସର ଉତ୍ତର ରଖନ୍ତୁ, ତାଙ୍କର ବିଚାର ଏଆଇସିସି କରିବ । ରାତିଅଧିଆ ନୋଟିସ୍ ସହ ନିରଞ୍ଜନଙ୍କ ଏହି ମନ୍ତବ୍ୟ କ’ଣ ସୁରଙ୍କ ବିରୋଧରେ ଏକ ଶୀତଳ ଷଡ଼ଯନ୍ତ୍ର । ଏଆଇସିସି ଯଦି ସୁର ରାଉତରାୟଙ୍କ ନାଁ ବିଚାର କରିବ, ତେବେ ଏହି କାରଣ ଦର୍ଶାଅ ନୋଟିସର ଦ୍ୱାହି ଦେଇ ତାଙ୍କ ନିଯୁକ୍ତି ଉପରେ ରୋକ୍ ଲଗାଯାଇ ପାରିବ ବୋଲି ସେ କହିଛନ୍ତି ।
ମହଙ୍ଗା ପଡ଼ିଲା ଗୋରୁ ଗାଡ଼ିରୁ ଚାନ୍ଦା ଆଦାୟ, ଚାକିରିରୁ ନିଲମ୍ବିତ ହେଲେ ୩ ପୋଲିସ କର୍ମଚାରୀ
ମୟୂରଭଞ୍ଜ: ମହଙ୍ଗା ପଡ଼ିଲା ଗୋରୁ ଗାଡ଼ିରୁ ଚାନ୍ଦା ଆଦାୟ । ଗୋରୁ ଗାଡ଼ିରୁ ଚାନ୍ଦା ଆଦାୟ ଘଟଣାରେ ଦୁଇ ଜଣ ଏଏସଆଇ ଓ ଜଣେ କନେଷ୍ଟବଳ ଚାକିରିରୁ ନିଲମ୍ବିତ ହୋଇଛନ୍ତି । ଏହି ତିନି ଜଣ ପୋଲିସ କର୍ମଚାରୀ ଝାରପୋଖରିଆ ଥାନାରେ କାର୍ଯ୍ୟରତ ଥିଲେ । ମୟୂରଭଞ୍ଜ ଏସପି ସେମାନଙ୍କୁ ନିଲମ୍ବିତ କରିଛନ୍ତି । ଗୋରୁ ଗାଡିରୁ ଚାନ୍ଦା ଆଦାୟ ସମ୍ପର୍କିତ ଏକ ଅଡିଓ ଭାଇରାଲ ସମ୍ପର୍କରେ ସୂଚନା ପାଇ ଏସପି ଋଷିକେଶ ଡି ଖିଲାଡ଼ି ନିଲମ୍ବନ ଆଦେଶ ଦେଇଥିଲେ । ନିଲମ୍ବିତ କର୍ମଚାରୀ ମାନେ ହେଲେ ଏଏସଆଇ ସ୍ମୃତି ରଞ୍ଜନ ସ୍ୱାଇଁ, ଚନ୍ଦନ କୁମାର ସିଂ ଏବଂ କନଷ୍ଟେବଳ ଦୀପକ କୁମାର ପାଲ ।
ଭାରତ ପ୍ରଧାନମନ୍ତ୍ରୀ ଓ ଫ୍ରାନ୍ସ ରାଷ୍ଟ୍ରପତି ମାକ୍ରନଙ୍କ ମିଳିତ ବିବୃତି, କହିଲେ ଋଷ-ୟୁକ୍ରେନ ସଂଘର୍ଷର ତୁରନ୍ତ ଘଟୁ ଅନ୍ତ
ପ୍ୟାରିସ: ଋଷ-ୟୁକ୍ରେନ ସଂଘର୍ଷର ତୁରନ୍ତ ଅବସାନ ହେଉ ଏବଂ ମାନବିକ ଦୁର୍ଦ୍ଦଶାର ଅନ୍ତ ଘଟୁ ବୋଲି ଆହ୍ବାନ ଦେଇଛନ୍ତି ଭାରତ ଓ ଫ୍ରାନ୍ସ । ଏନେଇ ପ୍ୟାରିସରେ ଭାରତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଫ୍ରାନ୍ସ ରାଷ୍ଟ୍ରପତି ଏମାନୁଏଲ ମାକ୍ରନଙ୍କ ମଧ୍ୟରେ ଏକ ମିଳିତ ବିବୃତି ଜାରି ହୋଇଛି । ଯୁଦ୍ଧ ଯୋଗୁ ଦୁର୍ଦ୍ଦଶା ଚରମ ସୀମାରେ ପହଞ୍ଚିଛି ଏବଂ ବିଶ୍ବରେ ଖାଦ୍ୟାଭାବ ଚରମ ରୂପ ନେଲାଣି ବୋଲି ବିବ଼ୃତିରେ ପ୍ରକାଶିତ ହୋଇଛି ।
ସେପଟେ ୟୁକ୍ରେନରେ ଋଷ ସୈନ୍ୟ ଥିବା ପର୍ଯ୍ୟନ୍ତ ମସ୍କୋ ସହ କୌଣସି ପ୍ରକାର ଚୁକ୍ତି ହେବ ନାହିଁ । ୟୁକ୍ରେନ ମାଟିରୁ ଋଷ ସୈନ୍ୟଙ୍କୁ ହଟାଇବା ଲାଗି ୟୁକ୍ରେନ ସୈନ୍ୟ ସଂଘର୍ଷ କରିବେ ଏବଂ ଦେଶର ସୀମାଗତ ସାର୍ବଭୌମତ୍ୱ ରକ୍ଷା ଲାଗି ୟୁକ୍ରେନ ଉଦ୍ୟମ କରିବ ବୋଲି କହିଛନ୍ତି ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି । ୟୁକ୍ରେନରେ ଋଷ ସୈନ୍ୟ ଥିବା ଯାଏ ସେ ଅସ୍ତ୍ରବିରତି ପ୍ରସ୍ତାବକୁ ଗ୍ରହଣ କରିବେ ନାହିଁ ବୋଲି କହିଛନ୍ତି । ସେପଟେ ଋଷ-ୟୁକ୍ରେନ ଯୁଦ୍ଧ ପ୍ରସଙ୍ଗକୁ ନେଇ ନାଟୋ ଉପରେ ଦୋଷ ଢ଼ାଳିଛନ୍ତି ପୋପ୍ ଫ୍ରାନସିସ । ଋଷ ପ୍ରତି ନାଟୋର ବୈମାତୃକ ମନୋଭାବ ହିଁ ଯୁଦ୍ଧର କାରଣ ସାଜିଲା ବୋଲି ସେ କହିଛନ୍ତି ।
ଅନ୍ୟପଟେ ଯୁଦ୍ଧର ଅବସ୍ଥା ଦିନକୁ ଦିନ ଘନୀଭୂତ ହେଉଥିବା ବେଳେ, ପୁଣି ମାରିୟୁପୋଲ ଆଜଭୋସ୍ତଲ ଷ୍ଟିଲ ପ୍ଲାଣ୍ଟରେ ଆରମ୍ଭ ହୋଇଛି ସଂଘର୍ଷ । ୧୦୦ ବିପନ୍ନଙ୍କୁ ଉଦ୍ଧାର ପରେ ପୁଣି ଦୁଇ ପକ୍ଷ ସୈନ୍ୟଙ୍କ ମଧ୍ୟରେ ସଂଘର୍ଷ ଯୋଗୁ ଉଦ୍ଧାର ପ୍ରକ୍ରିୟା ଠପ୍ ହୋଇଛି । ତୁରନ୍ତ ଉଦ୍ଧାର ପ୍ରକ୍ରିୟାରେ ହସ୍ତକ୍ଷେପ କରିବା ଲାଗି ଜାତିସଂଘକୁ ଅନୁରୋଧ କରିଛନ୍ତି ଜେଲେନସ୍କି । ମହାସଚିବ ଆଣ୍ଟୋନିଓ ଗୁଟେରସଙ୍କୁ ସେ ମାନବିକ ସଂକଟ ସମ୍ପର୍କରେ ଅବଗତ କରାଇବା ସହ ଫସିଥିବା ଲୋକଙ୍କୁ ଉଦ୍ଧାର ପାଇଁ ଆହ୍ବାନ ଜଣାଇଛନ୍ତି । ସେହିପରି ୟୁକ୍ରେନର ଅଣସାମରିକ କ୍ଷେତ୍ର ଉପରେ ଋଷ ଆକ୍ରମଣ କରୁଥିବା ନେଇ ଅଭିଯୋଗ କରିଛି ବ୍ରିଟେନ । ବିଭିନ୍ନ ଜନବସତି ଉପରେ ଋଷ କ୍ଷେପଣାସ୍ତ୍ର ମାଡ଼ କରୁଥିବାରୁ ମୃତାହତଙ୍କ ସଂଖ୍ୟା ବଢ଼ିବାରେ ଲାଗିଛି ବୋଲି କହିଛି ବ୍ରିଟେନ ପ୍ରତିରକ୍ଷା ମନ୍ତ୍ରାଳୟ ।
ସରିଲା ରମଜାନ୍, ଲିକ୍ ହେବାକୁ ଯାଉଛି ଇମ୍ରାନଙ୍କ ଆପତ୍ତିଜନକ ଭିଡିଓ
ଲାହୋର୍: ଲିକ୍ ହେବାକୁ ଯାଉଛି ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଭିଡିଓ । ଗୋଟିଏ କି ଦୁଇଟି ନୁହେଁ ଏକାଥର ଲିକ୍ ହେବ ୭ଟି ଭିଡିଓ । ସେଥିମଧରୁ ୩ଟି ଭିଡିଓ ଆପତ୍ତିଜନକ ଥିବା ମଧ୍ୟ ସୂଚନା ମିଳିଛି । ଇମ୍ରାନଙ୍କ ପାର୍ଟି ପାକିସ୍ତାନ ତେହେରିକ-ଇ-ଇନସାଫ (ପିଟିଆଇ) ର ସୋସିଆଲ ମିଡିଆ ୱିଙ୍ଗ ଭିଡିଓ ଆସିବା ପୂର୍ବରୁ କ୍ଷତି ନିୟନ୍ତ୍ରଣରେ ନିୟୋଜିତ ହୋଇସାରିଛନ୍ତି।
ଗତ ସପ୍ତାହରେ ଇମ୍ରାନ ନିଜେ କହିଥିଲେ ଯେ, ଇଦ୍ ପରେ ତାଙ୍କ ଚରିତ୍ରକୁ ସଂହାର କରିବା ପାଇଁ ଚେଷ୍ଟା କରାଯାଇପାରେ।
ଅନେକ ପାକିସ୍ତାନୀ ସାମ୍ବାଦିକ ସ୍ପଷ୍ଟ କରିଛନ୍ତି ଯେ, ଇମ୍ରାନଙ୍କ କିଛି ଆପତ୍ତିଜନକ ଭିଡିଓ ଯେ କୌଣସି ସମୟରେ ଲିକ୍ ହୋଇପାରେ। ବରିଷ୍ଠ ସାମ୍ବାଦିକ ଜାଫର ଅବ୍ବାସ ନକଭି କହିଛନ୍ତି ଯେ, ଭିଡିଓ ଗୁଡିକ ରିଲିଜ୍ ହେବାକୁ ପ୍ରସ୍ତୁତ ହୋଇସାରିଛି ଏବଂ ଇମ୍ରାନ ଖାନ ନିଜେ ଏହା ଜାଣିଛନ୍ତି। ତାଙ୍କର ସୋସିଆଲ ମିଡିଆ ଟିମ୍ ‘ପ୍ରି ଡ୍ୟାମେଜ କଣ୍ଟ୍ରୋଲ’ କରିବା ପାଇଁ ସଜାଗ ଅଛନ୍ତି ।
ସୂଚନା ଅନୁସାରେ, ମୋଟ ୭ ରୁ ୮ ଟି ଭିଡିଓ ରହିଛି । ସେ୍ଥିରେ ଦୁଇଟି ଅଡିଓ ଟେପ୍ ମଧ୍ୟ ଅଛି | ଇମ୍ରାନ ସରକାରଙ୍କ ପତନ ପରେ ତୁରନ୍ତ ଏଗୁଡିକ ଜାରି କରାଯାଇଥାନ୍ତା, କିନ୍ତୁ ସେତେବେଳେ ରମଜାନ ମାସ ଚାଲିଥିଲା। ଏବେ ରମଜାନ ମାସ ସରିବାରୁ ଯେ, କୌଣସି ସମୟରେ ଏହା ଲିକ୍ ହୋଇପାରେ ।
କିଛି ଭିଡିଓ ଇମ୍ରାନଙ୍କ ବିଳାସପୂର୍ଣ୍ଣ ବାସଭବନରେ ସୁଟ୍ କରାଯାଇଛି। ଏହି ଭିଡିଓର ସମୟ ସୀମା ହେଉଛି ୨ ମିନିଟ୍ ୧୮ ସେକେଣ୍ଡ ଏଠାରେ ଏକ ବିଶେଷ କଥା ହେଉଛି ଇମ୍ରାନ ଏବଂ ତାଙ୍କ ପାର୍ଟି PTI ଭିଡିଓଗୁଡ଼ିକୁ ନକଲି ବୋଲି କହିପାରିବେ ନାହିଁ, ତେଣୁ ଏହାକୁ ରିଲିଜ କରିବା ପୂର୍ବରୁ ଫୋରେନସିକ୍ ଅଡିଟ୍ କରାଯାଇଛି ।
ଏହି ଭିଡିଓ ଗୁଡିକ ପାକିସ୍ତାନରେ ଆଲୋଡ଼ନ ସୃଷ୍ଟି କରିବାକୁ ଯାଉଛି। ଭିଡିଓରେ ଆପତ୍ତିଜନକ ବିଷୟ ଥିବାରୁ ଏହାକୁ ସର୍ବସାଧାରଣରେ ପ୍ରକାଶ କରିବା ସମ୍ଭବ କି ନୁହେଁ ତାହା ପରେ ଜଣାପଡ଼ିବ ।
ଇମ୍ରାନ ଖାନ ଇସଲାମାବାଦଠାରୁ ପ୍ରାୟ ୧୫ କିଲୋମିଟର ଦୂରରେ ଥିବା ବାନିଗାଲାରେ ରୁହନ୍ତି। ପାକିସ୍ତାନର ସମସ୍ତେ ଜାଣନ୍ତି ଯେ, ଇମ୍ରାନ ପ୍ରତ୍ୟେକ ଦିନ ହେଲିକପ୍ଟର ଯୋଗେ ତାଙ୍କ ଘର ବାନିଗାଲା ଠାରୁ ଅଫିସକୁ ଯାଉଥିଲେ। ବାନିଗାଲାରେ ଇମ୍ରାନଙ୍କର ଏକ ବିଳାସପୂର୍ଣ୍ଣ ବାସଭବନ ଅଛି ଏବଂ ଏହା ପାହାଡ଼ିଆ ଅଞ୍ଚଳରେ । ଏହା ଏକର ଏକର ଜମିରେ ଥିବା କୁହାଯାଉଛି । ସେଠାରେ ଗଲ୍ଫ ଠାରୁ ଆରମ୍ଭ କରି ସୁଇମିଂ ପୁଲ ଏବଂ ସମସ୍ତ ପ୍ରକାରର ସୁବିଧା ମଧ୍ୟ ରହିଛି ।
ଏକ ମିଡିଆ ରିପୋର୍ଟ ଅନୁସାରେ, ଇମ୍ରାନଙ୍କ ଦ୍ୱାରା ପ୍ରସ୍ତୁତ ଭିଡିଓ ମଧ୍ୟରୁ ୩ ଟି ତାଙ୍କ ବାନିଗାଲା ଘରେ ତିଆରି ହୋଇଛି ।
ସମ୍ଭାବ୍ୟ ବାତ୍ୟାକୁ ନେଇ ଆଜି ବିଭିନ୍ନ ଜିଲ୍ଲାର ଜିଲ୍ଲାପାଳଙ୍କ ସହ ସମୀକ୍ଷା କରିବେ ଏସଆରସି
ଭୁବନେଶ୍ୱର: ସମ୍ଭାବ୍ୟ ବାତ୍ୟାକୁ ନେଇ ରାଜ୍ୟ ସରକାରଙ୍କ ପ୍ରସ୍ତୁତି ବୈଠକ । ଦିନ ୧୨ଟାରେ ଏସଆରସିଙ୍କ ପକ୍ଷରୁ ବସିବ ବୈଠକ । ପ୍ରଭାବିତ ହେବାକୁ ଥିବା ଜିଲ୍ଲାପାଳଙ୍କ ସହ କଥା ହେବେ ସ୍ୱତନ୍ତ୍ର ରିଲିଫ କମିଶନର । ୧୮ ଜିଲ୍ଲାକୁ ସତର୍କ ରହିବାକୁ କୁହାଯାଇଛି । ଗଞ୍ଜାମ, ଗଜପତି, ପୁରୀ, ଖୋର୍ଦ୍ଧା, ଜଗତସିଂହପୁର, କେନ୍ଦ୍ରାପଡା, ଯାଜପୁର, ଭଦ୍ରକ, ବାଲେଶ୍ବର, ନୟାଗଡ଼, କଟକ, ମୟୂରଭଞ୍ଜ, କେନ୍ଦୁଝର, ଢେଙ୍କାନାଳ, ମାଲକାନଗିରି, କୋରାପୁଟ , ରାୟଗଡ଼ା ଓ କନ୍ଧମାଳ ଜିଲ୍ଲାପାଳଙ୍କୁ ସମ୍ଭାବ୍ୟ ବାତ୍ୟାକୁ ନେଇ ସତର୍କ କରାଯାଇଛି । ଜିଲ୍ଲା ଜରୁରିକାଳୀନ ଅପରେସନ ସେଣ୍ଟର ଓ କଣ୍ଟ୍ରୋଲ ରୁମ୍ ପ୍ରସ୍ତୁତ ରଖିବାକୁ ନିର୍ଦ୍ଦେଶ ଦିଆଯାଇଛି ।
ସେହିପରି ତଳିଆ ଅଞ୍ଚଳ ଲୋକଙ୍କୁ ସ୍ଥାନାନ୍ତର ସହ ସୁରକ୍ଷିତ ଆଶ୍ରୟସ୍ଥଳୀରେ ରଖିବାକୁ ପ୍ରାଧାନ୍ୟ ଦିଆଯିବ । ସବୁ ସ୍ଥାୟୀ ଓ ଅସ୍ଥାୟୀ ଆଶ୍ରୟସ୍ଥଳୀ ଚିହ୍ନଟ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି । ପ୍ରତ୍ୟେକ ଆଶ୍ରୟସ୍ଥଳୀରେ ୨ ଜଣ ପୁରୁଷ ଓ ଜଣେ ମହିଳା ଦାୟିତ୍ୱରେ ରହିବେ । ସେମାନେ ଆଶାକର୍ମୀ ବା ଶିକ୍ଷୟିତ୍ରୀ, କନଷ୍ଟେବଳ ବା ହୋମଗାର୍ଡ ହୋଇଥିବେ । ଆସନ୍ତାକାଲି ସୁଦ୍ଧା ଏହାକୁ ପ୍ରସ୍ତୁତ ହେବା ଦରକାର ବୋଲି ଗାଇଡଲାଇନ ଜାରି ହୋଇଛି । ପକ୍କା ସ୍କୁଲ ଘର ମଧ୍ୟ ବାତ୍ୟା ଆଶ୍ରୟସ୍ଥଳୀ ଭାବେ ବ୍ୟବହାର ହୋଇପାରିବ । ସବୁ ବାତ୍ୟା ଆଶ୍ରୟସ୍ଥଳୀ ସ୍ଥାନୀୟ ବିଡିଓ କିମ୍ବା ତହସିଲଦାରଙ୍କ ଦ୍ବାରା ଯାଞ୍ଚ ହେବ । ପାଣି, ଶୌଚାଳୟ, ଜେନେରେଟର, ଲାଇଟ୍ ମହଜୁଦ ଅଛି କି ନାହିଁ ତା’ର ତଦାରଖ କରିବେ ।