ଇସଲାମାବାଦ: ପାକିସ୍ତାନରେ କ୍ଷମତା ପରିବର୍ତ୍ତନ ନେଇ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଓ ସେନା ମୁଖ୍ୟ ବାଜଓ୍ୱାଙ୍କ ମଧ୍ୟରେ ଜୋରଦାର ଝଗଡ଼ା ହୋଇଛି । ଶନିବାର ଅନାସ୍ଥା ଭୋଟରେ ପରାଜିତ ହେବା ପରେ ସେନାମୁଖ୍ୟଙ୍କ ସହ ଇମ୍ରାନ ଖାନ୍ଙ୍କ ବଡ଼ ଧରଣର ଝଗଡ଼ା ହୋଇଥିଲା । କ୍ଷମତା ପରିବର୍ତ୍ତନ ଷଡ଼ଯନ୍ତ୍ରରେ ବାଜଓ୍ୱା ସାମିଲ ଥିବା ନେଇ ଇମ୍ରାନ୍ ଅଭିଯୋଗ କରିଥିଲେ । ଉଭୟଙ୍କ ମଧ୍ୟରେ ତିକ୍ତତା ଏତେ ବଢ଼ିଯାଇଥିଲା ଯେ, ବାଜଓ୍ୱା ଇମ୍ରାନ୍ଙ୍କୁ ଚାପୁଡ଼ା ମାରିଥିଲେ । ଏଭଳି କିଛି ଚର୍ଚ୍ଚା ଏବେ ପାକିସ୍ତାନ ସୋସିଆଲ ମିଡିଆରେ ଜୋରସୋରେ ଚାଲିଛି ।
ଅଲ୍ଲୀ ନାମକ ଜଣେ ଟ୍ୱିଟର ୟୁଜର ଟ୍ୱିଟ୍ କରି ଲେଖିଛନ୍ତି ଯେ, ରାତି ୧୦ଟା ସମୟରେ ପ୍ରଧାନମନ୍ତ୍ରୀଙ୍କ ବାସଭବନରେ ଏକ ହେଲିକପ୍ଟର ଓହ୍ଲାଇଥିଲା । ପ୍ରଧାନମନ୍ତ୍ରୀ କାର୍ଯ୍ୟାଳୟ ସୁରକ୍ଷା କର୍ମୀ ସାଥିରେ ଥିବା ସ୍ପିକରଙ୍କୁୁ ଅଟକାଇଥିଲେ । କିନ୍ତୁ ବାଜଓ୍ୱା ଭିତରକୁ ଯାଇଥିଲେ ଏବଂ ଉୟଙ୍କ ମଧ୍ୟରେ ଆଲୋଚନା ଆରମ୍ଭ ହୋଇଥିଲା । କିନ୍ତୁ ଏହାର ଅନ୍ତ ଅତି ଖରାପ ହୋଇଥିଲା ।
ସେହିଭଳି ଅନ୍ୟଜଣେ ଟ୍ୱିଟର ବ୍ୟବହାରକାରୀ ମାରିଅମ୍ ଲେଖିଛନ୍ତି ଯେ, ସେ ଖାନ୍ଙ୍କୁ ଚାପୁଡ଼ ମରାଯାଇଥିବା ଶୁଣିଛନ୍ତି । ଏହା କ’ଣ ସତ ବୋଲି ସେ ପ୍ରଶ୍ନ କରିଛନ୍ତି ।
.
ଅନ୍ୟ ଜଣେ ଟ୍ୱିଟର ବ୍ୟବହାରକାରୀ ଲେଖିଛନ୍ତି ସେ କ୍ଷମତା ଛାଡ଼ିନଥିଲେ , ତାଙ୍କୁ ଶାସନ ଗାଦି ଛାଡ଼ିବାକୁ ବାଧ୍ୟ କରାଯାଇଥିଲା । ବାଜଓ୍ୱା ଏବଂ ଡିଜିଆଏସଆଇ ହେଲିକପ୍ଟରରେ ଆସି ପ୍ରଧାନମନ୍ତ୍ରୀଙ୍କ ବାସଭବନ ଭିତରକୁ ପ୍ରବେଶ କରିଥିଲେ । ଏବଂ ପ୍ରଧାନମନ୍ତ୍ରୀଙ୍କ ସହ ଦୁର୍ବ୍ୟବହାର କରିଥିଲେ ।
ସୂଚନା ଯୋଗ୍ୟ ଯେ, ବିରୋଧୀଙ୍କ ବାଉନସରରେ କ୍ଲିନ ବୋଲ୍ଡ ହୋଇଛନ୍ତି ଇମ୍ରାନ । ଶେଷ ହୋଇଛି ଇମ୍ରାନ ଖାନ୍ ସରକାରଙ୍କ ସାଢେ ତିନି ବର୍ଷର ଇନିଂସ । ହାଇଡ୍ରାମା ମଧ୍ୟରେ ମଧ୍ୟରାତିରେ ସଂସଦରେ ଇମ୍ରାନ ସରକାର ବିରୋଧରେ ଗୃହୀତ ହୋଇଥିଲା ଅନାସ୍ଥା ଭୋଟ୍ । ପ୍ରସ୍ତାବ ସପକ୍ଷରେ ୧୭୪ ଭୋଟ୍ ପଡିଥିବା ବେଳେ ଇମ୍ରାନଙ୍କ ଦଳର ସାଂସଦ ଅନୁପସ୍ଥିତ ରହିଥିଲେ । ଅନାସ୍ଥା ଭୋଟ୍ ପୂର୍ବରୁ ବାଚସ୍ପତି ଆସଦ କାଇଜର ଇସ୍ତଫା ଦେଇଥିଲେ । ଉପବାଚସ୍ପତି କାସିମ ସୁରି ବି ଦେଇଥିଲେ ଇସ୍ତଫା । ଅସ୍ଥାୟୀ ବାଚସ୍ପତିଙ୍କ ଜରିଆରେ ହୋଇଥିଲା ଭୋଟିଂ । ପାକିସ୍ତାନ ଇତିହାସରେ ପ୍ରଥମ ଥର ପାଇଁ କୌଣସି ପ୍ରଧାନମନ୍ତ୍ରୀଙ୍କ ବିରୋଧରେ ଅନାସ୍ଥା ପ୍ରସ୍ତାବ ସଫଳ ରହିଛି ।
