କଟକ: ଅନୁଭବ-ବର୍ଷା ପରିବାରିକ ବିବାଦ ମାମଲାରେ ଅନୁଭବଙ୍କୁ ଝଟକା । ଅନୁଭବଙ୍କୁ ଜିଲ୍ଲା ଦୌରାଜଜଙ୍କ ଝଟକା । ବର୍ଷାଙ୍କୁ ଅନୁଭବଙ୍କ ଘର ଛାଡ଼ି ଅନ୍ୟତ୍ର ରହିବା ନିର୍ଦ୍ଦେଶ ଉପରେ ରୋକ । SDJMଙ୍କ ନିର୍ଦ୍ଦେଶ ଉପରେ କଟକ ଜିଲ୍ଲା ଦୌରାଜଜଙ୍କ ଅନ୍ତରୀଣ ରୋକ୍ । ଅନୁଭବ ମହାନ୍ତିଙ୍କ ଘର ଛାଡ଼ି ଅନ୍ୟତ୍ର ରହିବାକୁ ନିର୍ଦ୍ଦେଶ ଦେଇଥିଲେ SDJM କୋର୍ଟ । ଘର ଭଡ଼ା ବାବଦକୁ ଅନୁଭବ ୩୦ ହଜାର ଟଙ୍କା ଦେବାକୁ କହିଥିଲେ କୋର୍ଟ । ତେବେ SDJM କୋର୍ଟଙ୍କ ନିର୍ଦ୍ଦେଶ ଉପରେ ରୋକ୍ ଲଗାଇଛନ୍ତି କଟକ ଜିଲ୍ଲା ଦୌରାଜଜ । ଏହି ମାମଲାରେ ପରବର୍ତ୍ତି ଶୁଣାଣି ଜୁଲାଇ ୪ ତାରିଖରେ ହେବ ।
ପାଣିପାଗ ବିଭାଗର ଅନୁମାନ, ଆସନ୍ତା ୨୭ ତାରିଖ ପରେ ରାଜ୍ୟରୁ ଗାଏବ ହୋଇଯିବ ବର୍ଷା
ଭୁବନେଶ୍ୱର: ଆସନ୍ତା ୨୭ ତାରିଖ ପରେ ରାଜ୍ୟରୁ ଗାଏବ ହୋଇଯିବ ବର୍ଷା । ଆରବ ସାଗରରୁ ଓଡ଼ିଶାକୁ ଆସୁଥିବା ଜଳୀୟବାଷ୍ପ ପୂର୍ଣ୍ଣ ବାୟୁ ଶକ୍ତ ନ ହେବାରୁ ରାଜ୍ୟରେ ଏଭଳି ସ୍ଥିତି ସୃଷ୍ଟି ହେବାକୁ ଯାଉଛି । କାରଣ କେରଳ ଛୁଇଁବା ପରେ ମୌସୁମୀ ଦୁର୍ବଳ ହୋଇଥିଲା । ଜୁନ୍ ୧୬ ତାରିଖରେ ଦକ୍ଷିଣ ଓଡ଼ିଶାକୁ ମୌସୁମୀ ଛୁଇଁବା ପରେ ୪ ଦିନ ପର୍ଯ୍ୟନ୍ତ ଆଗକୁ ବଢିପାରି ନଥିଲା । ଗତକାଲି ସଂପୂର୍ଣ୍ଣ ଓଡ଼ିଶାକୁ ମୌସୁମୀ ବାୟୁ ପ୍ରବେଶ କରିଥିବା ବେଳେ ଅଧିକାଂଶ ଜିଲ୍ଲାରେ ସାମାନ୍ୟରୁ ମଧ୍ୟମ ଧରଣର ବର୍ଷା ରେକର୍ଡ କରାଯାଇଥିଲା ।
କିନ୍ତୁ ଆଜି ସକାଳୁ ଆକାଶରୁ ଗାଏବ ହୋଇଯାଇଥିଲା ବାଦଲ । ଅଧିକାଂଶ ଜିଲ୍ଲାରେ ପାଗ ମୁଖ୍ୟତଃ ଶୁଖିଲା ରହିଥିବା ବେଳେ କେବଳ ଦକ୍ଷିଣ ଓଡ଼ିଶାର କୋରାପୁଟ, ମାଲକାନଗିରି, ରାୟଗଡ଼ା ଏବଂ ନବରଙ୍ଗପୁରରେ ବର୍ଷା ହୋଇଛି । ତେବେ ସନ୍ଧ୍ୟା ସମୟରେ ବାୟୁମଣ୍ଡଳରେ ଥିବା ଜଳୀୟବାଷ୍ପ ପୂର୍ଣ୍ଣ ବାୟୁ ବାଷ୍ପିଭୂତ ହୋଇ ଘଡ଼ଘଡ଼ି ବିଜୁଳି ସହ ବର୍ଷା ହେବାର ସମ୍ଭାବନା ରହିଛି । ଆସନ୍ତା ୨୪ ତାରିଖରେ ବଙ୍ଗୋପସାଗରରେ ଏକ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ଥିବାରୁ ୨୪ରୁ ୨୭ ତାରିଖ ପର୍ଯ୍ୟନ୍ତ ବର୍ଷାର ପରିମାଣ ଏବଂ ବିସ୍ତୃତି ବଢ଼ିବ । ପରେ ମୌସୁମୀ ଦୁର୍ବଳ ହେବା ସହ ବର୍ଷା ଗାଏବ ହୋଇଯିବ ବୋଲି କହିଛନ୍ତି ପାଣିପାଗ ବିଶେଷଜ୍ଞ ଶରତ ସାହୁ ।
ଦକ୍ଷିଣ ପଶ୍ଚିମ ମୌସୁମୀ ବାୟୁ ସାରା ଦେଶରେ ସକ୍ରିୟ ହୋଇ ନଥିବାରୁ ମୌସୁମୀ ଟ୍ରପ ଲାଇନ୍ ଏବେ ସକ୍ରିୟ ନାହିଁ । ତେଣୁ ମୌସୁମୀ ସକ୍ରିୟ ଥିଲେ ମଧ୍ୟ ଓଡ଼ିଶାରେ ଏବେ ନିଅଣ୍ଟିଆ ବର୍ଷା ରେକର୍ଡ କରାଯାଇଛି । ୬ଟି ଜିଲ୍ଲାରେ ସ୍ୱାଭାବିକ ବର୍ଷା ରେକର୍ଡ ହୋଇଥିବା ବେଳେ ୨୪ଟି ଜିଲ୍ଲାରେ ନିଅଣ୍ଟିଆ ବର୍ଷା ହୋଇଛି । ୧୦ଟି ଜିଲ୍ଲାରେ ୬୦ ରୁ ୯୩ ପ୍ରତିଶତ ନିଅଣ୍ଟିଆ ବର୍ଷା ହୋଇଥିବା ବେଳେ ପୁରୀ ଜିଲ୍ଲାରେ ସ୍ଥିତି ସଂଙ୍ଗୀନ ରହିଛି । ପୁରୀରେ ସ୍ୱାଭାବିକଠାରୁ ୯୩ ପ୍ରତିଶତ କମ୍ ବର୍ଷା ହୋଇଥିବା ବେଳେ ଜଗତସିଂହପୁରରେ ୯୨ ପ୍ରତିଶତ, ଖୋର୍ଦ୍ଧାରେ ୭୯ ପ୍ରତିଶତ, କେନ୍ଦ୍ରାପଡାରେ ୭୭ ପ୍ରତିଶତ କମ୍ ବର୍ଷା ରେକର୍ଡ ହୋଇଛି । ଆସନ୍ତା ୪ ଦିନ ପର୍ଯ୍ୟନ୍ତ ଉତ୍ତର ଏବଂ ଉପକୂଳ ଓଡ଼ିଶାର କିଛି ଜିଲ୍ଲାରେ ପ୍ରବଳ ବର୍ଷା ସମ୍ଭାବନା ଥିବାରୁ କିଛି ନିଅଣ୍ଟିଆ ଭରଣ ହେବାର ସମ୍ଭାବନା ରହିଛି । ବିଶେଷ କରି ବାଲେଶ୍ବର, ଭଦ୍ରକ, ମୟୁରଭଞ୍ଜ, କେନ୍ଦୁଝର, ଯାଜପୁର, କେନ୍ଦ୍ରାପଡା, ଜଗତସିଂହପୁର, ପୁରୀ, ଖୋର୍ଦ୍ଧା, କଟକ, ଅନୁଗୁଳ, କୋରାପୁଟ, ମାଲକାନଗିରି, ନବରଙ୍ଗପୁର ଏବଂ ରାୟଗଡାରେ ପ୍ରବଳ ବର୍ଷା ନେଇ ସତର୍କତା ଜାରି କରାଯାଇଛି । କିନ୍ତୁ ସଂପୂର୍ଣ୍ଣ ଭରଣ ହେବା ଆଶଙ୍କା ନାହିଁ ବୋଲି ପାଣିପାଗ ବିଶେଷଜ୍ଞ କହିଛନ୍ତି ।
ମୁଖ୍ୟ ସଚେତକ ପଦରୁ ସିନ୍ଦେ ବହିସ୍କୃତ
ମୁମ୍ବାଇ: ମହାରାଷ୍ଟ୍ର ରାଜନୀତିରେ ଘଡିକେ ଛୁଟୁଛି ଘୋଡା । ଶିବସେନା, କଂଗ୍ରେସ ଏବଂ ଏନସିପି ଦଳ ମେଣ୍ଟରେ ମହାରାଷ୍ଟ୍ରର ମହା ବିକାଶ ଅଘାଡି ସରକାର ଉପରେ ସଙ୍କଟ ଜାରି ରହିଛି । ସଙ୍କଟ ମଧ୍ୟରେ ବିଦ୍ରୋହୀ ମନ୍ତ୍ରୀ ତଥା ବିଧାୟକ ଏକନାଥ ସିନ୍ଧେଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ଉଦ୍ଧବ ଠାକରେ । ବିଧାନସଭାରେ ମୁଖ୍ୟ ସଚେତକ ପଦରୁ ସିନ୍ଦେଙ୍କୁ ବହିସ୍କାର କରାଯାଇଛି । ସୁରଟ ହୋଟେଲରେ ୨ ଶିବସେନା ନେତା ପହଞ୍ଚିଛନ୍ତି । ବିଦ୍ରୋହୀ ବିଧାୟକମାନେ ଏହି ହୋଟେଲରେ ଥିବା ସୂଚନା ରହିଥିଲା । ଏହାପରେ ସେମାନଙ୍କ ସହ ଦୁଇ ଶିବସେନା ନେତା ସୁରଟରେ ପହଞ୍ଚିଛନ୍ତି ।
आम्ही बाळासाहेबांचे कट्टर शिवसैनिक आहोत… बाळासाहेबांनी आम्हाला हिंदुत्वाची शिकवण दिली आहे.. बाळासाहेबांचे विचार आणि धर्मवीर आनंद दिघे साहेबांची शिकवण यांच्याबाबत आम्ही सत्तेसाठी कधीही प्रतारणा केली नाही आणि करणार नाही
— Eknath Shinde – एकनाथ शिंदे (@mieknathshinde) June 21, 2022
ଅନ୍ୟପକ୍ଷରେ ବିଦ୍ରୋହୀ ବିଧାୟକ ଏକନାଥ ସିନ୍ଦେଙ୍କ ବୟାନ ସାମ୍ନାକୁ ଆସିଛି । ସେ କହିଛନ୍ତି ବାଲାସାହେବଙ୍କ ନୀତିକୁ ଆମେ ସଦା ସର୍ବଦା ମାନିଆସିଛି । ଆମେ ବାଲାସାହେବଙ୍କ ସଚ୍ଚା ସୈନିକ । ତେଣୁ କ୍ଷମତା ପାଇଁ କେବେ ବି ଧୋକା ଦେବିନି । ସୂଚନାଯୋଗ୍ୟ ଏକନାଥ ସିନ୍ଧେଙ୍କ ସହ ୨୧ ବିଦ୍ରୋହୀ ବିଧାୟକ ବିଜେପି ଶାସିତ ଗୁଜୁରାଟ ସୁରଟର ଏକ ହୋଟେଲରେ ଅଛନ୍ତି । ସେମାନଙ୍କ ମଧ୍ୟରେ ୫ଜଣ ମନ୍ତ୍ରୀ ମଧ୍ୟ ଅଛନ୍ତି । ସୂଚନା ଥାଉକି ମହାରାଷ୍ଟ୍ର ବିଧାନ ପରିଷଦ ନିର୍ବାଚନରେ କ୍ରସ ଭୋଟିଂ ପରେ ଏହି ବିଦ୍ରୋହ ଦେଖାଯାଇଛି। ୧୦ ଟି ଆସନରୁ କ୍ରସ ଭୋଟିଂ କାରଣରୁ ବିଜେପି ହାତକୁ ୫ଟି ଚାଲିଯାଇଛି ।
ମହାରାଷ୍ଟ୍ର ମୁଖ୍ୟମନ୍ତ୍ରୀ ତଥା ଶିବସେନା ମୁଖିଆ ଉଦ୍ଧବ ଠାକରେ ସରକାର ଉପରେ ଛାଇଥିବା ସଙ୍କଟକୁ ନେଇ ବୈଠକ କରିଛନ୍ତି । ହେଲେ ଏହି ବୈଠକରେ ଶିବସେନାର ମୋଟ ୫୫ ବିଧାୟକଙ୍କ ମଧ୍ୟରୁ ୨୦ ଜଣ ଯୋଗଦେଇଛନ୍ତି । ଅନ୍ୟ ୩୫ ଜଣଙ୍କ ଅନୁପସ୍ଥିତ ବଡ ସଙ୍କଟ ଛିଡା କରିଛି । ବିଶେଷ ସୂତ୍ରରୁ ମିଳିଥିବା ସୂଚନାନୁଯାୟୀ ଠାକରେ ଖୁବ୍ ଶୀଘ୍ର ବିଦ୍ରୋହୀ ବିଧାୟକଙ୍କ ଉପରେ ଅଙ୍କୁଶ ଲଗାଇବା ପାଇଁ ତ୍ରୁଟି ବିରୋଧୀ ଆଇନ ଲାଗୁ କରିପାରନ୍ତି । ଶିବସେନା ନେତା ସଞ୍ଜୟ ରାଉତ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଶିବସେନା ସୈନିକ କେବେ ବି ବିଶ୍ବାସଘାତ କରିବେ ନାହିଁ । ଖୁବ୍ ଶୀଘ୍ର ସ୍ଥିତି ପୂର୍ବଭଳି ଠିକ୍ ହୋଇଯିବ । ବିଦ୍ରୋହୀ ବିଧାୟକଙ୍କ ସହ ଆମେ ସମ୍ପର୍କ କରୁଛୁ । ଖୁବ୍ ଶୀଘ୍ର ସେମାନେ ମହାରାଷ୍ଟ୍ର ଫେରବେ । ସରକାର ଭାଙ୍ଗିବା ପାଇଁ ବିଜେପି ପକ୍ଷରୁ କରାଯାଉଛି ହୀନ ରାଜନୀତି ।
ସେହିପରି କଂଗ୍ରେସ ଏବଂ ଏନସିପି ଦଳ ପକ୍ଷରୁ ମଧ୍ୟ ବୈଠକ କରାଯାଉଛି । ଯଦି ମହାରାଷ୍ଟ୍ର ବିଧାନସଭା ସ୍ଥିତି ଉପରେ ନଜର ପକାଇବା ତେବେ ବିଧାନସଭାରେ ମୋଟ ଆସନ ସଂଖ୍ୟା ୨୮୮ । ବିଜେପି ପାଖରେ ୧୦୬ ଆସନ ରହିଛି ଯେତବେଳେ କି ମେଣ୍ଟ ସରକାର ପାଖରେ (ଶିବସେନା-୫୫, କଂଗ୍ରେସ-୪୪, ଏନସିପି-୫୩) ଆସନ ରହିଛି ଏବଂ ଅନ୍ୟ ୨୯ ଆସନ ରହିଛି । ଯଦି ବିଦ୍ରୋହୀ ବିଧାୟକ ସିନ୍ଧେ ୨୧ ବିଧାୟକଙ୍କ ସହ ଦଳ ଛାଡି ବିଜେପିରେ ସାମିଲ ହୋଉଛନ୍ତି ତେବେ ମେଣ୍ଟ ସରକାର ବହୁମତ ହରାଇ କ୍ଷମତାଚ୍ୟୁତ ହୋଇଯିବ ।
ଯଶଓ୍ୱନ୍ତ ସିହ୍ନା ହେଲେ ମିଳିତ ବିରୋଧୀ ଦଳର ରାଷ୍ଟ୍ରପତି ପ୍ରାର୍ଥୀ
ନୂଆଦିଲ୍ଲୀ: ଯଶଓ୍ୱନ୍ତ ସିହ୍ନା ହେଲେ ବିରୋଧୀଙ୍କ ରାଷ୍ଟ୍ରପତି ପ୍ରାର୍ଥୀ । ବିରୋଧୀ ଦଳ ବୈଠକରେ ଏନେଇ ହୋଇଛି ଔପଚାରିକ ଘୋଷଣା । ପ୍ରେସମିଟ୍ କରି ଯଶଓ୍ୱନ୍ତ ସିହ୍ନାଙ୍କ ନାଁ ଘୋଷଣା କରିଛନ୍ତି ବରିଷ୍ଠ କଂଗ୍ରେସ ନେତା ମଲ୍ଲିକାର୍ଜୁନ ଖାର୍ଗେ । ଅଟଳ ବିହାରୀ ବାଜପେୟୀଙ୍କ ସରକାରରେ ଅର୍ଥମନ୍ତ୍ରୀ ଓ ବୈଦେଶିକ ମନ୍ତ୍ରୀ ଥିଲେ ଯଶଓ୍ୱନ୍ତ ସିହ୍ନା । ଆଜି ପୂର୍ବାହ୍ନ TMCରୁ ଇସ୍ତଫା ଦେଇଥିଲେ ଯଶଓ୍ୱନ୍ତ । ପୂର୍ବତନ କେନ୍ଦ୍ରମନ୍ତ୍ରୀ ଯଶଓ୍ୱନ୍ତ ସିହ୍ନା ମିଳିତ ବିରୋଧୀ ଦଳର ରାଷ୍ଟ୍ରପତି ପ୍ରାର୍ଥୀ ହୋଇପାରନ୍ତି ବୋଲି ପୂର୍ବରୁ ଚର୍ଚ୍ଚା ଚାଲିଥିଲା । ଟିଏମସି ପକ୍ଷରୁ ରାଷ୍ଟ୍ରପତି ପ୍ରାର୍ଥୀ ପାଇଁ ସିହ୍ନାଙ୍କ ନାମ ପ୍ରସ୍ତାବ ଦିଆଯାଇଥିଲା ।
We (opposition parties) have unanimously decided that Yashwant Sinha will be the common candidate of the Opposition for the Presidential elections: Congress leader Jairam Ramesh pic.twitter.com/lhnfE7Vj8d
— ANI (@ANI) June 21, 2022
ରାଷ୍ଟ୍ରପତି ପ୍ରାର୍ଥୀ ହେବା ନେଇ ସିହ୍ନା ଆଜି ଏକ ଟ୍ୱିଟ୍ କରି ନିଜର ଆଗ୍ରହ ସଂପର୍କରେ ସଙ୍କେତ ଦେବା ସହ ଟିଏମସି ମୁଖ୍ୟ ମମତା ବାନାର୍ଜୀଙ୍କୁ ଧନ୍ୟବାଦ ଦେଇଥିଲେ । ଶରଦ ପାଓ୍ୱାର, ନ୍ୟାସନାଲ କନଫରେନ୍ସ ନେତା ଫାରୁକ ଅବଦୁଲ୍ଲା ଓ ପଶ୍ଚିମବଙ୍ଗର ପୂର୍ବତନ ରାଜ୍ୟପାଳ ଗୋପାଳକୃଷ୍ଣ ଗାନ୍ଧି ବିରୋଧୀ ଦଳଙ୍କ ରାଷ୍ଟ୍ରପତି ପ୍ରାର୍ଥୀ ହେବା ପାଇଁ ମନା କରିଥିଲେ । ୨୦୧୮ରେ ସେ ବିଜେପିରୁ ଇସ୍ତଫା ଦେଇଥିଲେ । ପୂର୍ବରୁ ସେ କେନ୍ଦ୍ରରେ ଅର୍ଥ ଓ ବୈଦେଶିକ ବ୍ୟାପାର ମନ୍ତ୍ରୀ ଥିଲେ । ସେପଟେ ଆଜି ବିଜେପିର ସଂସଦୀୟ ବୋର୍ଡ ବୈଠକ ବସୁଛି । ବୈଠକରେ ଏନଡିଏର ରାଷ୍ଟ୍ରପତି ପ୍ରାର୍ଥୀ ଚୟନ ବାବଦରେ ଆଲୋଚନା ହେବ ।
ଡେଙ୍ଗୁ ପାଇଁ ଭୁବନେଶ୍ୱରରେ ୨ ଦିନ ପାଳନ ହେବ ଡ୍ରାଇ ଡେ’
ଭୁବନେଶ୍ୱର: ଭୁବନେଶ୍ୱରରେ ଦିନକୁ ଦିନ ବଢୁଛି ଡେଙ୍ଗୁ ଆତଙ୍କ । ଜୁନ ମାସରେ କେବଳ ୩୦ ଡେଙ୍ଗୁ ରୋଗୀ ଚିହ୍ନଟ ହୋଇଥିବା ବେଳେ ଅନେକ ଘରୋଇ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି । ବଢ଼ୁଥିବା ଡେଙ୍ଗୁକୁ ଦେଖି ବିଏମସି କମିଶନର ବିଜୟ ଅମୃତା କୁଳାଙ୍ଗେଙ୍କ ଅଧ୍ୟକ୍ଷତାରେ ଜରୁରୀ ବୈଠକ ଅନୁଷ୍ଠିତ ହୋଇଛି । ଏଣିକି ଭୁବନେଶ୍ୱରରେ ସପ୍ତାହକୁ ଦୁଇଦିନ ପାଳନ ହେବ ଡ୍ରାଇ ଡେ’ । ଡ୍ରାଇ ଡେ’ ଅର୍ଥାତ ଅଫିସ ହେଉ କିମ୍ବା ଘରେ ସମ୍ଭାବ୍ୟ ମଶା ବଂଶ ବୃଦ୍ଧି ସ୍ଥାନ ଗୁଡ଼ିକୁ ସଫା କରିବା । ଗୁରୁବାର ଓ ରବିବାର ହେବ ଡ୍ରାଇ ଡେ’ ।
ଗୁରୁବାର ସମସ୍ତ ସରକାରୀ, ବେସରକାରୀ କାର୍ଯ୍ୟାଳୟରେ ଏବଂ ରବିବାର ପ୍ରତ୍ୟେକଙ୍କ ଘରେ ଡ୍ରାଇ ଡେ’ ପାଳନ କରାଯିବ । ଡେଙ୍ଗୁ ରୋକିବା ପାଇଁ ସର୍ଭେ ଓ ସଚେତନତା ଉପରେ ଗୁରୁତ୍ୱ ଦିଆଯିବ । ପ୍ରତି ୱାର୍ଡରେ ବିଭିନ୍ନ ବର୍ଗର ବ୍ୟକ୍ତି ଓ ଗୋଷ୍ଠୀଙ୍କୁ ନେଇ ଗଠନ ହେବ ଗ୍ରୁପ । ପ୍ରଥମେ ସଚେତନତା ପରେ ଖିଲାପିଙ୍କ ବିରୋଧରେ ହେବ କାର୍ଯ୍ୟାନୁଷ୍ଠାନ । ବିଏମସି କମିଶନର ବିଜୟ ଅମୃତା କୁଳାଙ୍ଗେଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଏଭଳି ନିଷ୍ପତ୍ତି ହୋଇଛି । ବୈଠକରେ ବିଏମସିର ସମସ୍ତ ସ୍ୱାସ୍ଥ୍ୟ ଅଧିକାରୀ, ଡେପୁଟି କମିଶନର ଓ ଅତିରିକ୍ତ କମିଶନର ଉପସ୍ଥିତ ଥିଲେ । ଆସନ୍ତା ଗୁରୁବାରଠାରୁ ଆରମ୍ଭ ହେବ ଡ୍ରାଇ ଡେ’ ପାଳନ ।
ଜୀବନ ସଂଗ୍ରାମରେ ହାରିଗଲା ଗଜରାଜ
ସମ୍ବଲପୁର: ଜୀବନ ସଂଗ୍ରାମରେ ହାରିଗଲା ଗଜରାଜ । ଅସୁସ୍ଥ ହାତୀକୁ ପୋଖରୀରୁ ଉଦ୍ଧାର କରାଯିବା ପରେ ଚିକିତ୍ତାସା ସମୟରେ ତାର ମୃତ୍ୟୁ ହୋଇଛି । ୫ଦିନ ପରେ କ୍ରେନ୍ ସହାୟତାରେ ପୋଖରୀରୁ ହାତୀକୁ ଉଦ୍ଧାର କରାଯାଇଥିଲା । କିନ୍ତୁ ଶେଷରେ ହାତୀଟି ପ୍ରାଣ ହରାଇଛି ।
ସମ୍ବଲପୁର ବନଖଣ୍ଡ ପଡିଆବାହାଲ ରେଞ୍ଜ ସାପଲହରା ଗାଁ ନିକଟରେ ଥିବା ଏକ ପୋଖରୀକୁ ଗତ ଗୁରୁବାର ରାତିରେ ପାଣି ପିଇବାକୁ ଆସି ପଙ୍କରେ ଫସି ଯାଇଥିଲା ହାତୀ । ପୋଖରୀରେ ପଡ଼ି ହାତୀର ଗୋଟିଏ ଗୋଡ଼ ଭାଙ୍ଗିଯାଇଥିଲା । ଏନେଇ ସୂଚନା ମିଳିବା ପରେ ବନ ବିଭାଗ ପକ୍ଷରୁ ହାତୀଟିକୁ ପୋଖରୀରୁ ଉଦ୍ଧାର କରିବା ପାଇଁ ଉଦ୍ୟମ ଚାଲିଥିଲା । ହେଲେ ସମସ୍ତ ଚେଷ୍ଟା ଫେଲ ମାରିଥିଲା । ହାତୀକୁ ପୋଖରୀ କୂଳରେ ଅଳ୍ପପାଣିରେ ରଖି ଚିକିତ୍ସା କରାଯାଉଥିଲା । ଆଜି ଏକ କ୍ରେନ୍ ଯୋଗେ ହାତୀକୁ ପାଣିରୁ ବାହାର କରାଯାଇଥିଲା । ହେଲେ ହାତୀଟି ବାହାରକୁ ଆସିବା ପରେ ତା’ର ମୃତ୍ୟୁ ଘଟିଛି ।
ମଙ୍ଗଳ ଗ୍ରହରେ ଦେଖାଗଲା ହାତୀ?
ନୂଆଦିଲ୍ଲୀ: ଆମେରିକା ସ୍ପେସ୍ ଏଜେନ୍ସି NASA ମଙ୍ଗଳ ଗ୍ରହରେ ଜୀବନ ଖୋଜିବାରେ ଲାଗିଛନ୍ତି । ଏବେ ନିକଟରେ ଜଣେ ଗବେଷକ ଏକ ଫଟୋକୁ ନେଇ ଅଜବ ପ୍ରକାର ଦାବି କରିଛନ୍ତି । ମଙ୍ଗଳ ଗ୍ରହର ପଥର ପାଖରେ ଏକ ଅଜବ ଆକୃତ୍ତିର ଜୀବ ଦେଖା ଯାଉଛି । ଏହାକୁ ଗବେଷକ କୌଣସି ଜୀବ ବୋଲି କହୁଛନ୍ତି ।
ସେ ନିଜର ଓ୍ବେବସାଇଟରେ ଲେଖିଛନ୍ତି ଯେ, ଆଜି ମୁଁ ଓ୍ବେବସାଇଟରେ ଏକ ରୋଚକ ଜିନିଷ ଦେଖିଲି । ଏହା ହାତୀ ଭଳି ଦେଖାଯାଉଛି । ଏହାର ଏକ ବଡ଼ ଚେହେରା ରହିଛି । ଶୁଣ୍ଢ ଭଳି ବି କିଛି ଦେଖାଯାଉଛି । ଗଳା, ନାକ ଏବଂ ଦୁଇଟି ଆଖି ବି ଦେଖାଯାଉଛି । ଏହାକୁ ଦେଖି ଗବେଷକ କହିଛନ୍ତି ଯେ, ମଙ୍ଗଳ ଗ୍ରହରେ ଜୀବନ ହୋଇପାରେ ।
ପୂର୍ବରୁ ମଙ୍ଗଳ ଗ୍ରହରେ ମାଙ୍କଡ ଥିବାର ବି ଦାବି ହେଉଥିଲା । ଏହା ସହ ସେଠାରେ ଛୋଟ ଭାଲୁ ଥିବାର ବି ଦାବି କରାଯାଇଥିଲା । ମଝିରେ ମଝିରେ ମଙ୍ଗଳରେ ଅଜବ ଜିନିଷ ଦେଖାଯିବାର ଦାବି ହେଉଛି ।
ନାସାର ପର୍ସର୍ଭାନ୍ସ ରୋଭର ମଙ୍ଗଳ ଗ୍ରହର ଏକ ଫଟୋ କଏଦ କରିଛି । ଏହି ଫଟୋରେ ଏକ ଧାତୁ ପଥରରେ ଲାଗିଛି । ଯାହା କମ୍ବଳ ଭଳି ଦେଖାଯାଉଛି । ଏ ନେଇ ନାସା କହିଛି ଯେ, ଏହା ହେଉଛି ରୋଭରର କମ୍ବଳ, ଯାହା ମହାକାଶର ଶୀତରୁ ରକ୍ଷା କରିବା ପାଇଁ ରହିଛି ।
ନାସାର ରୋବର ମଙ୍ଗଳ ଗ୍ରହରେ ବେଳେ ବେଳେ ଅଜବ ଜିନିଷ ଠାବ କରିଛି । ବିଭିନ୍ନ ପ୍ରକାର ଫଟୋରେ ଅଜବ ଏବଂ ଜୀବ ଆକୃତ୍ତିର ଜିନିଷ ଦେଖାଯାଏ । ତେବେ ଏହା କେତେଦୁର ସତ ତାହା ଜଣାପଡ଼ିନି ।
ଡେଲଟା ଛକରେ ସ୍କର୍ପିଓ ଭାଙ୍ଗି ଜାଳିଦେବା ଘଟଣା, ୪ ଜଣଙ୍କୁ ଅଟକ ରଖିଛି ପୋଲିସ୍
ଭୁବନେଶ୍ୱର: ଭୁବନେଶ୍ୱର ଡେଲଟା ଛକରେ ସ୍କର୍ପିଓ ଭାଙ୍ଗି ଜାଳିଦେବା ଘଟଣାରେ କାର୍ଯ୍ୟାନୁଷ୍ଠାନ । ଆକ୍ସନ ମୋଡ଼ରେ କମିଶନରେଟ୍ ପୋଲିସ । ଘଟଣାରେ ୪ ଜଣଙ୍କୁ ଅଟକ ରଖିଛି ଖଣ୍ଡଗିରି ପୋଲିସ । ଅଟକ ଥିବା ୪ ଜଣ ହେଲେ ସୁଶୀଲ ରାଉତ, ବିଶ୍ୱଜିତ୍ ରାଉତ, ସୁଧୀର ବାରିକ ଓ ରାଜୁ ପ୍ରଧାନ । ଯେଉଁମାନେ ଗଣ୍ଡଗୋଳ କରିଥିଲେ, ଏବେ ସେମାନଙ୍କ ବିରୋଧରେ ଶକ୍ତ ହୋଇଛି ପୋଲିସ । ଅଭିଯୁକ୍ତ କରିଥିବା ଦୋକାନକୁ ମଧ୍ୟ ଭାଙ୍ଗିଛି ପୋଲିସ । ବୁଲିଛି ବୁଲଡୋଜର । ମାଟିରେ ମିଶିଛି ଅପରାଧୀଙ୍କ ଦୋକାନ ଘର । ବିଏମସି ସହାୟତାରେ ଅଭିଯୁକ୍ତଙ୍କ ଦୋକାନକୁ ଭାଙ୍ଗିଛି ଖଣ୍ଡଗିରି ପୋଲିସ ।
କେବଳ ଏମାନେ ନୁହଁନ୍ତି, ଯେଉଁମାନେ ସରକାରୀ ଜାଗା ଓ ଡ୍ରେନ୍ ଉପରେ ଘର କରିଛନ୍ତି ସେମାନଙ୍କ ଘର ମଧ୍ୟ ଭଙ୍ଗାଯାଇଛି । ରାଜଧାନୀରେ ଯେଉଁମାନେ ଅପରାଧ କରିବେ ସେମାନଙ୍କୁ ନିସ୍ତାର ନାହିଁ ବୋଲି କହିଛି ପୋଲିସ । ପୋଲିସ ସୂଚନା ଅନୁସାରେ, ଗାଡି ମାଲିକ ପାଖରେ ସୁଶୀଲ ରାଉତ ଡ୍ରାଇଭର ଭାବେ କାମ କରୁଥିଲେ । ହେଲେ ବକେୟା ଟଙ୍କାକୁ ନେଇ କଥା କଟାକଟି ହୋଇଥିଲା । ଟଙ୍କା ଦେଣନେଣକୁ ନେଇ ଗତକାଲି ଦୋକାନ ପାଖକୁ ଗାଡି ମାଲିକ ଆସିଥିଲେ । ହେଲେ ଏଠାରେ ସାମାନ୍ୟ କଥାକୁ ନେଇ ବଚସା ହେବା ପରେ ପାଟିତୁଣ୍ଡ ଓ ମାରପିଟ ହୋଇଥିଲା । ଫଳରେ ଅଟକ ଥିବା ୪ ଜଣ ଯୁବକ ସ୍କର୍ପିଓ ଗାଡି ଭାଙ୍ଗିବା ସହ ନିଆଁ ଲଗାଇ ଦେଇଥିଲେ । ପୋଲିସ ଆଖି ଆଗରେ ଗାଡିରେ ନିଆଁ ଲଗାଇ ଦେଇଥିଲେ ଅଭିଯୁକ୍ତ ।
କୋଟିଆରେ ଆନ୍ଧ୍ର ଉପମୁଖ୍ୟମନ୍ତ୍ରୀ ରାଜନ୍ନା ଦୋରା
କୋରାପୁଟ: କୋଟିଆ ହାତେଇବାକୁ ଆନ୍ଧ୍ରର ନୂଆ ଚାଲ୍ । କୋଟିଆରେ ଆନ୍ଧ୍ର ଉପମୁଖ୍ୟମନ୍ତ୍ରୀ ରାଜନ୍ନା ଦୋରା। ସରକାରୀ ଅଧିକାରୀଙ୍କ ପରେ କୋଟିଆକୁ ଗୁପ୍ତ ଗସ୍ତ କରିଛନ୍ତି ଆନ୍ଧ୍ର ଉପମୁଖ୍ୟମନ୍ତ୍ରୀ । କୋଟିଆ ତାଡିବାଲସା ଗାଁକୁ ଗସ୍ତ କରି ଆନ୍ଧ୍ର ସରକାରଙ୍କ ବିଭିନ୍ନ ଯୋଜନା ନେଇ ଆଲୋଚନା କରିଛନ୍ତି । ଆନ୍ଧ୍ରପ୍ରଦେଶ ଉପମୁଖ୍ୟମନ୍ତ୍ରୀଙ୍କ କୋଟିଆ ଗସ୍ତକୁ ତୀବ୍ର ବିରୋଧ କରିଛନ୍ତି ପଟାଙ୍ଗି ବିଧାୟକ ପ୍ରିତମ ପାଢ଼ୀ । \
ଆନ୍ଧ୍ରର ଅନେକ ପ୍ରଶାସନିକ ଅଧିକାରୀ କୋଟିଆ ଗସ୍ତ କରୁଛନ୍ତି । ଓଡ଼ିଶାର ଅଜ୍ଞାତରେ ସେମାନେ ଗସ୍ତ କରି ପରିଭ୍ରମଣ କରୁଛନ୍ତି । ଗୁପ୍ତ ଗସ୍ତ ନକରି ସ୍ପଷ୍ଟ ଦିବାଲୋକରେ ଆସିବାକୁ କହିଛନ୍ତି ବିଧାୟକ। ତେବେ ଆନ୍ଧ୍ରପ୍ରଦେଶର ପ୍ରଶାସନିକ ଅଧିକାରୀ ମାନେ କାହିଁକି ବିବାଦୀୟ କୋଟିଆ ଗସ୍ତ କରୁଛନ୍ତି ତାହାର କାରଣ ମଧ୍ୟ ଓଡିଶା ପ୍ରଶାସନ ପାଖରେ ନାହିଁ ।
‘ଦୁବାଇ ଯିବେ ମୁଖ୍ୟମନ୍ତ୍ରୀ, ଓଡ଼ିଶାକୁ ଆସିବ ବଡ଼ ଧରଣର ପୁଞ୍ଜି’
ଭୁବନେଶ୍ୱର: ଦୁବାଇରୁ ଓଡ଼ିଶାକୁ ଆସିପାରେ ବଡ଼ ଧରଣର ପୁଞ୍ଜି । ଏଥିପାଇଁ ମୁଖ୍ୟମନ୍ତ୍ରୀ ନିଜେ ଦୁବାଇ ଗସ୍ତ କରିବେ । ବଡ଼ ପୁଞ୍ଜିନିବେଶ ଆସିଲେ ଓଡ଼ିଆ ଯୁବକ ଯୁବତୀଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବ । ଜାଗା, ପାଣି ଓ ବିଦ୍ୟୁତ ଯୋଗାଇ ଦିଆଯାଉଛି । ଏହା ସହ ଅନ୍ୟ ସମସ୍ତ ସୁବିଧା ମଧ୍ୟ ଯୋଗାଇ ଦିଆଯାଉଛି । ଓଡ଼ିଶାରେ ଆଗାମୀ ୨୦ ବର୍ଷ ଶିଳ୍ପ କ୍ଷେତ୍ରରେ ଭଲ ସୁଯୋଗ ରହିଛି ବୋଲି କହିଛନ୍ତି ଶିଳ୍ପ ମନ୍ତ୍ରୀ ପ୍ରତାପ ଦେବ ।
ସେପଟେ ୨୨ ବର୍ଷରେ ଓଡ଼ିଶା କିପରି ସାଜିଲା ଉଦାହରଣ, ମିଶନ ଜିରୋ କାଜୁଆଲଟିକୁ କିପରି ମିଳିଲା ସଫଳତା, ବିପର୍ଯ୍ୟୟ ପରବର୍ତ୍ତୀ ଥଇଥାନ ଓ ପୁନରୁଦ୍ଧାର ଯୋଜନା ସମ୍ପର୍କରେ ଦିଗ୍ଦର୍ଶନ ଦେବା ପାଇଁ ମୁଖ୍ୟମନ୍ତ୍ରୀ ବିଦେଶ ଗସ୍ତ କରିଛନ୍ତି । ଦିନେ ଭୋକର ଭୂଗୋଳ କୁହାଯାଉଥିବା ଓଡ଼ିଶା ଏବେ ଧାନ ଉତ୍ପାଦନରେ ବଳକା ରାଜ୍ୟ । ବିପଦଆପଦରେ ଅନ୍ୟ ରାଜ୍ୟ ଲାଗି ବି ଦେବଦୂତ ସାଜିଛି ଓଡିଶା । ଜାତିସଂଘ ୱାର୍ଲଡ ଫୁଡ ପ୍ରୋଗ୍ରାମର ସ୍ବତନ୍ତ୍ର କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଅନୁଭୂତି ବାଣ୍ଟିବେ ।
ଖାଦ୍ୟ କାର୍ଯ୍ୟକ୍ରମରେ ଯୋଗଦେବା ପରେ ଭାଟିକାନ ସିଟିରେ ପୋପ ଫ୍ରାନସିସଙ୍କୁ ସାକ୍ଷାତ କରିବେ ନବୀନ । କୌଣସି ମୁଖ୍ୟମନ୍ତ୍ରୀ ପୋପଙ୍କୁ ସାକ୍ଷାତ କରିବାରେ ନବୀନ ହେବେ ପ୍ରଥମ । ଏହା ସହ ୟୁରୋପ ମହାଦେଶରେ ଥିବା ପ୍ରବାସୀ ଓଡ଼ିଆଙ୍କ ସହ ମୁଖ୍ୟମନ୍ତ୍ରୀ ଆଲୋଚନା କରିବାର କାର୍ଯ୍ୟକ୍ରମ ରହିଛି । ୨୬ ତାରିଖରେ ମୁଖ୍ୟମନ୍ତ୍ରୀ ଇନଭେଷ୍ଟର ମିଟ୍ ପାଇଁ ଦୁବାଇ ଗସ୍ତ କରିବେ । ୨୯ ତାରିଖରେ ସେଠାରେ ମଧ୍ୟପ୍ରାଚ୍ୟ ପୁଞ୍ଜିନିବେଶକଙ୍କ ସହ ରାଜ୍ୟରେ ପୁଞ୍ଜିନିବେଶ ନେଇ ଆଲୋଚନା କରିବେ ମୁଖ୍ୟମନ୍ତ୍ରୀ ।