ଆସାମ: ଆସାମ ଜୋରହାଟ ବିମାନ ବନ୍ଦରରେ ରନଓ୍ବେରୁ ଖସିଗଲା ଇଣ୍ଡିଗୋ । ଜୋରହାଟରୁ କୋଲକାତା ଯିବାକୁ ଥିବା ବିମାନର ଚକ କାଦୁଅରେ ଫସିଯିବା ପରେ ପ୍ରତିକ୍ରିୟା ରଖିଛନ୍ତି କମ୍ପାନି କର୍ତ୍ତୃପକ୍ଷ । ୬E-୭୫୭ ଇଣ୍ଡିଗୋ ବିମାନ ଜୋରହାଟରୁ କୋଲକାତା ଯିବାର ଥିଲା । ମାତ୍ର ଉଡାଣ ବେଳେ ଏହାର ଚକ କାଦୁଅରେ ପଶିଯିବାରୁ ଏହାକୁ ପୁଣି ବେ କୁ ଅଣାଯାଇଥିଲା । ବିମାନରେ ଥିବା ୯୮ ଯାତ୍ରୀ ନିରାପଦ ଥିଲେ । ପରେ ଏହି ବିମାନର ଉଡାଣ ବାତିଲ କରାଯାଇଥିଲା । ପାଇଲଟ ଏହି ସୂଚନା ଦେବା ପରେ ବିମାନର ଉଡାଣ ବାତିଲ କରାଯାଇ ଯାଞ୍ଚ କରାଯାଇଥିଲା । ଗତ ଗୁରୁବାର ଏହି ଘଟଣା ଘଟିଥିଲା ।
କେନ୍ଦ୍ରୀୟ ବିଦ୍ୟାଳୟ ଛାତ୍ରଙ୍କୁ ମରଣାନ୍ତକ ଆକ୍ରମଣ, ଥାନାରେ ଅଭିଯୋଗ କଲେ ବାପା
ଭୁବନେଶ୍ୱର: କେନ୍ଦ୍ରୀୟ ବିଦ୍ୟାଳୟ ଛାତ୍ରଙ୍କୁ ମରଣାନ୍ତକ ଆକ୍ରମଣ। ଥାନାରେ ଅଭିଯୋଗ କଲେ ବାପା ଅଶୋକ କୁମାର ସେଠୀ । ପୁଅକୁ ଭୁବନେଶ୍ବର କେଭି-୧ ନିକଟରେ ମରଣାନ୍ତକ ଆକ୍ରମଣ ହୋଇଛି । ଯୁକ୍ତ ଦୁଇ ଛାତ୍ରଙ୍କୁ ରାଗିଂ ନେଇ ଖାରବେଳନଗର ଥାନାରେ ଏତଲା ଦିଆଯାଇଛି । ୧୫ ଜଣ ଯୁବକ ଲୁହାରଡ଼, ବାଉଁଶରେ ମାଡ଼ ମାରିଥିବା ଅଭିଯୋଗ ହୋଇଛି ।
ରାଗିଂକୁ ବିରୋଧ କରିବାରୁ ମାଡ଼ ମାରିଥିବା ଅଭିଯୋଗ ହୋଇଛି । ଘଟଣାର ତଦନ୍ତ ଚାଲିଥିବା ସୂଚନା ଦେଇଛି ପୋଲିସ । ପୂର୍ବ ଶତ୍ରୁତାରୁ ଗଣ୍ଡଗୋଳ ହୋଇଥିବା ପୋଲିସ ପକ୍ଷରୁ ସୂଚନା ମିଳିଛି ।
ଅର୍ପିତା ମୁଖାର୍ଜୀଙ୍କ ବାସଭବନରୁ ଗାଏବ ୪ଟି ଲକଜରି ଗାଡ଼ି
ନୂଆଦିଲ୍ଲୀ: ଗିରଫ ଅଭିନେତ୍ରୀ ତଥା ବିଦା ହୋଇଥିବା ପଶ୍ଚିମବଙ୍ଗ ମନ୍ତ୍ରୀ ପାର୍ଥ ଚାଟାର୍ଜୀଙ୍କ ସହଯୋଗୀ ଅର୍ପିତା ମୁଖାର୍ଜୀଙ୍କ ବାସଭବନରୁ ୪ଟି ଲକଜରି ଗାଡ଼ି ଗାଏବ। ସେହି ଫ୍ଲାଟରେ ଥିବାବେଳେ ଅର୍ପିତାଙ୍କୁ ଗିରଫ କରାଯାଇଥିଲା ଏବଂ ଗିରଫ ପରେ ପରେ ତାଙ୍କ ଫ୍ଲାଟରୁ କାର୍ ଗାଏବ ହେବା ଘଟଣା ଚାଞ୍ଚଲ୍ୟ ସୃଷ୍ଟି କରିଛି ।
ଗାଏବ କାର୍ ମଧ୍ୟରେ ରହିଛି ଅଡି-ଏ୪, ମର୍ସିଡିଜ ବେଞ୍ଜ, ହଣ୍ଡାସିଟି, ହଣ୍ଡା ସିଆରଭି । ଏହି ସମସ୍ତ କାର୍ରେ ଟଙ୍କା ଭର୍ତ୍ତି କରାଯାଇ ଗାଏବ କରାଯାଇଥିଲା ବୋଲି ସୂଚନା ମିଳିଛି । ସିସିଟିଭି ଫୁଟେଜ ଅନୁସାରେ ପୋଲିସ ଘଟଣାର ତଦନ୍ତ କରୁଛି । ବେଲଘରିଆସ୍ଥିତ କ୍ଲବଟାଉନ ହାଇଟସରେ ଅର୍ପିତାଙ୍କ ରହିଛି ଦୁଇଟି ଫ୍ଲାଟ। ଗୋଟିଏ ଫ୍ଲାଟରୁ ୩୦ କୋଟି ଟଙ୍କା ଜବତ ହୋଇଥିବାବେଳେ ଅନ୍ୟ ଫ୍ଲାଟରୁ କିଛି ମିଳି ନଥିଲା। ଗତ ୨୨ ତାରିଖରେ ଡାଏମଣ୍ଡ ସିଟି ଫ୍ଲାଟରୁ ୨୧ କୋଟି ଟଙ୍କା ଜବତ ହୋଇଥିବାବେଳେ ବିପୁଳ ବୈଦେଶିକ ମୁଦ୍ରା ମିଳିଥିଲା ।
ଡାଏମଣ୍ଡ ସିଟି କମ୍ପ୍ଲେକ୍ସରୁ ୪ଟି ଗାଡି ଗାଏବ ହେବା ଘଟଣାକୁ ନେଇ ସସପେନସ ଜାରି ରହିଛି । ଗତକାଲି ଦଳର ସମସ୍ତ ପଦ ପଦବୀରୁ ପାର୍ଥଙ୍କୁ ବିଦା କରିଥିଲେ ଦିଦି । ଅର୍ପିତାଙ୍କ ଦୁଇଟି ଘରେ ହୋଇଥିବା ରେଡରେ ମିଳିଥିଲା ପ୍ରାୟ ୫୦ କୋଟି ଟଙ୍କା । ଏହାସହ ପ୍ରାୟ ୭ କେଜିର ସୁନା ଜବତ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ଟଏଲେଟରୁ ବି ମିଳିଥିଲା କୋଟି କୋଟି ଟଙ୍କାର ନୋଟ । ସୁନାରେ ତିଆରି ଫଟୋ ଫ୍ରେମ ଜବତ ହୋଇଥିବା ବେଳେ ସୁନାର କଲମ ମଧ୍ୟ ପାଇଥିଲା ଇଡି । ସେପଟେ ଉତ୍ତର ଚବିଶ ପରଗଣାରେ ଚର୍ମନଗରୀ ପଛ ପଟେ ଥିବା ଏକ ଦଶ ମାଣ ଜମି ଠାବ ହୋଇଛି । ଏହି ଜମି ଅର୍ପିତା ମୁଖାର୍ଜୀଙ୍କ ନାମରେ ଥିବାବେଳେ ୨୦୧୭ରେ ଏହି ଜମି ସେ କିଣିଥିଲେ।
ଦେଶରେ ବେକାରୀ ହାର ବଢ଼ି ଚାଲିଛି
ନୂଆଦିଲ୍ଲୀ: ଦେଶରେ ବେକାରୀ ହାର ବଢ଼ି ଚାଲିଛି। ସାମ୍ନାକୁ ଆସିଛି ଏଭଳି ଚିନ୍ତାଜନକ ଚିତ୍ର । ଗତ ୮ ବର୍ଷରେ ସରକାରୀ ଚାକିରି ପାଇଁ ୨୨.୦୫ କୋଟି ଆବେଦନ କରାଯାଇଥିବାବେଳେ ମାତ୍ର ୭.୨୨ ଲକ୍ଷ ଲୋକଙ୍କୁ ନିଯୁକ୍ତି ମିଳିଛି। କେନ୍ଦ୍ର ସରକାରଙ୍କ ପକ୍ଷରୁ ସଂସଦରେ ଦିଆଯାଇଛି ଏହି ସୂଚନା । ବେକାରୀ ପ୍ରସଙ୍ଗରେ ସଂସଦରେ ବିରୋଧୀ ହଙ୍ଗାମା ଜାରି ରଖିଛନ୍ତି ।
ସରକାର ଏ ପ୍ରସଙ୍ଗରେ ଆଲୋଚନା କରିବାକୁ ପଛଘୁଞ୍ଚା ଦେଉଥିବା ସେମାନେ ଅଭିଯୋଗ କରିଛନ୍ତି । ଏହାକୁ ଏଡ଼ାଇବା ପାଇଁ ସରକାର ବିରୋଧୀ ସାଂସଦଙ୍କ ନିଲମ୍ବନକୁ ଅସ୍ତ୍ର କରିଥିବା କୁହାଯାଉଛି । ଲୋକସଭାରେ ଏକ ପ୍ରଶ୍ନର ଲିଖିତ ଉତ୍ତରରେ କାର୍ମିକ ରାଷ୍ଟ୍ରମନ୍ତ୍ରୀ ଜିତେନ୍ଦ୍ର ସିଂହ କହିଛନ୍ତି ଯେ ୨୦୧୪-୧୫ରୁ ୨୦୨୧-୨୨, ୮ବର୍ଷ ମଧ୍ୟରେ ୨୨.୦୫ କୋଟି ଆଶାୟୀ କେନ୍ଦ୍ର ସରକାରରେ ଚାକିରି ପାଇଁ ଆବେଦନ କରିଥିଲେ। ଏମାନଙ୍କ ମଧ୍ୟରୁ ୭.୨୨ ଲକ୍ଷଙ୍କୁ ଚାକିରି ମିଳିଛି । ସରକାର ନିଯୁକ୍ତି ସୁଯୋଗ ସୃଷ୍ଟିକୁ ପ୍ରାଧାନ୍ୟ ଦେଉଛନ୍ତି ବୋଲି ମନ୍ତ୍ରୀ କହିଛନ୍ତି । ଏଥିପାଇଁ ବିଭିନ୍ନ ପଦକ୍ଷେପ ନିଆଯାଉଥିବା ଉଲ୍ଲେଖ କରିଛନ୍ତି । ତେବେ ମନ୍ତ୍ରୀଙ୍କ ଉତ୍ତର ବିରୋଧୀ ସାଂସଦମାନଙ୍କୁ ସନ୍ତୁଷ୍ଟ କରିପାରିନାହିଁ ।
ସୂଚନା ଅନୁଯାୟୀ ୨୦୨୧-୨୨ରେ ୧, ୮୬, ୭୧, ୧୨୧ ଆବେଦନ କରାଯାଇଥିବାବେଳେ ମାତ୍ର ୩୮, ୮୫୦ ଜଣ ଚାକିରି ପାଇଥିଲେ। ସେହିପରି ୨୦୨୦-୨୧ରେ ୧, ୮୦, ୦୧, ୪୬୯ ଆବେଦନ ଏବଂ ୭୮, ୫୫୫ ନିଯୁକ୍ତି, ୨୦୧୯-୨୦ରେ ୧, ୭୮, ୩୯, ୭୫୨ ଆବେଦନ ଏବଂ ୧, ୪୭, ୦୯୬ ନିଯୁକ୍ତି, ୨୦୧୮-୧୯ରେ ୫, ୦୯, ୩୬, ୪୭୯ ଆବେଦନ ଏବଂ ୩୮, ୧୦୦ ନିଯୁକ୍ତି, ୨୦୧୭-୧୮ରେ ୩, ୯୪, ୭୬, ୮୭୮ ଆବେଦନ ଏବଂ ୭୬, ୧୪୭ ନିଯୁକ୍ତି, ୨୦୧୬-୧୭ରେ ୨, ୨୮, ୯୯, ୬୧୨ ଆବେଦନ ଏବଂ ୧,୦୧, ୩୩୩ ନିଯୁକ୍ତି, ୨୦୧୫-୧୬ରେ ୨,୯୫, ୫୧, ୮୪୪ ଆବେଦନ ଏବଂ ୧, ୧୧, ୮୦୭ ନିଯୁକ୍ତି, ୨୦୧୪-୧୫ରେ ୨,୩୨, ୨୨, ୦୮୩ ଆବେଦନ କରିଥିବାବେଳେ ୧, ୩୦, ୪୨୩ ନିଯୁକ୍ତି ପାଇଥିଲେ।
ସୋସିଆଲ ମିଡିଆର ବ୍ୟବହାର କରୁଛନ୍ତି କି? ରୁହନ୍ତୁ ସାବଧାନ
ନୂଆଦିଲ୍ଲୀ: ଯଦି ସୋସିଆଲ ମିଡିଆ ବ୍ୟବହାର କରୁଛନ୍ତି ତେବେ ବେଳହୁଁ ହୁଅନ୍ତୁ ସାବଧାନ। ମନଇଚ୍ଛା କୌଣସି ବ୍ୟକ୍ତି ବିରୋଧରେ କିଛି ପୋଷ୍ଟ କରନ୍ତୁ ନାହିଁ । ଯଦି ସୋସିଆଲ ମିଡିଆରେ ଏସସି ଓ ଏସଟି ବ୍ୟକ୍ତିଙ୍କ ବିରୋଧରେ କିଛି ମନ୍ତବ୍ୟ ପୋଷ୍ଟ କରୁଛନ୍ତି । ତେବେ ଏସସି/ଏସଟି ଆଇନ ଅନୁସାରେ କାର୍ଯ୍ୟାନୁଷ୍ଠାନର ଶିକାର ହୋଇପାରନ୍ତି ।
ଏନେଇ କେରଳ ହାଇକୋର୍ଟ ଏକ ମାମଲାର ଶୁଣାଣି କରିବା ସହ ଜଣେ ୟୁଟ୍ୟୁବରଙ୍କ ଆଗୁଆ ଜାମିନ ଆବେଦନକୁ ଖାରଜ କରିଛନ୍ତି। ୟୁଟ୍ୟୁବର ଜଣକ ବିଭିନ୍ନ ସୋସିଆଲ ମିଡିଆରେ ଜଣେ ତଫସିଲଭୁକ୍ତ ଜନଜାତି ବର୍ଗର ବ୍ୟକ୍ତିଙ୍କ ବିରୋଧରେ କେତେକ ଟିପ୍ପଣୀ ଦେବା ପରେ ତାଙ୍କ ନାମରେ ମାମଲା ରୁଜୁ ହୋଇଥିଲା।
କେରଳର ଟ୍ରୁ ଟିଭି ନାମକ ଏକ ଅନଲାଇନ ନ୍ୟୁଜ ପ୍ଲାଟଫର୍ମର ପରିଚାଳନା ନିର୍ଦ୍ଦେଶକଙ୍କ ଆଗୁଆ ଜାମିନ ଆବେଦନ ମାମଲାର ଶୁଣାଣି କରି କୋର୍ଟ ଏହି ରାୟ ଦେଇଛନ୍ତି। ପବ୍ଲିକ ପ୍ରସିକ୍ୟୁଟର କେ.ଏ. ନୌସାଦ ଯୁକ୍ତି ଦର୍ଶାଇଥିଲେ, ଡିଜିଟାଲ ଯୁଗରେ ଏସସି-ଏସଟି ଆଇନର ଆଭିମୁଖ୍ୟକୁ ଉପଯୁକ୍ତ ଭାବେ ପାଳନ କରିବାର ଆବଶ୍ୟକତା ରହିଛି। ମାମଲାର ଶୁଣାଣି କରି ଜଷ୍ଟିସ ବେଚୁ କୁରିଆନ ଥୋମାସ କହିଛନ୍ତି ଏସସି-ଏସଟି ବ୍ୟକ୍ତିଙ୍କ ବିରୋଧରେ କୌଣସି ଅଶାଳୀନ ବା ଅରୁଚିକର ଟିପ୍ପଣୀ ଏସସି-ଏସଟି ଆଇନର ପରିସରଭୁକ୍ତ ହେବ।
ଘରୋଇ ବ୍ୟାଙ୍କଗୁଡିକର ପ୍ରଦର୍ଶନ ନୈରାଶ୍ୟଜନକ: ମୁଖ୍ୟ ଶାସନ ସଚିବ
ଭୁବନେଶ୍ୱର: ଘରୋଇ ବ୍ୟାଙ୍କଗୁଡିକର ପ୍ରଦର୍ଶନ ନୈରାଶ୍ୟଜନକ। ବିଭିନ୍ନ ସମୀକ୍ଷା ବୈଠକରେ ଏହା ପ୍ରତିଫଳିତ ହେଉଥିଲେ ମଧ୍ୟ ସରକାରୀ ଦେୟ, କେନ୍ଦ୍ରୀୟ ଓ ରାଜ୍ୟ ସରକାରଙ୍କ ଅନୁଦାନ ରାଶି ଆଦି ଏହି ଘରୋଇ ବ୍ୟାଙ୍କଗୁଡିକରେ ଜମା ରଖିବା ନିମନ୍ତେ ସରକାରୀ ବାବୁମାନେ ବେଶୀ ଆଗ୍ରହୀ। ଏନେଇ କ୍ଷୋଭ ପ୍ରକାଶ କରିଛନ୍ତି ମୁଖ୍ୟ ଶାସନ ସଚିବ ସୁରେଶ ମହାପାତ୍ର।
ତେବେ ଅଧିକାଂଶ ଘରୋଇ ବ୍ୟାଙ୍କଗୁଡିକର ରାଜ୍ୟ ବିକାଶରେ ଅବଦାନ ଅତ୍ୟନ୍ତ ନଗଣ୍ୟ। ଘରୋଇ ବ୍ୟାଙ୍କଗୁଡିକର ଜମା ଓ ଋଣ ଅନୁପାତ ଅତ୍ୟନ୍ତ ନୈରାଶ୍ୟଜନକ। ବିଭିନ୍ନ ସରକାରୀ କାର୍ଯ୍ୟକ୍ରମ, ଚାଷୀ ଓ ମହିଳା ସ୍ବୟଂ ସହାୟକ ଗୋଷ୍ଠୀକୁ ଋଣ ପ୍ରଦାନ ହାର ନିରୁତ୍ସାହଜନକ। ଯୁବଗୋଷ୍ଠୀକୁ ଆତ୍ମନିର୍ଭରଶୀଳ କରିବା କ୍ଷେତ୍ରରେ ଏହି ବ୍ୟାଙ୍କ ଗୁଡିକ ଅମନଯୋଗୀ। ବିଭିନ୍ନ ସମୟରେ ସମୀକ୍ଷା ବୈଠକରେ ଏହା ପ୍ରତିଫଳିତ ହୋଇଛି ।
ଅପରପକ୍ଷେ ଘରୋଇ ବ୍ୟାଙ୍କ ପରିବର୍ତ୍ତେ ରାଷ୍ଟ୍ରାୟତ୍ତ ବ୍ୟାଙ୍କରେ ସରକାରୀ ଅର୍ଥ ଜମା ରଖିବାକୁ ମୁଖ୍ୟଶାସନ ସଚିବ ବିଭିନ୍ନ ବିଭାଗକୁ ପରାମର୍ଶ ଦେଇଛନ୍ତି। ରାଜ୍ୟରେ ଚାଷୀଙ୍କୁ ଯେତିକି ଅର୍ଥ ଋଣ ପ୍ରଦାନ କରାଯାଉଛି ତାହାର ସିଂହଭାଗ ସମବାୟ ବ୍ୟାଙ୍କ ପ୍ରଦାନ କରୁଛି। ମୋଟ ଋଣର ୫୦ ପ୍ରତିଶତରୁ ଅଧିକ କେବଳ ସମବାୟ ବ୍ୟାଙ୍କ ମଞ୍ଜୁର କରୁଛି। ଅନୁରୂପ ଭାବେ ରାଷ୍ଟ୍ରାୟତ୍ତ ବ୍ୟାଙ୍କଗୁଡିକର ପ୍ରଦର୍ଶନ ୫୫ ପ୍ରତିଶତ ରହିଥିବାବେଳେ ଘରୋଇ ବ୍ୟାଙ୍କଗୁଡିକ ଏ କ୍ଷେତ୍ରରେ ମାତ୍ର ୧୫ ଦଶମିକ ୫୪ ପ୍ରତିଶତ ସଫଳତା ହାସଲ କରିଛନ୍ତି। ତେଣୁ ଘରୋଇ ବ୍ୟାଙ୍କ ପରିବର୍ତ୍ତେ ସରକାରୀ ବ୍ୟାଙ୍କରେ ସରକାରୀ ଅର୍ଥ ଜମା ରଖିବା ନିମନ୍ତେ ଅନେକ ସମୟରେ ମତ ପ୍ରକାଶ ପାଉଛି।
ଗାନ୍ଧି ପ୍ରତିମୂର୍ତ୍ତି ତଳେ ଧାରଣାରେ ସାଂସଦ, ମଶାରି ଭିତରେ କଟୁଛି ରାତି
ନୂଆଦିଲ୍ଲୀ: ଥମୁନି ସଂସଦର ସସ୍ପେଣ୍ଡ ବିବାଦ । ୫୦ଘଣ୍ଟାର ଧାରଣାରେ ସଂସଦରୁ ନିଲମ୍ବିତ ସାଂସଦ। ଏପରିକି ମହାତ୍ମା ଗାନ୍ଧି ପ୍ରତିମୂର୍ତ୍ତି ତଳେ ସାଂସଦମାନେ ମଶାରି ଟାଣି ଦୁଇ ରାତି କଟାଇଛନ୍ତି। ମୁଦ୍ରାସ୍ଫୀତି, ଦରବୃଦ୍ଧି, ପ୍ରବର୍ତ୍ତନ ନିର୍ଦ୍ଦେଶାଳୟ ପରି କେତେକ ସଂସ୍ଥାକୁ ଅପବ୍ୟବହାରକୁ ପ୍ରସଙ୍ଗ କରି ବିରୋଧୀ ଦଳର ସାଂସଦମାନେ ପ୍ରତିବାଦ କରିବାରୁ ୨୭ ସାଂସଦଙ୍କୁ କରାଯାଇଥିଲା ନିଲମ୍ବନ।
ଗଣତାନ୍ତ୍ରିକ ଅଧିକାର ଲାଗି ଲଢେଇ କରୁଥିବାବେଳେ ସେମାନଙ୍କୁ ଗୃହରୁ ନିଲମ୍ବନ ଅଗଣତାନ୍ତ୍ରିକ ବୋଲି କହିଛନ୍ତି ସାଂସଦ । ଧାରଣା ଦେଇଥିବା ସାଂସଦମାନଙ୍କ ମଧ୍ୟରେ ଅଛନ୍ତି ଆମ୍ ଆଦମି ପାର୍ଟି ନେତା ସଞ୍ଜୟ ସିଂ, ଟିଏମସି ନେତା ଶାନ୍ତନୁ ସେନ, ଡୋଲା ସେନ, ଆବିର ରଞ୍ଜନ ବିଶ୍ବାସ, ଟିଆରଏସ ସାଂସଦ ରବିଚନ୍ଦ୍ର ବଧିରାଜୁ। ଏହା ସହ ଡିଏମକେ ଓ ବାମପନ୍ଥୀ ଦଳରେ କେତେକ ସାଂସଦ ମଧ୍ୟ ରହିଛନ୍ତି।
ସୂଚନା ଅନୁସାରେ ବୁଧବାର ଦିନ ୧୧ଟାରୁ ଆରମ୍ଭ ହୋଇଥିବା ଏହି ଧାରଣା ଶୁକ୍ରବାର ଦ୍ୱିପ୍ରହର ୧ଟା ଯାଏଁ ଚାଲିବ। ଖାସ୍ କଥା ହେଉଛି ଭୋକ ଉପାସରେ ନୁହେଁ ବରଂ ଖାଇପିଇ ଧାରଣାରେ ବସିଛନ୍ତି ସାଂସଦ । ଯେଉଁଥିରେ ବ୍ରେକଫାଷ୍ଟ, ଲଞ୍ଚ ଓ ଡିନର ସାମିଲ ସହ ସମସ୍ତ ସୁବିଧା କରାଯାଇଛି। ଖାଇବା ପିଇବାରେ ଭାତ, ଦୋସା, ହାଲୱା, ଚିକେନ୍, ଗାଜର ହାଲୱା ମଧ୍ୟ ସାମିଲ ରହିଛି। ଖାଦ୍ୟପେୟର ଭାର ସମ୍ଭାଳିଛନ୍ତି AAP, TMC ଓ DMK।
ଗିରଫ ଦାବିରେ ସବୁଠି ଲାଗିଛି ସମ୍ବଲପୁର ବିଶ୍ୱବିଦ୍ୟାଳୟ କୁଳପତିଙ୍କ ପୋଷ୍ଟର
ବୁର୍ଲା: ପୁଣି ଚର୍ଚ୍ଚାରେ ସମ୍ବଲପୁର ବିଶ୍ୱବିଦ୍ୟାଳୟ କୁଳପତି। କୁଳପତି ପ୍ରଫେସର ସଞ୍ଜିବ ମିତ୍ତଲଙ୍କୁ ଗିରଫ ପାଇଁ ସହର ସାରା ପୋଷ୍ଟର ଲଗାଯାଇଛି । ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖ ଫ୍ଲାଇଓଭର ପିଲରରେ ମଧ୍ୟ ଏହି ପୋଷ୍ଟର ଲଗାଯାଇଥିବା ଦେଖିବାକୁ ମିଳିଛି।
ଗତକାଲି ରାତିରେ ଏହି ପୋଷ୍ଟର ଲଗାଯାଇଥିବା ସନ୍ଦେହ କରାଯାଉଛି। ତେବେ ପ୍ରଶ୍ନପତ୍ର ଲିକ୍ ଓ କିରାଣି ଦୀନବନ୍ଧୁ ମିଶ୍ର ଆତ୍ମାହୁତି ଘଟଣାକୁ ନେଇ ୟୁନିଭରସିଟି ଚର୍ଚ୍ଚାରେ ଥିବା ବେଳେ କେଉଁ ଘଟଣାକୁ ନେଇ ଏହି ପୋଷ୍ଟର ଲଗାଯାଇଛି ତାହା ଜଣାପଡ଼ିନି। ବିଶ୍ୱବିଦ୍ୟାଳୟ ପରିସରରୁ ବେଆଇନ ଗଛ କଟା ଓ ଲାଇବ୍ରେରୀ ପୋଡିକୁ ନେଇ ମଧ୍ୟ ଜୋରଦାର ଚର୍ଚ୍ଚା ହୋଇଥିଲା ।
ଧାରଣା ବନାମ ମଉଜ; ଗାନ୍ଧୀ ମୂର୍ତ୍ତି ତଳେ ଧାରଣା ସହ ସାଂସଦଙ୍କ ଭୋଜିଭାତ
ନୂଆଦିଲ୍ଲୀ: ହୋହଲ୍ଲା ଭିତରେ ଚାଲିଛି ରାଜ୍ୟସଭା ଓ ଲୋକସଭା। ଏହା ମଧ୍ୟରେ ନିଲମ୍ବିତ ହେଲେଣି ୨୭ ସାଂସଦ। ଫଳରେ ବିରୋଧୀଙ୍କ ମଧ୍ୟରେ ଅସନ୍ତୋଷ ବଢିଛି। ଏପରିକି ନିଲମ୍ବିତ ସାଂସଦ ମାନେ ସଂସଦ ଭବନ ପରିସରରେ ଥିବା ଗାନ୍ଧୀ ମୂର୍ତ୍ତି ତଳେ ଧାରଣା କରୁଛନ୍ତି । ୫୦ ଘଣ୍ଟିଆ ଧାରଣା ସିଫ୍ଟ ଅନୁଯାୟୀ ଚାଲିଛି। ସୂଚନା ଅନୁସାରେ ବୁଧବାର ଦିନ ୧୧ଟାରୁ ଆରମ୍ଭ ହୋଇଥିବା ଏହି ଧାରଣା ଶୁକ୍ରବାର ଦ୍ୱିପ୍ରହର ୧ଟା ଯାଏଁ ଚାଲିବ।
ଖାସ୍ କଥା ହେଉଛି ଭୋକ ଉପାସରେ ନୁହେଁ ବରଂ ଖାଇପିଇ ଧାରଣାରେ ବସିଛନ୍ତି ସାଂସଦ । ଯେଉଁଥିରେ ବ୍ରେକଫାଷ୍ଟ, ଲଞ୍ଚ ଓ ଡିନର ସାମିଲ ସହ ସମସ୍ତ ସୁବିଧା କରାଯାଇଛି। ଖାଇବା ପିଇବାରେ ଭାତ, ଦୋସା, ହାଲୱା, ଚିକେନ୍, ଗାଜର ହାଲୱା ମଧ୍ୟ ସାମିଲ ରହିଛି। ଖାଦ୍ୟପେୟର ଭାର ସମ୍ଭାଳିଛନ୍ତି AAP, TMC ଓ DMK।
ବୁଧବାର ଦିନ DMK ସାଂସଦ ତିରୁଚି ଶିବା ଧାରଣାରତ ସାଂସଦଙ୍କୁ ବ୍ରେକଫାଷ୍ଟରେ ଦୋସା ଖୁଆଇଛନ୍ତି । ଡିନର ଦାୟିତ୍ୱ ତୁଲାଇଥିଲା କଂଗ୍ରେସ। ଗୁରୁବାର ଦିନ, ଡିନର ଦାୟିତ୍ୱ ପଡିଛି AAP କାନ୍ଧରେ ।
ତେବେ ରାଜ୍ୟସଭାରେ ମଙ୍ଗଳବାର ଦିନ ବିରୋଧୀଙ୍କ ୧୯ ସାଂସଦଙ୍କୁ ନିଲମ୍ବିତ କରାଯାଇଥିଲା । ଯେଉଁଥିରେ TMCର ୭ ସାଂସଦ ଥିଲେ । ପରେ ବୁଧବାର ଦିନ ସାଂସଦ ସଞ୍ଜୟ ସିଂହଙ୍କୁ ସସପେଣ୍ଡ କରାଯାଇଥିଲା।
ମଙ୍କିପକ୍ସ ମୁକାବିଲା ପାଇଁ ପ୍ରସ୍ତୁତ ରାଜ୍ୟ ସରକାର
କଟକ: ମଙ୍କିପକ୍ସର ମୁକାବିଲା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ରାଜ୍ୟ ସରକାର। କଟକ ଏସସିବି ମେଡିକାଲରେ ହୋଇଛି ସ୍ବତନ୍ତ୍ର ବ୍ୟବସ୍ଥା । ଏଥିପାଇଁ ସଂକ୍ରମଣ ରୋଗ ବିଭାଗରେ ଦୁଇଟି ବେଡ଼ ସହ ୨ଟି ଆଇସୋଲେସନ କ୍ୟାବିନ ପ୍ରସୁତ ରହିଛି। ମେଡିସିନ ବିଭାଗ ଆଇସିୟୁରେ ୪ଟି ବେଡ୍ ବ୍ୟବସ୍ଥା କରାଯାଇଛି।
ଏହାଛଡ଼ା କଟକ ଏସସିବି ମେଡିକାଲରେ ୨୪ ଘଣ୍ଟିଆ କଣ୍ଟ୍ରୋଲ ରୁମ ଖୋଲାଯାଇଛି। ୫ଟି ବିଭାଗର ଡାକ୍ତରଙ୍କୁ ନେଇ ଗଠନ କରାଯାଇଛି ସ୍ବତନ୍ତ୍ର ଟିମ୍। ଯେଉଁଥିରେ ମେଡିସନ, ଚର୍ମରୋଗ, ମାଇକ୍ରୋ ବାୟୋଲୋଜି ,ଶିଶୁ ରୋଗ, ଏସପିଏମ ବିଶେଷଜ୍ଞ ରହିଛନ୍ତି । ଆହାଛଡ଼ା ସମସ୍ତ ଦିଗ ଉପରେ ନଜର ରଖିବାକୁ ଜଣେ ନୋଡାଲ ଅଫିସରଙ୍କୁ ନିଯୁକ୍ତ କରାଯାଇଛି।
ତେବେ ମଙ୍କପକ୍ସ ଆକ୍ରାନ୍ତଙ୍କୁ ସଠିକ ଭାବେ ଚିହ୍ନଟ ଓ ଚିକିତ୍ସା ବ୍ୟବସ୍ଥାକୁ ଗୁରୁତ୍ବ ଦିଆଯାଇଥିବା କହିଛନ୍ତି ମେଡିସନ ବିଭାଗର ବିଭାଗୀୟ ମୁଖ୍ୟ ତଥା ମଙ୍କିପକ୍ସ କମିଟି ଅଧକ୍ଷ ।