ଭୁବେନଶ୍ବର: ଆଜି ପୁଣି ଅଶାନ୍ତ ହୋଇ ଥିଲା ଦାରୁଠେଙ୍ଗ । ବିଏମସି ଅଳିଆ ଗାଡ଼ି ଧକ୍କାରେ ଜଣଙ୍କ ମୃତ୍ୟୁ ପରେ ଦେଖା ଦେଇଥିଲା ଅଶାନ୍ତି । ସ୍ଥାନୀୟ ଲୋକେ ରାସ୍ତାରୋକ କରିବା ସହ ହୋହାଲ୍ଲା କରିଥିଲେ । ସ୍ଥିତି ବିଗୁଡି ଥିବା ବେଳେ ବିଏମସି କମିଶନର ଏବଂ ମେୟର ଘଟଣା ସ୍ଥଳରେ ପହଞ୍ଚି ଆଲୋଚନା କରିବା ସହ କ୍ଷତିପୂରଣ ପ୍ରତିଶ୍ରୁତି ଦେବା ପରେ ଉତ୍ତେଜନା ଥମିଥିଲା ।
ସୂଚନାଯୋଗ୍ୟ, ଭୁବନେଶ୍ୱର ଉପକଣ୍ଠ ଦାରୁଠେଙ୍ଗରେ ଥିବା ଭୂଆଶୁଣୀ ଡମ୍ପିଂୟାର୍ଡରେ ଅଳିଆ ଗାଡ଼ି ଧକ୍କାରେ ଆଜି ସକାଳୁ ବେଣ୍ଟୁଆ ଗାଁର ରାମ ଘାଗରାଇଙ୍କ ମୃତ୍ୟୁ ଘଟିଥିଲା । ଯାହାକୁ ନେଇ ଉତ୍ତେଜନା ଦେଖା ଦେଇଥିଲେ । ଘଟଣାସ୍ଥଳରେ ବିଏମସି କମିଶନର ଓ ମେୟର ପହଞ୍ଚି ବିଧାୟକ ସୁର ରାଉତରାୟ ଓ ଦାରୁଠେଙ୍ଗବାସୀଙ୍କ ସହ ଆଲୋଚନା କରିଥିଲେ । ଆଲୋଚନାରେ ମୃତକଙ୍କ ପରିବାରକୁ ୫ ଲକ୍ଷ ଟଙ୍କାର ଅନୁକମ୍ପାମୂଳକ ସହାୟତା ପ୍ରଦାନ କରାଯିବା ସହ ପରିବାରର ଜଣଙ୍କୁ ଚାକିରି ପ୍ରଦାନ କରିବାକୁ ମେୟର ସୁଲୋଚନା ଦାସ ଘୋଷଣା କରିଥିଲେ । ଏହାସହ ଡମ୍ପିଂୟାର୍ଡ ଅଞ୍ଚଳରେ ଟ୍ରାଫିକ ବ୍ୟବସ୍ଥା ନହେବା ଯାଏଁ ଡମ୍ପିଂୟାର୍ଡ ବନ୍ଦ ରହିବ ବୋଲି ମେୟର ଘୋଷଣା କରିଛନ୍ତି ।
ଆଲୋଚନା ପରେ ରାସ୍ତାରୋକ ହଟିବା ସହ ମୃତଦେହ ବ୍ୟବଚ୍ଛେଦ ପାଇ ପଠାଯାଇଛି । ୨ ମାସ ତଳେ ଡମ୍ପିଂୟାଡ ଗାଡ଼ି ଧକ୍କାରେ ଜଣେ ଯୁବକର ମୃତ୍ୟୁ ହୋଇଥିଲା ।
