କଟକ: ବାରବାଟୀ ଷ୍ଟାଡିୟମରେ ହେବାକୁଥିବା ଲିଜେଣ୍ଡସ୍ ଲିଗ କ୍ରିକେଟ ଟି-୨୦ ପାଇଁ ଆଜିଠୁ କାଉଣ୍ଟରରେ ବିକ୍ରି ହେବ ଟିକେଟ । ଅଫଲାଇନ କାଉଣ୍ଟରରେ ୮ହଜାର ୪୨୧ ଟି ଟିକେଟ ବିକ୍ରି ହେବ । ୨ ନମ୍ବର ଗ୍ୟାଲେରୀର ୩ହଜାର ୭୩୯ ଟିକେଟ ୪ ନମ୍ବର ଗ୍ୟାଲେରୀର ୪୨୩୨, କ୍ଲବ ହାଉସର ୩୫୦ ଓ କର୍ପୋରେଟ ବକ୍ସର ୬୦ ଟି ଟିକେଟ୍ ବିକ୍ରି ହେବ । ଗ୍ୟାଲେରୀ ଟିକେଟ ଦାମ ୩୫୦ ଟଙ୍କା ଥିବା ବେଳେ କ୍ଲବ ହାଉସ ଟିକେଟ ୧୨୦୦ ଓ କର୍ପୋରେଟ ବକ୍ସ ଟିକେଟ ଦାମ ୪୮୦୦ ରହିଛି । ପୂର୍ବାହ୍ନ ୧୦ଟାରୁ ଅପରାହ୍ନ ୫ଟା ପର୍ଯ୍ୟନ୍ତ ଟିକେଟ ବିକ୍ରି ହେବ । ଆସନ୍ତା ୨୬, ୨୭ ଓ ୨୯ ତାରିଖରେ ଲିଜେଣ୍ଡସ କ୍ରିକେଟ T-20 ମ୍ୟାଚ୍ ଖେଳାଯିବ।
ଜିଲ୍ଲା ଯୋଜନା କମିଟି ଅଧ୍ୟକ୍ଷ ଘୋଷଣା, ୧୯ ମନ୍ତ୍ରୀ, ୧୧ ବିଧାୟକଙ୍କୁ ନୂଆ ଦାୟିତ୍ୱ
ଭୁବନେଶ୍ୱର: ପ୍ରକାଶ ପାଇଲା ଜିଲ୍ଲା ଯୋଜନା କମିଟି ଅଧ୍ୟକ୍ଷଙ୍କ ନାଁ । ୧୯ ଜଣ ମନ୍ତ୍ରୀଙ୍କୁ ବିଭିନ୍ନ ଜିଲ୍ଲାର ଯୋଜନା କମିଟି ଅଧ୍ୟକ୍ଷ ଭାବେ ନିଯୁକ୍ତ କରାଯାଇଛି । ସେହିଭଳି ୧୧ ଜଣ ବିଧାୟକଙ୍କୁ ମଧ୍ୟ ବିଭିନ୍ନ ଜିଲ୍ଲାର ଦାୟିତ୍ୱ ଦିଆଯାଇଛି । ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡାଙ୍କୁ ଅନୁଗୁଳ ଜିଲ୍ଲା ଯୋଜନା କମିଟି ଅଧ୍ୟକ୍ଷ ଭାବେ ନିଯୁକ୍ତ କରାଯାଇଥିବା ବେଳେ, ରୋହିତ ପୂଜାରୀଙ୍କୁ ବଲାଙ୍ଗୀର, ରାଜେନ୍ଦ୍ର ଢୋଲକିଆଙ୍କୁ ଦେବଗଡ଼, ବାସନ୍ତୀ ହେମ୍ବ୍ରମଙ୍କୁ ଢେଙ୍କାନାଳ, ଜଗନ୍ନାଥ ସାରକାଙ୍କୁ ଗଜପତି, ପ୍ରଫୁଲ୍ଲ ମଲ୍ଲିକଙ୍କୁ ଗଞ୍ଜାମ, ପ୍ରମିଳା ମଲ୍ଲିକଙ୍କୁ ଜଗତସିଂହପୁର, ସମୀର ରଞ୍ଜନ ଦାଶଙ୍କ ଯାଜପୁର, ପ୍ରୀତିରଞ୍ଜନ ଘଡ଼ାଇଙ୍କୁ ଝାରସୁଗୁଡ଼ା, ନବକିଶୋର ଦାସଙ୍କୁ କଳାହାଣ୍ଡି, ଶ୍ରୀକାନ୍ତ ସାହୁଙ୍କୁ କନ୍ଧମାଳ, ରଣେନ୍ଦ୍ର ପ୍ରତାପ ସ୍ୱାଇଁଙ୍କୁ କେନ୍ଦ୍ରାପଡ଼ା, ତୁଷାରକାନ୍ତି ବେହେରାଙ୍କୁ ମାଲକାନଗିରି, ଅଶ୍ୱିନୀ ପାତ୍ରଙ୍କୁ ମୟୂରଭଞ୍ଜ, ଟୁକୁନି ସାହୁଙ୍କୁ ନୂଆପଡ଼ା, ନିରଞ୍ଜନ ପୂଜାରୀଙ୍କୁ ପୁରୀ, ଅତନୁ ସବ୍ୟସାଚୀ ନାୟକଙ୍କୁ ରାୟଗଡ଼ା, ପ୍ରତାପ କେଶରୀ ଦେବଙ୍କୁ ସମ୍ବଲପୁର, ପ୍ରଦୀପ କୁମାର ଅମାତଙ୍କୁ ସୁବର୍ଣ୍ଣପୁର ଜିଲ୍ଲା ଯୋଜନା କମିଟି ଅଧ୍ୟକ୍ଷ ଭାବେ ନିଯୁକ୍ତ କରାଯାଇଛି ।
ସେହିପରି ଭୋଗରାଇ ବିଧାୟକ ଅନନ୍ତ ଦାସଙ୍କୁ ବାଲେଶ୍ୱର, ଦେବେଶ ଆଚାର୍ଯ୍ୟଙ୍କୁ ବରଗଡ଼, ବ୍ୟୋମକେଶ ରାୟଙ୍କୁ ଭଦ୍ରକ, ମହିଧର ରଣାଙ୍କୁ ବୌଦ୍ଧ, ପ୍ରମୋଦ ମଲ୍ଲିକଙ୍କୁ କଟକ, ଜଗନ୍ନାଥ ନାୟକଙ୍କୁ କେନ୍ଦୁଝର, ରାଜେନ୍ଦ୍ର ସାହୁଙ୍କୁ ଖୋର୍ଦ୍ଧା, ରଘୁରାମ ପୋଡାଲଙ୍କୁ କୋରାପୁଟ, ମନୋହର ରନ୍ଧାରୀଙ୍କୁ ନବରଙ୍ଗପୁର, ସତ୍ୟନାରାୟଣ ପ୍ରଧାନଙ୍କୁ ନୟାଗଡ଼ ଓ ଶାରଦା ପ୍ରସାଦ ନାୟକଙ୍କୁ ସୁନ୍ଦରଗଡ଼ ଜିଲ୍ଲା ଯୋଜନା କମିଟି ଅଧ୍ୟକ୍ଷ ଭାବେ ନିଯୁକ୍ତ କରାଯାଇଛି ।
ଆଜି ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଟି-୨୦ ସିରିଜ୍ର ନିର୍ଣ୍ଣାୟକ ମ୍ୟାଚ୍
ନାଗପୁର: ଆଜି ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ର ଦ୍ଵିତୀୟ ମୁକାବିଲା । ନାଗପୁରର ବିଦର୍ଭ କ୍ରିକେଟ୍ ଆସୋସିଏସନ ଷ୍ଟାଡିୟମରେ ଖେଳାଯିବ ମ୍ୟାଚ୍ । ମୋହାଲିରେ ଶୋଚନୀୟ ପରାଜୟ ପରେ ଟିମ୍ ଇଣ୍ଡିଆ ନାଗପୁରରେ କର ବା ମର ପରିସ୍ଥିତିର ସାମ୍ନା କରିବ। ମ୍ୟାଚ୍ ହାରିଲେ ଦଳ ଘରୋଇ ମାଟିରେ ସିରିଜ୍ ହାରିବ। ଏହି ନିର୍ଣ୍ଣାୟକ ମ୍ୟାଚ୍ ପୂର୍ବରୁ ଭାରତୀୟ ପ୍ରଶଂସକଙ୍କ ପାଇଁ କିଛିଟା ଚିନ୍ତାର ବିଷୟ ରହିଛି। ଭାରତୀୟ ଅଧିନାୟକ ରୋହିତ ଶର୍ମା ବହୁ ସମୟରୁ ବଡ ଇନିଂସର ସନ୍ଧାନରେ ଅଛନ୍ତି। ଗତ କିଛି ମ୍ୟାଚ୍ରେ ସେ ଭଲ ଆରମ୍ଭ କରୁଥିଲେ ବି ବଡ଼ ସ୍କୋର କରିବାରେ ବିଫଳ ହୋଇଛନ୍ତି । ମୋହାଲିରେ ହିଟ୍ ମ୍ୟାନ୍ କେବଳ ୧୧ ରନ କରି ଆଉଟ୍ ହୋଇଥିଲେ। ନାଗପୁରରେ ତାଙ୍କର ବ୍ୟାଟିଂ ରେକର୍ଡ ନିରାଶଜନକ ରହିଛି। ଏବେ ସିରିଜ୍ ୧-୦ରେ ଆଗୁଆ ଅଛି ଅଷ୍ଟ୍ରେଲିଆ।
ଆସିଲା ମନ୍ତ୍ରୀଙ୍କ ଦାଖଲ ସମ୍ପତ୍ତି ତାଲିକା, ମୁଖ୍ୟମନ୍ତ୍ରୀଙ୍କ ସମ୍ପତ୍ତି ୬୪ କୋଟି ୯୭ ଲକ୍ଷ
ଭୁବନେଶ୍ୱର: ଆସିଲା ମୁଖ୍ୟମନ୍ତ୍ରୀଙ୍କ ସମେତ ସମସ୍ତ ମନ୍ତ୍ରୀ ଦାଖଲ ସମ୍ପତ୍ତି ତାଲିକା। ସିଏମଓ ୱେବସାଇଟରେ ସମସ୍ତ ମନ୍ତ୍ରୀଙ୍କର ସ୍ଥାବର ଓ ଅସ୍ଥାବାର ସମ୍ପତ୍ତି ତାଲିକା ପ୍ରକାଶ ପାଇଛି । ୨୦୨୧ ଡିସେମ୍ବର ୩୧ ସୁଦ୍ଧା କେଉଁ ମନ୍ତ୍ରୀଙ୍କର କେତେ ସମ୍ପତ୍ତି ରହିଛି, ତାହା ପ୍ରକାଶ କରାଯାଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମ୍ପତ୍ତି ୨୦୨୧ ଡିସେମ୍ବର ୩୧ ସୁଦ୍ଧା ମୋଟ ସମ୍ପତ୍ତିର ପରିମାଣ ହେଉଛି ୬୪ କୋଟି ୮୯ ହଜାର ୨୨୦ ଟଙ୍କା ।
ମୁଖ୍ୟମନ୍ତ୍ରୀଙ୍କର ଦିଲ୍ଲୀ ଜନପଥ ବ୍ୟାଙ୍କରେ ୭୨ ଲକ୍ଷ ଟଙ୍କା ରହିଛି। ସେହିପରି ଭୁବନେଶ୍ୱର ଷ୍ଟେଟ୍ ବ୍ୟାଙ୍କରେ ୨୧ ଲକ୍ଷ ୭୧ ହଜାର ଟଙ୍କା, ହିଞ୍ଜିଳିକାଟୁ ଷ୍ଟେଟ୍ ବ୍ୟାଙ୍କରେ ୭ ହଜାର ୭୪ ଟଙ୍କା ଓ ହିଞ୍ଜିଳିକାଟୁ କଲେଜ କ୍ୟାମ୍ପସରେ ଥିବା ଷ୍ଟେଟ୍ ବ୍ୟାଙ୍କ ଆକାଉଣ୍ଟରେ ୧୪ ହଜାର ୪୮୮ ଟଙ୍କା ରହିଥିବା ମୁଖ୍ୟମନ୍ତ୍ରୀ ଦର୍ଶାଇଛନ୍ତି । ସ୍ୱାସ୍ଥ୍ୟମନ୍ତ୍ରୀ ନବକିଶୋର ଦାସ ସମ୍ପତ୍ତି ତାଲିକାରେ ଆଗରେ ଅଛନ୍ତି।
ଆଜିଠୁ ଶୁଖିଲା ରହିବ ପାଗ, ଆସନ୍ତା ୫ଦିନ ପର୍ଯ୍ୟନ୍ତ ରାଜ୍ୟରେ ନାହିଁ ବର୍ଷା
ଭୁବନେଶ୍ୱର: ଆଜିଠୁ ଶୁଖିଲା ରହିବ ପାଗ । ଆସନ୍ତା ୫ଦିନ ପର୍ଯ୍ୟନ୍ତ ରାଜ୍ୟରେ ନାହିଁ ବିଶେଷ ବର୍ଷା । ଲଘୁଚାପ ପ୍ରଭାବ କମିବା ଫଳରେ ବର୍ଷାର ପରିମାଣ ଓ ବିସ୍ତୃତି କମିଛି । ହେଲେ ଆଭ୍ୟନ୍ତରୀଣ ଜିଲ୍ଲାର କିଛି ସ୍ଥାନରେ କାଳବୈଶାଖୀ ଜନିତ ବର୍ଷା ହୋଇପାରେ । ୨୪, ୨୬ ଓ ୨୭ ତାରିଖରେ ସ୍ଥାନେ ସ୍ଥାନେ କାଳବୈଶାଖୀ ପ୍ରଭାବରେ ବର୍ଷା ହୋବାର ସମ୍ଭାବନା ରହିଛି । ୨୮ ତାରିଖ ପରେ ଆଉ ଏକ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ରହିଛି । ଫଳରେ ଓଡ଼ିଶାର କିଛି କିଛି ସ୍ଥାନରେ ସ୍ୱଳ୍ପରୁ ମଧ୍ୟମ ଧରଣର ବର୍ଷାର ସମ୍ଭାବନା ରହିଛି। ସେପଟେ ଏଯାବତ ମୌସୁମୀ ଋତୁରେ ୧୧୫୩ ଦଶମିକ ୩ ମିଲିମିଟର ବର୍ଷା ରେକର୍ଡ ହୋଇଛି । ଯାହା ସ୍ୱାଭାବିକ ବର୍ଷା ତୁଳନାରେ ୫ ପ୍ରତିଶତ ଅଧିକ ବୋଲି ଜଣାପଡ଼ିଛି । ଏପର୍ଯ୍ୟନ୍ତ ରାଜ୍ୟରେ ୫ଜିଲ୍ଲାରେ ସ୍ୱାଭାବିକଠାରୁ ଅଧିକ ଏବଂ ୨୫ ଜିଲ୍ଲାରେ ସ୍ୱାଭାବିକ ବର୍ଷା ରେକର୍ଡ କରାଯାଇଛି । ଯାହା ଆଗାମୀ ଧାନ ଚାଷ ପାଇଁ ବେଶ ଅନୁକୂଳ ବୋଲି ପାଣିପାଗ ବୈଜ୍ଞାନୀ କହିଛନ୍ତି ।
ICUରେ ଓଲିଉଡ ଷ୍ଟାର ବାବୁସାନ, ଶରୀରରେ ଅମ୍ଳଜାନ ସ୍ତର କମି ଯିବାରୁ ହସ୍ପିଟାଲରେ ଭର୍ତ୍ତି
ଭୁବନେଶ୍ୱର: ଓଲିଉଡ୍ ସୁପରଷ୍ଟାର ବାବୁସାନ୍ ମହାନ୍ତି ଅସୁସ୍ଥ। ଶରୀରରେ ଅମ୍ଳଜାନ ସ୍ତର କମି ଯିବାରୁ ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି। ଦମନ ଫିଲ୍ମ ପ୍ରମୋସନ ବେଳେ ଅସୁସ୍ଥ ହୋଇଛନ୍ତି ବାବୁସାନ । ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି । ଦମନ ଫିଲ୍ମର ନିର୍ଦ୍ଦେଶକ ବିଶାଲ ମୌର୍ଯ୍ୟ ହସ୍ପିଟାଲରେ ବାବୁସାନଙ୍କର ଏକ ଫଟୋ ସେୟାର କରି ତାଙ୍କ ଆଶୁ ଆରୋଗ୍ୟ କାମନା କରିଛନ୍ତି ।
ଦମନ ଫିଲ୍ମର ପ୍ରମୋସନ ପାଇଁ ବାବୁସାନ ବାଇକରେ ଲଦାଖ ଯାଇଥିବା ବେଳେ ଅମ୍ଳଜାନସ୍ତର କମିଯିବାରୁ ସେ ଅସୁସ୍ଥ ହୋଇପଡ଼ିଥିଲେ । ଡାକ୍ତରଙ୍କ ପରାମର୍ଶକ୍ରମେ ତାଙ୍କ ଚିକିତ୍ସା କରାଯିବା ପରେ ତାଙ୍କୁ ଭୁବନେଶ୍ୱର ଅଣାଯାଇଥିଲା । ଭୁବନେଶ୍ୱରରେ ପହଞ୍ଚିବା ପରେ ପୁଣି ଅସୁସ୍ଥ ହେବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଏବେ ତାଙ୍କ ସ୍ୱାସ୍ଥ୍ୟାବସ୍ଥାରେ ସୁଧାର ଆସିଥିବା ସୂଚନା ମିଳିଛି ।
ଆଜି ଜାତୀୟ ସିନେମା ଦିବସ, ଯେକୌଣସି ସିନେମା ହଲରେ ମାତ୍ର ୭୫ ଟଙ୍କାରେ ଦେଖିପାରିବେ ଫିଲ୍ମ
ନୂଆଦିଲ୍ଲୀ: ଆଜି ଜାତୀୟ ସିନେମା ଦିବସ । ଏହି ଅବସରରେ ଆଜି ଆପଣ ଯେକୌଣସି ସିନେମା ହଲରେ ଯେକୌଣସି ଫିଲ୍ମ ମାତ୍ର ୭୫ ଟଙ୍କାରେ କିଣିପାରିବେ। ମଲ୍ଟିପ୍ଲେକ୍ସ ଆସୋସିଏସନ୍ ଅଫ୍ ଇଣ୍ଡିଆ ସମେତ ସାରା ଦେଶରେ ସିନେମା ଆଜି ଭାରତରେ ଜାତୀୟ ସିନେମା ଦିବସ ପାଳନ କରୁଛି । ଏଥିପାଇଁ ୭୫ ଟଙ୍କାରେ ଟିକେଟ ମିଳିବା ପାଇଁ ନିଷ୍ପତ୍ତି ନିଆଯାଇଛି । ଜାତୀୟ ସିନେମା ଦିବସ ପୂର୍ବରୁ ପାଳନ କରାଯାଇନଥିଲା । ଏହି ବର୍ଷ ଏହି ଧାରା ଆରମ୍ଭ ହୋଇଛି । କୋଭିଡ କାରଣରୁ ଦୁଇ ବର୍ଷର ଥିଏଟର ବନ୍ଦ ପରେ ପୁନଃ ଆରମ୍ଭ ହେବାର ଆନନ୍ଦରେ ଏହି ଦିନ ପାଳନ କରାଯାଉଛି। ପ୍ରେକ୍ଷାଳୟ ଦ୍ୱାରା କରାଯାଇଥିବା ଏହି ଘୋଷଣା ଦର୍ଶକଙ୍କୁ ସିନେମା ହଲକୁ ଫେରାଇ ଆଣିବା ପାଇଁ ଏକ ବଡ଼ ପଦକ୍ଷେପ। ଯେଉଁମାନେ ଲକଡାଉନ୍ ପରଠାରୁ ପ୍ରେକ୍ଷାଳୟକୁ ଯାଇ ନାହାଁନ୍ତି, ସେମାନଙ୍କୁ ସିନେମା ହଲକୁ ଯିବା ପାଇଁ ଆଜି ବଡ଼ ଦିନ । PVR, INOX, ସିନେପୋଲିସ୍, କାର୍ନିଭାଲ୍, ମିରାଜ୍ ଓ ସିଟିପ୍ରିଡ୍, ଏସୀୟ, ମୁଭିଟାଇମ୍ ସମେତ ଦେଶର ପ୍ରାୟ ୪ ହଜାର ସିନେମା ହଲରେ ୭୫ ଟଙ୍କାରେ ଟିକେଟ୍ କିଣି ଦର୍ଶକ ବିଭିନ୍ନ ଫିଲ୍ମ ଦେଖିପାରିବେ ।
ଆଖଣ୍ଡଳମଣୀ ପୀଠ ବିକାଶ କାମର ସମୀକ୍ଷା କରିବେ ମୁଖ୍ୟ ଶାସନ ସଚିବ ଓ ଫାଇଭ-ଟି ସଚିବ
ଭୁବନେଶ୍ୱର: କେତେ ବାଟ ଆଗେଇଛି ଭଦ୍ରକ ଆଖଣ୍ଡଳମଣୀ ପୀଠର ବିକାଶ କାମ । ଆଜି ଗ୍ରାଉଣ୍ଡ ଜିରୋରେ ସମୀକ୍ଷା କରିବେ ମୁଖ୍ୟ ଶାସନ ସଚିବ ଓ ଫାଇଭ-ଟି ସଚିବ । ଅପରାହ୍ଣ ୪ଟାରେ ମୁଖ୍ୟ ଶାସନ ସଚିବ ସୁରେଶ ମହାପାତ୍ର ଓ ଫାଇଭ-ଟି ସଚିବ ଭି. କେ ପାଣ୍ଡିଆନ ମନ୍ଦିର ପରିଦର୍ଶନ ସହ ଉନ୍ନତିମୂଳକ କାର୍ଯ୍ୟର ସମୀକ୍ଷା କରିବେ । ପ୍ରଥମ ପର୍ଯ୍ୟାୟରେ ମନ୍ଦିର ଓ ପୀଠ ପାଇଁ ଦିଆଯାଇଥିବା ୨୧ କୋଟି ଟଙ୍କାର କାର୍ଯ୍ୟ କେତେବାଟ ଆଗେଇଛି। ସେନେଇ ସମୀକ୍ଷା କରିବାର କାର୍ଯ୍ୟକ୍ରମ ରହିଛି।
ମନ୍ଦିର ପାଇଁ ୬ କୋଟି, ସାଇନ୍ସ ସିଟି ପାଇଁ ୬ କୋଟି ୬୦ ଲକ୍ଷ, ପାନ୍ଥ ନିବାସ ପାଇଁ ୩ କୋଟି ୫୦ ଲକ୍ଷ, ଦୋକାନ ଗୃହ ପାଇଁ ୪ କୋଟି ଟଙ୍କା, ଶିବଗଙ୍ଗା ପୁଷ୍କରଣୀର ପୁନରୁଦ୍ଧାର ପାଇଁ ୧ କୋଟି ୩୦ ଲକ୍ଷ ଟଙ୍କା ପ୍ରଥମ ପର୍ଯ୍ୟାୟରେ ଦିଆଯାଇଥିଲା। ଏସବୁ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ, ଦ୍ୱିତୀୟ ପର୍ଯ୍ୟାୟ ସମ୍ପ୍ରସାରଣ କାର୍ଯ୍ୟର ସମୀକ୍ଷା କରିବା ସହ ସେବାୟତଙ୍କ ସହ ଆଲୋଚନା କରିବେ ମୁଖ୍ୟ ଶାସନ ସଚିବ ଓ ୫ଟି ସଚିବ। ପୀଠର ବିକାଶ ଓ ଉଚ୍ଛେଦ ହେବାକୁ ଥିବା ସେବାୟତଙ୍କୁ ଥଇଥାନ ପାଇଁ ସହାୟତା ଦେବାର ଯୋଜନା ରହିଛି। ପ୍ରଥମେ ଧାମରା ହେଲିପ୍ୟାଡରେ ଓହ୍ଲାଇ ବାଲିମୁଣ୍ଡାରେ ସ୍ଥାପନ ହେବାକୁ ଥିବା ଏଆରଷ୍ଟ୍ରିପ କାର୍ଯ୍ୟର ସମୀକ୍ଷା କରିବେ। ପରେ କଇଥକୋଲାରେ ୭୫୦ ଏକର ଜାଗାର ପ୍ରସ୍ତାବିତ ଇଣ୍ଡଷ୍ଟ୍ରିଆଲ ପାର୍କ ପାଇଁ ଅଧିଗ୍ରହଣ ହୋଇଥିବା ଜମି ବୁଲି ଦେଖିବେ । ଏହାସହ ଏହି ପ୍ରକଳ୍ପ ପାଇଁ ପ୍ରସ୍ତୁତ ବ୍ଲୁପ୍ରିଣ୍ଟ ଦେଖିବା ସହ ପ୍ରଶାସନିକ ଅଧିକାରୀଙ୍କ ସହ ଆଲୋଚନା କରିବେ। ସେହିପରି ୨୨୫ କୋଟି ଟଙ୍କାର ନିର୍ଆଣଧିନ ଧାମରା ଜାମୁଝାଡ଼ି ରାସ୍ତା ପରିଦର୍ଶନ କରିବେ ମୁଖ୍ୟ ଶାସନ ସଚିବ ଓ 5T ସଚିବ ।
ପୁଣି କଟକରୁ ନକଲି ଔଷଧ ଜବତ, ୧ ସପ୍ତାହ ଭିତରେ ୪୫ ଲକ୍ଷ ଟଙ୍କାର ନକଲି ମେଡିସିନ ଜବତ
କଟକ: ପୁଣି କଟକରୁ ନକଲି ଔଷଧ ଜବତ। ଗତକାଲି ପୁଣି ଜବତ ହୋଇଛି ୨୨ ଲକ୍ଷ ଟଙ୍କାର ନକଲି ମେଡିସନ୍। କଟକର ତିନିଟି ଫାର୍ମାସୀରୁ ଜବତ ହୋଇଛି ସମସ୍ତ ନକଲି ଔଷଧ। ଟେଲମା ବ୍ରାଣ୍ଡର ଔଷଧକୁ ଜବତ କରିଛି ଡ୍ରଗ କଣ୍ଟ୍ରୋଲ ବିଭାଗ । ଗିରଫ ଦୁଇ ଷ୍ଟକିଷ୍ଟଙ୍କ ଦ୍ୱାରା ବିକ୍ରି ହୋଇଥିଲା ଏହି ସବୁ ଔଷଧ। ଏହାକୁ ମିଶାଇଲେ ଦୁଇ ସପ୍ତାହ ଭିତରେ ଜବତ ହେଲାଣି ୪୫ ଲକ୍ଷ ଟଙ୍କାର ନକଲି ମେଡିସିନ।
ନକଲି ଔଷଧ ମାମଲାର ଅନୁସନ୍ଧାନ ପାଇଁ ଆଜି ବିହାର ଯିବ ସ୍ୱତନ୍ତ୍ର ତଦନ୍ତକାରୀ ଟିମ୍। ପୂର୍ବରୁ ମଧ୍ୟ ମାମଲାର ତଦନ୍ତ ପାଇଁ ରାଜ୍ୟ ବାହାରକୁ ଯାଇଛି କମିଶନରେଟ ପୋଲିସ । ଦିନକୁ ଦିନ ନକଲି ଔଷଧ କାରବାରର ଚେର ଲମ୍ବିବାରେ ଲାଗିଛି । ଗତ ୯ ତାରିଖରେ କଟକ ଭି.ଆର ଡ୍ରଗ ଏଜେନ୍ସି ଓ ପୂଜା ଏଣ୍ଟରପ୍ରାଇଜେସରୁ ଜବତ ହୋଇଥିଲା ୨୦ ଲକ୍ଷରୁ ଅଧିକ ଟଙ୍କାର ନକଲି ଔଷଧ। ଏବେବି ପୋଲିସ ଓ ଭେଷଜ ନିୟନ୍ତ୍ରଣ ବିଭାଗ ମିଳିତ କାର୍ଯ୍ୟାନୁଷ୍ଠାନ ଜାରି ରଖିଛି।
ଗିରଫ ହେଲେ ଟାଙ୍ଗରପାଲି ଅତିରିକ୍ତ ତହସିଲଦାର କୁଳମଣି ପଟେଲ
ସୁନ୍ଦରଗଡ଼: ଗିରଫ ହେଲେ ସୁନ୍ଦରଗଡ଼ ଜିଲ୍ଲା ଟାଙ୍ଗରପାଲି ଅତିରିକ୍ତ ତହସିଲଦାର କୁଳମଣି ପଟେଲ । ତାଙ୍କୁ ଗିରଫ କରି କୋର୍ଟ ଚାଲାଣ କରିଛି ଭିଜିଲାନ୍ସ । କୁଳମଣିଙ୍କୁ ସୁନ୍ଦରଗଡ଼ ସ୍ପେଶାଲ ଜଜ ଭିଜିଲାନ୍ସ କୋର୍ଟ ଚାଲାଣ କରାଯାଇଛି । ଅତିରିକ୍ତ ତହସିଲଦାରଙ୍କ ଆୟର ଉତ୍ସ ଠାରୁ 253% ଅଧିକ ସମ୍ପତ୍ତି ଥିବା ଭିଜିଲାନ୍ସ ତଦନ୍ତରୁ ଜଣାପଡ଼ିଛି । ଏନେଇ ଅତିରିକ୍ତ ତହସିଲଦାର ଓ ତାଙ୍କ ପତ୍ନୀଙ୍କ ନାମରେ ମାମଲା ରୁଜୁ କରାଯାଇଛି ।
ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗ ପରେ ଗତକାଲି ଅତିରିକ୍ତ ତହସିଲଦାରଙ୍କ ଘର ସମେତ ୮ଟି ସ୍ଥାନରେ ରେଡ କରିଥିଲା ଭିଜିଲାନ୍ସ । ସୁନ୍ଦରଗଡ଼ର ପ୍ରାଇମ ଏରିଆରେ ରହିଛି ମୋଟ୍ ୨୧ଟି ପ୍ଲଟ୍, ୨ଟି ବହୁତଳ କୋଠା ଓ ୪ଟି ଘର ଥିବା ଜାଣିବାକୁ ପାଇଥିଲା ଭିଜିଲାନ୍ସ । କେବଳ ଏତିକି ନୁହେଁ, ୨ଟି ଚାରି ଚକିଆ ଯାନ, ୨ଟି ଟ୍ରାକ୍ଟର, ୩ଟି ଦୁଇ ଚକିଆ ଯାନ ଠାବ ହୋଇଥିଲା । ଚଢ଼ାଉ ବେଳେ ଘରୁ ନଗଦ ଟଙ୍କା ମଧ୍ୟ ଜବତ ହୋଇଥିଲା ।