ଭୁବନେଶ୍ୱର: ଦୁର୍ଗାପୂଜା ପୂର୍ବରୁ କମିଶନରେଟ୍ ପୋଲିସର ଫ୍ଳାଗମାର୍ଚ୍ଚ । ଖୋଲାରେ ମଦ୍ୟପାନ, ଖଟି, ନିଶା କାରବାର ଏବଂ ହାର୍ଡକୋର କ୍ରିମିନଲଙ୍କ ବିରୋଧରେ ସ୍ବତନ୍ତ୍ର ଡ୍ରାଇଭ୍ । ୟୁନିଟ୍-6 ବସ୍ତିରେ କ୍ୟାପିଟାଲ୍ ଥାନା ପକ୍ଷରୁ ସ୍ପେଶାଲ୍ ଡ୍ରାଇଭ କରାଯାଇଥିବା ବେଳେ ଲକ୍ଷୀସାଗର ଥାନା ପକ୍ଷରୁ ହଳଦୀ ପଡିଆ ବସ୍ତି ଏବଂ ଖାରବେଳ ନଗର ଥାନା ପକ୍ଷରୁ ମାଳିସାହିରେ ଫ୍ଳାଗମାର୍ଚ୍ଚ କରାଯାଇଛି । ଏଥିରେ ୩ ଥାନାର ଆଇଆଇସିଙ୍କ ସମେତ ଏସିପି ଏବଂ ୩ ପ୍ଳାଟୁନ ପୋଲିସ ଫୋର୍ସ ନିୟୋଜିତ ହୋଇଥିଲେ ।
ମାଲିକର ଅଜାଣତରେ ବଦଳିଗଲା ଗାଡ଼ିର ମାଲିକାନା
କୋରାପୁଟ: ମାଲିକର ଅଜାଣତରେ ବି ଅନ୍ୟ ନାଁରେ ବଦଳିପାରେ ଗାଡ଼ିର ମାଲିକାନା । ଆଶ୍ଚର୍ଯ୍ୟ ଲାଗିଲେ ବି ସତ । ଏହା ଆମେ କହୁନୁ, ଏପରି ତଥ୍ୟ ଦେଇଛନ୍ତି ସୁନାବେଡ଼ା ଏସଡିପିଓ । ଗତ ୨୫ ତାରିଖରେ କିଛି ଲୋକ କୋରାପୁଟ ଜିଲ୍ଲା ସିମିଳିଗୁଡ଼ା ନିକଟରେ ଜଗୁ ହନ୍ତାଳଙ୍କ ନିକଟରୁ ଏକ ଅଲଟୋ କାରକୁ ଜୋର ଜବରଦସ୍ତ ନେଇ ଯାଇଥିଲେ । ଏନେଇ ସୁନାବେଡ଼ା ଥାନାରେ ଅଭିଯୋଗ କରିଥିଲେ ଜଗୁ । ତଦନ୍ତ ପରେ ଏମିତି କିଛି ତଥ୍ୟ ପୋଲିସର ହସ୍ତଗତ ହୋଇଛି ।
ଗାଡ଼ିଟି ଜଗୁ ହନ୍ତାଳଙ୍କ ବଦଳରେ ବିପିନ୍ ଛତ୍ରିୟାଙ୍କ ନାମରେ ମାଲିକାନା ପରିବର୍ତ୍ତନ ହୋଇଛି । ଗାଡ଼ି ଚୋରି ପରେ ଏହାର ମାଲିକାନା ପରିବର୍ତ୍ତନ ପାଇଁ ଫର୍ଜି କାଗତପତ୍ର ଜରିଆରେ ଆବେଦନ କରାଯାଇଥିଲା । କିନ୍ତୁ ବିକିବା ଲୋକ ଜଗୁ ହନ୍ତାଳ RTO କାର୍ଯ୍ୟାଳୟ ଯାଇ ନାହାନ୍ତି ବୋଲି କହିଛନ୍ତି । ଏପଟେ କିଣିବା ଲୋକ ବିପିନ ଛତ୍ରୀଆ ବି ଚୋରି ଗାଡି କିଣିଛନ୍ତି ସତ କିନ୍ତୁ ସେ ବି RTO କାର୍ଯ୍ୟାଳୟ ଯାଇନଥିବା କହିଛନ୍ତି ।
ତେବେ ଗାଡ଼ିର ମାଲିକାନା କିପରି ପରିବର୍ତ୍ତନ ହେଲା ଏବେ ତାକୁ ନେଇ ଉଠିଛି ବଡ ପ୍ରଶ୍ନ । ଗାଡି ଲୁଟ ଘଟଣାରେ 2 ଜଣଙ୍କୁ ଗିରଫ କରାଯାଇଥିବା ବେଳେ ଚୋରି ଗାଡି କିଣି ନିଜ ନାମରେ କରିଥିବା ବିପିନ ଛତ୍ରୀଆ ଓ ଫର୍ଜରି କାଗଜ ପତ୍ର କରି ଗାଡି ନାମ ବଦଳାଇଥିବା ମୁଖ୍ୟ ସନ୍ତୋଷ କୁମାର ଖଣ୍ଡେଇଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ୍ ।
ହାଇକୋର୍ଟ ଜର୍ଜ ଡ୍ରାଇଭରଙ୍କ ଝିଅ ପିନ୍ଧିବେ କଳା କୋଟ୍, ପ୍ରେରଣା ଦେଲେ କାର୍ତ୍ତିକା
ଜୟପୁର: ହାଇକୋର୍ଟ ଜର୍ଜ ଡ୍ରାଇଭରଙ୍କ ଝିଅର ସଫଳତା । ଖୁବ୍ ଶୀଘ୍ର କଳା କୋଟ୍ ପିନ୍ଧିବାକୁ ଯାଉଛନ୍ତି ୨୩ ବର୍ଷୀୟା ଝିଅ । ରାଜସ୍ଥାନ ବିଚାରବିଭାଗୀୟ ସେବା ପରୀକ୍ଷା କ୍ଲିଅର କଲେ କାର୍ତ୍ତିକା ଗେହଲଟ୍ । ରାଜ୍ୟ ସ୍ତରରେ ୬୬ ରାଙ୍କ୍ ରଖି ପାସ୍ ହୋଇଛନ୍ତି । ମାତ୍ର ୨୩ ବର୍ଷ ବୟସରେ ଜୁଡିସିଆଲ୍ ସେବା ପରୀକ୍ଷା କ୍ରାକ୍ କରିଛନ୍ତି କାର୍ତ୍ତିକା । କୋଭିଡ୍ ସମୟରେ ଅଫ୍ଲାଇନ୍ କ୍ଲାସ୍ ବନ୍ଦ ହେବା ପରେ ଅନଲାଇନରୁ କୋଚିଂ ଆରମ୍ଭ କରିଥିଲେ କାର୍ତ୍ତିକା ।
ଅନଲାଇନରେ ପ୍ରସ୍ତୁତି କରି ପ୍ରଥମ ଥରରେ ଏହି ପରୀକ୍ଷା ପାସ୍ କରିଛନ୍ତି । ଦିଲ୍ଲୀ ଜବାହାରଲାଲ୍ ନେହୁର ବିଶ୍ବବିଦ୍ୟାଳୟରେ ସ୍ନାତକ ପରେ ଏଲଏଲବି ସ୍ନାତ୍ତୋକତର ପାସ୍ କରିଛନ୍ତି କାର୍ତ୍ତିକା । ଏହା ପରେ ସେ ବିଚାର ବିଭାଗୀୟ ସେବା ପରୀକ୍ଷା ପାଇଁ ପ୍ରସ୍ତୁତି ଜୋରଦାର କରିଥିଲେ । ପରୀକ୍ଷା ଉର୍ତ୍ତୀର୍ଣ୍ଣ ହେବା ପରେ ପରିବାରରେ ଖୁସିର ଲହରୀ ଖେଳିଯାଇଛି । ଅନଲାଇନ କୋଚିଂ ଆପ୍ଲିକେସନ ଉତ୍କର୍ଷ ପରିବାର ପକ୍ଷରୁ କାର୍ତ୍ତିକାଙ୍କୁ ଶୁଭେଚ୍ଛା ଜଣାଇଛନ୍ତି ।
ଋଷରେ ଆଣ୍ଟି-ଓ୍ବାର ପ୍ରୋଟେଷ୍ଟ, ୩୦ଟି ସହରରେ ପୁଟିନଙ୍କୁ ତୀବ୍ର ବିରୋଧ
ମସ୍କୋ: ଋଷରେ ଆଣ୍ଟି-ଓ୍ବାର ପ୍ରୋଟେଷ୍ଟ । ମସ୍କୋ ସମେତ ୩୦ଟି ସହରରେ ପୁଟିନଙ୍କ ନିଷ୍ପତ୍ତିକୁ ତୀବ୍ର ବିରୋଧ । ୟୁକ୍ରେନକୁ ଅଧିକ ୩ଲକ୍ଷ ରିଜର୍ଭ ସୈନ୍ୟ ପଠାଇବା ନିର୍ଦ୍ଦେଶ ପରେ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବିରୋଧରେ ବିକ୍ଷୋଭ ଉଗ୍ର ରୂପ ନେଇଛି । ରିଜର୍ଭ ସୈନିକ ହେଉଛନ୍ତି ଋଷର ସାଧାରଣ ନାଗରିକ । ଯେଉଁମାନଙ୍କୁ ସୈନ୍ୟ ତାଲିମ ଦିଆଯାଇଥାଏ । ଆବଶ୍ୟକ ପଡ଼ିଲେ ସେମାନଙ୍କୁ ଯେକୌଣସି ସ୍ଥାନରେ ମୁତୟନ କରାଯାଇପାରେ ।
ୟୁକ୍ରେନକୁ ରିଜର୍ଭ ସୈନ୍ୟ ପଠାଇବା ଘୋଷଣା ପରେ ବିକ୍ଷୋଭ ଜୋରଦାର ହୋଇଛି । ପ୍ରାୟ ୧୩ଶହ ବିକ୍ଷୋଭକାରୀଙ୍କୁ ଉଠାଇ ନେଇଛି ପୋଲିସ । ରାଜଧାନୀ ମସ୍କୋ ଓ ଋଷର ସବୁଠୁ ବଡ଼ ଶିଳ୍ପ ସହର ପିଟର୍ସବର୍ଗରେ ଲକ୍ଷାଧିକ ଲୋକ ରାସ୍ତାକୁ ଓହ୍ଲାଇ ପ୍ରଦର୍ଶନ ଜାରି ରଖିଛନ୍ତି । ସେପଟେ ୟୁକ୍ରେନରେ ମୋବିଲାଇଜେସନ ଘୋଷଣା ପରେ ଦେଶ ଛାଡ଼ି ଚାଲିଯାଉଛନ୍ତି ଋଷ ନାଗରିକ । ତୁର୍କି, ଆର୍ମେନିଆ, ଜର୍ଜିଆ ଆଦି ଦେଶକୁ ଯାଉଥିବା ଫ୍ଲାଇଟ ଫୁଲ୍ । ନାଗରିକଙ୍କ ପଳାୟନ ରୋକିବାକୁ ୧୮ରୁ ୬୫ବର୍ଷୀୟ ନାଗରିକଙ୍କ ଟିକେଟ ଉପରେ ରୋକ ଲଗାଇ ଦିଆଯାଇଛି ।
ପ୍ରତିରକ୍ଷା ମନ୍ତ୍ରଣାଳୟ ବିନା ଅନୁମତିରେ ଟିକେଟ ବିକ୍ରି ନ କରିବାକୁ ଆଡଭାଇଜରୀ ଜାରି କରାଯାଇଛି । ଅନ୍ୟପଟେ ଯୁଦ୍ଧ ଅପରାଧ ପାଇଁ ଋଷଠାରୁ ଭିଟୋ ପାଓ୍ବାର ପ୍ରତ୍ୟାହାର କରିନେବାକୁ ନିବେଦନ କରିଛନ୍ତି ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି । ସେପଟେ ପ୍ରଥମ ଥର ଲାଗି ଋଷ-ୟୁକ୍ରେନ ମଧ୍ୟରେ ହୋଇଛି ବଡ଼ ଧରଣର ବନ୍ଦୀ ଅଦଳ ବଦଳ ପ୍ରକ୍ରିୟା । ଏହି ପ୍ରକ୍ରିୟାରେ ପ୍ରାୟ ୩୦୦ ବନ୍ଦୀଙ୍କୁ ଅଦଳବଦଳ କରାଯାଇଛି ।
ଅକ୍ଟୋବର ୬ରୁ ଶ୍ରୀମନ୍ଦିରରେ ଶ୍ରୀଜିଉଙ୍କ କାର୍ତ୍ତିକ ନୀତି
ପୁରୀ: ଅକ୍ଟୋବର ୬ରୁ ଶ୍ରୀମନ୍ଦିରରେ ଶ୍ରୀଜିଉଙ୍କର କାର୍ତ୍ତିକ ନୀତି। ରାଧାଦାମୋଦର ବେଶ ଓ ବାଳ ଭୋଗ ନୀତି ଆରମ୍ଭ ହେବ। ଏନେଇ ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟରେ ଜିଲ୍ଲାପାଳଙ୍କ ଅଧ୍ୟକ୍ଷତାରେ ବସିଥିବା ଉଭୟ ନୀତି ସବ୍ କମିଟି ଓ ଛତିଶା ନିଯୋଗ ବୈଠକରେ ନୀତି ନିର୍ଘଣ୍ଟ ଚୁଡାନ୍ତ ହୋଇଛି। କୋଭିଡ କଟକଣା ହଟିବା ପରେ ହବିଷ୍ୟାଳୀଙ୍କ ପ୍ରବଳ ଭିଡ଼ ସମ୍ଭାବନା ରହିଛି। ଏହାକୁ ଦୃଷ୍ଟିରେ ରଖି ଶ୍ରୀମନ୍ଦିରରେ ଶୃଙ୍ଖଳିତ ନୀତି କାନ୍ତି ଉପରେ ଗୁରୁତ୍ବ ଦିଆଯାଇଛି। ଅକ୍ଟୋବର ୬ ତାରିଖରୁ ନଭେମ୍ବର ୮ ପର୍ଯ୍ୟନ୍ତ ମହାପ୍ରଭୁଙ୍କ କାର୍ତ୍ତିକ ନୀତି ଅନୁଷ୍ଠିତ ହେବ।
ନିର୍ଦ୍ଧାରିତ ନୀତି ନିର୍ଘଣ୍ଟ ଅନୁଯାୟୀ ଅକ୍ଟୋବର ୬ରୁ ସକାଳ ୬.୧୫ରେ ରାଧାଦାମୋଦର ବେଶ ଓ ସକାଳ ୧୦ ଟାରୁ ୧୦.୩୦ ମଧ୍ୟରେ ବାଳଧୂପ ନୀତି ଅନୁଷ୍ଠିତ ହେବ। ଅକ୍ଟୋବର ୩୧ ରେ ମହାପ୍ରଭୁଙ୍କ ହରିହର ବେଶ, ନଭେମ୍ବର ୪ରେ ଠିଆକିଆ ବା ଲକ୍ଷ୍ମୀନାରାୟଣ ବେଶ, ୫ରେ ବାଙ୍କଚୁଡ ବେଶ, ୬ରେ ଡାଳିକିଆ ବା ତ୍ରିବିକ୍ରମ ବେଶ, ୭ରେ ଲକ୍ଷ୍ମୀନୃସିଂହ ବେଶ ଓ ୮ରେ ରାଜାଧିରାଜ ବା ସୁନାବେଶ ଅନୁଷ୍ଠିତ ହେବ। ହବିଷ୍ୟାଳୀଙ୍କ ଶୃଙ୍ଖଳିତ ଦର୍ଶନ ଉପରେ ଗୁରୁତ୍ବ ଦିଆଯାଇଛି। ସେହିପରି କାର୍ତ୍ତିକ ମାସରେ ଭିଆଇପି ଦର୍ଶନ ଉପରେ କଟକଣା ଲଗାଇବା ପାଇଁ ଛତିଶା ନିଯୋଗର ସଦସ୍ୟ ଠକରେ ଦାବି କରିଥିଲେ।
ଅକ୍ଟୋବର ୨୫ରେ ହେବାକୁ ଥିବା ସୂର୍ଯ୍ୟ ପରାଗ ଓ ନଭେମ୍ବର ୮ରେ ହେବାକୁ ଥିବା ଚନ୍ଦ୍ର ଗ୍ରହଣ ପାଇଁ ମଧ୍ୟ ନୀତି ନିର୍ଘଣ୍ଟ ହୋଇଛି। ଅକ୍ଟୋବର ୨୪ ସଂନ୍ଧ୍ୟାରୁ ଶ୍ରୀମନ୍ଦିରରେ ସାଧାରଣ ଦର୍ଶନ ବନ୍ଦ ରହିବ। ସେହିପରି ନଭେମ୍ବର ୮ରେ ଅପରାହ୍ନରୁ ସଂନ୍ଧ୍ୟା ପର୍ଯ୍ୟନ୍ତ ଶ୍ରୀମନ୍ଦିରରେ ମଧ୍ୟ ଦର୍ଶନ ବନ୍ଦ ରହିବ। ଅକ୍ଟୋବର ୨୫ରେ ଶ୍ରୀମନ୍ଦିରରେ ଭୋଗମଣ୍ଡପ ସରିବା ପରେ ରାଧାଦାମୋଦର ବେଶ ହେବ। ମଇଲମ ହୋଇ ଗ୍ରହଣ ସ୍ପର୍ଶ ପରେ ଗ୍ରହଣ ମହାସ୍ନାନ ଓ ଗ୍ରହଣ ଭୋଗ ନୀତି କରାଯିବ।
କଟକ, ଖୋର୍ଦ୍ଧା ଓ ନୟାଗଡ ଜିଲ୍ଲାର ମିଶନ ଶକ୍ତି ମା ମାନଙ୍କୁ ଭେଟିଲେ ମୁଖ୍ୟମନ୍ତ୍ରୀ
ଭୁବନେଶ୍ୱର: ସଂଧ୍ୟାରେ ନବୀନ ନିବାସଠାରେ କଟକ, ଖୋର୍ଦ୍ଧା ଓ ନୟାଗଡ ଜିଲ୍ଲାର ମିଶନ ଶକ୍ତି ଗୋଷ୍ଠୀର ମା ମାନେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କୁ ଭେଟି ଥିଲେ । ଏହି ଅବସରରେ ଗତ ଅଗଷ୍ଟ ୧୫ ତାରିଖ ୭୫ତମ ସ୍ବାଧୀନତା ଦିବସ ପାଳନ ଅବସରରେ ମା ମାନେ ଜାତୀୟ ପତାକା ତିଆରି ଦାୟିତ୍ବ ନେଇ ଦକ୍ଷତାର ସହ ତୁଲାଇ ଥିବାରୁ ମୁଖ୍ୟମନ୍ତ୍ରୀ ସମସ୍ତଙ୍କୁ ଧନ୍ୟବାଦ ଜଣାଇଥିଲେ।
ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଭି.କେ. ପାଣ୍ଡିଆନ ମିଶନ ଶକ୍ତି ମା ମାନଙ୍କ କାର୍ଯ୍ୟର ପ୍ରଶଂସା କରି କହିଥିଲେ ଯେ ଆପଣମାନଙ୍କ ଉପରେ ମୁଖ୍ୟମନ୍ତ୍ରୀଙ୍କ ସଂପୂର୍ଣ୍ଣ ଭରସା ରହିଛି। ଆପଣମାନେ ମଧ୍ୟ ଗାଁ ଗାଁରେ ବିକାଶର ନେତୃତ୍ୱ ନେଇ ମୁଖ୍ୟମନ୍ତ୍ରୀଙ୍କ ସ୍ବପ୍ନ ଓ ଭରସାକୁ ସାକାର କରିପାରିଛନ୍ତି ।
ଜାତୀୟ ପତାକା ତିଆରି ପରି ଏକ ମର୍ଯ୍ୟଦାପୂର୍ଣ୍ଣ ଦାୟିତ୍ବ ଅର୍ପଣ କରିଥିବାରୁ ମିଶନ ଶକ୍ତିର ମା ମାନେ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇ ଥିଲେ। ମିଶନ ଶକ୍ତିରେ ସାମିଲ ହୋଇ ଆମେ ଗର୍ବିତ ବୋଲି ସେମାନେ ପ୍ରକାଶ କରିବା ସହିତ ଏଥିପାଇଁ ଆଜି ବିଭିନ୍ନ କ୍ଷେତ୍ରରେ ନିଜର ପ୍ରତିଭାର ବିକାଶ ହୋଇପାରିଛି ବୋଲି ସେମାନେ କହିଥିଲେ ।
ସୂଚନାଯୋଗ୍ୟ ଯେ ଚଳିତ ବର୍ଷ ସ୍ୱାଧୀନତାର ୭୫ତମ ପୂର୍ତ୍ତି ଅବସରରେ ରାଜ୍ୟ ସରକାର ମିଶନ ଶକ୍ତି ମା ମାନଙ୍କୁ ୩୦ ଲକ୍ଷ ଜାତୀୟ ପତାକା ପ୍ରସ୍ତୁତି ଓ ବଣ୍ଟନ ଦାୟିତ୍ୱ ଦେଇଥିଲେ।
୧୬ ବିଭାଗର ୩୩ ପ୍ରସ୍ତାବକୁ କ୍ୟାବିନେଟ ମୋହର
ଭୁବନେଶ୍ୱର: କ୍ୟାବିନେଟ ବୈଠକରେ ବଡ଼ ନିଷ୍ପତ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିଥିଲା ରାଜ୍ୟ କ୍ୟାବିନେଟ । ବୈଠକରେ ୧୬ଟି ବିଭାଗର ୩୩ଟି ପ୍ରସ୍ତାବ ଉପରେ ଲାଗିଛି ମୋହର । ଏହି ତାଲିକାରେ ପଞ୍ଚାୟତିରାଜ ଓ ପାନୀୟଜଳ, ଅର୍ଥ, ସାଧାରଣ ପ୍ରଶାସନ, ଯୋଗାଣ ଓ ସମବାୟ ଆଦି ବିଭାଗର ଗୁରୁତ୍ବପୂର୍ଣ୍ଣ ପ୍ରସ୍ତାବକୁ ମିଳିଛି ମଞ୍ଜୁରୀ।
ଜଟଣୀ ତହସିଲର ଜାମୁକୋଳିରେ ହେବ କେନ୍ଦ୍ରୀୟ ହୋମିଓପାଥି ଗବେଷଣା ପରିଷଦ । ଏଥିପାଇଁ ରାଜ୍ୟ ସରକାର ମାଗଣାରେ ଯୋଗାଇ ଦେବେ ୫ ଏକର ଜମି । ଏଥିସହ ରାଜ୍ୟସ୍ତରୀୟ କ୍ରୀଡା ଭିତ୍ତିଭୂମି ବିକାଶ ପ୍ରକଳ୍ପକୁ ମଞ୍ଜୁରୀ ମିଳିଛି । କଳିଙ୍ଗ ଷ୍ଟାଡିୟମ ଓ ବିର୍ସା ମୁଣ୍ଡା ଷ୍ଟାଡିୟମର ଭିତ୍ତିଭୂମି ବିକାଶ ହେବ । ବିଶ୍ୱକପ ପାଇଁ ଭିତ୍ତିଭୂମି ବିକାଶ ବଜେଟ ସଂଶୋଧନକୁ ମଞ୍ଜୁରୀ ମିଳିଛି ।
ଏଥିସହ ୮୭୫କୋଟିର ସଂଶୋଧିତ ପ୍ରକଳ୍ପ ମୂଲ୍ୟକୁ ମିଳିଛି ମଞ୍ଜୁରୀ । କୋଭିଡ ମହାମାରୀ ପାଇଁ ମନ୍ତ୍ରିସ୍ତରୀୟ କମିଟିର ନିଷ୍ପତ୍ତି ଉପରେ ମୋହର ମରାଯାଇଛି । ରାଜ୍ୟର ଶିଳ୍ପାନୁଷ୍ଠାନକୁ ଚୂନ ପଥର ଯୋଗାଣ ଏଣିକି ସୁନିଶ୍ଚିତ ହେବ । ଏହି ଚୁନ ପଥର ଓଏମସି ଜରିଆରେ ଯୋଗାଇ ଦିଆଯିବ । ସ୍ବେଚ୍ଛାକୃତ ଅବସର ପରେ IRTS ଅଫିସର ମନୋଜ ମିଶ୍ରଙ୍କୁ ମିଳିବ ଚୁକ୍ତିଭିତିକ ନିଯୁକ୍ତି । ସେହି ପଦବୀରେ ରାଜ୍ୟ ସରକାର ଦେବେ ନିଯୁକ୍ତି ।
ସେହିପରି ୯ଟି ମେଗା ଲିଫ୍ଟ ପ୍ରୋଜେକ୍ଟକୁ ମୋହର ମାରିଛନ୍ତି ରାଜ୍ୟ କ୍ୟାବିନେଟ । ୩୬ ମାସ ଭିତରେ କାର୍ଯ୍ୟକ୍ଷମ ହେବ ଏହି ପ୍ରକଳ୍ପ । ସେହିପରି ୧୪ଟି ମେଗା ଲିଫ୍ଟ ପ୍ରୋଜେକ୍ଟ କେନ୍ଦୁଝର ଜିଲ୍ଲାରେ ହେବ । ୧୭ ହଜାର ହେକ୍ଟର ଜମି ଜଳସେଚିତ ହେବ । ୟେଉଁ କମ୍ପାନୀ ଏହି ଟେଣ୍ଡର ନେବ ତାହାକୁ ୧୫ ବର୍ଷ ପର୍ଯ୍ୟନ୍ତ ଦାୟିତ୍ୱ ନେବେ ବୋଲି କୁହାଯାଇଛି । ପୂର୍ତ୍ତ ବିଭାଗ ପକ୍ଷରୁ ଦୁଇଟି ପ୍ରସ୍ତାବକୁ ମୋହର ମରାଯାଇଛି । ସୁବର୍ଣ୍ଣପୁର -ବିନିକା ରାସ୍ତାକୁ ଉନ୍ନତିକରଣ କରିବା କାର୍ଯ୍ୟକୁ ଅନୁମୋଦନ ଦିଆଯାଇଛି ।
ଭୁବନେଶ୍ୱରରେ ବିଧାୟକଙ୍କ ନିମନ୍ତେ ଗୃହ ନିର୍ମାଣ ପାଇଁ ମଧ୍ୟ ଯେଉଁ ପ୍ରସ୍ତାବ ଦିଆଯାଇଥିଲା, ତାହାକୁ ଅନୁମୋଦନ ମାରିଛନ୍ତି ରାଜ୍ୟ ସରକାର । ରାଜ୍ୟର ସ୍ପର୍ଟସ ହଷ୍ଟେଲରେ ପଢୁଥିବା ପିଲାମାନଙ୍କ ଶାରୀରିକ ଶିକ୍ଷା ମହାବିଦ୍ୟାଳୟରେ ୧୫ ପ୍ରତିଶ ଆସନ ସରକ୍ଷଂଣ ବ୍ୟବସ୍ଥା କରାଯାଇଛି । ଯଦ୍ୱାରା ଖେଳ ପ୍ରତି ପିଲାମାନଙ୍କ ଇଛଶକ୍ତି ବୃଦ୍ଧି ଘଟିବ ବୋଲି କୁହାଯାଇଛି ।
ସେହିପରି ବିଭିନ୍ନ ବିଭାଗର ସରକାରୀ ଚାକିରି ସର୍ତ୍ତାବଳୀ ସଂଶୋଧନକୁ ମଧ୍ୟ କ୍ୟାବିନେଟ ଅନୁମଦୋନ କରିଛି । OPSC ସଦସ୍ୟ ନିଯୁକ୍ତି, ପର୍ଯ୍ୟଟନ ବିଭାଗର ନୂଆ କ୍ୟାଡର ଗଠନ, ସମବାୟ ବିଭାଗରେ କ୍ୟାଡର ପୁନର୍ଗଠନ କ୍ୟାବିନେଟ ମଞ୍ଜୁରୀ ଦେଇଛି । ଏହାଛଡ଼ା ଜିଲ୍ଲା ସ୍ତରରେ ପୋଲିସ ସେବା ନିଯୁକ୍ତି, ଓଡ଼ିଶା ସିଭିଲ ସଭିର୍ସ ନିଯୁକ୍ତି ନିୟମାବଳୀ , ଓଡ଼ିଶା ବିଚାର ବିଭାଗୀୟ ସେବା ନିଯୁକ୍ତି ସହ ଜିଲ୍ଲା ଏବଂ ସବ୍ ଓର୍ଡିନେଟ୍ କୋର୍ଟରେ ନିଯୁକ୍ତି ସର୍ତ୍ତବଳୀରେ ସଂଶୋଧନ କରାଯିବ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିବା ର୍ଜାୟ କ୍ୟାବିନେଟ ଏହି ପ୍ରସ୍ତାବକୁ ଅନୁମୋଦନ କରିଛି ।
ବନ୍ଧୁକ ନାଁ ଶୁଣି ଚୋର ମାରିଲା ଚମ୍ପଟ, ସିସିଟିଭିରେ ଭିଡ଼ିଓ..
ଭୁବନେଶ୍ୱର: ରାଜଧାନୀରେ ଚୋରି ଉଦ୍ୟମ ବିଫଳ । ବନ୍ଧୁକ ନାଁ ଶୁଣି ଚୋର ମାରିଲା ଚମ୍ପଟ । ଘର ମାଲିକର ଉପସ୍ଥିତ ବୁଦ୍ଧିଯୋଗୁ ଚୋରିରୁ ବର୍ତ୍ତିଗଲେ । ଭୁବନେଶ୍ବରର ଭିଏସଏସ୍ ନଗରରେ ଘଟିଛି ଏଭଳି ଚାଞ୍ଚଲ୍ୟକର ଓ କୌତୁହଳ ଘଟଣା । ଗତକାଲି ବିଳମ୍ବିତ ରାତିରେ ଏକ ଘର ଝରକା ଭାଙ୍ଗି ଚୋର ପଶିଥିଲେ । ଗୋଟିଏ ଘରେ କବାଟ ବନ୍ଦ କରି ଅନ୍ୟ ଘରେ ଚୋରି କରୁଥିଲେ ।
ଚୋରଙ୍କ ଶବ୍ଦ ଶୁଣି ମାଲିକ ଉଠିପଡ଼ିଥିଲେ । ଏବଂ ସେହି ସମୟରେ ବନ୍ଧୁକ ଆଣିବା ନେଇ ମିଛରେ କହିଥିଲେ । ସେପଟେ ମାଲିକଙ୍କ ବନ୍ଧୁକ ଶବ୍ଦଟି ଚୋରଙ୍କ କାନରେ ପଡ଼ିବା ମାତ୍ରେ ଛୁ ମାରିଥିଲେ ଚୋର । ଘରର ମାଲିକ ପ୍ରବେଶ କୁମାର ସାହୁ ଉଠି ବନ୍ଧୁକ ଆଣିବାକୁ ମିଛରେ ପାଟି କରିବାରୁ ପଳାଇଥିଲେ ଚୋର । ଯାହାକି ସିସିଟିଭିରେ କଏଦ ହୋଇଛି ଘଟଣା ବେଳର ଦୃଶ୍ୟ । ଏହି ଘଟଣାର ଏବେ ତଦନ୍ତ ଆରମ୍ଭ କରିଛି ସହିଦନଗର ପୋଲିସ ।
ରାଜତଦାନୀରେ ବିଭିନ୍ନ ସମୟରେ ଚୋରି ରାହାଜାନୀ ଘଟୁଛି । ଅନେକ ସ୍ଥାନରେ ଚୋର ଚୋରି କରିବା ସହ ଘରେ ଥିବା ଲୋକମାନଙ୍କୁ ମଧ୍ୟ ଅସହ୍ୟ ନିର୍ଯାତନା ଦେଉଛନ୍ତି । କିନ୍ତୁ ଏଭଳି ଏକ ରୋଚକ ଚୋର ପୁଲିସ ଖେଳ ବେଶ କୌତୁହଳ ପାଲଟିଛି । ଚୋର ଠାରୁ ମାଲିକ ବେସ ଚାଲାକି ହୋଇ ପଡିଛନ୍ତି ।
ଓଲଟି ପଡିଲା ଛେଳି ବୋଝେଇ ଟ୍ରକ, ଆଖିବୁଜି ନେଇଗଲେ ଲୋକେ
ଭଦ୍ରକ: ଓଲଟି ପଡିଲା ଛେଳି ବୋଝେଇ ଟ୍ରକ । ଦୁର୍ଘଟଣାର ସୁଯୋଗ ନେଇ ଶତାଧିକ ଛେଳିଙ୍କୁ ନେଇଗଲେ ଚୋର । ଭଦ୍ରକ ଭଣ୍ଡାରିପୋଖରୀ ଅଞ୍ଚଳରୁ ଆସିଛି ଏହି ଅଭିଯୋଗ । ଭଣ୍ଡାରିପୋଖରୀ ଆସାମ ପେଟ୍ରୋଲ ପମ୍ପ ସମ୍ମୁଖରେ ତିନିଶହରୁ ଅଧିକ ଛେଳି ନେଇଯାଉଥିବା ଟ୍ରକ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲା । ଘଟଣା ସ୍ଥଳରେ ୫ରୁ ଅଧିକ ଛେଳିଙ୍କ ମୃତ୍ୟୁ ହୋଇଥିବା ବେଳେ ଅନେକ ଛେଳି ଆହତ ହୋଇଥିଲେ ।
ସେପଟେ ଦୁର୍ଘଟଣାରେ ଆହତ ଟ୍ରକ ଡ୍ରାଇଭର, ହେଲପର ସମେତ 4ଜଣଙ୍କୁ ସ୍ଥାନୀୟ ଲୋକ ଉଦ୍ଧାର କରି ମେଡିକାଲରେ ଭର୍ତ୍ତି କରିଥିଲେ । ହେଲେ ଆହତ ଓ ମୃତ ଛେଳିକୁ ଛାଡି ଅନ୍ୟ ୧୦୦ରୁ ଅଧିକ ଛେଳି ଗାୟବ ହୋଇଯାଇଛନ୍ତି । ଦୁର୍ଘଟଣାଗ୍ରସ୍ତ ଟ୍ରକରୁ ଲୋକେ ଛେଳି ନେଇଯାଇଥିବା ଅଭିଯୋଗ ହୋଇଛି । ଭଣ୍ଡାରିପୋଖରୀ ପୋଲିସ ଘଟଣା ସ୍ଥଳରେ ପହଞ୍ଚି ଗାଡିକୁ ହଟାଇବା ସହ ତଦନ୍ତ ଆରମ୍ଭ କରିଛି ।
କେନ୍ଦ୍ର ଦେଉନି ପରିବେଶ ମଞ୍ଜୁରୀ, ସାମ୍ନାକୁ ଆସିଲା ଖୋର୍ଦ୍ଧା-ବଲାଙ୍ଗୀର ରେଳ ପ୍ରକଳ୍ପର ସତ
ନନ୍ଦିଘୋଷ ବ୍ୟୁରୋ: ଖୋର୍ଦ୍ଧା-ବଲାଙ୍ଗିର ରେଳ ପ୍ରକଳ୍ପରେ କେଁ ପୂରାଇଲା କେନ୍ଦ୍ର । ପରିବେଶ ମଞ୍ଜୁରୀ ଖାରଜ । ରାଜ୍ୟର ସର୍ବ ପୁରାତନ ରେଳ ପ୍ରକଳ୍ପ ଖୋର୍ଦ୍ଧାରୋଡ଼-ବଲାଙ୍ଗିର ରେଳ ଲାଇନ୍କୁ ପରିବେଶ ମଞ୍ଜୁରୀ ପ୍ରଦାନ କରିବାରେ କେନ୍ଦ୍ର ସରକାରଙ୍କର ଆଉ ଏକ ଅବହେଳା ସାମ୍ନାକୁ ଆସିଛି । ଖୋର୍ଦ୍ଧାରୋଡ଼-ବଲାଙ୍ଗିର ରେଳପଥ ପାଇଁ ଅନୁଷ୍ଠିତ ଆଞ୍ଚଳିକ ଉଚ୍ଚ କ୍ଷମତା ସମ୍ପନ୍ନ କମିଟି ବୈଠକରେ ମଞ୍ଜୁରୀକୁ ଖାରଜ କରି ଦିଆଯାଇଛି ।
ଏହି ପ୍ରକଳ୍ପ ପାଇଁ ରାଜ୍ୟ ସରକାର ୨୭ ବର୍ଷ ହେଲା ସହଯୋଗ କରି ଆସୁଥିବା ବେଳେ କେନ୍ଦ୍ର ସରକାର ବୈଷିୟକ ଦିଗ ଆନୁଧ୍ୟାନ କରୁଛନ୍ତି । ପ୍ରକଳ୍ପ ପାଇଁ ୨ ହଜାର କୋଟିରୁ ଅଧିକ ଟଙ୍କା ଖର୍ଚ୍ଚ ହେଲାଣି । ଜମି ଅଧିଗ୍ରହଣ ବାବଦକୁ ରାଜ୍ୟ ସରକାର ୨ କୋଟିରୁ ଅଧିକ ଏବଂ ନିର୍ମାଣ ବାବଦରେ ୫୦ ପ୍ରତିଶତରୁ ଅଧିକ ଖର୍ଚ୍ଚ ହେଲାଣି । ଏପରିସ୍ଥଳେ କେନ୍ଦ୍ର ସରକାର ପରିବେଶ ମଞ୍ଜୁରି ନ ଦେବା ପ୍ରକଳ୍ପର ଭାଗ୍ୟ ଅନିଶ୍ଚିତତା ମଧ୍ୟକୁ ଠେଲି ହୋଇଯାଇଛି ।
୧୯୯୪-୯୫ ମସିହାରେ ଖୋର୍ଦ୍ଧାରୋଡ଼-ବଲାଙ୍ଗିର ରେଳ ପ୍ରକଳ୍ପ ମଞ୍ଜୁରୀ ପାଇଥିବା ବେଳେ ପ୍ରଗତି ବୈଠକରେ ପ୍ରଧାନମନ୍ତ୍ରୀ ପ୍ରକଳ୍ପକୁ ଗୁରୁତ୍ବ ଦେଇଥିଲେ । ରେଳ ପ୍ରକଳ୍ପର ୧୧୨ରୁ ୩୦୧ କିମି ପର୍ଯ୍ୟନ୍ତ ଜମି ରାଜ୍ୟ ସରକାର ବିନା ମୂଲ୍ୟରେ ଯୋଗାଇ ଦେଉଥିବା ବେଳେ ନିର୍ମାଣ କାର୍ଯ୍ୟର ୫୦% ଖର୍ଚ୍ଚ ବହନ କରୁଛନ୍ତି। ତେବେ ପରିବେଶ ମଞ୍ଜୁରୀ ମିଳୁନଥିବାରୁ ୧୧୨ରୁ ୧୧୮ କିମି ପର୍ଯ୍ୟନ୍ତ କାମ ଆରମ୍ଭ ହୋଇପାରୁ ନଥିବା ଜଣା ପଡ଼ିଛି ।