କାଲିଫର୍ଣ୍ଣିଆ: ଆମେରିକାର କାଲିଫର୍ଣ୍ଣିଆରେ ୪ ଭାରତୀୟ ବଂଶୋଦ୍ଭବଙ୍କୁ ଅପହରଣ । ଅପହୃତଙ୍କ ମଧ୍ୟରେ ଏକ ୮ ମାସର ଶିଶୁ ରହିଛି । ଏହି ଘଟଣାରେ କାଲିଫର୍ନିଆର ମର୍ସଡ କଣ୍ଟିରେ ଗୋଟିଏ ପରିବାରର ୩ ଜଣ ଓ ଅନ୍ୟ ଜଣେ ଭାରତୀୟଙ୍କୁ ଗିରଫ କରାଯାଇଥିବା ସୂଚନା ଦେଇଛି ପୋଲିସ ।
ସାଉଥ ହାଇଓ୍ବେ-୫୯ ଉପରୁ ଦୁର୍ବୃତ୍ତମାନେ ମାରଣାସ୍ତ୍ର ଦେଖାଇ ଅପହରଣ କରିଥିବା ଜଣାପଡ଼ିଛି । ସେମାନଙ୍କ ମଧ୍ୟରେ ୩୬ ବର୍ଷୀୟ ଜଗଦୀପ ସିଂ, ତାଙ୍କ ପତ୍ନୀ ଜସଲିନ କୌର ଓ ତାଙ୍କର ୮ମାସର ଝିଅ ଏବଂ ଅମନଦୀପ ସିଂ ନାମକ ଜଣେ ବ୍ୟକ୍ତି ରହିଛନ୍ତି । ଅପହରଣର କାରଣ ଜଣାପଡ଼ି ନଥିବା ବେଳେ ଅପହରଣକାରୀଙ୍କୁ ଖୋଜୁଛି ପୋଲିସ ।
ଶ୍ରୀନଗର: ଜମ୍ମୁ ଓ କାଶ୍ମୀର ଡିଜି (ଜେଲ୍) ଏଚ.କେ. ଲୋହିଆଙ୍କ ହତ୍ୟା ସମଗ୍ର ଦେଶକୁ ଦୋହଲାଇ ଦେଇଛି । କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ତିନି ଦିନିଆ ଜମ୍ମୁ କାଶ୍ମୀର ଗସ୍ତରେ ଥିବା ବେଳେ ଏହି ହତ୍ୟାକାଣ୍ଡ ଘଟିଛି । ଆତଙ୍କବାଦୀ ସଂଗଠନ ଲସ୍କର ଏ ତୋଇବାର ଛାୟା ଶାଖା ‘ଦି ରେସିଷ୍ଟାନ୍ସ ଫୋର୍ସ’ ବା ଟିଆରଏଫ୍ ଏହି ହତ୍ୟା ପାଇଁ ନିଜକୁ ଦାୟୀ କରିଥିବା ବେଳେ ହତ୍ୟାକାରୀ ଘରୋଇ ସହାୟକ ୟାସିରକୁ ପୋଲିସ ଗିରଫ କରିଛି । ତେବେ ତାକୁ କେଉଁଠାରୁ ଗିରଫ କରାଯାଇଛି ସେ ବାବଦରେ କିଛି ମଧ୍ୟ ସୂଚନା ଦେଇନାହିଁ ।
ଡିଜି ଲୋହିଆଙ୍କ ହତ୍ୟାକାରୀ ୟାସିର ଅହମ୍ମଦକୁ ପୋଲିସ ଗିରଫ କରିଛି । ତାକୁ କେଉଁଠାରୁ ଗିରଫ କରାଗଲା ସେ ସମ୍ପର୍କରେ ସାମ୍ବାଦିକ ସମ୍ମିଳନୀରେ ପୋଲିସ ସୂଚନା ଦେବ ବୋଲି କହିଛି । ପୋଲିସ ଅନୁସାରେ ୟାସିରର ବ୍ୟବହାର ଆକ୍ରାମକ ଥିଲା । ସେ ଅବସାଦର ଶିକାର ଥିବା ଜଣାପଡୁଛି । ୟାସିରର ଏକ ଡାଏରୀ ପୋଲିସ ଜବତ କରିଛି । ଏହି ଡାଏରୀରୁ ୟାସିର ଅବସାଦଗସ୍ତ ଥିବା ଅନୁମାନ କରାଯାଉଛି । ଡାଏରୀରେ ଗୋଟିଏ ସ୍ଥାନରେ ସେ ଲେଖିଛି ଯେ, ଆମକୁ ମରିବାକୁ ଦିଅ, ବଂଚାଇବାକୁ ଆସନି । ଜୀବନକୁ ନେଇ ସେ ଏହିଭଳି ଅନେକ କଥା ଡାଏରୀରେ ଲେଖିଛି ।
ଡିଜି ଲୋହିଆଙ୍କ ହତ୍ୟା ପରେ ଆତଙ୍କବାଦୀ ସଂଗଠନ ଟିଆରଏଫ ଏଥିପାଇଁ ନିଜକୁ ଦାୟୀ କରି ସୋସିଆଲ ମିଡିଆରେ ପୋଷ୍ଟ କରିଥିଲା । ଟିଆରଏଫ୍ ଲସ୍କର ଏ ତୋଇବାର ଛାୟା ସଂଗଠନ । ସୋସିଆଲ ମିଡିଆ ପୋଷ୍ଟରେ ସଂଗଠନ କହିଥିଲା ଯେ, ଏହା ଆମର ଗୃହମନ୍ତ୍ରୀ ଅମିତ ଶାହଙ୍କୁ ଉପହାର । ଆଗକୁ ଏହିଭଳି ବଡ଼ବଡ଼ ଲୋକଙ୍କୁ ଟାର୍ଗେଟ୍ କରାଯିବ । ପୋଲିସ ଏପର୍ଯ୍ୟନ୍ତ ଏହି ହତ୍ୟାକୁ ଆତଙ୍କବାଦୀ ଆକ୍ରମଣ ବୋଲି ମାନି ନାହିଁ କି ଅସ୍ୱୀକାର ମଧ୍ୟ କରିନାହିଁ । ଦୁଇ ଦିଗକୁ ନେଇ ପୋଲିସ ତଦନ୍ତ କରୁଛି । ଏମିତିରେ ପ୍ରଶ୍ନ ଉଠୁଛି ଯେ, ୟାସିର କ’ଣ ଲସ୍କରର ଗୁପ୍ତ ମିଶନରେ ଥିଲା କି ? ଲୋହିଆ ଜମ୍ମୁରେ ପୋଷ୍ଟେଡ୍ ଥିଲେ । କିନ୍ତୁ ଶ୍ରୀନଗର ଆସି ସେ ନିଜ ବନ୍ଧୁ ରାଜିବ ଖଜୁରିଆଙ୍କ ଘରେ ରହୁଥିଲେ । କାଲି କୌଣସି ଘଟଣାକୁ ନେଇ ୟାସିର ସହିତ ତାଙ୍କର ଯୁକ୍ତିତର୍କ ହୋଇଥିବା କୁହାଯାଉଛି । ଏହାପରେ ୟାସିର ରାଗି ତାଙ୍କୁ ହତ୍ୟା କରିଥିବା ଅନୁମାନ କରାଯାଉଛି । ହତ୍ୟାକାଣ୍ଡ ଘଟାଇବା ପରେ ୟାସିର ଘରୁ ବାହାରି ଯାଇଥିଲା । ଘରୁ ଯାଉଥିବା ବେଳେ ଅନ୍ୟ ଜଣେ ଘରୋଇ ସହାୟକ ତାଙ୍କୁ ଲୋହିଆଙ୍କ ବାବଦରେ ପଚାରିଥିଲେ । ସାହାବ ଶୋଇଛନ୍ତି କେହି ୟାସିର ଘରୁ ବାହାରି ଯାଇଥିଲା । ଏବେ ପ୍ରଶ୍ନ ଉଠୁଛି ଯେ, ୨୨ ବର୍ଷୀୟ ୟାସିର କ’ଣ ଟିଆରଏଫର ସିକ୍ରେଟ୍ ମିଶନରେ ଥିଲା କି ? ପୋଲିସ ଖୁବଶୀଘ୍ର ଏହି ରହସ୍ୟ ଉପରୁ ପରଦା ଉଠାଇବ ବୋଲି ଆଶା କରାଯାଇପରେ ।
କଟକ: ସମାଜ ୧୦୩ ବର୍ଷ ସ୍ବନକ୍ଷତ୍ର ଦିବସ କାର୍ଯ୍ୟକ୍ରମରେ ଯୋଗଦେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହି ଅବସରରେ ସେ ସମାଜ ପରିବାରକୁ ଅଭିନନ୍ଦନ ଜଣାଇବା କହିଥିଲେ ଯେ, ‘ଓଡ଼ିଶାର ଘରେ ଘରେ ପରିଚିତ ସମାଜ । ଓଡ଼ିଶାର ଶହେ ବର୍ଷର ଇତିହାସ ସହ ଯୋଡ଼ି ହୋଇରହିଛି । ସେବା ଓ ସଚେତନତା କ୍ଷେତ୍ରରେ ଆଦର୍ଶ ହୋଇ ରହିଛି । ଓଡ଼ିଶାର ସାମାଜିକ ଓ ରାଜନୈତିକ ଜୀବନରେ ଗୁରୁତ୍ବ ବଜାୟ ରଖିଛି ।’
ଏହି ଅବସରରେ ସେ ଫାଇଭ ଟି ଉପକ୍ରମରେ କିଭଳି ଉତ୍କଳମଣିଙ୍କ ଜନ୍ମସ୍ଥାନର ପୁନଃ ବିକାଶ କରାଯାଉଛି ସେବାବଦରେ ମଧ୍ଯ କହିଥିଲେ । ଡିଜିଟାଲ ଯୁଗରେ ପ୍ରିଣ୍ଟ୍ ଏବେ ମଧ୍ୟ ତା’ର ପ୍ରାସଙ୍ଗିକତା ହରାଇନାହିଁ ବୋଲି ମୁଖ୍ୟମନ୍ତ୍ରୀ କହିଥିଲେ । ସେ କହିଥିଲେ ଯେ, ଡିଜିଟାଲ୍ ଯୁଗରେ ବି ପ୍ରିଣ୍ଟ ମିଡିଆର ଆଦୃତି ରହିଛି । ରାଜ୍ୟର ବିକାଶ କ୍ଷେତ୍ରରେ ସମାଜ ଦାୟିତ୍ବ ସଂପନ୍ନ ଗଣମାଧ୍ୟମ ଭାବେ ଆଗକୁ କାମ କରିବ ବୋଲି ମୁଖ୍ୟମନ୍ତ୍ରୀ ଆଶା ପ୍ରକାଶ କରିଛନ୍ତି ।
ସମାଜର ସାମାଜିକ ଅଙ୍ଗିକାରକୁ ପ୍ରଶଂସା କରି ମୁଖ୍ୟମନ୍ତ୍ରୀ କୋଭିଡ୍ କାଳରେ ଟ୍ରଷ୍ଟର କାର୍ଯ୍ୟକୁ ପ୍ରଶଂସା କରିଥିଲେ । କୋଭିଡ୍ କାଳରେ ସମାଜ ଦ୍ୱାରା ପରିଚାଳିତ ଗୋପବନ୍ଧୁ ହସ୍ପିଟାଲର ଭୂମିକାକୁ ମଧ୍ୟ ମୁଖ୍ୟମନ୍ତ୍ରୀ ପ୍ରଂଶସା କରିଥିଲେ । ସେ କହିଥିଲେ ଯେ, ‘ସମାଜ ଦ୍ବାରା ପରିଚାଳିତ ଗୋପବନ୍ଧୁ ହସପିଟାଲ କୋଭିଡ୍ ସମୟରେ ବେଶ୍ ଭଲ କାମ କରିଛି । ଏବେ ମଧ୍ୟ ଗରିବ ରୋଗୀଙ୍କୁ ବିଏସକେଓ୍ବାଇ କାର୍ଡ ମାଧ୍ୟମରେ ସ୍ବାସ୍ଥ୍ୟସେବା ଯୋଗାଇ ଦେଉଛି ।’
ଏହାସହ ଦୁର୍ଗାପୂଜା ଅବସରରେ ସମସ୍ତଙ୍କୁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ । ଦୈନିକ ଖବର କାଗଜ ସମାଜର ୧୦୩ ତମ ସ୍ବନକ୍ଷତ୍ର ଦିବସ କଟକ ସାରଳା ଭବନରେ ଆୟୋଜିତ ହୋଇଥିଲା ।
ଭୁବନେଶ୍ବର: ଜାନୁଆରୀ ୧୩ ତାରିଖରେ ଓଡ଼ିଶାରେ ଖେଳାଯିବ ପୁରୁଷ ବିଶ୍ବକପ ହକି । ଏଥିପାଇଁ ରାଜ୍ୟ ସରକାରଙ୍କ ତରଫରୁ ଜୋରସୋରରେ ଚାଲିଛି ପ୍ରସ୍ତୁତି । ଏହି କ୍ରମରେ ଦୁଇ ଜଣ ଆଇଏଏସଙ୍କୁ ଓଏସଡି ଭାବେ ନିଯୁକ୍ତି ଦେଇଛନ୍ତି ରାଜ୍ୟ ସରକାର ।
ଭୁବନେଶ୍ବର ପାଇଁ ରଘୁ ଜୀ.ଙ୍କୁ ନିଯୁକ୍ତି ଦିଆ ଯାଇଥିବା ବେଳେ ରାଉରକେଲା ପାଇଁ ଭୂପେନ୍ଦର ସିଂ ପୁନିଆଙ୍କୁ ଦାୟିତ୍ବ ଦିଆଯାଇଛି । ଆଇଏଏସ୍ ବଲଓ୍ବନ୍ତ ସିଂଙ୍କୁ ବିଡିଏ ଉପାଧ୍ୟକ୍ଷ ଭାବେ ଅତିରିକ୍ତ ଦାୟିତ୍ବ ଦିଆଯାଇଛି ।
ଭୁବନେଶ୍ବର: ଶିଳ୍ପ ସମୃଦ୍ଧ ହେବ ଓଡ଼ିଶା । ରାଜ୍ୟକୁ ଆସିବ ଇଲେକ୍ଟ୍ରୋନିକ ଭେଇକିଲ ବା ଇଭି ଶିଳ୍ପ । ଓଡ଼ିଶାରେ ଉତ୍ପାଦନ ନିମନ୍ତେ କିଛି ଚାର୍ଜିଂ ଷ୍ଟେସନ ନିର୍ମାତା ରାଜ୍ୟ ସରକାରଙ୍କୁ ପ୍ରସ୍ତାବ ଦେଇଛନ୍ତି । କିଛି ପ୍ରମୁଖ ବୈଦ୍ୟୁତିକ ଯାନ ନିର୍ମାତା ମେକ୍ ଇନ୍ ଓଡ଼ିଶାର ଆଗାମୀ କନକ୍ଲେଭରେ ଯୋଗଦେବେ । ନିବେଶକ ସମ୍ମିଳନୀରେ ବହୁ ଖ୍ୟାତାନାମା କମ୍ପାନୀ ଓଡ଼ିଶା ଆସିବାକୁ ଆଗ୍ରହ ପ୍ରକାଶ କରିଛନ୍ତି । ଏଣୁ ଆଗାମୀ ଦିନରେ ଓଡ଼ିଶାରେ ଅଟୋମୋବାଇଲ କମ୍ପାନୀ ସ୍ଥାପନ ହେବାର ସମ୍ଭାବନା ରହିଛି ।
ଓଡ଼ିଶାରେ ବିଦ୍ୟୁତ ଚାଳିତ ଓ ହାଇବ୍ରିଡ ଯାନ ନିର୍ମାଣ ପାଇଁ ପର୍ଯ୍ୟାପ୍ତ ଭିତ୍ତିଭୂମି ରହିଛି । ଦକ୍ଷ ମାନବ ସମ୍ବଳ ସହିତ ବିଦ୍ୟୁତ, ଜଳ ଓ ଜମିର ସୁବିଧା ରହିଛି । ବିଭିନ୍ନ ଆଇଟିଆଇରୁ ଉତ୍ତୀର୍ଣ୍ଣ ଦକ୍ଷ ମାନବ ସମ୍ବଳ ବିଭିନ୍ନ ଅଟୋମୋବାଇଲ କ୍ଷେତ୍ରରେ କାର୍ଯ୍ୟ କରୁଛନ୍ତି । ଦେଶରେ ବିଦ୍ୟୁତ ଚାଳିତ ଯାନର ଚାହିଦା ବଢୁଛି । ଏହାକୁ ପ୍ରୋତ୍ସାହିତ କରିବାକୁ ରାଜ୍ୟ ସରକାର ଇଭି-ପଲିସି ୨୦୨୧ ପ୍ରଣୟନ କରିଛନ୍ତି । ଏଣୁ ଓଡ଼ିଶାରେ ଇଭି ଶିଳ୍ପ ପ୍ରତିଷ୍ଠା ହେଲେ ରାଜ୍ୟ ସରକାର ସମସ୍ତ ପ୍ରୋତ୍ସାହନ ଯୋଗାଇ ଦେବେ । ପୁରୁଣା ଗାଡ଼ି ସ୍କ୍ରାପ ଶିଳ୍ପ ପାଇଁ ମଧ୍ୟ ଏଥିରେ ପ୍ରୋତ୍ସାହନ ବ୍ୟବସ୍ଥା ଅଛି । ଅନେକ ରାଜ୍ୟ ଏହି ଶିଳ୍ପକୁ ଆକୃଷ୍ଟ କରିବାକୁ ଉଦ୍ୟମ କରୁଥିବାବେଳେ ଓଡ଼ିଶାରେ ଇଭି ଶିଳ୍ପର ସମ୍ଭାବନା ବେଶ୍ ଉଜ୍ଜ୍ବଳ । ଏହାଦ୍ବାରା ବ୍ୟପକ ନିଯୁକ୍ତି ସୁଯୋଗ ସହିତ ଓଡ଼ିଶାରେ ଦକ୍ଷ ମାନବ ସମ୍ଭଳକୁ ରୋଜଗାର ମିଳିପାରିବ ।
ଜମ୍ମୁ: ଗୃହମନ୍ତ୍ରୀଙ୍କ ଗସ୍ତ ବେଳେ ଜାମ୍ମୁ-କାଶ୍ମୀର ଉପତ୍ୟାକାରେ ଆତଙ୍କବାଦୀଙ୍କ ଜଘନ୍ୟ କାଣ୍ଡ । ଘରେ ପଶି ଜେଲ ଡିଜିପିଙ୍କୁ ହତ୍ୟା । ଡିଜିପି ହେମନ୍ତ କୁମାର ଲୋହିଆଙ୍କୁ ଗଳାକାଟି ହତ୍ୟା କରିଛନ୍ତି ଦୁର୍ବୃତ୍ତ । ଡିଜିପିଙ୍କ ବାସଭବନରୁ ତାଙ୍କ ସନ୍ଦିଗ୍ଧ ମୃତଦେହ ଉଦ୍ଧାର କରାଯାଇଛି ।
କାଚ ବୋତଲ ଭାଙ୍ଗି ଦୁର୍ବୃତ୍ତ ତାଙ୍କ ବେକ କାଟି ଦେଇଥିବା ବେଳେ ଡିଜିପିଙ୍କ ଶରୀରରେ ଅନେକ କ୍ଷତ ଚିହ୍ନ ଦେଖିବାକୁ ମିଳିଥିଲା । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଘରୋଇ ସହାୟକ ୟାସିରଙ୍କ ଉପରେ ସନ୍ଦେହ କରୁଛି ପୋଲିସ । ୟାସିର ଶବକୁ ଜଳାଇବାକୁ ମଧ୍ୟ ଚେଷ୍ଟା କରିଥିବା ଜଣାପଡ଼ିଛି । ବେଡରୁମରେ ନିଆଁ ଜଳୁଥିବା ଦେଖି ସୁରକ୍ଷାକର୍ମୀ ପୋଲିସକୁ ଖବର ଦେଇଥିଲେ । ସ୍ପଟରେ ଫରେନସିକ ଓ କ୍ରାଇମ ଟିମ୍ ପହଞ୍ଚି ବିଭିନ୍ନ ଦିଗକୁ ନେଇ ତଦନ୍ତ ଆରମ୍ଭ କରିଛି । ଘରୋଇ ସହାୟକଙ୍କୁ ଗିରଫ କରିବା ପାଇଁ ପୋଲିସ ସର୍ଚ୍ଚ ଅପରେସନ ଆରମ୍ଭ କରିଛି । ଟିଆରଏଫ ନାମକ ଏକ ଆତଙ୍କବାଦୀ ସଂଗଠନ ଡିଜିପିଙ୍କ ହତ୍ୟା ନେଇ ନିଜକୁ ଦାୟୀ କରିଛି ।୧୯୯୨ ବ୍ୟାଚର IPS ଅଫିସର ଥିଲେ ହେମନ୍ତ କୁମାର ।
ଲାହୋର: ଶୀତ ଋତୁ ପୁର୍ବରୁ ଭାରତରେ ଅସ୍ଥିରତା ସୃଷ୍ଟି ଲାଗି ପାକିସ୍ତାନର ବଡ଼ ଉଦ୍ୟମ । ଭାରତକୁ ବହୁ ସଂଖ୍ୟକ ଆତଙ୍କବାଦୀଙ୍କୁ ପଠାଇବା ଲାଗି ପାକ ଗୁଇନ୍ଦା ସଂସ୍ଥା ଆଇଏସଆଇ କରିଛି ଯୋଜନା । ବିଶେଷ କରି କାଶ୍ମୀର ଉପତ୍ୟକାରେ ଅସ୍ଥିରତା ସୃଷ୍ଟି ଲାଗି ଆଇଏସଆଇ ଉଦ୍ୟମ କରିଥିବା ଗୁଇନ୍ଦା ବିଭାଗ ପକ୍ଷରୁ ମିଳିଛି ସୂଚନା ।
ଉଦ୍ଧମପୁର ବ୍ଲାଷ୍ଟ ଘଟଣାରେ ଅଭିଯୁକ୍ତଙ୍କୁ ଚାଲିଥିବା ଜେରା କ୍ରମେ ଏହି ତଥ୍ୟ ସାମନାକୁ ଆସିଛି । ଉଗ୍ରବାଦୀଙ୍କ ସହ ବିପୁଳ ପରିମାଣର ଅସ୍ତ୍ରଶସ୍ତ୍ର ଓ ଗୋଳାବାରୁଦ ଭାରତ ପଠାଇବା ଲାଗି ମଧ୍ୟ ଆଇଏସଆଇ ଯୋଜନା କରିଥିବା ତଦନ୍ତରୁ ଜଣାପଡିଛି । ଏପରିକି ଶ୍ରୀନଗରରେ ୩୦୦ରୁ ଅଧିକ କ୍ଷୁଦ୍ର ଅସ୍ତ୍ରଶସ୍ତ୍ର ନିୟୋଜିତ କରାଯାଇଛି । ଜାମ୍ମୁ ଓ କାଶ୍ମୀରରେ ହତ୍ୟା, ବିସ୍ଫୋରଣ ଓ ମୁଖାପିନ୍ଧି ହତ୍ୟା କରିବା ଲାଗି ଆଇଏସଆଇ ଲକ୍ଷ୍ୟ ରଖିଛି ।
ଗତ ସେପ୍ଟେମ୍ବର ୨୮ରେ ଶ୍ରୀନଗର ଦୋମେଲି ଚୌକରେ ହୋଇଥିବା ବିସ୍ଫୋରଣ ଘଟଣା ସମେତ ଅନ୍ୟାନ୍ୟ ଘଟଣାରେ ସମ୍ପୃକ୍ତ ଆତଙ୍କବାଦୀ ଗିରଫ ହେବା ପରେ ଜେରା ବେଳେ ଏହି ଚାଞ୍ଚଲ୍ୟକର ଖବର ପ୍ରକାଶ ପାଇଛି ।
କିଭ: ୟୁକ୍ରେନରେ ଋଷକୁ ବଡ଼ ଝଟକା । ଦଖଲରେ ଥିବା ଗୋଟିଏ ପରେ ଗୋଟିଏ ଅଞ୍ଚଳ ଯାଉଛି ଋଷ ହାତରୁ । ଦକ୍ଷିଣାଞ୍ଚଳ ଅନ୍ତର୍ଗତ ଦିନିପ୍ରୋ ନଦୀ ନିକଟସ୍ଥ ବିଭିନ୍ନ ସହରକୁ କବଜା କରିଛି ୟୁକ୍ରେନ । କିଛି ଦିନ ଧରି ଋଷ କବଜାରେ ଥିଲା ଏହି ଅଞ୍ଚଳ । ଦିନିପ୍ରୋ ନିକଟରେ ପ୍ରାୟ ୨୫ ହଜାର ଋଷୀୟ ସୈନ୍ୟ ରହିଥିବାବେଳେ ସେମାନେ ମୁକୁଳିବାର ବାଟ ପାଉନାହାନ୍ତି । ଦିନପ୍ରୋରୁ ବାହାରକୁ ଯିବା ଲାଗି ଥିବା ପ୍ରମୁଖ ବ୍ରିଜ ଗୁଡିକୁ ଧ୍ବଂସ କରିଦେଇଛି ୟୁକ୍ରେନ ।
ୟୁକ୍ରେନର ଖେରସନ, ଲୁଗାନସ୍କ, ଦୋନେସ୍କ ଓ ଜାପୋରିଜିୟାକୁ ଋଷ ନିଜ ସୀମାରେ ମିଶାଇ ଦେବା ପରେ ଉଗ୍ର ହୋଇଥିଲା ଋଷ । ତେବେ ଦିନିପ୍ରୋର ଅନେକ ଅଞ୍ଚଳକୁ ପୁଣି କବଜା କରିଛ ୟୁକ୍ରେନ । ଜୋଲୋତା ବାଲକାକୁ ୟୁକ୍ରେନ ପୁଣି କବଜା କରିଥିବାବେଳେ ସେଠାରେ ୟୁକ୍ରେନ ସୈନ୍ୟ ଉଡାଇଛନ୍ତି ଜାତୀୟ ପତାକା । ବଡ଼କଥା ହେଉଛି ଦିନିପ୍ରୋରେ ୟୁକ୍ରେନ ସୈନ୍ୟ ଯଦି ଘେରାବନ୍ଦୀ କରନ୍ତି ତେବେ ଋଷର ହଜାର ହଜାର ସୈନ୍ୟଙ୍କ ଜୀବନ ବିପନ୍ନ ହେବ । ତେଣେ ଇଜିୟମ ସହରରେ ଠାବ ହୋଇଛି ୧୦ଟି ନିର୍ଯାତନାସ୍ଥଳୀ । ସେଠାରେ ୟୁକ୍ରେନୀୟ ସୈନ୍ୟଙ୍କୁ ଋଷ ସୈନ୍ୟ ଅକଥନୀୟ ଅତ୍ୟାଚାର କରୁଥିବା ସୂଚନା ମିଳିଛି ।
ଭୁବନେଶ୍ବର: ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରେ କେନ୍ଦ୍ରୀଭୂତ ଲଘୁଚାପ । ପ୍ରବଳ ବର୍ଷାରେ ଭିଜୁଛି ଉପାନ୍ତରୁ ଉପକୂଳ । ରାଜ୍ୟର ବିଭିନ୍ନ ସ୍ଥାନରେ ପ୍ରବଳ ବର୍ଷା ଲାଗି ରହିଛି । କଟକ ଓ ଭୁବନେଶ୍ବରରେ ଅବିଶ୍ରାନ୍ତ ବର୍ଷା ହେଉଛି । ଟୁଇନସିଟିରେ ଘଣ୍ଟାପ୍ରତି ୨୦ରୁ ୩୦ ମିଲିମିଟର ବର୍ଷା ରେକର୍ଡ କରାଯାଇଛି ।
ଆଜି ଉପକୂଳ ଓଡିଶାରେ ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ରହିଛି । ଏଥିପାଇଁ ୧୮ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ୪ ଜିଲ୍ଲାରେ ୭୦ ରୁ ୨୦୦ ମିଲିମିଟର ବର୍ଷା ହେବାର ସମ୍ଭାବନା ରହିଛି । ଏଥିପାଇଁ ଗଞ୍ଜାମ, ଗଜପତି, ମାଲକାନଗିରି ଓ କୋରାପୁଟକୁ ସତର୍କତା କରାଯାଇଛି ।
ଆସନ୍ତାକାଲି ପାଇଁ ଦକ୍ଷିଣ ଆଭ୍ୟନ୍ତରୀଣ ଓଡ଼ିଶାର ୧୦ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ୬ ତାରିଖରେ ବର୍ଷା କମିବ, ଦକ୍ଷିଣ ଓଡ଼ିଶାର ୬ଟି ଜିଲ୍ଲାରେ ପ୍ରବଳ ବର୍ଷା ନେଇ ଆକଳନ କରାଯାଇଛି । ୭୦ ରୁ ୨୦୦ ମିଲିମିଟର ପର୍ଯ୍ୟନ୍ତ ବର୍ଷା ନେଇ ଆକଳନ କରାଯାଇଥିବାବେଳେ ଉତ୍ତର, ଦକ୍ଷିଣ ଏବଂ ଉପକୂଳ ଓଡ଼ିଶା ପ୍ରଭାବିତ ହେବ ।
ନୂଆଦିଲ୍ଲୀ: ଆଇଆଇଟି ଜେଇଇର ମୁଖ୍ୟ ପରୀକ୍ଷା ସମୟରେ ସଫ୍ଟୱେୟାରରେ କଥିତ ହ୍ୟାକିଂ କରି ପେପର ଲିକ୍ କରାଇବା ମାମଲାରେ ଅଭିଯୁକ୍ତ ରୁଷୀୟ ନାଗରିକକୁ ଗିରଫ କରାଯାଇଛି । ତାକୁ ବିମାନବନ୍ଦରରୁ ଗିରଫ କରାଯାଇଛି । ସିବିଆଇ ନିଜ ହାତକୁ ମାମଲା ନେଇ ପଚରା ଉଚରା କରୁଛି । ତେବେ ସୂଚନାଅନୁଯାୟୀ, ଜଣେ ରୁଷୀୟ ନାଗରିକଙ୍କୁ ପଚରା ଉଚରା କରାଯାଉଛି ।
ଜେଇଇ ମେନ୍ସ ୨୦୨୧ ପେପର ଲିକ୍ ମାମଲାରେ ତା ବିରୋଧରେ ଲୁକଆଉଟ୍ ସର୍କୁଲାର ଜାରି କରାଯାଇଥିଲା । ଏହାରି ଆଧାରରେ କାଜାକିସ୍ତାନରୁ ଦିଲ୍ଲୀ ବିମାନବନ୍ଦରରେ ପହଞ୍ଚିବା ପରେ ଇମିଗ୍ରେସନ ବିଭାଗ ତାକୁ ହେପାଜତକୁ ନେଇଥିଲା । ପେପର ଲିକ୍ ମାମଲାରେ ବ୍ୟକ୍ତିଜଣଙ୍କ ମୁଖ୍ୟ ହ୍ୟାକର ଥିଲା । ସିବିଆଇ ମୁତାବିକ ଆଇଇଟି ଜେଇଇ ପେପର ଲିକ୍ ମାମଲାର ତଦନ୍ତ ସମୟରେ ଜଣାଯାଇଛି ଯେ କିଛି ବିଦେଶୀ ନାଗରିକ ଜେଇଇ ମେନ୍ସ ସମେତ ଅନେକ ଅନଲାଇନ୍ ପରୀକ୍ଷାରେ ସଫ୍ଟୱେୟାରେ ଗଡ଼ବଡ଼ କରିଥିଲେ ।
ଏହି ସମୟରେ ଏହି ରୁଷୀୟ ନାଗରିକଙ୍କ ଭୂମିକାର ଖୁଲାସା ହୋଇଥିଲା, ଯିଏକି କଥିତ ଭାବେ ଆଇଲିଅନ ସଫ୍ଟୱେୟାର (ଯେଉଁ ସଫ୍ଟୱେୟାର ମାଧ୍ୟମରେ ପରୀକ୍ଷା ହେଉଥିଲା) ସହ ଗଡବଡ କରିଥିଲା । ଏବଂ ପରୀକ୍ଷା ସମୟରେ ସନ୍ଦିଗ୍ଧ ପରୀକ୍ଷାର୍ଥୀଙ୍କ କମ୍ପ୍ୟୁଟର ସିଷ୍ଟମକୁ ହ୍ୟାକ କରିବାରେ ଅନ୍ୟ ଅଭିଯୁକ୍ତଙ୍କ ସହାୟତା କରିଥିଲା । ଏହି କାରଣରୁ ଏହି ରୁଷୀୟ ନାଗରିକ ବିରୋଧରେ ଲୁକ୍ ଆଉଟ୍ ସର୍କୁଲାର ଜାରି କରାଯାଇଥିଲା ।
ଉଲ୍ଲେଖଯୋଗ୍ୟ, ଏକ ବେସରକାରୀ ଶିକ୍ଷା ସଂସ୍ଥାରେ ଚାଲୁଥିବା ଜେଇଇ ମେନ୍ସ ପରୀକ୍ଷା ୨୦୨୧ରେ ଅନିୟମିତତା ଅଭିଯୋଗରେ ସେହି କମ୍ପାନୀ, ତାର ନିର୍ଦ୍ଦେଶକ ଏବଂ ତିନି କର୍ମଚାରୀ, ତିନି ଦଲାଲ ସମେତ ଅନ୍ୟମାନଙ୍କ ବିରୋଧରେ ୧ ସେପ୍ଟେମ୍ବରକୁ ମାମଲା ରୁଜୁ କରାଯାଇଥିଲା । ଅଭିଯୋଗ ଅନୁଯାୟୀ ଏମାନେ ଜେଇଇ ମେନ୍ସ ପରୀକ୍ଷାରେ ଗଡବଡ କରୁଥିଲେ । ଇଞ୍ଜିନିୟର ସଂସ୍ଥା ଏନଆଇଟିରେ ଆଡମିଶନ କରାଇଦେବା ପାଇଁ ପରୀକ୍ଷାର୍ଥୀଙ୍କଠାରୁ ମୋଟା ଅଙ୍କରେ ଅର୍ଥ ନେଇଥିଲେ । ଏବଂ ହରିୟାଣାର ସୋନିପଥ ସ୍ଥିତ ଏକ ପରୀକ୍ଷା କେନ୍ଦ୍ରରେ ରିମୋଟ ଆକ୍ସେସ ଜରିଆରେ ସେମାନଙ୍କ ପ୍ରଶ୍ନ ପତ୍ର ସମାଧାନ କରୁଥିଲେ ।
