ଭୁବନେଶ୍ବର: ପଦମପୁର ଉପନିର୍ବାଚନ ଫଳାଫଳ ପୂର୍ବରୁ ବିଜେପି ଦୁଇ ଫାଳ । ଦଳର ବରିଷ୍ଠ ନେତା ଖାରବେଳ ସ୍ବାଇଁ ବିଜେଡି ଜିତିବ ବୋଲି ଭବିଷ୍ୟବାଣୀ କରିଛନ୍ତି । ସେପଟେ ଅନ୍ୟତମ ବରିଷ୍ଠ ନେତା ପୃଥ୍ବୀରାଜ ହରିଚନ୍ଦନ ଖରବେଳଙ୍କ ଆକଳନ ସହ ଏକମତ ହୋଇପାରୁନାହାଁନ୍ତି । ଖାରବେଳ ସ୍ବାଇଁ ପଦମପୁର ପ୍ରଚାରରେ ନଥିଲେ କିମ୍ବା ସେଠାକୁ ସେ ଯାଇନାହାଁନ୍ତି ।
ତେଣୁ ସେ କିଭଳି ବିଜେଡି ଜିତିବ ବୋଲି କହୁଛନ୍ତି ବୋଲି ପ୍ରଶ୍ନ ଉଠାଇଛନ୍ତି ପୃଥ୍ବୀରାଜ । ଖାରବେଳଙ୍କ କହିବା ଅନୁଯାୟୀ ବିଜେପି ପଦମପୁରରେ ହାରିବ ଏବଂ ଦଳ ଏହି ପରାଜୟର କାରଣ ସମୀକ୍ଷା କରିବା ଆବଶ୍ୟକ ।
ନୂଆଦିଲ୍ଲୀ: ଚିନ୍ତାଜନକ ସ୍ଥିତିରେ ଦିଲ୍ଲୀ ପ୍ରଦୂଷଣ । ଶୀତ ବଢ଼ୁଥିବା ବେଳେ ପ୍ରଦୂଷଣ ଅତିରୁ ଅତି ଖରାପ ସ୍ତରରେ ପହଞ୍ଚିଛି । ଗତ କିଛିଦିନ ଧରି ରାଷ୍ଟ୍ରୀୟ ରାଜଧାନୀ ଦିଲ୍ଲୀ AQI ସ୍ତର ଅତି ଖରାପରେ ରହିଛି । ଏୟାର କ୍ବାଲିଟି ଖରାପ ହୋଇଥିବାରୁ କଟକଣା ବଢ଼ାଇ ଦିଆଯାଇଛି । ଆଜି ସକାଳୁ ଦିଲ୍ଲୀ AQI ୩୭୫ ରେକର୍ଡ ହୋଇଛି ।
ରାଜଧାନୀର ୩୫ AQI ଷ୍ଟେସନ ମଧ୍ୟରୁ ୩୧ ଷ୍ଟେସନରେ ପ୍ରଦୂଷଣ ମାତ୍ରା ଅତି ଖରାପ ରହିଥିବା ରିପୋର୍ଟ ଦେଇଛି ସିପିସିବି । ଗ୍ରେଡେଡ ରେସପନ୍ସ ଆକ୍ସନ ପ୍ଲାନ ଷ୍ଟେଜ-୩ ଆଧାରରେ ଜରୁରୀ ନଥିବା ନିର୍ମାଣ କାର୍ଯ୍ୟ ବନ୍ଦ ରଖିବାକୁ ନିର୍ଦ୍ଦେଶ ଜାରି କରାଯାଇଛି । ଇଟା ଭାଟି ଓ ଷ୍ଟୋନ କ୍ରସର ଉପରେ କଟକଣା ଲଗାଯାଇଛି ।
ନୂଆଦିଲ୍ଲୀ: ଦିଲ୍ଲୀ ମହାନଗର ନିଗମ ନିର୍ବାଚନରେ ବାଜି ମାରିବ ଝାଡୁ । ଦୀର୍ଘ ୧୫ ବର୍ଷ ପରେ ବିଜେପି ହାତରୁ ଖସିବ ଏମସିଡି । ଦିଲ୍ଲୀର ମିନି ସରକାର ଗଠନ ପାଇଁ ଆପ୍ ସପକ୍ଷରେ ଭୋଟ ପଡ଼ିଛି ବୋଲି ଗତକାଲି ବୁଥ୍ ବାହୁଡ଼ା ମତରୁ ଜଣାପଡ଼ିଛି । ଏଗଜିଟ ପୋଲ କରିଥିବା ଅଧିକାଂଶ ସଂସ୍ଥା ଦିଲ୍ଲୀ ଏମସିଡିରେ ଆମ ଆଦମୀ ପାର୍ଟିକୁ ପୂର୍ଣ୍ଣ ବହୁମତ ମିଳିଥିବା ରିପୋର୍ଟ କରିଛନ୍ତି ।
ଏଗଜିଟ ପୋଲ ସର୍ଭେକୁ ନେଇ ରାଜନୈତିକ ଦଳ ଗୁଡ଼ିକ ମଧ୍ୟରେ ଉତ୍ସାହ ଦେଖାଯାଇଛି । ବୁଥ ବାହୁଡ଼ା ମତକୁ ନେଇ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆପ୍ ମୁଖ୍ୟ ଅରବିନ୍ଦ କେଜରିଓ୍ବାଲ ଦିଲ୍ଲୀବାସୀଙ୍କୁ ଶୁଭେଚ୍ଛା ଜଣାଇଛନ୍ତି । ଏମସିଡି ରେଜଲ୍ଟକୁ ନେଇ ଆକ୍ସିସ ମାଇଁ ଇଣ୍ଡିଆ କରିଥିବା ସର୍ଭେରେ ଆପ୍ କୁ ୧୪୯ରୁ ୧୭୧ ସିଟ ମିଳିବ ବୋଲି କହିଛି । ସେହିପରି ବିଜେପିକୁ ୬୯ରୁ ୯୧ ସିଟ ଓ କଂଗ୍ରେସକୁ ୩ରୁ ୭ ସିଟ୍ ମିଳିବ ବୋଲି ସର୍ଭେ ରିପୋର୍ଟ ଦେଇଛି ।
ଅନ୍ୟପଟେ ନ୍ୟୁଜ୍ ଏକ୍ସ ଜନ କି ବାତ୍ ଆପ୍କୁ ୧୫୯ରୁ ୧୭୫ ସିଟ୍ ମିଳିପାରେ ବୋଲି କହିଛି । ବିଜେପିକୁ ୭୦ରୁ ୯୨ ଓ କଂଗ୍ରେସକୁ ୪ରୁ ୭ ସିଟ ଆସନ ମିଳିପାରେ ବୋଲି କହିଛି ।
ଭୁବନେଶ୍ୱର: ଭୁବନେଶ୍ବର ମହାନଗର ନିଗମକୁ ଜାତୀୟ ସ୍ତରରେ ମିଳିଛି ଆଉ ଏକ ବଡ଼ ସଫଳତା । ସ୍ବେରେଜ, ସେଫଟେଜ୍ ଓ ଫିକଲ ମ୍ୟାନେଜମେଣ୍ଟ କ୍ଷେତ୍ରରେ ପୁରସ୍କୃତ ହେବ ବିଏମସି । ଆସନ୍ତା ୭ ଓ ୮ ତାରିଖରେ ଦିଲ୍ଲୀରେ ହେବାକୁ ଥିବା ଉତ୍ସବରେ ସମ୍ମାନ ଗ୍ରହଣ କରିବ ବିଏମସି । ପୁରସ୍କାର ଗ୍ରହଣ କରିବାକୁ ଭୁବନେଶ୍ୱର ମେୟରଙ୍କ ସମେତ ୫ ଜଣିଆ ପ୍ରତିନିଧି ଦଳ ଦିଲ୍ଲୀ ଗସ୍ତ କରିଛି ।
ସମଗ୍ର ଦେଶରେ ବିଏମସିର ମଡେଲ ସର୍ବୋତ୍ତମ । ଦିଲ୍ଲୀ ଗସ୍ତରେ ଯାଇଥିବା ଟିମରେ ସାନିଟେସନ ଷ୍ଟାଣ୍ଡିଂ କମିଟି ଅଧ୍ୟକ୍ଷ ବିରଞ୍ଚି ନାରାୟଣ ମହାସୁପକାର, ପ୍ରୀତିନନ୍ଦା ରାଉତରାୟ, ଭାରତୀ ସିଂ ଓ ଡେପୁଟି କମିଶନର କମଳାକାନ୍ତ ବେହେରା ସାମିଲ ଅଛନ୍ତି । ପରିମଳ ବ୍ୟବସ୍ଥାରେ ସୁଧାର ପାଇଁ ଭୁବନେଶ୍ବର ମହାନଗର ନିଗମର ବିଭିନ୍ନ ପଦକ୍ଷେପକୁ ରାଜଧାନୀବାସୀ ଗ୍ରହଣ କରୁଥିବାରୁ ବିଏମସିକୁ ମିଳୁଛି ସଫଳତା ।
ଇଣ୍ଟରନେଟ ଓ ଟେଲିକମ ସେବା ଯୋଗାଇବାରେ ଭାରତ ସବୁଠାରୁ ଶସ୍ତା ଦେଶ । ଏବେ ପୁଣି ଏହି ସେବା ଆହୁରି ଶସ୍ତା ହେବାକୁ ଆଶା କରାଯାଉଛି । ମହଙ୍ଗା ମାଡ, ମହଙ୍ଗା ସ୍ପ୍ରେକ୍ଟମ ବା ଅତ୍ୟଧିକ ଲାଇସେନ୍ସ ଫି’ର ବାହାନା ଦେଇ ଲଗାତାର ଟାରିଫ ବୃଦ୍ଧି କଥା କହୁଛି ଟେଲିକମ କମ୍ପାନୀ । ୨୦୨୧ରେ ୨୦ ରୁ ୨୫ ପ୍ରତିଶତ ମଧ୍ୟ ଟାରିଫ ବୃଦ୍ଧି କରିଥିଲା କମ୍ପାନୀ । ଚଳିତବର୍ଷ ନଭେମ୍ବର ସୁଦ୍ଧା ୧୦ରୁ ୧୫ ପ୍ରତିଶତ ଟାରିଫ ବୃଦ୍ଧି ପାଇଁ ଆଶା କରାଯାଉଥିଲା । ହେଲେ ବର୍ତ୍ତମାନ ସୁଦ୍ଧା ଟାରିଫ ବୃଦ୍ଧି କରିନାହିଁ କମ୍ପାନୀ । ଯାହା ଫଳରେ ମୋବାଇଲ କଲ୍ ଓ ଇଣ୍ଟରନେଟ ଶସ୍ତା ହେବାକୁ ଯାଉଛି ।
ଟେଲିକମ କମ୍ପାନୀରେ ବାର୍ଷିକ ଲାଇସେନ୍ସ ଫି’ ଖର୍ଚ୍ଚର ବଡ ଭୁମିକା ତୁଲାଇଥାଏ । କମ୍ପାନୀକୁ ନିଜ ଏଜିଆରର ୮ ପ୍ରତିଶତ ଲାଇସେନ୍ସ ଫି’ ଭାବେ ଦେବାକୁ ହୋଇଥାଏ । କିନ୍ତୁ ନୂଆ ଟେଲିକମ ବିଲ୍ରେ ସରକାର ଏହି ଲାଇସେନ୍ସ ଫି’ କିଛି ମାତ୍ରାରେ କମ କରିପାରନ୍ତି ।
ଟେଲିକମ ବିଲ୍ର ପ୍ରଥମ ଡ୍ରାଫ୍ଟ କାରଣରୁ ପୂର୍ବରୁ ବି ବିବାଦ ଘେରରେ ରହିଆସିଛି ଦୂରସଞ୍ଚାର ମନ୍ତ୍ରାଳୟ । ଏହି ଡ୍ରାଫ୍ଟକୁ ନେଇ ନଭେମ୍ବର ୨୦ ମଧ୍ୟରେ ୯୦୦ ଅଭିଯୋଗ ଆସିଛି । ଡିସେମ୍ବର ଶେଷ ସୁଦ୍ଧା ସରକାର ପୁଣି ସଂଶୋଧିତ ଡ୍ରାଫ୍ଟ ଆଣି ପାରନ୍ତି । ଯେଉଁଥିରେ ଲାଇସେନ୍ସ ଫି’ ଏଜିଆରର ୮ ପ୍ରତିଶତରୁ ହ୍ରାସ କରି ୫ ରୁ ୬ ପ୍ରତିଶତ ମଧ୍ୟରେ ସୀମିତ ରହିବ ।
ପ୍ରକୃତରେ ଟେଲିକମ କମ୍ପାନୀଙ୍କୁ ଲାଇସେନ୍ସ ଫି’ରୁ ମୁକ୍ତି ମିଳିବାର ଶ୍ରେୟ ହ୍ବାଟସଆପ୍ ଭଳି ଟେକ୍ କମ୍ପାନୀଙ୍କୁ ମିଳିବା ଆବଶ୍ୟକ । ଟେଲିକମ ବିଲ୍ ପୂର୍ବରୁ ଡ୍ରାଫ୍ଟରେ କୁହାଯାଇଥିଲା ଯେ ହ୍ବାଟସଆପ୍, ଟେଲିଗ୍ରାମ, ସ୍କାଇପି ଭଳି କମ୍ୟୁନିକେସନ ଆପ୍କୁ ଗାଇଡଲାଇନ ମଧ୍ୟରେ ଅଣାଯିବା ଉଚିତ୍ । ଏହା ଦ୍ବାରା ଭାରତରେ ବ୍ୟବସାୟ କରିବା ପାଇଁ ଏମାନଙ୍କୁ କିଛି ନିୟମ ମାନିବାକୁ ପଡିବ ।
ଏହି ତିନି ନିୟମକୁ ନାପସନ୍ଦ କରିବା ସହ ବିରୋଧ କରୁଥିଲେ ଟେକ୍ କମ୍ପାନୀ । କିନ୍ତୁ ବହୁ କାର୍ଯ୍ୟକ୍ରମରେ କେନ୍ଦ୍ରମନ୍ତ୍ରୀ ଅଶ୍ବିନୀ ବୈଷ୍ଣବ କହିଥିଲେ ଯେ, ଏହି କମ୍ପାନୀ ଗୁଡିକରେ ପ୍ରତିବନ୍ଧକ ଲଗାଇବା ସରକାରଙ୍କ ଉଦ୍ଦେଶ୍ୟ ନୁହେଁ । ବରଂ କମ୍ପାନୀର ଚାପରେ ହୁଏତ ସରକାର ଲାଇସେନ୍ସର ପ୍ରାବଧାନ ହଟାଇ ପାରନ୍ତି ନଚେତ ଲାଇସେନ୍ସକୁ ଅନିବାର୍ଯ୍ୟ ରଖି ଲାଇସେନ୍ସ ଫି’ ବହୁତ କମ କରିପାରନ୍ତି । ଯାହା ଫଳରେ ଲାଇସେନ୍ସ ଫି’କୁ କମ କରି ଏଜିଆରର ଏକ ବା ଦୁଇ ପ୍ରତିଶତ କରାଯାଇପାରିବ । ଏକାଥରେ ଏହି ନିୟମ ଲାଗୁ ନ କରି ସରକାର ପର୍ଯ୍ୟାୟକ୍ରମେ କରିପାରନ୍ତି ବୋଲି ବିଶେଷଜ୍ଞ ମତ ଦିଅନ୍ତି ।
ମୁମ୍ବାଇ: ଜଣାଶୁଣା ଟିଭି ଅଭିନେତ୍ରୀ ହେତଲ ଯାଦବଙ୍କ କାର ଦୁର୍ଘଟଣାଗ୍ରସ୍ତ । ଟିଭିର ମୋଷ୍ଟ ଫେମସ ଶୋ ଇମଲିରେ ଶିବାନୀ ରାଣା ଭୁମିକାରେ ନଜର ଆସୁଥିବା ହେତଲଙ୍କ ଗାଡି ଦୁର୍ଘଟଣାର ଶିକାର ହୋଇଛି । ବିଳମ୍ବିତ ରାତିରେ ସୁଟିଂରୁ ଫେରୁଥିବା ସମୟରେ ହେତଲଙ୍କ ଗାଡି ଏକ ଟ୍ରକକୁ ଧକ୍କା ଦେଇଥିଲା । କିନ୍ତୁ ଅଭିନେତ୍ରୀ ଏବେ ସୁରକ୍ଷିତ ଅଛନ୍ତି । ସୁଟିଂ ସାରି ସେ ନିଜେ ଗାଡି ଡ୍ରାଇଭିଂ କରି ଫେରୁଥିଲେ । ଏହି ସମୟରେ ଏକ ଟ୍ରକ ତାଙ୍କ ଗାଡିକୁ ପଛପଟୁ ଧକ୍କା ଦେଇଥିଲା ।
ଜେଭିଏଲଆର ଛକରେ ଟ୍ରକଟି ଅଭିନେତ୍ରୀଙ୍କ କାରକୁ ଧକ୍କା ଦେବା ସହ ୧୦୦ ମିଟର ପର୍ଯ୍ୟନ୍ତ ଘୋଷାଡି ନେଇଥିଲା । ଗାଡି ଓଲଟିବାର ଠିକ୍ ପୂର୍ବରୁ ବ୍ରେକ୍ ମାରି ଜୀବନ ବଞ୍ଚାଇଛନ୍ତି ଅଭିନେତ୍ରୀ । ସୌଭାଗ୍ୟବଶତଃ ବଡ ଅଘଟଣରୁ ବର୍ତ୍ତି ଯାଇଛନ୍ତି ଅଭିନେତ୍ରୀ । ଗତ ୨୫ ବର୍ଷରୁ ଅଭିନୟ ଜଗତ ସହ ଜଡିତ ଅଛନ୍ତି ହେତଲ । ଲୋକପ୍ରିୟ ସିରିଏଲ ତାରକ ମେହତା କା ଉଲଟା ଚଷମାରେ ଜ୍ବାଲା ଚରିତ୍ରରୁ ଲୋକପ୍ରିୟତା ହାସଲ କରିଛନ୍ତି ହେତଲ ।
ଖୋର୍ଦ୍ଧା: ଭିଜିଲାନ୍ସ ଜାଲରେ ଖୋର୍ଦ୍ଧା କ୍ଷୁଦ୍ର ଜଳସେଚନ ନିର୍ବାହୀ ଯନ୍ତ୍ରୀ । ଯନ୍ତ୍ରୀ ମନୋଜ ରଞ୍ଜନ ଦାସଙ୍କ ସରକାରୀ କାର୍ଯ୍ୟାଳୟରେ ରେଡ୍ କରୁଛି ଭିଜିଲାନ୍ସ ଟିମ୍ । ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଏକକାଳୀନ ୭ଟି ସ୍ଥାନରେ ରେଡ ଜାରି ରହିଛି ।
ଆଜି ସକାଳୁ ଭିଜିଲାନ୍ସ ଇନ୍ସପେକ୍ଟର ମମିତା ପ୍ରଧାନଙ୍କ ନେତୃତ୍ୱରେ ଏକ ଟିମ୍ କ୍ଷୁଦ୍ର ଜଳସେଚନ ନିର୍ବାହୀ ଯନ୍ତ୍ରୀଙ୍କ ସରକାରୀ କାର୍ଯ୍ୟାଳୟରେ ରେଡ୍ କରୁଛି । କିଛି ଗୁରୁତ୍ବପୂର୍ଣ୍ଣ କାଗଜପତ୍ର ଓ ଅନ୍ୟ ଫାଇଲ ମଧ୍ୟ ଯାଞ୍ଚ କରୁଛି ଟିମ୍ ।
ଜୟପୁର: ରାଜସ୍ଥାନ ଖେଲ ସଙ୍କୁଲରୁ ଆଜି ସକାଳୁ ଆରମ୍ଭ ହୋଇଛି ଭାରତ ଯୋଡୋ ପଦଯାତ୍ରା । ରାଜସ୍ଥାନରେ ପଦଯାତ୍ରାର ଦ୍ବିତୀୟ ଦିନରେ ରାହୁଲଙ୍କ ସହ ହଜାର ହଜାର ସମର୍ଥକ ସାମିଲ ହୋଇଛନ୍ତି । ମୁଖ୍ୟମନ୍ତ୍ରୀ ଅଶୋକ ଗେହଲଟ, ସଚିନ ପାଇଲଟ, ପିସିସି ଅଧ୍ୟକ୍ଷ ଗୋବିନ୍ଦ ସିଂଙ୍କ ସମତେ ବହୁ ମନ୍ତ୍ରୀ ମଧ୍ୟ ସାମିଲ ହୋଇଛନ୍ତି । ଆଜି ପଦଯାତ୍ରା କୋଟାରେ ପହଞ୍ଚିବ ।
ରାଜସ୍ଥାନରେ ଯାତ୍ରାର ପ୍ରଥମ ଦିନରେ ରାହୁଲ ଗାନ୍ଧୀ ପାଖାପାଖି ୨୪ କିଲୋମିଟର ଚାଲିଛନ୍ତି । ଭାରତ ଯୋଡୋ ଯାତ୍ରାରେ ବିଜେପି ଉପରେ ବର୍ଷିଛନ୍ତି ରାହୁଲ । ଦେଶର ସାଧୁସନ୍ଥଙ୍କ ବିରୋଧରେ କାମ କରୁଛି କେନ୍ଦ୍ର ସରକାର । ବିଜେପି ଓ ଆରଏସଏସର ଲୋକ ଜୟ ଶ୍ରୀରାମ କୁହନ୍ତି । ମାତା ସୀତାଙ୍କ ବିନା ରାମଙ୍କ ଅସ୍ତିତ୍ବ ନାହିଁ । ରାମଙ୍କ ବିନା ସୀତା ମାତା ବି ଅସମ୍ପୂର୍ଣ୍ଣ । ହେଲେ ବିଜେପି-ଆରଏସଏସ ନିଜ ନାରାରୁ ମାତା ସୀତାଙ୍କ ନାମ ବାଦ୍ ରଖିଛନ୍ତି ? ସେମାନେ କାହିଁକି ଜୟ ସିୟାରାମ କହୁନାହାନ୍ତି ? ଆରଏସଏସ ଲୋକଙ୍କୁ ଜୟ ସୀୟାରାମ କହିବା ଦରକାର । ଏମାନଙ୍କୁ ଭଗବାନ ରାମଙ୍କ ଠୁ ଶିଖିବା ଉଚିତ୍ । ଭଗବାନ ରାମ କେବେବି ଘୃଣା କରିବା ଶିଖାଇ ନାହାନ୍ତି ।
ରାଜସ୍ଥାନରୁ ବାହାରିବା ପରେ ପଦଯାତ୍ରା ହରିୟାଣାରେ ପହଞ୍ଚିବ । ଆଜିସୁଦ୍ଧା ୮୯ ଦିନରେ ପହଞ୍ଚିଛି କଂଗ୍ରେସର ଭାରତ ଯୋଡ ଯାତ୍ରା । ସେପ୍ଟେମ୍ବର ୭ ତାରିଖରୁ କନ୍ୟାକୁମାରୀରୁ ଆରମ୍ଭ ହୋଇଥିବା ଏହି ପଦଯାତ୍ରା ଆସନ୍ତା ଫେବୃଆରୀ ଶେଷସୁଦ୍ଧା କାଶ୍ମୀରରେ ପହଞ୍ଚିବ ।
ଭୁବନେଶ୍ବର: ବଙ୍ଗୋପସାଗରରେ ଦାନା ବାନ୍ଧୁଛି ବାତ୍ୟା ମାଣ୍ଡୋସ । ଲଘୁଚାପ ସକ୍ରିୟ ଥିବା ବେଳେ ଆଜି ସଂଧ୍ୟାରେ ନେବ ଅବପାତର ରୂପ । ପରବର୍ତ୍ତୀ ସମୟରେ ଏହା ଆହୁରି ଘନୀଭୂତ ହୋଇ ବାତ୍ୟାର ରୂପ ନେବା ସମ୍ଭାବନା ରହିଛି । ଏହା ପଶ୍ଚିମ ଉତ୍ତର-ପଶ୍ଚିମ ଦିଗରେ ଗତି କରି ଦକ୍ଷିଣ ପଶ୍ଚିମ ବଙ୍ଗୋପସାଗରରେ ବାତ୍ୟା ରୂପ ନେବା ସମ୍ଭାବନା ରହିଛି ।
ଦକ୍ଷିଣ ଆନ୍ଧ୍ର ଉପକୂଳ ସମୁଦ୍ର ଆଖପାଖରେ ବାତ୍ୟା ପହଞ୍ଚିବା ସମ୍ଭାବନା ରହିଛି । ତେବେ ଓଡ଼ଶାରେ ଏହାର ସିଧାସଳଖ ପ୍ରଭାବ ପଡ଼ିବ ନାହିଁ ବୋଲି ସୂଚନା ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର । ଦକ୍ଷିଣ ଆନ୍ଧ୍ର ଉପକୂଳ ସମୁଦ୍ର ଆଖପାଖରେ ବାତ୍ୟା ପହଞ୍ଚିବା ସମ୍ଭାବନା ରହିଛି । ତେବେ ଓଡ଼ଶାରେ ଏହାର ସିଧାସଳଖ ପ୍ରଭାବ ପଡ଼ିବ ନାହିଁ ବୋଲି ସୂଚନା ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର ।
ନୂଆଦିଲ୍ଲୀ: ଦିଲ୍ଲୀ ମଦ ଦୁର୍ନୀତି ମାମଲା । ଆଜି ସିବିଆଇରେ ହାଜର ହେବେନି ଟିଆରଏସ ନେତ୍ରୀ କେ. କବିତା । ଏନେଇ ସିବିଆଇକୁ ଚିଠି ଲେଖିଛନ୍ତି ତେଲଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓଙ୍କ ଝିଅ କବିତା । ଡିସେମ୍ବର ୬ ତାରିଖରେ ସିବିଆଇରେ ହାଜର ହେବା ଲାଗି ଗତ ଶୁକ୍ରବାର କବିତାଙ୍କୁ ନୋଟିସ ଦେଇଥିଲା ସିବିଆଇ । ଅପରାଧ ଆଚରଣ ସଂହିତାର ଧାରା ୧୬୦ ଅନୁସାରେ ଏହି ନୋଟିସ ଦିଆଯାଇଥିଲା । ବହୁଚର୍ଚ୍ଚିତ ଦିଲ୍ଲୀ ମଦ ଦୁର୍ନୀତି ମାମଲାରେ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ସମେତ ୧୪ ଜଣଙ୍କ ନାମରେ ରହିଛି ମାମଲା ।
ସିବିଆଇ ଡିଆଇଜି ରାଘବେନ୍ଦ୍ର ବାସାଙ୍କ ନିକଟକୁ ପତ୍ର ଲେଖି କବିତା ଦର୍ଶାଇଥିଲେ- ତାଙ୍କ ନାମ ସିବିଆଇ ଏଫଆଇଆରରେ ନଥିବାରୁ ସେ ୬ ତାରିଖରେ ସିବିଆଇରେ ହାଜର ହେବେ ନାହିଁ । ତେବେ ଆସନ୍ତା ୧୧, ୧୨, ୧୪ କିମ୍ବା ୧୫ ତାରିଖରେ କବିତା ସିବିଆଇ ଡିଆଇଜିଙ୍କୁ ଭେଟିବା ଲାଗି ତାରିଖ ମାଗିଛନ୍ତି । ଗତ ଡିସେମ୍ବର ୧ ତାରିଖରେ ପ୍ରବର୍ତ୍ତନ ନିର୍ଦ୍ଦେଶାଳୟ ମଦ ଦୁର୍ନୀତି ମାମଲାରେ ଷଷ୍ଠ ଅଭିଯୁକ୍ତ ଅମିତ ଅରୋରାଙ୍କୁ ଗିରଫ କରିଥିଲା ।
କୋର୍ଟ ନିକଟରେ ପ୍ରବର୍ତ୍ତନ ନିର୍ଦ୍ଦେଶାଳୟ ଏକ ରିମାଣ୍ଡ ରିପୋର୍ଟ ଦାଖଲ କରିଥିଲା ଏବଂ ଏଥିରେ କବିତା ଦୁଇଟି ଫୋନ ବ୍ୟବହାର କରୁଥିଲେ ଏବଂ ତାଙ୍କ ଆଇଏମଇଆଇକୁ ୧୦ ଥର ବଦଳାଇଥିଲେ ବୋଲି ଦର୍ଶାଇଥିଲା । ଇଡି ବି କହିଥିଲା ମଦ ଦୁର୍ନୀତି ମାମଲାରେ ୩୬ ଜଣ ଅଭିଯୁକ୍ତ ଅଛନ୍ତି ଏବଂ ସେମାନେ ପ୍ରମାଣ ଲୁଚାଇବା ଲାଗି ୧୭୦ରୁ ଅଧିକ ଫୋନ ବ୍ୟବହାର କରିଥିଲେ । ଅଭିଯୋଗ ଅନୁସାରେ ଶରଥ ରେଡୀ, କେ. କବିତା ଓ ଏମ. ଶ୍ରୀନିବାସଲୁ ରେଡୀଙ୍କ ମାଲିକାନାରେ ଚାଲିଥିବା ଏକ ଗ୍ରୁପ ଠାରୁ ମଦ ଦୁର୍ନୀତି ମାମଲାର ଅଭିଯୁ୍କ୍ତ ବିଜୟ ନାୟାର ୧୦୦ କୋଟି ଟଙ୍କା ପାଇଥିଲା ।
