କଟକ: କଟକ ଅନ୍ଧ ମୁକ ବଧିର ବିଦ୍ୟାଳୟର ଛାତ୍ରଙ୍କ ଆତ୍ମହତ୍ୟା ସନ୍ଦେହ । କଟକ ବିଡାନାସି ଥାନା ଅନ୍ତର୍ଗତ ନୂଆସାହିରେ ଅଘଟଣ । ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର କଲା ପୋଲିସ । ମୃତକ ଅଷ୍ଟମ ଶ୍ରେଣୀର ଛାତ୍ର ରାକେଶ ମହାପାତ୍ର । ମୃତ୍ୟୁର କାରଣ ଅସ୍ପଷ୍ଟ ଥିବାବେଳେ ମୃତଦେହ ଉଦ୍ଧାର କରି ତଦନ୍ତ କରୁଛି ପୋଲିସ୍ । ଶବ ବ୍ୟବଛେଦ ପାଇଁ ଏସସିବି ମେଡାକାଲକୁ ପଠାଯାଇଛି । ରାକେଶ ଜଣେ ଭଲ ପିଲା । ତେବେ ସେ କାହିଁକି ଆତ୍ମହତ୍ୟା କଲା ସେନେଇ ଜାଣି ନଥିବା ଶିକ୍ଷୟିତ୍ରୀ କହିଛନ୍ତି । ସେପଟେ ବିଦ୍ୟାଳୟ ପକ୍ଷରୁ ଅବହେଳା ପାଇଁ ରାକେଶ ଆତ୍ମହତ୍ୟା କରିଥିବା ତାଙ୍କ ପରିବାର ଲୋକେ ଅଭିଯୋଗ କରିଛନ୍ତି ।
ସାଢେ ୬ କୋଟି ଠକେଇ ଘଟଣାରେ ମୁଖ୍ୟ ଅଭିଯୁକ୍ତ ଓ ସହଯୋଗୀ ଗିରଫ
ଭୁବନେଶ୍ୱର: ଗ୍ରାମୀଣ ରୋଗଗାର କଲ୍ୟାଣ ସଂସ୍ଥାନ ନାଁରେ ଫେକ୍ ଓ୍ବେବସାଇଟ ତିଆରି କରି ସାଢେ 6 କୋଟି ଠକେଇ ଘଟଣା । ମୁଖ୍ୟ ଅଭିଯୁକ୍ତ ଧରମପାଲ ସିଂହ ର ସହଯୋଗୀ ଜୟରାମ ତିଓ୍ବାରୀ ଗିରଫ । ଭୁବନେଶ୍ୱରରୁ ଗିରଫ କଲା EOW । ଧର୍ମପାଲଙ୍କ ଜାମିନ କଥା ବୁଝିବାକୁ ଆସିଥିବା ବେଳେ ସନ୍ଦେହ କରି ମାଡି ବସିଲା EOW । ଗ୍ରାମୀଣ ରୋଗଗାର କଲ୍ୟାଣ ସଂସ୍ଥାନ ଆକାଉଣ୍ଟରୁ ଜୟରାମଙ୍କ ଆକାଉଣ୍ଟକୁ ୩୫ ଲକ୍ଷ ୮୩ ହଜାର ଟଙ୍କା ଆସିଥିବା ତଦନ୍ତ ବେଳେ ଜଣାପଡ଼ିଛି ।
ଜବ ରାକେଟରେ ଧର୍ମପାଲ ଏକାଧିକ ସହଯୋଗୀ ଏବେ ଫେରାର ଅଛନ୍ତି । ଜୟରାମ ଠାରୁ ସଂସ୍ଥା ସମ୍ବନ୍ଧୀୟ ଗୁରୁତ୍ବପୂର୍ଣ କାଗଜପତ୍ର ଜବତ ହୋଇଛି । ଫେସବୁକ ଓ ସାମାଜିକ ଗଣମାଧ୍ୟମକୁ ବିଜ୍ଞପନ ଦେଇଥିବା ଟଙ୍କା ବାବଦରେ ମଧ୍ୟ କାଗଜପତ୍ର ଜବତ କରିଛି EOW । ଗତକାଲି ଧରମପାଲକୁ କୋର୍ଟରେ ହାଜର କରିବା ପରେ ୫ ଦିନ ରିମାଣ୍ଡରେ ଆଣିବା ପାଇଁ ଭୁବନେଶ୍ବର SDJMଙ୍କ କୋର୍ଟରେ ଆବେଦନ କରିଛି EOW । ଆଜି ଜୟରାମଙ୍କୁ କୋର୍ଟ ଚାଲାଣ କଟିଛି EOW । ଜୟରାମଙ୍କୁ ମଧ୍ୟ ରିମାଣ୍ଡରେ ଆଣି ମୁହାଁ ମୁହିଁ ଜେରା କରିବ EOW ।
କ୍ୟାରିଅରର ଶେଷ ଟୁର୍ଣ୍ଣାମେଣ୍ଟର ପ୍ରଥମ ରାଉଣ୍ଡରେ ହାରିଲେ ସାନିୟା
ନୂଆଦିଲ୍ଲୀ: ଭାରତୀୟ ଟେନିସ ତାରକା ସାନିୟା ମିର୍ଜା ନିଜ କ୍ୟାରିଅରର ଶେଷ ଟୁର୍ଣ୍ଣାମେଣ୍ଟ ଦୁବାଇ ଟେନିସ୍ ଚମ୍ପିୟନସିପର ପ୍ରଥମ ରାଉଣ୍ଡରେ ପରାଜିତ ହୋଇ ବାହାରି ଯାଇଛନ୍ତି । ଦୁବାଇରେ ମଙ୍ଗଳବାର ମିର୍ଜା ଏବଂ ତାଙ୍କର ଆମେରିକାନ ପାର୍ଟନର ମ୍ୟାଡିସନ କିଜଙ୍କୁ ଋଷିଆର ବେରୋନିକା କୁଦେରମେଟୋବା ଏବଂ ଲ୍ୟୁଡମିଲା ସୈମସୋନୋଭା ୬-୪ ରେ ପରାଜିତ କରିଛନ୍ତି । ୩୬ ବର୍ଷୀୟ ସାନିୟା ମିର୍ଜା ଏକ ମାସ ପୂର୍ବେ ଟେନିସରୁ ସନ୍ୟାସ ନେବେ ବୋଲି ଘୋଷଣା କରିଥିଲେ ।
ଏବଂ କହିଥିଲେ ଯେ ଦୁବାଇରେ ସେ ନିଜ କ୍ୟାରିଅରର ଶେଷ ମୁକାବିଲା ଖେଳିବେ । ସାନିୟା ମିର୍ଜା ନିଜ କ୍ୟାରିଅରରେ ୬ ଗ୍ରାଣ୍ଡସ୍ଲାମ ଟାଇଟଲ ଜିତି ସାରିଛନ୍ତି । ଏଥିରେ ୩ ୱିମେନ୍ସ ଡବଲ୍ସ ଏବଂ ୩ ମିକ୍ସ ଡବଲ୍ସ କ୍ୟାଟେଗୋରୀରେ ଆସିଛି । ସାନିୟା ଶେଷ ଗ୍ରାଣ୍ଡସ୍ଲାମ ୨୦୧୬ରେ ଜିତିଥିଲେ । ସାନିୟା ଗତ ମାସରେ ଖେଳାଯାଇଥିବା ବର୍ଷର ପ୍ରଥମ ଗ୍ରାଣ୍ଡସ୍ଲାମ ଅଷ୍ଟ୍ରେଲିଆନ ଓପନର ମିକ୍ସଡ ଡବଲ୍ସ କ୍ୟାଟେଗୋରୀରେ ରନରଅପ୍ ହୋଇଥିଲେ । ସେ ରୋହନ ବୋପନ୍ନାଙ୍କ ସହ ପେୟାର ବନାଇଥିଲେ ।
ନବ ଦାସଙ୍କୁ ଧମକ ଦେଉଥିଲେ ଧର୍ମେନ୍ଦ୍ର ଓ ଜୟନାରାୟଣ: ରୁଦ୍ର ମହାରଥୀ
ଭୁବନେଶ୍ୱର: ସ୍ବର୍ଗତ ମନ୍ତ୍ରୀ ନବକିଶୋର ଦାସଙ୍କୁ ଧମକ ଦେଉଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଜୟନାରାୟଣ ମିଶ୍ର । ଏଭଳି ବିସ୍ଫୋରକ ବୟାନ ଦେଇଛନ୍ତି ପିପିଲି ବିଧାୟକ ରୁଦ୍ରପ୍ରତାପ ମହାରଥୀ । ସେ କହିଛନ୍ତି ପଦମପୁର ଉପନିର୍ବାଚନ ସମୟରେ ପାର୍ଟି ରଣନୀତି ବିଷୟରେ ଆଲୋଚନା ବେଳେ ନବ ଦାସ କହିଥିଲେ ତାଙ୍କୁ ଧର୍ମେନ୍ଦ୍ର ପ୍ରଧାନ ଓ ଜୟନାରାୟଣ ମିଶ୍ର ଧମକ ଦେଉଛନ୍ତି । ଏମିତିକି ପଦମପୁର ଉପନିର୍ବାଚନକୁ ନଆସିବା ସହ ଦୂରେଇ ରହିବା ପାଇଁ ନବ ଦାସଙ୍କୁ ଉଭୟେ ଧର୍ମେନ୍ଦ୍ର ଓ ଜୟନାରାୟଣ କହିଥିଲେ । କାହାକୁ ଡରେ ନାହିଁ ବୋଲି ନବ ଦାସ କହିଥିଲେ ବୋଲି ରୁଦ୍ର କହିଛନ୍ତି ।
କୋଉଁଠି ନା କୋଉଁଠି ନବକିଶୋରଙ୍କ ହତ୍ୟା ପଛରେ ଜୟନାରାୟଣ ମିଶ୍ର ଏବଂ ଧର୍ମେନ୍ଦ୍ର ପ୍ରଧାନଙ୍କ ସମ୍ପୃକ୍ତି ସନ୍ଦେହ ଘେରରେ ରହୁଛି । ଜୟନାରାୟଣ ମିଶ୍ର ଯାହାଙ୍କ ନାଁରେ ୧୬ଟି ଅପରାଧିକ ମାମଲା ରହିଛି । ପବ୍ଲିକ ପ୍ଲେସରେ ଅନ୍ ଡିଉଟି ପୋଲିସ ଅଫିସରଙ୍କୁ ଆକ୍ରମଣ କରିବାକୁ ପଛାଉ ନାହାନ୍ତି । ବରିଷ୍ଠ ହୋଇ ସେମାନଙ୍କଠୁ କ’ଣ ଶିଖିବେ ଯୁବ ବିଧାୟକ ବୋଲି ପ୍ରଶ୍ନ କରିଛନ୍ତି ରୁଦ୍ର ।
ବାଲେଶ୍ବର ଫାମିଲି କୋର୍ଟ ହତା ପାଲଟିଲା ରଣକ୍ଷେତ୍ର, ଛାଡ଼ପତ୍ର ମାମଲା ବିଚାର ବେଳେ ମାରପିଟ୍
ବାଲେଶ୍ବର: ବାଲେଶ୍ବର ପରିବାର ଅଦାଲତ ପରିସର ପାଲଟିଲା ରଣକ୍ଷେତ୍ର । ପରିବାର ଅଦାଲତରେ ଛାଡ଼ପତ୍ର ମାମଲାର ବିଚାର ଚାଲିଥିବା ବେଳେ ଦମ୍ପତିଙ୍କ ମାରପିଟ୍ । ସ୍ବାମୀ ରତିକାନ୍ତଙ୍କ ହ୍ୟାଲିମେଟ୍ ମାଡ଼ରେ ଆହତ ହୋଇ ମେଡିକାଲରେ ଭର୍ତ୍ତି ହେଲେ ସ୍ତ୍ରୀ ରଶ୍ମିରେଖା । ଚାନ୍ଦିପୁର ଥାନା ମଝିକିଆ ଗାଁର ରତିକାନ୍ତ ପାଣିଗ୍ରାହୀ ଓ ରଶ୍ମିରେଖା ପାଣିଗ୍ରାହୀଙ୍କର ଗତ ୩ ବର୍ଷ ପୂର୍ବେ ବିବାହ ହୋଇଥିଲା । ଉଭୟଙ୍କ ମଧ୍ୟରେ ଗଣ୍ଡଗୋଳ ହେବାରୁ ପରିବାର ଅଦାଲତରେ ଛାଡପତ୍ର ମାମଲା ଦାୟର କରାଯାଇଥିଲା । ମାମଲା ବିଚାରାଧୀନ ଥିବା ବେଳେ ଆଜି କୌଣସି କାରଣରୁ ଉଭୟେ କୋର୍ଟ ପରିସର ଆଗରେ ହାତାହାତି ହୋଇଥିଲେ । ଉଭୟଙ୍କ ମଧ୍ୟରେ ବଚସା ଓ ମାରପିଟ୍ ଏତେ ଜୋର ହୋଇଥିଲା ଯେ ରତିକାନ୍ତ ରଶ୍ମୀରେଖାଙ୍କୁ ହେଲିମେଟରେ ମୁଣ୍ଡକୁ ମାରିଥିଲେ । ଫଳରେ ରଶ୍ମୀରେଖା ଅଚେତ ହୋଇପଡ଼ିଥିଲେ ।
ବିଜେପିକୁ ଟାର୍ଗେଟ କଲେ ପ୍ରମିଳା ମଲ୍ଲିକ, କହିଲେ ପୂର୍ବରୁ ବିଜେପି ନବ ଦାସଙ୍କ ବିରୋଧରେ କରିଛି ଷଡ଼ଯନ୍ତ୍ର
ଭୁବନେଶ୍ୱର: ନବ ଦାସଙ୍କ ହତ୍ୟା ମାମଲାରେ ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କୁ ଶାଣିତ ଆକ୍ରମଣ କରିଛନ୍ତି ରାଜସ୍ବ ମନ୍ତ୍ରୀ ପ୍ରମିଲା ମଲ୍ଲିକ । ଜୟନାରାୟଣଙ୍କୁ ନୀଳବର୍ଣ୍ଣ ଶୃଗାଳ ବୋଲି ସମ୍ବୋଧିକ କରି ସେ କହିଛନ୍ତି ଯେ ସେ ନିଜେ ହତ୍ୟାକାରୀ ହୋଇଥିବାରୁ ସମସ୍ତଙ୍କୁ ଆଙ୍ଗୁଳି ନିର୍ଦ୍ଦେଶ କରୁଛନ୍ତି । ନିଜକୁ ବଞ୍ଚାଇବାକୁ ଯାଇ ତାଙ୍କ ନାଁରେ ୧୬ଟି ବଡ଼ ଅପରାଧିକ ମାମଲା ରହିଛି । ସେ ଏବେ ଜାମିନରେ ଅଛନ୍ତି । ନବ ଦାସଙ୍କ ହତ୍ୟା ମାମଲାରେ ସେ ଯେଉଁ ମନ୍ତବ୍ୟ ଦେଉଛନ୍ତି ତାହା ଗ୍ରହଣୀୟ ନୁହେଁ । ଏଭଳି କହି ବିଜେପିକୁ ଟାର୍ଗେଟ କରିଛନ୍ତି ମନ୍ତ୍ରୀ ପ୍ରମିଳା ମଲ୍ଲିକ । ୨୦୧୭ ମସିହା ଗଞ୍ଜାମ ଲକ୍ଷ୍ମୀଦତ୍ତ ପ୍ରଧାନ ହତ୍ୟା ମାମଲାରେ ହତ୍ୟାକାରୀଙ୍କୁ ଉତ୍ତରାଖଣ୍ଡରେ ଲୁଚେଇ ରଖିଥିଲେ ବିଜେପି ନେତା ।
ହତ୍ୟାକାରୀଙ୍କୁ ସୁରକ୍ଷା ଦେବାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମ୍ପୃକ୍ତି ଥିଲା ବୋଲି ଅଭିଯୋଗ ହୋଇଥିଲା । ହତ୍ୟାକାଣ୍ଡରେ ସାମିଲ ହେବା, ହତ୍ୟାକାରୀଙ୍କୁ ସୁରକ୍ଷା ଦେବା ବିଜେପି ନେତାଙ୍କର ଅଭ୍ୟାସ । ୨୦୧୮ ମସିହା ବିଜେପୁର ଦିଲେଶ୍ବର ସାହୁ ହତ୍ୟା ଘଟଣାରେ ମଧ୍ୟ ବିଜେପି ସାମିଲ । ଏହି ହତ୍ୟାକାଣ୍ଡରେ ଜୟନାରାୟଣ ମିଶ୍ର ଓ ଇରାଶିଶ୍ ଆଚାର୍ଯ୍ୟ ଗିରଫ ହୋଇଥିଲେ । ଜୟନାରାୟଣ ଏବେ ବେଲରେ ଅଛନ୍ତି । ପଦମପୁର ଉପନିର୍ବାଚନ ସମୟରେ ନବ ଦାସଙ୍କୁ ବିଜେପି ନେତା ଧମକ ଦେଇଥିଲେ । ପଶ୍ଚିମ ଓଡ଼ିଶାରେ ନବ ଦାସ ଯେଉଁଭଳି ଭାବେ ସଂଗଠନ କରିଥିଲେ ତାକୁ ନେଇ ବିଜେପି ଭୟଭୀତ ଥିଲା । ପଶ୍ଚିମ ଓଡ଼ିଶାରେ ବିଜେପିର ସତ୍ତା ହଜିଯାଇଥାନ୍ତା ବୋଲି କହିଛନ୍ତି ପ୍ରମିଳା ମଲ୍ଲିକ । ଏଥିସହ ମୁଁ ମରିଗଲି, ମୋତେ ମାରନା ବୋଲି କହି ବାଉଳେଇ ହେଉଛନ୍ତି ଜୟନାରାୟଣ । ନବ ଦାସଙ୍କ ହତ୍ୟା କାଣ୍ଡରେ କ୍ରାଇମବାଞ୍ଚ ରିପୋର୍ଟକୁ ଅପେକ୍ଷା କରନ୍ତୁ, ନହେଲେ ଆଗୁଆ ସରେଣ୍ଡର କରନ୍ତୁ ବୋଲି କହି ଜୟନାରାୟଣଙ୍କୁ ଚ୍ୟାଲେଞ୍ଜ କରିଛନ୍ତି ପ୍ରମିଳା ମଲ୍ଲିକ । ଜୟନାରାୟଣଙ୍କ ଦେହ ଭଲ ନାହିଁ । ତାଙ୍କର ମାନସିକ ସ୍ଥିତି ଠିକ୍ ନାହିଁ । ବାଚସ୍ପତିଙ୍କୁ କହି ବିଶ୍ରାମ ନିଅନ୍ତୁ ବୋଲି କହିଛନ୍ତି ପ୍ରମିଳା ମଲ୍ଲିକ ।
ମାନସିକ ଭାରସାମ୍ୟ ହରାଇଛନ୍ତି ବିରୋଧୀ ଦଳ ନେତା: ସସ୍ମିତ ପାତ୍ର
ଭୁବନେଶ୍ୱର: ମାନସିକ ଭାରସାମ୍ୟ ହରାଇଛନ୍ତି ବିରୋଧୀ ଦଳ ନେତା ଜୟନାରାୟଣ ମିଶ୍ର । ତାଙ୍କର ତୁରନ୍ତ ଚିକିତ୍ସା ହେବା ଦରକାର । ଦୁଇ ଜଣ ଜଣାଶୁଣା ବ୍ୟକ୍ତିବିଶେଷଙ୍କୁ ନବକିଶୋର ଦାସ ହତ୍ୟା ମାମଲାରେ ଆଙ୍ଗୁଳି ଦେଖାଇବା ଆଦୌ ଗ୍ରହଣୀୟ ନୁହେଁ ବୋଲି ବିଜେଡି ସାଂସଦ ସସ୍ମିତ ପାତ୍ର କହିଛନ୍ତି । ସେମାନେ ଅନବରତ ରାଜ୍ୟର ବିକାଶ ପାଇଁ କାମ କରୁଛନ୍ତି ବୋଲି ସସ୍ମିତ ପାତ୍ର କହିଛନ୍ତି ।
ସେହିପରି ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କ ମନ୍ତବ୍ୟକୁ କଡ଼ା ସମାଲୋଚନା କରିଛନ୍ତି ସାଂସଦ ଅମର ପଟ୍ଟନାୟକ । ଟୁଇଟ କରି ସମାଲୋଚନା କରିଛନ୍ତି ବିଜେଡି ସାଂସଦ ଅମର ପଟ୍ଟନାୟକ । ଜୟନାରାୟଣଙ୍କ ମନ୍ତବ୍ୟକୁ ପାଗଳର ପ୍ରଳାପ ବୋଲି କହିଛନ୍ତି ଅମର ।
ଆମେରିକା ସହ ୧୨ ବର୍ଷ ପୂରୁଣା ପରମାଣୁ ଚୁକ୍ତି ବାତିଲ କଲା ରୁଷ୍
ନୂଆଦିଲ୍ଲୀ: ରୁଷ୍-ୟୁକ୍ରେନ ଯୁଦ୍ଧକୁ ଆଗାମୀ ୨୪ ତାରିଖରେ ବର୍ଷେ ପୂରିବ । ଏହା ପୂର୍ବରୁ ଗତକାଲି ଆମେରିକା ରାଷ୍ଟ୍ରପତି ଜୋ ବାଇଡେନ ଅଚାନକ ୟୁକ୍ରେନର ରାଜଧାନୀ କିଭରେ ପହଞ୍ଚିଯାଇଥିଲେ । କେବଳ ପହଞ୍ଚିନଥିଲେ ବରଂ ସେଠାରେ ଅନେକ ବଡ଼ ଘୋଷଣା ମଧ୍ୟ କରିଥିଲେ । ୟୁକ୍ରେନକୁ ଆମେରିକା ଆହୁରି ଯୁଦ୍ଧାସ୍ତ୍ର ଯୋଗାଇ ଦେବା ନେଇ ମଧ୍ୟ କହିଥିଲେ । ବାଇଡେନଙ୍କ ଗସ୍ତର ଗୋଟେ ଦିନ ପରେ ଅର୍ଥାତ ଆଜି ରୁଷ୍ ରାଷ୍ଟ୍ରପତି ଭ୍ଲାଦମିର ପୁଟିନ ସଂସଦରେ ସମ୍ବୋଧିତ କରିଛନ୍ତି । ଏହି ସମ୍ବୋଧନରେ ସେ ଯୁଦ୍ଧକୁ ନେଇ ଅନେକ ବଡ଼ ଘୋଷଣା କରିଥିଲେ । ସେ କହିଥିଲେ ଯେ ଆମେ ସବୁବେଳେ ଶାନ୍ତି ଚାହୁଁଥିଲୁ ହେଲେ ଆମେରିକା ଭଳି ପାଶ୍ଚାତ୍ୟ ଦେଶଗୁଡିକ ୟୁକ୍ରେନ କାନ୍ଧରେ ବନ୍ଧୁକ ରଖି ଆମ ଆଡକୁ ଚଳାଇଥିଲେ ।
ଯୁଦ୍ଧ ସ୍ଥିତି ସୃଷ୍ଟି କରିଥିଲେ ଯେଉଁ କାରଣରୁ ଆମକୁ ମଧ୍ୟ ଯୁଦ୍ଧ କରିବାକୁ ପଡ଼ିଲା । ଏହି ସମ୍ବୋଧନରେ ଆମେରିକା ସହ ଦେଶର ସମ୍ପର୍କ ନେଇ ବଡ଼ ଘୋଷଣା କରିଥିଲେ । ପୁଟିନ କହିଥିଲେ, ଯୁଦ୍ଧ ଟାଳିବା ପାଇଁ ସବୁପ୍ରକାର ରାଜନୈତିକ ପ୍ରୟାସ କରିଥିଲୁ, କିନ୍ତୁ ନାଟୋ ଏବଂ ଆମେରିକା ଏହାକୁ ସଫଳ ହେବାକୁ ଦେଇନଥିଲେ । ଆମେ ଏବେ ବି ଆଲୋଚନା ପାଇଁ ରାଜି ଅଛୁ କିନ୍ତୁ ଏଥିପାଇଁ ସର୍ତ୍ତ ମଞ୍ଜୁର ନୁହେଁ । ୟୁକ୍ରେନକୁ ଲଙ୍ଗ ରେଞ୍ଜ ଡିଫେନ୍ସ ସିଷ୍ଟମ ଦିଆଯାଉଛି । ଆମ ସୀମାରେ ଏଥିପାଇଁ ବିପଦ ଲାଗି ରହିଛି । ରୁଷ୍ ୨୦୧୧ରେ ଆମେରିକା ସହ କରିଥିବା ପରମାଣୁ ଚୁକ୍ତିକୁ ବାତିଲ କରୁଛି । ଆମେରିକା ନିଜର ଆଧିପତ୍ୟ ବିସ୍ତାର ପାଇଁ ଅନ୍ୟକୁ ମୋହର ବନାଉଛନ୍ତି । ପାଶ୍ଚାତ୍ୟ ଶକ୍ତି ହିଁ ଯୁଦ୍ଧ ପାଇଁ ଦାୟୀ ବୋଲି ପୁଟିନ କହିଥିଲେ ।
ଇନ୍ଦିରା ଗାନ୍ଧି ମୋ ବାପାଙ୍କୁ ପଦରୁ ହଟାଇ ଦେଇଥିଲେ; ପୂରୁଣା କଥା ବଖାଣିଲେ ବିଦେଶ ମନ୍ତ୍ରୀ ଜୟଶଙ୍କର
ନୂଆଦିଲ୍ଲୀ: ବିଦେଶ ମନ୍ତ୍ରୀ ଏସ୍ ଜୟଶଙ୍କର ଏକ ସାକ୍ଷାତକାରରେ ଇନ୍ଦିରା ଗାନ୍ଧି ଏବଂ ରାଜିବ ଗାନ୍ଧି ପ୍ରଧାନମନ୍ତ୍ରୀ ରହିବା ସମୟରେ ନିଜ ବାପାଙ୍କ ସହ ହୋଇଥିବା ଅନ୍ୟାୟ ସମ୍ପର୍କରେ ପ୍ରଥମ ଥର ପାଇଁ ମୁଁହ ଖୋଲିଛନ୍ତି । ଜୟଶଙ୍କର କହିଛନ୍ତି ଯେ, ମୋ ବାପା ଡା. କେ ସୁବ୍ରମଣ୍ୟମ କ୍ୟାବିନେଟ୍ ସଚିବ ଥିଲେ, କିନ୍ତୁ ୧୯୮୦ରେ ଯେବେ ଇନ୍ଦିରା ଗାନ୍ଧି ଦ୍ୱିତୀୟଥର ପାଇଁ ନିର୍ବାଚିତ ହୋଇ କ୍ଷମତାକୁ ଆସିଥିଲେ, ତେବେ ସର୍ବପ୍ରଥମେ ମୋ ବାପାଙ୍କୁ ପଦରୁ ହଟାଇ ଦେଇଥିଲେ । ମୋ ବାପା ବହୁତ ସଚ୍ଚୋଟ ବ୍ୟକ୍ତି ଥିଲେ ଏବଂ ବୋଧହୁଏ ଏହି କାରଣରୁ ତାଙ୍କୁ ସମସ୍ୟା ହେଉଥିଲା ।
ସେ ଏହା ପରେ କେବେ ବି ସଚିବ ହୋଇ ପାରିନଥିଲେ । ରାଜିବ ଗାନ୍ଧିଙ୍କ କାର୍ଯ୍ୟକାଳ ସମୟରେ ମଧ୍ୟ ମୋ ବାପାଙ୍କଠାରୁ ଜୁନିୟର ଅଧିକାରୀଙ୍କୁ କ୍ୟାବିନେଟ୍ ସଚିବ କରାଯାଇଥିଲା । ନ୍ୟୁଜ ଏଜେନ୍ସି ଏଏନଆଇକୁ ଦେଇଥିବା ଇଣ୍ଟରଭ୍ୟୁରେ ଜୟଶଙ୍କର ପରିବାର, ନରେନ୍ଦ୍ର ମୋଦିଙ୍କ ସହ ପ୍ରଥମ ଭେଟ, ବ୍ୟୁରୋକ୍ରେସିରୁ ରାଜନୀତି ପର୍ଯ୍ୟନ୍ତ ଯାତ୍ରା ସମେତ ଅନେକ ବଡ଼ ପ୍ରସଙ୍ଗ ସମ୍ପର୍କରେ ଖୋଲା ଖୋଲି ଭାବେ କହିଥିଲେ । ସେ ପ୍ରଧାନମନ୍ତ୍ରୀଙ୍କ ଉପରେ ପ୍ରଶ୍ନ ଉଠାଉଥିବା ବିଦେଶୀ ମିଡିଆ, କଂଗ୍ରେସ ପାର୍ଟି, ବିବିସିର ବିବାଦୀୟ ଡକ୍ୟୁମେଣ୍ଟାରୀ, ଆମେରିକୀୟ ବିଜନେସମ୍ୟାନ ଜର୍ଜ ସୋରୋସଙ୍କ ବୟାନର ଟାଇମିଙ୍ଗ ଉପରେ ମଧ୍ୟ ପ୍ରଶ୍ନ ଉଠାଇଥିଲେ ।
ଚୀନର ପ୍ରସଙ୍ଗ ଉପରେ ରାହୁଲ ଗାନ୍ଧି ଏବଂ କଂଗ୍ରେସର ପ୍ରଶ୍ନର ଜବାବ ଦେଇ ଜୟଶଙ୍କର କହିଥିଲେ, ଆମ ଉପରେ ଆରୋପ ଲାଗୁଛି ଯେ ଆମେ ଚୀନକୁ ଡରୁଛୁ, ତାର ନାଁ ମଧ୍ୟ ନେବାକୁ ଡରୁଛୁ । ମୁଁ କହିଦେବାକୁ ଚାହେଁ ଯେ ଆମେ ଚୀନକୁ ଡରୁନାହୁଁ । ଯଦି ଆମେ ଡରୁଛୁ ତେବେ ଭାରତୀୟ ସେନାକୁ ଚୀନ ସୀମାକୁ କିଏ ପଠାଇଥିଲା? ଏ ସେନା ରାହୁଲ ଗାନ୍ଧି ପଠାଇନଥିଲେ, ନରେନ୍ଦ୍ର ମୋଦି ପଠାଇଥିଲେ । ଜୟଶଙ୍କର କହିଥିଲେ, କଂଗ୍ରେସ ଏବଂ ବିରୋଧୀ ଦଳ ଆରୋପ ଲଗାଉଛନ୍ତି ଯେ ଲଦ୍ଦାଖରେ ପେଙ୍ଗୟାଙ୍ଗ ହ୍ରଦ ପାଖରେ ଚୀନ ବ୍ରୀଜ ନିର୍ମାଣ କରୁଛି ।
ମୁଁ ଆପଣଙ୍କୁ କହି ରଖିବାକୁ ଚାହେଁ ଯେ ଏହି ଅଞ୍ଚଳ ୧୯୬୨ରୁ ଚୀନର ଅବୈଧ କବଜାରେ ରହିଛି । ବର୍ତ୍ତମାନ ଭାରତୀୟ ଇତିହାସର ସବୁଠୁ ବଡ଼ ପିସ୍ ଟାଇମ ଡିପ୍ଲୋମେଣ୍ଟ ଚୀନ ସୀମାରେ ନିୟୋଜିତ ଅଛି । ଏବଂ ଦୟାକରି ଆପଣ ଏହି କଥାକୁ ନୋଟ କରନ୍ତୁ, ମୁଁ ଚୀନ୍ କହିଛି । ଏଥିସହ ସେ କହିଥିଲେ ଯଦି ରାହୁଲଙ୍କ ପାଖରେ ଚୀନ୍ ସମ୍ପର୍କରେ ଅଧିକ ଜ୍ଞାନ ଏବଂ ବୁଦ୍ଧିମତା ଅଛି ତେବେ ମୁଁ ତାଙ୍କ କଥା ଶୁଣିବା ପାଇଁ ପ୍ରସ୍ତୁତ ଅଛି ।
ନୂଆରୂପ ପାଇଛି ଉତ୍କଳମଣିଙ୍କ ଜନ୍ମମାଟି, ୨୩ରେ ଲୋକାର୍ପଣ କରିବେ ମୁଖ୍ୟମନ୍ତ୍ରୀ
ପୁରୀ: ନୂଆରୂପ ପାଇଛି ଉତ୍କଳମଣୀଙ୍କ ଜନ୍ମମାଟି । ଐତିହାସିକ ଗ୍ରାମରେ ହୋଇଛି ରୂପାନ୍ତର । ଗୋପବନ୍ଧୁଙ୍କ ଜନ୍ମସ୍ଥାନକୁ ମିଳିଛି ସ୍ବତନ୍ତ୍ର ପରିଚୟ । ୨୩ ତାରିଖରେ ପୂନଃବିକଶିତ ଜନ୍ମପୀଠର ଲୋକାର୍ପଣ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ୨୫ କୋଟି ଟଙ୍କା ବ୍ୟୟରେ ଏହି ପ୍ରକଳ୍ପ ମଧ୍ୟରେ ଗୋପବନ୍ଧୁଙ୍କ ଜନ୍ମ ପୀଠରେ ଥିବା ଶିବ ମନ୍ଦିର, ଦୁଇଟି ପୋଖରୀ, ପୈତୃକ ବାସଗୃହ, ଗ୍ରାମରାସ୍ତା, ଜନ୍ମପୀଠ ପରିକ୍ରମା ରାସ୍ତା, ଗୋପବନ୍ଧୁଙ୍କ ସ୍ମୁତି ସଂଗ୍ରହାଳୟ, ସୂଚନା କେନ୍ଦ୍ର, ଆତିଥ୍ୟ କେନ୍ଦ୍ର, ଶିଶୁ ପାର୍କ, ଉତ୍କଳମଣୀଙ୍କ ପ୍ରାୟ ୧୫ ଫୁଟ ଉଚ୍ଚର ପ୍ରତିମୂର୍ତ୍ତି, ଷଠିଘର କାର୍ଯ୍ୟ ସଂପୂର୍ଣ୍ଣ ହୋଇଛି । ଯାହାକୁ ଜନସାଧାରଣଙ୍କ ଉଦ୍ଦେଶ୍ୟରେ ଲୋକାର୍ପଣ କରିବେ ମୁଖ୍ୟମନ୍ତ୍ରୀ । ଯାହାକୁ ନେଇ ଗ୍ରାମବାସୀ ବେଶ ଉତ୍ସାହିତ ଥିବାବେଳେ ସରକାରଙ୍କ ସହଯୋଗ ପାଇଁ ଧନ୍ୟବାଦ ଜଣାଇଛନ୍ତି ।
ଘରେ ଥିବା ସେହି ଢିଙ୍କି, ଲଣ୍ଠନ, ଲୋଟା, ଖଟ, ସବୁକିଛି ଉତ୍କଳମଣୀଙ୍କ ସ୍ମୃତିକୁ ତାଜା କରୁଛି । ଘରକର ସବୁ ବସ୍ତୁକୁ ଅତି ସୁନ୍ଦରଭାବେ ସଜାଇ ରଖାଯାଇଛି । ଜନ୍ମମାଟିର ପରିବେଶକୁ ଉନ୍ନତି କରାଯାଇଥିବା ବେଳେ ଗ୍ରାମରେ ଗୋପବନ୍ଧୁଙ୍କ ସ୍ମୃତି ବହନ କରୁଥିବା ସବୁ ସ୍ଥାନ ଉପରେ ବିଶେଷ ଧ୍ୟାନ ଦିଆଯାଇଛି । ସୁଆଣ୍ଡୋ ବିକାଶ ଗୋପବନ୍ଧୁଙ୍କ ଜନ୍ମମାଟିକୁ ଏକ ସ୍ବତନ୍ତ୍ର ପରିଚୟ ଦେବ ବୋଲି ଆଶା କରିଛନ୍ତି ସ୍ଥାନୀୟ ଲୋକେ । ରାଜ୍ୟ ସରକାରଙ୍କ ପକ୍ଷରୁ ଅନେକ ବିକାଶମୂଳକ କାର୍ଯ୍ୟ ମଧ୍ୟରୁ ଉତ୍କଳମଣୀ ଗୋପବନ୍ଧୁଙ୍କ ପୀଠ ସୁଆଣ୍ଡୋର ବିକାଶ ଓଡ଼ିଶାର ବରପୁତ୍ରଙ୍କ ପାଇଁ ଏକ ପ୍ରମୁଖ ଅବଦାନ ।