ପୁରୀ: ଭୋଗ ନୁହେଁ ତ୍ୟାଗ ମହାନ, ସେବା ହିଁ ଶ୍ରେଷ୍ଠ। ମାନବ ସମାଜର ମଣି ଥିଲେ ଉତ୍କଳମଣି। ତାଙ୍କ ତ୍ୟାଗ, ଦେଶଭକ୍ତି, ସେବା ଓ ଜାତିପ୍ରୀତିର ତୁଳନା ନାହିଁ। ସୁଆଣ୍ଡୋରେ ଉତ୍କଳମଣି ଗୋପବନ୍ଧୁ ଦାସଙ୍କ ପୁନଃବିକଶିତ ଜନ୍ମପୀଠର ଲୋକାର୍ପଣ ଅବସରରେ ଏହା କରିଛନ୍ତି ମୁଖ୍ୟମନ୍ତ୍ରୀ। ଉତ୍କଳମଣିଙ୍କ ଜନ୍ମମାଟି ପବିତ୍ର ଭୂମି ସୁଆଣ୍ଡୋକୁ ପ୍ରଣାମ ଜଣାଇଛନ୍ତି।

ଗୋପବନ୍ଧୁଙ୍କ ଜନ୍ମମାଟିର ବିକାଶ 5T ସଂସ୍କାରରେ ଅତିସୁନ୍ଦର ଭାବେ କରାଯାଇଛି। ଷଠିଘର ବିକାଶ ସହ ମ୍ୟୁଜିୟମ, ଲୋକେଶ୍ବର ମନ୍ଦିରର ସୌନ୍ଦର୍ଯ୍ୟକରଣ କରାଯାଇଛି। ଏଥିସହ ଉତ୍କଳମଣିଙ୍କ ବିରାଟ ଷ୍ଟାଚ୍ୟୁ ପ୍ରତିଷ୍ଠା କରାଯାଇଛି। ଉତ୍କଳମଣିଙ୍କ ପରିବାର ଓ ସୁଆଣ୍ଡୋବାସୀ ପୂର୍ଣ୍ଣ ସହଯୋଗ କରିଥିବାରୁ ସେମାନଙ୍କୁ ଧନ୍ୟବାଦ ଜଣାଇଛନ୍ତି ମୁଖ୍ୟମନ୍ତ୍ରୀ।

ଗୋପବନ୍ଧୁ ଜଣେ ଯୁଗପୁରୁଷ ଥିଲେ, ସବୁବେଳେ ଓଡ଼ିଶା ତାଙ୍କ ନିକଟରେ ଋଣୀ ରହିବ। ଆଗକୁ ମଧ୍ୟ 5T ସଂସ୍କାରରେ ରାଜ୍ୟର ବିଭିନ୍ନ ବରପୁତ୍ରଙ୍କ ଜନ୍ମସ୍ଥାନର ବିକାଶ ପାଇଁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ଉତ୍କଳ ଗୌରବ ମଧୁସୁଦନ ଦାସ, ଫକୀର ମୋହନ ସେନାପତି, ଗଙ୍ଗାଧର ମେହେର, ସହିଦ ଲକ୍ଷ୍ମଣ ନାୟକଙ୍କ ଭଳି ବରପୁତ୍ରଙ୍କ ତ୍ୟାଗ ଅସାଧାରଣ ବୋଲି ମୁଖ୍ୟମନ୍ତ୍ରୀ କହିଛନ୍ତି।

ସ୍ବାଧୀନତା ସଂଗ୍ରାମରୁ ଆରମ୍ଭ କରି ଓଡ଼ିଶାର ଶିକ୍ଷା, ସାହିତ୍ୟ, ସଂସ୍କୃତି, ରାଜନୀତି, ମାନବିକତାରେ ଗୋପବନ୍ଧୁ ନୂଆ କୀର୍ତ୍ତି ସ୍ଥାପନ କରିଛନ୍ତି। ଓଡ଼ିଶାରେ ଜାତୀୟତାବାଦୀ ବିକାଶର ସେ ଥିଲେ କର୍ଣ୍ଣଧାର। ଗୋପବନ୍ଧୁ ସବୁବେଳେ ପ୍ରେରଣା ହୋଇରହିବେ। ଗୋପବନ୍ଧୁଙ୍କ ବାର୍ତ୍ତାକୁ ଜୀବନ ବ୍ରତ କରି ନୂଆ ସଶକ୍ତ ଓଡ଼ିଶା ଗଠନ ପାଇଁ କାମ କରିବାକୁ ମୁଖ୍ୟମନ୍ତ୍ରୀ ଆହ୍ବାନ ଦେଇଛନ୍ତି ।

ଭୁବନେଶ୍ୱର: ବିଧାନସଭାର ତୃତୀୟ ଦିନରେ ସୁରୁଖୁରୁରେ ଚାଲିଲା ଗୃହ। ପ୍ରଶ୍ନକାଳରେ ବିଧାୟକଙ୍କ ପ୍ରଶ୍ନର ଉତ୍ତର ଦେଇଥିଲେ ବିଭାଗୀୟ ମନ୍ତ୍ରୀ। ମହାନଦୀ ଅବବାହିକା ସୁବର୍ଣ୍ଣପୁର ଜିଲ୍ଲାର ଖଇରମାଲ ଓ ଗୋଧନେଶ୍ୱର ଠାରେ ଇନଷ୍ଟ୍ରିମ୍ ଷ୍ଟୋରେଜ ଷ୍ଟ୍ରକଚର ନିର୍ମାଣ କରାଯିବ। ବିନା ବିସ୍ଥାପନରେ ଏହା ହେବ ।

୬ ବର୍ଷ ଭିତରେ ସବୁଠାରେ ଇନଷ୍ଟ୍ରିମ୍ ଷ୍ଟୋରେଜ ଷ୍ଟ୍ରକଚର ନିର୍ମାଣ ସରିବ। ସାରା ରାଜ୍ୟରେ ୩୨ଟି ଇନଷ୍ଟ୍ରିମ୍ ଷ୍ଟୋରେଜ ଷ୍ଟ୍ରକଚର କରାଯିବ। ୧୬ଟି ପ୍ରଥମ ପର୍ଯ୍ୟାୟରେ ସରିବ ଏବଂ ବାକିର ଟେଣ୍ଡର ଖୁବ ଶୀଘ୍ର କରାଯିବ ବୋଲି ବିଧାନସଭାରେ ସ୍ପଷ୍ଟ କରିଛନ୍ତି ବିଭାଗୀୟ ମନ୍ତ୍ରୀ।

ଅନ୍ୟପଟେ ବିଧାନସଭାରେ ଆସିଥିବା ପ୍ରଶ୍ନର ଉତ୍ତର ଦେଇ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ପ୍ରମିଳା ମଲ୍ଲିକ କହିଛନ୍ତି, ମୟୂରଭଞ୍ଜ ଜିଲ୍ଲାର ରାଇରଙ୍ଗପୁର, ବଲାଙ୍ଗିର ଜିଲ୍ଲାର କଣ୍ଟାବାଞ୍ଝି, ଟିଟିଲାଗଡ଼, ବରଗଡ଼ ଜିଲ୍ଲାର ପଦମପୁର ଓ କଳାହାଣ୍ଡି ଜିଲ୍ଲାର ଧର୍ମଗଡ଼କୁ ଜିଲ୍ଲା କରିବା ପାଇଁ ଦାବି ପତ୍ରଗୁଡିକ ରାଜସ୍ବ ବିଭାଗ ପାଇଛି ।

ସେହିପରି ଭାରତ ସରକାରଙ୍କ ସଡ଼କ ପରିବହନ ମନ୍ତ୍ରାଳୟ ଦ୍ବାରା ୨୦୨୧ ମସିହା ପାଇଁ ପ୍ରକାଶିତ ତଥ୍ୟ ଅନୁଯାୟୀ ଓଡ଼ିଶାରେ ସଡ଼କ ଦୁର୍ଘଟଣା ସଂଖ୍ୟା ଦେଶରେ ସର୍ବାଧିକ ନୁହେଁ । ସୁପ୍ରିମକୋର୍ଟ କମିଟି ବିଭିନ୍ନ ରାଜ୍ୟରେ ସଡ଼କ ଦୁର୍ଘଟଣାର ସମୀକ୍ଷା କରୁଛନ୍ତି । ରାଜ୍ୟ ସରକାରଙ୍କ ଦ୍ବାରା ସଡ଼କ ଦୁର୍ଘଟଣା ରୋକିବା ପାଇଁ ନିଆଯାଇଥିବା ପଦକ୍ଷେପଗୁଡ଼ିକର ଅଡିଟ ଏହି କମିଟି କରାଇଥିଲେ । ଅଡିଟ ରିପୋର୍ଟ ଅନୁଯାୟୀ ସୁପ୍ରିମକୋର୍ଟ କମିଟି ସଡ଼କ ଦୁର୍ଘଟଣା ରୋକିବା ନିମନ୍ତେ ନିଆଯାଇଥିବା ପଦକ୍ଷେପଗୁଡ଼ିକ ପାଇଁ ରାଜ୍ୟ ସରକାରଙ୍କୁ ପ୍ରଶଂସା କରିଛନ୍ତି । ଆଜି ବିଧାନସଭାରେ ବାଣିଜ୍ୟ ଓ ପରିବହନ ମନ୍ତ୍ରୀ ଟୁକୁନି ସାହୁ ଏହା କହିଛନ୍ତି ।

ଆହୁରି ମଧ୍ୟ ଭୂମିକମ୍ପ ଜୋନରେ ଅନୁଗୁଳର ତାଳଚେର ବ୍ଲକ ଓ ଏହାର ପ୍ବାର୍ଶବର୍ତ୍ତୀ ଅଞ୍ଚଳକୁ ମୋଡରେଟ ଡ୍ୟାମେଜ ରିସ୍କ ଜୋନ୍‌ ଭାବେ ଚିହ୍ନଟ କରାଯାଇଛି । ନ୍ୟାସନାଲ ଡିଜାଷ୍ଟର ମ୍ୟାନେଜମେଣ୍ଟ ଅଥରିଟି ଓ ବିଲଡିଂ ମାଟେରିଆଲ ଏବଂ ଟେକ୍ନୋଲୋଜି ପ୍ରମୋସନ କାଉନସିଲ ଦ୍ବାରା ୨୦୦୬ରେ ଏହା ପ୍ରକାଶିତ ହୋଇଛି । ଭୂମିକମ୍ପ ସମୟରେ ଉଦ୍ଧାର କାର୍ଯ୍ୟ ନିମନ୍ତେ ଓଡ୍ରାଫ ସଦସ୍ୟଙ୍କୁ କୋଲାପ୍ସ ଷ୍ଟ୍ରକଚର, ସର୍ଚ୍ଚ ଏବଂ ରେସକ୍ୟୁ ପାଇଁ ସ୍ବତନ୍ତ୍ର ତାଲିମ ଦିଆଯାଇଛି ବୋଲି ବିଧାନସଭାରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ପ୍ରମିଳା ମଲ୍ଲିକ ସୂଚନା ଦେଇଛନ୍ତି।

ଭୁବନେଶ୍ୱର: କାଳିଆ ଯୋଜନାରେ ସହାୟତା ପାଇଛନ୍ତି ୪୧ ଲକ୍ଷ ୮ ହଜାର ୯୫୨ ଜଣ ଚାଷୀ। ୧୮ ଲକ୍ଷ ୬୯ ହଜାର ୫୨୯ ଭୂମିହୀନ କୃଷି ପରିବାରକୁ ଏହି ଯୋଜନାରେ ସାମିଲ କରାଯାଇଛି। ୨୦୧୮-୧୯ରୁ ପ୍ରଚଳିତ ଏହି ଯୋଜନାରେ ବର୍ଷକୁ ଦୁଇଟି କିସ୍ତିରେ ଟଙ୍କା ଦିଆଯାଉଛି। ପ୍ରତ୍ୟେକ କିସ୍ତିରେ ଚାଷୀଙ୍କୁ ୫ ହଜାର ଟଙ୍କା ଲେଖାଏଁ ସହାୟତା ପ୍ରଦାନ କରାଯାଇଛି।

ଏହାସହିତ ୨୦୧୯ ଖରିଫ ବର୍ଷ ପାଇଁ ୫ହଜାର ଟଙ୍କା ଲେଖାଏଁ, ୨୦୨୦-୨୧ ବର୍ଷଠାରୁ ପ୍ରତ୍ୟେକ କିସ୍ତିରେ ୨ ହଜାର ଟଙ୍କା ଲେଖାଏଁ ହିସାବରେ ୪ ହଜାର ଟଙ୍କା ପ୍ରଦାନ କରାଯାଉଛି। ପ୍ରତ୍ୟେକ ଭୂମିହୀନ ପରିବାରକୁ ସମୁଦାୟ ୩ଟି କିସ୍ତିରେ ମୋଟ ୧୨ ହଜାର ୫୦୦ ଟଙ୍କା ପ୍ରଦାନ କରାଯାଇଛି। ବୁଧବାର ବିଧାନସଭାରେ ବିଜେଡି ବିଧାୟକ ଅରବିନ୍ଦ ଢାଲିଙ୍କ ପ୍ରଶ୍ନରେ ଏହି ତଥ୍ୟ ରଖିଛନ୍ତି କୃଷି ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ।

ଯେଉଁ ଚାଷୀମାନେ କାଳିଆ ଯୋଜନାରେ ଅନ୍ତର୍ଭୁକ୍ତ ହୋଇପାରିନାହାନ୍ତି, ସେମାନେ କାଳିଆ ଓ୍ବେବପୋର୍ଟାଲ୍ kalia.odisha.gov.in ରେ ଅନଲାଇନ୍ ଆବେଦନ କରିପାରିବେ । ସେହିପରି ବଳରାମ ଯୋଜନା ୨୦୨୦-୨୧ ମସିହାରୁ କାର୍ଯ୍ୟକାରୀ ହୋଇଛି। ଗତ ୩ ବର୍ଷରେ ବଳରାମ ଯୋଜନାରେ ୬୦ ହଜାର ୩୪୬ ଜଣ କୃଷକଙ୍କୁ ମୋଟ ୯୮ କୋଟି ୬୬ ଲକ୍ଷ ଟଙ୍କାର ଋଣ ପ୍ରଦାନ କରାଯାଇଛି।