ପୁରୀ : ଶ୍ରୀମନ୍ଦିରର ସିଂହଦ୍ଵାରର ନୂତନ ରୂପାଦ୍ବାର ସ୍ଥାପନ କରାଯିବା ପାଇଁ ଆରମ୍ଭ ହୋଇଛି ପ୍ରସ୍ତୁତି। ପୂର୍ବ ନିଷ୍ପତ୍ତି ଅନୁଯାୟୀ ଚତୁର୍ଦ୍ଧାମୂର୍ତ୍ତିଙ୍କ ନବଦିନ ଯାତ୍ରାରେ ବାହାରିବା ପରେ କାମ ଆରମ୍ଭ ହେବ। ସେହି ନିଷ୍ପତ୍ତି ଅନୁସାରେ ସିଂହଦ୍ବାରରେ କାମ ଆରମ୍ଭ ହୋଇଛି। ପ୍ରଥମେ ପ୍ଲାଇରେ ନିର୍ମିତ ଅସ୍ଥାୟୀ ସିଂହଦ୍ୱାର ତିଆରି କରାଯାଉଛି। ଏହାପରେ ସିଂହଦ୍ବାରରେ ଥିବା ପିତ୍ତଳ ଦ୍ବାରକୁ ଖୋଲାଯିବ। ତାପରେ ନୂଆକରି ନିର୍ମିତ ରୂପା ଦ୍ବାରା ଲଗାଯିବ। ମୁମ୍ବାଇର ଜଣେ ଦାତା ରୂପା ପ୍ରଦାନ କରିଛନ୍ତି। ସେଥିରେ ବର୍ମାଟିକ କାଠରେ ନୂତନ ଦ୍ବାରା ନିର୍ମାଣ କରାଯାଇଛି ଯାହାକୁ ଲଗାଯିବ। ପୂର୍ବରୁ ସାତପାହାଚ, ଜୟବିଜୟ ଦ୍ବାର, କଳାହାଟ ଦ୍ବାର, ବେହରଣ ଦ୍ଵାର, ଭୋଗମଣ୍ଡପ ଦ୍ବାରା ଆଦି ଦ୍ବାରାକୁ ଉତ୍କଳୀୟ ଢାଞ୍ଚାରେ ରୂପା ଦ୍ବାରା କରାଯାଇଛି। ଏହାସହ ଗର୍ଭଗୃହର ମଧ୍ୟ ଯାଞ୍ଚ ହେବ । ମହାପ୍ରଭୁଙ୍କ ଏହି ଯାତ୍ରା ସମୟରେ ଗର୍ଭଗୃହ ଯାଞ୍ଚ କରାଯାଏ । ଏଏସଆଇର ବୈଷୟିକ କୋର୍ କମିଟି ଓ ଶ୍ରୀମନ୍ଦିର ବୈଷୟିକ କୋର୍ କମିଟି ମିଳିତ ଭାବେ ଯାଞ୍ଚ କରିବେ ।
ଭିଜିଲାନ୍ସ ଜାଲରେ ଭଦ୍ରକର ପୂର୍ବତନ ଜିଲ୍ଲା ସମାଜ ମଙ୍ଗଳ ଅଧିକାରୀ
ଭଦ୍ରକ : ଭିଜିଲାନ୍ସ ଜାଲରେ ଭଦ୍ରକର ପୂର୍ବତନ ଜିଲ୍ଲା ସମାଜ ମଙ୍ଗଳ ଅଧିକାରୀ। ମହିଳା ଓ ଶିଶୁ ବିକାଶ ବିଭାଗରେ କାର୍ଯ୍ୟରତ ଥିଲେ ଜୟନ୍ତୀ ବେହେରା । ଭଦ୍ରକ, ବାଲେଶ୍ବର ଓ ଭୁବନେଶ୍ବରର ୧୧ଟି ସ୍ଥାନରେ ଚାଲିଛି ଏକକାଳୀନ ରେଡ୍ । ବାଲେଶ୍ବର ସହଦେବଖୁଣ୍ଟା ଫିରିଙ୍ଗପାଟଣାରେ ଥିବା ୩ମହଲା କୋଠା, ସିଦ୍ଧେଶ୍ବର କଲୋନୀରେ ଥିବା ୩ ମହଲା କୋଠାରେ ଚାଲିଛି ରେଡ୍ । ଗଣେଶ୍ବରପୁରରେ ନିର୍ମାଣାଧୀନ ୨ମହଲା କୋଠା ଠାବ ହୋଇଛି ।
ବାଲେଶ୍ବରରେ ଥିବା ପୁଅ ରୋହିତ ମଣ୍ଡଳର ଅଫିସ ଚାମ୍ବର, ବାଲେଶ୍ବର ସୁନାହାଟରେ ଥିବା ସମ୍ପର୍କୀୟଙ୍କ ଘର ଓ ଚାଡିଆପୋଲରେ ଥିବା ଜଣେ ସହଯୋଗୀଙ୍କ ଘରେ ଚାଲିଛି ରେଡ୍ । ସେହିପରି ଭଦ୍ରକ ସ୍ଥିତ ଭଡ଼ାଘର, ଅଫିସ ଚାମ୍ବରରେ ଚାଲିଛି ରେଡ୍ । ଚଳିତ ମାସ ୪ତାରିଖ ଯାଏ ଜୟନ୍ତୀଙ୍କର ଡ୍ୟୁଟି ରହିଥିଲା । ହେଲେ ଏବେସୁଦ୍ଧା ଡ୍ୟୁଟି ହସ୍ତାନ୍ତର ହୋଇନି ।
କେବଳ ସେତିକି ନୁହେଁ ଭୁବନେଶ୍ବର କଳ୍ପନା ଛକ ଗୌତମ ନଗରରେ ଥିବା ରୟାଲ ରେସିଡେନ୍ସିରେ ରହିଛି ଫ୍ଲାଟ୍ । ଓଲ୍ଡଟାଉନ ଷ୍ଟଲୱାର୍ଟ ଆପାର୍ଟମେଣ୍ଟରେ 3ବିଏଚକେ ଫ୍ଲାଟ୍ ଓ ଭୁବନେଶ୍ବରରେ ମହିଳା ଓ ଶିଶୁ ବିକାଶ ବିଭାଗରେ ଥିବା ଜୟନ୍ତୀଙ୍କ ଅଫିସ ଚାମ୍ବରରେ ଚାଲିଛି ଭିଜିଲାନ୍ସ ଛାପା । ରେଡ୍ରେ ଜଣେ ଅତିରିକ୍ତ ଏସପି, ୪ଡିଏସପି ଓ ୮ ଇନ୍ସପେକ୍ଟର ସାମିଲ ଅଛନ୍ତି ।
ହକି ଇଣ୍ଡିଆ ଜୁନିଅର ପୁରୁଷ ନ୍ୟାସନାଲ ଚମ୍ପିୟାନସିପ ; ଫାଇନାଲରେ ଚଣ୍ଡିଗଡ଼-ମଧ୍ୟପ୍ରଦେଶ
ରାଉରକେଲା : ରାଉରକେଲା ଵିର୍ସା ମୁଣ୍ଡା ହକି ଷ୍ଟାଡିୟମରେ ଅନୁଷ୍ଠିତ ହେଉଥିବା ହକି ଇଣ୍ଡିଆ ଜୁନିଅର ପୁରୁଷ ନ୍ୟାସନାଲ ଚମ୍ପିୟାନସିପର ଫାଇନାଲରେ ଚଣ୍ଡିଗଡ ଓ ମଧ୍ୟପ୍ରଦେଶ ପ୍ରବେଶ କରିଛନ୍ତି। ପ୍ରଥମ ସେମି ଫାଇନାଲ ମ୍ୟାଚରେ ହରିୟଣାକୁ ୩-୧ ଗୋଲରେ ପରାସ୍ତ କରି ଚଣ୍ଡିଗଡ ଫାଇନାଲରେ ପ୍ରବେଶ କରିଛନ୍ତି। ଦ୍ଵିତୀୟ ସେମି ଫାଇନାଲରେ ଓଡିଶାକୁ ୧୨-୧୧ ପେନାଲଟି ସୁଟ ଆଉଟ ଗୋଲରେ ପରାସ୍ତ କରି ମଧ୍ୟପ୍ରଦେଶ ଫାଇନାଲରେ ପ୍ରବେଶ କରିଛନ୍ତି। ଆଜି ଵିର୍ସା ମୁଣ୍ଡା ହକି ଷ୍ଟାଡିୟମରେ ଫାଇନାଲ ମ୍ୟାଚ ଅନୁଷ୍ଠିତ ହେଵାସହ ତୃତୀୟ ଓ ଚତୁର୍ଥ ସ୍ଥାନ ପାଇଁ ମଧ୍ୟ ମ୍ୟାଚ ଅନୁଷ୍ଠିତ ହେବ।
ଆଜି ରଥାରୁଢ ଚତୁର୍ଦ୍ଧା ମୂରତିଙ୍କର ହେବ ଆଡ଼ପ ମଣ୍ଡପ ବିଜେ ନୀତି
ପୁରୀ : ରତ୍ନ ସିଂହାସନ ଛାଡ଼ି ଶରଧାବାଲିରେ କାଳିଆ ସାଆନ୍ତ। ଶ୍ରୀଗୁଣ୍ଡିଚା ମନ୍ଦିର ଆଗରେ ତିନି ରଥ। ରଥ ଉପରେ ଦର୍ଶନ ନେଉଛନ୍ତି ଶ୍ରୀଜିଉ । ଆଜି ରଥାରୁଢ ଚତୁର୍ଦ୍ଧା ମୂରତିଙ୍କର ହେବ ଆଡ଼ପ ମଣ୍ଡପ ବିଜେ ନୀତି । ରଥ ଉପରେ ମହାପ୍ରଭୁଙ୍କ ଦୈନନ୍ଦିନ ନୀତିକାନ୍ତି ଅନୁଷ୍ଠିତ ହୋଇ ଅପରାହ୍ମରେ ଆଡ଼ପ ମଣ୍ଡପ ବିଜେ ନୀତି ସମ୍ପାଦନ କରିବେ ସେବାୟତ । ଗୋଟି ପହଣ୍ଡିରେ ଆଡ଼ପ ମଣ୍ଡପକୁ ବିଜେ କରିବେ ଶ୍ରୀଜିଉ । ଆଡ଼ପମଣ୍ଡପ ବିଜେ କରି ଜନ୍ମବେଦୀରେ ତିନି ଠାକୁର କରିବେ ଲୀଳାଖେଳା । ଶ୍ରୀଗୁଣ୍ଡିଚା ଦିନ ପ୍ରଭୁ ବଳଭଦ୍ରଙ୍କ ରଥ ଶରଧାବାଲିରେ ଲାଗିସାରିଥିବାବେଳେ ଗତକାଲ ଦେବୀ ସୁଭଦ୍ରା ଓ ମହାପ୍ରଭୁ ଜଗନ୍ନାଥଙ୍କ ରଥକୁ ଶରଧାବାଲିକୁ ଟାଣି ଆଣିଥିଲେ ଲକ୍ଷଲକ୍ଷ ଶ୍ରଦ୍ଧାଳୁ । ରଥାରୂଢ କାଳିଆକୁ ଦେଖି ଛଳଛଳ ଭକତ ଆଖି । ଚକାଆଖି ସହ ଆଖି ମିଳାଇ କିଏ କାନ୍ଦି ପକାଉଛି ତ ଆଉ କିଏ ଅଭିମାନ କରୁଛି। ବିଶ୍ବନିୟନ୍ତାଙ୍କ ଦିବ୍ୟ ଦର୍ଶନ କରି ହୃଦୟର ବେଦନା ଜଣାଇଛନ୍ତି ଶ୍ରଦ୍ଧାଳୁ। ଅପଲକ ନୟନରେ କାଳିଆ ମୁହଁକୁ ଚାହିଁ ଭାବବିନୋଦିଆଙ୍କ ଭାବରେ ଆତ୍ମହରା ଭକ୍ତ। ଭକ୍ତଙ୍କ ଶୃଙ୍ଖଳିତ ଦର୍ଶନ ପାଇଁ ମନ୍ଦିର ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି।
କେନ୍ଦୁଝର କିରିବୁରୁ ଅଞ୍ଚଳରେ ଜଙ୍ଗଲ ଛାଡ଼ି ଗାଁ ମୁହାଁ ହେଲେଣି ହାତୀ ପଲ
କେନ୍ଦୁଝର : ଜଙ୍ଗଲ ଛାଡ଼ି କଲୋନୀରେ ହାତୀ ଆତଙ୍କ । ଗଛ ସହ, ଭାଙ୍ଗିଲା ଲୋକଙ୍କ ବାଡ଼ । କେନ୍ଦୁଝର ଜିଲ୍ଲା ବଲାଣୀ ଥାନା କିରିବୁରୁ ଅଞ୍ଚଳରେ ହାତୀ ଆତଙ୍କ । ରାତିରେ ହଠାତ୍ କିରିବୁରୁ ଡାଲମିଆ କଲୋନୀରେ ପଶିଲା ହାତୀ । କଦଳୀ ଖାଇବା ସହିତ ଭାଙ୍ଗିଲା କଦଳୀ ଗଛ ଓ ଲୋକଙ୍କର ବାଡ଼ । ଆଜି ରାତିରେ କୋଇଡ଼ା ପଟୁ ଏକ ହାତୀ ଆସି କିରିବୁରୁ ଡାଲମିଆ କଲୋନୀରେ ପଶି ଯାଇଥିଲା । ହାତୀକୁ ଘର ନିକଟରେ ଦେଖି ଲୋକେ ଭୟଭୀତ ହୋଇ ପଡ଼ିଥିଲେ । ଲୋକେ ହାତୀକୁ ଘଉଡ଼ାଇବାକୁ ଚେଷ୍ଟା କରିଥିଲେ । ହାତୀ ବାଡ଼ିରେ ପଶି ଗଛ ଭାଙ୍ଗିବା ସହ ତାରବାଡ଼ ଭାଙ୍ଗିଥିଲା । ପରେ ହାତୀଟି ଝାଡ଼ଖଣ୍ଡ ଜଙ୍ଗଲକୁ ପଳାଇ ଯାଇଥିବା ସୂଚନା ମିଳିଛି ।
ଆଜି ରାଜ୍ୟରେ ଆଉ ତିନୋଟି ଜିଲ୍ଲାରେ ଖୋଲିଲା ସ୍କୁଲ
ବ୍ୟୁରୋ : ଆଜି ଆଉ ତିନୋଟି ଜିଲ୍ଲାରେ ଖୋଲିଲା ସ୍କୁଲ । ସମ୍ବଲପୁର, ଝାରସୁଗୁଡ଼ା ଓ ବଲାଙ୍ଗୀର ଜିଲ୍ଲାରେ ଆଜିଠୁ ସ୍କୁଲ ଖୋଲିଛି । ଏହି ଜିଲ୍ଲାରେ ୨୪ ତାରିଖ ପର୍ଯ୍ୟନ୍ତ ସକାଳୁଆ ସ୍କୁଲ ହେଉଛି । ସକାଳ ୬ଟା ୩୦ରୁ ୧୦ଟା ଯାଏ ପାଠପଢା ହେଉଛି । ପରେ ୨୬ ତାରିଖରୁ ନିୟମିତ ସମୟାନୁସାରେ ବିଦ୍ୟାଳୟ ଚାଲିବ । ସେହିପରି ଆସନ୍ତାକାଲି, ସୁନ୍ଦରଗଡ଼, ସୁବର୍ଣ୍ଣପୁର, ନୂଆପଡ଼ା ଓ ବରଗଡ଼ ଜିଲ୍ଲାରେ ସ୍କୁଲ ଖୋଲିବାକୁ ନିଷ୍ପତ୍ତି ହୋଇଛି । ଏହି ଜିଲ୍ଲାରେ ସକାଳ ସାଢେ ୬ଟାରୁ ଦିନ ୧୦ଟା ଯାଏ କ୍ଲାସ ଚାଲିବ । ୨୬ ତାରିଖରୁ ନିୟମିତ ସମୟ ଅନୁସାରେ କ୍ଲାସ ହେବାନେଇ ଜିଲ୍ଲାପାଳ ନିଷ୍ପତ୍ତି ନେଇଛନ୍ତି । ଗତକାଲିଠୁ ରାଜ୍ୟରେ ରାଜ୍ୟରେ ସ୍କୁଲ ଖୋଲିଛି । ତେବେ ଗ୍ରୀଷ୍ଣ ପ୍ରବାହ ପାଇଁ ପଶ୍ଚିମ ଓଡ଼ିଶାର ୭ ଜିଲ୍ଲାର ଜିଲ୍ଲାପାଳଙ୍କୁ ସ୍କୁଲ ଖୋଲିବା ନିଷ୍ପତ୍ତି ନେବାକୁ ଦାୟିତ୍ବ ଦେଇଥିଲା ଗଣଶିକ୍ଷା ବିଭାଗ ।
ରୂପାନ୍ତରଣ ଫର୍ଦ୍ଦରେ ବାଲେଶ୍ବର , ଆଜି ଗ୍ରାଉଣ୍ଡ ଜିରୋକୁ ଯାଇ ବିକାଶର ସମୀକ୍ଷା କରିବେ 5T ସଚିବ
ବ୍ୟୁରୋ : ଆଜି ରୂପାନ୍ତରଣ ଫର୍ଦ୍ଦରେ ସାମିଲ ହେବ ବାଲେଶ୍ବର । ଗ୍ରାଉଣ୍ଡ ଜିରୋକୁ ଯାଇ ବିକାଶର ସମୀକ୍ଷା କରିବେ 5T ସଚିବ ଭି.କେ ପାଣ୍ଡିଆନ । ଉନ୍ନୟନ ପ୍ରକଳ୍ପର ସମୀକ୍ଷା ପାଇଁ ଆଜିଠୁ ଦୁଇଦିନିଆ ବାଲେଶ୍ବର ଗସ୍ତରେ ଯାଇଛନ୍ତି 5T ସଚିବ ।
ସକାଳ ୮ଟା ୩୫ମିନିଟରେ ବାଲେଶ୍ବରରେ ପହଞ୍ଚିବା ପରେ ଖଇରା ଗୋଷ୍ଠୀ ଉନ୍ନୟନ କେନ୍ଦ୍ର ପରିଦର୍ଶନ କରିବେ 5T ସଚିବ । ସେଠାରେ ଆମ ହସପିଟାଲରେ ଚାଲିଥିବା ବିକାଶ କାମର ଅନୁଧ୍ୟାନ କରିବେ । ସେଠାରୁ କୁପାରୀ ପଞ୍ଚାୟତ ଗ୍ରାଉଣ୍ଡକୁ ଯାଇ ଜନସାଧାରଣ ଓ ମିଶନ ଶକ୍ତି ମାଆମାନଙ୍କ ସହିତ ଆଲୋଚନା କରିବେ । ପରେ ଜାମୁଝାଡ଼ି ନିକଟରେ ବାମ୍ବୋ ପ୍ରୋସେସିଂ ୟୁନିଟ ପରିଦର୍ଶନ ସହ ମିଶନ ଶକ୍ତି ମାଆଙ୍କ ସହିତ ଆଲୋଚନା କରିବେ । ସୋର ୟୁଏନ କଲେଜରେ ଛାତ୍ରଛାତ୍ରୀଙ୍କ ସହିତ ଆଲୋଚନା କରି ସିଏଚସି ଗସ୍ତ କରି ବିକାଶ କାମର ଅନୁଧ୍ୟାନ କରିବେ ଫାଇଭ-ଟି ସଚିବ । ସେଠାରୁ ସନ୍ତରାଗଡ଼ିଆ ଯାଇ ସାଳନ୍ଦୀ କେନାଲ ଉନ୍ନୟନ କାର୍ଯ୍ୟର ଅନୁଧ୍ୟାନ କରିବେ । ପରେ ବାହାନଗା ହାଇସ୍କୁଲ ପରିଦର୍ଶନ କରିବା ସହ ରେଳ ଦୁର୍ଘଟଣା ଉଦ୍ଧାର କାର୍ଯ୍ୟ ପାଇଁ ସ୍ଥାନୀୟ ଲୋକଙ୍କୁ କୃତଜ୍ଞତା ପ୍ରଦାନ କରିବେ । ଏହାପରେ ଦିନତମାମ ଏକାଧିକ ଉନ୍ନୟନ କାର୍ଯ୍ୟର ଅନୁଧ୍ୟାନ କରିବେ ଫାଇଭ-ଟି ସଚିବ ।
ଶୀତଳାପଲ୍ଲୀ ମଲ୍ଟି ସ୍ପେଶାଲିଷ୍ଟ ହସ୍ପିଟାଲ ପାଇଁ ଜମି: ଅନାଥାଶ୍ରମ, ଦୃଷ୍ଟିହୀନଙ୍କ ସ୍କୁଲ ସ୍ବତନ୍ତ୍ର ଖଜଣା
ଭୁବନେଶ୍ବର: ଗଞ୍ଜାମ କନିସି ଶୀତଳାପଲ୍ଲୀ ମୌଜାରେ ଟାଟା ସ୍ପେଶାଲିଟି ହସ୍ପିଟାଲ ପ୍ରତିଷ୍ଠା ନିମନ୍ତେ ଯୋଗାଇ ଦିଆଯାଇଛି ୪୩ ଏକରରୁ ଅଧିକ ଜମି । ଏ ବାବଦରେ ଇନସିଡେମ୍ଟାଲ ଚାର୍ଜ ଓ ବାର୍ଷିକ ଭୂରାଜସ୍ବ, ସେସ ଓ ସମସ୍କ ଦେୟ ଉପରେ ସୁଧ ଛାଡ଼ କରିବା ନିମନ୍ତେ ରାଜ୍ୟ ସରକାର ନିଷ୍ପତ୍ତି ଗ୍ରହଣ କରିଛନ୍ତି । ଟାଟାକୁ ଉକ୍ତ ଜମି ଲିଜରେ ନେବା ପାଇଁ ଏବେ ଠାରୁ ଏକର ପିଛା ଶହେ ଟଙ୍କା ହିସାବରେ ବାର୍ଷିକ ଭୂ-ରାଜସ୍ବର ୭୫ ପ୍ରତିଶତ ହିସାବରେ ବାର୍ଷିକ ସେସ ଦେବାକୁ ପଡିବ ।
ସେହିପରି ଅନାଥାଶ୍ରମ, ଦୃଷ୍ଟିହୀନଙ୍କ ପାଇଁ ସ୍କୁଲ ପାଇଁ ସ୍ବତନ୍ତ୍ର ଖଜଣା ଧାର୍ଯ୍ୟ କରାଯାଇଛି । ସରକାରୀ ଜମି ଲିଜ ପ୍ରଦାନ କ୍ଷେତ୍ରରେ ସେସବୁ ଅନୁଷ୍ଠାନଗୁଡିକ ଖଜଣା ବାବଦରେ ଏକର ପିଛା ବାର୍ଷିକ ଶହେ ଟଙ୍କା ଓ ସେସ ବାବଦରେ ବାର୍ଷିକ ଖଜଣାର ୭୫ ପ୍ରତିଶତ ଦେୟ ଦେବେ । ସେହିପରି ଅବଢା ଯୋଜନାର ମୋଟ ଅଟକଳରେ ବୃଦ୍ଧିକୁ କ୍ୟାବିନେଟ ମୋହର ମାରିଛି । ଏଥର ଅଟକଳ ୪୨୨୪.୨୨ କୋଟି ଟଙ୍କାକୁ ବୃଦ୍ଧି କରାଯାଇଛି ।
ଓଡ଼ିଶା ଜିଏସଟି ସଂଶୋଧନ ବିଧେୟକ ୨୦୨୩କୁ ମୋହର ମାରିଛି ରାଜ୍ୟ କ୍ୟାବିନେଟ । ଏଥିରେ ଜିଏସଟି ବ୍ୟବସ୍ଥାକୁ ସରଳ କରିବା ସହିତ ଟିକସଦାତାଙ୍କୁ ଅଧିକ ସୁବିଧା ସୁଯୋଗ ଯୋଗାଇ ଦେବାକୁ ପ୍ରସ୍ତାବ ରହିଛି । କମ୍ପୋଜିସନ୍ ଲେଭି ଅଧୀନରେ ଟିକସ ଦେବା ଉପରେ ଲାଗିଥିବା ପ୍ରତିବନ୍ଧକକୁ ହଟାଇ ଦେବାର ପ୍ରସ୍ତାବ ରହିଛି । ଟିକସ ଯୋଗ୍ୟ ବ୍ୟକ୍ତି କର୍ପୋରେଟ ସାମାଜିକ ଦାୟିତ୍ବ ସମ୍ବନ୍ଧୀୟ କାର୍ଯ୍ୟ କରିଥିଲେ ଇନପୁଟ୍ ଟ୍ୟାକ୍ସ କ୍ରେଡିଟ୍ ଉପଲବ୍ଧ ହେବନି । ଜିଏସଟି ବିବାଦ ତୁଟାଇବାକୁ ପ୍ରଧାନ ଖଣ୍ଡପୀଠ ଓ ରାଜ୍ୟ ଖଣ୍ଡପୀଠ ଗଠନ ପାଇଁ ପ୍ରସ୍ତାବ ରହିଛି । ସେହିପରି କେତେକ ଅପରାଧରେ ଆର୍ଥିକ ଦେୟ ସୀମା ୧ କୋଟିରୁ ୨ କୋଟିକୁ ବୃଦ୍ଧି ପ୍ରସ୍ତାବ ରହିଛି । ଓଡ଼ିଶା ପ୍ରବରଣ ଆୟୋଗ ନିୟମାବଳୀ ୧୯୯୫ର ସଂଶୋଧନକୁ କ୍ୟାବିନେଟରେ ମଞ୍ଜୁରି ମିଳିଛି । ଏଥିରେ ଅଧ୍ୟକ୍ଷ ଓ ସଦସ୍ୟମାନଙ୍କ ୬୨ରୁ ୬୫ ବର୍ଷ ପର୍ଯ୍ୟନ୍ତ ବୟସ ସୀମା ବୃଦ୍ଧି, ବେତନ ବୃଦ୍ଧି, ଅତିରିକ୍ତ ପେନସନ ନିବୃତ୍ତ କରିବାକୁ ବ୍ୟବସ୍ଥା କରାଯାଇଛି ।
ମଝିଘରିଆଣୀ ମନ୍ଦିର ଭିତ୍ତିଭୂମି ବିକାଶ ପାଇଁ ଜମି ଦେବେ ରାଜ୍ୟ ସରକାର
ରାୟଗଡ଼ା: ମାଆ ମଝିଘରିଆଣୀ ମନ୍ଦିର ଭିତ୍ତିଭୂମି ବିକାଶ ପାଇଁ ଜମି ଦେବେ ସରକାର । ରେଳ ବିଭାଗଠାରୁ ସମାନ ପରିମାଣ ଓ ସମାନ ମୂଲ୍ୟର ଜମି ସହିତ ବଦଳ କରି ଅଣାଯାଇଥିବା ୬ ଏକର ୩୦ଡିସିମିଲି ଜମି ମନ୍ଦିରକୁ ଦିଆଯିବ । ମନ୍ଦିର ଭିତ୍ତିଭୂମି ବିକାଶ ପାଇଁ ବିନା ପ୍ରିମିୟମ ଓ ବିନା ଇନସିଡେଣ୍ଟାଲ ଚାର୍ଜରେ ମନ୍ଦିର ପରିଚାଳନା ଟ୍ରଷ୍ଟକୁ ଲିଜ୍ ଆକାରରେ ଦେବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି । ଟ୍ରଷ୍ଟକୁ ରିହାତି ଦରରେ ଏକର ପିଛା ଶହେ ଟଙ୍କା ହିସାବରେ ବାର୍ଷିକ ଭୂ-ରାଜସ୍ବ ଓ ଭୂ-ରାଜସ୍ବର ୭୫ ପ୍ରତିଶତ ହିସାବରେ ବାର୍ଷିକ ସେସ୍ ଦେବାକୁ ପଡିବ ।
୩ ମାସରେ ୬୦ ବର୍ଷର ସମସ୍ୟା ସମାଧାନ, ନର ନାରାୟଣ ଆଶ୍ରମକୁ ୨.୨୭ ଏକର ଜମି
ପୋଟେରୁ: ୬୦ ବର୍ଷର ସମସ୍ୟା ୩ ମାସରେ ସମାଧାନ । ପୋଟେରୁ ନର ନାରାୟଣ ଆଶ୍ରମକୁ ୨.୨୭ ଏକର ଜମି ପ୍ରଦାନ । ଆନନ୍ଦାଶ୍ରୁ ସହ ମୁଖ୍ୟମନ୍ତ୍ରୀଙ୍କ ଉପରେ ଆଶିଷ ଢ଼ାଳିଲେ ଭକ୍ତଗଣ । ବିକାଶମୂଳକ କାର୍ଯ୍ୟ ନିମନ୍ତେ ୪୮ ଲକ୍ଷ ଟଙ୍କାର ଆର୍ଥିକ ସହାୟତା । ସେପ୍ଟେମ୍ବର ମାସ ମଧ୍ୟରେ ଶେଷ କରାଯିବ ସବୁ ନିର୍ମାଣ କାର୍ଯ୍ୟ ।
ଦୃଢ଼ ଇଚ୍ଛାଶକ୍ତି ଥିଲେ ସବୁ ଅସାଧ୍ୟ କାର୍ଯ୍ୟ ବି ସହଜ ହୋଇପାରେ । ଆଉ ଏହି ଇଚ୍ଛାଶକ୍ତି ଯେତେବେଳେ ଜନହିତ ପାଇଁ ବିନିଯୋଗ ହୁଏ ସେତେବେଳେ ସବୁ ବାଧାବିଘ୍ନ ଦୂର ହୋଇଥାଏ । ଏହାର ଜ୍ବଳନ୍ତ ଉଦାହରଣ ଏବେ ଦେଖିବାକୁ ମିଳିଛି ମାଲକାନଗିରି ଜିଲ୍ଲାର ପୋଟେରୁ ଅଞ୍ଚଳର ପୁଲି ମେଟଲା ମୌଜାରେ ନରନାରାୟଣ ଆଶ୍ରମ ପ୍ରସଙ୍ଗରେ । ଗତ ୬ ଦଶନ୍ଧି ଧରି ଆଶ୍ରମର ଜମିଜମାକୁ ନେଇ ଲାଗି ରହିଥିବା ସମସ୍ୟା ମାତ୍ର ୩ ମାସରେ ହୋଇଛି ସମାଧାନ । 5T ସଚିବ ଭି.କେ. ପାଣ୍ଡିଆନଙ୍କ ତ୍ୱରିତ କାର୍ଯ୍ୟାନୁଷ୍ଠାନ ଫଳରେ ଦୁଇଟି ପ୍ଲଟରେ ୨.୨୭୩ ଏକର ଜଙ୍ଗଲ ଜମିକୁ ସାର୍ବଜନୀନ ବ୍ୟବହାର ଉଦ୍ଦେଶ୍ୟରେ ବ୍ୟବହାର ନିମନ୍ତେ ପଦକ୍ଷେପ ଗ୍ରହଣ କରାଯାଇଛି । ଏହାସହ ଆଶ୍ରମରେ ଗୋଷ୍ଠୀ କେନ୍ଦ୍ର ସ୍ଥାପନ ନିମନ୍ତେ ୪୮ ଲକ୍ଷ ଟଙ୍କା ଆର୍ଥିକ ଅନୁଦାନ ପ୍ରଦାନ କରାଯାଇଛି । ଯାହାକୁ ନେଇ ଆଶ୍ରମବାସୀ ଓ ଆଶ୍ରମ ସହ ଜଡ଼ିତ ୭୦ ହଜାରରୁ ଊର୍ଦ୍ଧ୍ବ ଶ୍ରଦ୍ଧାଳୁ ଓ ଭକ୍ତଙ୍କ ମଧ୍ୟରେ ଆନନ୍ଦ କହିଲେ ନସରେ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ 5T ସଚିବଙ୍କ ଯୋଗୁଁ ଏହି କାର୍ଯ୍ୟ ସମ୍ଭବ ହୋଇଥିବା ଉଲ୍ଲେଖ କରି ଅଜାଡ଼ିଛନ୍ତି ଅସୀମ ଆଶିଷ । ପ୍ରାୟ ୬ ଦଶନ୍ଧି ତଳେ ସ୍ଥାପନ ହୋଇଥିବା ଏହି ଆଶ୍ରମର ଅନ୍ତେବାସୀ ଓ ଆଶ୍ରମ ସହ ଜଡ଼ିତ ଶ୍ରଦ୍ଧାଳୁ ନିଜକୁ ସମାଜସେବାରେ ନିୟୋଜିତ କରି ଆସିଛନ୍ତି । ଆଶ୍ରମଟି ଜଙ୍ଗଲ ଜମିରେ ଗଢ଼ି ଉଠିଥିବାରୁ ଏଠାରେ କୌଣସି ଉନ୍ନତିମୂଳକ କାର୍ଯ୍ୟ ସମ୍ଭବ ହୋଇ ପାରୁ ନଥିଲା, କିମ୍ବା କୌଣସି ଅନୁଦାନ ମିଳିବା ମଧ୍ୟ ସମ୍ଭବ ହେଉ ନ ଥିଲା ।
ଗତ ମାର୍ଚ୍ଚ ମାସରେ 5T ସଚିବଙ୍କ ଗସ୍ତ ସମୟରେ ଆଶ୍ରମ କର୍ତ୍ତୃପକ୍ଷ ଏ ସମ୍ପର୍କରେ କି.କେ. ପାଣ୍ଡିଆନଙ୍କ ଦୃଷ୍ଟି ଆକର୍ଷଣ କରିଥିଲେ ଓ ସେ ମଧ୍ୟ ଏ ସମ୍ପର୍କରେ ପଦକ୍ଷେପ ଗ୍ରହଣ କରିବେ ବୋଲି ପ୍ରତିଶ୍ରୁତି ଦେଇଥିଲେ । ଇତିମଧ୍ୟରେ ଜଙ୍ଗଲ ଅଧିକାର ଆଇନ ୨୦୦୬ର ଧାରା ୩(୨) ଅନୁସାରେ ଏହି ଜମିକୁ କାଲିମେଳା ବିଡ଼ିଓଙ୍କ ମାର୍ଫତରେ ପଞ୍ଚାୟତିରାଜ ଓ ପାନୀୟଜଳ ବିଭାଗକୁ ହସ୍ତାନ୍ତର କରାଯାଇଛି । ଏହାସହ ଏଠାରେ ଏକ ଗୋଷ୍ଠୀ କେନ୍ଦ୍ର ସ୍ଥାପନ ସହ କାଲିମେଳା ବିଡ଼ିଓ ଓ ଆଶ୍ରମର ପ୍ରାଧିକୃତ ଅଧିକାରୀ ମଧ୍ୟରେ ଏକ ବୁଝାମଣାପତ୍ର ଗତ ଜୁନ୍ ୧୬ ତାରିଖରେ ସ୍ୱାକ୍ଷର ହୋଇଛି । ମାଲକାନଗିରି ଉପଜିଲ୍ଲାପାଳ ଅକ୍ଷୟ ଖେମୁଣ୍ଡୁଙ୍କ ସୂଚନା ଅନୁସାରେ ଏହା ଫଳରେ ସ୍ଥାନୀୟ ନରନାରାୟଣ ଆଶ୍ରମର ବହୁ ଦିନର ସମସ୍ୟା ସମାଧାନ ହୋଇଛି । ଆଇନ ପରିସର ମଧ୍ୟରେ ସମସ୍ତ କାର୍ଯ୍ୟ କରାଯାଇଛି ଓ ଏହାଦ୍ୱାରା ଆଶ୍ରମର ଉନ୍ନୟନ ନିମନ୍ତେ ଭବିଷ୍ୟତରେ ଅନେକ କାର୍ଯ୍ୟ ହୋଇ ପାରିବ ବୋଲି ସେ କହିଛନ୍ତି । ଅନ୍ୟପକ୍ଷରେ ଆଶ୍ରମର ଅନ୍ତେବାସୀ ଓ କର୍ତ୍ତୃପକ୍ଷ ଦୀର୍ଘ ୬ ଦଶନ୍ଧିର ସମସ୍ୟା ସମାଧାନ କରିବାରେ 5T ସଚିବଙ୍କ ତତ୍ପରତାକୁ ଭୂୟସୀ ପ୍ରଶଂସା କରିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପଦକ୍ଷେପ ପାଇଁ ଆମେମାନେ ଅତ୍ୟନ୍ତ ଖୁସି । ତାଙ୍କୁ ଭଗବାନ ବହୁ ପରମାୟୁ ଦିଅନ୍ତୁ ବୋଲି ଆଶ୍ରମର ସାଧୁମାନେ କହିଛନ୍ତି । ଜଣେ ଭକ୍ତ କହିଛନ୍ତି ଯେ, ଆମେ ଭିଡ଼ିଓ କନଫରେନ୍ସିଂ ଜରିଆରେ ଏଥିନେଇ 5T ସଚିବଙ୍କୁ ଅନୁରୋଧ କରିଥିଲୁ । ମାତ୍ର ଦୁଇ ମାସ ମଧ୍ୟରେ ସେ ତାହାକୁ କାର୍ଯ୍ୟରେ ପରିଣତ କରିଛନ୍ତି । ଠାକୁରଙ୍କ ଦୂତ ଭାବରେ ଭି.କେ. ପାଣ୍ଡିଆନ ଏହି କାର୍ଯ୍ୟ ସମ୍ପନ୍ନ କରିଛନ୍ତି । ସେଥିପାଇଁ ଠାକୁର ସତ୍ୟାନନ୍ଦ ପରମହଂସ ଦେବ, ନୀଳକଣ୍ଠ ଗୋସ୍ୱାମୀ ମୁଖ୍ୟମନ୍ତ୍ରୀଙ୍କୁ ଅଶେଷ ଆୟୁଷ ଦିଅନ୍ତୁ, ତାଙ୍କର କଲ୍ୟାଣ କରନ୍ତୁ । ସାରା ବିଶ୍ୱର ହଜାର ହଜାର ଭକ୍ତଙ୍କ ସ୍ନେହ ଓ ଶ୍ରଦ୍ଧା ମୁଖ୍ୟମନ୍ତ୍ରୀ ଗ୍ରହଣ କରନ୍ତୁ ବୋଲି କିଛି ଭକ୍ତ କହିଛନ୍ତି ।