କେନ୍ଦୁଝର: ଆନନ୍ଦପୁର ବନଖଣ୍ଡ ତନେଇପାଳ ଗାଁରେ ଦନ୍ତା ହାତୀଙ୍କ ଉତ୍ପାତ। ଗାଁ ଦାଣ୍ଡରେ ବୁଲୁଛି ହାତୀ । ଘରଦ୍ବାର ଭାଙ୍ଗିବା ସହ ବ୍ୟାପକ ଫସଲ ସହ ସାଇତା ଧାନକୁ ଖାଇ ନଷ୍ଟ କରୁଛି । ଗାଁର ଦିଲ୍ଲୀପ ମହାନ୍ତ ଓ ଭରତ ମହାନ୍ତଙ୍କ ଘର ଭାଙ୍ଗିରୁଜି ଦେଇଛି ଦନ୍ତା ।
ହାତୀ ଭୟରେ ଖଟତଳେ ସାରା ରାତି ବିତୁଛି ଜୀବନ । ଦନ୍ତା ଉଭୟ ପରିବାରର ୩ କୁଇଣ୍ଟାଲରୁ ଅଧିକ ଧାନ ଚାଉଳ ଖାଇ ଗାଁ ଦାଣ୍ଡରେ ବୁଲି ଉତ୍ପାତ ମଚାଇଥିଲା । ବନବିଭାଗ କର୍ମଚାରୀ ପହଞ୍ଚି ହାତୀକୁ ଘଉଡ଼ାଇବା ପାଇଁ ପ୍ରୟାସ ଜାରି ରଖିଛନ୍ତି ।
ନନ୍ଦିଘୋଷ ବ୍ୟୁରୋ: ଜୁଲାଇ ୧୪ରେ ଲଞ୍ଚ ହେବ ଇସ୍ରୋର ଚନ୍ଦ୍ରୟାନ-୩ । ଅପରାହ୍ନ ୨ଟା ୩୫ରେ ହେବ ଉତକ୍ଷେପଣ । ଉତକ୍ଷେପଣ ପାଇଁ ଜୋରଦାର ପ୍ରସ୍ତୁତି କରାଯାଉଛି । ଏପଟେ କିନ୍ତୁ ଗୁଜରାଟ ସୁରଟରେ ଲୋକ ସଚେତନତା ପାଇଁ ହୋଇଛି ରଙ୍ଗୋଲି । ୨୪ ଘଣ୍ଟାରେ ୯୧ ଫୁଟର ଚନ୍ଦ୍ରାୟନ ୩ ଯାନର ରଙ୍ଗୋଲି ବନାଇଛନ୍ତି କଳାକାର । ୧୨ରୁ ୧୩ ରଙ୍ଗକୁ ବିଭିନ୍ନ ସେଡ୍ ଦେଇ ତିଆରି ହୋଇଛି ସୁନ୍ଦର ଓ ଆକର୍ଷଣୀୟ ଥ୍ରୀଡି ରଙ୍ଗୋଲି । ଏକ ସ୍କୁଲରେ ସୁରଟର କିଛି କଳାକାର ଏହି ପେଣ୍ଟିଂ ବନାଇଛନ୍ତି । ଯାହା ଅବିକଳ ଚନ୍ଦ୍ରାୟନ-୩ ପରି ଦିଶୁଛି ।
ଆନ୍ଧ୍ରପ୍ରଦେଶର ଶ୍ରୀହରିକୋଟାରେ ଚନ୍ଦ୍ରୟାନ-୩ ଉତକ୍ଷେପଣ ପାଇଁ ପ୍ରସ୍ତୁତି ଜୋରଦାର ହୋଇଛି । ୨୦୦୮-୦୯ରେ ଚନ୍ଦ୍ରୟାନ-୧ ହୋଇଥିବା ବେଳେ ଚନ୍ଦ୍ର ପୃଷ୍ଠରେ ଜଳର ସନ୍ଧାନ ମିଳିଥିଲା। ୨୦୧୯ ଅଗଷ୍ଟରେ ହୋଇଥିବା ଚନ୍ଦ୍ରୟାନ-୨ ବିଫଳ ହୋଇଥିଲା । ମାତ୍ର ଚନ୍ଦ୍ରୟାନ-୨ରେ ଚନ୍ଦ୍ର ପୃଷ୍ଠକୁ ପଠାଯାଇଥିବା ଅର୍ବିଟର ଏବେ ବି ସଫଳତାର ସହ କାର୍ଯ୍ୟ କରୁଛି ।
ଭୁବନେଶ୍ବର: ସଫାରୀରେ ଦବିଲା ବସ୍, ଘେରିଗଲେ ସିଂହ । ନନ୍ଦନକାନନ ପ୍ରାଣୀ ଉଦ୍ୟାନରେ ଫସିଲା ସଫାରୀ ବସ୍ । ସିଂହ ସଫାରୀକୁ ପର୍ଯ୍ୟଟକଙ୍କୁ ନେଇ ଯାଉଥିବା ଏକ ବସ୍ ଅଧା ବାଟରେ ଦବି ଯାଇଥିବା ବେଳେ ବସ୍ ପାଖରେ ସିଂହମାନେ ଘେରି ଯାଇଥିଲେ । ନନ୍ଦନକାନନ କର୍ତ୍ତୃପକ୍ଷଙ୍କ ନିର୍ଦ୍ଦେଶକ୍ରମେ ପର୍ଯ୍ୟଟକଙ୍କୁ ଉଦ୍ଧାର କରିଥିଲେ କର୍ମଚାରୀ ।
ସିଂହଙ୍କୁ ଘଉଡ଼ାଇବାରୁ ୩୦ ଜଣ ପର୍ଯ୍ୟଟକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ସଫାରୀ ରାସ୍ତାଟି ମୋରମ୍ ପଡ଼ି ତିଆରି କରାଯାଇଛି । ବର୍ଷାରେ ରାସ୍ତାଟି ଦୁର୍ବଳ ହୋଇଯାଇଥିଲା । ଫଳରେ ବସ୍ ଦବି ଯାଇଥିଲା । ସମାନ ଘଟଣା ୨୦୨୧ ନଭେମ୍ବର ୭ ରେ ଘଟିଥିଲା । ନନ୍ଦନକାନନରେ ବାରମ୍ବାର ଏଭଳି ଅଘଟଣ ଘଟୁଥିବାରୁ ପର୍ଯ୍ୟଟକଙ୍କ ମହଲରେ ଭୟର ବାତାବରଣ ସୃଷ୍ଟି ହୋଇଛି ।
ନୂଆଦିଲ୍ଲୀ: ଉତ୍ତରରୁ ଦକ୍ଷିଣ ଲଗାଣ ବର୍ଷା । ହିମାଞ୍ଚଳ, ଉତ୍ତରାଖଣ୍ଡ, ଜମ୍ମୁ-କାଶ୍ମୀର ଓ ରାଜସ୍ଥାନରେ ରେଡ୍ ଆଲର୍ଟ । ୨୦ ବର୍ଷର ରେକର୍ଡ ଭାଙ୍ଗିଲା ଦିଲ୍ଲୀ ବର୍ଷା । ଦେଶରେ ମୌସୁମୀ ବର୍ଷା ଜାରି ରହିଛି । ଭୀଷଣ ବର୍ଷା ଓ ବନ୍ୟା ସ୍ଥିତି ଯୋଗୁ ରାଜସ୍ଥାନରେ ୪ କେରଳରେ ୮ଜଣଙ୍କ ମୃତ୍ୟୁ ହେଲାଣି । କେଉଁଠି ବଡ଼ ବଡ଼ଗଛ ପଡ଼ିଛି, ତ କେଉଁଠି ଘର କାନ୍ଥ ଭୁଶୁଡ଼ି ପଡୁଛି । ଲଗାଣ ବର୍ଷାରେ ଜଳବନ୍ଦୀ ସ୍ଥିତି ଉପୁଜିଛି ।
ଦିଲ୍ଲୀରେ ଗତ ୯ ଘଣ୍ଟାରେ ୧୨୬.୧ ମିଲିମିଟର ବର୍ଷା ରେକର୍ଡ ହୋଇଛି । ହିମାଞ୍ଚଳର ୭ ଜିଲ୍ଲାକୁ ରେଡ୍ ଆଲର୍ଟ ଜାରି ହୋଇଛି । ଆଜି ସକାଳୁ ବର୍ଷା ଜାରି ରହିଛି । ଜମ୍ମୁର ବିଭିନ୍ନ ସ୍ଥାନ, ପୂର୍ବ ରାଜସ୍ଥାନ, ହରିୟାଣା, ଚଣ୍ଡିଗଡ଼, ଦିଲ୍ଲୀ ଓ ପଞ୍ଜାବରେ ବର୍ଷା ଜାରି ରିହଛି । କେରଳର କିଛି ସ୍ଥାନରେ ସକାଳୁ ବର୍ଷା ଜାରି ରହିଛି । ଦିଲ୍ଲୀର ରାଜରାସ୍ତାରେ ଲହଡି ମାରୁଛି ଆଣ୍ଠୁଏ ଉଚ୍ଚର ବର୍ଷା ଜଳ । ଲୋକ ଯାତାୟତରେ ବହୁ ଅସୁବିଧା ଭୋଗୁଛନ୍ତି ।
କାର୍ ହେଉ କି ବସ୍ ପାଣି ଭିତରେ ପଶି ଯାଉଛନ୍ତି । ପ୍ରଗତି ମୈଦାନ ଟନେଲରେ ପଶିଲା ପାଣି । ଉତ୍ତରାଖଣ୍ଡର ୧୩ ଜିଲ୍ଲାରେ ୧୨ ଜୁଲାଇ ଯାଏ ହେବ ବର୍ଷା । ସେପଟେ କେଦାରନାଥରେ ପ୍ରବଳ ବର୍ଷା ଯୋଗୁ ବିଭିନ୍ନ ସ୍ଥାନରେ ଭୂସ୍ଖଳନ ହୋଇଛି ।
ଖାର୍ତୁମ: ଏୟାର ଷ୍ଟ୍ରାଇକରେ ସୁଦାନରେ ୨୨ ଜଣଙ୍କ ମୃତ୍ୟୁ ହୋଇଛି । ରାଜଧାନୀ ଖାର୍ତୁମର ପଡ଼ୋଶୀ ସହରରେ ଏୟାରଷ୍ଟ୍ରାଇକ୍ ହୋଇଛି । ପଶ୍ଚିମ ଓମଗୁରମ୍ୟାନରେ ସୁଦାନ ସେନା ଏୟାରଷ୍ଟ୍ରାଇକ କରିଛି । ଫଳରେ ୨୨ ଜଣଙ୍କ ଜୀବନ ଯାଇଥିବା ବେଳେ ଅନେକ ଆହତ ହୋଇଛନ୍ତି । ୧୨ ସପ୍ତାହ ଧରି ସୁଦାନ ସେନା ଓ ପାାରାମିଲିଟାରୀ ଫୋର୍ସ ମଧ୍ୟରେ ସଂଘର୍ଷ ଜାରି ରହିଛି ।
୧୫ ଏପ୍ରିଲରେ ଲଢେଇ ଆରମ୍ଭ ହେବା ପରେ ଆରଏସଏଫ ପକ୍ଷରୁ ରାଜଧାନୀ ଖାର୍ତୁମ, ଓମଗୁରମ୍ୟାନ୍ ଓ ବହରୀରେ ଜୋରଦାର ଆକ୍ରମଣ ଜାରି ରହିଛି । କେତେବେଳେ ଏୟାର ଷ୍ଟ୍ରାଇକ ତ କେତେବେଳେ ତୋପ ମାଡ଼ ଜାରି ରହିଛି । ଆଜି ଯାଏ କୌଣସି ମଧ୍ୟସ୍ଥତା ସଫଳ ହୋଇପାରିନି । ଉଭୟ ପକ୍ଷ ମଧ୍ୟରେ ଲଢ଼େଇ ଜାରି ରହିଥିବା ବେଳେ, ଦେଶ ଗୃହଯୁଦ୍ଧ ଆଡ଼କୁ ମୁହାଁଇଛି ।
ଲୋକତନ୍ତ୍ରରେ ପରିବର୍ତ୍ତନ ପାଇଁ ସେନାରେ ଏକତା ରକ୍ଷା କରିବାକୁ ଯୁଦ୍ଧ ପୂର୍ବରୁ ଉଭୟ ପକ୍ଷ ମଧ୍ୟରେ ଅଶାନ୍ତି ବଢ଼ିଥିଲା । ଏବେ ସୁଦ୍ଧା ଲଢ଼େଇରେ ୧୧୩୩ ଜଣଙ୍କ ଜୀବନ ଗଲାଣି । ଅଧାରୁ ଅଧିକ ମହିଳା ଓ ଯୁବତୀଙ୍କୁ ଦୁଷ୍କର୍ମ ଓ ଅପହରଣ କରାଯାଇଥିବା ଅଭିଯୋଗ ବି ରହିଛି । ୨୦ ବିଦ୍ରୋହୀଙ୍କୁ ମାରିବା ସହ ସେମାନଙ୍କ ଅସ୍ତ୍ର ଶସ୍ତ୍ର ନଷ୍ଟ କରାଯାଇଥିବା ସେନା ପକ୍ଷରୁ କୁହାଯାଇଛି ।
ବାଲେଶ୍ବର: ବାହାନଗା ରେଳ ଦୁର୍ଘଟଣାର ସହାୟତା ରାଶି ନେଇ ଗଲେ ଶଶୁର । ଥାନାରେ ଅଭିଯୋଗ କଲେ ପତ୍ନୀ। ବାହାନଗା ଟ୍ରେନ ଦୁର୍ଘଟଣାରେ ଭଦ୍ରକ ଜିଲ୍ଲାର ବାସୁଦେବପୁର ସୁଗୋ ପଞ୍ଚାୟତର ଗୋବିନ୍ଦ ଚନ୍ଦ୍ର ସାହୁ ମୃତ୍ୟୁବରଣ କରିଥିଲେ । କୋଲକାତାରୁ ଘରକୁ ଫେରୁଥିବା ବେ୍ଳେ ରେଳ ଦୁର୍ଘଟଣାଗ୍ରସ୍ତ ହେବାରୁ ଗୋବିନ୍ଦଙ୍କ ମୃତ୍ୟୁ ହୋଇଥିଲା ।
ଶୋକ ସନ୍ତପ୍ତ ପରିବାରକୁ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୫ ଲକ୍ଷ ଟଙ୍କା ଓ କେନ୍ଦ୍ର ସରକାରଙ୍କ ପକ୍ଷରୁ ୧୦ ଲକ୍ଷ ଟଙ୍କାର ଆର୍ଥିକ ସହାୟତା ପ୍ରଦାନ କରିଥିଲେ । ହେଲେ ସରକାରଙ୍କ ଠାରୁ ମିଳିଥିବା ସହାୟତା ରାଶି ହାତେଇବା ପାଇଁ ମାରି ଦେବାର ଧମକ ମିଳୁଛି ପତ୍ନୀ ବିଜୟା ସାହୁଙ୍କୁ । ଏମିତିକି ବ୍ୟାଙ୍କ ଜମା ଖାତାରୁ ସମସ୍ତ ଟଙ୍କା ଶ୍ବଶୂର ଉଠାଇ ନେଇଥିବାରୁ ମାଆ ପିଲା ଚଳିବେ କେମିତି ସେନେଇ ବାସୁଦେବପୁର ଥାନାର ଦ୍ବାରସ୍ଥ ହୋଇଛନ୍ତି । ଶ୍ବଶୁରଙ୍କୁ ଯୋଗାଯୋଗ କରିବା ସମ୍ଭବ ହୋଇ ପାରିଲା ନାହିଁ ।
ଭୁବନେଶ୍ବର: ହୋଟେଲରେ ଅପରାଧିକ କାର୍ଯ୍ୟକଳାପରେ ଲାଗିବ ରୋକ । ସନ୍ଦିଗ୍ଧଙ୍କ ପ୍ରବେଶ ବା ରହଣୀ ସମ୍ପର୍କରେ ତୁରନ୍ତ ଖବର ପାଇବ କମିଶନରେଟ ପୋଲିସ । ସରାଇ ଆପ୍ ଅଧୀନରେ ଅଣ ସ୍ୱୀକୃତିପ୍ରାପ୍ତ ହୋଟେଲରେ ଚଢ଼ାଉ ।
ଷ୍ଟେସନ, ମାଷ୍ଟରକ୍ୟାଣ୍ଟିନ, କଟକରୋଡ୍, ନୟାପଲ୍ଲୀ ଅଞ୍ଚଳରେ ଚଢ଼ାଉ । ଚନ୍ଦ୍ରଶେଖରପୁର, ଇନ୍ଫୋସିସ୍, ଖାରବେଳନଗର ଅଞ୍ଚଳରେ ବି ଚଢ଼ାଉ ଜାରି ରହିଛି । ଆପ୍ ଅଧୀନରେ ରେଜିଷ୍ଟର କରିନଥିବାରୁ ହୋଟେଲ ମାଲିକଙ୍କୁ ତାଗିଦ କରାଯାଇଛି । ସେଫ୍ ସିଟି ଡ୍ରାଇଭ ଅଧୀନରେ ସହରବାସୀଙ୍କ ସୁରକ୍ଷାକୁ ଗୁରୁତ୍ୱ ଦେଉଛି କମିଶନରେଟ ପୋଲିସ ।
ଭୁବନେଶ୍ବର: ପିଜିଆଇ ରିପୋର୍ଟରେ ଓଡ଼ିଶାର ରାଙ୍କିଂ ହ୍ରାସ ନେଇ ବର୍ଷିଛି ବିଜେଡି । ଓଡ଼ିଶାର ଶିକ୍ଷାକୁ ନେଇ କେନ୍ଦ୍ର ଶିକ୍ଷା ମନ୍ତ୍ରଣାଳୟ ରାଜନୀତି କରୁଛି ବୋଲି ଅଭିଯୋଗ କରିଛନ୍ତି ବିଜେଡି ସାଂସଦ ସସ୍ମିତ ପାତ୍ର । ସବୁ କ୍ଷେତ୍ରରେ ଓଡ଼ିଶା ପୁରସ୍କୃତ ହେଉଥିବାବେଳେ ଶିକ୍ଷାରେ ପଛୁଆ ନେଇ ପ୍ରଶ୍ନ ଉଠାଇଛି ବିଜେଡି । ଓଡ଼ିଶାର ଶିକ୍ଷାକୁ ନିମ୍ନମାନର ଓ ଓଡ଼ିଶାକୁ ବଦନାମ କରିବାକୁ କେନ୍ଦ୍ର ପ୍ରୟାସ କରୁଥିବା ଅଭିଯୋଗ ହୋଇଛି । ଓଡ଼ିଶା ସରକାର ପ୍ରାୟ ୮ ହଜାର ହାଇସ୍କୁଲକୁ ରୂପାନ୍ତରିତ କରୁଛନ୍ତି । ଏହାଦ୍ବାରା ଉଚ୍ଚମାନର ଶିକ୍ଷା ପ୍ରଦାନ କରିଆସୁଛନ୍ତି ରାଜ୍ୟ ସରକାର । ଯେଉଁଥିରେ ଲକ୍ଷ ଲକ୍ଷ ଛାତ୍ରଛାତ୍ରୀ ଉପକୃତ ହେଉଛନ୍ତି ।
ମୋ ସ୍କୁଲ ଅଭିଯାନ ଦେଶରେ ଅତୁଳନୀୟ । ଏଭଳି ସ୍ଥିତିରେ ଶିକ୍ଷା ମନ୍ତ୍ରଣାଳୟର ପିଜିଆଇ ରିପୋର୍ଟରେ ଓଡ଼ିଶାର ରାଙ୍କିଂ ହ୍ରାସ ଘଟିବା ଆଶ୍ଚର୍ଯ୍ୟଜନକ । ଓଡ଼ିଶାର ଶିକ୍ଷା ବ୍ୟବସ୍ଥାକୁ ଖରାପ ଭାବେ ଦର୍ଶାଇବା ଓ ଓଡ଼ିଶାବାସୀଙ୍କୁ ବଦନାମ କରିବାକୁ କେନ୍ଦ୍ର ସୁଚିନ୍ତିତ ପ୍ରୟାସ କରିଥିବା ବିଜେଡି କହିଛି । ଆହୁରି ଆଶ୍ଚର୍ଯ୍ୟ କଥା ହେଉଛି, ଉତ୍କଳ ବିଶ୍ବବିଦ୍ୟାଳୟ, ବ୍ରହ୍ମପୁର ବିଶ୍ବବିଦ୍ୟାଳୟ, ସମ୍ବଲପୁର ବିଶ୍ବ ବିଦ୍ୟାଳୟର ମାତ୍ୟତାରେ ମଧ୍ୟ ହ୍ରାସ ପାଇଛି ।
କେନ୍ଦ୍ର ଶିକ୍ଷା ମନ୍ତ୍ରଣାଳୟ ଓଡ଼ିଶାର ଶିକ୍ଷା ବ୍ୟବସ୍ଥାର ମୂଲ୍ୟାୟନରେ ଏଭଳି ରାଜନୀତି କରିବା ଦୁର୍ଭାଗ୍ୟଜନକ ବୋଲି କହିଛନ୍ତି ସାଂସଦ ସସ୍ମିତ ପାତ୍ର । ପୂର୍ବରୁ ଗ୍ରାମୀଣ, ଗୃହ ନିର୍ମାଣ, ମନରେଗା, ଦକ୍ଷତା ବିକାଶ, କ୍ରୀଡ଼ା ପ୍ରୋତ୍ସାହନ, ବିପର୍ଯ୍ୟ ପରିଚାଳନା, ଏବଂ ଅନ୍ୟାନ୍ୟ କ୍ଷେତ୍ରରେ ଉତ୍କୃଷ୍ଟ ପ୍ରଦର୍ଶନ ପାଇଁ ଓଡ଼ିଶାକୁ କେନ୍ଦ୍ର ସରକାର ପୁରସ୍କୃତ କରିଛନ୍ତି । ପିଜିଆଇରେ ଓଡ଼ିଶାର ସଦ୍ୟତମ ରାଙ୍କକୁ ଗ୍ରହଣ କରାଯିବନି ।
ଜୟପୁର: ରାଜସ୍ଥାନ ରାଜନୀତିରେ କଂଗ୍ରେସ ନେତା ସଚିନ ପାଇଲଟଙ୍କ ହାବଭାବ ବଦଳୁଛି । ଦଳ ଭିତରେ ରହି ମୋ ସହ ଯାହା ବି ହୋଇଛି, ସବୁ କିଛି ଭୁଲିଯାଇଛି ଓ ଲୋକଙ୍କୁ କ୍ଷମା କରିଦେଇଛି । ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ଉପରେ ଥିବା ସମସ୍ତ ବିବାଦକୁ ସେ ଭୁଲିଯାଇଛନ୍ତି ବୋଲି କହିଛନ୍ତି ସଚିନ ପାଇଲଟ । ଏଥିପାଇଁ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ପରାମର୍ଶ ଦେଇଥିଲେ ।
ଆଗକୁ ବିଧାନସଭା ନିର୍ବାଚନ ଆସୁଥିବା ବେଳେ ସମସ୍ତେ ଦାୟିତ୍ବ ନେଲେ ଆଗକୁ ନିର୍ବାଚନ ବୈତରଣୀ ପାର ହୋଇପାରିବା ବୋଲି କହିଛନ୍ତି ସଚିନ ପାଇଲଟ୍ । ରାଜସ୍ଥାନ କଂଗ୍ରେସର ଗୁରୁତ୍ବପୂର୍ଣ୍ଣ ବୈଠକ ପରେ ରାଜ୍ୟ କଂଗ୍ରେସ ବେଶ୍ ଉତ୍ସାହିତ ରହିଛି । ଏଥିସହ ଅଶୋକ ଗେହଲଟଙ୍କୁ ବିଭିନ୍ନ ପ୍ରସଙ୍ଗରେ ଘେରୁଥିବା ସଚିନ ପାଇଲଟ ମଧ୍ୟ ଆଉ କୌଣସି ପ୍ରକାର ବିବାଦ ସୃଷ୍ଟି କରିବେ ନାହିଁ ବୋଲି କହିଛନ୍ତି । ୨୪ ନିର୍ବାଚନ ପୂର୍ବରୁ ରାଜସ୍ଥାନ ନିର୍ବାଚନ ଜିତିବାକୁ ପଡ଼ିବ ବୋଲି ସଚିନ ପାଇଲଟ କହିଛନ୍ତି ।
ଭୁବନେଶ୍ବର: ଓଟିପି ସେୟାରିଂ ନେଇ ପାକିସ୍ତାନ ଲିଙ୍କ ମାମଲାରେ ତନାଘନା । ଭୁବନେଶ୍ବରରେ ମୁମ୍ବାଇର ଆଣ୍ଟି ଟେରରିଷ୍ଟ ସ୍କ୍ବାଡ । ବିଳମ୍ବିତ ରାତିରେ ଭୁବନେଶ୍ବର ପହଞ୍ଚିଲେ ମୁମ୍ବାଇ ଏଟିଏସ୍ । ଆଜି ଏସଟିଏଫ୍ କାର୍ଯ୍ୟାଳୟରେ ଅଭିଯୁକ୍ତ ଅଭିଜିତ ସଞ୍ଜୟ ଜାମ୍ବୁରେକୁ ଜେରା କରିବ ମୁମ୍ବାଇ ଏଟିଏସ୍ । ଜେରା ପରେ ଖୋଲିପାରେ ପାକିସ୍ତାନ ଆଇଏସଆଇ ଏଜେଣ୍ଟଙ୍କ ସହ ଆର୍ଥିକ କାରବାର ଲିଙ୍କ୍ ।
୪ ଦିନିଆ ରିମାଣ୍ଡରେ ମୁମ୍ବାଇର ଅଭିଜିତ ସଞ୍ଜୟ ଜାମ୍ବୁରେ । ରିମାଣ୍ଡରେ ଅଭିଜିତ ସଂଜୟକୁ ମାରାଥନ ଜେରା କରୁଛି ଏସଟିଏଫ । ଅଭିଜିତ ଜରିଆରେ ହେଉଥିଲା ଆଇଏସଆଇ ଫଣ୍ଡିଂ । ଓଡ଼ିଶାର ପଠାଣି, ପ୍ରୀତମଙ୍କ ସମେତ ୪ ଅଭିଯୁକ୍ତ ପାଖକୁ ଆସିଥିଲା ଟଙ୍କା । ଓଡ଼ିଶାର ସିମକାର୍ଡ ପାକିସ୍ତାନରେ ହେଉଥିଲା ଅପରେଟ । ୨୦୧୮ ଠାରୁ ପାକିସ୍ତାନ ଏଜେଣ୍ଟଙ୍କ ସହ ଯୋଗାଯୋଗରେ ଥିଲା ଅଭିଜିତ ।
ପାକିସ୍ତାନର ଇଣ୍ଟେଲିଜେନ୍ସ ଆର୍ମି ଅଫିସର ସହ କଥା ହୋଇଥିଲା ଅଭିଜିତ । ଅଭିଜିତକୁ ମିଶାଇ ମୋଟ ୫ ଜଣଙ୍କୁ ଗିରଫ କରିଛି ଏସଟିଏଫ ।
