ନନ୍ଦିଘୋଷ ବ୍ୟୁରୋ: ଅନ୍ଧବିଶ୍ୱାସର କରୁଣ ପରିଣତି! ଗୁଣିଗାରେଡି ସନ୍ଦେହରେ ଜଣେ ୩ ବର୍ଷର ନିଷ୍ପାପ ଶିଶୁକୁ ହତ୍ୟା କରାଯାଇଥିବା ଘଟଣା ଉତ୍ତରପ୍ରଦେଶର ବୁଲନ୍ଦସହରରେ ଚାଞ୍ଚଲ୍ୟ ସୃଷ୍ଟି କରିଛି। ନଗର କୋତୱାଲି ଥାନା ଅନ୍ତର୍ଗତ ଅବନ୍ତି ନଗରର ଭୁଦ୍ ମୋହଲ୍ଲାରେ ଘଟିଛି ଏହି ଅଭାବନୀୟ ଘଟଣା। ନଭେମ୍ବର ୨୧ ତାରିଖ ଅପରାହ୍ନରୁ ନିଖୋଜ ଥିବା ଶିଶୁକନ୍ୟାର ମୃତଦେହ ଘରଠାରୁ ମାତ୍ର ୪୦ ମିଟର ଦୂରରେ ଥିବା ଏକ ଭଡ଼ା ଘରୁ ଉଦ୍ଧାର କରାଯାଇଛି। ଘଟଣାରେ ସନ୍ଦେହ ଆଧାରରେ ପଡ଼ୋଶୀ ମହିଳା ସୋନାଲିଙ୍କୁ ପୋଲିସ ହେପାଜତକୁ ନେଇ ପଚରାଉଚରା କରୁଛି।
ଘରୁ ନିଖୋଜ ହେବାର କିଛି ସମୟ ପରେ ମିଳିଲା ମୃତଦେହ
ସୂଚନା ଅନୁଯାୟୀ, ନଭେମ୍ବର ୨୧ ତାରିଖ ଅପରାହ୍ନରେ ତିନି ବର୍ଷର ଶିଶୁକନ୍ୟାଟି ହଠାତ୍ ଘରୁ ନିଖୋଜ ହୋଇଯାଇଥିଲା। ପରିବାର ଲୋକେ ଆଖପାଖ ଅଞ୍ଚଳରେ ବହୁ ଖୋଜାଖୋଜି କରିଥିଲେ। କିନ୍ତୁ ତା’ର କୌଣସି ପତ୍ତା ନମିଳିବାରୁ ନଗର କୋତୱାଲି ପୋଲିସକୁ ଖବର ଦେଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଆଖପାଖ ଅଞ୍ଚଳର ସିସିଟିଭି ଫୁଟେଜ୍ ଯାଞ୍ଚ କରିଥିଲା। ଫୁଟେଜ୍ରୁ ଶିଶୁଟି ଅଧିକ ଦୂରକୁ ଯାଇନଥିବା ଜଣାପଡ଼ିବା ପରେ ଆଖପାଖ ଘରଗୁଡ଼ିକରେ ଖୋଜାଖୋଜି ଆରମ୍ଭ ହୋଇଥିଲା। ଏହି ସମୟରେ ରୋହତାଶ ରାଜପୁତଙ୍କ ଘରେ ଭଡ଼ାରେ ରହୁଥିବା ସୋନାଲିଙ୍କ କୋଠରିରୁ ଶିଶୁକନ୍ୟାର ମୃତଦେହ ମିଳିଥିଲା।
ଗୁଣିଗାରେଡି ସନ୍ଦେହ, ରାସ୍ତା ଅବରୋଧ କଲେ ଉତ୍ତ୍ୟକ୍ତ ଲୋକେ
ଶିଶୁକନ୍ୟାର ମୃତଦେହ ମିଳିବା ପରେ ପରିବାର ଲୋକଙ୍କ ସମେତ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ଉତ୍ତ୍ୟକ୍ତ ଲୋକେ ଦିଲ୍ଲୀ ରାସ୍ତା ଅବରୋଧ କରି ପ୍ରତିବାଦ କରିଥିଲେ। ପରିସ୍ଥିତିକୁ ଦୃଷ୍ଟିରେ ରଖି ଘଟଣାସ୍ଥଳରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଥିଲା। ଖବର ପାଇ ବୁଲନ୍ଦସହରର ବରିଷ୍ଠ ପୋଲିସ ଅଧୀକ୍ଷକ (SSP) ଦିନେଶ କୁମାର ସିଂହ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ। ତାଙ୍କ କହିବା ଅନୁଯାୟୀ, ପ୍ରାଥମିକ ତଦନ୍ତରେ ଘଟଣାସ୍ଥଳର ପରିସ୍ଥିତିରୁ ଗୁଣିଗାରେଡି ସହ ଜଡ଼ିତ ହତ୍ୟାର ସନ୍ଦେହ ହେଉଛି। ତେବେ ହତ୍ୟାର ପ୍ରକୃତ କାରଣ ତଦନ୍ତ ପରେ ସ୍ପଷ୍ଟ ହେବ।
ପୋଷ୍ଟମର୍ଟମ ରିପୋର୍ଟକୁ ଅପେକ୍ଷା, ତଦନ୍ତ ଜାରି
ପୋଲିସ ଶିଶୁକନ୍ୟାର ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଅନ୍ୟପଟେ ହେପାଜତରେ ଥିବା ମହିଳା ସୋନାଲିଙ୍କୁ ଘନଘନ ଜେରା କରାଯାଉଛି। ମାମଲାର ସମ୍ବେଦନଶୀଳତାକୁ ଦେଖି ବିଭିନ୍ନ ଥାନାର ପୋଲିସ ଏବଂ ପ୍ରାୟ ଅଧ ଡଜନ୍ ଡିଏସ୍ପିଙ୍କ ନେତୃତ୍ୱରେ ଅତିରିକ୍ତ ଫୋର୍ସ ମୁତୟନ କରାଯାଇଛି। ଏହି ନିର୍ମମ ଘଟଣା ସମଗ୍ର ଅଞ୍ଚଳକୁ ସ୍ତବ୍ଧ କରିଦେଇଥିବା ବେଳେ ନିଷ୍ପାପ ଶିଶୁର ମୃତ୍ୟୁକୁ ନେଇ ସବୁଠି ଶୋକ ଓ ଆକ୍ରୋଶ ପ୍ରକାଶ ପାଇଛି। ତଦନ୍ତ ଓ ପୋଷ୍ଟମର୍ଟମ ରିପୋର୍ଟ ପରେ ହତ୍ୟା ପଛର ପ୍ରକୃତ କାରଣ ଜଣାପଡିବ ।

