ମୁମ୍ବାଇ: ମହାରାଷ୍ଟ୍ର ରାଜନୀତିରେ ବଡ଼ ହଲଚଲ୍ । ଏନସିପିରେ ଫାଟ୍ । ରାଜଭବନ ପହଞ୍ଚିଲେ ଏନସିପି ନେତା ଅଜିତ୍ ପାଓ୍ବାର । ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଓ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାବିସ୍ ମଧ୍ୟ ରାଜଭବନରେ ପହଞ୍ଚିଲେ । ଅଜିତ୍ ପାଓ୍ୱାର ୨୯ ବିଧାୟକଙ୍କ ସହ ସରକାରରେ ହୋଇପାରନ୍ତି ସାମିଲ । ବିରୋଧୀ ଦଳ ପଦ ଛାଡି ଉପମୁଖ୍ୟମନ୍ତ୍ରୀ ହୋଇପାରନ୍ତି ଅଜିତ୍ । ଅଜିତ ପାଓ୍ୱାର ସରକାରରେ ସାମିଲ ହେବା ପରେ ତାଙ୍କୁ ଉପମୁଖ୍ୟମନ୍ତ୍ରୀ ପଦ ମିଳିବା ନେଇ ଜୋରଦାର ଚର୍ଚ୍ଚା ହେଉଛି । ଏନସିପି ପୁର୍ନଗଠନ ନେଇ ଖୁସିନଥିଲେ ଅଜିତ ପାଓ୍ୱାର । ସେହିପରି ଏନସିପି ବିଧାୟକ ଛଗନ ଭୁଜବଳ, ଧନଞ୍ଜୟ ମୁଣ୍ଡେ, ଦିଲୀପ ବାଲସେ ପାଟିଲ ଓ ଅନିଲ ପାଟିଲ ମନ୍ତ୍ରୀ ହେବା ନେଇ ଚର୍ଚ୍ଚା ହେଉଛି । ଏକଦା ଏହି ୫ ଜଣ ନେତା ଏନସିପି ସୁପ୍ରିମୋ ଶରଦ ପାଓ୍ୱାରଙ୍କ ଘନିଷ୍ଠ ଥିଲେ । କିନ୍ତୁ ଆଜି ଏହି ୫ ନେତାଙ୍କ ସହ ମୋଟ ୨୯ ବିଧାୟକ ସିନ୍ଧେଙ୍କ ସରକାରରେ ସାମିଲ ହେବେ । ମନ୍ତ୍ରୀମଣ୍ଡଳ ଅଦଳବଦଳ ନେଇ ମହାରାଷ୍ଟ୍ର ରାଜଭବନରେ ଶପଥ ଗ୍ରହଣ ପାଇଁ ହେଉଛି ଜୋରଦାର ପ୍ରସ୍ତୁତି ।
ସମାନ ନାଗରିକ ସଂହିତା ସମର୍ଥନରେ ମାୟାବତୀ
ଲକ୍ଷ୍ନୌ: ଆମ୍ ଆଦମୀ ପାର୍ଟି ପରେ ୟୁନିଫର୍ମ ସିଭିଲ୍ କୋଡ୍ ଉପରେ ନିଜର ଆଭିମୁଖ୍ୟ ସ୍ପଷ୍ଟ କରିଛି ବହୁଜନ ସମାଜ ପାର୍ଟି । ଏକ ବଡ଼ ବିବୃତ୍ତି ଦେଇ ବିଏସପି ମୁଖ୍ୟ ମାୟାବତୀ ଆଜି କହିଛନ୍ତି ଯେ ତାଙ୍କ ଦଳ ୟୁନିଫର୍ମ ସିଭିଲ କୋଡ୍ ବିରୋଧରେ ନୁହେଁ । କିନ୍ତୁ ୟୁସିସି ସହ ଜଡ଼ିତ ସମସ୍ତ ଦିଗକୁ ବିଜେପି ବିଚାର କରିବା ଉଚିତ୍ । ଆମ ଦଳ ୟୁସିସିର କାର୍ଯ୍ୟକାରିତା ବିରୋଧରେ ନୁହେଁ । ୟୁସିସି କାର୍ଯ୍ୟକାରୀ କରିବାରେ ବିଜେପି ମଡେଲ ଉପରେ ଆମର ମତଭେଦ ରହିଛି । ୟୁସିସି ସହ ଜଡିତ ସମସ୍ତ ଦିଗକୁ ବିଜେପି ବିଚାର କରିବା ଉଚିତ୍। ଆମ ଦଳ UCC ର କାର୍ଯ୍ୟକାରିତା ବିରୁଦ୍ଧରେ ନୁହେଁ | ୟୁସିସି କାର୍ଯ୍ୟକାରୀ କରିବାର ବିଜେପି ମଡେଲ ଉପରେ ଆମର ମତଭେଦ ରହିଛି। ୟୁସିସି ମାଧ୍ୟମରେ ସଂକୀର୍ଣ୍ଣ ମାନସିକ ରାଜନୀତି କରିବାକୁ ବିଜେପି ଚେଷ୍ଟା କରୁଛି ବୋଲି କହିଛନ୍ତି ମାୟାବତୀ ।
ଯଦି ବିଜେପି ଏହାକୁ ରାଜନୈତିକ ଏଜେଣ୍ଡାଠାରୁ ଉପରକୁ ଉଠାଏ ତେବେ ଆମେ ଏହାକୁ ସମର୍ଥନ କରିବୁ, ନଚେତ୍ ଆମେ ଏହାକୁ ବିରୋଧ କରିବୁ ବୋଲି କହିଛନ୍ତି ମାୟାବତୀ । ୟୁସିସିକୁ ଆଲୋଚନାର ବିଷୟ କରି ସରକାର ଧ୍ୟାନ ଆକର୍ଷଣ କରିବାକୁ ରାଜନୀତି କରୁଛନ୍ତି । ୟୁସିସି ବିଷୟରେ ପୂର୍ବରୁ ମଧ୍ୟ ସମ୍ବିଧାନରେ ଉଲ୍ଲେଖ ରହିଛି । ସେ ଆହୁରି ମଧ୍ୟ କହିଛନ୍ତି ଯେ ଭାରତ ଦେଶରେ ବହୁ ଜନସଂଖ୍ୟା ବିଶିଷ୍ଟ ଦେଶ । ଏଠାରେ ହିନ୍ଦୁ, ମୁସଲମାନ, ଶିଖ୍, ଖ୍ରୀଷ୍ଟିଆନ, ପାର୍ସି, ବୈଦ୍ଧ ଧର୍ମ ଅନୁସରଣ କରନ୍ତି। ସେମାନଙ୍କର ଖାଇବା, ଜୀବନଯାପନ ଏବଂ ଜୀବନଶୈଳୀ ଏବଂ ରୀତିନୀତି ଅନୁଯାୟୀ ସେମାନଙ୍କର ନିଜସ୍ୱ ପଦ୍ଧତି ଅଛି । ଏହାକୁ ଅଣଦେଖା କରାଯାଇପାରିବ ନାହିଁ ବୋଲି କହିଛନ୍ତି ବିଏସପି ମୁଖ୍ୟ ମାୟାବତୀ ।
ଉଗ୍ର ହିଂସାରେ ଜଳୁଛି ଫ୍ରାନ୍ସ, ୫ ଦିନ ଧରି ସାରାଦେଶରେ ପୋଡ଼ାଜଳା
ପ୍ୟାରିସ୍: ଉଗ୍ର ହିଂସାରେ ଜଳୁଛି ଫ୍ରାନ୍ସ । ପୋଲିସ ଗୁଳିରେ ନାବାଳଙ୍କ ମୃତ୍ୟୁ ପରେ ରକ୍ତାକ୍ତ ହୋଇଛି ରୋମାଣ୍ଟିକ ସହର । ୫ ଦିନ ଧରି ସାରାଦେଶରେ ନିଆଁ ଜଳୁଥିବା ବେଳେ ସ୍ଥିତି ନିୟନ୍ତ୍ରଣ ପାଇଁ ୫୦ ହଜାର ସୈନ୍ୟ ଓ ପୋଲିସ କର୍ମୀ ମୁତୟନ କରାଯାଇଛି । ଗତକାଲି ରାତିରେ ୪୨୭ ଜଣ ବିକ୍ଷୋଭକାରୀଙ୍କୁ ଗିରଫ କରାଯାଇଛି । ଏବେସୁଦ୍ଧା ପ୍ରାୟ ୩ ହଜାର ଲୋକଙ୍କୁ ହେପାଜତକୁ ନେଇଛି ପୋଲିସ । ପ୍ୟାରିସ ମେୟରଙ୍କ ଘର ଆଗରେ ରଖାଯାଇଥିବା କାରରେ ନିଆଁ ଲଗାଇ ଦେଇଛନ୍ତି ବିକ୍ଷୋଭକାରୀ । ଗତ ୫ ଦିନ ମଧ୍ୟରେ ୨ ହଜାରରୁ ଅଧିକ ଗାଡ଼ି ପୋଡ଼ି ଦିଆଯାଇଛି । ଦଙ୍ଗାକାରୀଙ୍କୁ ରୋକିବାକୁ ପୋଲିସ ଲୁହ ବୁହା ଗ୍ୟାସ ଓ ଓ୍ବାଟର କ୍ୟାନନ ମାଡ଼ କରିଛି । ପୋଲିସ ଗୁଳିରେ ମୃତ ନାବାଳଙ୍କର ଆଜି ଶେଷକୃତ୍ୟ କରାଯାଇଥିବା ବେଳେ ଶ୍ମଶାନରେ ହଜାର ହଜାର ଲୋକଙ୍କ ଭିଡ଼ ଜମିଛି ।
ପୋଲିସ ଗୁଳିରେ ନାବାଳଙ୍କ ମୃତ୍ୟୁର ୨୪ ଘଣ୍ଟା ଭିତରେ ହିଁ ହିଂସାତ୍ମକ ପ୍ରଦର୍ଶନ ଆରମ୍ଭ ହୋଇଥିଲା । ସ୍ଥିତି ନିୟନ୍ତ୍ରଣ ପାଇଁ ସଶସ୍ତ୍ର ଯାନ, ହେଲିକପ୍ଟର ଏବଂ ୪୫,୦୦୦ ପୋଲିସ କର୍ମଚାରୀଙ୍କୁ ପ୍ୟାରିସ, ଲ୍ୟେ ଏବଂ ମାର୍ସିଲରେ ନିୟୋଜିତ କରାଯାଇଛି । ଫ୍ରାନ୍ସରେ ଚାଲିଥିବା ହିଂସାତ୍ମକ ବିରୋଧ ବିଦେଶର ଚିନ୍ତା ବଢାଇ ଦେଇଛି। ଆଗାମୀ ଶୀତଋତୁରେ ଫ୍ରାନ୍ସ ରଗବୀ ବିଶ୍ୱକପ୍ ଏବଂ ୨୦୨୪ର ଗ୍ରୀଷ୍ମ ସମୟରେ ପ୍ୟାରିସ୍ ଅଲିମ୍ପିକ୍ ଗେମ୍ ଆୟୋଜନ କରୁଛି। ଯଦି ବିରୋଧ ଦୀର୍ଘ ସମୟ ଧରି ଚାଲେ ତେବେ ଅନ୍ତରାଷ୍ଟ୍ରୀୟସ୍ତରରେ ଫ୍ରାନ୍ସ ସରକାରଙ୍କୁ ଅପଦସ୍ଥ ହେବାକୁ ପଡ଼ିପାରେ । ହିଂସାତ୍ମକ ପ୍ରଦର୍ଶନକୁ ଦୃଷ୍ଟିରେ ରଖି ବ୍ରିଟେନ ଏବଂ ଅନ୍ୟ ୟୁରୋପୀୟ ଦେଶମାନେ ନାଗରିକ ତଥା ପର୍ଯ୍ୟଟକଙ୍କୁ ହିଂସା ପ୍ରଭାବିତ ଅଞ୍ଚଳକୁ ନଯିବାକୁ ନିର୍ଦ୍ଦେଶ ଦେଇଛନ୍ତି ।
ଗ୍ୟାଙ୍ଗଷ୍ଟରଙ୍କୁ କଳାପାଣି ସଜା, ଆଣ୍ଡାମାନ ସିଫ୍ଟ ହେବେ ଦୁର୍ଦ୍ଦାନ୍ତ ଅପରାଧୀ
ନୂଆଦିଲ୍ଲୀ: ଗ୍ୟାଙ୍ଗଷ୍ଟରଙ୍କୁ କଳାପାଣି ସଜା । ଆଣ୍ଡାମାନ ସିଫ୍ଟ ହେବେ ଦୁର୍ଦ୍ଦାନ୍ତ ଅପରାଧୀ । ଏନେଇ କେନ୍ଦ୍ର ଗୃହ ମନ୍ତ୍ରଣାଳୟକୁ ଚିଠି ଲେଖିଛି NIA । ଉତ୍ତର ଭାରତର ବିଭିନ୍ନ ଜିଲ୍ଲାରେ କଏଦ ଥିବା ୧୦ରୁ ୧୨ ଅପରାଧୀଙ୍କୁ ଆଣ୍ଡାମାନ-ନିକୋବର ଦ୍ବୀପକୁ ସ୍ଥାନାନ୍ତର କରାଯିବ । କିଛି ଗ୍ୟାଙ୍ଗଷ୍ଟରଙ୍କୁ ଆସାମ ଡିବ୍ରୁଗଡ଼ ଜେଲ ପଠାଇବାକୁ ମଧ୍ୟ ଯୋଜନା କରୁଛି କେନ୍ଦ୍ରୀୟ ତଦନ୍ତକାରୀ ସଂସ୍ଥା ।
ଗୃହ ମନ୍ତ୍ରଣାଳୟ ଅଧିକାରୀ ଓ NIA ଟିମ୍ ମଧ୍ୟରେ ଏନେଇ ଦୀର୍ଘ ଘଣ୍ଟା ଧରି ଆଲୋଚନା ହୋଇଛି । ଦିଲ୍ଲୀ, ପଞ୍ଜାବ ଓ ହରିଆଣାର ବିଭିନ୍ନ ଜେଲରେ ବନ୍ଦୀ ଥିବା ଗ୍ୟାଙ୍ଗଷ୍ଟର ଜେଲ ଭିତରେ ରହି ମଧ୍ୟ କ୍ରାଇମ ସିଣ୍ଡିକେଟ ଚଳାଇଥିବାରୁ ସେମାନଙ୍କୁ କଳାପାଣି ସଜା କାଟିବାକୁ ପଠାଇବାକୁ ଯୋଜନା କରୁଛି NIA ।
ଋଣ ଭାର ସହି ନପାରି ଦମ୍ପତିଙ୍କ ଆତ୍ମହତ୍ୟା
ଖୋର୍ଦ୍ଧା: ଋଣ ଭାର ସହି ନପାରି ଦମ୍ପତିଙ୍କ ଆତ୍ମହତ୍ୟା ଅଭିଯୋଗ । ଋଣ ଶୁଝିବା ପାଇଁ ଘରୋଇ ଫାଇନାନ୍ସ କମ୍ପାନି ଚାପ ପକାଇବା ଫଳରେ ବୃଦ୍ଧ ଦମ୍ପତି ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଋଣ ଶୁଝି ନପାରି ଘରେ ରଶି ଲଗାଇ ଝୁଲି ପଡ଼ିଛନ୍ତି ସ୍ବାମୀ- ସ୍ତ୍ରୀ । ପୁରୀ ଜିଲ୍ଲା କଣାସ ବ୍ଲକ ଅଁଳାଯୋଡ଼ି ଉପରସାହି ଗାଁରେ ଏଭଳି ଘଟଣା ଘଟିଛି । ମୃତ ଦମ୍ପତି ହେଲେ ୫୮ ବର୍ଷୀୟ ବାନାମ୍ବର ବେହେରା ଓ ୫୩ ବର୍ଷୀୟା ବନିତା ବେହେରା ।
ଗତ ରାତିରେ ଫାଇନାନ୍ସ କମ୍ପାନୀର କର୍ମଚାରୀମାନେ କିସ୍ତି ଟଙ୍କା ପାଇଁ ତାଙ୍କ ଘରେ ପହଞ୍ଚିଥିଲେ । ବିଳମ୍ବିତ ରାତି ଯାଏ ପାଇଁ ଘରେ ବସି ରହିଥିଲେ । ଏବେ ଟଙ୍କା ନଥିବା ବୃଦ୍ଧ ଦମ୍ପତିଙ୍କ ଜଣାଇବା ପରେ ମଧ୍ୟ କର୍ମଚାରୀମାନେ ଯାଇ ନ ଥିଲେ । ଧମକ ଚମକ ଦେଇଥିବା ଅଭିଯୋଗ ହୋଇଛି । ଏହା ପରେ ଘର ଭିତରେ ସ୍ବାମୀ-ସ୍ତ୍ରୀ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଦମ୍ପତିଙ୍କ ମୃତଦେହ ବ୍ୟବଚ୍ଛେଦ ପାଇଁ ଖୋର୍ଦ୍ଧା ମେଡିକାଲ ପଠାଯାଇଛି ।
ବିପଦରେ ଗଜରାଜ, ଯଶିପୁର ଜାମୁକେଶର ନିକଟରୁ ହାତୀଦାନ୍ତ ଜବତ
ମୟୂରଭଞ୍ଜ: ଅସୁରକ୍ଷିତ ଶିମିଳିପାଳ । ପୁଣି ହାତୀ ଦାନ୍ତ ଜବତ, ୫ ଗିରଫ । ଯଶିପୁର ଜାମୁକେଶର ନିକଟରୁ ୫ ଜଣ ହାତୀଦାନ୍ତ ତସ୍କରୀଙ୍କୁ ଗିରଫ କରିଛି ବନ ବିଭାଗ । ଡିଲ୍ ପାଇଁ ଯୋଜନା ଚାଲିଥିବା ବେଳେ କୌଣସି ସୂତ୍ରରୁ ଖବର ଚଢ଼ାଉ କରିଥିଲା ବନବିଭାଗ। ଚଢ଼ାଉରେ ନର୍ଥ ଜୋନ, ସାଉଥ ଜୋନ ଏବଂ ରାଇରଙ୍ଗପୁର ଡିଭିଜନର ଅଧିକାରୀ ସାମିଲ ଥିଲେ । କେବେ ଶିକାରୀଙ୍କ ଶିକାର ହେଉଛନ୍ତି ବନ୍ୟଜନ୍ତୁ ତ କେବେ ଶିକାରୀକୁ ରୋକିବା ପାଇଁ ଯାଇ ବନ ବିଭାଗ ବାରମ୍ଵାର ମୁହାଁମୁହିଁ ହେଉଛନ୍ତି । ଆମନା ସାମ୍ନା ହେଲେ ଗୁଳି ଫୁଟାଇବାକୁ ବି ପଛାଉ ନାହାଁନ୍ତି ଶିକାରୀ। ଏଭଳି ସ୍ଥିତିରେ ଶିମିଳିପାଳର ସୁରକ୍ଷା ନେଇ ଚିନ୍ତା ଘାରିଛି ।
ସମ୍ବଲପୁର ଗସ୍ତରେ ବିଜେଡି ସାଙ୍ଗଠନିକ ସମ୍ପାଦକ, ବିଶାଳ ରାଲିରେ ପାଛୋଟି ନେଲେ ନେତା ଓ କର୍ମୀ
ସମ୍ବଲପୁର: ସମ୍ବଲପୁର ଗସ୍ତରେ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ସମ୍ବଲପୁର ଜିଲ୍ଲା ପର୍ଯ୍ୟବେକ୍ଷକ ଭାବେ ଦାୟିତ୍ବ ନେଲା ପରେ ସମ୍ବଲପୁର ଗସ୍ତ କରିଛନ୍ତି ପ୍ରଣବ ପ୍ରକାଶ ଦାସ । ରେଢ଼ାଖୋଲରେ ତାଙ୍କୁ ଭବ୍ୟ ସ୍ବାଗତ କରାଯାଇଛି । ପରେ ଯୁଯୁମରାରେ ଏକ ବିଶାଳ ବାଇକ ରାଲିରେ ସମ୍ବଲପୁର ଗସ୍ତ କରିଛନ୍ତି ପ୍ରଣବ ପ୍ରକାଶ ଦାସ । ସାଙ୍ଗରେ ପୂର୍ବତନ ମନ୍ତ୍ରୀ ସୁଶାନ୍ତ ସିଂହ, ସମ୍ବଲପୁର ଜିଲ୍ଲା ବିଜେଡି ସଭାପତି ସିଦ୍ଧାର୍ଥ ଦାସ, ପୂର୍ବତନ ମନ୍ତ୍ରୀ ରୋହିତ ପୂଜାରୀଙ୍କ ସହ ହଜାର ହଜାର ସଂଖ୍ୟାରେ କର୍ମୀ ସାମିଲ ହୋଇଛନ୍ତି ।
ସ୍ୱଳ୍ପ ଦୂରଗାମୀ କ୍ଷେପଣାସ୍ତ୍ର ’ସାଗରିକା’ର ସଫଳ ପରୀକ୍ଷଣ
ବାଲେଶ୍ୱର: ସ୍ୱଳ୍ପ ଦୂରଗାମୀ କ୍ଷେପଣାସ୍ତ୍ର ସାଗରିକାର ସଫଳ ପରୀକ୍ଷଣ । ଶନିବାର ଧାମରାର ଅବଦୁଲ କଲାମ ଦ୍ୱୀପରୁ ସନ୍ଧ୍ୟା ୬ଟା ୫୫ରେ ୪ ନମ୍ବର ଲଞ୍ଚ ପ୍ୟାଡରୁ ଏହି ପରୀକ୍ଷଣ କରାଯାଇଥିଲା । ଏହାର ଲକ୍ଷ୍ୟଭେଦ କ୍ଷମତା ୭୫୦ କିମି ରହିଛି । ଏହି ବାଲାଷ୍ଟିକ୍ ମିସାଇଲ ପରୀକ୍ଷଣ ସମୟରେ ଡିଆରଡିଓ, ଭାରତୀୟ ନୌସେନାର ବହୁ ଉଚ୍ଚପଦସ୍ଥ ଅଧିକାରୀ ଉପସ୍ଥିତ ଥିଲେ । ପରୀକ୍ଷଣ ପରେ ଭାରତ ପ୍ରତିରକ୍ଷା କ୍ଷେତ୍ରରେ ଅଧିକ ଶକ୍ତିଶାଳୀ ହେବ ବୋଲି ଡିଆରଡିଓ ପକ୍ଷରୁ କୁହାଯାଇଛି । ପୂର୍ବରୁ ଏହି କ୍ଷେପଣାସ୍ତ୍ର ସାଗରିକାକୁ ପ୍ରତିରକ୍ଷା ବିଭାଗ ନୌସେନାରୁ ବ୍ୟବହାର କରାଯାଇଥିଲା ।
ଉପର ମୁଣ୍ଡରେ ବର୍ଷା ଯୋଗୁଁ ହୀରାକୁଦରେ ବଢ଼ୁଛି ବନ୍ୟାଜଳ
ସମ୍ବଲପୁର: ଉପର ମୁଣ୍ଡରେ ବର୍ଷା ଯୋଗୁଁ ହୀରାକୁଦ ଜଳ ଭଣ୍ଡାରକୁ ଆହୁରି ବଢ଼ୁଛି ବନ୍ୟାଜଳ ପ୍ରବେଶ ମାତ୍ରା । କଲମାର ସମସ୍ତ ଗେଟ୍ ଖୋଲାଥିବାବେଳେ ହୀରାକୁଦ ଡ୍ୟାମ୍ ଭିତରକୁ ପ୍ରତି ସେକେଣ୍ଡରେ ୯୨ ହଜାର ୫୭୩ ଘନଫୁଟ ବନ୍ୟାଜଳ ପ୍ରବେଶ କରୁଛି । ୩୫ ହଜାର ୧୫୯ ଘନଫୁଟ ଜଳ ବିଭିନ୍ନ କେନାଲ ଦେଇ ନିଷ୍କାସିତ ହେଉଛି । ସେପଟେ ୬୦୬.୪୧ ଫୁଟରେ ପହଞ୍ଚିଲାଣି ହୀରାକୁଦ ଡ୍ୟାମର ଜଳସ୍ତର ।
ଆସୁଛି ଲଘୁଚାପ, ଆସନ୍ତାକାଲିଠୁ ଆରମ୍ଭ ହେବ ବର୍ଷା
ଭୁବନେଶ୍ୱର: ଆସୁଛି ଲଘୁଚାପ । ଆସନ୍ତାକାଲିଠୁ ଆରମ୍ଭ ହେବ ବର୍ଷା । ଆସନ୍ତା ୪ ତାରିଖରୁ ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି । ଦକ୍ଷିଣ ଓଡ଼ିଶା ଓ ଉତ୍ତର ଓଡ଼ିଶା ଉପକୂଳରେ ସୃଷ୍ଟି ହୋଇପାରେ ଲଘୁଚାପ । ଏହାର ପ୍ରଭାବରେ ଆସନ୍ତାକାଲିଠୁ ୬ ତାରିଖରେ ଯାଏ ରାଜ୍ୟରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଏନେଇ ପୂର୍ବାନୁମାନ କରିଛି ପାଣିପାଗ ବିଭାଗ ।
ଆଜି ଭଦ୍ରକ, ବାଲେଶ୍ୱର, ଯାଜପୁର, କେନ୍ଦ୍ରାପଡା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, ଗଜପତି, ମୟୂରଭଞ୍ଜ, କେନ୍ଦୁଝର, ଢେଙ୍କାନାଳ ଆଦି ଜିଲ୍ଲାରେ ଆଜି ଘଡ଼ଘଡ଼ି ସହ ବର୍ଷା ହେବାର ସମ୍ଭାବନା ରହିଛ । କାଲିଠୁ ଉପକୂଳ ସମେତ ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ହେବ ବୋଲି ଆକଳନ କରାଯାଇଛି । ବର୍ଷା ସହ ପାଗରେ ଆସିବ ପରିବର୍ତ୍ତନ । ଦକ୍ଷିଣ-ପଶ୍ଚିମ ମୌସୁମୀ ବାୟୁରୁ ଦୁର୍ବଳ ପ୍ରବାହ ଯୋଗୁ ରାଜ୍ୟରେ କିଛି ଦିନ ହେବ ବର୍ଷାର ମାତ୍ରା କମ୍ ରହିଥିବା ବେଳେ ତାପମାତ୍ରାରେ ବି ବୃଦ୍ଧି ଘଟିଛି ।