ସମ୍ବଲପୁର: ଅନାଥଙ୍କୁ ମିଳିଲା ମା’ଙ୍କ ପରିଚୟ । ଖୁସି ମୁହଁରେ ହସ ଫୁଟାଇବେ ଫିନଲାଣ୍ଡ ମହିଳା । ସମ୍ବଲପୁର ଶିଶୁ ଯତ୍ନ ଅନୁଷ୍ଠାନର ଶିଶୁ କନ୍ୟା ଖୁସିକୁ ଆପଣାଇଛନ୍ତି ଫିନଲାଣ୍ଡ ମହିଳା ଲୌରା ଏଲେନା | ଅନ୍ତର୍ଦେଶୀୟ ପୋଷ୍ୟ ନିୟମ ଅନୁସାରେ ଆଜି ଖୁସିକୁ ତାର ନୂତନ ମା’ଙ୍କୁ ହସ୍ତାନ୍ତର କରାଯାଇଛି | ଶିଶୁକୁ କୋଳେଇ ନେଇ ଫିନଲାଣ୍ଡ ମହିଳା ଅତ୍ୟନ୍ତ ଆନନ୍ଦିତ ହୋଇଛନ୍ତି | ଆରଡିସି ଡ଼. ସୁରେଶ ଚନ୍ଦ୍ର ଦଳେଇ ଏବଂ ଜିଲ୍ଲାପାଳ ଅନନ୍ୟା ଦାସ ଶିଶୁର ନୂତନ ମା ସହିତ ଆଲୋଚନା କରି ଶିଶୁ କନ୍ୟାର ଉଜ୍ଜଳ ଭବିଷ୍ୟତ କାମନା କରିଛନ୍ତି | ଅନ୍ୟ ମାନଙ୍କ ମଧ୍ୟରେ ଅତିରିକ୍ତ ଜିଲ୍ଲାପାଳ ଉମାକାନ୍ତ ରାଜ, ଡେପୁଟି କଲେକ୍ଟର ମିତାଲି ମଧୁସ୍ମିତା ଦଳେଇ, ଲୋପାମୁଦ୍ରା କାଲୋ, ଜିଲ୍ଲା ଶିଶୁ ସୁରକ୍ଷା ଅଧିକାରୀ ଶୁଚିସ୍ମିତା ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ ।
ଦେବଦୂତ ସାଜିଲେ ୧୦୮ ଆମ୍ବୁଲାନ୍ସ କର୍ମଚାରୀ, କ୍ୟାନ୍ସର ରୋଗୀଙ୍କୁ ୧ କିଲୋମିଟର ଷ୍ଟ୍ରେଚରରେ ବୋହିଲେ
ବାଲେଶ୍ୱର: କ୍ୟାନ୍ସର ରୋଗୀଙ୍କ ପାଇଁ ପୁଣି ଦେବଦୂତ ସାଜିଲେ ୧୦୮ ଆମ୍ବୁଲାନ୍ସ କର୍ମଚାରୀ । କ୍ୟାନ୍ସର ରୋଗୀଙ୍କୁ ୧ କିଲୋମିଟର ଷ୍ଟ୍ରେଚରରେ ବୋହି ଆଣିଲେ ୧୦୮ ଆମ୍ବୁଲାନ୍ସ କର୍ମଚାରୀ । ବାଲେଶ୍ୱର ଜିଲ୍ଲା ସିମୁଳିଆ ବ୍ଲକ ଅନ୍ତର୍ଗତ ଈଶ୍ୱରପୁର ଗାଁର ବରେନ୍ଦ୍ର ବେହେରା ନାମକ ଜଣେ ବ୍ୟକ୍ତି କ୍ୟାନ୍ସର ରୋଗରେ ପୀଡ଼ିତ ଥିଲେ । ହଠାତ୍ ତାଙ୍କ ସ୍ୱାସ୍ଥ୍ୟାବସ୍ଥା ବିଗିଡ଼ିବା କାରଣରୁ ପରିବାର ଲୋକେ ନିକଟସ୍ଥ ୧୦୮ ଆମ୍ବୁଲାନ୍ସ ସହ ଯୋଗାଯୋଗ କରିଥିଲେ । ଖବର ପାଇବା ପରେ ନିକଟସ୍ଥ ଡାକ୍ତରଖାନାରୁ ତୁରନ୍ତ ଏକ ୧୦୮ ଆମ୍ବୁଲାନ୍ସ ଇଶ୍ୱରପୁର ଗାଁ ଅଭିମୁଖେ ବାହାରିଯାଇଥିଲା ।
ମାତ୍ର ଗାଁ ଭିତରକୁ ଯାଉଥିବା ରାସ୍ତାର ଅବସ୍ଥା ଅତ୍ୟନ୍ତ ଶୋଚନୀୟ ହୋଇଥିବା କାରଣରୁ ଆମ୍ବୁଲାନ୍ସଟି ଗାଁ ଠାରୁ ପ୍ରାୟ ୧ କିଲୋମିଟର ଦୂରରେ ଅଟକି ରହିଥିଲା । ପରେ ୧୦୮ ଆମ୍ବୁଲାନ୍ସ ଇଏମଟି ବିଜୟୀ କିସନ ସେନ୍ଦ୍, ଡ୍ରାଇଭର ଗୟାଧର ଦାସ ଏବଂ ଆଟେଡାଣ୍ଟ ପ୍ରଶାନ୍ତ କୁମାର ବେହେରା ଏକ ଷ୍ଟ୍ରେଚର ଧରି ଯାଇ ରୋଗୀଙ୍କ ନୀକଟରେ ପହଂଚିଥିଲେ । ଏହାପରେ ଆମ୍ବୁଲାନ୍ସ କର୍ମଚାରୀମାନେ ପରିବାର ଲୋକଙ୍କ ସହାୟତାରେ ରୋଗୀଙ୍କୁ ଷ୍ଟ୍ରେଚରରେ ୧ କିଲୋମିଟର ରାସ୍ତା ଚାଲି ଚାଲି ଆଣି ଆମ୍ବୁଲାନ୍ସ ନୀକଟରେ ପହଞ୍ଚାଇଥିଲେ । ପରେ ସେଠାରୁ ରୋଗୀଙ୍କୁ ୧୦୮ ଆମ୍ବୁଲାନ୍ସ ଯୋଗେ ଅଣାଯାଇ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଛି । ଆମ୍ବୁଲାନ୍ସ କର୍ମଚାରୀମାନଙ୍କର ଏପରି କାର୍ଯ୍ୟକୁ ସଭିଏଁ ପ୍ରଶଂସା କରିଛନ୍ତି ।
ୱେଷ୍ଟଇଣ୍ଡିଜ ବିପକ୍ଷ ଟି-୨୦ ସିରିଜ ପାଇଁ ଭାରତୀୟ ଦଳ ଘୋଷିତ, ବିରାଟ ଓ ରୋହିତ ବାଦ୍
ନୂଆଦିଲ୍ଲୀ: ୱେଷ୍ଟଇଣ୍ଡିଜ ବିପକ୍ଷରେ ଭାରତକୁ ଟେଷ୍ଟ ଏବଂ ଦିନିକିଆ ସହ ଟି-୨୦ ସିରିଜ ଖେଳିବାର ଅଛି । ଏଥଇପାଇଁ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ ପାଇଁ ଭାରତୀୟ ଦଳର ଘୋଷଣା କରିଛି ବିସିସିଆଇ । ୧୫ ସଦସୀୟ ଟିମର ନେତୃତ୍ୱ ହାର୍ଦ୍ଦିକ ପାଣ୍ଡ୍ୟାଙ୍କୁ ଦିଆଯଆଇଛି । ସେହିପରି ଟିମରେ ପ୍ରଥମକରି ତିଲକ ବର୍ମା ଏବ ଯଶସ୍ୱୀ ଜୟସୱାଲଙ୍କୁ ମଧ୍ୟ ସାମିଲ କରାଯାଇଛି । ଦଳରେ ନିୟମିତ ଅଧିନାୟକ ରୋହିତ ଶର୍ମା, ଷ୍ଟାର ବ୍ୟାଟର ବିରାଟ କୋହଲି ସମେତ ସିନିୟର ଖେଳାଳିଙ୍କୁ ସ୍ଥାନ ମିଳିନାହିଁ ।
ଯଶସ୍ୱୀ ଜୟସୱାଲ ଏବଂ ତିଲକ ବର୍ମାଙ୍କ ପାଇଁ ଆଇପିଏଲ ୨୦୨୩ ବହୁତ ଚମତ୍କାର ରହିଥିଲା । ଜୟସୱାଲ ରାଜସ୍ଥାନ ରୟାଲ୍ସ ପାଇଁ ୧୪ ଟି ମ୍ୟାଚରେ ୧୬୩.୬୧ ଷ୍ଟ୍ରାଇକ ରେଟରେ ୬୨୫ ରନ୍ କରିଥିଲେ, ଯେଉଁଥିରେ ଏକ ଶତକ ଏବଂ ପାଞ୍ଚ ଅର୍ଦ୍ଧଶତକ ସାମିଲ ରହିଥିଲା । ଯଶସ୍ୱୀଙ୍କ ନାଁରେ ଆଇପିଏଲ ଇତିହାସର ସବୁଠୁ ଦ୍ରୁତତମ ଅର୍ଦ୍ଧଶତକ ମାରିବାର ରେକର୍ଡ ମଧ୍ୟ ରହିଥିଲା । ବାମହାତୀ ବ୍ୟାଟ୍ସମ୍ୟାନ୍ ତିଲକ ବର୍ମା ମୁମ୍ବାଇ ଇଣ୍ଡିଆନ୍ସ ପାଇଁ ଚମତ୍କାର ପ୍ରଦର୍ଶନ କରିଥିଲେ । ଅନେକ ଅସମ୍ଭବ ମ୍ୟାଚରେ ଭଲ ବ୍ୟାଟିଂ କରି ଦଳକୁ ବିଜୟ ଦ୍ୱାର ପର୍ଯ୍ୟନ୍ତ ନେଇଯାଇଥିଲେ ।
ଟି-୨୦ ସିରିଜ ପାଇଁ ଭାରତୀୟ ଦଳ: ଇଶାନ କିଶନ (ୱିକେଟକିପର), ଶୁଭମନ ଗିଲ୍, ଯଶସ୍ୱୀ ଜୟସୱାଲ, ତିଲକ ବର୍ମା, ସୂର୍ଯ୍ୟକୁମାର ଯାଦବ (ଉପଅଧିନାୟକ), ସଞ୍ଜୁ ସାମସନ (ୱିକେଟକିପର), ହାର୍ଦ୍ଦିକ ପାଣ୍ଡ୍ୟା (ଅଧିନାୟକ), ଅକ୍ଷର ପଟେଲ, ଯୁଜବେନ୍ଦ୍ର ଚହଲ, କୁଲଦୀପ ଯାଦବ, ରବି ବିଷ୍ଣୋଇ, ଅର୍ଶଦୀପ ସିଂହ, ଉମରାନ ମଲିକ, ଆବେଶ ଖାନ, ମୁକେଶ କୁମାର ।
ନିମ୍ନମାନର ହଷ୍ଟେଲ ନିର୍ମାଣ କରିଥିବା ସଂସ୍ଥା ବିରୋଧରେ କଡ଼ା ଆଭିମୁଖ୍ୟ
ସୁବର୍ଣ୍ଣପୁର: ଦୁର୍ନୀତି ବିରୋଧରେ 5T ଆକ୍ସନ । ନିମ୍ନମାନର ହଷ୍ଟେଲ ନିର୍ମାଣ କରିଥିବା ସଂସ୍ଥା ବିରୋଧରେ କଡ଼ା ଆଭିମୁଖ୍ୟ । 5T ସଚିବଙ୍କ ନିର୍ଦ୍ଦେଶ ପରେ ତଦନ୍ତ ପାଇଁ ଭିଜିଲାନ୍ସକୁ ଚିଠି ଲେଖିଲେ ସୁବର୍ଣ୍ଣପୁର ଜିଲ୍ଲାପାଳ । ଗତକାଲି ସୁବର୍ଣ୍ଣପୁର ଜିଲ୍ଲା ଗସ୍ତ ସମୟରେ ମକୁନ୍ଦପୁର ୧୦୦ଶଯ୍ୟା ବିଶିଷ୍ଟ ଏସସି ଗାର୍ଲ୍ସ ହଷ୍ଟେଲ ଗସ୍ତ କରିଥିଲେ 5T ସଚିବ ଭି.କେ ପାଣ୍ଡିଆନ । ଏହି ସମୟରେ ୮୦ ଲକ୍ଷ ଟଙ୍କା ବ୍ୟୟରେ ନିର୍ମାଣ ହୋଇଥିବା ହଷ୍ଟେଲ କାମ ନିମ୍ନମାନର ହୋଇଥିବା ଜଳଜଳ ଦେଖାଯାଇଥିଲା। କୋଠାର ଉଭୟ ଭିତରେ ଓ ବାହାରେ ଫାଟ ଦେଖିବାକୁ ମିଳିଥିଲା ।
ସେହିପରି କୋଠାରେ ଲାଗିଥିବା ଫିଟିଙ୍ଗ୍ସ ନିମ୍ନମାନର ବୋଲି ଜାଣିବାକୁ ପାଇଥିଲେ 5T ସଚିବ । ସରକାରୀ ଅର୍ଥର ଅପବ୍ୟବହାର ହୋଇଥିବା ଜାଣିବାକୁ ପାଇ ଜିଲ୍ଲାପାଳଙ୍କୁ ଏହାର ତଦନ୍ତ ନିର୍ଦ୍ଦେଶ ଦେଇଥିଲେ। ଭୁବନେଶ୍ବରର ହିନ୍ଦୁସ୍ତାନ ଷ୍ଟିଲ ଆଣ୍ଟ କନଷ୍ଟ୍ରକସନ ପକ୍ଷରୁ ଆଶ୍ରମ ସ୍କୁଲ ପାଇଁ ହଷ୍ଟେଲ ନିର୍ମାଣ କରାଯାଇଥିଲା । କେବିକେ ଜିଲ୍ଲା ପାଇଁ ଥିବା ଆରଏଲଟିଏପି ଯୋଜନାରେ ନିର୍ମାଣ କାର୍ଯ୍ୟ କରାଯାଇଥିଲା। ଏହାର ତଦନ୍ତ କରିବାକୁ ଭିଜିଲାନ୍ସକୁ ଚିଠି ଲେଖିଛନ୍ତି ସୁବର୍ଣ୍ଣପୁର ଜିଲ୍ଲାପାଳ । ସଂସ୍ଥା ବିରୋଧରେ ଆବଶ୍ୟକ ଆକ୍ସନ୍ ସହ ଖର୍ଚ୍ଚ ଅର୍ଥ ଭରଣା କରିବାକୁ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ଆଉ ୨ ଜଜଙ୍କ ନିଯୁକ୍ତି ପାଇଁ କେନ୍ଦ୍ରକୁ ସୁପାରିଶ କଲେ ସୁପ୍ରିମକୋର୍ଟ କଲେଜିୟମ
ବଢ଼ିବ ସୁପ୍ରିମକୋର୍ଟ ବିଚାରପତିଙ୍କ ସଂଖ୍ୟା । ଆଉ ୨ଜଜଙ୍କ ନିଯୁକ୍ତି ପାଇଁ ସୁପ୍ରିମକୋର୍ଟ କଲେଜିୟମଙ୍କ ସୁପାରିଶ । ଜଷ୍ଟିସ ଉଜ୍ଜ୍ୱଳ ଭୂୟାଁ ଓ ଜଷ୍ଟିସ ଏସ ଭି ଭଟ୍ଟିଙ୍କ ନାମ ସୁପାରିଶ । ତେଲେଙ୍ଗାନା ହାଇକୋର୍ଟ ମୁଖ୍ୟ ବିଚାରପତି ଜଷ୍ଟିସ ଉଜ୍ଜ୍ୱଳ ଭୂୟାଁ । କେରଳ ହାଇକୋର୍ଟ ମୁଖ୍ୟ ବିଚାରପତି ଜଷ୍ଟିଲ ଏସ୍ ଭେଙ୍କଟନାରାୟଣ ଭଟ୍ଟି । କଲେଜିୟମ ବୁଧବାର କେନ୍ଦ୍ର ସରକାରଙ୍କୁ ସୁପାରିଶ ପଠାଇଛି । ବର୍ତ୍ତମାନ ସୁପ୍ରିମକୋର୍ଟରେ ମୋଟ ୩୧ ଜଣ ଜଜ୍ ରହିଛନ୍ତି । ବର୍ତ୍ତମାନ ୩ ଜଜଙ୍କ ପଦ ଖାଲି ରହିଛି । କେନ୍ଦ୍ରକୁ ଉଜ୍ଜ୍ୱଳ ଭୂୟାଁ ଏବଂ ଏସ୍ ଭି ଭଟିଙ୍କ ନାଁ ସୁପାରିଶ କରିଥିବା କଲେଜିୟମରେ ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼, ଜଷ୍ଟିସ ସଞ୍ଜ କିଶନ କୌଲ, ଜଷ୍ଟିସ ରାଜୀବ ଖନ୍ନା, ଜଷ୍ଟିସ ବିଆର ଗଭଇ ଏବଂ ଜଷ୍ଟିସ ସୂର୍ଯ୍ୟକାନ୍ତ ରହିଛନ୍ତି । ସୂଚନାଯୋଗ୍ୟ, ସୁପ୍ରିମକୋର୍ଟରେ ଗତ ମାସରେ ତିନି ଜଜ ଅବସରଗ୍ରହଣ କରିଥିଲେ ।
ଦାଦା ଶରଦ ପାଓ୍ବାରଙ୍କୁ ହଟାଇ ଏନସିପି ଗାଦି ମାଡିବସିଲେ ପୁତୁରା ଅଜିତ ପାଓ୍ବାର
ମୁମ୍ବାଇ: ଦାଦା ଶରଦ ପାଓ୍ବାରଙ୍କୁ ହଟାଇ ଏନସିପି ଗାଦି ମାଡିବସିଲେ ପୁତୁରା ଅଜିତ ପାଓ୍ବାର । ମହାରାଷ୍ଟ୍ର ଏନସିପିରେ ବଡ଼ ଧରଣର ଓଲପାଲଟ ଦେଖିବାକୁ ମିଳିଛି । ନିଜକୁ ଦଳର ଅଧ୍ୟକ୍ଷ ଘୋଷଣା କଲେ ଅଜିତ ପାଓ୍ବାର । କାର୍ଯ୍ୟକାରୀଣି ବୈଠକରେ ନିଷ୍ପତ୍ତି ନିଆଯାଇଛି । ଶରଦ ପାଓ୍ବାରଙ୍କ ବୟସ ହେଲାଣି, ରାଜନୀତି ନକରି ଆଶିର୍ବାଦ ଦିଅନ୍ତୁ ବୋଲି ଅଜିତ ପାଓ୍ବାର କହିଛନ୍ତି । ସେପଟେ ରାଜନୈତିକ ଅଭିଳାଷା ରଖିଲେ ବିରୋଧୀଙ୍କ ଭବିଷ୍ୟତ ଅନ୍ଧାର ହୋଇଯିବ ବୋଲି ଶରଦ ପାଓ୍ବାର କହିଛନ୍ତି । ଆଜି ହୋଇଥିବା ବୈଠକରେ ୧୫ ଜଣ ବିଧାୟକ ଶରଦଙ୍କ ସହ ଥିବା ବେଳେ ୩୦ ଜଣ ବିଧାୟକ ଅଜିତଙ୍କ ସହ ଥିଲେ ।
କେବେ ଅବସର ନେବେ ଦାଦା ଶରଦ ପାଓ୍ବାର ? ପୁତୁରାଙ୍କ ରାଜନୈତିକ କ୍ୟାରିୟରରେ ଦାଦା ଅଡୁଆ । ସିନିୟର ପାଓ୍ବାର ବନାମ ଜୁନିୟର ପାଓ୍ବାର । ନିଜ ନିଜ ସମର୍ଥକଙ୍କ ବିଧାୟକଙ୍କ ସହ ବୈଠକ କରି ଶକ୍ତି ପ୍ରଦର୍ଶନ କଲେ ଦାଦା ପୁତୁରା । ବୈଠକରେ ଉପସ୍ଥିତ ବିଧାୟକଙ୍କୁ ଦେଖି ଉତ୍ସାହିତ ଶରଦ ପାଓ୍ବାର । ସାରା ଦେଶ ଆଜି ଆମକୁ ଦେଖୁଛି । ରାଜ୍ୟରେ ଚାଲିଥିବା ରାଜନୈତିକ ହେରଫେରକୁ ଲୋକେ ନାପସନ୍ଦ କରୁଛନ୍ତି । ଲୋକଙ୍କ ଭଲ ପାଇଁ କାମ କରିବା ପରିବର୍ତ୍ତେ ନିଜ ରାଜନୈତିକ କ୍ୟାରିୟର ସଜାଡିବାରେ ନେତା ବ୍ୟସ୍ତ ବୋଲି କହି ଅଜିତଙ୍କୁ ଟାର୍ଗେଟ କରିଛନ୍ତି ଶରଦ ପାଓ୍ବାର ।
ଏଥିସହ ପ୍ରଧାନମନ୍ତ୍ରୀଙ୍କୁ ମଧ୍ୟ ସିଧାସଳଖ ପ୍ରଶ୍ନ କରିଛନ୍ତି । କିଛିଦିନ ତଳେ ଏନସିପିକୁ ଦୁର୍ନୀତିଖୋର କହୁଥିବା ବେଳେ ଆଜି କାହିଁକି ସେମାନଙ୍କ ସହ ମିଶି ସରକାର ଗଠନ କଲେ ? ଅଜିତଙ୍କର ଯଦି କିଛି ଅସୁବିଧା ଥିଲା ମୋ ସହ କଥା ହେବା ଥିଲା । ରାଜନୈତିକ ଅଭାଳାଷା ରଖି ଏଭଳି ଦଳ ଭିତରେ ବିବାଦ ସୃଷ୍ଟି କରିବା ଠିକ୍ ହୋଇନି କହିଛନ୍ତି ଶରଦ ପାଓ୍ବାର । ମୁଁ କେବେ ବି କ୍ଷମତା ପାଇଁ ରାଜନୀତି କରିନାହିଁ । ଲୋକଙ୍କ ପାଇଁ କାମ କରିବା ସବୁବେଳେ ପ୍ରାଥମିକତା ରହିଛି । ଏନସିପିର ଡିଏନଏ ସମ୍ପୂର୍ଣ୍ଣ ଭିନ୍ନ ବୋଲି ଶରଦ କହିଛନ୍ତି । ଯାହାକୁ ସମର୍ଥନ କରିଛନ୍ତି ବୈଠକରେ ଉପସ୍ଥିତ ସମର୍ଥକ ବିଧାୟକ ଓ ସାଂସଦ । ଅଜିତ ପାଓ୍ବାର ମଧ୍ୟ ଶରଦଙ୍କୁ ନିଜର ରାଜନୈତିକ ଗୁରୁ କହି ଟାର୍ଗେଟ କରିଛନ୍ତି ।
ତାଙ୍କୁ ଦେଖି ରାଜନୀତି ଶିଖିଛନ୍ତି ବୋଲି କହିଛନ୍ତି । କିନ୍ତୁ ଏବେ ସମୟ ହୋଇଛି ସେ ଅବସର ନେଇଯାଆନ୍ତୁ । ୮୩ ବର୍ଷ ହେଲାଣି କେବେ ଅବସର ନେବେ ବୋଲି ପ୍ରଶ୍ନ କରିଛନ୍ତି । ଶରଦ ପାଓ୍ବାର ଯାହା କହିଛନ୍ତି, ତାକୁ ଦଳ ଭିତରେ ରଖି ଶୃଙ୍ଖଳିତ କର୍ମୀ ଭାବେ ମାନିଛନ୍ତି । ହେଲେ ତାଙ୍କ ଆଗରେ ମୋର କିଛି ଗୁରୁତ୍ବ ନାହିଁ । ନିଜ ରାଜନୈତିକ କ୍ୟାରିୟରରୁ ଅବସର ନେବାକୁ ଘୋଷଣା କରିଥିଲେ ବି କାହିଁକି ୟୁଟର୍ଣ୍ଣ ନେଲେ ବୋଲି ଅଜିତ ପ୍ରଶ୍ନ କରିଛନ୍ତି । ଅଜିତ ତାଙ୍କ ସମର୍ଥକଙ୍କ ବିଧାୟକଙ୍କୁ ନିଜ ନିର୍ବାଚନୀ କ୍ଷେତ୍ରର ବିକାଶକୁ ଫୋକସ କରିବାକୁ ପରାମର୍ଶ ଦେଇଛନ୍ତି ।
୨୦୨୪ ପାଇଁ ତାଙ୍କୁ ପ୍ରସ୍ତୁତ ରହିବାକୁ ପଡିବ । ସରକାରୀ ଅନୁଦାନ ପାଇଁ ଅଟକିଥିବା କାମକୁ ତୁରନ୍ତ ଆରମ୍ଭ କରିବା ପାଇଁ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ସହ କଥାହେବେ ବୋଲି ଅଜିତ କହିଛନ୍ତି । ସେପଟେ ଶରଦଙ୍କ ବୈଠକରେ ଯୋଗଦେଇଥିବା ବିଧାୟକ ମାନେ ମଧ୍ୟ ଯୋଗାଯୋଗରେ ଅଛନ୍ତି ବୋଲି କହିଛନ୍ତି ଅଜିତ ପାଓ୍ବାର । ନିର୍ବାଚନ ଆୟୋଗକୁ ଚିଠି ଲେଖି ଦଳର ନାଁ ଓ ଚିହ୍ନ ଉପରେ ଅଧିକାର ବୋଲି କହି ଆବେଦନ କରିଛନ୍ତି ଅଜିତ ପାଓ୍ବାର । ସେହିଁ ଅସଲ ଏନସିପି ନେତା । ତାଙ୍କ ସମର୍ଥନରେ ଅଧାରୁ ଅଧିକ ବିଧାୟକ । ତେଣୁ ଦଳ ଉପରେ ଅଧିକାର ସାବ୍ୟସ୍ତ କରିବା ପାଇଁ ଅଜିତ ଆବେଦନ କରିଛନ୍ତି ।
ସେପଟେ ଶରଦ ପାଓ୍ବାରଙ୍କ ଗୋଷ୍ଠିର ଜୟନ୍ତ ପାଟିଲ ମଧ୍ୟ ନିର୍ବାଚନ ଆୟୋଗଙ୍କୁ ଦଳରେ ଭିତରେ ଦେଖାଦେଇଥିବା ବିବାଦ ବିଷୟରେ ଜଣାଇଛନ୍ତି । ଯେଉଁମାନେ ଦଳର ଶୃଙ୍ଖଳାକୁ ଅବମାନନା କରି ଏନଡିଏରେ ଯୋଗ ଦେଇଛନ୍ତି ସେମାନଙ୍କୁ ଅଯୋଗ୍ୟ ଘୋଷଣା କରିବାକୁ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି । ସେମାନେ କରୁଥିବା ଦାବି ସମ୍ପୂର୍ଣ୍ଣ ବେଆଇନ ବୋଲି ଜୟନ୍ତ ପାଟିଲ କହିଛନ୍ତି । ଗତ ରବିବାର ଏନସିପିର ୯ ଜଣ ବିଧାୟକ ଏନଡିଏରେ ଯୋଗ ଦେବା ସହ ମନ୍ତ୍ରୀ ପଦର ଶପଥ ନେଇଥିଲେ । ଯାହାକୁ ଦଳ ବିରୋଧୀ ଆଚରଣ କହି ଅଯୋଗ୍ୟ ଘୋଷଣା କରିବାକୁ ଆବେଦନ କରିଛନ୍ତି ଶରଦ ପାଓ୍ବାରଙ୍କ ଗୋଷ୍ଠି ।
DN ଗ୍ରୁପ ମୁଖ୍ୟ ଜଗଦୀଶ ନାୟକଙ୍କ ବ୍ୟବସାୟ ପ୍ରତିଷ୍ଠାନ ଉପରେ ବଡ଼ଧରଣର ଆୟକର ଚଢ଼ାଉ
ଭୁବନେଶ୍ୱର: ଭୁବନେଶ୍ବରରେ ବଡ଼ଧରଣର ଆୟକର ଚଢ଼ାଉ । DN ଗ୍ରୁପ ମୁଖ୍ୟ ଜଗଦୀଶ ନାୟକଙ୍କ ବ୍ୟବସାୟ ପ୍ରତିଷ୍ଠାନ ଉପରେ ରେଡ୍ । ରିୟଲ ଇଷ୍ଟେଟ୍ କମ୍ପାନୀର କର୍ମଚାରୀ ଚନ୍ଦ୍ରଶେଖର ପଣ୍ଡାଙ୍କ ଘରୁ ୩୦ କୋଟି ଟଙ୍କା ଜବତ ହୋଇଥିବା ସୂଚନା ମିଳିଛି । ଚନ୍ଦ୍ରଶେଖର ଏକ ସରକାରୀ ଘରେ ଭଡା ନେଇ ରହୁଥିଲେ । ଉକ୍ତ ଭଡ଼ା ଘରୁ ୩୦ କୋଟି ଟଙ୍କା ମିଳିଥିବା ସୂଚନା ମିଳିଛି । ଏହି ଟଙ୍କା ସବୁ ତିନୋଟି ଟ୍ରଙ୍କ ଓ ଗୋଟିଏ ଆଟାଚିରୁ ବାହାରିଛି ।
୧୦ରୁ ୧୨ ଜଣ ଆଇଟି ଅଧିକାରୀ ଏହି ଚଢ଼ାଉରେ ସାମିଲ୍ ଅଛନ୍ତି । ଆୟକର ଅଧିକାରୀମାନେ ଭୋର୍ ୩ଟାରୁ ରେଡ୍ କରୁଛନ୍ତି । କମ୍ପାନୀର ନିର୍ଦ୍ଦେଶକଙ୍କ ସମେତ ବରିଷ୍ଠ ଅଧିକାରୀଙ୍କ ଘରେ ମଧ୍ୟ ଚଢାଉ କରାଯାଉଥିବା ସୂଚନା ମିଳିଛି । ଟିକସ ଫାଙ୍କିବା ଅଭିଯୋଗରେ ଗତକାଲି ରାତିରୁ ୨୨ ସ୍ଥାନରେ ଏକକାଳୀନ ଚଢ଼ାଉ କରାଯାଉଛି । ଆଜି ସକାଳୁ ଭୁବନେଶ୍ୱର ୪ ନମ୍ବରରେ ଏହି ଚଢ଼ାଉ ହୋଇଥିଲା । ଆଇଆରସି ଭିଲେଜସ୍ଥିତ ମୁଖ୍ୟ କାର୍ଯ୍ୟାଳୟରେ ବି ଚଢ଼ାଉ କରିଥିଲା ଆୟକର ବିଭାଗ।
ଅନଲାଇନ ପୋଞ୍ଜି ସ୍କିମରେ ଠକେଇ ମାମଲା, ସାଇବର ଠକଙ୍କ ୧୪ଟି ଆକାଉଣ୍ଟରୁ ୭୫ ଲକ୍ଷ ଟଙ୍କା ଫ୍ରିଜ କଲା EOW
ଭୁବନେଶ୍ୱର: ଅନଲାଇନ ପୋଞ୍ଜି ସ୍କିମରେ ଠକେଇ ମାମଲା । ସେଲିବ୍ରିଟି, ଶିଲ୍ପପତି, କ୍ରିକେଟରଙ୍କ ଫଟୋ ଓ ଭିଡ଼ିଓକୁ ଏଡିଟ କରି ଲିଙ୍କ ଦେଇ କରୁଥିଲେ ପ୍ରଚାର । ଦୁବାଇ ଓ ୟୁଏଇରୁ ଠକ କରୁଛି ଅପରେଟ । ଲୋଭ ଦେଖି ଲୋକଙ୍କୁ ଠକୁ ଥିଲେ ସାଇବର ଠକ । ସାଇବର ଠକଙ୍କ ବିଭିନ୍ନ 14ଟି ଆକାଉଣ୍ଟରୁ 75 ଲକ୍ଷ ଟଙ୍କା ଫ୍ରିଜ କରିଛି ଇଓଡବ୍ଲୁ । ଅନଲାଇନ ପୋଞ୍ଜି ସ୍କିମ ପାଇଁ କରୁଥିବା ଆପ ଗୁଡିକରେ ମଧ୍ୟବିତ୍ତ ପରିବାର ଲୋକଙ୍କୁ ଟାର୍ଗେଟ କରୁଥିଲେ ଠକ । ଇଓଡବ୍ଲୁ ଅଭିଯୋଗ ପରେ ମାମଲା କରାଯାଇଛି । ପୂର୍ବରୁ 1 କୋଟି 22 ଲକ୍ଷ ଟଙ୍କା ଫ୍ରିଜ କରାଯାଇଥିଲା ।
ଅମିତାଭ ଵଚନ, ସଚିନ ତେନ୍ଦୁଲକର, ମୁକେଶ ଅମ୍ବାନୀଙ୍କ ଭଳି ବଡ଼ ବଡ଼ ସେଲିବ୍ରିଟିଙ୍କ ଫୋଟୋ ଭିଡ଼ିଓ ବ୍ୟବହାର କରି ଲୋକଙ୍କୁ ଲଗାଉଥିଲେ ଚୁନା । ଯାହା ଫଳରେ ସାଧାରଣ ଲୋକ ମାନେ ସହଜରେ ଭରସା କରି ଯାଉଥିଲେ l ଅଳ୍ପ ସମୟରେ ଅଧିକ ଟଙ୍କା ପାଇବା ଲୋଭରେ ଫସୁଥିଲେ ଲୋକ । ଫ୍ଲାଏ ଏଭିଏଟର,ଫୋରେକ୍ସ ଡାନା, ଲାଇଭ 22 କ୍ୟାସ ଇତ୍ୟାଦି ଆପ୍ ମାଧ୍ୟମରେ ଲୋକଙ୍କୁ ଠକୁଥିଲେ l ସେଲ କମ୍ପାନୀର ଆକାଉଣ୍ଟକୁ ବ୍ୟବହାର କରୁଥିଲେ ଏହି ଲୁଟେରା । 10 ହଜାର କୋଟି ଟଙ୍କାର ବେଇଆନ କାରବାର ହୋଇଛି l ୟୁପିଆଇ ଆଇଡିରେ ଟଙ୍କା ଦେଇ ଭରସା ଜନ୍ମଇବା ପରେ ୟୁପିଆଇକୁ ବଦଳାଇ ଦେଉଥିଲେ l ଏହି ସମସ୍ତ ଆକାଉଣ୍ଟରେ ଏବେ ସୁଦ୍ଧା ପାଖାପାଖି ଏକ ହଜାର କୋଟି ଟଙ୍କାର ଆର୍ଥିକ କାରବାର ହୋଇଛି ।
ଏହି ଟଙ୍କା ଗୁଡିକୁ କ୍ରିପଟୋରେ ବଦଳାଇବା ସହ ବାହାର ଦେଶକୁ ମଧ୍ୟ ଟ୍ରାନ୍ସଫର କରି ଦେଉଥିଲେ l ଏ ନେଇ ଆଡଭାଇଜରୀ ଜାରି କରିଛି ଇଓଡବ୍ଲୁ । ଏହିଭଳି ଆପ ଗୁଡିକ ଠାରୁ ଦୂରେଇ ରହିବା ସହ କାହାକୁ ବି ରେଫର ନକରିବାକୁ ପରାମର୍ଶ ଦେଇଛି ଇଓଡବ୍ଲୁ l ସାଇବର ଫ୍ରଡ଼ରେ ମଧ୍ୟ ଏହି ପଇସାକୁ ଇନଭେଷ୍ଟ କରାଯାଉଥିଲା । ବେଆଇନ ଆପ୍ ଗୁଡିକୁ ପ୍ରଚାର ପ୍ରସାର ନକରିବାକୁ ସୋସିଆଲ ମିଡ଼ିଆ ଇଫ୍ଲୁଏନସର ଓ ସେଲିବ୍ରିଟି ମାନଙ୍କୁ ଅପିଲ କରିଛି ଅର୍ଥନୈତିକ ଶାଖା । ଠକଙ୍କୁ ଧରିବା ପାଇଁ ଆପର ଆଡ଼ମିନ, କ୍ରିଏଟର, କେଉଁଠି ତିଆରି ହୋଇଥିଲା ଜାଣିବାକୁ ଗୁଗୁଲକୁ ଚିଠି ଲେଖିଲ ଇଓଡବ୍ଲୁ ।
ଚନ୍ଦକା ଅଞ୍ଚଳରୁ ଦୁଇ ସ୍କୁଲ ଛାତ୍ର ନିଖୋଜ ଘଟଣା, ଟିଟିଲାଗଡ଼ ସଇଁତଳା ଅଞ୍ଚଳରୁ ଉଭୟ ଉଦ୍ଧାର
ଭୁବନେଶ୍ୱର: ଚନ୍ଦକା ଅଞ୍ଚଳରେ ସ୍କୁଲ ଯାଇ ଦୁଇ ଛାତ୍ର ନିଖୋଜ ଘଟଣା । ଟିଟିଲାଗଡ଼ରୁ ଉଭୟଙ୍କୁ ଉଦ୍ଧାର କରାଯାଇଛି । ଏହି ଦୁଇ ଛାତ୍ର ହେଲେ ଚନ୍ଦକାର ପୃଥ୍ବୀରାଜ ପ୍ରଧାନ ଓ ଭରତପୁର ଅଞ୍ଚଳର ସୋନୁ କୁମାର ଉଦ୍ଧାର ହୋଇଛନ୍ତି । ଉଦ୍ଧାର ଛାତ୍ରଙ୍କ କହିବା ଅନୁସାରେ ଗତ କାଲି ସ୍କୁଲ ଯାଇଥିବା ବେଳେ ସ୍କୁଲ ପରିସର ବାହାରକୁ ବିସ୍କୁଟ ଖାଇବାକୁ ଆସିଥିଲେ । ସେହି ସମୟରେ କେହିଜଣେ ତାଙ୍କ ମୁହଁରେ କପଡା ଘୋଡାଇ ବେହୋସ କରି ଏକ ଟ୍ରକ ଯୋଗେ ନେଇଯାଇଥିଲେ ।
ଆଜି ସେମାନେ କୌଶଳ କ୍ରମେ ଅପହରଣରକାରୀଙ୍କ ନିକଟରୁ ଖସି ନିଜ ଘର ଲୋକଙ୍କୁ ଫୋନରେ ସବୁ ଜଣାଇଥିଲେ ପରେ ଟିଟିଲାଗଡ ରେଳଷ୍ଟେସନରେ ପହଞ୍ଚିବା ପରେ ଉଦ୍ଧାର କରିଥିଲା ପୋଲିସ । ପୃଥ୍ୱୀରାଜଙ୍କ ବାପା ଜଣେ ମାର୍ବଲ ପଥର ଓ ଟ୍ରାନ୍ସପୋର୍ଟ ବ୍ଯବସାୟୀ ବୋଲି ତାଙ୍କ ପୁଅ କହୁଥିବା ବେଳେ ସୋନୁ କୁମାରଙ୍କ ବାପା ଟ୍ରାଭେଲ ଏଜେଣ୍ଟ ଭାବେ କାମ କରନ୍ତି ବୋଲି ସୋନୁ କହିଛନ୍ତି । ଦୁଇ ଛାତ୍ର ଏକ ସାଂଘାତିକ ତଥ୍ଯ ଦେଇଛନ୍ତି ଯେ, ତାଙ୍କ ସହିତ ଆହୁରି ୬ ଜଣଙ୍କୁ ଟ୍ରକରେ କିଡନ୍ଯାପ କରି ନିଆଯାଇଥିଲା । ସେମାନଙ୍କ ଭିତରେ ୪ ଜଣ ଝିଅ ଅଚେତ ଅବସ୍ଥାରେ ଟ୍ରକ ଭିତରେ ଥିଲେ ଓ ୨ ଜଣ କାନ୍ଦୁଥିଲେ ।
ବାମଣ୍ଡା ମଡେଲ ଡିଗ୍ରୀ କଲେଜରେ 5T ସଚିବ, ଯୋଗ ଓ ଧ୍ୟାନ କରିବାକୁ ଛାତ୍ରଛାତ୍ରୀଙ୍କୁ ଦେଲେ ପରାମର୍ଶ
ବୌଦ୍ଧ:ବୌଦ୍ଧ ଜିଲ୍ଲା ଗସ୍ତରେ 5T ସଚିବ ଭି.କେ ପାଣ୍ଡିଆନ୍ । ଗ୍ରାଉଣ୍ଡକୁ ଯାଇ ବିକାଶ କାର୍ଯ୍ୟର କରୁଛନ୍ତି ସମୀକ୍ଷା । ମଡେଲ ଡିଗ୍ରୀ କଲେଜ ବାମଣ୍ଡାରେ ପହଁଚି 5T ସଚିବ ଉପସ୍ଥିତ ଥିବା ଛାତ୍ରଛାତ୍ରୀଙ୍କ ସହ ହାତ ମିଶାଇ ସେମାନଙ୍କୁ ଉତ୍ସାହିତ କରିଥିଲେ । ପାଖରେ 5T ସଚିବଙ୍କୁ ଦେଖି ଖୁସିରେ ବିଭୋର ହୋଇ ପଡିଥିଲେ ଛାତ୍ରଛାତ୍ରୀ । ମଡେଲ ଡିଗ୍ରୀ କଲେଜ ବାମଣ୍ଡାରେ ପହଞ୍ଚି ଛାତ୍ରଛାତ୍ରୀଙ୍କ ସହ ହାତ ମିଶାଇ ଉତ୍ସାହିତ କରିଥିଲେ । 5T ସ୍କୁଲ ରୂପାନ୍ତର କେମିତି ହୋଇଛି ବୋଲି ସେ ପଚାରିଲେ? ସମସ୍ତ ବ୍ୟବସ୍ଥା ନେଇ କଥା ହୋଇଥିଲେ 5t ସଚିବ । ବୌଦ୍ଧର ସମସ୍ତ ଯୁକ୍ତ ଦୁଇ ଓ ଡିଗ୍ରୀ କଲେଜକୁ 5T ରେ ସାମିଲ କରିଛନ୍ତି ମୁଖ୍ୟମନ୍ତ୍ରୀ । ଆପଣଙ୍କ କଲେଜରେ ସ୍ମାର୍ଟ କ୍ଲାସ ହେବ, ଭଲ ଟୟଲେଟ୍ ହେବ ।
ନିଜ ଓ ବାପା ମାଙ୍କ ସ୍ୱପ୍ନ ସାକାର କରିବାକୁ ମୁଖ୍ୟମନ୍ତ୍ରୀ ଏହା କରିଛନ୍ତି । ସବୁ ଆଧୁନିକ ସୁବିଧା ବୌଦ୍ଧ କଲେଜ ପାଇବେ । ଆପଣଙ୍କ ଉଜ୍ଜଳ ଭବିଷ୍ୟତ ପାଇଁ ମୁଖ୍ୟମନ୍ତ୍ରୀ ଏହି କାମ କରିଛନ୍ତି । ଆପଣ ସହଯୋଗ କରନ୍ତୁ, ଭଲ ପାଠ ପଢ଼ନ୍ତୁ, କଠିନ ପରିଶ୍ରମ କରନ୍ତୁ, ଘର ତିଆରିରେ ଯେପରି ବାପା ମାନଙ୍କୁ ସହଯୋଗ କରୁଛନ୍ତି, ସେହିପରି କଲେଜ ବି ଆପଣଙ୍କ ଘର । ମିଶିକି କାମ କରନ୍ତୁ । ନିଜ ଭିତରେ ଆଟାଚମେଣ୍ଟ ଆସିବ । କଲେଜ ଓ କ୍ଲାସରୁମର ଫୋଟୋ ନେବେ । 6 ମାସ ଭିତରେ କଲେଜ ରୂପାନ୍ତର ହୋଇଯିବ । ସେ ଫୋଟୋ ବି ନିଅନ୍ତୁ । ଏହା ଆପଣଙ୍କର ସ୍ମୃତି ହୋଇଯିବ । ଆପଣ ମାନେ ଇନଷ୍ଟାଗ୍ରାମରେ ତାହା ପୋଷ୍ଟ କରନ୍ତୁ । ସେ ସବୁ ମତେ ପୋଷ୍ଟ କରିକି ଦେବେ ।
ଆପଣଙ୍କ କଲେଜର ଉନ୍ନତି ଆପଣଙ୍କ ହାତରେ । ସମସ୍ତଙ୍କ ସହଯୋଗ ଯୋଗୁଁ 5T ରୂପାନ୍ତର ସଫଳ ହୋଇଛି । ଏହି ଅବସରରେ 5T ସଚିବ ଭିକେ ପାଣ୍ଡିଆନ ପିଲାମାନଙ୍କୁ ପ୍ରଶ୍ନ କରିଥିଲେ ଯେ ଭଗମାନ ଆମକୁ ଏହି ଶରୀର ଦେଇଛନ୍ତି, ପ୍ରତିଦିନ କିଏ କିଏ ସ୍ୱିମିଙ୍ଗ, ଯୋଗ, ସାଇକ୍ଲିଙ୍ଗ କରନ୍ତି? ଏଥିରେ ଅନେକ ପିଲା ହାତ ଉଠାଇଥିଲେ । ଭିକେ ପାଣ୍ଡିଆନ ଏଥିରେ ଖୁସି ବ୍ୟକ୍ତ କରିବା ସହ କରିଥିଲେ ନିଜ ଶରୀର ଉପରେ ଦିନକୁ ଅଧ ଘଣ୍ଟା ଧ୍ୟାନ ଦିଅନ୍ତୁ । ମନର ଶାନ୍ତି ପାଇଁ ଅତିକମରେ ୧୫ ମିନିଟ ଯୋଗ ଓ ଧ୍ୟାନ କରିବାକୁ ପିଲାଙ୍କୁ ମନ୍ତ୍ର ଦେଇଥିଲେ ସଚିବ ।
ଏହା ତାଙ୍କର ନିଜସ୍ୱ ଅନୁଭୂତି ଏବଂ ଏଥିରୁ ଆତ୍ମବିଶ୍ୱାସ ମିଳିବ ବୋଲି ସେ ଛାତ୍ରଛାତ୍ରୀଙ୍କୁ କହିଥିଲେ । ଆଗକୁ ଭିକେ ପାଣ୍ଡିଆନ କହିଥିଲେ ଭଲ ସାଙ୍ଗମାନେ ଆତ୍ମବିଶ୍ୱାସ ବଢ଼ାନ୍ତି । ଖରାପ ସାଙ୍ଗ ଆତ୍ମବିଶ୍ୱାସ କମାଇଥାନ୍ତି । ତେଣୁ ଭଲ ସାଙ୍ଗ ଚୟନ କରିବାକୁ ପରାମର୍ଶ ଦେଇଥିଲେ । 5T ସଚିବ ଆଗକୁ କହିଥିଲେ ମୁଁ ସ୍କୁଲରେ ପଢ଼ିବା ବେଳେ ୨୦ କିଲୋମିଟର ଯିବା ଆସିବା କରୁଥିଲି । ସରକାରୀ ସ୍କୁଲରେ ପଢୁଥିଲି ଆଉ ଆଜି ଆପଣଙ୍କ ଆଗରେ କଥା ରଖୁଛି । ଆପଣମାନେ ମଧ୍ୟ ଦିନେ ବଡ଼ ସଫଳ ମଣିଷ ହେଲେ ମୋତେ ଚିଠି ପଠାଇବେ ।ଏଥିସହିତ ପିଲାମାନଙ୍କୁ ଉତ୍ସାହିତ କରିବା ସହ ସେମାନଙ୍କ ଆତ୍ମବିଶ୍ୱାସ ବଢ଼ାଇଥିଲେ 5T ସଚିବ ।