ସମ୍ବଲପୁର: ବଢ଼ୁଛି ହୀରାକୁଦ ଜଳଭଣ୍ଡାରର ଜଳସ୍ତର । ଉପରମୁଣ୍ଡରେ ପ୍ରବଳ ବର୍ଷା ଯୋଗୁ ଜଳସ୍ତର ବଢିବାରେ ଲାଗିଛି । ଏବେ ଜଳଭଣ୍ଡାରର ଜଳସ୍ତର ୬୧୫.୨୧ ଫୁଟ ରହିଛି । ପ୍ରତି ସେକେଣ୍ଡରେ ଜଳଭଣ୍ଡାର ମଧ୍ୟକୁ ୩ ଲକ୍ଷ ୩୩ ହଜାର ଘନଫୁଟ ବନ୍ୟାଜଳ ପ୍ରବେଶ କରୁଥିବାବେଳେ ଦୁଇଟି ଗେଟରେ ୬୬ ହଜାର ଘନଫୁଟ ବନ୍ୟାଜଳ ନିଷ୍କାସନ କରାଯାଉଛି । ଆଗକୁ ସ୍ଥିତି ଦେଖି ଅଧିକ ଗେଟ୍ ଖୋଲିବା ନିଷ୍ପତ୍ତି ନିଆଯିବ ବୋଲି କର୍ତ୍ତୃପକ୍ଷ ସୂଚନା ଦେଇଛନ୍ତି ।
ରାହୁଲ ଗାନ୍ଧୀଙ୍କୁ ଜେଲଦଣ୍ଡ ମାମଲା, ଆଜି ଶୁଣାଣି କରିବେ ସୁପ୍ରିମକୋର୍ଟ
ନୂଆଦିଲ୍ଲୀ: ମୋଦି ସରନେମ୍ ପ୍ରସଙ୍ଗରେ ରାହୁଲ ଗାନ୍ଧୀଙ୍କୁ ଜେଲଦଣ୍ଡ ମାମଲା । ଆଜି ମାମଲାର ଶୁଣାଣି କରିବେ ସୁପ୍ରିମକୋର୍ଟ । ଗତ ୧୮ ତାରିଖରେ ମାମଲାର ଶୁଣାଣି କରି ଗୁଜରାଟ ସରକାରଙ୍କୁ ସୁପ୍ରିମକୋର୍ଟ ନୋଟିସ କରିଥିଲେ । ୧୦ ଦିନ ମଧ୍ୟରେ ଉତ୍ତର ରଖିବାକୁ କୋର୍ଟ ନିର୍ଦ୍ଦେଶ ଦେଇଥିଲେ । ମୋଦି ସରନେମ୍ ମାମଲାରେ ରାହୁଲଙ୍କ ବିରୋଧରେ ଅଭିଯୋଗ ଦାଏର କରିଥିବା ବିଜେପି ନେତା ପୂର୍ଣ୍ଣେଶ ମୋଦିଙ୍କୁ କୋର୍ଟ ନୋଟିସ କରିଥିଲେ । ତେବେ ଶୁଣାଣି ପୂର୍ବରୁ ରାହୁଲ ସୁପ୍ରିମକୋର୍ଟରେ ଜବାବ ଦାଖଲ କରିଛନ୍ତି । ଦୋଷୀ ସାବ୍ୟସ୍ତ ଉପରେ ରୋକ ଲଗାଇବାକୁ ରାହୁଲ ଅପିଲ କରିଛନ୍ତି । ରାହୁଲ କହିଛନ୍ତି, ଜେଲଦଣ୍ଡ କାରଣରୁ ତାଙ୍କର ଲୋକସଭା ସଦସ୍ୟତା ରଦ୍ଦ ହୋଇଛି । ମାମଲା କରିଥିବା ପୂର୍ଣ୍ଣେଶ ମୋଦି ନିଜେ ମୂଳ ମୋଦି ସଂପ୍ରଦାୟର ନୁହଁନ୍ତି । ପୂର୍ବରୁ ଏପରି ମାମଲାରେ କେହି ଦଣ୍ଡିତ ହୋଇନାହାନ୍ତି । କ୍ଷମା ମାଗିବାକୁ ମନା କରିବାକୁ ଗର୍ବୀ ବୋଲି କୁହାଯାଇପାରିବ ନାହିଁ ।
୨୦୧୯ରେ କର୍ଣ୍ଣାଟକ କୋଲରରେ ମୋଦି ସାଙ୍ଗିଆକୁ ନେଇ ରାହୁଲଙ୍କ ବୟାନ ପରେ ଆଇପିସିର ଧାରା ୪୯୯, ୫୦୦ ଓ ୫୦୪ ଅନୁସାରେ ମାମଲା ରୁଜୁ ହୋଇଥିଲା । ଗତ ମାର୍ଚ୍ଚ ୨୩ ତାରିଖରେ ମାନହାନି ମାମଲାରେ ରାହୁଲଙ୍କୁ ଦୋଷୀ ସାବ୍ୟସ୍ତ କରିବା ସହ ୨ ବର୍ଷ ଜେଲଦଣ୍ଡାଦେଶ ଦେଇଥିଲେ ସୁରତ ସିଜେଏମ କୋର୍ଟ । ଗୁଜରାଟ ହାଇକୋର୍ଟ ମଧ୍ୟ ତଳକୋର୍ଟଙ୍କ ରାୟ କାଏମ ରଖିଥିଲେ ।
ମହାନଦୀରେ ବଡ଼ ଘାଇ, ତେରମାଣପୁରଠାରେ ୨୦ ଫୁଟର ଘାଇ
ଜଗତସିଂହପୁର: ଜଗତସିଂହପୁର ଜିଲ୍ଲା ତେରମାଣପୁରରେ ମହାନଦୀରେ ବଡ଼ ଘାଇ । କୁଜଙ୍ଗ ବ୍ଲକ ରାହାମା ତେରମାଣପୁରଠାରେ ୨୦ ଫୁଟର ଘାଇ ସୃଷ୍ଟି ହୋଇଛି । ଫଳରେ ସ୍ଥାନୀୟ ଅଞ୍ଚଳ ଜଳବନ୍ଦୀ ହୋଇଛି । ତେରମାଣପୁର, ପୋଟସାହି ଓ ମଠ ସାହି ଭିତରେ ବନ୍ୟାଜଳ ପ୍ରବେଶ କରିଛି । ଭୟରେ ୧୦୦ରୁ ଅଧିକ ପରିବାର ତାଳଦଣ୍ଡା ବନ୍ଧ ଉପରକୁ ଚାଲି ଆସିଛନ୍ତି । ପ୍ରଶାସନ ଘଟଣାସ୍ଥଳରେ ପହଞ୍ଚି ଘାଇ ମରାମତି ପାଇଁ ଉଦ୍ୟମ କରୁଛି । ଉଦ୍ଧାରକାରୀ ଦଳ ଲୋକଙ୍କୁ ସୁରକ୍ଷିତ ଉଦ୍ଧାର କରୁଛନ୍ତି ।
ଆଜି ଶ୍ରୀମନ୍ଦିର ପରିଚାଳନା କମିଟି ବୈଠକ, ବନକଲାଗି ନୀତି ବିଳମ୍ବ ସମ୍ପର୍କରେ ହେବ ଅନୁଧ୍ୟାନ
ପୁରୀ: ଆଜି ବସିବ ଶ୍ରୀମନ୍ଦିର ପରିଚାଳନା କମିଟି ବୈଠକ । ନିଳାଦ୍ରୀ ଭକ୍ତ ନିବାସରେ ଦିନ ୧୧ଟା ସମୟରେ ବୈଠକ ବସିବାକୁ ଥିବା ବେଳେ ପୂର୍ବ ବିବରଣୀ ପଠନ ଓ ଅନୁମୋଦନ ହେବା ସହ ଗତ ରଥ ଓ ସ୍ନାନ ଯାତ୍ରାର ସମୀକ୍ଷା କରାଯିବ । ଏଥିସହ ସେବାୟତ ବାସଗୃହ, ଆଦର୍ଶ ଗୁରୁକୁଳ ସମ୍ପର୍କରେ ଆଲୋଚନା କରାଯିବ ବାଉଳି ମଠ ଉନ୍ନତି କରଣ ସହ ଶ୍ରୀଜଗନ୍ନାଥ ମନ୍ଦିର ଭୂମି ଓ ପ୍ରକଳ୍ପ ସବକମିଟି ବୈଠକର ବିବରଣୀ ବିଷୟରେ ଆଲୋଚନା କରାଯିବ । ତେବେ ଦୀର୍ଘ ଏକମାସ ହେବ ମହାପ୍ରଭୁଙ୍କ ବନକ ଲାଗି ହୋଇନଥିବା ବେଳେ ଆସନ୍ତା ୯ ତାରିଖରେ ଏହା କରାଯିବ ବୋଲି ସ୍ଥିରୀକୃତ କରାଯାଇଛି । ତେବେ କାହିଁକି ନୀତି ବିଳମ୍ବ ହେଲା, କେଉଁଠାରେ ସମନ୍ୱୟ ଅଭାବ ରହିଲା ସେ ସମ୍ବନ୍ଧରେ ମଧ୍ୟ ଆଲୋଚନା କରାଯିବ ।
ଶ୍ରୀମନ୍ଦିର ଚାରିଦ୍ୱାର ଭକ୍ତଙ୍କ ନିମନ୍ତେ ଖୋଲାଯିବା ପ୍ରସଙ୍ଗ ବିଷୟରେ ମଧ୍ୟ ସଭାପତିଙ୍କ ଅନୁମୋଦନ କ୍ରମେ ଆଲୋଚନା କରାଯାଇପାରେ । ବୈଠକରେ ପରିଚାଳନା କମିଟିର ସ୍ଥାୟୀ ସଭାପତି ଗଜପତି ଦିବ୍ୟସିଂହ ଦେବ, ଶ୍ରୀମନ୍ଦିର ମୁଖ୍ୟ ପ୍ରଶାସକ, ଜିଲ୍ଲାପାଳ, ଏସ୍ପିଙ୍କ ସମେତ ଶ୍ରୀମନ୍ଦିର ପ୍ରଶାସନର ବରିଷ୍ଠ ଅଧିକାରୀ ଓ ପରିଚାଳନା କମିଟିର ସମସ୍ଥ ସଦସ୍ୟ ଉପସ୍ଥିତ ରହିବେ ।
ବୈତରଣୀ ବନ୍ୟାରେ ଗମ୍ଭୀର ହେଉଛି ସ୍ଥିତି, ପାଣି ଘେରରେ ରହିଛନ୍ତି ୪୦ ହଜାର ଲୋକ
ଭଦ୍ରକ: ବୈତରଣୀ ବନ୍ୟାରେ ଗମ୍ଭୀର ହେଉଛି ସ୍ଥିତି । ଭଦ୍ରକ ଜିଲ୍ଲା ଧାମନଗର ଓ ଚାନ୍ଦବାଲିରେ ୨୫ ପଞ୍ଚାୟତ ଜଳବନ୍ଦୀ ହୋଇଛି । ପ୍ରାୟ ୪୦ ହଜାର ଲୋକ ପାଣି ଘେରରେ ରହିଛନ୍ତି । ଆଖଣ୍ଡଳମଣି-ଭଦ୍ରକ ମୁଖ୍ୟରାସ୍ତାର ୬ଟି ସ୍ଥାନରେ ୪ରୁ ୫ ଫୁଟର ପାଣି ପ୍ରବାହିତ ହେଉଛି । ପାଣି ବଢୁଥିବାରୁ ଲୋକ ଆତଙ୍କିତ ଅବସ୍ଥାରେ ରହିଛନ୍ତି । ବନ୍ୟା ପାଣିରେ ବିଷଧର ସାପକୁ ନେଇ ଭୟ ବଢୁଥିବାବେଳେ ପ୍ରଶାସନ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛି । ଏନଡିଆରଫ, ଓଡ୍ରାଫ, ଅଗ୍ନିଶମ ବାହିନୀ ତରଫରୁ ଉଦ୍ଧାର କାର୍ଯ୍ୟ କରାଯାଉଛି ।
ସିନେମାରେ RAW ଏଜେଣ୍ଟ ଭୂମିକାରେ ନଜର ଆସିବେ ସୀମା ହାଇଦର !
ନୂଆଦିଲ୍ଲୀ: ସିନେମାରେ RAW ଏଜେଣ୍ଟ ଭୂମିକାରେ ନଜର ଆସିବେ ସୀମା ହୈଦର। ଆଗାମୀ ଚଳଚ୍ଚିତ୍ର ‘ଏ ଟେଲର୍ ମର୍ଡର ଷ୍ଟୋରୀ’ ପାଇଁ ତାଙ୍କ ଅଡ଼ିସନ୍ ନିଆଯାଇଛି। ଜାନି ଫାୟାରଫକ୍ସ ପ୍ରଡକ୍ସନ୍ ହାଉସ୍ ଦିଲ୍ଲୀ ଗ୍ରେଟର ନୋଏଡାରେ ସୀମା ହୈଦରଙ୍କୁ ଭେଟିଛି।
ପ୍ରେମ ପାଇଁ ସୀମା ଲଙ୍ଘି ଭାରତ ଆସିଥିବା ପାକିସ୍ତାନ ଯୁବତୀ ସୀମା ହୈଦରଙ୍କ ସାଥ୍ ଦେଉଛି ଭାଗ୍ୟ। ବେଆଇନ ଭାବେ ଭାରତ ଆସିଥିବାରୁ ତାଙ୍କୁ ଅନେକ ଆଇନଗତ ସମସ୍ୟାର ସମ୍ମୁଖୀନ ହେବାକୁ ପଡ଼ିପାରେ ବୋଲି କୁହାଯାଉଥିଲେ ମଧ୍ୟ ଏପରି କିଛି ହୋଇନାହିଁ। ବରଂ ତାଙ୍କ ସହ କିଛି ଭିନ୍ନ ହେଉଛି। ସୀମାଙ୍କୁ ବଲିଉଡ୍ ବ୍ରେକ୍ ପାଇଁ ଆସିଛି ଅଫର୍। ଏଥିପାଇଁ ନିର୍ଦ୍ଦେଶକ ଅଡ଼ିସନ୍ ମଧ୍ୟ ନେଇ ସାରିଥିବା କୁହାଯାଉଛି।
ଜାନି ଫାୟାରଫକ୍ସ ପ୍ରଡକ୍ସନ୍ ହାଉସ୍ ଦିଲ୍ଲୀ ଗ୍ରେଟର ନୋଏଡ଼ାରେ ସୀମା ହୈଦରଙ୍କୁ ଭେଟିଛି। ଆଗାମୀ ଚଳଚ୍ଚିତ୍ର ‘ଏ ଟେଲର୍ ମର୍ଡର ଷ୍ଟୋରୀ’ ପାଇଁ ତାଙ୍କ ଅଡ଼ିସନ୍ ନିଆଯାଇଛି। ଉଦୟପୁର ଟେଲର କହ୍ନେୟା ଲାଲଙ୍କୁ ଇସଲାମିକ୍ କଟ୍ଟରପନ୍ଥୀ କରିଥିବା ହତ୍ୟା ମାମଲା ଉପରେ ଆଧାର କରି ଏହି ଚଳଚ୍ଚିତ୍ର ନିର୍ମାଣ କରାଯାଉଛି। ଏଥିରେ ସୀମା ଜଣେ RAW (ରିସର୍ଚ୍ଚ ଆଣ୍ଡ ଆନାଲିସିସ୍ ୱିଙ୍ଗ୍)ର ଏଜେଣ୍ଟ ଭାବେ ଅଭିନୟ କରିବେ। ଚଳଚ୍ଚିତ୍ରର ନିର୍ଦ୍ଦେଶକ ଜୟନ୍ତ ସିହ୍ନା ଏବଂ ଭାରତ ସିଂହ ଏନେଇ ସୀମାଙ୍କ ସ୍ୱାମୀ ସଚିନଙ୍କୁ ମଧ୍ୟ ଭେଟିଛନ୍ତି।
ଅନଲାଇନ୍ ଗେମ୍ PUBG ମାଧ୍ୟମରେ ପାକିସ୍ତାନର ସୀମା ଉତ୍ତର ପ୍ରଦେଶର ସଚିନଙ୍କ ପ୍ରେମରେ ପଡ଼ିଥିଲେ। ସୀମାଙ୍କର ସ୍ୱାମୀ ଏବଂ ୪ ସନ୍ତାନ ଥିଲେ ମଧ୍ୟ ସେ ସଚିନଙ୍କ ପାଇଁ ଭାରତ ଚାଲି ଆସିଥିଲେ। ପାକିସ୍ତାନ ସହ ଭାରତର ‘ସୀମା’ ପ୍ରତିବନ୍ଧକ ଥିବାରୁ ସେ ନେପାଳ ଦେଇ ଭାରତ ପ୍ରବେଶ କରିଥିଲେ। ବେଆଇନ ଭାବେ ଭାରତ ପ୍ରବେଶ କାରଣରୁ ଉଭୟଙ୍କୁ ଗିରଫ କରିଥିଲା ଦିଲ୍ଲୀ ପୁଲିସ। ପୋଲିସ ତାଙ୍କୁ ଆଇଏସଆଇ ସନ୍ଦିଗ୍ଧ ଭାବେ ମଧ୍ୟ ଖୋଳତାଡ କରୁଛି ।
ସଚିନଙ୍କ ପ୍ରେମରେ ପଡ଼ି ଚାରି ପିଲାଙ୍କ ସହ ନେପାଳ ଦେଇ ବେଆଇନ ଭାବେ ଭାରତ ଆସିଥିବା ପାକିସ୍ତାନୀ ମହିଳା ସୀମା ହାଇଦର ଏବେ ଫିଲ୍ମ ସାଇନ୍ କରିଛନ୍ତି। ଖୁବ୍ ଶୀଘ୍ର ସେ ଜଣେ ଅଭିନେତ୍ରୀ ହେବାକୁ ଯାଉଛନ୍ତି। ଏବେ ତାଙ୍କୁ ନେଇ ଆଉ ଏକ ବଡ଼ ଖବର ସାମ୍ନାକୁ ଆସିଛି। ବର୍ତ୍ତମାନ ଏକ ଦଳ ସୀମାଙ୍କୁ ନିର୍ବାଚନ ଲଢ଼ିବାକୁ ପ୍ରସ୍ତାବ ଦେଇଥିବା ନେଇ ଚର୍ଚ୍ଚା ହେଉଛି।
କପିଲଙ୍କୁ କାହିଁକ ଏଭଳି କହିଲେ ଜାଡେଜା…
ନୂଆଦିଲ୍ଲୀ: ଭାରତୀୟ ଖେଳାଳିଙ୍କୁ ଅହଙ୍କାରୀ ବୋଲି ନିକଟରେ ଆକ୍ଷେପ କରିଥିଲେ କପିଲ ଦେବ। ଏମିତିକି ଟଙ୍କା ପାଇବା କାରଣରୁ ଖେଳାଳିମାନେ ଗର୍ବି ହୋଇପଡିଛନ୍ତି ବୋଲି କହିବାକୁ ମଧ୍ୟ ପଛାଇନାହାଁନ୍ତି। ଯାହାପରେ କପିଲଙ୍କୁ କଡ଼ା ଜବାବ ଦେଇଛନ୍ତି ଟିମ୍ ଇଣ୍ଡିଆର ଖେଳାଳି ।
କପିଲଙ୍କୁ ଜବାବ ଦେଇ ଜାଡେଜା କହିଛନ୍ତି, ଯେତେବେଳେ ଭାରତ ମ୍ୟାଚ୍ ହାରେ, ସେତେବେଳେ ଲୋକମାନେ ଏଭଳି ଟିପ୍ପଣୀ ଦେଇଥାନ୍ତି । ସେ ଆହୁରି କହିଛନ୍ତି, ଖେଳାଳିଙ୍କ ଧ୍ୟାନ କେବଳ ଟିମର ଜିତ୍ ଉପରେ ଥିଲା। ସେମାନଙ୍କର ଅନ୍ୟକୌଣସି ବ୍ୟକ୍ତିଗତ ଏଜେଣ୍ଡା ନଥିଲା। ପୂର୍ବତନ ଖେଳାଳିଙ୍କର ନିଜର ମତାମତ ରଖିବାର ଅଧିକାର ରହିଛି । କିନ୍ତୁ ମୋତେ ଲାଗୁନି ଏହି ଟିମରେ କେହି ଅହଙ୍କାରି ଅଛନ୍ତି। ସମସ୍ତେ ନିଜର ଶତପ୍ରତିଶତ ଦେଉଛନ୍ତି । ତେବେ କ୍ରିକେଟ ଲିଜେଣ୍ଡ ତଥା ୧୯୮୩ ବିଶ୍ୱକପ ବିଜେତା ଅଧିନାୟକ କପିଲ ଦେବ ଭାରତୀୟ ଖେଳାଳିଙ୍କୁ ଏଭଳି କାହିଁକି କହିଛନ୍ତି, କ‘ଣ ଥିଲା ପୂରା ଘଟଣା ଆସନ୍ତୁ ଜାଣିବା…
ୱେଷ୍ଟଇଣ୍ଡିଜ୍ ବିପକ୍ଷ ଦ୍ୱିତୀୟ ଦିନିକିଆରେ ଲଜ୍ଜାଜନକ ପରାଜୟ ପାଇଁ ପୂର୍ବତନ ଅଧିନାୟକ କପିଲ ଦେବ ଭାରତୀୟ ଦଳକୁ ସମାଲୋଚନା କରିଛନ୍ତି। ସେ କହିଛନ୍ତି ଯେ ପୂର୍ବରୁ ଆଇପିଏଲ ଭଳି ବଡ଼ ଏବଂ ଲମ୍ବା ସମୟ ଧରି ଟୁର୍ଣ୍ଣାମେଣ୍ଟ ହେଉନଥିଲା । ହେଲେ ଆଇପିଏଲ ଆରମ୍ଭ ହେବା ପରଠୁ ଖେଳାଳିଙ୍କ ପାଖରେ ଟଙ୍କାର ଅଭାବ ରହୁନି। ଯେଉଁଥିପାଇଁ ସେମାନେ ଅହଙ୍କାରରେ ବୁଡି ରହୁଛନ୍ତି। ଖେଳାଳିମାନେ ନିଜକୁ ଏତେ ଜ୍ଞାନୀ ଭାବୁଛନ୍ତି ଯେ, ସେମାନେ କୌଣସି ବରିଷ୍ଠଙ୍କ ଠାରୁ ପରାମର୍ଶ ଲୋଡ଼ିବାର ଆବଶ୍ୟକତା ଅନୁଭବ କରନ୍ତି ନାହିଁ | ସେହିପରି ରାଜନୀତି ଏବଂ ଆଇପିଏଲ ଟଙ୍କା ଯୋଗୁ ଭାରତୀୟ କ୍ରିକେଟ ଦୁଃଖଦ ସମୟ ଦେଇ ଗତି କରୁଛି ବୋଲି ପୂର୍ବରୁ ଗାଭାସ୍କର କହିଥିଲେ ।
ଘୁଞ୍ଚିଲା ୟୁଜି ଓ ପିଜି ନାମଲେଖା ତାରିଖ
ଭୁବନେଶ୍ୱର: ଘୁଞ୍ଚିଲା ୟୁଜି ଓ ପିଜି ନାମଲେଖା ତାରିଖ। ରାଜ୍ୟରେ ବର୍ଷାଜନିତ ଖରାପ ପାଣିପାଗ ଯୋଗୁଁ ଦେଖାଦେଇଥୀବା ପରିସ୍ଥିତିକୁ ଦୃଷ୍ଟିରେ ରଖି ଉଚ୍ଚଶିକ୍ଷା ବିଭାଗ ପକ୍ଷରୁ ନାମଲେଖା ତାରିଖରେ ପରିବର୍ତ୍ତନ କରାଯାଇଛି।
ୟୁଜି ନାମଲେଖା ଓ ଆବେଦନକାରୀଙ୍କ ଦ୍ବିତୀୟ ପର୍ଯ୍ୟାୟ ଚୟନ ଏବଂ ପିଜି ପ୍ରଥମ ପର୍ଯ୍ୟାୟ ଚୟନକୁ ଆଗାମୀ ୫ ତାରିଖ ଶନିବାରକୁ ଘୁଞ୍ଚାଇ ଦିଆଯାଇଛି। ଏନେଇ ସୂଚନା ଦେଇଛନ୍ତି ଉଚ୍ଚଶିକ୍ଷା ବିଭାଗ ଉପ ନିର୍ଦ୍ଦେଶକ।
ମୁଣ୍ଡଳୀରେ ପିକ୍ ଛୁଇଁଲାଣି ମହାନଦୀ, ୯ ଲକ୍ଷ ୨୦ ହଜାର କ୍ୟୁସେକ ଜଳ ପ୍ରବାହିତ
କଟକ: ମୁଣ୍ଡଳୀରେ ପିକ୍ ଛୁଇଁଲାଣି ମହାନଦୀ। ଏବେ ୯ ଲକ୍ଷ ୨୦ ହଜାର କ୍ୟୁସେକରେ ପ୍ରବାହିତ ହେଉଛି ନଦୀ ଜଳ। ଏହି ସ୍ତର କିଛି ଘଣ୍ଟା ଧରି ଜାରିରହିବ, ସକାଳକୁ କମିବ ବୋଲି ସୂଚନା ଦେଇଛନ୍ତି ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଭକ୍ତ ରଞ୍ଜନ ମହାନ୍ତି ।
ଏବେ ମହାନଦୀର ତଳମୁଣ୍ଡ ଉପରେ ଆମର ନଜର ରହିଥିବା ବେଳେ ଜେନାପୁର ନିକଟରେ ବ୍ରାହ୍ମଣୀର ଜଳସ୍ତର ଖସୁଛି । ଆଖୁଆପଦାରେ କମୁଛି ବୈତରଣୀ ଜଳସ୍ତର । ଜଗତସିଂହପୁର, କେନ୍ଦ୍ରାପଡ଼ା, ପୁରୀ, ଖୋର୍ଦ୍ଧା ଉପରେ ଏବେ ନଜର । ୧୮ରୁ ୨୪ ଘଣ୍ଟାରେ ଜଗତସିଂହପୁର, କେନ୍ଦ୍ରାପଡ଼ା ଓ ପୁରୀରେ ବନ୍ୟାଜଳ ପାସ କରିବ । ଏଥିପାଇଁ ଲୋକେ ଭୟଭୀତ ହୁଅନ୍ତୁ ନାହିଁ ବୋଲି ସେ ପ୍ରକାଶ କରିଛନ୍ତି।
ମହାନଦୀରେ ଧିରେ ଧିରେ ବଢୁଛି ଜଳସ୍ତର, ଚିନ୍ତାରେ ଚାଷୀ
କଟକ: ମହାନଦୀରେ ଧିରେ ଧିରେ ବଢୁଛି ଜଳସ୍ତର। ଆସନ୍ତା ଦୁଇଦିନ ମଧ୍ୟରେ ୯ ହଜାର ୫୦୦ ଶହ କ୍ୟୁସେକ ଜଳ ପ୍ରବାହିତ ହେବ ମହାନଦୀରେ। ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ସରିଛି। ଅନ୍ୟପକ୍ଷରେ କୁଜଙ୍ଗ ବ୍ଲକର ଜିଲ୍ଲାନାସୀ ପଞ୍ଚାୟତ, କୁଜଙ୍ଗ ପଞ୍ଚାୟତ, ବଡବାଲିକଣି ପଞ୍ଚାୟତ, ସାଇଲୋ ପଞ୍ଚାୟତ ପରିବା ଚାଷୀ ଏବେ ହତାଶ ହୋଇପଡିଛନ୍ତି।
ଏହି ପଞ୍ଚାୟତ ଗୁଡିକ ମୁଖ୍ୟତଃ ପରିବା ଚାଷ ଉପରେ ନିର୍ଭର କରୁଥିବା ବେଳେ ପରିବା ଦର ଅଧିକ ଥିବାରୁ ବିଲରେ ପଶିଲେ ଅଧିକ କ୍ଷୟକ୍ଷତି ହେବା ଆଶଙ୍କା ଦେଖାଦେଇଛି। ବନ୍ୟା ପାଣି ବଢିବା ପୂର୍ବରୁ ଫସଲ ସବୁ ବିକଳରେ ତୋଳି ନେଉଛନ୍ତି ଚାଷୀ। ତେବେ ବନ୍ୟା ପାଣିକୁ ନେଇ ଜଳସମ୍ପଦ ବିଭାଗ ସଜାଗ ରହିଛି ଏବଂ ଆବଶ୍ୟକୀୟ ବାଲିବସ୍ତା, ବହ୍ଲା ମହଜୁତ ରହିଛି ବୋଲି କହିଛନ୍ତି ପାରାଦ୍ଵୀପ ଡିଭିଜନ ଜଳସମ୍ପଦ ବିଭାଗ ଏସଡିଓ।