କଟକ: ହାଇକୋର୍ଟ ପାଇଁ ଗୌରବମୟ ଅଧ୍ୟାୟ । ଓଡ଼ିଆରେ ଆସିଲା ହାଇକୋର୍ଟଙ୍କ ପ୍ରଥମ ରାୟ । ୭୫ ବର୍ଷ ପୂର୍ତ୍ତି ଅବସରରେ ହାଇକୋର୍ଟ ଇତିହାସରେ ଆଉ ଏକ ଗୌରବମୟ ଅଧ୍ୟାୟ ଯୋଡ଼ି ହୋଇଛି । ଓଡ଼ିଆ ଭାଷାରେ ହାଇକୋର୍ଟ ପକ୍ଷରୁ ଏକ ରାୟ ପ୍ରକାଶ ପାଇଛି। ଯାହା ହାଇକୋର୍ଟର ଆଞ୍ଚଳିକ ଭାଷାରେ ପ୍ରଥମ ରାୟ ବୋଲି କୁହାଯାଉଛି । ସୌରଭ, ଏନଜିଓ ବନାମ ରାଜ୍ୟ ସରକାର ମାମଲାର ଶୁଣାଣି କରି ହାଇକୋର୍ଟ ଏହି ରାୟ ପ୍ରକାଶ କରିଛନ୍ତି । ଗତ ଜୁଲାଇ ୧୯ରେ ଖଣ୍ଡପୀଠ ଏହି ମାମଲାର ଶୁଣାଣି ଶେଷ କରି ରାୟକୁ ସଂରକ୍ଷିତ ରଖିଥିଲେ । ଅନୁସୂଚିତ ଜାତି ଓ ଜନଜାତି ବିଭାଗର ଏକ ନିର୍ଦ୍ଦେଶନାମାକୁ ବିରୋଧ କରି ଦାୟର ଏହି ମାମଲାକୁ ହାଇକୋର୍ଟ ଖାରଜ କରିଥିଲେ ଓ ଏହାର ରାୟ ଓଡ଼ିଆରେ ପ୍ରକାଶ ପାଇଛି ।
’SCB ମେଡିକାଲ କଲେଜ ଓ ହସ୍ପିଟାଲ ଏକ ମିନି ଇଣ୍ଡିଆ’: ରାଷ୍ଟ୍ରପତି
କଟକ: ସାରା ଦେଶରେ ଏସସିବିର ପ୍ରସିଦ୍ଧି ରହିଛି । ଓଡ଼ିଶା ସହ ପଡ଼ୋଶୀ ରାଜ୍ୟର ରୋଗୀମାନେ ଏଠାକୁ ଆସୁଛନ୍ତି । ସବୁବର୍ଗର ଲୋକଙ୍କୁ ନିଃଶୁଳ୍କ ସେବା ଯୋଗାଉଛି ଏସସିବି ମେଡିକାଲ । SCB ମେଡିକାଲ କଲେଜ ଓ ହସ୍ପିଟାଲ ଏକ ମିନି ଇଣ୍ଡିଆ । ଡାକ୍ତରୀ ଏକ ବୃତ୍ତି ନୁହେଁ ଏକ ବ୍ରତ । ଆଜି କଟକ ଏସସିବି ମେଡିକାଲ କଲେଜର ବାର୍ଷିକ ଉତ୍ସବରେ ସାମିଲ ହୋଇ ଏହା କହିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଏହି ଅବସରରେ ରାଷ୍ଟ୍ରପତି ଏକ ସ୍ମରଣୀକାର ଉନ୍ମୋଚନ କରିଥିଲେ । କାର୍ଯ୍ୟକ୍ରମରେ ସାମିଲ ହୋଇ ସ୍ୱାସ୍ଥ୍ୟମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି, SCBକୁ ବିଶ୍ୱସ୍ତରୀୟ କରିବା କାମ ଚାଲୁରହିଛି । ମୁଖ୍ୟମନ୍ତ୍ରୀଙ୍କ ଦୂରଦୃଷ୍ଟିକୁ କାର୍ଯ୍ୟକାରୀ କରାଯାଉଛି । ୨ ଦଶନ୍ଧିରେ ରାଜ୍ୟରେ ସ୍ୱାସ୍ଥ୍ୟସେବାରେ ବ୍ୟାପକ ଉନ୍ନତି ଆସିଛି । ମୁଖ୍ୟମନ୍ତ୍ରୀଙ୍କ ପ୍ରଚେଷ୍ଟାରୁ ଡାକ୍ତର ଆବଶ୍ୟକତା ଦୃଷ୍ଟିରୁ ଓଡ଼ିଶା ଏକ ବଳକା ରାଜ୍ୟ ହୋଇପାରିଛି ବୋଲି କହିଛନ୍ତି ସ୍ବାସ୍ଥ୍ୟ ମନ୍ତ୍ରୀ । କାର୍ଯ୍ୟକ୍ରମରେ ସ୍ବାଗତ ସମ୍ଭାଷଣ ଦେଇଥିଲେ ଏସସିବି ଡିନ୍ ।
କେନ୍ଦ୍ର ସରକାର ବିରୋଧରେ ଅନାସ୍ଥା ମଞ୍ଜୁର, ବିରୋଧୀଙ୍କ ପ୍ରସ୍ତାବ ଗ୍ରହଣ କଲେ ଲୋକସଭା ବାଚସ୍ପତି
ନୂଆଦିଲ୍ଲୀ: ଏନଡିଏ ଭର୍ସେସ ଇଣ୍ଡିଆ । ସଂସଦରେ ମଣିପୁର ନେଇ ଗତିରୋଧ ଜାରି । ଆଜି ବି ବିରୋଧରେ ଜୋରଦାର ହଙ୍ଗାମା । ଏନଡିଏ ସରକାର ବିରୋଧରେ ଅନାସ୍ଥା ପ୍ରସ୍ତାବ ଆଣିଲେ ବିରୋଧୀ । କଂଗ୍ରେସ ଓ ବିଆରଏସ୍ ଆଣିଥିବା ଅନାସ୍ଥା ପ୍ରସ୍ତାବ ଗ୍ରହଣ କରିବା ସହ ଆଲୋଚନା ପାଇଁ ରାଜି ହୋଇଛନ୍ତି ଲୋକସଭା ବାଚସ୍ପତି । ଉଭୟ ଗୃହରେ ପ୍ରଧାନମନ୍ତ୍ରୀଙ୍କ ବୟାନ ପାଇଁ ବିରୋଧୀ ଜିଦ୍ ଧରିଥିବା ବେଳେ ସରକାର କିନ୍ତୁ ଏଥିରେ ଅରାଜି । ଫଳରେ ୫ଦିନ ଧରି ସଂସଦରେ ଅଚଳାବସ୍ଥା ଲାଗି ରହିଛି । ଧାରଣାସ୍ଥଳରେ ପହଞ୍ଚି ସଞ୍ଜୟ ସିଂଙ୍କ ସହ ଆଲୋଚନା କରିଛନ୍ତି କଂଗ୍ରେସ ସାଂସଦ ସୋନିଆ ଗାନ୍ଧୀ । ମୋଦି ସରକାର ୨୦୧୮ରେ ତେଲୁଗୁ ଦେଶମ ପାର୍ଟି ଆଣିଥିବା ଅନାସ୍ଥା ପ୍ରସ୍ତାବର ସାମ୍ନା କରିଥିଲେ । ଏହା କିନ୍ତୁ ଆଲୋଚନା ପରେ ୧୨୬-୩୨୫ ଭୋଟରେ କାଟ ଖାଇଯାଇଥିଲା । ଅନାସ୍ଥା ସପକ୍ଷରେ ୧୨୬ ଭୋଟ ପଡିଥିବାବେଳେ ବିରୋଧରେ ୩୨୫ ଭୋଟ ପଡିଥିଲା ।
ସର୍ଭିସ ରିଭଲଭରରୁ ନିଜକୁ ଗୁଳିକଲେ ଏସଆଇ
ଜୟପୁର: ସର୍ଭିସ ରିଭଲଭରରୁ ନିଜକୁ ଗୁଳିକଲେ ଏସଆଇ । କୋରାପୁଟ ଜିଲ୍ଲା ପୋଲିସ ମୁଖ୍ୟାଳୟର ଘଟଣା । ନିଜକୁ ଗୁଳିକରି ଏସଆଇ ନରେନ୍ଦ୍ର ବିଶ୍ବାଳ ଆତ୍ମହତ୍ୟା ଉଦ୍ୟମ କରିଛନ୍ତି । ଗୁରୁତର ଅବସ୍ଥାରେ ତାଙ୍କୁ ପ୍ରଥମେ କୋରାପୁଟ ମେଡିକାଲ କଲେଜ ଓ ପରେ ବିଶାଖାପାଟଣାକୁ ସ୍ଥାନାନ୍ତର କରାଯାଇଛି । ନରେନ୍ଦ୍ରଙ୍କ ବାମପାଖ ମୁହଁରେ ଗୁଳି ବାଜିଥିବା ସୂଚନା ମିଳିଛି । ଏହି ସମୟରେ ଏସପି ମଧ୍ୟ କାର୍ଯ୍ୟାଳୟରେ ଉପସ୍ଥିତ ଥିଲେ । ତେବେ କେଉଁ କାରଣ ପାଇଁ ସେ ଆତ୍ମହତ୍ୟା ଉଦ୍ୟମ କରିଛନ୍ତି ସେନେଇ ସ୍ପଷ୍ଟ ସୂଚନା ମିଳିନାହିଁ । ଘଟଣାସ୍ଥଳରେ ଏସପି ତଦନ୍ତ ଆରମ୍ଭ କରିଛନ୍ତି ।
ସଂସଦରେ ମହିଳା ସଂରକ୍ଷଣ ଦାବି ଦୋହରାଇଲା ବିଜେଡି, ପ୍ରସଙ୍ଗ ଉଠାଇଲେ ସାଂସଦ ସସ୍ମିତ ପାତ୍ର
ନୂଆଦିଲ୍ଲୀ: ପାର୍ଲାମେଣ୍ଟ ଓ ବିଧାନସଭାରେ ମହିଳାଙ୍କ ଲାଗି ୩୩ ପ୍ରତିଶତ ସିଟ୍ ସଂରକ୍ଷଣ ଦାବି ପୁଣି ଦୋହରାଇଛି ବିଜେଡି । ରାଜ୍ୟସଭାରେ ମହିଳା ସଂରକ୍ଷଣ ଦାବି ଉଠାଇଛନ୍ତି ବିଜେଡି ସାଂସଦ ଡ. ସସ୍ମିତ ପାତ୍ର । ସଶକ୍ତ ଭାରତ ଲାଗି ମହିଳାଙ୍କ ପ୍ରତିନିଧିତ୍ୱକୁ ବିଜେଡି ଅଗ୍ରାଧିକାର ଦେଇଆସୁଛି । କେନ୍ଦ୍ର ସରକାର ଏହାକୁ ନେଇ ପ୍ରତିଶ୍ରୁତି ରକ୍ଷା କରୁନାହାଁନ୍ତି । ଅନ୍ୟପଟେ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ନିକଟରେ ବାରମ୍ବାର ଦାବି କରିଆସୁଛନ୍ତି । ୨୦୧୯ରେ ମୁଖ୍ୟମନ୍ତ୍ରୀ ୩୩ ପ୍ରତିଶତ ଲୋକସଭା ଟିକେଟ ମହିଳାଙ୍କୁ ଦେଇ ଐତିହାସିକ ପଦକ୍ଷେପ ନେଇଥିଲେ ।
ସେହିପରି ବିଜେଡି ପ୍ରତିନିଧି ମଣ୍ଡଳ ବିଭିନ୍ନ ରାଜନୈତିକ ଦଳଙ୍କୁ ବୁଝାଇ ସମର୍ଥନ ମାଗିଥିଲେ । ବିଜେଡିର ଏହି ପଦକ୍ଷେପକୁ ଅନେକ ରାଜନୈତିକ ଦଳ ସମର୍ଥନ ଦେଇଥିଲେ । ତା ସତ୍ତ୍ବେ ମଧ୍ୟ ଏଯାଏଁ ମହିଳା ସଂରକ୍ଷଣ ବିଲ ପାସ୍ ହୋଇପାରିଲାନି । ତେଣୁ ତୁରନ୍ତ ମହିଳା ସଂରକ୍ଷଣ ବିଲ୍ ପାରିତ ନେଇ ରାଜ୍ୟସଭାରେ ଦାବି ଦୋହରାଇଛନ୍ତି ସସ୍ମିତ । ଏହାଦ୍ବାରା ଦେଶକୁ ସଶକ୍ତ ମହିଳା ପ୍ରତିନିଧି ମିଳିବା ସହ ୬୬ କୋଟି ମହିଳାଙ୍କ ସ୍ବପ୍ନ ପୂରଣ ହେବ ବୋଲି ସେ କହିଛନ୍ତି ।
ପ୍ରେମିକାର ଭାଇକୁ ରାସ୍ତାରୁ ହଟାଇବାକୁ ପ୍ରେମିକ ଦେଲା ସୁପାରି, ପାଟ୍ରୋଲିଂ ବେଳେ ଧରା ପଡ଼ିଗଲେ କିଲର
ବ୍ରହ୍ମପୁର: ଧରାପଡ଼ିଗଲା ଅନୈତିକ ସମ୍ପର୍କ । ପ୍ରେମିକାର ଭାଇକୁ ରାସ୍ତାରୁ ହଟାଇବାକୁ ପ୍ରେମିକ ଦେଲା ସୁପାରି । ହେଲେ ପ୍ରେମିକର ସୁପାରି କିଲିଂ ପ୍ଲାନ୍ ପଣ୍ଡ କରିଦେଲା ଦିଗପହଣ୍ଡି ପୋଲିସ । ୨ଟି ଖଣ୍ଡା ଓ ବୋମା ଧରି ବୁଲୁଥିବା ମୁଖ୍ୟ ଅଭିଯୁକ୍ତ ସମେତ ୫ ସୁପାରୀ କିଲରଙ୍କୁ ଗିରଫ କରିଛି ପୋଲିସ । ବ୍ରହ୍ମପୁର ଟାଉନ ଥାନା ଅଞ୍ଚଳରେ ମର୍ଡର ଯୋଜନା ଚରିତାର୍ଥ କରିବା ପୂର୍ବରୁ ଅଭିଯୁକ୍ତକୁ କାବୁ କରିଛି ପୋଲିସ ।
ସୂଚନା ଅନୁସାରେ, ଦିଗପହଣ୍ଡି ଅନ୍ତେଇ ଗାଁର ଉଦୟନାଥ ସେଠୀ ତାଙ୍କ ଶଳା ଭାଉଜ ପିଙ୍କି ସେଠୀଙ୍କ ସହ ଅନୈତିକ ସମ୍ପର୍କ ରଖିଥିଲେ । ହେଲେ ଏକଥା ପିଙ୍କିଙ୍କ ଭାଇ ଯୋଗୀ ସେଠୀ ଜାଣିଦେବାରୁ ତାଙ୍କୁ ରାସ୍ତାରୁ ହଟାଇବାକୁ ଅଜୁ ସେଠୀକୁ ସୁପାରି ଦେଇଥିଲା ଉଦୟ । ୪ଲକ୍ଷରେ ଡିଲ୍ ଫାଇନାଲ ହୋଇଥିଲା । ଯୋଗୀଙ୍କୁ ମାରିବାକୁ ସୂରଜ ପରିଡ଼ା, ରୂପକ ସେଠୀ, ନରେଶ ସେଠୀ ଓ ନିରାକାର ବେହେରାଙ୍କ ସହ ଯୋଗାଯୋଗ କରିଥିଲା ଅଜୁ ।
ଡିଲ୍ ଅନୁସାରେ ସମସ୍ତଙ୍କୁ ୫୦ ହଜାର ଟଙ୍କା ଲେଖାଏଁ ମିଳିଥାନ୍ତା । ୨୪ ତାରିଖରେ ମର୍ଡର ପ୍ଲଟ୍ ପ୍ରସ୍ତୁତ କରି ଗତକାଲି ଜାଗା ମୁଣ୍ଡରେ ପହଞ୍ଚିଥିଲେ ମୁଖ୍ୟ ଅଭିଯୁକ୍ତ ସହ ୫ଜଣ । ସାଙ୍ଗରେ ୨ଟି ଖଣ୍ଡା ଓ ବୋମା ନେଇ ଯାଇଥିଲେ । ହେଲେ ପୋଲିସ ପାଟ୍ରୋଲିଂ ବେଳେ ଧରା ପଡ଼ିଗଲେ ୫ ସୁପାରୀ କିଲର । ଫୁସ୍ ହେଲା ମର୍ଡର ପ୍ଲାନ୍ । ଅଭିଯୁକ୍ତଙ୍କୁ ଗିରଫ କରିବା ସହ ସେମାନଙ୍କଠାରୁ ଖଣ୍ଡା, ବୋମା, ୫ ହଳ ନୂଆ ଡ୍ରେସ, ୫ଟି ମୋବାଇଲ ଓ ୫ ହଜାର ୬ଶହ ଟଙ୍କା ଜବତ ହୋଇଛି ।
୮ ହଜାର ଟଙ୍କା ଲାଞ୍ଚ ନେବା ବେଳେ ମାଡିବସିଲା ଭିଜିଲାନ୍ସ, ASI ଗିରଫ
ବୌଦ୍ଧ: ଭିଜିଲାନ୍ସ ଜାଲରେ ପୁଣି ଜଣେ ପୋଲିସ ବାବୁ । ବୌଦ୍ଧ ବସଷ୍ଟାଣ୍ଡ ନିକଟରେ ଲାଞ୍ଚ ନେବା ବେଳେ ମାଡିବସିଲା ଭିଜିଲାନ୍ସ । ଭିଜିଲାନ୍ସ ପଞ୍ଝାରେ ଅନୁଗୁଳ ଜିଲ୍ଲା କିଆକଟା ଥାନା ASI ନବୀନ କୁମାର ଶତପଥୀ ।
ଏକ ପାରିବାରିକ କେସକୁ ରଫାଦଫା କରିବା ପାଇଁ ୮ ହଜାର ଟଙ୍କା ଲାଞ୍ଚ ନେଉଥିବା ବେଳେ ସେ ଧରାପଡିଛନ୍ତି । ଅନୁଗୁଳ ଜିଲ୍ଲା ଆଠମଲ୍ଲିକ ବେଲାଦୁଲାର ପଞ୍ଚାନନ ମେହେରଙ୍କ ପାରିବାରିକ କଳହ ସମାଧାନ ପାଇଁ ASI ନବୀନ ଶତପଥୀ ୧୫ ହଜାର ଟଙ୍କା ଦାବି କରିଥିଲେ । ପଞ୍ଚାନନ ପ୍ରଥମେ ୨ ହଜାର ଦେଇ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ ।
ଆଜି ଭିଜିଲାନ୍ସ ଯୋଜନା ମୁତାବକ ବୌଦ୍ଧ ବସଷ୍ଟାଣ୍ଡରେ ASI ନବୀନ ଶତପଥୀଙ୍କୁ ୮ ହଜାର ଟଙ୍କା ଦେଲା ବେଳେ ଧରିଛି । ତାଙ୍କ ଠାରୁ କେମିକାଲ ବୋଳା ଟଙ୍କା ଜବତ କରି ଗିରଫ କରିଛି ଭିଜିଲାନ୍ସ । ତେବେ ବୌଦ୍ଧ ବୁଟୁପାଲି ସ୍ଥିତ ବାସଭବନରେ ମଧ୍ୟ ରେଡ୍ ଚାଲିଥିବା ଜଣାପଡିଛି ।
ରବିବାରକୁ ଛାଡି ୮ ଦିନ ବ୍ୟାଙ୍କରେ ହେବନି କାମ, ଗ୍ରାହକ ଜାଣିନିଅନ୍ତୁ କେବେ ବନ୍ଦ ରହିବ
ନନ୍ଦିଘୋଷ ବ୍ୟୁରୋ: ବ୍ୟାଙ୍କ କର୍ମଚାରୀଙ୍କ ପାଇଁ ଖୁସି ଖବର । ଅଗଷ୍ଟ ମାସରେ ୧୪ ଦିନ ବନ୍ଦ ରହିବ ବ୍ୟାଙ୍କ । ୪ ରବିବାର ଓ ୨ ଶନିବାର ଅର୍ଥାତ ୬ ଦିନ ବ୍ୟାଙ୍କ ବନ୍ଦ ରହିବ । କିନ୍ତୁ ଅଲଗା ଅଲଗା ଜାଗାରେ ଅଲଗା ଅଲଗା କାରଣରୁ ୮ ଦିନ ବ୍ୟାଙ୍କରେ କାମ ହେବନି । ଅଗଷ୍ଟ ମାସରେ କେଉଁ କେଉଁ ଦିନ ବ୍ୟାଙ୍କରେ କାମ ବନ୍ଦ ରହିବ ଜାଣନ୍ତୁ ।
କୋଚି ଓ ଥିରୁଅନନ୍ତପୁରମରେ ୨୬ ରୁ ୨୯ ଅଗଷ୍ଟ ପର୍ଯ୍ୟନ୍ତ ଲଗାତାର ୪ ଦିନ ବ୍ୟାଙ୍କ ବନ୍ଦ ରହିବ । ୨୬ ଅଗଷ୍ଟ ଚତୁର୍ଥ ଶନିବାର ଓ ୨୭ ଅଗଷ୍ଟ ରବିବାର ରହିଛି । ସେପଟେ ୨୮ ଅଗଷ୍ଟରେ ଓନାମ ଓ ୨୯ ଅଗଷ୍ଟରେ ତିରୁଓଣମ କାରଣରୁ କେରଳର ଏହି ଦୁଇ ସହରରେ ବ୍ୟାଙ୍କ ବନ୍ଦ ରହିବ ।
ସେହିପରି ଚଳିତ ମାସର ଶେଷ ତାରିଖ ଅର୍ଥାତ ଜୁଲାଇ ୩୧ ସୁଦ୍ଧା ଏହି ଗୁରୁତ୍ବପୂର୍ଣ୍ଣ କାମ କରିନିଅନ୍ତୁ । କାରଣ ଇନକମ ଟ୍ୟାକ୍ସ ରିଟର୍ଣ୍ଣ ଫାଇଲ୍ କରିବା ସହ PM ଫସଲ ବୀମା ଯୋଜନାରେ ରେଜିଷ୍ଟ୍ରେସନ କରିବା ପାଇଁ ଏ ମାସ ଶେଷ ତାରିଖ ନିର୍ଦ୍ଧାରିତ ହୋଇଛି ।
ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସର ଚଢ଼ାଉ, ଏକକାଳୀନ ୩ଟି ସ୍ଥାନରେ ରେଡ୍
କଳାହାଣ୍ଡି: ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସର ଚଢ଼ାଉ। ଭବାନୀପାଟଣା ଜନସ୍ବାସ୍ଥ୍ୟ ବିଭାଗର ସହକାରୀ ଯନ୍ତ୍ରୀ କିଶୋର ଚନ୍ଦ୍ର ସାହୁଙ୍କ ଘରେ ଭିଜିଲାନ୍ସ ଛାପା । ଏକକାଳୀନ ୩ଟି ସ୍ଥାନରେ ଚାଲିଛି ରେଡ୍ । ଭବାନୀପାଟଣା ମନ୍ଦାରବଗିଚାପଡ଼ାରେ ଥିବା ଘର, ନର୍ଲା ବ୍ଲକରେ ବଲବସପୁରରେ ଥିବା ପୈତୃକ ଘର ଓ ସରକାରୀ କାର୍ଯ୍ୟାଳୟରେ ଚାଲିଛି ଚଢ଼ାଉ ।
ଚଢ଼ାଉରେ ଜଣେ ଅତିରିକ୍ତ ଏସପି, ୩ଜଣ ଡିଏସପି, ୪ଜଣ ଇନସ୍ପେକ୍ଟର ସାମିଲ ଅଛନ୍ତି । ପ୍ରାଥମିକ ପର୍ଯ୍ୟାୟରେ ସହକାରୀ ଯନ୍ତ୍ରୀଙ୍କ ଘରୁ ୨୦ଭରିରୁ ଅଧିକ ସୁନା ଠାବ ହୋଇଥିବା ସୂଚନା ମିଳିଛି । ଏକାଧୀକ ସ୍ଥାନରେ ଜମି ରହିଥିବା ଭିଜିଲାନ୍ସ ଜାଣିବାକୁ ପାଇଛି ।
ପିଲାଙ୍କୁ ଦେଖି ଗାଡି ଅଟକାଇଲେ, ନିଜେ ଓହ୍ଲାଇ ଚକୋଲେଟ ବାଣ୍ଟିଲେ ରାଷ୍ଟ୍ରପତି
କଟକ: ରାଷ୍ଟ୍ରପତିଙ୍କ କଟକ ଗସ୍ତ ଆରମ୍ଭ ହୋଇଥିଲା ମା’ କଟକ ଚଣ୍ଡୀଙ୍କ ଦର୍ଶନରୁ । ମନ୍ଦିରରେ ପହଞ୍ଚି ମା’ଙ୍କୁ ଦର୍ଶନ କରିବା ସହ ପୂଜାର୍ଚ୍ଚନା କରିଥିଲେ ରାଷ୍ଟ୍ରପତି । ରାଷ୍ଟ୍ରପତିଙ୍କୁ ସ୍ବାଗତ କରିଥିଲେ ମନ୍ଦିର କର୍ମକର୍ତ୍ତା । କଟକ ଚଣ୍ଡୀ ମନ୍ଦିର ପହଞ୍ଚିବା ବେଳେ ଉପସ୍ଥିତ ଲୋକଙ୍କୁ ହାତ ହଲାଇ ନମସ୍କାର କରିଥିଲେ ମ୍ୟାଡାମ ପ୍ରେସିଡେଣ୍ଟ । ଏହି ସମୟରେ ଛୋଟ ପିଲାଙ୍କୁ ଚକୋଲେଟ୍ ବାଣ୍ଟିଥିଲେ ମହାମହିମ ରାଷ୍ଟ୍ରପତି ।
କଟକ ଚଣ୍ଡୀ ମନ୍ଦିରରୁ ମାଆଙ୍କ ଦର୍ଶନ ସାରି ଶୈଳବାଳା ମହିଳା ମହାବିଦ୍ୟାଳୟ ଗଲାବେଳେ ଛକ ଉପରେ ଠିଆ ହୋଇଥିବା ପିଲାଙ୍କୁ ଦେଖି ଗାଡ଼ି ଅଟକାଇଥିଲେ । ନିଜେ ଗାଡ଼ିରୁ ଓହ୍ଲାଇ ପିଲାଙ୍କ ସହ ମିଶିବା ସହ ଚକୋଲେଟ୍ ଦେଇଥିଲେ । ପିଲାମାନେ ବି ପାଖରେ ରାଷ୍ଟ୍ରପତିଙ୍କୁ ପାଇ ବେଶ ଖୁସି ହୋଇଥିଲେ। ସେଠାରୁ ଶୈଳବାଳା ମହିଳା ମହାବିଦ୍ୟାଳୟକୁ ଯାଇ ମଧୁବାବୁଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଥିଲେ । ଏହାପରେ ନେତାଜୀଙ୍କ ଜନ୍ମସ୍ଥାନ ସଂଗ୍ରହାଳୟ ଯାଇ ସୁଭାଷ ଚନ୍ଦ୍ର ବୋଷଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିବା ସହ ସଂଗ୍ରହାଳୟ ବୁଲି ଦେଖିଥିଲେ ।